ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Luté

KO HA tulama fakalotomāfana ia ʻo e mateaki ʻi he vahaʻa ʻo e ongo fefine ʻe toko ua. Ko ha talanoa ia ʻo e houngaʻia kia Sihova ko e ʻOtuá mo e falala ki heʻene fokotuʻutuʻú. Ko ha talanoa ia ʻoku fakamamafaʻi ai ʻa e mahuʻingaʻia vēkeveke ʻa Sihova ʻi he laine ʻo e hako faka-Mīsaiá. Ko ha talanoa fakaueʻiloto ia ʻo e ngaahi fiefia mo e mamahi ʻa ha fāmili. Ko e tohi Tohi Tapu ʻa Luté ʻoku kau kotoa ki ai eni pea mo e meʻa lahi ange.

Ko e tohi Luté ʻoku kāpui ai ha vahaʻa taimi ʻo e taʻu nai ʻe 11 “ʻi he taimi naʻe pule ai ʻa e Kau Fakamāu” ʻi ʻIsilelí. (Lute 1:1) Ko e ngaahi meʻa naʻe lēkōtí kuo pau pē naʻe hoko he konga ki muʻa ʻo e vahaʻa taimi ʻo e kau Fakamāú, koeʻuhí ko e tokotaha maʻu kelekele ko Pōasí, ʻa e taha ʻo e faʻahinga ʻi he tulama moʻoni ko eni ki he moʻuí, ko e foha ia ʻo Lēhapi ʻi he ʻaho ʻo Siosiuá. (Siosiua 2:​1, 2; Lute 2:1; Mātiu 1:5) Ko e talanoá ʻoku ngalingali naʻe tohi ia ʻe he palōfita ko Sāmiuelá ʻi he 1090 K.M. Ko e tohi pē eni ʻe taha ʻi he Tohi Tapú ʻoku fakahaaʻi ai ʻa e hingoa ʻo ha fefine ʻikai ko ha ʻIsileli. Ko e pōpoaki ʻoku ʻi aí “ko e koto moʻui mo e koto malohi.”—Hepelu 4:12.

“KO E POTU ʻOKU KE ʻALU KI AI, TE U ʻALU KI AI AU”

(Lute 1:1–​2:​23)

ʻI he taimi naʻe aʻu ai ʻa Nāomi mo Lute ki Pētelihemá, naʻá na hoko ko e fakamaʻunga tefito ia ʻo e tokangá. ʻI he lave ki he tokotaha motuʻa ange he toko ua ko ení ʻoku toutou ʻeke ʻe he kakai fefine ʻo e koló: “Ko Naomi eni?” ʻI he meʻá ni, ʻoku lea ai ʻa Nāomi: “Oua naa ui au ko Naomi, kae ui au ko Mala: he kuo fai fakamamahi lahi kiate au e he Mafimafi. Naaku alu kitua kuou fonu, bea kuo toe omi au e Jihova ki abi kuou maha.”—Lute 1:​19-21, PM.

ʻI hono fakatupunga ʻe ha honge ʻi ʻIsileli ʻa hono fāmilí ke nau hiki mei Pētelihema ki he fonua ko Mōapé, ʻoku “fonu” ʻa Nāomi ʻi he ʻi ai hono husepānití mo e ongo foha ʻe toko uá. Neongo ia, ʻi ha taimi hili ʻenau nofo ʻi Mōapé, ʻoku mate ʻa hono husepānití ʻa ʻElimeleki. Ki mui ai, ʻoku mali ʻa e ongo fohá mo e ongo fefine Mōape ko Opa mo Lute. ʻOku mahili nai mei ai ha taʻu ʻe hongofulu, pea ʻoku mate paʻa ʻa e ongo fohá, ʻo nofo taʻehusepāniti ai ʻa e kau fefine ʻe toko tolú. ʻI he fili ʻa e faʻē-ʻi-he-fonó, ʻa Nāomi, ke ne foki ki Siutá, ʻoku ʻalu fakataha mo ia ʻa e ongo uitou ʻo hono ongo fohá. ʻI heʻenau fonongá, ʻoku fakaʻaiʻai ai ʻe Nāomi ʻa hono ongo ʻofefine-ʻi-he-fonó ke na foki ki Mōape ʻo kumi hana husepāniti mei he lotolotonga ʻo hona kakaí tonu. ʻOku loto ki ai ʻa Opa. Kae kehe, ʻoku pipiki ʻa Lute kia Nāomi, ʻo ne pehē: “Ko e potu ʻoku ke ʻalu ki ai, te u ʻalu ki ai au; pea ko e potu ʻoku ke mohe ai, te u mohe ai: ko ho kakai ko hoku kakai, pea ko ho ʻOtua ko hoku ʻOtua.”—Lute 1:16.

ʻOku aʻu ʻa e ongo uitoú, ʻa Nāomi mo Lute ki Pētelihema ʻi he kamata ʻa e utu-taʻu paʻalé. ʻI hono ngāueʻaongaʻaki ha tokonaki naʻe fai ʻi he Lao ʻa e ʻOtuá, ʻoku kamata tufi ʻa Lute ʻi ha ngoue ʻa ia naʻe ʻa e kāinga tangata ʻo ʻElimeleki—ko ha Siu taʻumotuʻa ko Pōasi. ʻOku maʻu ʻe Lute ʻa e leleiʻia ʻa Pōasí pea ʻoku hokohoko atu ʻene tufi ʻi heʻene ngoué kae ʻoua ke ʻosi ʻa e “tutuʻu ʻo e taʻu paale mo e taʻu uite.”—Lute 2:23.

Tali ki he Ngaahi Fehuʻi Fakatohitapú:

1:8​—Ko e hā naʻe tala ai ʻe Nāomi ki heʻene ongo tama-ʻi-he-fonó ke na foki “taki taha  ki he fale o ʻene faʻe” kae ʻikai ki he fale ʻo ʻene tamaí? Pe naʻe moʻui ʻa e tamai ʻa Opá ʻi he taimi ko iá ʻoku ʻikai ke fakahaaʻi ia. Kae kehe, naʻe moʻui ʻa e tamai ia ʻa Luté. (Lute 2:11) Neongo ia, naʻe lea ʻa Nāomi ʻo kau ki he fale ʻo e faʻeé, ʻi he fakakaukau nai ko e lave ki heʻena faʻeé ʻe ʻomai ai ki heʻena fakakaukaú ʻa e fakafiemālie ʻi he ʻofa fakafaʻeé. ʻE tautefito ʻa e fakafiemālie ʻa e meʻá ni ki he ongo tama kuo lōmekina ʻe he mamahí ʻi he māvae mo ʻena faʻē-ʻi-he-fono ʻofeiná. ʻE toe tapua nai mei he fakamatalá ʻa e fakakaukau ʻi he ʻikai hangē ko Nāomí, ko e ongo faʻē ʻa Lute mo Opá naʻe ʻi ai hona ongo ʻapi lelei.

1:​13, 21​—Naʻe ʻai ʻe Sihova ke fakamamahi ʻa e moʻuí kia Nāomi pea fakatupunga ʻa ʻene mamahí? ʻIkai, pea naʻe ʻikai tukuakiʻi ʻe Nāomi ʻa e ʻOtuá ʻaki ha faihala. Kae kehe, ʻi he vakai atu ki he meʻa kotoa naʻe hoko kiate iá, naʻá ne fakakaukau ai naʻe ʻikai kau mo ia ʻa Sihova. Naʻá ne ongoʻi mamahi mo mole ʻene ʻamanakí. ʻIkai ngata aí, ʻi he ngaahi ʻaho ko iá ko e fua ʻo e manavá naʻe vakai ki ai ko ha tāpuaki fakaʻotua pea ko e paʻá, ko ha mala. ʻI he ʻikai ha makapuna pea mate hono ongo fohá, naʻe ongoʻi tonuhia nai ai ʻa Nāomi ʻi he fakakaukau kuo fakamaaʻi ia ʻe Sihová.

2:​12 (PM)​—Ko e hā ʻa e “totogi lahi” naʻe maʻu ʻe Lute meia Sihová? Naʻe maʻu ʻe Lute ha foha pea maʻu ʻa e monū ʻo e hoko ko ha fehokotakiʻanga ʻi he laine hohoko mahuʻinga taha ʻi he hisitōliá—ko e laine ko ia ʻo Sīsū Kalaisí.​—Lute 4:​13-​17; Mātiu 1:​5, 16.

Ngaahi Lēsoni kia Kitautolu:

1:8; 2:​20. Neongo ʻa e ngaahi mamahi naʻá ne hokosiá, naʻe tauhi maʻu ʻe Nāomi ʻa ʻene tuipau ki he ʻaloʻofa ʻa Sihová. ʻOku totonu ke tau fai ʻa e meʻa tatau, tautefito ʻi he taimi ʻoku hoko ai ʻa e ngaahi ʻahiʻahi mamafá.

1:9. ʻOku ʻikai totonu ke hoko ha ʻapi ko ha feituʻu pē ʻa ia ʻoku kai mo mohe ai ʻa e ngaahi mēmipa ʻo e fāmilí. ʻOku totonu ke hoko ia ko ha feituʻu nonga ʻo e mālōlō mo e fiemālie.

1:​14-​16. Naʻe ‘foki ki hono kakaí, pea ki hono ʻotuá’ ʻa Opa. Naʻe ʻikai foki ʻa Lute. Naʻá ne liʻaki ʻa e fiemālie mo e malu ʻo hono fonua tupuʻangá peá ne mateaki ai pē kia Sihova. ʻI hono fakatupulekina ʻa e ʻofa mateaki ki he ʻOtuá pea fakahāhā ha laumālie feilaulauʻi-kitá ʻe tokoni ia ke maluʻi ai kitautolu mei he tō ki he ngaahi holi siokitá pea ‘holomui ai ʻo to ki mala.’—Hepelu 10:39.

2:2. Naʻe loto ʻa Lute ke ngāueʻaongaʻaki ʻa e tokonaki ʻo e tufí naʻe fai maʻá e lelei ki he kau mulí mo e faingataʻaʻiá. Naʻá ne anga-fakatōkilalo. ʻOku ʻikai totonu ke fuʻu hīkisia ha Kalisitiane faingataʻaʻia ke ne tali ʻa e tokoni ʻofa ʻa e ngaahi kaungātuí pe ko ha tokoni fakapuleʻanga pē ʻokú ne taau nai ke maʻu.

2:7. Neongo hono maʻu ʻa e totonu ke tufí, naʻe kole ʻa Lute ki ha ngofua ʻi he ki muʻa ke ne fai iá. (Livitiko 19:​9, 10) Ko ha fakaʻilonga eni ʻo e anga-vaivai ʻi heʻene tafaʻakí. ʻOku tau fakapotopoto ke “vivili ki he angavaivai” he “ʻe maʻu ʻa e fonua ʻe he faʻa kataki [pe anga-vaivaí]; pea te nau fefiefiaʻi ʻi he melino lahi.”—Sefanaia 2:3; Sāme 37:11.

2:​11. Naʻe fakamoʻoniʻi ʻe Lute naʻe ʻikai ko ha kāinga pē ia kia Nāomi. Ko ha kaumeʻa moʻoni ia. (Palovepi 17:17) Naʻe fefeka ʻa ʻena kaumeʻá koeʻuhi naʻe makatuʻunga ia ʻi he ngaahi ʻulungāanga hangē ko e ʻofá, mateakí, kaungāongoʻí, anga-leleí pea mo ha laumālie feilaulauʻi-kita. Ko e meʻa ʻoku mahuʻinga angé, naʻe makatuʻunga ia ʻi hona tuʻunga fakalaumālié—ʻa ʻena  holi ke tauhi kia Sihova pea ke ʻi he haʻohaʻonga ʻo ʻene kau lotú. Ko kitautolu foki ʻoku tau maʻu ʻa e ngaahi faingamālie lelei ke fakatupulekina ai ʻa e ngaahi kaumeʻa moʻoni mo e kau lotu moʻoní.

2:​15-​17. Naʻa mo e taimi naʻe ʻai ai ʻe Pōasi ke malava ʻo fakasiʻisiʻi ʻa e kavenga ʻa Luté, “naʻa ne fai ʻene tufi ʻi he ngoue na, ʻo aʻu ki he efiafi.” Ko Luté ko ha tokotaha ngāue mālohi ia. ʻOku totonu ke maʻu ʻe ha Kalisitiane ha ongoongo ʻi he hoko ko ha tokotaha ngāue tōtōivi.

2:​19-​22. Naʻe fiefia ʻa Nāomi mo Lute ʻi ha fetalanoaʻaki lelei lolotonga ʻa e ngaahi houa efiafí, naʻe mahuʻingaʻia ʻa e tokotaha motuʻa angé ʻi he ngaahi ngāue ʻa e tokotaha kei siʻi angé, ʻo na fakatou fakahaaʻi ʻena ngaahi fakakaukaú mo e ongoʻí. ʻOku totonu ke toe kehe ʻi ha fāmili Kalisitiane?

2:​22, 23. ʻI he ʻikai hangē ko e ʻofefine ʻo Sēkope ko Tainá, naʻe kumi ʻa Lute ke feohi mo e kau lotu ʻa Sihová. Ko ha faʻifaʻitakiʻanga lelei ē kia kitautolu!​—Senesi 34:​1, 2; 1 Kolinito 15:33.

HOKO ʻA NĀOMI ʻO “FONU”

(Lute 3:​1–4:22)

ʻOku fuʻu motuʻa ʻa Nāomi ke maʻu fānau. Ko ia ʻokú ne fakahinohinoʻi ʻa Lute ke ne fetongi ia ʻi ha mali ʻi hano fakatau, pe mali mo e tuongaʻane-ʻi-he-fonó. ʻI he muimui he tataki ʻa Nāomí, ʻoku kole ai ʻa Lute kia Pōasi ke ne hoko ko hono tokotaha-fakatau. ʻOku mateuteu ʻa Pōasi ke fai ki ai. Kae kehe, ʻoku ʻi ai ha kāinga ofi ange ʻa ia ʻoku totonu ke ʻuluaki ʻoange ki ai ʻa e faingamālié.

ʻOku fakaleleiʻi leva ʻe Pōasi ʻa e meʻá ni. ʻI he pongipongi pē hono hokó, ʻokú ne tānaki mai ʻa e kau mātuʻa ʻe toko hongofulu ʻo Pētelihema ʻi he ʻao ʻo e tokotaha kāingá ʻo ʻeke ange ai kiate ia pe ʻokú ne loto-lelei ke fai ʻa e fakataú. ʻOku fakafisi ʻa e tangatá ke ne fai ia. Ko ia ai, ʻoku ngāue ʻa Pōasi ko ha tokotaha-fakatau ʻo ne mali mo Lute. ʻOku maʻu ʻi heʻena malí ha foha, ko ʻŌpeti, ko e kui-tangata ia ʻa Tuʻi Tēvitá. ʻOku pehē ange leva ʻe he kau fefine Pētelihemá kia Nāomi: “Fakafetai kia Jihova, . . . Bea e iate koe ia koe fakaakeake moui, bea koe tauhi kiate koe i hoo motua: koeuhi ko hoo taahine i he fono, aia oku ofa kiate koe, aia oku lelei lahi kiate koe i he tama tagata e toko fitu, kuo ne fanauʻi kiate ia.” (Lute 4:​14, 15, PM) Ko e fefine ʻa ia naʻe foki “maha” ki Pētelihemá kuó ne toe hoko ʻo “fonu”!—Lute 1:21.

Tali ki he Ngaahi Fehuʻi Fakatohitapú:

3:​11 (PM)​—Ko e hā naʻá ne ʻoange kia Lute ʻa e ongoongo ʻo e hoko “ko e fefine agalelei”? Naʻe ʻikai “ko e fi ʻo e ʻulu” pe ko e “ʻai ʻo e koula mo e tui ʻo e ngaahi kofu” naʻá ne fakatupunga ʻa e niʻihi kehé ke nau leleiʻia ʻia Luté. ʻI hono kehé, ko e “tangata fufū ʻo e loto”—ko ʻene mateakí mo e ʻofá, ko ʻene anga-fakatōkilaló mo e anga-vaivaí, ko ʻene tōtōiví mo e laumālie feilaulauʻi-kitá. Ko ha fefine manavahē-ʻOtua pē ʻokú ne holi ki ha ongoongo hangē ko e ongoongo ʻo Luté kuo pau ke ne feinga ke fakatupulekina ʻa e ngaahi ʻulungāangá ni.—1 Pita 3:​3, 4; Palovepi 31:​28-​31.

3:​14​—Ko e hā naʻe ʻā hake ai ʻa Lute mo Pōasi ki muʻa ke mafoa ʻa e atá? Naʻe ʻikai hoko ení koeʻuhi ko ha hoko ha ʻulungāanga taʻetaau lolotonga ʻa e poó peá na loto ai ke fakapulipuliʻi. Ko e ngaahi tōʻonga ʻa Lute he pō ko iá ʻoku ngalingali naʻe fehoanaki ia mo e meʻa naʻe fai  ko ha tōʻonga fakafonua ʻa ha fefine ʻoku kumi ki he totonu ʻo e mali mo e tuongaʻane-ʻi-he-fonó. Naʻá ne fai ʻo fehoanaki mo e fakahinohino ʻa Nāomí. ʻIkai ngata aí, ko e tali mahino ʻa Pōasí ʻoku fakahaaʻi ai naʻe ʻikai te ne sio ki ha hala ʻe taha ʻi he meʻa naʻe fai ʻe Luté. (Lute 3:​2-13) ʻOku hā mahino, naʻe tuʻu pongipongia hake ʻa Lute mo Pōasí koeʻuhi ke ʻoua ʻe ʻi ai ha ʻuhinga ki ha taha ke ne kamata ai ha muhumuhu ʻikai ha makatuʻunga lelei.

3:​15​—Ko e hā naʻe mahuʻinga fekauʻaki mo hono ʻoange ʻe Pōasi kia Lute ʻa e fuaʻanga paʻale ʻe onó? Naʻe fakahaaʻi nai ʻi he tōʻonga ko ení ʻi he hangē pē ko e hoko atu ha ʻaho mālōlō ʻi he ʻaho ngāue ʻe onó, naʻe ofi ʻa e ʻaho mālōlō ʻo Luté. ʻE fakapapauʻi ʻe Pōasi te ne maʻu “ha maloloʻanga” ʻi he fale ʻo hono husepānití. (Lute 1:9; 3:​1, NW) Pehē foki mahalo ko e fuaʻanga paʻale pē ʻe ono ʻa e meʻa naʻe lava ke hili ʻo fua ʻe Lute ʻi hono ʻulú.

3:​16 (PM)​—Ko e hā naʻe ʻeke ange ai ʻe Nāomi kia Lute: “Kohai koe, eku tama?” Meʻa ní naʻe ʻikai te ne ʻiloʻi ʻa ʻene tama-ʻi-he-fonó? ʻOku ngalingali naʻe pehē, he ʻi he foki ʻa Lute kia Nāomí, naʻe kei fakapoʻuli pē nai. Ko ia ai, ko e fehuʻí ʻoku toe ʻuhinga nai ia naʻe fieʻilo ʻa Nāomi fekauʻaki mo e tuʻunga foʻou naʻe malava ke maʻu ʻe Lute ʻi he fehoanaki mo hono fakatau iá.

4:6​—ʻI he founga fē naʻe lava ai ki ha tokotaha-fakatau ke ne “maumauʻi” ʻa hono tofiʻá ʻaki hono fai ʻo e fakataú? ʻUluakí, kapau ko e tokotaha ʻoku tō ki he masivá naʻá ne fakatau atu ʻa hono tofiʻa kelekelé, ʻe pau ke ʻoatu ai ʻe he tokotaha-fakataú ʻa e paʻanga ke fakatau mai ʻaki ʻa e kelekelé ʻi ha totongi naʻe fakapapauʻi ʻi he lahi ʻo e ngaahi taʻu ʻoku toé kae ʻoua ke aʻu ki he Siupeli hoko maí. (Livitiko 25:​25-27) Ko hono fai iá ʻe fakasiʻisiʻi ai ʻa e mahuʻinga ʻo hono kelekelé tonu. ʻIkai ngata aí, kapau ʻe fanauʻi ha foha kia Lute, ko e foha ko iá, kae ʻikai ko ha toe taha ʻi he ngaahi kāinga ofi fakamuimui taha ʻo e tokotaha-fakataú te ne maʻu ʻa e kelekele naʻe fakataú.

Ngaahi Lēsoni kia Kitautolu:

3:​12; 4:​1-6. Naʻe mātuʻaki muimui tokanga ʻa Pōasi ki he fokotuʻutuʻu ʻa Sihová. ʻOku tau mātuʻaki tokanga ʻi he muimui ki he ngaahi founga fakateokalatí?​—1 Kolinito 14:40.

3:18. Naʻe falala ʻa Nāomi kia Pōasi. ʻIkai ʻoku totonu ke tau maʻu ʻa e falala tatau ki he ngaahi kaungātui faitōnungá? Naʻe loto-lelei ʻa Lute ke fakahoko ʻa e mali tuongaʻane-ʻi-he-fono mo ha tangata naʻe ʻikai ʻaupito te ne ʻiloʻi, ko ha tangata naʻe ʻikai tuʻu hono hingoá ʻi he Tohi Tapú. (Lute 4:1) Ko e hā hono ʻuhingá? Koeʻuhi naʻá ne falala ki he fokotuʻutuʻu ʻa e ʻOtuá. ʻOku tau maʻu ha falala meimei tatau? Ko e fakatātaá, ʻi heʻene hoko ki he kumi ha hoa malí, ʻoku tau tokanga ki he akonaki ke mali “i he Eiki be”?—1 Kolinito 7:​39, PM.

4:​13-​16. Neongo ko ha Mōape ia pea ko ha tokotaha lotu ki muʻa ki he ʻotua ko Kīmosí, ko ha monū moʻoni ē naʻe maʻu ʻe Luté! ʻOku fakatātaaʻi ʻe he meʻá ni ʻa e tefitoʻi moʻoni ʻoku pehē “ʻoku ʻikai tuʻunga ki heʻete loto ki ai, pe ki heʻete lele ki ai, ka ki he fai ʻaloʻofa ʻa e ʻOtua.”—Loma 9:16.

ʻE Hanga ʻe he ʻOtuá ʻo “Hakeakiʻi Kimoutolu ʻo ka Hoko Hono Taimi”

ʻOku fakatātaaʻi ʻe he tohi Luté ʻa Sihova ko ha ʻOtua ʻo e ʻaloʻofa, ʻa ia ʻoku ngāue maʻa ʻene kau sevāniti mateakí. (2 Kalonikali 16:9) ʻI heʻetau sioloto atu ki he anga hono tāpuakiʻi ʻa Luté, ʻoku tau sio ai ki he mahuʻinga ʻo hono tuku ʻetau falalá ki he ʻOtuá fakataha mo e tui taʻetoefehuʻia, ʻo tui kakato “ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.”—Hepelu 11:6.

Ko Lute, Nāomi mo Pōasí naʻe tuku ʻenau falala kakató ki he fokotuʻutuʻu ʻa Sihová pea naʻe ngāue lelei ʻa e meʻa kotoa kia kinautolu. ʻI he founga meimei tatau, “ʻilonga ʻa e kakai ʻoku ʻofa ki he ʻOtua, ʻoku fengaueʻaki ʻa e meʻa kotoa pe maʻanau lelei; he ko e kakai kinautolu kuo ului ʻo fakatatau ki heʻene tuʻutuʻuni.” (Loma 8:28) Tau tokanga leva ki he akonaki ʻa e ʻapositolo ko Pitá: “Ko ia mou fakavaivaiʻi kimoutolu ʻi he lalo nima mafimafi ʻo e ʻOtua, koeʻuhi ke ne hakeakiʻi kimoutolu ʻo ka hoko hono taimi: ʻo mou li atu ā hono kotoa ʻo hoʻomou lotomoʻua ki he ʻEne ʻAfio; he ʻoku ne mamahiʻi kimoutolu.”—1 Pita 5:​6, 7.

[Fakatātā ʻi he peesi 26]

ʻOkú ke ʻiloʻi ʻa e ʻuhinga naʻe ʻikai ke liʻaki ai ʻe Lute ʻa Nāomí?

[Fakatātā ʻi he peesi 27]

Ko e hā naʻá ne ʻoange kia Lute ʻa e ongoongo ʻo e hoko ko ha “fefine agalelei”?

[Fakatātā ʻi he peesi 28]

Ko e hā ʻa e “totogi lahi” kia Lute meia Sihová?