ʻOkú Ke Manatuʻi?

Kuó ke fiefia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻa e kaungāongoʻi, pea ko e hā ʻoku totonu ai ke fakatupulekina ia ʻe he kau Kalisitiané?

Ko e malava ia ke ʻai kita ʻi he tuʻunga ʻo ha tokotaha ʻe tahá, hangē ko hono ongoʻi ʻi hotau lotó ʻa e mamahi ʻa e tokotaha ʻe tahá. ʻOku akonakiʻi ʻa e kau Kalisitiané ke nau fakahaaʻi ʻa e ‘feongoʻiʻaki, feʻofaʻaki fakatokoua, mo e manavaʻofa.’ (1 Pita 3:​8, NW) ʻOku fokotuʻu ʻe Sihova ha faʻifaʻitakiʻanga kia kitautolu ke muimui ki ai ʻi hono fakahaaʻi ʻa e kaungāongoʻí. (Sāme 103:14; Sakalaia 2:8) ʻE lava ke tau fakalahi ʻetau ongongofuá ʻi he meʻá ni ʻaki ʻa e fanongo, tokanga mo e fakakaukauloto.​—4/15, peesi 24-6.

• Ke maʻu ʻa e fiefia moʻoní, ko e hā kuo pau ke muʻomuʻa ai ʻa e fakamoʻui fakalaumālié ʻi he fakaleleiʻanga fakaʻosi ki he ngaahi faingataʻaʻia fakasinó?

Ko e kakai moʻui lelei fakaesino tokolahi ʻoku ʻikai te nau fiefia, ʻi he lōmekina ʻe he ngaahi palopalemá. ʻI hono kehé, ko e kau Kalisitiane tokolahi ʻa ia ʻoku nau tofanga he ʻahó ni ʻi he faingataʻaʻia fakaesinó ʻoku nau fiefia lahi ʻi he tauhi kia Sihová. Ko e faʻahinga ʻoku maʻu ʻaonga mei he fakamoʻui fakalaumālié te nau maʻu ʻa e faingamālie ke hokosia ʻa hono fakangata ʻa e ngaahi faingataʻaʻia fakaesinó ʻi he māmani foʻoú.​—5/1, peesi 6-7.

• Ko e hā ʻoku fokotuʻu ai ʻe he Hepelu 12:16 ʻa ʻĪsoa ʻi he tuʻunga tatau mo ha tokotaha feʻauakí?

ʻOku fakahaaʻi ʻe he fakamatala faka-Tohitapú naʻe fakahāhā ʻe ʻĪsoa ha fakakaukau naʻe fakahangataha ki he ngaahi totongi he taimi pē ko iá mo ha taʻetokanga ki he ngaahi meʻa toputapú. Kapau ʻe fakaʻatā ʻe ha taha he ʻahó ni ʻa e faʻahinga fakakaukau ko iá ke tupulaki, ʻe lava ke iku ia ki he angahala mamafa, ʻo hangē ko ia ko e feʻauakí.​—5/1, peesi 10-11.

• Ko hai ʻa Tetuliane, pea ko e hā ʻoku ʻiloa ai iá?

Ko ha tokotaha-tohi ia mo e teolosia ʻa ia naʻe moʻui ʻi he senituli hono ua mo hono tolu T.S. ʻOku ʻiloa ia ʻi heʻene faʻu ha ngaahi tohi lahi ʻi hono taukapoʻi ʻa e lotu faka-Kalisitiane lau peé. Lolotonga hono fai ʻene taukapó, naʻá ne fakahū mai ai ʻa e ngaahi fakakaukau mo e ngaahi tui fakafilōsofia ʻa ia naʻe fakatoka ai ʻa e makatuʻunga ki he ngaahi fakameleʻi fakaetokāteline, hangē ko e Tolu-Tahaʻi-ʻOtuá.​—5/15, peesi 29-​31.

• Ko e hā ʻoku ʻikai tupu kakato ai mei he kēnisí ʻa e ngaahi mahaki, tōʻonga mo e mate ʻa e tangatá?

Kuo fakaʻosiʻaki ʻe he kau saienisí ʻoku ʻi ai moʻoni ha tupuʻanga fakakēnisi ki he ngaahi mahaki fakaetangata kehekehe, pea ʻoku tui ʻa e niʻihi ko e tōʻongá ʻoku fakapapauʻi ia ʻe hotau kēnisí. Neongo ia, ʻoku ʻomai ʻe he Tohitapú ʻa e fakamaama ki he tupuʻanga ʻo e faʻahinga ʻo e tangatá, ʻo kau ai ʻa e founga naʻe hoko mai ai ʻa e angahalá mo e taʻehaohaoá ʻo fakamamahiʻi ʻa e faʻahinga ʻo e tangatá. Lolotonga ʻe fakahoko nai ʻe he kēnisí ha ngafa ʻi hono fakafuo ʻa e ngaahi angaʻitangatá, ko ʻetau taʻehaohaoá mo hotau ʻātakaí ko e toe ongo tākiekina lahi ia.​—6/1, peesi 9-​11.

• ʻOku anga-fēfē hono fakamaama ʻe ha konga pepailo naʻe maʻu ʻi Oxyrhynchus, ʻIsipite, ʻa hono ngāueʻaki ʻa e huafa ʻo e ʻOtuá?

Ko e konga ko eni ʻo e Siope 42:​11, 12 mei he Septuagint faka-Kalisí ʻoku ʻi ai ʻa e Tetakalamatoní (ko e ngaahi foʻi mataʻitohi faka-Hepelū ʻe fā ʻo e huafa ʻo e ʻOtuá). Ko e toe fakamoʻoni eni ko e huafa ʻo e ʻOtuá ʻi he faka-Hepeluú naʻe hā ʻi he Septuagint, ʻoku faʻa lave ki ai ʻa e kau hiki-tohi ʻo e Ngaahi Konga Tohitapu Faka-Kalisi Kalisitiané.​—6/1, peesi 30.

• Ko e ngaahi tau ki he mate anga-fakamālohi mo fakamate ʻa e ʻEmipaea Lomá kuo fakahoa ia ki he ngaahi sipoti fē ʻoku mamata ai ha taha ʻi onopooni?

Ko ha fakaʻaliʻali ki muí ni ʻi he Colosseum ʻi Loma, ʻĪtali, ʻoku ʻomai ai ʻa e ngaahi faitatau ʻi onopooni ʻaki hono fakakau ai ʻa e ngaahi konga ʻi he vitioó ʻo e tau mo e pulú, fuhu fakapalōfesinalé, ngaahi lova meʻalele mo e paikí, pea mo e fuhu ʻa e kau mamatá ʻi ha ngaahi sipoti fakaeonopooni kehe. Naʻe ʻiloʻi ʻe he muʻaki kau Kalisitiané ʻoku ʻikai ʻofa ʻa Sihova ki he fakamālohí pe ko e faʻahinga fakamālohí, pea ʻoku ʻikai totonu ke pehē mo e kau Kalisitiane ʻi he ʻaho ní. (Sāme 11:5)​—6/15, peesi 29.

• ʻI heʻetau feinga ke hoko ko e kau faiako ola leleí, ko e hā ʻe lava ke tau ako mei he faʻifaʻitakiʻanga ʻa ʻĒselá?

ʻOku fakamamafaʻi ʻi he Esela 7:​10 (NW) ʻa e meʻa ʻe fā naʻe fai ʻe ʻĒsela, ko e ngaahi meʻa ʻa ia ʻe lava ke tau feinga ke faʻifaʻitaki ki ai. ʻOku pehē ai: “Naʻe [1] teuteuʻi ʻe ʻĒsela hono lotó [2] ke kumi faleʻi ki he lao ʻa Sihová pea [3] ke fai ki ai pea [4] ke akoʻi ʻi ʻIsileli ʻa e tuʻutuʻuní mo e fakamaau totonú.”​—7/1, peesi 20.

• Ko e hā ʻa e ongo tafaʻaki ʻe ua ʻo e ngāué ʻoku feʻungamālie ki ha fefine Kalisitiane ke ne tui ai ha pūlou?

Ko e taha ʻoku ʻi he ngaahi tuʻunga ʻoku malanga hake ʻi ʻapi ʻi he fāmilí. Ko ʻene tui ha pūloú ʻoku tapua mei ai ʻa e ʻiloʻi ʻoku fakafatongiaʻaki ʻa hono husepānití ke ne taki ʻi he lotú mo e fakahinohino faka-Tohitapú. Ko e taha ʻoku ʻi he ngaahi ngāue fakaefakatahaʻangá ia, ʻa ia ʻokú ne fakahaaʻi ai ʻa e lāuʻilo ʻoku fakamafaiʻi Fakatohitapu ʻa e kakai tangata ʻosi papitaisó ke nau faiako mo fakahinohino. (1 Kolinito 11:​3-​10)​—7/15, peesi 26-7.

• Ko e hā ʻoku ʻiloʻi ai ʻe he kau Kalisitiané ʻoku kau ki he ʻioká ʻa e meʻa lahi ange ia ʻi he fakamālohisinó pea ʻoku fakatuʻutāmakí?

Ko e taumuʻa akonekina ʻo e ʻioká ke tataki ha tokotaha ke ne hoko ai ʻo fakataha mo ha laumālie mahulu hake ʻi he tangatá. ʻI he kehe mei he tataki ʻa e ʻOtuá, ʻoku kau ki he ʻioká ʻa hono taʻofi ʻa e fakakaukau fakanatulá. (Loma 12:​1, 2) ʻE lava ke fakaeʻa ʻe he ʻioká ha taha ki he ngaahi fakatuʻutāmaki ʻo e fakahaʻele faʻahikehé mo e tui fakamēsikí. (Teutalonome 18:​10, 11)​—8/1, peesi 20-2.