Ngaahi Fehuʻi mei he Kau Lautohí

ʻI ʻIsileli ʻo e kuonga muʻá, ko e hā naʻe ʻuhinga ki ai ʻa e maama fakaemana naʻe ui he taimi ʻe niʻihi ko e Sikainá ʻa ia naʻe hā ʻi he Potu Toputapu ʻo e tāpanekalé pea mo e temipalé?

Ko Sihova, ʻa e Tamai ʻofa mo e Maluʻi ʻo hono kakaí, naʻá ne ʻai ʻo eʻa makehe ʻa ʻene ʻi aí ʻi ʻIsileli. Ko e founga ʻe taha naʻá ne fakahoko ai iá naʻe fakafou ia ʻi ha konga ʻao ulo ʻa ia naʻe felāveʻi vāofi mo hono feituʻu faiʻanga lotú.

Ko e maama mataʻāʻā ko iá naʻá ne fakafofongaʻi ʻa e ʻi ai taʻehāmai ʻa Sihová. Naʻe hā ia ʻi he Potu Toputapú fakatouʻosi ʻi he tāpanekalé pea mo e temipale naʻe langa ʻe Solomoné. Ko e maama fakaemana ko iá naʻe ʻikai ʻuhinga iá naʻe ʻi ai fakaesino ʻa Sihova. Ko e ʻOtuá ʻe ʻikai lava ke hao ia ʻi ha faʻahinga fale pē ʻoku ngaohi ʻe he tangatá. (2 Kalonikali 6:18; Ngāue 17:24) Ko e maama kakaha mahulu hake ʻi natula ko eni ʻi he potu toputapu ʻo e ʻOtuá naʻe lava ke ʻoange ai ki he taulaʻeiki lahí ʻa e loto-maʻu pea fakafou atu ʻiate ia ki he kau ʻIsilelí kotoa ko e ʻi ai fakaemaluʻi ʻa Sihová naʻe tokangaʻi ai kinautolu mo ʻenau ngaahi fiemaʻú.

ʻI he lea faka-Alamea ki mui mai he Tohi Tapú, naʻe ui ai ʻa e maama ko ení ko e Sikaina (shekhi·nahʹ), ko ha foʻi lea ko hono ʻuhingá ko e “ko ia ʻoku nofo” pe “ko e nofoʻanga.” Ko e foʻi leá ni ʻoku ʻikai ke ʻasi ia ʻi he Tohi Tapú ka ʻoku maʻu ia ʻi he ngaahi liliu faka-Alamea ʻo e Ngaahi Konga Tohi Tapu Faka-Hepeluú, ʻa ia ʻoku toe ʻiloa ko e Tākumú.

ʻI hono fai ʻa e ngaahi fakahinohino ki hono langa ʻo e tāpanekalé, naʻe folofola ai ʻa Sihova kia Mōsese: “Te ke hilifaki ʻa e hoifuaʻanga ki he aake; pea te ke tuku ki he aake ʻa e fakamoʻoni te u ʻatu kiate koe. Ko e potu ia te u fetaulaki ai mo koe, pea te u alea ai mo koe ʻi he funga hoifuaʻanga, mei he vahaʻa ʻo e ongo selupimi ʻa ia ʻoku ʻi he funga ʻo e aake.” (Ekisoto 25:​21, 22) Ko e ʻAʻake naʻe lave ki aí ko ha puha ʻufiʻufi koula ia ʻi he Potu Toputapú. Naʻe ʻi ai ʻa e ongo selupimi koula ʻe ua ʻi he tāpuni ʻo e ʻAʻaké.

Naʻe folofola ʻa Sihova mei fē? Naʻá ne ʻomai ʻa e talí ʻi heʻene folofola kia Mōsesé: “Te u hā au ʻi he ʻao ʻi he funga Hoifuaʻanga.” (Livitiko 16:2) Naʻe nofo ʻi ʻolunga ʻa e konga ʻaó ni ʻi he ʻAʻake toputapú ʻi he vahaʻa ʻo e ongo selupimi koulá. ʻOku ʻikai ke fakahaaʻi ʻe he Tohi Tapú pe ko e hā hono māʻolunga ʻo e konga ʻao ko iá, pe ko e hā hono mamaʻo naʻe mafola atu ki ai ʻi ʻolunga ʻi he ongo selupimí.

Ko e konga ʻao fakamaama ko ení naʻe lava ke maama ai ʻa e Potu Toputapú. Ko hono moʻoní, ko e maʻuʻanga fakamaama pē ia ʻe taha ʻi he loki ko iá. Naʻe maʻu ʻaonga ʻa e taulaʻeiki lahí mei he maama ko iá ʻi he taimi naʻá ne hū ai ki he loki taupotu ki lotó ʻi he ʻAho Fakaleleí. Naʻá ne tuʻu ai ʻi he ʻao ʻo Sihová.

ʻOku ʻi ai ha faʻahinga ʻuhinga ʻo e maama fakaemana ko ení ki he kau Kalisitiané? Naʻe mamata ʻa e ʻapositolo ko Sioné ʻi he vīsoné ki ha kolo ʻa ia “ʻoku ʻikai ha po.” Ko e koló ko Selusalema Foʻou, naʻe faʻuʻaki ia ʻa e kau Kalisitiane pani kuo nau toetuʻu ke pule fakataha mo Sīsuú. Ko e maama ʻo e kolo fakaefakatātā ko ení ʻoku ʻikai mei he laʻaá ia pe ko e māhiná. Ko e lāngilangi ʻo Sihova ko e ʻOtuá ʻokú ne fakamaama fakahangatonu ʻa e kautaha ko ení, ʻo hangē tofu pē ko hono fakamaama ʻe he konga ʻao Sikainá ʻa e Potu Toputapú. Pehē foki, ko e Lamí, ʻa Sīsū Kalaisi, ko e “maama” ia ʻo e koló. ʻI he tafaʻaki ʻe tahá, ko e “kolo” ko ení ʻokú ne hulu hifo ʻene maama fakalaumālié mo ʻene hōifuá ki he kakai kuo huhuʻi mei he puleʻanga kotoa pē ki hono tataki kinautolú.—Fakahā 21:​22-25.

Koeʻuhi ko ʻenau maʻu ʻa e ngaahi tāpuaki lahi fau pehē mei ʻolungá, ko e kau lotu ʻa Sihová ʻe lava ke nau fakapapauʻi ko Sihova ʻa honau Tauhi fakaemaluʻí mo e Tamai ʻofá.