‘Mou Fefakamolemoleʻaki’

ʻOKÚ KE tui kuo fakamolemoleʻi ʻe he ʻOtuá hoʻo ngaahi angahalá? ʻI he ʻIunaite Seteté, ʻoku hā ngali ʻoku tui pehē ʻa e tokolahi taha ʻo e kakai lalahí. Ko Dr. Loren Toussaint, ʻa e taki faʻu-tohi ʻo ha ako naʻe fai ʻi he ʻUnivēsiti ʻo e Akoʻanga Michigan ki he Fekumi Fakasōsialé, ʻokú ne fakamatala ʻo pehē, ʻi he kau ʻAmelika ʻe toko 1,423 naʻe saveaʻí, ko e peseti nai ʻe 80 ʻo e kakai lalahi laka hake honau taʻumotuʻá ʻi he taʻu 45 naʻa nau pehē kuo fakamolemoleʻi ʻe he ʻOtuá ʻenau ngaahi angahalá.

Kae kehe, ʻoku mahuʻingá, he ko e peseti pē ʻe 57 ʻo e faʻahinga ʻi he savea ko iá naʻa nau pehē ʻoku nau fakaaʻu atu ʻa e fakamolemolé ki he niʻihi kehé. ʻOku fakamanatu mai kia kitautolu ʻe he fika ko iá ʻa e ngaahi lea ʻa Sīsū ʻi he Malanga he Moʻungá: “Kapau te mou fakamolemole ʻa e ngāhi hala ʻa e kakai, pea ʻe fakamolemole kimoutolu ʻe hoʻomou Tamai Fakalangi: pea ka ʻikai te mou fakamolemole ʻa e ngāhi hala ʻa e kakai, pea ʻe ʻikai foki fakamolemole ʻe hoʻomou Tamai hoʻomou ngāhi hala.” (Mātiu 6:​14, 15) ʻIo, ko e fakamolemoleʻi ʻe he ʻOtuá ʻetau ngaahi angahalá ʻoku fakatuʻunga ia, ʻi hano konga, ʻi heʻetau mateuteu ke fakamolemoleʻi ʻa e niʻihi kehé.

Naʻe fakamanatu ʻe he ʻapositolo ko Paulá ki he kau Kalisitiane ʻi Kolosé ʻa e tefitoʻi moʻoni ko ení. Naʻá ne enginaki kia kinautolu: “Ka ai ha taha ʻoku ne koviʻia ʻi ha taha ʻi ha meʻa, ke mou fekatakiʻaki pe mo fefakamolemoleʻaki; ʻio, ʻo hange foki ne fakamolemole kimoutolu ʻe he ʻEiki, ke pehe pe mo kimoutolu.” (Kolose 3:13) Ko e moʻoni, ʻoku ʻikai faingofua maʻu pē ke fai eni. Ko e fakatātaá, ʻi he taimi ko koe ai ʻa e tokotaha ʻoku fai mai ki ai ʻa e ngaahi lea taʻefakakaukaú pe taʻeʻofá, ʻe lava ke hoko ʻo faingataʻa ke fakamolemoleʻi ia.

Neongo ia, ko e ngaahi ʻaonga ʻo hono fakaaʻu atu ʻa e fakamolemolé ʻoku lahi. Ko Dr. David R. Williams, ko ha faisaienisi sōsiale, naʻá ne pehē fekauʻaki mo ʻene fekumí: “ʻOku mau maʻu ha vahaʻangatae mātuʻaki mālohi ʻi he vahaʻa ʻo e fakamolemoleʻi ʻo e niʻihi kehé mo e moʻui lelei fakaʻatamaí ʻi he lotolotonga ʻo e kau ʻAmelika fatutangatá mo taʻumotuʻa angé.” ʻOku feongoongoi ia mo e ngaahi lea ʻa e tuʻi poto ko Solomoné, ʻa ia naʻá ne tohi ʻi he taʻu nai ʻe 3,000 kuohilí: “Ko e loto ʻoku toka ko e moʻuiʻanga ʻo e sino kotoa.” (Palovepi 14:30) Koeʻuhi ʻoku pouaki ʻe ha laumālie fakamolemole ʻa e ngaahi vahaʻangatae lelei mo e ʻOtuá pea mo hotau kaungāʻapí, ʻoku tau maʻu ʻa e ʻuhinga lelei ke hehema ai ke fefakamolemoleʻaki mei he lotó.​—Mātiu 18:35.