Maʻu ʻAonga mei he ʻAloʻofa ʻa Sihová
Maʻu ʻAonga mei he ʻAloʻofa ʻa Sihová
“Kohai oku boto, bea tokaga ki he . . . aloofa ogogofua a Jihova.”—Sāme 107:43, PM.
1. Naʻe ʻuluaki ngāueʻaki ʻanefē ʻa e foʻi lea faka-Hepelū ki he “ʻaloʻofá” ʻi he Tohitapú, pea ko e hā ʻa e ngaahi fehuʻi fekauʻaki mo e ʻulungāngá ni te tau lāulea ki ai?
ʻI HE taʻu nai ʻe 4,000 kuohilí, naʻe pehē ai ʻe Lote ʻa ia naʻe fohaʻaki ʻe ʻĒpalahamé ʻo fekauʻaki mo Sihova: “Kuó ke fakaogo lahi hoo aloofa.” (Senesi 19:19, PM) Ko e ʻuluaki taimi eni ʻoku hā ai ʻi he Tohitapú ʻa e foʻi lea faka-Hepelū totonu ʻoku liliu ko e “ʻaloʻofá” ʻi he foʻi veesi ko ení. Ko Sēkope, Nāomi, Tēvita, mo e kau sevāniti kehe ʻa e ʻOtuá naʻa nau toe lea fekauʻaki mo e ʻulungaanga ko eni ʻo Sihová. (Senesi 32:10; Lute 1:8; 2 Samiuela 2:6) Ko hono moʻoní, ko e ongo kupuʻi lea “ʻaloʻofá” mo e “ngaahi ʻaloʻofá” ʻoku ʻasi tuʻo 250 nai ia ʻi he New World Translation of the Holy Scriptures. Ka ko e hā ʻa e ʻaloʻofa ʻa Sihová? Ko hai naʻe fakahaaʻi ki ai ʻi he kuohilí? Pea ʻoku anga-fēfē ʻetau maʻu ʻaonga mei ai ʻi he ʻaho ní?
2. Ko e hā ʻoku faingataʻa ai ke fakaʻuhingaʻi ʻa e foʻi lea faka-Hepelū ʻoku liliu ko e “ʻaloʻofá,” pea ko e hā hano fetongi totonu ʻo ia?
2 ʻI he ngaahi Konga Tohitapú, ko e “ʻaloʻofá” ko ha liliu ia ʻo ha kupuʻi lea faka-Hepelū mohu ʻuhinga lahi ʻo ʻikai ai ha foʻi lea pē ʻe taha ʻi he lahi taha ʻo e ngaahi leá te ne fakamatalaʻi tonu ʻa hono ʻuhinga kakató. Ko ia ai, ko e ngaahi fakalea hangē ko e “ʻofa,” “meesi,” mo e “loto-tōnungá” ʻoku ʻikai te nau maʻu ʻa hono ʻuhinga kakató. Kae kehe, ko e fakalea fakalūkufua ange ko e “ʻaloʻofá” ʻoku “ʻikai loko mamaʻo ia mei he ʻuhinga kakato ʻo e foʻi leá,” ko e lau ia ʻa e Theological Wordbook of the Old Testament. Ko e New World Translation of the Holy Scriptures—With References ʻoku ʻomai totonu ai ʻa e “ʻofa mateakí” ko ha fetongi ia ʻo e kupuʻi lea faka-Hepelū ʻoku liliu ko e “ʻaloʻofá.”—Ekisoto 15:13, NW; Sāme 5:7, NW; fakamatala ʻi laló.
Kehe mei he ʻOfá mo e Mateakí
3. ʻOku anga-fēfē ʻa e kehe ʻa e ʻaloʻofá mei he ʻofá?
3 Ko e ʻaloʻofá, pe ʻofa mateakí, ʻoku felāveʻi ofi ia mo e ongo ʻulungaanga ko e ʻofá mo e mateakí. Neongo ia, ʻoku kehe ia meiate kinaua ʻi he ngaahi founga mahuʻinga. Fakakaukau angé ki he founga ʻoku fekehekeheʻaki ai ʻa e ʻaloʻofá mo e ʻofá. ʻOku lava ʻa e ʻofá ke ngāueʻaki ia ki he ngaahi meʻá mo e ngaahi fakakaukaú. ʻOku lau ʻa e Tohitapú fekauʻaki mo e “ʻofa ki he uainé mo e loló” mo e “ʻofa ki he poto.” (Palovepi 21:17, NW; Palovepi 29:3) Ka ko e ʻaloʻofá ʻoku ngāueʻaki pē ia ki he kakaí, ʻo ʻikai ki he fakakaukaú pe ko e ngaahi meʻa maté. Hangē ko ení, ʻoku felāveʻi mo e kakaí ʻa e pehē ʻi he Ekisoto 20:6 (PM) ko Sihová ʻokú ne “fakaha ae aloofa ki he gaahi toko afe.”
4. ʻOku anga-fēfē ʻa e kehe ʻa e ʻaloʻofá mei he mateakí?
4 Ko e foʻi lea faka-Hepelū ʻoku fakalea ko e “ʻaloʻofá” ʻoku toe fālahi ange hono ʻuhingá ʻona ʻi he foʻi lea “mateakí.” ʻI he ngaahi lea ʻe niʻihi, ʻoku faʻa ngāueʻaki ai ʻa e “mateakí” ki he tōʻonga ʻoku totonu ke fakahaaʻi ʻe ha tokotaha māʻulalo ki ha tokotaha māʻolunga. Kae hangē ko ia ʻoku fakahaaʻi ʻe ha tokotaha fakatotolo, mei ha vakai faka-Tohitapu ko e ʻaloʻofá “ʻoku faʻa ʻuhinga lahi ange ia ki he tafaʻaki fehangahangai tofu pē ko ia ʻo e vahaʻangataé: ko e mālohí ʻoku mateaki ia ki he vaivaí pe ki he masivá pe māʻulaló.” Ko ia naʻe lava ai ke kōlenga ʻa Tuʻi Tēvita kia Sihova: “Tuku ke ulo mai ho fofoga ki hoo tamaioeiki: fakamoui au koeuhi ko hoo aloofa.” (Sāme 31:16, PM) Ko Sihova, ʻa e tokotaha mālohí, ʻoku kole ki ai ke ne fakahaaʻi ʻa e ʻaloʻofá, pe ʻofa mateakí, ki he tokotaha masiva ko Tēvitá. Koeʻuhi ʻoku ʻikai ha mafai ʻo e masivá ki he mālohí, ko hono fakahaaʻi ʻa e ʻaloʻofá ʻi he tuʻunga peheé ʻoku fakahāhaaʻi loto-lelei ia, ʻo ʻikai ʻi hano fakakounaʻi.
5. (a) Ko e hā ʻa e ngaahi anga ʻo e ʻaloʻofa ʻa e ʻOtuá ʻoku fakaeʻa ʻi heʻene Folofolá? (e) Ko e hā ʻa e ongo fakahāhā ʻo e ʻaloʻofa ʻa Sihová te tau lāulea ki aí?
5 “Kohai oku boto”? ko e ʻeke ia ʻa e tokotaha-tohi-sāmé. Te ne “tokaga ki he . . . aloofa ogogofua a Jihova.” (Sāme 107:43, PM) Ko e ʻaloʻofa ʻa Sihová ʻe lava ke iku ia ki he fakahaofi mo e haofaki. (Sāme 6:4; 119:88, 159) Ko ha maluʻi ia mo ha meʻa tefito ʻoku ʻomai ai ʻa e fiemālie mei he ngaahi faingataʻá. (Sāme 31:16, 21; 40:11; 143:12) Koeʻuhi ko e ʻulungaanga ko ení, ʻoku malava ai ʻa e fakaakeake mei he angahalá. (Sāme 25:7) ʻI he fakamanatu ha ngaahi talanoa Fakatohitapu pau pea fakatokangaʻi ʻa e ngaahi konga Tohitapu kehé, te tau ʻiloʻi ai ko e ʻaloʻofa ʻa Sihová ʻoku (1) fakahaaʻi ia ʻaki ʻa e ngaahi ngāue pau pea (2) ʻoku hokosia ia ʻe heʻene kau sevāniti loto-tōnungá.
Fakahaofí—Ko ha Fakahāhā ʻo e ʻAloʻofa
6, 7. (a) Naʻe anga-fēfē hono fakalahi ʻe Sihova ʻa ʻene ʻaloʻofá ʻi he tuʻunga ʻo Loté? (e) Ko fē ʻa e taimi naʻe lave ai ʻa Lote ki he ʻaloʻofa ʻa Sihová?
6 Mahalo ko e founga lelei taha ke fakapapauʻi ai ʻa e lahi ʻo e ʻaloʻofa ʻa Sihová ko hono sivisiviʻi ʻa e ngaahi fakamatala Fakatohitapu ʻoku fekauʻaki mo e ʻulungaanga ko ení. ʻI he Senesi 14:1-16, ʻoku tau ʻilo ai ko Lote, ʻa ia naʻe fohaʻaki ʻe ʻĒpalahamé, naʻe ʻave ia ʻe he ngaahi kongakau ʻa e filí. Ka naʻe fakahaofi ʻe ʻĒpalahame ʻa Lote. Naʻe toe ʻi he fakatuʻutāmaki ʻa e moʻui ʻa Loté ʻi he taimi naʻe fakapapauʻi ai ʻe Sihova ke fakaʻauha ʻa e kolo fulikivanu ko Sōtomá, ʻa ia naʻe nofo ai ʻa Lote mo hono fāmilí.—Senesi 18:20-22; 19:12, 13.
7 Ki muʻa pē ʻi he fakaʻauha ʻo Sōtomá, naʻe fakafeʻao ai ʻe he ongo ʻāngelo ʻa Sihová ʻa Lote mo hono fāmilí ki tuʻa mei he koló. ʻI he taimi ko iá, naʻe pehē ai ʻe Lote: “Kuo ofeina a hoo tamaioeiki i ho ao, bea kuó ke fakaogo lahi hoo aloofa, aia kuó ke fakaha kiate au, i hoo fakamoui au.” (Senesi 19:16, 19, PM) ʻI he ngaahi leá ni naʻe fakahaaʻi ai ʻe Lote kuo fakahaaʻi ʻe Sihova ʻa e ʻaloʻofa makehe atu ʻaki hono fakahaofi iá. ʻI he tuʻunga ko ení, naʻe fakahaaʻi ai ʻa e ʻaloʻofa ʻa e ʻOtuá fakafou ʻi he fakahaofi mo e haofakiʻi.—2 Pita 2:7.
ʻAloʻofa ʻa Sihová mo ʻEne Tatakí
8, 9. (a) Ko e hā ʻa e ngāue naʻe vaheʻi ki he tamaioʻeiki ʻa ʻĒpalahamé? (e) Ko e hā naʻe lotu ai ʻa e tamaioʻeikí ki he ʻaloʻofa ʻa e ʻOtuá, pea ko e hā naʻe hoko lolotonga ʻa ʻene lotú?
8 ʻI he Senesi vahe 24, ʻoku tau lau ai fekauʻaki mo e fakahāhā ʻe taha ʻo e ʻaloʻofa fakaʻotuá, pe ʻofa mateakí. ʻOku fakahaaʻi ʻi he fakamatalá naʻe fekauʻi ʻe ʻĒpalahame ʻa ʻene tamaioʻeikí ke fononga ki he fonua ʻo e kāinga ʻo ʻĒpalahamé ke kumi ai ha uaifi maʻa hono foha ko ʻAisaké. (Sen 24 Veesi 2-4) Naʻe faingataʻa ʻa e ngāue naʻe vaheʻí, ka naʻe fakapapauʻi ange ki he tamaioʻeikí ʻe hanga ʻe he ʻāngelo ʻa Sihová ʻo tataki ia. (Sen 24 Veesi 7) Naʻe faifai pē ʻo aʻu ʻa e tamaioʻeikí ki ha vaikeli ʻi tuʻa ʻi he “kolo ʻo Nehoa” (ʻi Hālani pe ko ha feituʻu ofi ai) ʻi he taimi tofu pē ko ia naʻe fakaofiofi mai ai ʻa e kau fefiné ke ʻutu vaí. (Sen 24 Veesi 10, 11) ʻI heʻene sio atu ʻoku ofi mai ʻa e kau fefiné, naʻá ne ʻiloʻi leva ai kuo aʻu ki he mōmeniti mahuʻinga taha ʻo ʻene ngāué. Ka ʻe lava fēfē ke ne fili ʻa e fefine totonú?
9 ʻI he lāuʻilo naʻá ne fiemaʻu ʻa e tokoni fakaʻotuá, naʻe lotu ʻa e tamaioʻeiki ʻa ʻĒpalahamé: “ʻE Sihova ko e ʻOtua ʻo ʻeku ʻeiki ko Epalahame, ke ke fakataʻimalieʻi au he ʻaho ni, mo ke fai [ʻalo]ʻofa ki heʻeku ʻeiki ko Epalahame.” (Sen 24 Veesi 12) ʻE anga-fēfē hono fakahāhā ʻe Sihova ʻa ʻene ʻaloʻofá? Naʻe kole ʻa e tamaioʻeikí ki ha fakaʻilonga pau ʻa ia ʻe lava ai ke ne ʻiloʻi ʻa e finemui kuo fili ʻe he ʻOtuá. (Sen 24 Veesi 13, 14) Naʻe fai ʻe he fefine ʻe taha ʻa e meʻa tofu pē ko ia naʻá ne kole ki ai meia Sihová. ʻIo, ne hangē ia naʻá ne fanongo ange ki heʻene lotú! (Sen 24 Veesi 15-20) ʻI he moʻutāfuʻuá, naʻe “moʻu vakaia ʻe he [tamaioʻeikí] ʻa e fefine.” Neongo ia, naʻe kei ʻi ai ʻa e ngaahi moʻoniʻi meʻa mātuʻaki mahuʻinga naʻe fiemaʻu ke fakapapauʻi. Ko e fefine hoihoifua ko ení ko e taha ia ʻo e kāinga ʻo ʻĒpalahamé? Pea naʻá ne kei nofo taʻemali? Ko ia ai, naʻe hanganaki “fakalongo pē, [ʻa e tamaioʻeikí] ke ʻilo pe kuo fakamonuʻia ʻe Sihova hono fononga pe ʻikai.”—Sen 24 Veesi 16, 21.
10. Ko e hā naʻe fakaʻosiʻaki ai ʻe he tamaioʻeiki ʻa ʻĒpalahamé kuo fakahaaʻi ʻe Sihova ʻa e ʻaloʻofa ki hono ʻeikí?
10 Taimi nounou mei ai, naʻe fakahaaʻi ia ʻe he finemuí “ko e ʻofefine au ʻo Petueli, ko e tama ia ʻa Milika ʻa ia naʻá ne fanauʻi kia Nehoa [ko e tokoua ʻo ʻĒpalahamé].” (Senesi 11:26; 24:24) ʻI he mōmeniti ko iá naʻe ʻiloʻi ai ʻe he tamaioʻeikí kuo tali ʻe Sihova ʻa ʻene lotú. ʻI he tāfuʻuá, naʻá ne punou ai ʻo ne pehē: “Malo mo Sihova, ko e ʻOtua ʻo ʻeku ʻeiki ko Epalahame, he ʻikai tukuā ʻene ʻaloʻofa mo ʻene moʻoni ki heʻeku ʻeiki: ʻi heʻeku ʻi he hala naʻe taki au ʻe Sihova ki he fale ʻo e tokoua oʻeku ʻeiki.” (Sen 24 Veesi 27) ʻI hono ʻomai ʻa e tatakí, naʻe fakahaaʻi ʻe he ʻOtuá ʻa e ʻaloʻofa ki he ʻeiki ʻa e tamaioʻeiki, ko ʻĒpalahamé.
Ko e ʻAloʻofa ʻa e ʻOtuá ʻOku ʻOmai Ai ʻa e Fiemālie mo e Maluʻi
11, 12. (a) ʻI he lolotonga ʻo e ngaahi ʻahiʻahi fē naʻe hokosia ai ʻe Siosifa ʻa e ʻaloʻofa ʻa Sihová? (e) Naʻe anga-fēfē hono fakahaaʻi ʻa e ʻaloʻofa ʻa e ʻOtuá ʻi he tuʻunga ʻo Siosifá?
11 Ko hono hokó, tau vakai angé ki he Senesi vahe 39. ʻOku fakatefito ia ʻi he mokopuna ua ʻo ʻĒpalahame ko Siosifá, ʻa ia naʻe fakatau atu ki he nofo pōpula ʻi ʻIsipité. Neongo e meʻa ko iá, “naʻe kau ʻa Sihova mo Siosifa.” (Sen 39 Veesi 1, 2) Ko hono moʻoní, naʻa mo e pule ʻIsipite ʻo Siosifá, ʻa Pōtifa, naʻá ne fakaʻosiʻaki ʻo pehē naʻe kau ʻa Sihova mo Siosifa. (Sen 39 Veesi 3) Kae kehe, naʻe fehangahangai ʻa Siosifa mo ha ʻahiʻahi mafatukituki ʻaupito. Naʻe tukuakiʻi loi ia ki he fakamālohiʻi fakaefehokotaki fakasino ʻa e uaifi ʻo Pōtifá pea naʻe tuku pilīsone. (Sen 39 Veesi 7-20) Ko e “ʻana [ʻi he pilīsoné]” naʻe “fakamamahi ʻaki [ai] ha seini hono vaʻe; naʻe fekuki ʻene moʻui mo e aione.”—Senesi 40:15; Sāme 105:18.
12 Ko e hā naʻe hoko lolotonga ʻa e meʻa mātuʻaki faingataʻa ko ia ne hokó? “Nae ia Josefa a Jihova, o ne aloofa kiate ia.” (Sen 39 Veesi 21a, PM) Ko ha foʻi ngāue tefito ʻo e ʻaloʻofá naʻá ne kamataʻi ha ngaahi ʻotu meʻa ʻa ia naʻe taki atu ai ki mui ki he fiemālie mei he ngaahi faingataʻa naʻe hokosia ʻe Siosifá. Naʻe tuku ʻe Sihova ʻa Siosifa ke ‘ofeina ia i he ao oe tauhi [“ʻōfisa pule,” NW] ʻo e fale fakabobulá.’ (Sen 39 Veesi 21e, PM) Ko hono olá, naʻe vaheʻi ange ʻe he ʻōfisá kia Siosifa ha lakanga falalaʻanga. (Sen 39 Veesi 22) Hoko atu aí, naʻe fetaulaki ʻa Siosifa mo e tangata ʻa ia naʻe faifai pē ʻo ne ʻave ia ki he tokanga ʻa Feló, ʻa e pule ʻo ʻIsipité. (Senesi 40:1-4, 9-15; 41:9-14) Naʻe hoko ai ʻo hiki hake ʻe he tuʻí ʻa Siosifa ki he lakanga ʻo e tokotaha-pule hono ua ʻi ʻIsipité, ʻo iku ai ki heʻene fakahoko ha ngāue fakahaofi-moʻui ʻi he fonua naʻe taaʻi ʻe he honge ko ʻIsipité. (Senesi 41:37-55) Naʻe kamata ʻa e faingataʻaʻia ʻa Siosifá ʻi heʻene taʻu 17 pea toki ʻosi ia ʻo laka hake ʻi he taʻu ʻe 12! (Senesi 37:2, 4; 41:46) Ka ʻi he kotoa ʻo e ngaahi taʻu ko ia ʻo e mamahí mo e faingataʻá, naʻe fakahaaʻi ai ʻe Sihova ko e ʻOtuá ʻa ʻene ʻaloʻofa kia Siosifá ʻaki hono maluʻi ia mei he fakatamaki taupotu tahá pea ʻi hono haofakiʻi ia ki ha ngafa makehe ʻi he taumuʻa fakaʻotuá.
ʻAloʻofa ʻa e ʻOtuá ʻOku ʻIkai ʻAupito ke Taʻemalava
13. (a) Ko e hā ʻa e ngaahi fakahāhā ʻo e ʻaloʻofa ʻa Sihová ʻoku maʻu ʻi he Sāme 136? (e) Ko e hā ʻa e natula ʻo e ʻaloʻofá?
13 Naʻe toutou fakahaaʻi ʻe Sihova ʻa ʻene ʻaloʻofá ki he kau ʻIsilelí ʻi he tuʻunga ko ha kakai. ʻOku fakamatala ʻa e Sāme 136 ʻo pehē ʻi heʻene ʻaloʻofá, naʻá ne fai ai kia kinautolu ʻa e fakahaofi (Sāme 136 Veesi 10-15), tataki (Sāme 136 Veesi 16), mo e maluʻi. (Sāme 136 Veesi 17-20) Kuo toe fakahāhā ʻe he ʻOtuá ʻa ʻene ʻaloʻofá ki ha faʻahinga tāutaha. Ko ha tokotaha ʻokú ne fakahaaʻi ʻa e ʻaloʻofá ki he kaungā faʻahinga ʻo e tangatá ʻokú ne fai ia ʻaki ʻa e ngaahi ngāue pole kuo fakataumuʻa ke fakahoko ai ha fiemaʻu mātuʻaki mahuʻinga. ʻI he fekauʻaki mo e ʻaloʻofá, ʻoku pehē ʻe ha tohi maʻuʻanga fakamatala faka-Tohitapu ʻe taha: “Ko ha ngāue ia ʻoku haofakiʻi ai pe hakeakiʻi ai ʻa e moʻuí. Ko e kau mai ia ki ha tokotaha ʻoku tofanga ʻi ha tuʻutāmaki pe faingataʻa.” ʻOku fakamatalaʻi ia ʻe ha mataotao ʻe taha ko e “ʻofa ʻoku liliuʻi ki he ngāue.”
14, 15. Ko e hā ʻe lava ai ke tau fakapapauʻi naʻe hoko ʻa Lote ko ha sevāniti fakahōifua ʻa e ʻOtuá?
14 Ko e ngaahi fakamatala ʻa Senesi kuo tau sivisiviʻí ʻoku fakahaaʻi mai ai kia kitautolu ʻoku ʻikai ʻaupito taʻemalava ʻe Sihova ke fakahāhā ʻa e ʻaloʻofá ki he faʻahinga ʻoku ʻofa kiate iá. Ko Lote, ʻĒpalahame, mo Siosifa naʻa nau moʻui ʻi he malumalu ʻo e ngaahi tuʻunga kehekehe pea fehangahangai mo e ngaahi ʻahiʻahi mātuʻaki kehekehe. Ko e faʻahinga taʻehaohaoa kinautolu, ka naʻa nau hoko ko e kau sevāniti fakahōifua ʻa Sihova, pea naʻa nau fiemaʻu ʻa e tokoni fakaʻotuá. ʻOku lava ke tau maʻu ʻa e fiemālie ʻi he ʻiloʻi ʻoku fakahāhā ʻe heʻetau Tamai fakahēvani ʻofá ʻa e ʻaloʻofa ki he faʻahinga tāutaha peheé.
15 Naʻe fai ʻe Lote ʻa e ngaahi fili taʻefakapotopoto ʻa ia naʻe iku ai ki he ngaahi faingataʻa. (Senesi 13:12, 13; 14:11, 12) Neongo ia, naʻá ne toe fakahāhā ʻa e ngaahi ʻulungaanga ʻoku taau ke fakaongoongoleleiʻi. ʻI he aʻu atu ki Sōtoma ʻa e toko ua ʻo e kau ʻāngelo ʻa e ʻOtuá, naʻe fakahaaʻi ai ʻe Lote kia kinaua ʻa e anga-talitali kakaí. (Senesi 19:1-3) ʻI he tuí, naʻá ne fakatokanga ai ki hono ongo foha-ʻi-he-fonó fekauʻaki mo e fakaʻauha ʻo Sōtoma ʻoku tuʻunuku maí. (Senesi 19:14) Ko e vakai ʻa e ʻOtuá kia Loté ʻoku maʻu ia ʻi he 2 Pita 2:7-9 (PM), ʻa ia ʻoku tau lau ai: “[Ko Sihova naʻá] ne fakamoui a Lote agatonu, aia nae mamahi i he ulugaaga fakalielia ae kau agahala: (He nae nofo ae tagata maonioni koia iate kinautolu, bea i he ene mamata mo fanogo, nae fakamamahi a hono laumalie maonioni, i he aho kotoabe, aki e nau gaahi faiaga taetotonu;) oku ilo e he Eiki ke fakamoui ae kakai aga[līʻoa] faka-Otua mei he gaahi ahiahi.” ʻIo, ko Loté ko ha tangata naʻe māʻoniʻoni, pea ko e fakalea hení ʻoku fakahuʻunga ai ko ha tokotaha ia naʻe anga-līʻoa fakaʻotua. ʻI he hangē ko iá, ʻoku tau maʻu ʻa e ʻaloʻofa ʻa e ʻOtuá ʻi heʻetau kau ʻi he “ulugaaga maonioni moe aga[līʻoa] faka-Otua.”—2 Pita 3:11, 12, PM.
16. Ko e hā ʻa e ngaahi kupuʻi lea lelei ʻoku leaʻaki ʻe he Tohitapú fekauʻaki mo ʻĒpalahame pea mo Siosifá?
16 Ko e fakamatala ʻi he Senesi vahe 24 ʻoku fakahaaʻi mahino ai ʻa e vāofi ʻa ʻĒpalahame mo Sihová. Ko e ʻuluaki vēsí ʻoku pehē ai naʻe ‘fakamonuʻia ʻa ʻĒpalahame ʻe Sihova ʻi he meʻa kotoa pe.’ Naʻe ui ʻe he sevāniti ʻa ʻĒpalahamé ʻa Sihova “ko e ʻOtua ʻo ʻeku ʻeiki ko Epalahame.” (Sen 24 Veesi 12, 27) Pea ʻoku pehē ʻe he ākonga ko Sēmisí ko ʻĒpalahamé naʻe “fakahaaʻi ʻokú ne māʻoniʻoni” pea “naʻe hoko ʻo ui ko e ‘kaumeʻa ʻo Sihova.’” (Semisi 2:21-23, NW) Ko e meʻa tatau pē ʻoku hoko ʻia Siosifá. Ko e vahaʻangatae vāofi ʻi he vahaʻa ʻo Sihova mo Siosifá ʻoku fakamamafaʻi ia ʻi he kotoa ʻo e Senesi vahe 39. (Gen 39 Veesi 2, 3, 21, 23) ʻIkai ngata aí, ʻi he fekauʻaki mo Siosifá, naʻe pehē ʻe he ākonga ko Sitīvení: “Naʻe ʻiate ia ʻa e ʻOtua.”—Ngāue 7:9.
17. Ko e hā ʻoku lava ke tau ako mei he ngaahi faʻifaʻitakiʻanga ʻa Lote, ʻĒpalahame pea mo Siosifá?
17 Ko e faʻahinga naʻa nau maʻu ʻa e ʻaloʻofa fakaʻotua kuo tau toki ʻosi lāulea ki aí, ko e faʻahinga tāutaha ia naʻa nau maʻu ha vahaʻangatae lelei mo Sihova ko e ʻOtuá pea naʻa nau fakahoko ʻa e taumuʻa fakaʻotuá ʻi he ngaahi founga kehekehe. Naʻa nau fehangahangai mo e ngaahi fakafaingataʻaʻiaʻanga naʻe ʻikai mei lava ke nau ikuʻi ʻia kinautolu pē. Naʻe ʻi he tuʻunga fakatuʻutāmaki ʻa e haofakiʻi ʻo e moʻui ʻa Loté, ko e hokohoko atu ʻo e laine fakafāmili ʻo ʻĒpalahamé, pea mo hono maluʻi ʻo e ngafa ʻo Siosifá. Ko Sihova pē taha naʻe lava ke ne fakatōliʻa ʻa e ngaahi fiemaʻu ʻa e kau tangata fakaʻotua ko ení, pea naʻá ne fai ʻa e meʻa tofu pē ko iá ʻaki ʻene kau mai ki ai fakataha mo ʻene ngaahi ngāue ʻaloʻofá. Kapau ʻoku fiemaʻu ke tau hokosia ʻa e ʻaloʻofa ʻa Sihova ko e ʻOtuá ʻo taʻengata, ko kitautolu foki kuo pau ke tau maʻu ha vahaʻangatae fakafoʻituitui vāofi mo ia, pea kuo pau ke tau hokohoko atu ke fai ʻa hono finangaló.—Esela 7:28; Sāme 18:50.
ʻOfaʻi ʻa e Kau Sevāniti ʻa e ʻOtuá
18. Ko e hā ʻoku fakahaaʻi ʻe he ngaahi konga Tohitapu kehekehe fekauʻaki mo e ʻaloʻofa ʻa Sihová?
18 Ko e ʻaloʻofa ʻa Sihová ‘kuó ne fakafonu a mamani,’ pea ko e houngaʻia ē ko kitautolu ʻi he ʻulungaanga ko eni ʻo e ʻOtuá! (Sāme 119:64, PM) ʻOku tau tali ʻaufuatō ki he tau ʻo e foʻi hiva ʻa e tokotaha-tohi-sāmé: “ʻE, ke nau fakafetaʻi kia Sihova koeʻuhi ko ʻene ʻaloʻofa; mo ʻene ngaahi ngaue fakaofo maʻá e hakoʻi tangata.” (Sāme 107:8, 15, 21, 31) ʻOku tau fiefia ʻi hono fakaaʻu mai ʻe Sihova ʻa ʻene ʻaloʻofá ki heʻene kau sevāniti fakahōifuá—ʻi he tuʻunga ko e faʻahinga tāutaha pe ko ha kulupu. ʻI he lotú, naʻe lea ai ʻa e palōfita ko Tanielá kia Sihova “[ko e ʻOtua moʻoni] koe Otua lahi mo fakamanavaheia, oku iate ia ae fuakava moe aloofa ma anautolu oku ofa kiate ia, bea kiate kinautolu oku [tauhi] ene gaahi fekau.” (Taniela 9:4, PM) Naʻe lotu ʻa Tuʻi Tēvita: “Ke tuu mau be hoo aloofa kiate kinautolu oku nau ilo koe.” (Sāme 36:10, PM) He houngaʻia ē ko kitautolu ʻi hono fakahāhā ʻe Sihova ʻa e ʻaloʻofa ki heʻene kau sevānití!—1 Tuʻi 8:23; 1 Kalonikali 17:13.
19. ʻI he kupu hoko maí, ko e hā ʻa e ngaahi fehuʻi te tau lāulea ki aí?
19 Ko e moʻoni, ʻoku ʻofaʻi kitautolu ʻi he tuʻunga ko e kakai ʻa Sihová! ʻI he tānaki atu ki he maʻu ʻaonga mei he ʻofa ʻa e ʻOtuá kuo fakahaaʻi ki he faʻahinga ʻo e tangatá fakalūkufua, ʻoku tau maʻu ʻa e ngaahi tāpuaki makehe ko e tupu mei he ʻaloʻofa, pe ʻofa mateaki ʻa ʻetau Tamai fakahēvaní. (Sione 3:16) ʻOku tau maʻu ʻaonga tautefito ʻi he taimi ʻo e faingataʻá mei he ʻulungaanga mahuʻinga ko eni ʻo Sihová. (Sāme 36:7) Ka ʻe lava fēfē ke tau faʻifaʻitaki ki he ʻaloʻofa ʻa Sihova ko e ʻOtuá? ʻOku tau fakahāhā fakatāutaha ʻa e ʻulungaanga tuʻu-ki-muʻa ko ení? Ko e ongo fehuʻí ni mo e ngaahi fehuʻi felāveʻi mo iá ʻe lāulea ki ai ʻi he kupu hoko maí.
ʻOkú Ke Manatuʻi?
• Ko e hā ha fakalea Fakatohitapu ko e fetongi ʻo e “ʻaloʻofá”?
• ʻOku anga-fēfē ʻa e kehe ʻa e ʻaloʻofá mei he ʻofá mo e mateakí?
• Ko e hā ʻa e ngaahi founga naʻe fakahaaʻi ai ʻe Sihova ʻa e ʻaloʻofá kia Lote, ʻĒpalahame mo Siosifá?
• Ko e hā ʻa e fakapapau ʻoku lava ke tau maʻu mei he ngaahi fakahāhā ʻo e ʻaloʻofa ʻa Sihová ʻi he kuohilí?
[Fehuʻi ki he Ako]
[Fakatātā ʻi he peesi 13]
ʻOkú ke ʻiloʻi ʻa e anga ʻo hono fakahaaʻi ʻe he ʻOtuá ʻa e ʻaloʻofá kia Loté?
[Fakatātā ʻi he peesi 15]
ʻI heʻene ʻaloʻofá, naʻe tataki ai ʻe Sihova ʻa e tamaioʻeiki ʻa ʻĒpalahamé
[Fakatātā ʻi he peesi 16]
Naʻe fakahaaʻi ʻe Sihova ʻa e ʻaloʻofá ʻaki hono maluʻi ʻo Siosifa