Ngaahi Fehuʻi mei he Kau Lautohí

ʻOku tonu ke pehē ko e meesi ʻa Sihová ʻoku fakavaivaiʻi ai ʻa ʻene fakamaau totonú?

Neongo ko e kupuʻi leá ni kuo ngāueʻaki ia, ʻoku lelei tahá ke fakaʻehiʻehi mei ai koeʻuhi ʻoku hā ngali fakahuʻunga ai ko e meesi ʻa Sihová ʻokú ne ʻai ke ʻikai mālohi pe ʻokú ne taʻotaʻofi ʻa ʻene fakamaau totonú, ʻo hangē ia ko ʻene mēsí naʻe māʻolunga ange ia ʻi he ʻulungaanga fefeka ange ko e fakamaau totonú. ʻOku ʻikai ke tonu eni.

Ko e foʻi lea faka-Hepelū naʻe liliu ko e “fakamaau totonú” ʻi he New World Translation ʻoku lava ke toe ʻuhinga ia ko e “fakamaau.” Ko e fakamaau totonú ʻoku felāveʻi vāofi ia mo e māʻoniʻoní. Kae kehe, ko e fakamaau totonú ʻoku faʻa ʻi ai hono ngaahi kaunga fakalao. Ko e māʻoniʻoní ʻoku ʻikai ke faʻa pehē. ʻOku moʻoni ko e fakamaau totonu ʻa Sihová ʻe lava ke fekauʻaki ia mo hono fakahoko ʻo e tautea naʻe taau mo iá, ka ʻe toe lava ke kau ki ai ʻa hono tokonaki mai ʻo e fakamoʻui maʻá e faʻahinga tāú. (Senesi 18:​20-​32; Aisea 56:1; Malakai 4:2) Ko ia ai, ko e fakamaau totonu ʻa Sihová ʻoku ʻikai totonu ke vakai ki ai ʻoku fefeka pe fiemaʻu ke ʻai ke ʻoua ʻe mālohi.

Ko e foʻi lea faka-Hepelū ki he “mēsí” ʻoku lava ke ʻuhinga ia ki he ngāue ke taʻofi ʻa hono fakahoko ʻo e fakamāú. ʻOku lava ke toe ʻuhinga ia ki hano fakahaaʻi longomoʻui ʻo e manavaʻofá, ʻo ʻomai ai ʻa e fiemālie ki he faingatāmakí.​—Teutalonome 10:18; Luke 10:​29-​37.

Ko Sihová ko ha ʻOtua fakatouʻosi ia ʻo e fakamaau totonu mo e meesi. (Ekisoto 34:​6, 7; Teutalonome 32:4; Sāme 145:9) Ko ʻene fakamaau totonú mo ʻene mēsí ʻoku fakatou haohaoa pea ʻokú na ngāue feongoongoi fakataha. (Sāme 116:5; Hosea 2:​19) Ko e ongo ʻulungāngá fakatouʻosi ʻokú na palanisi haohaoa pe fefakakakatoʻaki. Ko ia ai, kapau te tau pehē ko e meesi ʻa Sihová ʻokú ne fakavaivaiʻi ʻa ʻene fakamaau totonú, ʻe toe pau ai ke tau pehē ʻoku fakavaivaiʻi ʻe heʻene fakamaau totonú ʻa ʻene mēsí.

Naʻe kikite ʻa ʻAisea: “ʻE hanganaki ʻamanaki ʻa Sihova ke fakahaaʻi kiate kimoutolu ʻa e hōifua, pea ko ia ai, te ne mālanga hake ke fakahaaʻi kiate kimoutolu ʻa e mēsí. He ko Sihová ko ha ʻOtua ia ʻo e fakamaau [“fakamaau totonu,” The New English Bible].” (Aisea 30:​18, NW) ʻOku fakahaaʻi heni ʻe ʻAisea ko e fakamaau totonu ʻa Sihová ʻokú ne ueʻi ʻa e ngaahi ngāue ʻo e mēsí ʻo ʻikai ʻuhinga ke ʻikai ʻai ke mālohi pe taʻotaʻofi ʻa ʻene fakamaau totonú. ʻOku fakahaaʻi ʻe Sihova ʻa e mēsí koeʻuhí ʻokú ne faitotonu pea pehē foki koeʻuhí ʻokú ne ʻofa.

Ko e moʻoni, ko e tokotaha-tohi Tohitapu ko Sēmisí naʻá ne tohi: “ʻOku ikuna ʻa e mēsí ʻi he fakamāú.” (Semisi 2:13e, NW) Kae kehe, ʻi he potutohí ʻoku lave ai ʻa Sēmisi ʻo ʻikai kia Sihova ka ki he kau Kalisitiane ʻoku nau fakahaaʻi ʻa e mēsí—ko e fakatātaá, ki he kau faingataʻaʻiá pea mo e masivá. (Semisi 1:27; 2:​1-9) ʻI hono ʻomai ʻa e faʻahinga faimeesi peheé ki he fakamāú, ʻoku fakatokangaʻi ai ʻe Sihova ʻa ʻenau tōʻongá pea fakamolemoleʻi ʻi he faimeesi kinautolu ʻo makatuʻunga ʻi he feilaulau ʻa hono ʻAló. Ko ia ai, ko ʻenau tōʻonga faimēsí ʻoku ikuna ia ʻi ha fakamaau fakafili pē ʻoku nau moʻulaloa nai ki ai.​—Palovepi 14:21; Mātiu 5:7; 6:​12; 7:2.

Ko ia ai, ʻoku ʻikai tonu ke pehē ko e fakamaau ʻa Sihová ʻoku fakavaivaiʻi ʻaki ʻa ʻene mēsí ʻi he ʻuhinga ʻoku fiemaʻu ke ʻai ke ʻikai mālohi ʻe he mēsí ʻa ʻene fakamaau totonú. Ko e ongo ʻulungaanga ʻe uá ʻoku palanisi haohaoa ia ʻia Sihova. ʻOkú na fepalanisiʻaki ʻo hangē tofu pē ko ʻena palanisí—pea ʻoku fakapalanisi ʻaki ia ʻa e—ongo ʻulungaanga kehe ʻo Sihová, hangē ko e ʻofá mo e potó.