ʻAʻeva mo e ʻOtuá ʻi he Ngaahi Taimi Taʻemanonga ko ʻEní

“Nae aeva a Inoke moe Otua. Bea nae ikai ia; he nae ave ia e he Otua.”—SENESI 5:​24, PM.

1. Ko e hā ʻa e niʻihi ʻo e ngaahi tafaʻaki ʻo hotau taimí ʻokú ne ʻai ia ke fakatuʻutāmakí?

 NGAAHI taimi taʻemanonga! ʻOku fakamatalaʻi lelei ʻe he ngaahi foʻi lea ko iá ʻa e ngaahi taʻu ʻo e maveuveu mo e fakamālohi kuo moʻui mai ai ʻa e faʻahinga ʻo e tangatá talu mei hono fokotuʻu ʻo e Puleʻanga Faka-Mīsaiá ʻi he 1914. ʻI he lolotonga ʻo e taimi kotoa ko iá, kuo ʻi he “kuonga fakamui” ai ʻa e faʻahinga ʻo e tangatá. Ko e ngaahi fakatamaki hangē ko e ngaahi honge, ngaahi mahaki, ngaahi mofuike mo e ngaahi taú kuó ne fakahohaʻasi kinautolu ʻi ha tuʻunga taʻehanotatau. (2 Timote 3:1; Fakahā 6:​1-8) Kuo ʻikai hao mei ai ʻa e faʻahinga ʻoku lotu kia Sihová. ʻI ha faʻahinga tuʻunga, kuo pau ai kiate kitautolu kotoa ke tau fekuki mo e ngaahi faingataʻa mo e ngaahi tuʻunga taʻepau ʻo e taimi ʻoku tau ʻi aí. Ko e ngaahi faingataʻa fakaʻekonōmiká, ngaahi maveuveu fakapolitikalé, faihiá mo e mahamahakí ʻoku nau ʻi he lotolotonga ʻo e ngaahi meʻa ʻokú ne ʻai ʻa e moʻuí ke mātuʻaki faingataʻá.

 2. Ko e hā ʻa e ngaahi pole kuo fehangahangai mo e kau sevāniti ʻa Sihová?

² Tānaki atu ki ai, kuo kātekina ʻe he tokolahi ʻo e kau sevāniti ʻa Sihová ʻa e ngaahi fakatanga lahi ʻaupito ʻi he kei hokohoko faitau ʻa Sētane ki he faʻahinga “ʻoku [nau] tauhi ʻa e ngaahi tuʻutuʻuni ʻa e ʻOtua, mo nau puke maʻu ʻenau fakamoʻoni kia Sisu.” (Fakahā 12:17) Pea neongo kuo ʻikai ke tau faingataʻaʻia kotoa ʻi ha fakatanga fakahangatonu, kuo fāinga ʻa e kotoa ʻo e kau Kalisitiane moʻoní mo Sētane ko e Tēvoló pea mo e laumālie ʻokú ne fakatupunga ʻi he lotolotonga ʻo e faʻahinga ʻo e tangatá. (Efeso 2:2; 6:12) ʻOku fiemaʻu ʻa e faʻa vakavakai maʻu pē ke ʻoua ʻe hoko ʻo tākiekina ʻe he laumālie ko iá, koeʻuhi ʻoku tau fetaulaki mo ia ʻi he ngāueʻangá, ʻi he akoʻangá, pea ʻi ha feituʻu kehe pē ʻa ia kuo pau ke tau feohi ai mo e faʻahinga ʻoku ʻikai te nau mahuʻingaʻia ʻi he lotu maʻá.

ʻAʻeva mo e ʻOtuá, ʻIkai mo e Ngaahi Puleʻangá

3, 4. ʻI he founga fē ʻoku kehe ai ʻa e kau Kalisitiané mei he māmaní?

³ ʻI he ʻuluaki senitulí, naʻe talitekeʻi mālohi pehē ai ʻe he kau Kalisitiané ʻa e laumālie ʻo e māmani ko ʻení, pea naʻe ʻai ai kinautolu ʻo nau mātuʻaki kehe mei he faʻahinga ʻi tuʻa mei he  fakatahaʻanga Kalisitiané. Naʻe fakamatalaʻi ʻe Paula ʻa e faikehekehé ʻi heʻene tohi: “Ko ia, ko e meʻa ʻoku ou tala mo fakapapau atu ʻi he ʻEiki, ʻa ʻeni, Ke ʻoua te mou kei laka ʻo hange ko e fai ʻa Senitaile [pe ngaahi puleʻangá]; ʻa ia ʻoku nau fou ʻi he muna ʻa honau loto, kuo fakapoʻuli honau ʻatamai, kuo nau motu mei he moʻui ʻa e ʻOtua, ko e meʻa ʻi he vale ʻoku nofoʻia kinautolu, ko e meʻa ʻi he fakafefeka honau loto: ʻa ia ko e faʻahinga ʻoku ongonoa, pea nau liʻoa kinautolu ki he pauʻu, ke fai ʻa e angaʻuli kotoa pe ʻi he havala.”—Efeso 4:​17-19.

⁴ He maeʻeeʻa lelei ē ko hono fakamatalaʻi ʻe he ngaahi lea ko iá ʻa e fakapoʻuli lōlō fakalaumālie mo fakaeʻulungāanga ʻo e māmani ko ʻení—fakatouʻosi ʻi he ʻaho ʻo Paulá pea ʻi hotau ʻahó! Hangē ko ia ʻi he ʻuluaki senitulí, ko e kau Kalisitiane ʻi he ʻaho ní ʻoku ʻikai te nau ‘laka ʻo hange ko e fai ʻa Senitailé.’ Ka, ʻoku nau maʻu ʻa e monū fakaofo ko e ʻaʻeva mo e ʻOtuá. Ko e moʻoni, ʻoku fehuʻia nai ʻe he niʻihi pe ʻoku ʻuhinga lelei ke pehē ʻoku ʻaʻeva ʻa e faʻahinga māʻulalo mo taʻehaohaoa ʻo e tangatá mo Sihova. Kae kehe, ʻoku fakahaaʻi ʻe he Tohi Tapú ʻoku nau malava. ʻIkai ngata aí, ʻoku ʻamanekina mai ʻe Sihova kinautolu ke nau fai pehē. ʻI he senituli hono valu ki muʻa ʻi hotau Kuongá, naʻe tohi ai ʻe he palōfita ko Maiká ʻa e ngaahi lea fakamānavaʻí ni: “Koeha oku amanaki e Jihova iate koe, ka koeuhi ke ke fai totonu mo ke loto ki he ofa, mo ke aeva mo ho Otua i he agavaivai?”—Fakaʻītali ʻamautolu, Maika 6:​8, PM.

Anga-Fēfē pea ko e Hā e ʻUhinga ke ʻAʻeva Ai mo e ʻOtuá?

 5. ʻE malava fēfē ki ha tangata taʻehaohaoa ke ʻaʻeva mo e ʻOtuá?

⁵ ʻE lava fēfē ke tau ʻaʻeva mo e ʻOtua mālohi fakaʻaufuli mo taʻehāmaí? ʻOku hā mahino, ʻoku ʻikai ʻi he founga ʻoku tau ʻaʻeva ai mo e kaungā faʻahinga ʻo e tangatá. ʻI he Tohi Tapú ko e kupuʻi lea “ke aeva” ʻoku malava ke ʻuhinga iá “ke muimui ʻi ha ʻalunga ʻo e ngāue pau.” a ʻI he fakakaukau atu ki he meʻá ni, ʻoku tau mahinoʻi ai ko e tokotaha ʻoku ʻaʻeva mo e ʻOtuá ʻokú ne muimui ʻi ha ʻalunga moʻui ʻoku fakahaaʻi mai ʻe he ʻOtuá pea ʻoku fakahōifua kiate iá. Ko e tuli ki ha ʻalunga peheé ʻokú ne ʻai kitautolu ke tau kehe mei he tokolahi taha ʻo e kakai takatakai ʻiate kitautolú. Ka, ko e fili totonu pē ia ʻe taha ki ha Kalisitiane. Ko e hā hono ʻuhingá? ʻOku lahi ʻa e ngaahi ʻuhingá.

6, 7. Ko e hā ko e ʻalunga lelei tahá ai ʻa e ʻaʻeva mo e ʻOtuá?

⁶ ʻUluakí, ko Sihova ʻa hotau Tokotaha-Fakatupú, ko e Matavai ʻo ʻetau moʻuí, pea ko e Tokotaha-Tokonaki ia ʻo e meʻa kotoa pē ʻoku tau fiemaʻu ke fakatolongaʻaki ʻa e moʻuí. (Fakahā 4:11) ʻI heʻene peheé, ko ia pē ʻokú ne maʻu ʻa e totonu ke ne tala mai kiate kitautolu ʻa e founga ke tau ʻaʻeva aí. Tānaki atu ki ai, ko e ʻaʻeva mo e ʻOtuá ʻa e ʻalunga ʻaonga lahi taha ʻoku ala lavá. Ki he faʻahinga ʻoku ʻaʻeva mo iá, kuo fai ʻe Sihova ha tokonaki ke fakamolemoleʻiʻaki ʻa e angahalá, pea ʻokú ne ʻomai ʻa e ʻamanaki papau ko e moʻui taʻengata. ʻOku toe tokonaki mai ʻe heʻetau Tamai fakahēvani anga-ʻofa fakaʻaufulí ʻa e akonaki fakapotopoto ʻoku tokoniʻi ai ʻa e faʻahinga ʻoku ʻaʻeva mo iá ke nau lavameʻa ʻi he moʻuí he taimí ni, neongo ʻenau taʻehaohaoá mo e nofo ʻi ha māmani ʻoku tokoto ʻi he mālohi ʻo Sētané. (Sione 3:16; 2 Timote 3:​15, 16; 1 Sione 1:8; 2:25; 5:19) Ko ha toe ʻuhinga ʻe taha ki he ʻaʻeva mo e ʻOtuá he ko ʻetau loto-lelei ke fai peheé ʻoku tokoni ia ki he melino mo e fāʻūtaha ʻa e fakatahaʻangá.—Kolose 3:​15, 16.

⁷ Fakaʻosí, pea ko e mahuʻinga tahá ia, ʻi he taimi ʻoku tau ʻaʻeva ai mo e ʻOtuá, ʻoku tau fakahāhā ai ʻa e feituʻu ʻoku tau tuʻu aí ʻi he ʻīsiu lahi ko ia naʻe langaʻi hake ʻi he ngoue ko ʻĪtení—ʻa e ʻīsiu fekauʻaki mo e tuʻunga-haú. (Senesi 3:​1-6) ʻOku tau fakahāhaaʻiʻaki ʻetau founga moʻuí ʻoku tau tuʻu kakato ʻi he tafaʻaki ʻa Sihová, pea ʻoku tau talaki taʻemanavahē ko ia toko taha pē ʻa e Hau totonú. (Sāme 83:18) ʻOku tau ngāue ai ʻo fehoanaki mo ʻetau lotu ke fakatāpuhaaʻi ʻa e huafa ʻo e ʻOtuá pea ke fai hono finangaló. (Mātiu 6:​9, 10) He fakapotopoto lahi ē ka ko e faʻahinga ʻoku nau fili ke ʻaʻeva mo e ʻOtuá! ʻOku malava ke nau fakapapauʻi ʻoku nau ʻalu ʻi he hala totonú, koeʻuhi ko Sihova “ʻoku aʻana toko taha ʻa e poto.” ʻOku ʻikai ʻaupito te ne fai ha fehālaaki.—Loma 16:27.

 8. Naʻe anga-fēfē ʻa e meimei tatau ʻa e taimi ʻo ʻĪnoke mo Noá mo hotau taimí?

⁸ Kae kehe, ʻe malava fēfē ke moʻui ʻi he tuʻunga ʻoku totonu ki he kau Kalisitiané lolotonga iá ʻoku mātuʻaki taʻemanonga ʻa e taimi ʻoku tau ʻi aí pea  ko e tokolahi taha ʻo e kakaí ʻoku ʻikai te nau mahuʻingaʻia ʻi he tauhi kia Sihová? Te tau maʻu ʻa e talí ʻi heʻetau fakakaukau atu ki he kau tangata faitōnunga ʻo e kuonga muʻá ʻa ia naʻa nau tauhi ʻenau anga-tonú he lolotonga ʻo e ngaahi taimi mātuʻaki faingataʻá. Ko e toko ua ʻo e faʻahingá ni ko ʻĪnoke mo Noa. Ko kinaua fakatouʻosi naʻá na moʻui ʻi he ngaahi taimi meimei tatau ʻaupito mo hotau taimí. Naʻe mafolalahia ʻa e fulikivanú. Naʻe fonu ʻa e māmani ʻi he ʻaho ʻo Noá ʻi he fakamālohí mo e ʻulungāanga taʻetāú. Neongo ia, naʻe talitekeʻi ʻe ʻĪnoke mo Noa ʻa e laumālie ʻo e māmani ʻo hona taimí peá na ʻaʻeva mo Sihova. Naʻe anga-fēfē ʻa e malava ke na fai peheé? Ke tali ʻa e fehuʻi ko iá, te tau lāulea ʻi he kupu ko ʻení ki he faʻifaʻitakiʻanga ʻa ʻĪnoké. ʻI he kupu hoko maí, te tau lāulea ai kia Noa.

Naʻe ʻAʻeva ʻa ʻĪnoke mo e ʻOtuá ʻi he Ngaahi Taimi Taʻemanonga

 9. Ko e hā ʻa e fakamatala ʻoku tau maʻu fekauʻaki mo ʻĪnoké?

⁹ Ko ʻĪnoke ʻa e fuofua tokotaha ʻoku fakamatalaʻi ʻi he Tohi Tapú naʻe ʻaʻeva mo e ʻOtuá. ʻOku pehē ʻe he lēkooti ʻa e Tohi Tapú: “Hili ae fanauʻi kiate ia a Metusela nae eveeva a Inoke moe Otua.” (Senesi 5:​22, PM) Pea ʻi he hili hono fakamatalaʻi ʻa e lōloa ʻo e moʻui ʻa ʻĪnoké—ʻa ia, neongo naʻe lōloa ʻi hono fakahoa ki he lōloa ʻo ʻetau moʻuí, naʻe nounou ia ki he ngaahi ʻaho ko iá—ʻoku pehē ʻe he lēkōtí: “Nae aeva a Inoke moe Otua: bea nae ikai ia; he nae ave ia e he Otua.” (Senesi 5:​24, PM) ʻOku hā mahino, naʻe ʻave ʻe Sihova ʻa ʻĪnoke mei he fonua ʻo e moʻuí ki he mohe ʻi he maté ki muʻa ke ala kiate ia ʻa e kau fakafepakí. (Hepelu 11:​5, 13) Tuku kehe ʻa e ngaahi veesi nounou ko iá, ʻoku ʻi ai ʻa e lave siʻisiʻi kia ʻĪnoke ʻi he Tohi Tapú. Ka neongo ia, mei he fakamatala kuo tau maʻú pea mei he ngaahi fakamatala kehé, ʻoku tau maʻu ai ʻa e ʻuhinga lelei ke pehē naʻe taʻemanonga ʻa e taimi ʻo ʻĪnoké.

10, 11. (a) Naʻe anga-fēfē ʻa e mafola ʻa e koví ʻi he hili ʻa e angatuʻu ʻa ʻĀtama mo ʻIví? (e) Ko e hā ʻa e pōpoaki fakaekikite naʻe malangaʻi ʻe ʻĪnoké, pea ko e hā ʻa e tali naʻá ne fetaulaki moʻoni mo iá?

¹⁰ Ko e fakatātaá, fakakaukau atu ki he mafola vave ʻaupito ʻa e koví ʻi he matakali ʻo e tangatá ʻi he hili ʻa e faiangahala ʻa ʻĀtamá. ʻOku tala mai ʻe he Tohi Tapú ko e foha ʻuluaki ʻo ʻĀtama ne fanauʻí, ʻa Keini, naʻá ne hoko ko e fuofua tokotaha fakapō ia ʻi he faʻahinga ʻo e tangatá ʻi heʻene tāmateʻi hono tokoua ko ʻĒpelí. (Senesi 4:​8-10) ʻI he hili ʻa e mate fakamamahi ʻa ʻĒpelí, naʻe fanauʻi mai ʻe ʻĀtama mo ʻIvi ha toe foha ʻe taha, pea naʻá na fakahingoa ia ko Seti. ʻOku tau lau fekauʻaki mo ia: “Nae fanauʻi foki ha foha kia Seti; bea nae ui hono higoa ko Inosi: bea nae kamata ui ae kakai ki he huafa o Jihova.” (Senesi 4:​25, 26, PM) Ko hono pangó, ko e ‘ui ki he huafa o Jihová’ naʻe fai ʻi ha founga ʻo e tafoki mei he  moʻoní. b ʻI he ngaahi taʻu lahi hili hono fanauʻi ʻo ʻĪnosí, naʻe faʻu ai ʻe ha hako ʻo Keini ko hono hingoá ko Lēmeki ha foʻi hiva ki hono ongo uaifí ʻo talaki ai naʻá ne tāmateʻi ha kiʻi tangata ʻa ia naʻá ne fakalaveaʻi ia. Naʻá ne toe fakatokanga: “He liunga fitu ʻa e sauni ʻo Keini, kae liunga fitungofulu ma fitu ʻa Lemeki.”—Senesi 4:​10, 19, 23, 24.

¹¹ Ko e ngaahi moʻoniʻi meʻa nounou peheé hangē ko ia naʻe lave ki ai ki muʻá ʻoku fakahaaʻi mai ai ko e kovi ko ia naʻe kamataʻi ʻe Sētane ʻi he ngoue ko ʻĪtení naʻe iku vave ia ki he mafola ʻa e fulikivanú ʻi he lotolotonga ʻo e fānau ʻa ʻĀtamá. ʻI ha māmani pehē, naʻe hoko ai ʻa ʻĪnoke ko ha palōfita ʻa Sihova ʻa ia ko ʻene ngaahi lea fakamānavaʻi mālohí ē ʻoku toe kaungatonu ia ki he ʻaho ní. ʻOku līpooti ʻe Siutasi naʻe kikite ʻa ʻĪnoke: “Vakai! ne hoko mai ʻa e ʻEiki ʻoku haʻofia ia ʻe hono ngaahi toko mano tapu, ke fai fakamāu ki he kakai kotoa pe, pea ke fakamoʻoni ki he kau fakaʻotuamate kotoa pe ʻenau ngaahi ngaue fakaʻotuamate kotoa pe, ʻa ia kuo nau fai ʻilo pe, pea mo e ngaahi lea fefeka kuo fai kiate ia ʻe he kau angahala fakaʻotuamate.” (Siutasi 14, 15) ʻE fakahoko fakaʻosi ʻa e ngaahi lea ko iá ʻi ʻĀmaketone. (Fakahā 16:​14, 16) Kae kehe, ʻoku malava ke tau fakapapauʻi naʻa mo e ʻi he ʻaho ʻo ʻĪnoké, naʻe tokolahi ʻa e “kau angahala fakaʻotuamate” naʻa nau fanongo ki he kikite ʻa ʻĪnoké fakataha mo e ongoʻi ʻita. He anga-ʻofa lahi ē ko hono ʻave ʻe Sihova ʻa e palōfitá ke ʻoua te nau ala ki aí!

Ko e Hā Naʻá Ne Fakaivimālohiʻi ʻa ʻĪnoke ke ʻAʻeva mo e ʻOtuá?

12. Ko e hā naʻá ne ʻai ʻa ʻĪnoke ke kehe mei hono toʻutangatá?

¹² ʻI he ngoue ko ʻĪtení, naʻe fanongo ai ʻa ʻĀtama mo ʻIvi kia Sētane, pea angatuʻu ai ʻa ʻĀtama kia Sihova. (Senesi 3:​1-6) Naʻe fou hona foha ko ʻĒpelí ʻi ha ʻalunga kehe, pea naʻe hāngaifofonga ki ai ʻa Sihova. (Senesi 4:​3, 4) Ko e meʻa fakamamahí, ko e tokolahi ʻo e fānau ʻa ʻĀtamá naʻe ʻikai ke nau hangē ko ʻĒpelí. Kae kehe, naʻe pehē ʻa ʻĪnoke, ʻa ia naʻe fāʻeleʻi ʻi he laui teau taʻu ki mui ai. Ko e hā ʻa e faikehekehe naʻe ʻi he vahaʻa ʻo ʻĪnoke mo e ngaahi hako kehe tokolahi fau ʻo ʻĀtamá? Naʻe tali ʻe he ʻapositolo ko Paulá ʻa e fehuʻi ko iá ʻi heʻene tohi: “Ko tui naʻe hiki ai ʻa Inoke, ke ʻoua te ne mamata ki he mate; pea naʻe ʻikai ʻiloa, koeʻuhi kuo hiki ia ʻe he ʻOtua: he ʻi he teʻeki ke hiki ia ne fakamoʻoni maʻana, kuo ne fakahōifua ʻa e ʻOtua.” (Hepelu 11:5) Ko ʻĪnoké ko ha konga ia ʻo ha fuʻu “ʻao kau fakamoʻoni [ki muʻa he Kalisitiané],” ʻa ia ko e ngaahi faʻifaʻitakiʻanga fisifisimuʻa ʻo e tuí. (Hepelu 12:1) Ko e tuí naʻá ne fakamafeia ʻa ʻĪnoke ke ne kātaki ʻi he ʻulungāanga totonú ʻi he kotoa ʻo ha moʻui laka hake he taʻu ʻe 300—laka hake ia ʻi he liunga tolu ʻo e lōloa ʻo e moʻui ʻa e tokolahi taha ʻo kitautolu ʻi he ʻaho ní!

13. Ko e hā ʻa e faʻahinga tui naʻe maʻu ʻe ʻĪnoké?

¹³ Naʻe fakamatalaʻi ʻe Paula ʻa e tui ʻa ʻĪnoké pea mo e kau fakamoʻoni kehe ʻi heʻene tohi: “Ko e tuí ko e fakatuʻotuʻa ʻosi fakapapauʻi ki he ngaahi meʻa ʻoku ʻamanekiná, ko e fakahāhā mahino ʻo e ngaahi meʻa moʻoní neongo ʻoku ʻikai sio ki ai.” (Hepelu 11:​1, NW) ʻIo, ko e tuí ko e fakatuʻotuʻa papau, makatuʻunga ʻi he fakapapauʻi, ko e ngaahi meʻa ʻoku tau ʻamanaki ki aí ʻe hoko moʻoni. ʻOku kau ki ai ha fakatuʻotuʻa mātuʻaki mālohi ʻoku kaunga ki he meʻa ʻoku tau tokangataha ki ai ʻi heʻetau moʻuí. Ko e faʻahinga tui pehē naʻá ne fakamafeia ʻa ʻĪnoke ke ʻaʻeva mo e ʻOtuá neongo naʻe ʻikai pehē ʻa e māmani ia naʻe takatakai kiate iá.

14. Ko e hā ʻa e ʻilo totonu naʻe makatuʻunga nai ai ʻa e tui ʻa ʻĪnoké?

¹⁴ ʻOku makatuʻunga ʻa e tui moʻoní ʻi he ʻilo totonu. Ko e hā ʻa e ʻilo naʻe maʻu ʻe ʻĪnoké? (Loma 10:​14, 17; 1 Timote 2:4) ʻOku ʻikai ha veiveiua, naʻá ne ʻilo fekauʻaki mo e ngaahi meʻa naʻe hoko ʻi ʻĪtení. Mahalo pē, naʻá ne toe fanongo fekauʻaki mo e faʻahinga moʻui naʻe ʻi he ngoue ʻi ʻĪtení—ʻa  ia naʻe kei ʻi ai nai, neongo naʻe tapui mei ai ʻa e faʻahinga ʻo e tangatá. (Senesi 3:​23, 24) Pea naʻá ne ʻilo ki he taumuʻa ʻa e ʻOtuá ke fakafonu ʻe he fānau ʻa ʻĀtamá ʻa e māmaní pea ʻai ʻa e foʻi palanité kotoa ke hangē ko e muʻaki Palataisi ko iá. (Senesi 1:28) Tānaki atu ki ai, kuo pau pē naʻe koloaʻaki ʻe ʻĪnoke ʻa e talaʻofa ʻa Sihova ke fakatupu mai ha Hako ʻa ia te ne laiki ʻa e ʻulu ʻo Sētané pea toʻo atu ʻa e ngaahi nunuʻa kovi ʻo e kākā ʻa Sētané. (Senesi 3:15) Ko e moʻoni, ko e kikite fakamānavaʻi ʻa ʻĪnoké tonu, naʻe fakatolonga mai ʻi he tohi ʻa Siutasí, ʻoku fekauʻaki ia mo hono fakaʻauha ʻo e hako ʻo Sētané. Koeʻuhi naʻe maʻu ʻe ʻĪnoke ʻa e tuí, ʻoku tau ʻilo ai naʻá ne lotu kia Sihova ko e tokotaha “te ne hanga ʻo totongi kiate kinautolu ʻoku kumi hākili kiate ia.” (Hepelu 11:6) Ko ia ai, neongo naʻe ʻikai ke maʻu ʻe ʻĪnoke ʻa e ʻilo kotoa ʻoku tau maʻú, naʻá ne maʻu ʻa e ʻilo feʻunga ke fokotuʻu ai ʻa e makatuʻunga ʻo ha tui mālohi. ʻAki ʻa e tui peheé, naʻá ne tauhi ai ʻene anga-tonú he lolotonga ʻa e ngaahi taimi taʻemanongá.

Faʻifaʻitaki ki he Faʻifaʻitakiʻanga ʻa ʻĪnoké

15, 16. ʻE lava fēfē ke tau muimui ʻi he ʻalunga ʻo ʻĪnoké?

¹⁵ Koeʻuhi, hangē ko ʻĪnoké, ʻoku tau loto ke fakahōifuaʻi ʻa Sihova ʻi he lolotonga ʻo e ngaahi taimi taʻemanonga ko ia ʻoku ʻi ai ʻi he ʻaho ní, ʻoku totonu ke tau muimui ki he faʻifaʻitakiʻanga ʻa ʻĪnoké. ʻOku fiemaʻu ke tau maʻu pea tauhi maʻu ʻa e ʻilo totonu kia Sihova mo ʻene taumuʻá. Ka ʻoku tau fiemaʻu ʻa e meʻa lahi ange ai. ʻOku fiemaʻu ke tau fakaʻatā ʻa e ʻilo totonu ko iá ke ne tataki hotau ʻalungá. (Sāme 119:101; 2 Pita 1:19) ʻOku fiemaʻu ke tataki kitautolu ʻe he fakakaukau ʻa e ʻOtuá, ʻo tau feinga maʻu pē ke fakahōifuaʻi ia ʻaki ʻetau fakakaukaú mo e ngāue kotoa pē.

¹⁶ ʻOku ʻikai ke tau maʻu ha lēkooti ʻo ha toe taha kehe ʻi he taimi ʻo ʻĪnoké naʻá ne tauhi kia Sihova, ka ʻoku hā mahino naʻá ne toko taha pē pe ko ha taha ia ʻo ha faʻahinga tokosiʻi. Ko kitautolu foki ʻoku tau tokosiʻi ʻi he māmaní, ka ʻoku ʻikai te tau loto-siʻi ai. ʻE poupouʻi kitautolu ʻe Sihova tatau ai pē pe ko hai nai ʻe fakafepaki mai kiate kitautolú. (Loma 8:31) Naʻe fakatokanga loto-toʻa ʻa ʻĪnoke ʻo fekauʻaki mo e fakaʻauha naʻe tuʻunuku mai ki he kau tangata anga-taʻefakaʻotuá. Ko kitautolu foki ʻoku tau loto-toʻa ʻi heʻetau malangaʻi “ʻa e ongoongolelei ko eni ʻo e puleʻanga” neongo ʻa e manukí, fakafepakí mo e fakatangá. (Mātiu 24:14) Naʻe ʻikai ke moʻui ʻa ʻĪnoke ia ʻo fuoloa tatau mo e tokolahi ʻo hono toʻutangatá. Neongo ia, naʻe ʻikai ke ʻi he māmani ko iá ʻene ʻamanakí. Naʻe fakahangataha hono matá ʻoʻona ki he meʻa naʻe mātuʻaki maʻongoʻonga ange. (Hepelu 11:​10, 35) Ko kitautolu foki ʻoku tau fakahangataha hotau matá ki he fakahoko ʻo e taumuʻa ʻa Sihová. Ko ia ai, ʻoku ʻikai ke tau ngāueʻaki ʻa e māmani ko ʻení ko ha meʻa ke ʻosiki. (1 Kolinito 7:31) ʻI hono kehé, ʻoku tau ngāueʻaki hotau mālohí mo ʻetau koloá ʻo tautefito pē ki he ngāue ʻa Sihová.

17. Ko e hā ʻa e ʻilo ʻoku tau maʻu naʻe ʻikai ke maʻu ʻe ʻĪnoké, ko ia ko e hā ʻoku totonu ke tau faí?

¹⁷ Naʻe tui ʻa ʻĪnoke ko e Hako ko ia naʻe talaʻofa ʻe he ʻOtuá ʻe hā ia ʻi he taimi kotofa ʻa Sihová. Kuo meimei taʻu ʻeni ʻe 2,000 talu mei he hā ʻa e Hako ko iá—ʻa Sīsū Kalaisi, ʻo tokonaki ʻa e huhuʻí, pea fakaava ʻa e matapā kiate kitautolu, pea pehē ki he kau fakamoʻoni faitōnunga pehē ʻo e kuonga muʻá, hangē ko ʻĪnoké, ke maʻu ʻa e moʻui taʻengatá. Ko e Hako ko iá, ʻa ē ʻokú ne ʻafio he taimí ni ko e Tuʻi ʻo e Puleʻanga ʻo e ʻOtuá, kuó ne lī hifo ʻa Sētane mei hēvani ki he māmani ko ʻení, pea ʻoku tau sio takai holo ʻiate kitautolu ki he mamahi ʻoku tupu mei aí. (Fakahā 12:12) ʻIo, ʻoku ʻi ai ʻa e ʻilo ʻoku malava ke tau maʻu ʻoku mātuʻaki lahi ange ia ʻi he ʻilo naʻe malava ke maʻu ʻe ʻĪnoké. Ko ia, ʻofa ke tau maʻu ʻa e tui mālohi hangē ko ia naʻá ne maʻú. ʻOfa ke hanga ʻe heʻetau falala ki he fakahoko ʻo e ngaahi talaʻofa ʻa e ʻOtuá ʻo tākiekina ʻa e meʻa kotoa pē ʻoku tau faí. ʻOfa ke tau hangē ko ʻĪnoké, ʻo ʻaʻeva mo e ʻOtuá, neongo ʻoku tau moʻui ʻi he ngaahi taimi taʻemanonga.

[Fakamatala ʻi lalo]

ʻE Anga-Fēfē Haʻo Tali?

• Ko e hā ʻoku ʻuhinga ki ai ʻa e ʻaʻeva mo e ʻOtuá?

• Ko e hā ko e ʻalunga lelei tahá ai ʻa e ʻaʻeva mo e ʻOtuá?

• Ko e hā naʻá ne fakamafeia ʻa ʻĪnoke ke ne ʻaʻeva mo e ʻOtuá neongo ʻa e ngaahi taimi taʻemanongá?

• ʻE lava fēfē ke tau faʻifaʻitaki kia ʻĪnoke?

[Fehuʻi ki he Ako]

[Fakatātā ʻi he peesi 15]

ʻAki ʻa e tuí, “nae aeva a Inoke moe Otua”

[Fakatātā ʻi he peesi 17]

ʻOku tau tui mālohi ʻe hoko moʻoni ʻa e ngaahi talaʻofa ʻa Sihová

[Fakamatala ʻo e tā ʻi he peesi 13]

Fefine, taupotu ki toʻomataʻú: FAO photo/B. Imevbore; fale ʻoku holó: San Hong R-C Picture Company