Ngaahi Fehuʻi mei he Kau Lautohí

ʻOku totonu ki ha Kalisitiane ke ne ʻoange ki ha tokotaha ngāue fakapuleʻanga ha tipi pe ko ha meʻaʻofa ki heʻene ngaahi ngāué, pe ʻe vakai ia ki ai ko ha totongi-fufū?

Ko fē pē ha feituʻu ʻoku nau nofo ai, ʻoku feinga ʻa e kau Kalisitiané ke ngāueʻaki ʻa e poto ʻaongá ʻi he feangainga mo e ngaahi tuʻunga fakalotofonuá, ʻi hono manatuʻi ko e meʻa ʻoku ala tali mo fakalao ʻi he fonua ʻe tahá ʻoku mātuʻaki ʻikai ala tali mo taʻefakalao nai ia ʻi he fonua ʻe tahá. (Palovepi 2:​6-9) Ko hono moʻoní, ʻoku totonu ki ha Kalisitiane ke ne manatuʻi maʻu pē ko ha taha pē ʻokú ne loto ke hoko ko ha “ʻāunofo ʻi he teniti [ʻo Sihová]” kuo pau ke ne fakamamaʻo mei he totongi-fufuú.—Sāme 15:​1, 5; Palovepi 17:23.

Ko e hā ʻa e totongi-fufuú? Fakatatau ki he World Book Encyclopedia, “ʻoku ʻuhinga ʻa e totongi-fufuú ko e foaki pe ʻave ha meʻa mahuʻinga ki ha . . . taha ʻoku ʻi ha tuʻunga fakapuleʻanga, ʻa ia ʻi he tafaʻaki ʻe tahá ʻokú ne maumauʻi ʻa hono fatongiá pe ko e laó koeʻuhi ke maʻu ʻaonga ai ʻa e tokotaha-foakí.” Ko ia, tatau ai pē pe ko fē ʻa e feituʻu ʻoku nofo ai ha taha, ko e totongi-fufū ia ke foaki ha paʻanga pe ko ha meʻaʻofa ki ha fakamaau pe ko ha ʻōfisa polisi ke pikoʻi ai ʻa e fakamaau totonú, pe ki ha ʻinisipēkita ke fakakuikui mei ha hala pe ko ha maumau-lao. Ko e toe totongi-fufū ia ke ngāueʻaki ha meʻaʻofa ke maʻu ai ha fakafeangai filifilimānako, hangē ko hono ʻai ke te muʻomuʻa ʻi ha lisi talitali pe ke te muʻomuʻa kita ʻi he faʻahinga kehe ʻoku tuʻu ʻi ha laine. ʻOku toe hanga ʻe ha ʻalunga pehē ʻo fakahaaʻi ʻa e ʻikai ha ʻofá.—Mātiu 7:12; 22:39.

Ka ko ha totongi-fufū ia ke foaki ha meʻaʻofa pe ko ha tipi, tau pehē, ki ha sevāniti ngāue fakapuleʻanga koeʻuhi ke maʻu ai ha ngāue fakalao pe ke fakaʻehiʻehi mei ha fakafeangai taʻetotonu? Ko e fakatātaá, ʻi he ngaahi fonua ʻe niʻihi ʻoku toumoua nai ai ʻa e kau ngāue fakapuleʻangá ke fakahū ʻa e fānaú ki he akó, fakatokoto ha taha ʻi ha falemahaki, pe ʻomai ha ngaahi fakamatala fakaʻimikuleisini kae ʻoua kuo nau maʻu ha tipi. Pe ʻoku nau tolotoloi nai hano fai ha ngāue ki ha ngaahi tohi kole ke fakafoʻou ʻa e ngaahi laisení mo e ngaahi ngofuá.

Ko e ngaahi tipí pea mo e fakakaukau fakalūkufua atu ki aí ʻoku kehekehe ia ʻi he feituʻu ki he feituʻu. Kapau ko e ngaahi totongi peheé ʻoku tōʻongaʻaki pe ʻoku ʻamanekina, ʻe ongoʻi nai ʻe he kau Kalisitiane ia ʻe niʻihi ʻi heʻene ʻi loto ʻi he laó, ʻoku ʻikai te nau maumauʻi ha ngaahi tefitoʻi moʻoni Fakatohitapu ʻi he taimi ʻoku nau tipiʻi ai ha ʻōfisa ke fakahoko hono fatongiá. ʻI he ngaahi fonua ʻe niʻihi ʻoku aʻu ʻo vakai nai ʻa e kakaí ia ki he ngaahi totongi peheé ko ha meʻaʻofa ia ke fakalahiʻaki ʻa e paʻanga hū mai siʻisiʻi ʻa e tokotaha ngāue fakapuleʻangá. Manatuʻi ʻoku ʻi ai ha faikehekehe ʻi hono foaki ha meʻaʻofa ki ha ngāue fakalaó pea mo hono ʻave ha totongi-fufū ki ha leleiʻia taʻefakalaó.

ʻI he tafaʻaki ʻe tahá, ʻi hono fai ha ngaahi kole fakalaó, kuo fakafisi ai ʻa e niʻihi ʻo e Kau Fakamoʻoni ʻa Sihová ke foaki ha ngaahi tipi ki he kau ʻinisipēkita, kau ngāue kasitomu, pe niʻihi kehe naʻa mo e feituʻu ʻoku tōʻongaʻaki ai ʻa e foaki-meʻaʻofa peheé. Koeʻuhi ʻoku ʻiloa fakalotofonua ʻa e Kau Fakamoʻoní fakatouʻosi ʻi he meʻa fakakonisēnisí ni pea ʻi heʻenau faitotonú, ʻoku nau maʻu ai ha fakafeangai ʻi he taimi ʻe niʻihi ʻa ia ʻoku toki maʻu pē ia ʻe he tokolahi taha ʻo e kakaí ʻi hono totongiʻí.—Palovepi 10:9; Mātiu 5:16.

ʻI hono fakanounoú, ko e sevāniti taki taha ʻa Sihova kuo pau ke ne fili maʻana tonu pe te ne foaki ha tipi ke maʻu mai ai ha ngāue fakalao pe ke fakaʻehiʻehi mei ha tōʻongafai taʻetotonu. Hiliō ai, ʻoku totonu ke ne tuli ki ha ʻalunga te ne kei maʻu ai ha konisēnisi leleí, ʻe ʻikai ʻomai ai ha luma ki he huafa ʻo Sihová, pea ʻe ʻikai fakatūkiaʻi ai ʻa e niʻihi kehé.—Mātiu 6:9; 1 Kolinito 10:​31-33; 2 Kolinito 6:3; 1 Timote 1:5.