Ikuna ʻa Samisoni ʻi he Mālohi ʻo Sihová!

ʻOKU hanga ʻe he faʻahinga sāuni ne nau puke iá ʻo kapeʻi hono ongo matá pea tuku atu ia ke ne ngāue pōpula. ʻOku nau ʻave leva ia mei he fale fakapōpulá ki ha temipale pangani ke ne fakafiefiaʻi ʻa e fuʻu kakaí. ʻOku nau ʻai ia ke ne laka ʻi he ʻao ʻo e fuʻu kau mamata ʻe laui afe pea fakakataʻaki ia. Ko e pōpulá ʻoku ʻikai ko ha faihia pe ko ha ʻeiki-tau ʻo ha kau tau ʻa e filí. Ko ha tokotaha lotu ia ʻa Sihova pea kuó ne ngāue ko ha fakamaau ki ʻIsileli ʻo feʻunga mo e taʻu ʻe 20.

Naʻe anga-fēfē ʻa e hoko ʻa Samisoni—ko e tangata mālohi taha fakaesino kuó ne moʻui maí—ʻo iku ki ha tuʻunga fakamā peheé? ʻE fakahaofi ia ʻe hono mālohi anga-kehé? Ko e hā ʻa e fakapulipuli ʻo e mālohinga ʻo Samisoní? Ko e hā, kapau ʻoku ʻi ai, ʻe lava ke tau ako mei he talanoa ki heʻene moʻuí?

Te Ne “Kamata ke Fakahaofi ʻa Isileli”

Naʻe hisitōlia ʻaki ʻe he fānau ʻIsilelí ʻa e tafoki mei he lotu moʻoní. Ko ia ʻi heʻenau “fai . . . ʻa e meʻa naʻe tau kovi ki he finangalo ʻo Sihova; pea tuku kinautolu ʻe Sihova ki he nima ʻo e kau Filisitia, ʻo fangofulu taʻu.”—Fakamaau 13:1.

Naʻe kamata ʻa e talanoa ʻo Samisoní ʻi he taimi naʻe hā ai ʻa e ʻāngelo ʻa Sihová ki he uaifi paʻa ʻo ha tangata ʻIsileli ko Mānoa ʻo fakahaaʻi ange te ne fanauʻi ha foha. “ʻE ʻikai apo ha tele ki hono ʻulu,” ko e fakahinohino ia ʻa e ʻāngeló kiate iá, “he ko e tamasiʻi te ne nofo ko e nasili kia Sihova mei hono fanauʻi: pea ko ia ia te ne kamata ke fakahaofi ʻa Isileli mei he kau Filisitia.” (Fakamaau 13:​2-5) Ki muʻa ke tuʻituʻiaʻi ʻa Samisoní, naʻe fakapapauʻi ʻe Sihova ke ʻoange kia Samisoni ha ngāue makehe. Mei he mōmeniti ʻo hono fanauʻí, naʻe pau ke ne hoko ko ha Nāsili—ko e tokotaha naʻe fili ki ha faʻahinga ngāue toputapu makehe.

“ʻOku Ou Matamataleleiʻia” ʻIate Ia

ʻI he hanganaki tupu hake ʻa Samisoní, naʻe “tabuakiʻi ia ʻe Jihova.” (Fakamaau 13:​24, PM) ʻI he ʻaho ʻe taha naʻe haʻu ai ʻa Samisoni ki heʻene tamaí mo ʻene faʻeé ʻo ne pehē ange: “Kuo u mamata ki ha fefine ʻi Timina ko ha taʻahine Filisitia; pea ko eni, ke ke maʻu mai ai moku uaifi.” (Fakamaau 14:2) Fakaʻuta atu ki heʻena ʻohovalé. ʻI he ʻikai fakatauʻatāinaʻi ʻa ʻIsileli mei he nima ʻo e kau fakafeʻātungiá, naʻe loto ʻa hona fohá ke ne faʻu ha fepikitaki ʻi he mali mo kinautolu. Ko hono maʻu ha uaifi mei he lotolotonga ʻo e kau lotu ʻa e ngaahi ʻotua panganí naʻe fepaki ia mo e Lao ʻa e ʻOtuá. (Ekisoto 34:​ 11-16) ʻI he meʻá ni, naʻe fakafepaki ki ai ʻa ʻene ongo mātuʻá: “ʻOku ʻikai koā ha fefine ʻi he ngaahi ʻofefine ʻo ho kainga, pe ʻi hoku kainga katoa, ʻoku ke ʻalu ai ke maʻu hao uaifi mei he kau Filisitia taʻe-kamu na?” Neongo ia, naʻe kei vilitaki pē ʻa Samisoni: “Ke ke maʻu mai ʻa e fefine moʻoku, he ʻoku ou matamataleleiʻia ai.”—Fakamaau 14:3.

ʻI he founga fē naʻe hoko ai ʻa e fefine Filisitia makehe ko ení ʻo ‘matamatalelei’ kia Samisoní? ʻIkai ʻi he ʻuhinga naʻá ne “hoihoifua, manakoa, fakaʻofoʻofa,” ko e fakahuʻunga ia ʻa e Cyclopedia ʻa McClintock mo Strong, “ka naʻe tonu fekauʻaki mo ha tūkunga, taumuʻa pe kaveinga.” ʻI he fekauʻaki mo e taumuʻa ko e hā? ʻOku fakamatalaʻi ʻi he Fakamaau 14:4 ko Samisoní naʻá ne “kumi hano ava [pe faingamālie] ke fai mo e kau Filisitia.” Naʻe mahuʻingaʻia ʻa Samisoni ʻi he fefiné ki he taumuʻa ko iá. ʻI he tupu hake ʻa Samisoni ki he tuʻunga ko e tokotaha lahí, naʻe “kamata ʻe he Laumalie ʻo Sihova ke oʻi ia,” pe ueʻi ia ke ne fai ha meʻa. (Fakamaau 13:25) Ko ia ko e laumālie ʻo Sihová ʻa e mālohi naʻe teke mei mui ki he kole ngalikehe ʻa Samisoni ki ha uaifí pea pehē ki he mālohi naʻe teke mei mui ʻi heʻene ngāue kotoa ko e fakamaau ki ʻIsilelí. Naʻe maʻu ʻe Samisoni ʻa e faingamālie naʻá ne feinga ki aí? Tau ʻuluaki vakai angé ki he anga hono fakapapauʻi ʻe Sihova kiate ia ʻa e poupou fakaʻotuá.

Naʻe fononga ʻa Samisoni ki he kolo ʻo e fefine te ne mali mo iá ko Tīmina. ʻI heʻene “aʻu ki he ngoue-vaine ʻo Tīmina,” ʻoku fakahaaʻi ʻe he fakamatala Fakatohitapú, “ʻiloange naʻe kalou mai ha laione mui, mo fakafetaulaki kiate ia. Pea ʻohofia ia ʻe he Laumalie ʻo e Eiki, pea ne hae ia.” Ko e fakahaaʻi anga-kehe ko eni ʻo e mālohí naʻe hoko mai ia ʻi he taimi naʻe tokotaha pē ai ʻa Samisoní. Naʻe ʻikai ha kau fakamoʻoni sio tonu. Ko e founga nai eni ʻo hono fakapapauʻi ʻe Sihova kia Samisoni ko iá ʻi hono tuʻunga ko ha Nāsilí naʻá ne ala lava ke fakahoko ʻa e fekau kuo ʻomai ʻe he ʻOtuá? ʻOku ʻikai ha lau ki ai ʻa e Tohi Tapú, ka naʻe ʻiloʻi moʻoni ʻe Samisoni ko e mālohi anga-kehe ko iá naʻe ʻikai ʻoʻona. Kuo pau pē ko ʻene haʻú mei he ʻOtuá. Naʻe lava ke ne falala kia Sihova ke ne tokoniʻi ia ʻi he ngāue naʻe tuʻu mei muʻá. ʻI hono fakaivia ʻi he meʻa naʻe hoko ki he laioné, “naʻe ʻalu hifo [ʻa Samisoni], ʻo afea mo e fefine; pea [ne] leleiʻia ʻiate ia.”—Fakamaau 14:​5-7.

ʻI he foki atu ki mui ʻa Samisoni ke ʻave ki ʻapi ʻa e fefiné, naʻá “ne afe ke vakai ʻa e ʻangaʻanga ʻo e laione: pea ta naʻe ʻi ai ha fuifui pi ʻi he kete ʻo e laione, mo ha honi.” ʻI hono manatuʻi ení, naʻe fokotuʻu ai ʻe Samisoni ʻa e tupuʻa ko ení ki he kau tangata fononga Filisitia ʻe toko 30 ʻi heʻene malí: “Naʻe tupu ha meʻakai mei he uʻakai, pea naʻe tupu ha melie mei he malohi.” Kapau te nau mateʻi ʻo tonu ʻa e ʻuhinga ʻo e tupuʻá, ʻe ʻoange ʻe Samisoni kia kinautolu ʻa e ngaahi kofu loto mo e kofu tuʻa ʻe 30. Kapau heʻikai, kuo pau ke nau ʻoange ʻa e meʻa tatau kiate ia. Naʻe puputuʻu ʻa e kau Filisitiá ʻi he tupuʻá ʻo feʻunga mo e ʻaho ʻe tolu. ʻI he ʻaho hono faá, naʻa nau hanga ai ʻo fakamanamanaʻi ʻa e fefiné.  Naʻa nau tala ange kiate ia: “Ke ke tauheleʻi ho husepaniti ke ne vete mai ʻa e tupuʻa, naʻa mau tutu koe mo ho fale ʻaki ʻa e afi.” He anga-fakamamahi ē ko ia! Kapau naʻe tōʻongafaiʻaki ʻa e founga ko iá ʻe he kau Filisitiá ki honau kakaí tonu, fakaʻuta atu ki he tuʻunga fakatuʻutāmaki ʻo e kau ʻIsileli lōmekiná!—Fakamaau 14:​8-15.

Naʻe tenge ʻe he fefine ilifiá ʻa Samisoni ke ne tala ange ʻa e talí. ʻI hono fakahāhā ʻa e ʻikai ha ʻofa mo e mateaki kia Samisoní, naʻá ne fakahaaʻi leva ia ki he kau tangata fononga ʻi he malí. Naʻa nau solova ʻa e tupuʻá pea naʻe ʻiloʻi ʻe Samisoni ʻa e ʻuhinga naʻa nau lava aí. Naʻá ne tala ange kia kinautolu: “Ka ne taeoua hoo mou keli mo eku bulu fefine, behe ne ikai te mou ilo eku lea mo hono uhiga fufu.” Ko e faingamālie naʻe tatali ki ai ʻa Samisoní naʻe hoko mai ia he taimi ko ení. “Nae hoko malohi ae Laumalie o Jihova kiate ia, bea alu hifo ia ki Asikeloni, o ne tamateʻi ae kau tagata iate kinautolu e toko tolugofulu, bea nae too eia ho nau gaahi kofu, o atu ae gaahi kofu kiate kinautolu nae fakaha ene lea fufu.”—Fakamaau 14:​18, 19, PM.

Ko e ngāue ʻa Samisoni ʻi ʻAsikeloní naʻe ueʻi ia ʻe ha holi ki ha sāuni ʻi heʻene tafaʻakí? ʻIkai. Ko ha ngāue ia ʻa e ʻOtuá fakafou ʻi heʻene tokotaha faifakahaofi naʻe filí. Naʻe kamata ʻe Sihova fakafou ʻia Samisoni ha faitau mo e kau fakafeʻātungia anga-fakamamahi ʻo hono kakaí. Naʻe pau ke hokohoko atu ʻa e feingatau ko ení. Naʻe malanga hake ʻa e faingamālie hokó ʻi he taimi naʻe haʻu ai ʻa Samisoni ke ʻaʻahi ki hono uaifí.

Tau Toko Taha

ʻI heʻene foki ki Tīminá, naʻe ʻiloʻi ai ʻe Samisoni kuo fakamaliʻi ʻe he tamai ʻa hono uaifí ʻa e fefiné ki ha tangata ʻe taha, ʻi heʻene tui naʻe fehiʻa ʻa Samisoni ʻiate ia. Naʻe fakahaaʻi ʻe Samisoni ʻene ʻitá. Naʻá ne puke ha fanga fōkisi ʻe toko 300 ʻo haʻi tautau toko ua kinautolu fakataha mo ha tūhulu ʻi he vahaʻa ʻo honau hikú. ʻI hono tukuange atú, naʻa nau tutu ʻa e ngaahi ngoué, ngaahi ngoue vainé mo e ngaahi ngoue ʻōlivé, ʻo fakaʻauha ai ʻa e ngoue tefito ʻe tolu ʻa e kau Filisitiá ki he taʻu ko iá. Naʻe fakahāhā ʻe he kau Filisitia loto-ʻitá ha anga-fakamamahi. Naʻa nau fakakaukau ko e tupu ia mei he uaifi ʻo Samisoní mo ʻene tamaí pea nau tutu kinaua. Ko ʻenau sāuni anga-fakapāpeliané naʻe feʻunga ia mo e taumuʻa ʻa Samisoní. ʻI he tafaʻaki ʻe tahá, naʻá ne ʻohofi ai kinautolu fakataha mo ha fuʻu tāmate lahi.​—Fakamaau 15:​1-8.

Naʻe mahinoʻi ʻe he kau ʻIsilelí naʻe tāpuakiʻi ʻe Sihova ko e ʻOtuá ʻa Samisoni pea fāitaha ai mo ia ke fakangata ʻa e pule ʻa e kau Filisitiá? ʻIkai ʻaupito. Ke kalofi ʻa e faingataʻá, naʻe fekauʻi atu ʻe he kau tangata Siutá ʻa e kau tangata ʻe toko 3,000 ke nau puke ʻa e taki naʻe fili ʻe he ʻOtuá ʻo tuku atu ia ki hono ngaahi filí. Kae kehe, ko e taʻemateaki ko eni ʻi ʻIsilelí, naʻe ʻoange ai kia Samisoni ʻa e faingamālie ke ne toe fakahoko ha maumau lahi ange ki hono ngaahi filí. ʻI he teu ke ʻoatu ia ki he kau Filisitiá, “nae hoko malohi aubito ae Laumalie o Jihova kiate ia, bea hoko ae maea nae i hono nima o hage ha vavae kuo vela i he afi, bea nae homo leva ia mei hono nima.” Naʻá ne toʻo hake leva ʻa e hui kouʻahe ʻo ha ʻasi ʻo taaʻi ʻaki ʻa e toko taha afe ʻo e filí.—Fakamaau 15:​10-15, PM.

ʻI he kōlenga kia Sihová, naʻe pehē ʻe Samisoni: “Ko eni kuo ke fakafai ʻi hoʻo tamaioʻeiki ʻa e fuʻu fakahaofi ko eni, kau mate ai au he fie inu, ʻo to ki he nima ʻo e faʻahinga taʻekamu na?” Naʻe fanongo ʻa Sihova ki he lotu ʻa Samisoni peá ne tali ia. “Ka ka foaʻi ʻe he ʻOtua ʻa e luo . . . , pea naʻe haʻu mei ai ʻa e vai; pea ne inu, pea toe ake hono laumalie, ʻo ne moʻui.”​—Fakamaau 15:​18, 19.

Naʻe tokangataha ʻa Samisoni ʻi he tuli ki heʻene taumuʻá, ko ʻene tauʻi ʻo e kau Filisitiá. Ko ʻene nofo ʻi he fale ʻo ha paʻumutu ʻi Kesá ko hono taumuʻá ke tauʻi ai ʻa e ngaahi fili ʻo e ʻOtuá. Naʻe fiemaʻu ʻe Samisoni ha feituʻu nofoʻanga ki he taimi poʻulí ʻi ha kolo fakafili pea naʻe lava ke maʻu ia ʻi he fale ʻo ha paʻumutu. Naʻe ʻikai ha taumuʻa ʻulungāanga taʻetaau ʻa Samisoni ʻi heʻene fakakaukaú. Naʻá ne mavahe mei he fale ʻo e fefiné ʻi he tuʻapoó, ʻo ne puke ʻa e ongo matapā ʻo e koló pea mo e ongo pou he tafaʻakí ʻo fua ki he funga moʻunga ofi ki Hepeloni, ʻa ia naʻe kilomita nai ʻe 60 ʻa hono mamaʻó. Naʻe fai eni ʻi he hōifua fakaʻotuá mo e mālohi naʻe foaki ange ʻe he ʻOtuá.​—Fakamaau 16:​1-3.

Ko e founga naʻe ngāue ai ʻa e laumālie māʻoniʻoní ʻi he tuʻunga ʻo Samisoní naʻe makehe koeʻuhi ko e ngaahi tuʻunga anga-kehé. Ko e kau sevāniti faitōnunga ʻa e ʻOtuá he ʻaho ní ʻe lava ke  nau falala ki he laumālie tatau ke ne fakaivia kinautolu. Naʻe fakapapauʻi ʻe Sīsū ki hono kau muimuí ʻe hanga ʻe Sihova ʻo “foaki ʻa e Laumalie Maʻoniʻoni kiate kinautolu ʻoku kole kiate ia.”—Luke 11:13.

Ko e Hā Naʻe ‘Mahuʻi Ai Meia Samisoni’ ʻa Sihová?

Naʻe hoko ʻo pehē naʻe ʻofa ʻa Samisoni ʻi ha fefine ko Tilila. Ko e ngaahi ʻeiki talite ʻe toko nima ʻo e kau Filisitiá naʻa nau vēkeveke ʻaupito ke fakangata ʻa Samisoni ko ia naʻa nau kole tokoni kia Tilila. Naʻa nau fakaofiofi kia Tilila ʻo pehē ange kiate ia: “Fakakolekole kiate ia, bea vakai be oku tuu i he ha ene malohi lahi, bea koeha ae mea koia te mau lavaʻi ai ia.” ʻI he tuʻunga ko ha totongi-fufū, naʻe meʻaʻofa ange kiate ia taki taha ʻe he ʻeiki talite ʻe toko nimá ʻa e “koga siliva e taha afe ma teau.”—Fakamaau 16:​4, 5, PM.

Kapau ko e ngaahi konga silivá ko e sikeli, ko e meʻaʻofa ko ia ʻo e sikeli ʻe 5,500 ko ha fuʻu totongi-fufū lahi fakaʻulia. Naʻe totongi ʻe ʻĒpalahame ʻa e sikeli ʻe 400 ki ha tanuʻanga maʻa hono uaifí, pea naʻe fakatau atu ha pōpula ki ha sikeli pē ʻe 30. (Senesi 23:​14-20; Ekisoto 21:32) Ko e moʻoniʻi meʻa ko ia ʻa e hoko ʻo hā lelei ʻa e ngaahi ʻeiki talité—ko e kau pule ʻe toko nima ʻo e ngaahi kolo Filisitiá—ki he mānumanu ʻa Tililá ʻo ʻikai ki heʻene mateaki ki hono faʻahingá ʻoku fakahuʻunga ai ko ha fefine ʻIsileli nai ia. ʻI ha tuʻunga pē, naʻe tali ʻe Tilila ʻa e meʻaʻofá.

Naʻe tuʻo tolu hono ʻoange ʻe Samisoni kia Tilila ʻa e ngaahi tali takihalaʻi ki heʻene fakaʻeké, pea naʻe tuʻo tolu ʻene lavakiʻi ia ʻaki ʻene feinga ke tukuange ia ki hono ngaahi filí. Ka “ʻi heʻene fakafiu kiate ia, ʻi heʻene lau ʻi he ʻaho kotoa pe, mo fakakina kiate ia, naʻe faifai pea ʻikai te ne meimei kataki ke moʻui.” Naʻe iku ai ʻo fakahā ʻe Samisoni ʻa e moʻoní—naʻe ʻikai ʻaupito ke kosi ʻa hono ʻulú. Kapau ʻe kosi ia, te ne hoko ai ʻo vaivai pea hangē ko e faʻahinga kehe kotoa pē ʻo e kau tangatá.—Fakamaau 16:​6-17.

Ko e tōʻanga ia ʻo Samisoní. Naʻe faʻufaʻu ai ʻe Tilila ke ʻai ia ki ha tuʻunga ke tele ai hono ʻulú. Kae kehe, ko e mālohi ʻo Samisoní naʻe ʻikai ʻi hono louʻulú moʻoni ia. Ko hono louʻulú, naʻá ne fakafofongaʻi pē ʻa hono vahaʻangatae makehe mo e ʻOtuá ʻi he tuʻunga ko ha Nāsilí. ʻI hono fakaʻatā ia ʻe Samisoni ke ne hoko ʻo ʻi ha tuʻunga naʻe uesia ai ʻa hono tuʻunga Nāsilí koeʻuhi ko hono tele ʻa hono ʻulú, ‘naʻe mahuʻi ʻa Sihova meiate ia.’ Naʻe ikunaʻi ʻe he kau Filisitiá he taimi ko ení ʻa Samisoni, ʻo fakakuihi ia pea tuku pilīsone.—Fakamaau 16:​18-21.

Ko ha lēsoni mālohi ē ʻoku akoʻi mai ʻe he lēsoni ko ení kia kitautolú! ʻIkai ʻoku totonu ke tau fakamahuʻingaʻi hotau vahaʻangatae mo Sihová ko ha meʻa mahuʻinga ʻaupito? Kapau ʻoku tau fakangaloku ʻa ʻetau fakatapui faka-Kalisitiané ʻi ha founga pē, ʻe lava fēfē ke tau ʻamanekina ke hokohoko atu hono tāpuakiʻi kitautolu ʻe he ʻOtuá?

“Ke Mole ʻEku Moʻui Fakataha mo e Kau Filisitia”

Naʻe fakamālō ʻa e kau Filisitia fiefia lahí ki honau ʻotua ko Tākoní ʻi hono ikunaʻi ʻo Samisoní. ʻI hono kātoangaʻi ʻa ʻenau ikuná, naʻa nau taki atu ʻenau pōpulá ki he temipale ʻo Tākoní. Ka naʻe ʻiloʻi ʻe Samisoni ʻa e ʻuhinga moʻoni ʻo ʻene toó. Naʻá ne ʻiloʻi ʻa e ʻuhinga naʻe liʻaki ai ia ʻe Sihová pea naʻe fakatomala ʻa Samisoni ʻi heʻene taʻelavameʻá. Lolotonga ʻa e ʻi he fale fakapōpulá ʻa Samisoní, naʻe kamata ke tupu lahi ʻa hono louʻulú. ʻI heʻene ʻi he ʻao ʻo e laui afe ʻo e kau Filisitiá he taimi ko ení, ko e hā ʻa e ngāue te ne faí?

“Atonai Sihova e,” ko e lotu ia ʻa Samisoní, “manatuʻi au; ʻio, fakamalohiʻi au, Elohimi e, ʻa e ta tuʻo taha ko eni: kehe pe ke u sauni ki he kau Filisitia ha taha ʻo hoku ongo pokoʻi mata oʻoku ni!” Naʻá ne fakamālohiʻi leva ia ʻo ne piki ʻi he ongo pou ʻe ua ʻi he loto-mālie ʻo e falé, pea “ne tuloloʻaki hono ivi kotoa.” Ko e hā ʻa e ikuʻangá? “Naʻe holo ʻa e fale ki he houʻeiki mo e kakai kotoa naʻe ʻi ai. Ko ia ko e kakai naʻa ne tamateʻi ʻi heʻene pekia naʻe tokolahi ʻi he kakai naʻa ne tamateʻi ʻi heʻene moʻui.”—Fakamaau 16​:​22-​30.

ʻI he mālohinga fakaesinó, naʻe ʻikai hano tatau ʻo Samisoni ʻi he haʻohaʻonga ʻo e tangatá. Ko ʻene ngaahi ngāue mālohí naʻe ʻiloa moʻoni. Ka ko e meʻa mahuʻinga tahá, ʻoku lau ʻe he folofola ʻa Sihová ʻa Samisoni ʻi he lotolotonga ʻo e faʻahinga mālohi ko ia ʻi he tuí.​—Hepelu 11:​32-​34.

[Fakatātā ʻi he peesi 26]

Ko e hā ʻa e fakapulipuli ʻo e mālohinga ʻo Samisoní?