Ko ha Toitoiʻanga mei he Matangí

ʻI ʻOLUNGA ʻi he ʻotu moʻunga ʻalapaini ʻo ʻIulopé, ʻe lava ke ke maʻu ai ha ʻakau mālohi ʻoku tupu ʻoku ui ko e lose ʻalapaini. Ko e kiʻi lose ʻalapaini valevale ko ení ʻoku faʻa tupu ia ko e fanga kiʻi vao fihi iiki ʻoku nau fetaʻomi he kelekelé ki ha maluʻi mei he ngaahi matangi fefeka ʻi he ngaahi feituʻu māʻolungá. Ko e matangi mālohí ʻokú ne fakamanamanaʻi ʻa e ʻi ai ʻa e ʻakau ʻalapainí ʻaki hono tuku hifo ʻa hono ʻea māfaná, toʻo ʻa e hauhau ʻo e ʻeá pea mo e kelekelé pea taʻaki ʻa honau aká.

ʻOku faʻa hao ʻa e lose ʻalapainí mei he ngaahi haʻahaʻa ʻo e matangí ʻi heʻene tupu ʻi he ngaahi mafahifahi ʻi he maká. Neongo ko e kelekele ʻi he ngaahi tuʻuʻanga ko ení ʻoku ʻikai nai ke lahi, ko e ngaahi mafahifahiʻi maká ʻoku hoko ia ko e maluʻanga mei he matangí pea ʻai ai ke malava ʻa e ʻakaú ʻo maluʻi ʻa e vaí. ʻI he meimei puli mei he mamata ki ai ʻi he lahi taha ʻo e taʻú, ʻi he faʻahitaʻu māfaná ko e fanga kiʻi lose ʻalapaini ko ení ʻoku nau teuteuʻi ʻa honau moʻunga fakauú ʻaki ʻa e ngaahi matalaʻiʻakau kulokula fakaʻofoʻofa.

Naʻe fakamatala ʻa e palōfita ko ʻAiseá ko e “kau pilinisí” ʻe fakanofo ia ʻe he ʻOtuá, pea ko e tokotaha taki taha ʻe hoko “ko ha toitoiʻanga mei he matangí.” (Aisea 32:​1, 2, NW) ʻI he malumalu ʻo e tataki ʻa e Tuʻí, ʻa Kalaisi Sīsū, ko e kau pilinisi fakalaumālie ko ení, pe kau ʻovasiá, te nau hangē ko e ngaahi maka fefeka, ʻoku tuʻumaʻu ʻi he ngaahi taimi ʻo e faingataʻá pe mamahí. Te nau ʻomai ʻa e fakaū alafalalaʻanga ʻi he fehangahangai mo e fakafilí pea tokoniʻi ʻa e faʻahinga masivá ke maluʻi ʻenau tukuʻanga vai fakalaumālie mei he Folofola ʻa e ʻOtuá.

Ko e ngaahi matangi ʻo e fakatangá, fakalotosiʻí, pe mahamahakí, ʻe lava ke ne toutou taaʻi ha Kalisitiane, ʻo fakatupunga ai ʻa ʻene tuí ke vaivai kapau ʻoku ʻikai ke ʻi ai hano maluʻi. ʻE lava ʻa e kau mātuʻa Kalisitiané ke tokonaki ki ai ʻa e maluʻangá ʻaki ʻenau fanongo tokanga ki heʻene palopalemá, ʻoange ʻa e akonaki makatuʻunga ʻi he Tohitapú pea fai ʻa e fakalototoʻa pe ko e tokoni ʻaonga. ʻI he hangē ko honau Tuʻi fakanofó, ʻa Kalaisi Sīsū, ʻoku nau loto ke tokoniʻi ʻa e faʻahinga kuo “tukuhāusia.” (Mātiu 9:36) Pea ʻoku nau holi ke tokoniʻi ʻa e niʻihi kehe kuo maumauʻi ʻe he ngaahi matangi ʻo e akonaki loí. (Efeso 4:​14) Ko e tokoni pehē ʻi he taimi feʻungamālié ʻe lava ke fakamoʻoniʻi ʻa ʻene mātuʻaki mahuʻingá.

“Naʻá ku fou ʻi ha vahaʻa taimi hohaʻa ʻi heʻeku moʻuí ʻi he taimi naʻe mavahe ai ʻa e ngaahi kaumeʻa ofi ʻe niʻihi mei he fakatahaʻangá, pea ʻi he taimi tatau, naʻe faingataʻaʻia ʻa ʻeku tamaí ʻi ha fānoa ʻa e toto ʻi he ʻutó,” ko e fakamatala ia ʻa Miriam. “ʻI ha feinga ke ikuʻi ʻeku loto-mafasiá, naʻá ku kamata ke faialea mo ha kaumeʻa tangata ʻi he māmaní. Taimi nounou mei ai, ʻi he ongoʻi taʻetāú, naʻá ku fakahā ki he kau mātuʻa ʻi he fakatahaʻangá kuó u fili ke mavahe mei he moʻoní, koeʻuhi naʻá ku fakapapauʻi ʻe ʻikai lava ke ʻofa ʻa Sihova ʻiate au.

“ʻI he taimi faingataʻa ko ení, naʻe fakamanatu mai ʻe ha tokotaha mātuʻa manavaʻofa kiate au ʻa e ngaahi taʻu naʻá ku ngāue ai ko ha faifekau tāimuʻa tuʻumaʻú. Naʻá ne tala mai kiate au naʻá ne leleiʻia maʻu pē ʻi heʻeku loto-tōnungá, pea naʻá ne kole anga-ʻofa mai ke u fakaʻatā ʻa e kau mātuʻá ke nau tokoniʻi au, ke nau fakapapauʻi mai kiate au ʻa e ʻofa ʻa Sihová. Ko ʻenau mahuʻingaʻia anga-ʻofa ʻi he taimi mahuʻinga ko iá naʻe hangē ia ha ‘toitoiʻanga’ kiate au lolotonga ʻa e afā fakalaumālie naʻe taulōfuʻu takatakai ʻiate aú. ʻI loto ʻi ha māhina ʻe taha, naʻá ku fakangata ai ʻa hoku vahaʻangatae mo hoku kaumeʻa tangatá, pea kuó u hanganaki ʻaʻeva ʻi he hala ʻo e moʻoní talu mei ai.”

ʻOku ongoʻi fiemālie ʻa e kau mātuʻá ʻi he taimi ʻoku nau sio ai ki he ngaahi kaungā Kalisitiane ʻoku longomoʻui fakalaumālié, koeʻuhi pē ko e maluʻanga ʻoku ʻoange kiate kinautolu ʻi he taimi totonú. Pea ko e ngaahi ‘feituʻu toitoiʻanga’ ko ení ʻokú ne ʻomai kiate kitautolu ha tomuʻa ʻahiʻahiʻi ʻo e tokoni fakalaumālie lahi ʻa ia te tau maʻu ʻi he lolotonga ʻa e Pule Taʻu ʻe Taha Afe ʻa Kalaisí.