ʻIkai ʻAupito Fuʻu Taʻumotuʻa ke Ako

NAʻE fanauʻi ʻa Kseniya ʻi he 1897. Naʻe ʻi ai ʻene fānau fefine ʻe toko 3, ko ha foha, fanga makapuna ʻe toko 15 pea mo ha fanga makapuna-ua ʻe toko 25. Ko e kotoa ʻo ʻene moʻuí naʻá ne fai ai ʻa e meʻa naʻe akoʻi ange ʻe heʻene faʻeé kiate ia ke ne faí. Neongo naʻá ne haʻu ki Mosikou ko ha tokotaha kumi hūfanga mei he Lepupilika faiʻanga tau Abkhaz, ʻa ia ʻoku tuʻu ʻi he vahaʻa ʻo e Tahi ʻUliʻulí mo e Caucasus, naʻá ne fiemālie pē ʻi heʻene moʻuí, tautefito ki he meʻa naʻá ne ui ko ʻene tui tukufakaholó.

ʻI he 1993, naʻe hoko ai ʻa e taʻahine ʻa Kseniya ko Meri ko e taha ʻo e Kau Fakamoʻoni ʻa Sihová. Naʻe kamata talanoa ʻa Meri kia Kseniya fekauʻaki mo Sihova ko e ʻOtuá pea mo e Tohitapú, ka naʻe ʻikai te ne loto ke fanongo. Naʻe tala ange maʻu pē ʻe Kseniya ki heʻene taʻahiné, “ʻOku ou fuʻu taʻumotuʻa ke ako ha meʻa foʻou.”

Ka, ko ʻene taʻahiné ʻa Meri; ko e uaifi ʻa hono mokopuna tangatá, ʻa Londa; pea mo hono mokopuna-ua ko Nana mo Zaza, naʻa nau hoko kotoa ko e Kau Fakamoʻoni ʻa Sihova, ʻo nau talanoa maʻu pē kiate ia fekauʻaki mo e Tohitapú. ʻI ha efiafi ʻe taha ʻi he 1999, naʻa nau lau ai ha konga Tohitapu kia Kseniya ʻa ia naʻe maongo ki hono lotó. Naʻe ʻi ai ʻa e ngaahi lea fakaueʻiloto ʻa Sīsū ki he kau ʻapositolo loto-tōnungá ʻi he taimi naʻá ne fokotuʻutuʻu ai ʻa e Kai Efiafi ʻa e ʻEikí. (Luke 22:​19, 20) ʻI hono taʻu 102, naʻe fili ai ʻa Kseniya ʻi he efiafi ko iá ke kamata ako ʻa e Tohitapú.

“ʻI he hili ha moʻui ʻi he taʻu ʻe 102,” ko e lea ia ʻa Kseniya, “naʻá ku toki mahinoʻi ai ʻa e ʻuhinga ʻo e moʻuí. ʻOku ou ʻiloʻi he taimí ni ʻoku ʻikai ke toe ʻi ai ha meʻa ʻe lelei ange ka ko e tauhi ki hotau ʻOtua fakaofo mo anga-ʻofa ko Sihová. ʻOku ou kei longomoʻui mo moʻuilelei. ʻOku ou lava ke lautohi taʻematasioʻata pea feohi longomoʻui mo hoku fāmilí.”

ʻI Nōvema 5, 2000, naʻe papitaiso ai ʻa Kseniya. ʻOkú ne pehē: “ʻOku ou foaki atu he taimí ni ʻeku moʻuí kia Sihova ke tauhi kiate ia ʻi he ʻofa. ʻOku ou tufa ha ngaahi makasini mo ha ngaahi tuleki lolotonga ia ʻeku tangutu ʻi ha tauʻanga pasi ofi ki hoku ʻapí. ʻOku faʻa ʻaʻahi mai ʻa e ngaahi kāingá, pea ʻoku ou vahevahe fiefia kiate kinautolu ʻa e moʻoni fekauʻaki mo Sihová.”

ʻOku fakatuʻotuʻa atu ʻa Kseniya ki ha ʻaho ʻe ‘tupu ʻafaʻafa ai hono kakanó, ʻo hulu ʻi ha finemui; pea foki ai ia ki hono taimi finemuí.’ (Siope 33:25) Kapau ko ha taʻu teau ē ʻoku ʻikai te ne ongoʻi ʻokú ne fuʻu motuʻa ke ako ki he ʻuhinga ʻo e moʻuí mei he Tohitapú, fēfē koe?