Hanganaki Tauhi ʻa Sihova ʻAki ha Loto Tuʻumaʻu
Hanganaki Tauhi ʻa Sihova ʻAki ha Loto Tuʻumaʻu
“ʻOku tuʻumaʻu hoku lotó, ʻE ʻOtua, ʻoku tuʻumaʻu hoku lotó.”—Sāme 57:7, NW.
1. Ko e hā ʻoku malava ai ke tau maʻu ʻa e tuipau hangē ko ia naʻe ʻia Tēvitá?
ʻOKU malava ʻe Sihova ke ne ʻai kitautolu ke tau tuʻumaʻu ʻi he tui faka-Kalisitiané koeʻuhi ke tau malava ʻo pīkitai ki he lotu faka-Kalisitiane moʻoní ʻi he tuʻunga ko ʻene kau sevāniti ʻosi fakatapui. (Loma 14:4) Ko ia ai, ʻoku malava ke tau maʻu ʻa e tuipau hangē ko ia naʻe ʻi he tokotaha-tohi-saame ko Tēvitá, ʻa ia naʻe ueʻi ke ne hiva: “ʻOku tuʻumaʻu hoku lotó, ʻE ʻOtua.” (Sāme 108:1, NW) Kapau ʻoku tuʻumaʻu hotau lotó, ʻe ueʻi kitautolu ke tau fakahoko ʻetau fakatapui ki he ʻOtuá. Pea ʻi he hanga kiate ia ki ha tataki mo ha mālohí, ʻe malava ke tau fakamoʻoniʻi ai ko kitautolú ʻoku taʻeueʻia, ʻo tau tuʻu mālohi ʻi he fakapapau mo e tui ʻi he tuʻunga ko e kau tauhi anga-tonu, “ʻo maʻu maʻu pē ʻa e ngaahi meʻa lahi ke fai ʻi he ngāue ʻa e ʻEikí.”—1 Kolinito 15:58, NW.
2, 3. Ko e hā ʻa e mahuʻinga ʻo e ngaahi enginaki ʻa Paula ʻoku lēkooti ʻi he 1 Kolinito 16:13?
2 ʻI he ngaahi enginaki naʻe fakahanga ki he kau muimui ʻo Sīsuú ʻi Kolinitō ʻo e kuonga muʻá ka ʻoku kaungatonu ki he kau Kalisitiane ʻi he lolotonga ní, naʻe pehē ai ʻe he ʻapositolo ko Paulá: “Hanganaki ʻā, tuʻu mālohi ʻi he tuí, hokohoko atu ʻo ngali tangata, tupu ʻo mālohi.” (1 Kolinito 16:13, NW) ʻI he faka-Kalisí ko e ngaahi foʻi fekau taki taha ko ʻení ʻoku ʻi he taimi lolotongá, ʻo fakaʻaiʻai ai ʻa e ngāue hokohoko. Ko e hā ʻa e mahuʻinga ʻo e akonaki ko ʻení?
3 ʻOku malava ke tau “hanganaki ʻā” fakalaumālie ʻaki hono fakafepakiʻi ʻa e Tēvoló pea nofo ofi ki he ʻOtuá. (Semisi 4:7, 8) Ko e falala kia Sihová ʻokú ne fakaivia kitautolu ke tau kei fāʻūtaha ai pē pea ke ‘tuʻu mālohi ʻi he tui faka-Kalisitiané.’ Ko kitautolu—kau ai mo e kau fefine tokolahi ʻi hotau lotolotongá—ʻoku tau “hokohoko atu ʻo ngali tangata” ʻaki hono tauhi loto-toʻa ʻa e ʻOtuá ʻi he tuʻunga ko e kau fanongonongo ʻo e Puleʻangá. (Sāme 68:11) ʻOku tau “tupu ʻo mālohi” ʻi he hokohoko hanga ki heʻetau Tamai fakahēvaní ki ha mālohi ke fai hono finangaló.—Filipai 4:13.
4. Ko e hā naʻe taki atu ki heʻetau papitaiso ko e kau Kalisitiané?
4 Kuo tau tuʻu maʻá e tui moʻoní ʻi he taimi naʻa tau fai ai ha fakatapui taʻefakangatangata kia Sihova pea fakaʻilongaʻi ia ʻaki hono foua ʻa e fakauku ʻi he vaí. Ka ko e hā naʻe taki atu ki heʻetau papitaisó? ʻUluakí naʻa tau maʻu ʻa e ʻilo totonu ki he Folofola ʻa e ʻOtuá. (Sione 17:3) Naʻe fakatupu ʻe he meʻá ni ʻa e tui pea ueʻi ai kitautolu ke fakatomala, ʻo fakahāhā ʻa e ongoʻi loto-mamahi moʻoni ʻi he faihala he kuohilí. (Ngāue 3:19; Hepelu 11:6) Naʻe hoko mai leva ki heʻetau liliú, he naʻa tau tafoki mei he ngaahi tōʻonga halá koeʻuhi ke tuli ki ha moʻui ʻoku fehoanaki mo e finangalo ʻo e ʻOtuá. (Loma 12:2; Efeso 4:23, 24) Naʻe hoko mai heni ha fakatapui loto-ʻaufuatō kia Sihova ʻi he lotu. (Mātiu 16:24; 1 Pita 2:21) Naʻa tau fai ha kole ki he ʻOtuá ki ha konisēnisi lelei pea papitaiso ʻi hono fakaʻilongaʻi ʻo ʻetau fakatapui kiate iá. (1 Pita 3:21) ʻI he fakakaukau atu ki he ngaahi lākanga ko ʻení ʻe tokoniʻi ai kitautolu ke tau hangataha ai pē ki he fiemaʻu ke feinga hokohoko ke tau moʻui ʻo fakatatau ki heʻetau fakatapuí pea hanganaki tauhi ʻa Sihova ʻaki ha loto tuʻumaʻu.
Hokohoko Atu Hoʻo Kumi ki he ʻIlo Totonú
5. Ko e hā ʻoku totonu ai ke tau hokohoko atu hono maʻu ʻa e ʻilo Fakatohitapú?
5 Ke moʻui ʻo fakatatau ki heʻetau fakatapui ki he ʻOtuá, kuo pau ke tau hokohoko atu ke maʻu ʻa e ʻilo Fakatohitapu fakatupu-tuí. Ko ha fiefia ē naʻa tau maʻu ʻi hono maʻu ʻa e meʻakai fakalaumālié ʻi heʻetau fuofua hoko ʻo maheni mo e moʻoni ʻa e ʻOtuá! (Mātiu 24:45-47) Ko e “ngaahi meʻakai” ko iá naʻe ifo—pea naʻa nau fafangaʻi lelei fakalaumālie kitautolu. Ko ia ai, ʻoku mātuʻaki totonu ke hanganaki maʻu ʻa e meʻakai fakatupu-ivi fakalaumālié koeʻuhi ke tau tauhi maʻu ha loto tuʻumaʻu ʻi he tuʻunga ko e kau sevāniti ʻosi fakatapui ʻa Sihova.
6. Naʻe anga-fēfē nai hono tokoniʻi koe ke fakatupu ha houngaʻia fakamātoato ki he moʻoni ʻo e Tohitapú?
6 ʻOku fiemaʻu ʻa e feinga ke maʻu ha ʻilo lahi ange ki he ngaahi Konga Tohitapú. ʻOku hangē ia ha kumi ki ha ngaahi koloa fufuú—ko ha meʻa ʻoku fiemaʻu ki ai ʻa e fakaongosia. Ka ko ha fakafiemālie lahi ē ʻa hono maʻu “ʻa e ʻiloʻi totonu ʻo e ʻOtuá”! (Palovepi 2:1-6, NW) ʻI he taimi naʻá ke ʻuluaki ako ai ʻa e Tohitapú mo ha tokotaha malanga ʻo e Puleʻangá, naʻá ne ngāueʻaki nai ʻa e tohi ʻIlo ʻA Ia ʻOku Taki Atu ki he Moʻui Taʻengatá. Naʻe ngāueʻaki nai ʻa e taimi lahi ke ʻosiki ai ʻa e vahe taki taha, mahalo ʻo laka hake ʻi he tuʻo tahá. Naʻá ke maʻu ʻa e ʻaonga ʻi he taimi naʻe lau ai mo fetalanoaʻaki ʻi he ngaahi konga Tohitapu ʻoku hā aí. Kapau naʻe ʻi ai ha poini naʻe faingataʻa ke mahinoʻi, naʻe fakamatalaʻi ia. Ko e tokotaha naʻá ne fakahoko ʻa e ako Tohitapu pea mo koé naʻe teuteu lelei, naʻe lotu ʻo kole ʻa e laumālie ʻo e ʻOtuá, peá ne tokoniʻi koe ke fakatupu ha houngaʻia fakamātoato ki he moʻoní.
7. Ko e hā ʻokú ne ʻai ha taha ke ne taau ai ke akoʻi ʻa e moʻoni ʻa e ʻOtuá ki he niʻihi kehé?
7 Naʻe feʻungamālie ʻa e feinga ko iá, he naʻe tohi ʻe Paula: “Ko ia ʻoku akonekina [ʻi he lea] ʻi he Folofola, ke ne tuku kiate ia ʻoku faiako [ʻi he leá] ke ʻinasi ʻi heʻene koloa kotoa.” (Kaletia 6:6) ʻI hení ʻoku fakahaaʻi ʻe he konga tohi faka-Kalisí ko e ngaahi akonaki ʻa e Folofola ʻa e ʻOtuá naʻe fakahūhū ia ki he ʻatamai mo e loto ʻo e tokotaha naʻe “akonekina ʻi he leá.” Ko hono akoʻi koe ʻi he founga ko iá ʻoku ʻai ai koe ʻo ke taau ke hoko ko ha faiako ki ha toe niʻihi kehe. (Ngāue 18:25) Ke faitotonu ki hoʻo fakatapuí, kuo pau ke ke tauhi maʻu hoʻo moʻuilelei fakalaumālié mo hoʻo tuʻumaʻú ʻaki hono ako hokohoko ʻa e Folofola ʻa e ʻOtuá.—1 Timote 4:13; Taitusi 1:13; 2:2.
Manatuʻi Hoʻo Fakatomalá mo e Liliú
8. ʻOku malava fēfē ke tauhi maʻu ʻa e ʻulungaanga fakaʻotuá?
8 ʻOkú ke manatuʻi ʻa e fiemālie naʻá ke ongoʻi ʻi he taimi naʻá ke ako ai ʻa e moʻoní, fakatomala, pea maʻu ai ha ongoʻi ʻo e fakamolemole ʻa e ʻOtuá makatuʻunga ʻi he tui ki he feilaulau huhuʻi ʻa Sīsuú? (Sāme 32:1-5; Loma 5:8; 1 Pita 3:18) Ko hono moʻoní, ʻoku ʻikai te ke loto ke ke toe foki ki ha moʻui angahalaʻia. (2 Pita 2:20-22) ʻI he lotolotonga ʻo e ngaahi meʻa kehé, ko e lotu tuʻumaʻu kia Sihová te ne tokoniʻi koe ke ke tauhi maʻu ʻa e ʻulungaanga fakaʻotuá, moʻui ʻo fakatatau ki hoʻo fakatapuí, pea hanganaki tauhi loto-tōnunga ʻa Sihova.—2 Pita 3:11, 12.
9. ʻI he hoko ʻo tafoki mei he ngaahi tōʻonga angahalaʻiá, ko e hā ʻa e ʻalunga ʻoku totonu ke tau tuli ki aí?
9 ʻI he hoko ʻo liliu ʻaki ʻa e tafoki mei he ngaahi tōʻonga angahalaʻiá, hokohoko atu ʻa e kumi ki he tokoni ʻa e ʻOtuá ʻaki hono tauhi ho lotó ke tuʻumaʻu. Ko hono moʻoní, naʻá ke faai fononga ʻi ha fuʻu hala fehālaaki ka naʻe fai ha sio ki ha mape falalaʻanga pea kamata ke fononga ʻi he hala totonú. ʻOua te ke ʻalu hē ʻi he taimi ní. Hanganaki falala ki he tataki ʻa e ʻOtuá, pea ke fakapapauʻi ke nofo maʻu ʻi he hala ki he moʻuí.—Aisea 30:20, 21; Mātiu 7:13, 14.
ʻOua ʻAupito Naʻa Ngalo Hoʻo Fakatapuí mo e Papitaisó
10. Ko e hā ʻa e ngaahi poini ʻoku totonu ke tauhi maʻu ʻi he ʻatamaí ʻo fekauʻaki mo ʻetau fakatapui ki he ʻOtuá?
10 Manatuʻi naʻá ke fai ha fakatapui kia Sihova ʻi he lotu, fakataha mo e fakakaukau ki ha laui ʻitāniti ʻo e ngāue loto-tōnungá. (Siutasi 20, 21) ʻOku fakahaaʻi ʻe he fakatapuí ha fakamavaheʻi, pe ko ha mavahe, ki ha taumuʻa toputapu. (Livitiko 15:31; 22:2) Ko hoʻo fakatapuí naʻe ʻikai ko ha aleapau fakataimi pe ko ha tukupā ki ha tangata. Ko ha fakatapui tuʻumaʻu ia ki he Hau Fakalevelevá, pea ke moʻuiʻaki iá ʻoku fiemaʻu ai ʻa e ʻofa mateaki ki he ʻOtuá ʻo aʻu ki he mate. ʻIo, ‘moʻui pe mate, ko e meʻa ʻa Sihova ʻa kitautolu.’ (Loma 14:7, 8, NW) ʻOku fakatuʻunga ʻetau fiefiá ʻi heʻetau anganofo ki hono finangaló pea ʻi heʻetau hokohoko atu ke tauhi kiate ia ʻaki ha loto tuʻumaʻú.
11. Ko e hā ʻoku totonu ai ke ke manatuʻi hoʻo papitaisó pea mo hono ʻuhingá?
11 Manatuʻi maʻu pē hoʻo papitaisó ko e fakaʻilonga ia ʻo hoʻo fakatapui loto-ʻaufuatō ki he ʻOtuá. Naʻe ʻikai ko ha papitaiso fakamālohi ia, he naʻá ke fai ʻiate koe pē ʻa e filí. ʻOkú ke fakapapauʻi he taimí ni ke ʻai ho lotó ke fehoanaki mo e finangalo fakaʻotuá ʻi he toenga ʻo hoʻo moʻuí? Naʻá ke fai ha kole ki he ʻOtuá ki ha konisēnisi lelei pea papitaiso ʻi hono fakaʻilongaʻi ʻa hoʻo fakatapui kiate iá. Tauhi ʻa e konisēnisi lelei ko iá ʻaki hono fakahoko hoʻo fakatapuí, pea ko e tāpuaki lahi ʻa Sihová ʻe nofo ia ʻiate koe.—Palovepi 10:22.
ʻOku ʻI Ai ha Kaunga ʻo e Meʻa ʻOkú Ke Loto ki Aí
12, 13. ʻOku anga-fēfē ʻa e fekauʻaki ʻa e meʻa ʻoku tau loto ki aí tonu pea mo e fakatapuí mo e papitaisó?
12 Ko e moʻoni, kuo hanga ʻe he fakatapuí mo e papitaisó ʻo ʻomai ha ngaahi tāpuaki lahi ki he laui miliona ʻo e kakaí ʻi he kotoa ʻo e māmaní. ʻI heʻetau fakaʻilongaʻi ʻetau fakatapui ki he ʻOtuá ʻaki hono foua ʻa e papitaiso ʻi he vaí, ʻoku tau mate ai ʻi he fekauʻaki mo e ʻalunga ʻo ʻetau moʻui ʻi he kuohilí kae ʻikai ʻi he fekauʻaki mo e meʻa ʻoku tau loto ki aí tonu. ʻI he tuʻunga ko e kau tui kuo ʻosi akoʻi leleí, naʻa tau ngāueʻaki moʻoni ai ʻa e meʻa ʻoku tau loto ki aí tonu ʻi heʻetau fai ha fakatapui ki he ʻOtuá ʻi he lotu pea hoko ʻo papitaisó. Ko e ʻalunga ʻo e fakatapuí mo e papitaisó ʻoku fiemaʻu ai ke tau fakapapauʻi pe ko e hā ʻa e finangalo ʻo e ʻOtuá pea fili loto-lelei leva ke fai ia. (Efeso 5:17) ʻOku tau faʻifaʻitaki ai kia Sīsū, ʻa ia naʻá ne ngāueʻaki ʻa e meʻa naʻá ne loto ki aí ʻi heʻene tukuange ʻene ngāue fakatufungá, hoko ʻo papitaiso, pea līʻoa kakato atu ia ki hono fai ʻa e finangalo ʻo ʻene Tamai fakahēvaní.—Sāme 40:7, 8; Sione 6:38-40.
13 Naʻe taumuʻa ʻa Sihova ko e ʻOtuá ki hono ʻAló ke hoko ʻo “haohaoa fakafou he ngaahi faingataʻaʻia.” Ko ia ai, naʻe pau kia Sīsū ke ne ngāueʻaki ʻa e meʻa naʻá ne loto ki aí koeʻuhi ke ne kātakiʻi ʻa e ngaahi faingataʻaʻia ko iá ʻi he loto-tōnunga. Ki he taumuʻa ko iá, naʻá ne ʻoatu ai ʻa e “ngaahi hū mo e ngaahi kole tōtōaki foki . . . fakataha mo e ngaahi kalanga mo e ngaahi tangi loʻimata, pea naʻe fanongoa leleiʻia ia koeʻuhi ko ʻene manavahē ʻOtuá.” (Hepelu 2:10, 18; 5:7, 8, NW) Kapau te tau fakahāhā ha manavahē anga-ʻapasia meimei tatau ki he ʻOtuá, ʻoku tau fakapapauʻi ʻe “fanongoa leleiʻia” mo kitautolu foki, pea ʻoku malava ke tau loto-pau ʻe hanga ʻe Sihova ʻo ʻai kitautolu ke tau tuʻumaʻu ʻi he tuʻunga ko ʻene Kau Fakamoʻoni ʻosi fakatapuí.—Aisea 43:10.
ʻE Lava Ke Ke Tauhi Maʻu ha Loto Tuʻumaʻu
14. Ko e hā ʻoku totonu ai ke tau lau fakaʻaho ʻa e Tohitapú?
14 Ko e hā ʻe tokoni kiate koe ke ke tauhi maʻu ha loto tuʻumaʻu pea moʻui ai ʻo fakatatau ki hoʻo fakatapui ki he ʻOtuá? ʻI he taumuʻa ke maʻu ʻa e ʻilo fakautuutu ai pē ʻo e Folofola ʻa e ʻOtuá, lau fakaʻaho ʻa e Tohitapú. Ko e meʻa ʻeni ʻoku enginaki mai ʻaki maʻu pē ʻe he “tamaioeiki agatonu mo boto” ke tau faí. ʻOku ʻomai ʻa e akonaki ko iá koeʻuhi ko e moʻui ʻo fakatatau ki heʻetau fakatapuí ʻoku fiemaʻu ai ke tau hanganaki laka ʻi he moʻoni ʻa e ʻOtuá. Kapau naʻe tali ʻilo pau ʻe he kautaha ʻa Sihová ʻa e ngaahi akonaki loí, heʻikai ʻaupito ke ʻomai ki he Kau Fakamoʻoni ʻa Sihová ia pea mo e faʻahinga ʻoku nau malanga ki aí ʻa e faleʻi ko ia ke lau ʻa e Tohitapú.
15. (a) Ko e hā ʻoku totonu ke fakakaukau ki aí ʻi hono fai ha ngaahi filí? (e) Ko e hā ʻoku lava ai ke pehē ko e ngāue fakamāmaní ko ha ngāue ʻoho fononga pē ia ki he Kalisitiané?
15 ʻI hono fai ha ngaahi fili, fakakaukau maʻu pē ki he anga nai ʻo ʻene kaunga ki he fakahoko ʻo hoʻo fakatapui kia Sihová. ʻE fekauʻaki nai ʻeni mo hoʻo ngāue fakamāmaní. ʻOkú ke feinga ke ʻai ia ke tokoni kiate koe ʻi he ʻai ke laka ki muʻa ʻa e lotu moʻoní? Neongo ʻoku ʻilo ʻe he kau pule ngāué ʻi he tuʻunga fakalūkufuá ko e kau Kalisitiane ʻosi fakatapuí ʻoku nau alafalalaʻanga mo fai-meʻa-lava, ʻoku nau toe fakatokangaʻi ko e Kau Fakamoʻoni ʻa Sihová ʻoku ʻikai te nau fiemaʻu tuʻunga māʻolunga ke tamuʻomuʻa ʻi he māmaní pea ʻoku ʻikai te nau feʻauhi mo e niʻihi kehé ki he ngaahi tuʻunga fakatupu-paʻanga lahi tahá. ʻOku peheé koeʻuhi ko e taumuʻa ʻa e Kau Fakamoʻoní ia ʻoku ʻikai ko hono maʻu ha tuʻumālie, ongoongoa, maʻu tuʻunga, pe mafai. Ki he faʻahinga ko ia ʻoku nau moʻui ʻo fakatatau ki heʻenau fakatapui ki he ʻOtuá, ko e meʻa mahuʻinga tahá ia ko hono fai ʻa e finangalo fakaʻotuá. Ko ha ngāue fakamāmani ʻokú ne fakaivia kinautolu ke nau maʻu ʻa e ngaahi fiemaʻu pau ki he moʻuí ko ha ngāue ʻoho fononga pē, ko ha ngāue ʻoku mahuʻinga fika ua. ʻI he hangē ko e ʻapositolo ko Paulá, ko ʻenau ngāué, pe ngāue tefitó, ko e ngāue fakafaifekau faka-Kalisitiané. (Ngāue 18:3, 4; 2 Tesalonaika 3:7, 8; 1 Timote 5:8) ʻOkú ke ʻai ʻa e ngaahi meʻa ʻo e Puleʻangá ke muʻomuʻa ʻi hoʻo moʻuí?—Mātiu 6:25-33.
16. Ko e hā ʻe lava ke tau faí kapau ʻoku hanga ʻe ha loto-moʻua taʻetotonu ʻo ʻai ke faingataʻa ke moʻui ʻo fakatatau ki heʻetau fakatapui ki he ʻOtuá?
16 Kuo ʻi ai ʻa e niʻihi ne mei lōmekina kinautolu ʻe he ngaahi loto-moʻua kehekehe ki muʻa pea nau ako ʻa e moʻoní. Ka he fonu mahuohua ē ko honau lotó ʻi he fiefia, houngaʻia, mo e ʻofa ki he ʻOtuá ʻi heʻenau maʻu ʻa e ʻamanaki ʻo e Puleʻangá! ʻI he fakakaukau atu ki he ngaahi tāpuaki kuo nau maʻu talu mei he taimi ko iá, ʻe tokoni lelei nai ia kiate kinautolu ke nau moʻui ʻo fakatatau ki heʻenau fakatapui kia Sihová. ʻI he tafaʻaki ʻe tahá, fēfē kapau ko ha loto-moʻua taʻetotonu ki he ngaahi palopalema anga-maheni ʻo e moʻui ʻi he fokotuʻutuʻu ko ení ʻoku maluʻaki mai ke ne kāsia ʻa e “folofola ʻa e ʻOtua,” hangē tofu pē ko hono taʻofi nai ʻe he ʻakau talatalá ʻa e fanga kiʻi fuʻu ʻakaú mei haʻanau aʻu ki he tuʻunga matuʻotuʻa ʻo fua lahí? (Luke 8:7, 11, 14; Mātiu 13:22; Maake 4:18, 19) Kapau ʻokú ke ongoʻi ʻoku kamata ke hoko ʻa e meʻá ni kiate koe pe ki ho fāmilí, lī atu hoʻo loto-moʻuá kia Sihova pea lotu ke ne tokoniʻi koe ke ke tupulaki ʻi he ʻofá mo e houngaʻiá. Kapau te ke lī hoʻo kavengá kiate ia, te ne tokoniʻi koe mo ʻoatu kiate koe ʻa e mālohi ke hanganaki tauhi fiefia ia ʻaki ha loto tuʻumaʻu.—Sāme 55:22; Filipai 4:6, 7; Fakahā 2:4.
17. ʻOku malava fēfē ke fekuki mo e ngaahi ʻahiʻahi kakahá?
17 Hanganaki lotu tuʻumaʻu kia Sihova ko e ʻOtuá, ʻo hangē pē ko hoʻo lotu ʻi he taimi naʻá ke fai ai hoʻo fakatapui kiate iá. (Sāme 65:2) ʻI he taimi ʻoku fakataueleʻi ai ke faihalá, pe ʻi he taimi ʻoku fehangahangai ai mo ha ʻahiʻahi kakahá, kumi ki he tataki ʻa e ʻOtuá mo ʻene tokoní ke muimui ai. Manatuʻi ʻa e fiemaʻu ke tuí, he naʻe tohi ʻe he ākonga ko Sēmisí: “Kapau ko e poto ʻoku masiva ai ha taha, ke ne kole mei he ʻOtua, ʻa ia ʻoku ne foaki ʻataʻatā pe ki he kakai kotoa pe, ʻo ʻikai ʻatu mo e lau; pea ʻe foaki ia ki ai. Ka ke ne kole tui pe, ʻo ʻoua ʻe talaʻa. He ko ia ʻoku talaʻa ʻoku ne hange ko e peau ʻo e tahi ʻoku fakateka ʻo fepaleʻekina ʻe he matangi. ʻIo, ke ʻoua naʻa mahalo ʻe he tangata ko ia te ne maʻu ha meʻa mei he ʻEiki. Ko e tangata lotolotoua ia, taʻemāu ʻene anga kotoa pe.” (Semisi 1:5-8) Kapau ko ha ʻahiʻahi ʻoku hā ngali fakatupu lōmekina, ʻoku malava ke tau fakapapauʻi ʻa e meʻá ni: “Kuo teʻeki ke moʻua kimoutolu ʻe ha faʻahinga ʻahiʻahi ʻoku taʻehoa mo e tangata: pea ko e ʻOtua ko e toko taha ʻoku fai ki heʻene lea, pea ʻe ʻikai te ne fakangofua ke ʻahiʻahiʻi kimoutolu ʻo makehe atu ʻi hoʻomou mafai; kae kehe, te ne ngaohi fakataha mo e ʻahiʻahi hono haoʻanga foki mei ai, koeʻuhi ke lava hono katakiʻi.”—1 Kolinito 10:13.
18. Ko e hā ʻe lava ke tau faí kapau ʻoku fakavaivaiʻi ʻe ha angahala mamafa fufū ʻetau fakapapau ke moʻui ʻo fakatatau ki heʻetau fakatapui kia Sihová?
18 Fēfē kapau ko ha angahala fufū ʻokú ne fakahohaʻasi ho konisēnisí mo fakavaivaiʻi hoʻo fakapapau ke moʻui ʻo fakatatau ki hoʻo fakatapui ki he ʻOtuá? Kapau ʻokú ke fakatomala, ʻe lava ke ke maʻu ʻa e fiemālie ʻi he ʻiloʻi ko Sihová ‘ʻe ʻikai te ne taʻe tokaʻi ʻa e loto lavea mo mafesifesí.’ (Sāme 51:17) Kumi ki he tokoni ʻa e kau mātuʻa Kalisitiane anga-ʻofá, ʻi he ʻiloʻi ko kinautolu—ʻi he faʻifaʻitaki kia Sihová—ʻe ʻikai te nau fakamaʻamaʻaʻi hoʻo fiemaʻu ke hokosia ʻa e toe fakafoʻou ʻo ha vahaʻangatae lelei mo hoʻo Tamai fakahēvaní. (Sāme 103:10-14; Semisi 5:13-15) ʻI ha toe fakafoʻou leva ʻo e mālohi fakalaumālié pea mo ha loto tuʻumaʻú, te ke malava ai ke ʻai ha ngaahi hala totonu ki ho vaʻé pea ʻilo ai ʻoku malava ke ke moʻui ʻo fakatatau ki hoʻo fakatapui ki he ʻOtuá.—Hepelu 12:12, 13.
Hanganaki Tauhi ʻAki ha Loto Tuʻumaʻu
19, 20. Ko e hā ʻoku mātuʻaki mahuʻinga ai ke tau hanganaki moʻui ʻo fakatatau ki heʻetau fakatapuí?
19 ʻI he ngaahi taimi faingataʻá ni, kuo pau ke tau ngāue mālohi ke moʻui ʻo fakatatau ki heʻetau fakatapuí pea hanganaki tauhi ʻa e ʻOtuá ʻaki ha loto tuʻumaʻu. Naʻe pehē ʻe Sīsū: “Ko ia te ne kataki ʻo aʻu ki he ngataʻanga, ko e toko taha ko ia te ne moʻui.” (Mātiu 24:13) Koeʻuhi ʻoku tau moʻui ʻi he “ngaahi ʻaho fakaʻosí,” ʻe lava ke hoko mai ʻa e ngataʻangá ia ʻi ha taimi pē. (2 Timote 3:1, NW) ʻIkai ngata aí, ʻoku ʻikai ha taha ʻo kitautolu ʻe lava ke ne ʻilo pau pe te tau moʻui ʻapongipongi. (Semisi 4:13, 14) Ko ia, ʻoku mātuʻaki mahuʻinga ke tau hanganaki moʻui ʻo fakatatau ki heʻetau fakatapuí he ʻahó ni!
20 Naʻe fakamamafaʻi ʻeni ʻe he ʻapositolo ko Pitá ʻi heʻene tohi hono uá. Naʻá ne fakahā ʻo pehē, hangē pē ko hono fakaʻauha ʻo e fakaʻotuamaté ʻi he Lōmakí, ʻe pehē pē ʻa e māmani fakaefakatātaá, pe sōsaieti fakaetangata anga-fulikivanú, ʻe fakaʻauha ia ʻi he lolotonga ʻa e “ʻaho ʻo Sihova.” Ko ia ai, naʻe kalanga ʻa Pita: “ʻOku totonu ke mou hoko ko e faʻahinga kakai ʻoku tōʻonga māʻoniʻoni ʻi he ʻulungāngá pea fai ʻa e ngaahi ngāue ʻo e anga-līʻoa fakaʻotuá”! Naʻá ne toe enginaki kiate kinautolu: “Siʻi ngaahi ʻofaʻanga, ʻi hono ʻosi maʻu ʻa e ʻilo tokamuʻá ni, mou leʻohi kimoutolu ke ʻoua naʻa takiheeʻi kimoutolu [ʻe he kau faiako loí mo e kau tangata fakaʻotuamaté] pea mou tō ai mei hoʻomou tuʻumaʻú na.” (2 Pita 3:5-17, NW) He meʻa fakamamahi ē kapau ʻe takiheeʻi ha tokotaha ʻosi papitaiso pea hoko mai ki he ngataʻanga ʻo ʻene moʻuí ko e tokotaha naʻe ʻikai malava ke ne tauhi maʻu ha loto tuʻumaʻu!
21, 22. Kuo anga-fēfē hono fakamoʻoniʻi ʻa e moʻoni ʻa e ngaahi lea ʻo e Sāme 57:7 ʻi he tuʻunga ʻo Tēvitá pea mo e kau Kalisitiane moʻoní?
21 Ko hoʻo fakapapau ke ke moʻui ʻo fakatatau ki hoʻo fakatapui ki he ʻOtuá ʻe fakaivimālohi lelei ia kapau te ke tauhi maʻu ʻi he ʻatamaí ʻa e ʻaho fakafiefia ʻo hoʻo papitaisó pea kumi ki he tokoni ʻa e ʻOtuá koeʻuhi ke hanga ʻe hoʻo ngaahi leá mo hoʻo ngaahi ngāué ʻo ʻai ʻa hono lotó ke fiefia. (Palovepi 27:11) ʻOku ʻikai ʻaupito ke taʻefalala ʻa Sihova ia ki heʻene kakaí, pea ko hono moʻoní ʻoku totonu ke tau faitōnunga kiate ia. (Sāme 94:14) Naʻá ne fakahāhā ʻa e meesi mo e kaungāongoʻi ʻi hono fakafepakiʻi ʻa e ngaahi palani ʻa e ngaahi filí pea fakahaofi ʻa Tēvitá. ʻI he houngaʻia ki he meʻá ni, naʻe talaki ʻe Tēvita ʻa e tuʻu mālohi, ʻa e taʻeueʻia, ʻo ʻene ʻofa ki hono Tokotaha-Faifakahaofí. ʻAki ʻa e ongoʻi loloto, naʻá ne hiva: “ʻOku tuʻumaʻu hoku lotó, ʻE ʻOtua, ʻoku tuʻumaʻu hoku lotó. Te u hiva mo faʻu fasi.”—Sāme 57:7, NW.
22 ʻI he hangē ko Tēvitá, kuo ʻikai ke fakaholomui ʻa e kau Kalisitiane moʻoní mei heʻenau anga-līʻoa ki he ʻOtuá. ʻAki ʻa e loto tuʻumaʻu, ʻoku nau taku honau fakahaofí mo honau fakamoʻuí kia Sihova, ʻa ia ʻoku nau hiva fakafetaʻi fiefia ki ai. Kapau ʻoku tuʻumaʻu ho lotó, ʻe falala ia ki he ʻOtuá, pea ʻi heʻene tokoní te ke malava ai ke fakahoko hoʻo fakatapuí. ʻIo, ʻe lava ke ke hangē “ko e tokotaha māʻoniʻoní” ʻa ia naʻe hiva ʻa e tokotaha-tohi-sāmé fekauʻaki mo ia: “ʻE ʻikai te ne manavahē naʻa mo e ʻi he ngaahi ongoongo koví. Ko hono lotó ʻoku tuʻumaʻu, kuo ʻai ia ke falala kia Sihova.” (Sāme 112:6, 7, NW) ʻAki ʻa e tui ki he ʻOtuá mo e falala kakato kiate iá, te ke malava ai ke moʻui ʻo fakatatau ki hoʻo fakatapuí pea hanganaki tauhi ʻa Sihova ʻaki ha loto tuʻumaʻu.
ʻOkú Ke Manatuʻi?
• Ko e hā ʻoku totonu ai ke tau hokohoko atu hono maʻu ʻa e ʻilo totonu ki he Tohitapú?
• Ko e hā ʻoku totonu ai ke tau tauhi maʻu ʻi he ʻatamaí ʻetau fakatomalá mo ʻetau liliú?
• ʻOku anga-fēfē ʻetau maʻu ha ʻaonga mei hono manatuʻi ʻetau fakatapuí mo e papitaisó?
• Ko e hā te ne tokoniʻi kitautolu ke tau hanganaki tauhi ai ʻa Sihova ʻaki ha loto tuʻumaʻú?
[Fehuʻi ki he Ako]
[Fakatātā ʻi he peesi 18]
Ko hono ʻai ʻa e ngāue fakafaifekau faka-Kalisitiané ko ʻetau ngāue tefitó iá ʻoku tokoniʻi ai kitautolu ke hanganaki tauhi ʻa Sihova ʻaki ha loto tuʻumaʻu
[Fakatātā ʻi he peesi 18]
ʻOkú ke tauhi maʻu hoʻo moʻuilelei fakalaumālié ʻaki hono lau fakaʻaho ʻa e Folofola ʻa e ʻOtuá?