Fiefia ʻi Hono Ako Fakafoʻituitui ʻo e Folofola ʻa e ʻOtuá

“Teu fakalaulauloto foki ki hoo gaue kotoabe, o talanoa ki hoo gaahi faiaga [“feangaingá,” NW].”​—SĀME 77:​12, PM.

1, 2. (a) Ko e hā kuo pau ai ke tau tuku mavahe ha taimi ki he fakalaulaulotó? (e) Ko e hā ʻa e ʻuhinga ʻo e “fakalaulaulotó” mo e “fakakaukaulotó”?

 ʻI HE tuʻunga ko e kau ākonga ʻa Sīsū Kalaisí, ʻoku totonu ke tau tokanga lahi fekauʻaki mo hotau vahaʻangatae mo e ʻOtuá pea mo ʻetau ngaahi ʻuhinga ki hono tauhi Iá. Kae kehe, ʻi he ʻahó ni, ko e tokolahi taha ʻo e kakaí ʻoku nau moʻui femoʻuekina ʻaupito ʻo ʻikai ai ke nau tuku ha taimi ki he fakalaulaulotó. ʻOku nau mātuʻaki nōfoʻi ʻi he ngāue hokohoko ko e tuli ki he meʻa fakamatelié, fakatau maí, mo e kumi taʻefakakaukau ki he mālié. ʻE lava fēfē ke tau kalofi ha ngāue kulanoa pehē? Hangē pē ko ʻetau fokotuʻu mavahe ha taimi pau ʻi he ʻaho taki taha ki he ngaahi ngāue ʻoku mahuʻingá, hangē ko e kaí mo e mohé, kuo pau ke pehē ʻetau fakaʻatā ha taimi ʻi he ʻaho taki taha ke fakalaulauloto ai ki he ngaahi ngāue mo e ngaahi feangainga ʻa Sihová.​—Teutalonome 8:3; Mātiu 4:4.

² Kuó ke kiʻi nofo hifo ke fakalaulauloto? Ko e hā ʻa e ʻuhinga ke fakalaulaulotó? ʻOku fakaʻuhingaʻi ʻe he tikisinale ʻe taha ʻa e foʻi leá ko e “fakahangataha ʻete fakakaukaú: fifili-loto pe fakakaukauloto.” Pea ko e foʻilea “fakakaukaulotó” ʻoku ʻuhinga ia “ko e fakakaukauʻi: fifili-loto . . . ke fakakaukau pe fefīliaki tautefito ʻi he tuʻunga fakalongolongo, fakamātoato, pea loloto.” Ko e hā ʻa e ʻuhinga ʻoku ʻomi ʻe he meʻá ni kia kitautolú?

3. Ko e hā ʻoku felāveʻi fakahangatonu mo e fai ko ia ha fakaʻau ki muʻa fakalaumālié?

³ Ko e taha e meʻa, ʻoku totonu ke ne fakamanatu mai kia kitautolu ʻa e meʻa naʻe tohi ʻe he ʻapositolo ko Paulá ki hono kaungā tamaioʻeiki ko Tīmoté: “Tokaga koe ki he lau tohi, moe eginaki, moe akonaki, kae oua keu alu atu. . . . Fakalaulauloto ki he gaahi mea ni; ke ke moua koe ki ai; koeuhi ke ha mai hoo fakaaau ki muʻa i he mea kotoabe.” ʻIo, ko e fakaʻau ki muʻá mo e fakalakalaká naʻe ʻamanekina ia, pea ko e ngaahi lea ʻa Paulá naʻe fakahaaʻi ai naʻe ʻi ai ʻa e felāveʻi fakahangatonu ʻa e fakalaulauloto ki he ngaahi meʻa fakalaumālié mo e fakaʻau ki muʻá. ʻOku pehē pē ʻene moʻoni ʻi he ʻaho ní. Ke maʻu ʻa e fiemālie ʻo e fai ha fakaʻau ki muʻa fakalaumālié, kuo pau ke tau kei “fakalaulauloto” pea “moua” ʻi he ngaahi meʻa ʻoku fekauʻaki mo e Folofola ʻa e ʻOtuá.​—1 Timote 4:​13-15, PM.

4. Ko e hā ʻa e ngaahi tokonaki ʻe lava ke ke ngāueʻaki ke tokoniʻi koe ke fakakaukauloto maʻu pē ki he Folofola ʻa Sihová?

⁴ Ko e taimi lelei taha kiate koe ke fakalaulauloto aí ʻoku fakatefito ia ʻiate koe mo hoʻo founga-tuʻumaʻu fakafāmilí. ʻOku fakakaukauloto ʻa e tokolahi ki ha konga Tohitapu pongipongia ʻi he pongipongí ʻi he taimi ʻoku nau lau ai ʻa e kiʻi tohi Ko Hono Vakaiʻi Fakaʻaho ʻa e Tohitapú. Ko hono moʻoní, ko e kau ngāue pole ʻe toko 20,000 nai ʻi he ngaahi ʻapi Pēteli takatakai ʻi he māmaní ʻoku nau kamata ʻaki honau ʻahó ha lāulea miniti ʻe 15 ki he konga Tohitapu ʻo e ʻaho ko iá. Lolotonga ko e kiʻi tokosiʻi pē ʻoku nau lea ʻo fai ha poupou ʻi he pongipongi taki taha, ko e toengá ʻoku nau fakakaukauloto ki he meʻa ʻoku leaʻaki mo laú. Ko e Kau Fakamoʻoni ʻe niʻihi ʻoku nau fakakaukauloto ki he  Folofola ʻa e ʻOtuá lolotonga ʻenau ʻalu ki he ngāué. ʻOku nau fanongo ki he ngaahi foʻi tepi kāsete ʻo e Tohitapú mo e makasini Taua Leʻo mo e ʻĀ Hake! ʻa ia ʻoku maʻu ʻi he ngaahi lea ʻe niʻihi. ʻOku fai eni ʻe he kau fefine tauhi ʻapi tokolahi lolotonga ʻenau ngāue holo ʻi falé. Ko hono moʻoní, ʻoku nau faʻifaʻitaki ki he tangata-tohi-saame ko ʻĒsafé, ʻa ia naʻá ne tohi: “Teu manatu ki he gaahi gaue a Jihova: koe mooni teu manatu ki hoo gaahi mana i mua. Teu fakalaulauloto foki ki hoo gaue kotoabe, o talanoa ki hoo gaahi faiaga [“feangaingá,” NW].”—Sāme 77:​11, 12.

Ko e Fakakaukau Totonú ʻOkú Ne ʻOmi ʻa e Ngaahi Ola ʻAonga

5. Ko e hā ʻoku totonu ai ke mahuʻinga ʻa e ako fakafoʻituituí kia kitautolú?

⁵ ʻI hotau kuonga fakaeonopooni ko eni ʻo e TV, vitioó, mo e komipiutá, ko e lautohí kuo mātuʻaki hōloa ia pea aʻu ʻo tuʻu. ʻOku totonu ke ʻoua ʻaupito ʻe hoko eni ia ʻi he haʻohaʻonga ʻo e Kau Fakamoʻoni ʻa Sihová. Ko e moʻoni, ko e lau ʻo e Tohitapú ʻoku hangē ia ha maea fakahaofi ʻokú ne fakafehokotaki kitautolu kia Sihová. ʻI he laui afeʻi taʻu kuohilí, naʻe fetongi ai ʻe Siosiua ʻa Mōsese ko e taki ʻo ʻIsilelí. Ke maʻu ʻa e tāpuaki ʻa Sihová, naʻe pau kia Siosiua ke ne lau kiate ia ʻa e Folofola ʻa e ʻOtuá. (Siosiua 1:8; Sāme 1:​1, 2) ʻOku kei hoko ia ko e fiemaʻu ʻi he ʻahó ni. Kae kehe, koeʻuhi ko e fakangatangata ʻo e tuʻunga fakaakó, ʻoku faingataʻaʻia nai pe ko ha fāinga lahi ia ki he niʻihi ʻa e lautohí. Ko ia, ko e hā ʻe lava ke ne tokoniʻi kitautolu ke tau saiʻia ke lau mo ako ʻa e Tohitapú? Ko e talí ʻe lava ke maʻu ia ʻi he ngaahi lea ʻa Solomone ʻoku hiki ʻi he Palovepi 2:​1-6. Kātaki ʻo fakaava hoʻo Tohitapú pea lau ʻa e ngaahi veesi ko ení. Pea te tau toki lāulea fakataha leva ki ai.

6. Ko e hā ʻa e faʻahinga fakakaukau ʻoku totonu ke tau fakahāhā fekauʻaki mo e ʻiloʻi ʻo e ʻOtuá?

⁶ Ke kamataʻaki, ʻoku tau maʻu ʻa e ekinaki ko ení: “ʻE hoku foha, kapau te ke tali ʻeku ngaahi leá pea koloaʻaki ʻiate koe ʻa ʻeku ngaahi fekaú tonu, koeʻuhi ke ke tokanga ki he potó ʻaki ho telingá, ke ke lava ai ʻo ofeʻi ho lotó ki he ʻiloʻiló; . . .” (Palovepi 2:​1, 2, NW) Ko e hā ʻa e meʻa ʻoku tau ako mei he ngaahi leá ni? Ko e fatongia ia ʻoku tō kia kitautolu tāutaha. Fakatokangaʻi ʻa e tuʻunga “kapau te ke tali ʻeku ngaahi leá.” Ko e “kapau” hā mahino ia koeʻuhí ko e tokolahi taha ʻo e kakaí ʻoku ʻikai ke nau tokanga kinautolu ki he Folofola ʻa e ʻOtuá. Ke tau fiefia ʻi hono ako ʻo e Folofola ʻa e ʻOtuá, kuo pau ke tau loto-lelei ke tali ʻa e ngaahi lea ʻa Sihová pea tauhi ia hangē ha koloa mahuʻinga ʻoku ʻikai ke tau loto ke molé. ʻOku totonu ke ʻoua ʻaupito te tau tuku ʻetau founga-tuʻumaʻu fakaʻahó ke ne fakatupunga kitautolu ke tau hoko ʻo mātuʻaki femoʻuekina ai pe fakaleluʻi ʻo kamata ai ke tau tauhi ʻa e Folofola ʻa e ʻOtuá ʻi he taʻemahuʻingaʻia, naʻa mo e filifilingaua.​—Loma 3:​3, 4.

7. ʻI ha taimi pē ʻoku malava ai, ko e hā ʻoku totonu ai ke tau maʻu pea tokanga ʻi he ngaahi fakataha faka-Kalisitiané?

⁷ ʻOku tau “tokanga” moʻoni ʻo fanongo lelei ʻi he taimi ʻoku fakamatalaʻi ai ʻa e Folofola ʻa e ʻOtuá ʻi heʻetau ngaahi fakataha faka-Kalisitiané? (Efeso 4:​20, 21) ʻOku tau ‘ofeʻi hotau lotó’ ke maʻu ʻa e ʻiloʻiló? Mahalo pē ko e tokotaha malangá ʻoku ʻikai ko e taukei tahá ia, kae lolotonga ʻokú ne tofa mai ʻa e Folofola ʻa e ʻOtuá, ʻoku tuha ia mo ʻetau tokanga kakató. Ko e moʻoni, ke tokanga ki he poto ʻo Sihová, kuo pau, ʻi ha taimi pē ʻoku malava aí, ke tau ʻi he ngaahi fakataha faka-Kalisitiané. (Palovepi 18:1) Fakaʻuta atu ki he loto-mamahi ʻa ha taha naʻe tō mei he fakataha ko ia ʻi he loki ʻi ʻolunga ʻi Selusalemá ʻi he Penitekosi 33 T.S.! Neongo ʻoku ʻikai ke fakaholomamata ʻetau ngaahi fakatahá ʻo hangē ko iá, ko e Tohitapú, ʻa ʻetau tohi ako tefitó, ʻoku fai ʻa e lāulea aí. Ko ia ai, ko e fakataha kotoa pē ʻe lava ke hoko ia ko ha tāpuaki kia kitautolu kapau ʻoku tau tokanga pea muimui fakataha ʻi heʻetau Tohitapú.​—Ngāue 2:​1-4; Hepelu 10:​24, 25.

8, 9. (a) Ko e hā ʻoku fiemaʻu ʻe he ako fakafoʻituituí meia kitautolú? (e) ʻE anga-fēfē haʻo fakahoa ʻa e mahuʻinga ʻo e koulá ki hono mahinoʻi ʻo e ʻiloʻi ʻa e ʻOtuá?

⁸ Ko e ngaahi lea hono hoko ʻa e tuʻi potó ʻoku pehē: “ʻIkai ngata ai, kapau te ke ui ki he mahinó tonu pea haʻaki ho leʻó ki he ʻiloʻiló tonu, . . .” (Palovepi 2:​3, NW) Ko e hā ʻa e fakakaukau pe laumālie ʻoku fakahoko mai ʻe he ngaahi lea ko ení kia kitautolú? Ko e moʻoni, ko ha holi fakamātoato ke mahinoʻi ʻa e Folofola ʻa Sihová! ʻOku nau fakahuʻunga ha loto-lelei ke ako mo ha vakai atu ke maʻu ʻa e ʻiloʻiló, ke ʻiloʻi ko e hā ʻa e finangalo ʻo Sihová. Ko e meʻá ni foki, ʻoku fiemaʻu ki ai ʻa e feinga, pea ʻoku taki atu ai kitautolu ki he ngaahi lea mo e fakatātā hono hoko ʻa Solomoné.​—Efeso 5:​15-17.

⁹ ʻOkú ne hoko atu: “Kapau te ke hanganaki  kumi ki ai ʻo hangē ki ha siliva, pea hanganaki fekumi ki ai ʻo hangē ko hoʻo fai ki ha koloa fufuú, . . .” (Palovepi 2:​4, NW) ʻOku ʻai ʻe he meʻá ni kitautolu ke tau fakakaukau atu ki he ngaahi lavameʻa ʻi he keli koloá ʻa e kau tangata kuo nau kumi ʻi he faai mai ʻa e ngaahi senitulí ki he ngaahi mētale mahuʻinga ko ia hangē ko e silivá mo e koulá. Kuo tāmate ʻa e tangatá koeʻuhi ko e koulá. Kuo fakamoleki ʻe he niʻihi e kotoa ʻenau moʻuí he feinga ke kumi ki aí. Neongo ia, ko e hā ʻa e mahuʻinga moʻoni ʻoku maʻu ʻe he koulá? Kapau ʻokú ke hē ʻi ha toafa pea ʻokú ke mate he fieinuá, ko fē te ke saiʻia ange aí: ko ha konga koula pe ko ha ipu vai? Neongo ia, he faivelenga lahi moʻoni kuo kumiʻaki ʻe he tangatá ki he koulá, mo hono mahuʻinga fakangatangata mo fetōʻakí! a He faivelenga lahi ange ē ʻoku totonu ke tau kumiʻaki ki he potó, ʻiloʻiló, mo e mahinoʻi ʻo e ʻOtuá mo hono finangaló! Ka ko e hā ʻa e ngaahi ʻaonga ʻo ha fekumi pehē?​—Sāme 19:​7-10; Palovepi 3:​13-18.

10. Ko e hā ʻoku lava ke tau maʻú kapau ʻoku tau ako ʻa e Folofola ʻa e ʻOtuá?

¹⁰ ʻOku hoko atu ʻa e fakamatala ʻa Solomoné: “ʻI he tuʻunga ko iá te ke toki mahinoʻi ai ʻa e manavahē kia Sihová, pea te ke maʻu ai ʻa e ʻiloʻi tonu ʻo e ʻOtuá.” (Palovepi 2:​5, NW) He fakakaukau fakatupu tāfuʻua ē​—ʻa e malava ʻe kitautolu faʻahinga angahalaʻia ʻo e tangatá ke maʻu “ʻa e ʻiloʻi tonu ʻo e ʻOtuá,” ʻa Sihova, ko e ʻEiki Hau ʻo e ʻunivēsí! (Sāme 73:28; Ngāue 4:24) Ko e kau filōsefá mo e kau tangata poto ʻoku taku ʻo e māmaní kuo nau feinga ʻi he laui senituli ke mahinoʻi ʻa e ngaahi misiteli ʻo e moʻuí mo e ʻunivēsí. Kae kehe, kuo nau taʻemalava ke maʻu “ʻa e ʻiloʻi tonu ʻo e ʻOtuá.” Ko e hā hono ʻuhingá? Neongo kuo ala maʻu ia ʻi he lauiafeʻi taʻu ʻi he Folofola ʻa e ʻOtuá, ʻa e Tohitapú, naʻa nau tukunoaʻi ia ʻo pehē ʻoku fuʻu faingofua ʻo nau taʻemalava ai ke tali mo mahinoʻi ia.​—1 Kolinito 1:​18-21.

11. Ko e hā ʻa e ngaahi ʻaonga ʻe niʻihi ʻo e ako fakafoʻituituí?

¹¹ Ko e toe fakaʻaiʻai eni ʻe taha ʻoku fakamamafaʻi mai ʻe Solomone: “He ʻoku foaki poto ʻe Sihova tonu; ʻoku mei hono ngutú ʻa e ʻiló mo e ʻiloʻiló.” (Palovepi 2:​6, NW) ʻOku ʻomi tauʻatāina mo loto-lelei ʻe Sihova ʻa e potó, ʻiló, mo e ʻiloʻiló ki ha taha pē ʻoku fie kumi ki he ngaahi meʻá ni. ʻOku pau moʻoni mo kitautolu ke tau fakamahuʻingaʻi lahi ʻa e ako fakafoʻituitui ʻo e Folofola ʻa e ʻOtuá, neongo kapau ʻoku fiemaʻu ki ai ʻa e feinga,  akonekina, mo e feilaulau. He ko ē kuo tau ʻosi maʻu ʻa e ngaahi tatau kuo pulusi ʻo e Tohitapú ʻo ʻikai fiemaʻu ke tau toe faʻu ha ngaahi tatau tohinima, ʻo hangē ko ia naʻe fai ʻe he niʻihi ʻi he kuonga muʻá!​—Teutalonome 17:​18, 19.

Ke ʻAʻeva Taau mo Sihova

12. Ko e hā ʻoku totonu ko ʻetau taumuʻá ia ʻi he tuli ki he ʻiloʻi ʻo e ʻOtuá?

¹² Ko e hā ʻoku totonu ko e taumuʻa ia ʻoku tau fai ai ʻa e ako fakafoʻituituí? Ke hā ʻoku tau sai ange ʻi he niʻihi kehé? Ke fakahāhā ha ʻilo māʻolunga ange? Ke hoko, hangē ko e laú, ko ha fuʻu ʻenisaikolopētia Tohitapu ʻoku ʻaʻeva? ʻIkai. Ko ʻetau taumuʻá ke tau hoko ko e kau Kalisitiane ʻoku ʻaʻeva, talanoa, mo ngāue, ʻo mateuteu maʻu pē ke tokoniʻi ʻa e niʻihi kehé, ʻi he laumālie fakaivifoʻou ʻo Kalaisí. (Mātiu 11:​28-30) Naʻe fakatokanga ʻa e ʻapositolo ko Paulá: “Ko e ʻilo ko e meʻa fakafuofuolahi ia, ka ko e ʻofa ko e meʻa langa hake.” (1 Kolinito 8:1) Ko ia ai, ʻoku totonu ke tau maʻu ʻa e fakakaukau fakatōkilalo naʻe fakahāhaaʻi ʻe Mōsese ʻi he taimi naʻá ne pehē ai kia Sihova: “Ke ke fakaʻilo mai muʻa ho hala, ke u ʻiloʻi koe; koeʻuhiā ke u fakahoifua ʻa e ʻAfiona.” (Ekisoto 33:13) ʻIo, ʻoku totonu ke tau holi ki he ʻiló koeʻuhi ke tau fakahōifua ki he ʻOtuá, ʻikai ko e fakamānako ki he tangatá. ʻOku tau loto ke hoko ko e kau sevāniti taau mo anga-fakatōkilalo ʻa e ʻOtuá. ʻE lava fēfē ke tau aʻusia ʻa e taumuʻa ko iá?

13. Ko e hā ʻoku fiemaʻu ki ha taha ke hoko ko ha sevāniti taau ʻa e ʻOtuá?

¹³ Naʻe faleʻi ʻe Paula ʻa Tīmote fekauʻaki mo e founga ke fakahōifua ai ki he ʻOtuá, ʻo pehē: “Ke ke feinga ke fakaha koe ki he ʻOtua ʻoku ke tuʻu mo e lau; ko e tangata ngaue ʻoku ʻikai mā, ko hoʻo tofa totonu ʻa e folofola ʻo e moʻoni.” (2 Timote 2:15) Ko e fakalea ko ia “tofa totonu” ko e haʻu ia mei he foʻi veape komipauni Kalisi naʻe ʻuhinga tefitó ko e “tutuʻu hangatonu,” pe ‘tuʻusi hangatonu.’ (Kingdom Interlinear) Fakatatau ki he niʻihi, ʻoku fokotuʻu ʻe he meʻá ni ʻa e fakakaukau ʻo ha tangata tuitui ʻokú ne kosi ʻa e tupenú ʻo fakatatau ki he sīpingá, ko ha tangata faama ʻokú ne palau fahi ha ngoueʻanga, pea mo e hā fua. Kae kehe, ko e olá kuo pau ke totonu, pe hangatonu. Ko e poiní ia ke hoko ko ha sevāniti taau mo fakahōifua ki he ʻOtuá, naʻe pau kia Tīmote ‘ke ne feinga’ ke fakapapauʻi ko ʻene akonakí mo hono ʻulungāngá naʻe tatau mo e lea ʻo e moʻoní.​—1 Timote 4:16.

14. ʻOku totonu ke fēfē hono hanga ʻe heʻetau ako fakafoʻituituí ʻo tākiekina ʻa e meʻa ʻoku tau faí mo leaʻakí?

¹⁴ Naʻe toe ʻai ʻe Paula ʻa e poini tatau ʻi he taimi naʻá ne ekinaki ai ki he kau Kalisitiane ʻi Kolosé ke “aeva o tāu moe Eiki o fakafiemalie i he mea kotoabe” ʻaki ʻa e “fua lahi i he gaue lelei kotoabe, bea tubulekina i he iloʻi ae Otua.” (Kolose 1:​10, PM) ʻI hení ʻoku fakafelāveʻi ʻe Paula ʻa e hoko ʻo taau mo Sihová ki he “fua lahi i he gaue lelei kotoabe” pea pehē ki he “tubulekina i he iloʻi ae Otua.” ʻI hono fakalea ʻe tahá, ko e meʻa ʻoku lau ʻe Sihová ʻoku ʻikai ngata pē ʻi he lahi ʻo ʻetau fakamahuʻingaʻi ʻa e ʻiló kae pehē foki ki he anga ʻo ʻetau piki ofi ki he Folofola ʻa e ʻOtuá ʻi he meʻa ʻoku tau faí mo leaʻakí. (Loma 2:​21, 22) ʻOku ʻuhinga ení ko ʻetau ako fakafoʻituituí kuo pau ke ne tākiekina ʻetau fakakaukaú mo hotau ʻulungāngá kapau ʻoku tau loto ke fakahōifua ki he ʻOtuá.

15. ʻE lava fēfē ke tau maluʻi mo mapuleʻi hotau ʻatamaí mo ʻetau fakakaukaú?

¹⁵ ʻI he ʻahó ni, ʻoku fakapapauʻi ʻe Sētane ke fakaʻauha hotau tuʻunga fakalaumālié ʻaki hono pouaki ha faitau fekauʻaki mo e ʻatamaí. (Loma 7:​14-25) Ko ia ai, kuo pau ke tau maluʻi pea mapuleʻi hotau ʻatamaí mo ʻetau fakakaukaú koeʻuhi ke fakamoʻoniʻi ʻa ʻetau taau ki hotau ʻOtuá, ʻa Sihova. Ko e meʻatau ʻoku tau maʻú ko e “ʻilo ki he ʻOtua,” ʻa ia ʻoku malava ke ne “taki popula ʻa e feinga kotoa  pe ʻa e loto [“fakakaukaú,” NW] ke Fakavaivai kia Kalaisi.” Ko e toe ʻuhinga lahi ia kia kitautolu ke tau tokanga ai ki he ako Tohitapu fakaʻahó, he ʻoku tau loto ke toʻo atu ʻa e ngaahi fakakaukau siokita mo fakakakanó mei hotau ʻatamaí.​—2 Kolinito 10:5.

Ngaahi Tokoni ki he Mahinó

16. ʻE lava fēfē ke tau maʻu ʻaonga tonu ʻi hono akoʻi kitautolu ʻe Sihová?

¹⁶ ʻOku ʻomi ʻe he akonaki ʻa Sihová ʻa e ngaahi ʻaonga fakalaumālie mo fakaesino. ʻOku ʻikai ko ha teolosia ia ʻoku mate mo taʻeʻaonga. Ko ia ai, ʻoku tau lau: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.” (Aisea 48:17) ʻOku anga-fēfē hono fakatupunga kitautolu ʻe Sihova ke tau ʻaʻeva ʻi hono hala ʻoku ʻaongá? ʻUluakí, ʻoku tau maʻu ʻene Folofola fakamānavaʻí, ʻa e Tohitapu Māʻoniʻoní. Ko e ʻetau tohi ako tefitó eni, ʻa ia ʻoku tau hanga maʻu pē ki aí. Ko e ʻuhinga ia ʻoku lelei ai ke muimui ʻi he ngaahi fakataha faka-Kalisitiané mo ha Tohitapu ʻoku fakaava. Ko e ngaahi ola ʻaonga ʻo e fai peheé ʻe lava ke mātā ia ʻi he fakamatala fekauʻaki mo e ʻiunoke ʻItiopeá, ʻa ia ʻoku lēkooti ʻi he Ngāue vahe 8.

17. Ko e hā naʻe hoko ʻi he tuʻunga ʻo e ʻiunoke ʻItiopeá, pea ko e hā ʻoku fakatātaaʻi ʻe he meʻá ni?

¹⁷ Ko e ʻiunoke ʻItiopeá ko ha tokotaha ului ia ki he lotu faka-Siú. Ko ha tokotaha tui loto-moʻoni ia ki he ʻOtuá, pea naʻá ne ako ʻa e ngaahi Konga Tohitapú. ʻI he fononga ʻi heʻene salioté, naʻá ne lau ai ʻa e konga tohi ʻa ʻAiseá ʻi he taimi naʻe lele atu ai ʻa Filipe ʻi hono tafaʻakí mo ne ʻeke: “ʻOku ke ʻilo ʻa e ʻuhinga ʻo e meʻa ʻoku ke lau?” Naʻe anga-fēfē tali ʻa e ʻiunoké? “ʻO u ʻilo fēfē, taʻe ha taha ke ne fakahinohino au? Pea ne kole kia Filipe ke ne heka mai ke na nonofo.” Pea hanga leva ʻe Filipe, ʻi he tataki ʻa e laumālie māʻoniʻoní, ʻo tokoniʻi ʻa e ʻiunoké ke ne mahinoʻi ʻa e kikite ʻa ʻAiseá. (AiseaNgāue 8:​27-35) Ko e hā ʻoku fakatātaaʻi ʻe he meʻá ni? Ko ʻetau lautohi fakafoʻituitui ʻo e Tohitapú ʻoku ʻikai feʻunga pē ai. Ko Sihova, ʻaki hono laumālié, ʻokú ne ngāueʻaki ʻa e kalasi tamaioʻeiki anga-tonu mo potó ke tokoniʻi kitautolu ke mahinoʻi ʻene Folofolá ʻi he taimi totonú. ʻOku anga-fēfē hono fai ení?​—Mātiu 24:​45-47, PM; Luke 12:42.

18. ʻOku anga-fēfē hono tokoniʻi kitautolu ʻe he tamaioʻeiki anga-tonu mo potó?

¹⁸ Neongo ʻoku fakamatalaʻi ʻa e kalasi tamaioʻeikí ʻoku “agatonu mo boto,” naʻe ʻikai pehē ʻe Sīsū ia ʻe ʻikai haʻane hala. Ko e kulupu ko eni ʻo e fanga tokoua pani anga-tonú ʻokú ne kei maʻu ʻa e kau Kalisitiane taʻehaohaoa. Naʻa mo ʻenau taumuʻa lelei tahá, ʻe lava ke nau kei fehālaaki pē, ʻo hangē ko ia naʻe hoko ʻi he taimi ʻe niʻihi ki he kau tangata ʻi he ʻuluaki senitulí. (Ngāue 10:​9-​15; Kaletia 2:​8, 11-​14) Kae kehe, ko ʻenau taumuʻá ʻoku maʻa, pea ʻoku ngāueʻaki kinautolu ʻe Sihova ke tokonaki kia kitautolu ʻa e ngaahi tokoni ki he ako Tohitapú ke langa hake ʻetau tuí ʻi he Folofola ʻa e ʻOtuá mo ʻene ngaahi talaʻofá. Ko e tokonaki tefito ki he ako fakafoʻituituí kuo ʻomai kia kitautolu ʻe he tamaioʻeikí ko e New World Translation of the Holy Scriptures. ʻOku maʻu ia ʻi he taimí ni, kakato pe ʻi he konga, ʻi he lea ʻe 42, pea ko e tatau ʻe 114 miliona ʻi he ngaahi pulusinga kehekehe kuo pulusí. ʻE lava fēfē ke tau ngāueolaleleiʻaki ia ʻi heʻetau ako fakafoʻituituí?​—2 Timote 3:​14-17.

19. Ko e hā ʻa e ngaahi tafaʻaki ʻe niʻihi ʻo e New World Translation​—With References ʻe lava ke ʻaonga ʻi he ako fakafoʻituituí?

 ¹⁹ Ko e fakatātaá, hangē ko e New World Translation of the Holy Scriptures​—With References. ʻOku ʻi ai hono ngaahi kōlomu ki he ngaahi maʻuʻanga fakamatala fekolosiʻaki, ngaahi fakamatala ʻi lalo, ko ha konikōtieni siʻisiʻi ʻi he fōtunga ʻo ha “ʻIniteki ʻo e Ngaahi Foʻilea Faka-Tohitapú” mo ha “ʻIniteki ʻo e Ngaahi Foʻilea Fakamatala ʻi Lalo,” pea mo ha ʻApenitiki ʻokú ne kāpui ʻa e ngaahi kaveinga lahi ʻe 43, kau ai ʻa e ngaahi mape mo e ngaahi saati. ʻOku toe ʻi ai mo e “Talateu,” mo hono ngaahi fakamatala ki he ngaahi maʻuʻanga fakamatala lahi ʻoku ngāueʻaki ki he liliu laulōtaha ko eni ʻo e Tohitapú. Kapau ʻoku ala maʻu ia ʻi ha lea ʻoku lava ke ke mahinoʻi, feinga leva ke alāanga ʻaupito mo e ngaahi tafaʻaki ko ení pea ngāueʻaongaʻaki kinautolu. Kae kehe, ko e Tohitapú ʻa e kamataʻanga ki heʻetau polokalama akó, pea ʻi he New World Translation, ʻoku tau maʻu ai ha liliu ʻokú ne fakamamafaʻi totonu ʻa e huafa fakaʻotuá ʻo hangē ko ʻene fakamamafaʻi ʻa e pule ʻa e Puleʻanga ʻo e ʻOtuá.​—Sāme 149:​1-9; Taniela 2:​44; Mātiu 6:​9, 10.

20. Ko e hā ʻa e ngaahi fehuʻi fekauʻaki mo e ako fakafoʻituituí ʻoku fiemaʻu he taimí ni hano tali?

²⁰ Sai, te tau ʻeke nai, ‘Ko e hā ha toe tokoni ʻoku tau fiemaʻu ke mahinoʻi ʻa e Tohitapú? ʻE lava fēfē ke tau tuku ha taimi ki he ako fakafoʻituituí? ʻE lava fēfē ke tau ʻai ʻetau ako fakafoʻituituí ke ola lelei ange? ʻOku totonu ke tākiekina fēfē ʻe heʻetau akó ʻa e niʻihi kehé?’ Ko e kupu hono hokó ʻe lāulea ki he ngaahi tafaʻaki mahuʻinga ko ení ʻi heʻetau fakaʻau ki muʻa faka-Kalisitiané.

[Fakamatala ʻi lalo]

ʻOkú Ke Manatuʻi?

• Ko e hā ʻa e ʻuhinga ke “fakalaulauloto” pea ke “fakakaukaulotó”?

• Ko e hā ʻa e fakakaukau ʻoku totonu ke tau maʻu fekauʻaki mo hono ako ʻo e Folofola ʻa e ʻOtuá?

• Ko e hā ʻa e taumuʻa ʻoku totonu ke tau maʻu ʻi heʻetau ako fakafoʻituituí?

• Ko e hā ʻa e ngaahi tokoni ki hono mahinoʻi ʻo e Tohitapú ʻoku tau maʻú?

[Fehuʻi ki he Ako]

[Fakatātā ʻi he peesi 15]

ʻOku ʻilo ʻe he ngaahi mēmipa ʻo e fāmili Pētelí ʻoku fakaivimālohi fakalaumālie ke kamata ʻa e ʻaho taki taha ʻaki ʻa e lāulea ki ha konga Tohitapu

[Fakatātā ʻi he peesi 15]

ʻE lava ke ngāueʻaongaʻaki ʻa e taimí ʻaki ʻa e fanongo ki he ngaahi foʻi tepi faka-Tohitapú lolotonga ʻetau fononga holó

[Fakatātā ʻi he peesi 16]

Kuo ngāue mālohi mo lōloa ʻa e tangatá ke maʻu ʻa e koulá. Ko e hā ʻa e lahi ʻo e feinga ʻokú ke fai ke ako ʻa e Folofola ʻa e ʻOtuá?

[Maʻuʻanga]

Courtesy of California State Parks, 2002

[Fakatātā ʻi he peesi 17]

Ko e Tohitapú ko ha koloa ia ʻe lava ke taki atu ki he moʻui taʻengatá