ʻOku Aʻu ʻa e Ongoongo Lelei ʻo e Melinó ki he Ngaahi Feituʻu Māʻolunga ʻo Chiapas

“ʻI he tāmate tavale kovi taha ʻoku lava ke manatuʻi ʻe ha taha ʻi he vahe-fonua ko Chiapas, ko e kau ngoue ʻe toko 45, ʻikai hanau maluʻanga, kau ai ʻa e fanga kiʻi pēpē valevale ʻe toko 13, ʻa ia naʻe tāmateʻi ʻe ha kulupu ʻo e kau tangata fakamahafu.” Ko e līpooti ia naʻe fai ʻe he nusipepa ko e “El Universal” ʻi he meʻa naʻe hoko ʻi Acteal, Vahe-Fonua Chiapas, ʻi Tīsema 22, 1997.

KO CHIAPAS ko e vahe-fonua ʻi he fakatokelau ʻo Mekisikoú, kauʻāfonua ʻi Kuatemala. ʻI ha hisitōlia fuoloa ʻo e masivá mo e hongé, ko ha kulupu ʻo e kau ʻInitia tuʻufonua Maya naʻa nau fokotuʻutuʻu ha kau tau angatuʻu ʻi Sanuali 1994, ʻi he malumalu ʻo e hingoa ko e Ejército Zapatista de Liberación National (EZLN, Kau Tau Zapatista Fakatauʻatāina Fakafonua). Ko e ngaahi fealeaʻaki ki ha fakaleleiʻanga melinó naʻe ʻikai ke ola lelei. Ko e ngaahi fakatūʻuta mo e ngaahi ʻohofi, fakatouʻosi mei he kau angatuʻú pea mo e kau sōtia ʻa e puleʻangá, kuo iku ia ki he lingitoto mo e mate. Naʻe fakatupunga ʻe he maveuveú ʻa e tokolahi ʻo e kau ngoue ʻi he feituʻú ke nau hola ke nau hao.

ʻI he lotolotonga ʻo e ngaahi tuʻunga taʻepau peheé, naʻe ʻi ai ʻa e kulupu ʻe taha ʻo e kau ʻofa ki he melinó ʻa ia naʻa nau tuʻuʻatā maʻu pē ʻi he ngaahi fekīhiaki fakapolitikalé. ʻI he faivelengá, ʻoku nau fakahanga ʻa e tokangá ki he Puleʻanga ʻo e ʻOtuá ko e ʻamanakiʻanga pē ia ʻe taha ki hono fakaleleiʻi ʻa e ngaahi palopalema ʻoku fetaulaki mo e kakaí, fakatouʻosi ʻi he feituʻú pea ʻi he foʻi kolopé. (Taniela 2:44) Ko hai ʻa kinautolu? Ko e Kau Fakamoʻoni ʻa Sihová. ʻI he talangofua ki he fekau ʻa Sīsuú, ʻoku nau feinga ke ʻave ʻa e ongoongo lelei ʻo e Puleʻanga ʻo e ʻOtuá ki he ngaahi konga lahi taha ʻoku liʻekiná ʻi he ngaahi feituʻu māʻolunga ʻo Chiapas. (Mātiu 24:14) Naʻe anga-fēfē ʻa e malanga ʻi he malumalu ʻo e ngaahi tuʻunga peheé, pea ko e hā hono olá?

“Ko e Taha Au ʻo e Kau Fakamoʻoni ʻa Sihová”

Ko Adolfo, ko ha talavou naʻá ne hoko ki muí ni mai ko ha tokotaha malanga ʻo e Puleʻangá, ʻa ia naʻe ngāue ʻi he ʻaho ʻe taha ʻi ha fale fakamafolalea ʻi Ocosingo. Fakafokifā pē naʻe ʻi ai ha tukituki leʻo-lahi ʻi he matapaá. Ko ha kulupu ʻo e kau tangata fakapuli naʻa nau hū mai pea ʻai ʻenau ngaahi meʻafaná ki hono ʻulú. Naʻa nau fakavave ki he loki fakamafolaleá, faʻao ʻa e naunaú, pea nau fakamafola atu ʻi he ʻeá ʻoku nau fai ha tala tau fakafepaki ki he puleʻangá.

ʻI he hanga hake kia Adolfo, naʻe tuʻutuʻuni ange ʻe he kau tangata toʻo meʻataú kiate ia ke kau fakataha mo kinautolu. “Ko e taha au ʻo e Kau Fakamoʻoni ʻa Sihová,” ko e tali ia ʻa Adolfo, neongo naʻe teʻeki ai ke ne papitaiso. Naʻá ne fakamatalaʻi ange ko e ʻamanakiʻanga pē ʻe taha ki he melinó ko e Puleʻanga ʻo e ʻOtuá, pea naʻá ne fakafisingaʻi mālohi ʻa e teunga mo e meʻafana naʻa nau ʻoange kiate iá. ʻI he sio ki heʻene tuʻumaʻu papaú, naʻa nau tukuange ia ke ne ʻalu. ʻI he manatu ki he meʻa naʻe hokó, ʻoku pehē ʻe Adolfo: “Naʻe fakaivimālohiʻi moʻoni ʻeku tuí ʻe he meʻa ko ia naʻe hokó.”

Faifai atu pē naʻe tuʻumaʻu ʻa e tuʻungá, ka naʻe kei ʻi he malumalu pē ʻo e puleʻi fakakautaú ʻa e feituʻú. Neongo ia, naʻe tali fiefia ʻe Adolfo ʻa e fakaafe ʻa e kau mātuʻa ʻo e fakatahaʻanga fakalotofonuá ke ne ngāue mo ha kulupu mavahe  ʻo e kau Kalisitiané ʻi he feituʻú. ʻI he feituʻu faiʻanga sivi naʻe pau ke ne kolosi atu aí, naʻe fakahāhā ange kiate ia ʻe he kau sōtiá ʻa e fakaʻapaʻapa ʻi heʻene fakahā ange ko iá ko e taha ʻo e Kau Fakamoʻoni ʻa Sihová. Naʻá ne papitaiso ki mui ai pea naʻá ne maʻu ʻa e fiemālie ʻi hono tokoniʻi ʻa e kulupu mavahe ko iá ʻo hoko ko ha fakatahaʻanga ʻo e Kau Fakamoʻoni ʻa Sihová. “Kuó u papitaiso he taimí ni,” ko e fakamatala ia ʻa Adolfo, “ʻoku lava ke u leaʻaki ʻa e tuipau kakato ʻo pehē ko e taha au ʻo e Kau Fakamoʻoni ʻa Sihová!”

“ʻOku Fakaivimālohiʻi Kitautolu ʻe Sihova”

ʻI he taimi nounou hili ʻa hono fakahā ʻe he EZLN ʻa e tala tau fakafepaki ki he puleʻangá ʻi he letioó, naʻe hola ʻa e kakai ʻo e koló. Ko Francisco, ko ha faifekau taimi-kakato, pe tāimuʻa, naʻá ne fakamatalaʻi ʻa e anga hono fakaivimālohiʻi ia ʻe Sihova pea mo hono uaifí ʻi he meʻa ko ia naʻe pau ke na tofanga aí.

“Naʻá ma fakakaukau ke ma toitoi ʻi ha feituʻu ʻoku houa ʻe tolu ʻa e lue lalo ki aí. Naʻe ʻi ai ha fakatahaʻanga ai, ko ia te ma ʻi ai mo e fanga tokouá. Naʻe vave ʻa e taimi ke fai ai ʻemau ʻasemipilī fakafeituʻú ʻi Palenque. Ko hoku uaifí mo au naʻe ʻikai te ma loto ke ma liʻaki ʻa e fakataha makehe ki he kau tāimuʻá, ka naʻá ma ʻilo ko e hala ki he ʻasemipilií naʻe tāpuniʻi ia ʻe he EZLN. Naʻá ma fakakaukau ke ma ʻalu hala vao, ʻa ia naʻá ma fononga ai ʻi he houa ʻe hiva. Naʻá ma aʻu taimi totonu ke kau ki he fakataha tāimuʻá, ʻa ia naʻá ma fuʻu  fiefia ai, pea pehē foki ki he polokalama ʻasemipilií fakakātoa.

“ʻI heʻema fokí, naʻá ma ʻilo ai ko homa ʻapí ne tutu pea naʻe kaihaʻasi ʻema fanga monumanú. Ko e meʻa pē naʻe toé ko ha kiʻi kato vala. Naʻá ma ongoʻi loto-mamahi fekauʻaki mo ʻema molé, ka ko e fanga tokoua ʻi Ocosingo naʻa nau anga-ʻofa ʻo ʻave kimaua ki honau ngaahi ʻapí. Naʻa nau toe fakahāhā mai foki kiate kimaua ʻa e founga ke ngāue ai ʻi ha ngaahi meʻa ʻa ia ʻi homa tuʻunga ko e ongo faʻá naʻe ʻikai te ma fai ia ki muʻa. Naʻe akoʻi au ʻe ha tokoua ʻe taha ke fai ha ngaahi faitā, pea ko e tokoua ʻe taha naʻá ne akoʻi au ki he tuitui suú. Ko e founga ʻeni naʻe malava ai ki hoku uaifí mo au ke ma poupouʻi ʻaki kimauá ʻo aʻu mai ki he taimí ni, ʻo ʻikai ke taʻofi ai ʻa e ngāue tāimuʻá. ʻI he fakalaulauloto ki he meʻa naʻe hokó, ʻoku malava ke ma sio ai ʻi he lolotonga ʻo e ʻikai faingofua kiate kimaua ke kātakí, ʻoku fakaivimālohiʻi kimaua ʻe Sihova.”

Fua ʻo e Ngāue Fakamalangá

Ko e Kau Fakamoʻoni ʻi he Vahe-Fonua Chiapas naʻe ʻikai te nau fakaʻatā ʻa e faingataʻá mo e fakatuʻutāmakí ke ne taʻofi kinautolu mei he kau ʻi ha feinga makehe ke ʻave ʻa e ongoongo leleí ki he kakai ʻi he feituʻú. Ko e fakatātaá, ʻi ʻEpeleli mo Mē 1995, naʻa nau kau fakataha mo honau kaungā Kalisitiane ʻi māmani lahí ʻi ha feingangāue ko hono tufaki ʻa e Ongoongo ʻo e Puleʻangá Fika 34, fakataha mo e kaveinga feʻungamālie taha Ko e Hā ʻOku Palopalemaʻia Ai ʻa e Moʻuí?

ʻI he lolotonga ʻo e feingangāué​—ʻi ha feituʻu naʻe ui ko Pueblo Nuevo—ko Ciro, ko ha tāimuʻa tuʻumaʻu, naʻá ne maʻu ai ha fāmili naʻa nau fakahāhaaʻi ʻa e mahuʻingaʻiá. ʻI heʻene toe foki ki ai ʻi he ʻosi ʻa e ʻaho ʻe tolu, naʻá ne malava ai ke kamata ha ako Tohitapu mo kinautolu. Ka ʻi he taimi naʻe toe foki atu ai ʻa Ciro pea mo ha kaungāngāue ke hoko atu ʻa e ako mo e fāmilí, naʻe ʻikai ke ʻi ʻapi ʻa e tangata ia ʻo e ʻapí. Ka, ko ha kulupu ʻo e kau tangata fakapuli naʻa nau tali mai kiate ia ke fai ha kovi ki ai. Naʻa nau ʻeke ange kia Ciro pea mo hono kaungāngāué pe ko e hā ʻokú na kumi ki aí pea nau fakamanamanaʻi ke tāmateʻi kinaua. ʻI he hili ha lotu fakalongolongo kia Sihova, naʻe fakamatalaʻi loto-toʻa ʻe he ongo Kalisitiané ko ʻena haʻú ke akoʻi ki he fāmilí ʻa e Tohitapú. ʻI he meʻa ko iá naʻe tukuange kinaua ʻe he kau tangata fakapulí. ʻI ha faʻahinga ʻuhinga, naʻe ʻikai ʻaupito pē ke haʻu ʻa e tangata ia ʻo e ʻapí ʻi he ʻaho ko iá.

ʻI he ʻaho ʻe taha ʻi he meimei taʻu ʻe tolu ki mui ai, naʻe ʻohovale ʻa Ciro ʻi he ʻasi ange ʻa e tangatá ʻi hono matapaá. He fiefia ē ka ko Ciro ʻi heʻene ʻiloʻi ko e fāmilí fakalūkufua ne nau ʻosi papitaiso pea nau feohi he taimi ko ʻení mo ha fakatahaʻanga ʻi Kuatemala! Ko e taha ʻo e ngaahi ʻofefiné naʻe ngāue ko ha tāimuʻa tuʻumaʻu.

Houngaʻia ʻi he Meʻakai Fakalaumālié

Neongo ʻa e hokohoko atu ʻa e faingataʻá ʻi Chiapas, ʻoku līpooti ʻe ha ʻovasia fakavahe ʻo pehē ko e Kau Fakamoʻoni ʻi he feituʻú ʻoku nau houngaʻia moʻoni ʻi he mahuʻinga ʻo e fakataha fakatahatahá. (Hepelu 10:​24, 25) ʻOkú ne lave ki he meʻa naʻe  hoko ʻi ha ʻaho ʻasemipilī makehe ki muí ni mai, ʻa ia naʻe fakataimi-tēpileʻi ke kamata pongipongia ʻi he pongipongí koeʻuhí kae malava ke foki atu ki ʻapi ʻa e faʻahinga ʻoku maʻu fakatahá ʻi he taimi faingamālie ʻo e ʻahó. Neongo ko e tokolahi taha ʻo kinautolu naʻe pau ke nau lue ʻo laka hake ʻi he houa ʻe tolu ʻo fou atu ʻi he vaotaá ke aʻu ki he feituʻu faiʻanga ʻasemipilií, ko e tokotaha kotoa pē naʻe ʻi hono nofoʻangá ʻi he 7:00 pongipongí. ʻI he kau fanongó naʻe ʻi ai ʻa e kau mēmipa ʻe toko ono ʻo e kulupu EZLN, ʻo nau fanongo mo pasipasi, ʻo fiefia nai ʻi he polokalamá. Naʻa nau lue foki mo kinautolu ʻi he houa ʻe tolu ke maʻu ʻa e ʻasemipilií. Ko e toko uanoa ʻo kinautolu naʻa nau toe haʻu ki he Fakamanatu ʻo e pekia ʻa Kalaisí, ʻa ia naʻe fai ʻi ha Fale Fakatahaʻanga fakalotofonua.

Ko ha talavou ʻe taha ʻi ha kau tau vao naʻe vaheʻi ki ai ʻe hono kau māʻolungá ke ne leʻohi ha feituʻu pau ʻi ha vaotā. ʻI heʻene aʻu ki he feituʻu ko iá, naʻá ne ʻilo ko e tokolahi taha ʻo e kau nofo kotoa aí, ko e Kau Fakamoʻoni ʻa Sihova, kuo nau hola. Ko ia naʻá ne nofo hifo ʻi ha taha ʻo e ngaahi ʻapi liʻakí. ʻI he ʻikai ha fuʻu loko meʻa lahi ke faí, naʻá ne toʻo hake ai ʻa e ngaahi tohi ʻa ia naʻá ne maʻu takai ʻi he falé peá ne kamata ke lau ia. Naʻe toki ʻilo ange ko e ngaahi tohi ia ʻa e Taua Leʻó naʻe tuku ai ʻe he Kau Fakamoʻoní. ʻI heʻene nofo toko tahá, naʻe maʻu ʻe he talavoú ʻa e taimi ke fakalaulauloto ai ki he meʻa naʻá ne laú. Naʻá ne fakakaukau kuo pau ke liliu ʻene moʻuí pea tukuange mo ʻene ngaahi meʻataú. ʻI he vave taha naʻá ne malavá, naʻá ne ʻilo ʻa e Kau Fakamoʻoní pea kamata ha ako Tohitapu. ʻI loto ʻi he māhina ʻe ono, naʻá ne tala ki he niʻihi kehé ʻa e ongoongo leleí. Ko ia mo e mēmipa kehe ʻe toko tolu ʻi hono fāmilí ʻa ia naʻa nau māʻunga fepoupouaki mo e kau tau vaó ʻoku nau hoko kinautolu ko e kau Kalisitiane ʻosi papitaiso he taimí ni.

Vakai ʻi ha Tafaʻaki Pau

Neongo naʻe ʻuhinga ia ko ha fehangahangai lahi mo e faingataʻá, naʻe tākiekina pau moʻoni ʻe he fakafepakí ʻa e fakakaukau ʻa e kakaí ki he ngāue fakamalangá. Ko ha tokotaha mātuʻa ʻi he kolo ko ia naʻe kamata ai ʻa e fekīhiakí ʻokú ne pehē: “ʻI he ʻaho ʻe nima hili ʻa e hoko ʻa e fetauʻakí, naʻa mau ʻosi fokotuʻutuʻu ʻa e ngāue fakamalangá fakatouʻosi ʻi loto mo tuʻa ʻi he koló. Naʻe vēkeveke ʻa e kakaí ke fanongo kiate kimautolu. Naʻa mau tufa ʻa e ngaahi tohi faka-Tohitapu lahi pea kamata mo e ngaahi ako Tohitapu ʻe niʻihi. ʻI he feituʻu ʻe taha, ko e tokolahi naʻa nau fakafepaki ki he moʻoní, ka koeʻuhí ko e fekeʻikeʻí, ʻoku nau fanongo he taimí ni, ako ʻa e Tohitapú, pea maʻu ʻa e ngaahi fakatahá mo e ngaahi ʻasemipilií.”

ʻOku fiefia ʻa e fanga tokouá koeʻuhí he ʻoku malava ke nau kei hokohoko atu ʻenau ngaahi ngāue fakateokalatí neongo ʻa e ngaahi fuʻu tuʻunga taʻemanongá. ʻI he ʻilo fakatouʻosi ki ai ʻa e ngaahi mafai ʻo e puleʻangá mo e EZLN, ʻoku nau hokohoko atu hono fai ʻenau ngaahi ʻasemipilií, ʻa ia ʻoku fakaivimālohiʻi fakalaumālie ai kinautolú. Ko e ngaahi ʻaʻahi ʻa e kau ʻovasia fefonongaʻakí ko ha toe fakaueʻiloto mālohi ia ke hokohoko atu ʻa e ngāue fakamalangá. Ko e meʻa mahuʻingá, ko e fakalototoʻá ʻoku aʻu ʻo haʻu ia mei he faʻahinga naʻa nau kau ʻi he fakafepakí, ʻa ia ʻoku nau faʻa fakaʻaiʻai ai ʻa e Kau Fakamoʻoní ke hokohoko atu ʻi heʻenau ngāue fakamalangá.

Neongo ko e ngaahi ʻahiʻahi mo e ngaahi faingataʻa naʻe kātekina ʻe he kakai ʻi Chiapas kuo siʻisiʻi hifo ʻi ha taimi, kuo teʻeki ai pē ke nau ʻosi atu. Ka, ko e meʻa ʻe taha ʻoku paú—ʻoku fakapapauʻi ʻe he Kau Fakamoʻoni ʻa Sihová ke hokohoko atu ʻo ʻikai tuku ʻa ʻenau ngaahi feinga ke ʻave ki he kakaí ʻa e ongoongo lelei ʻo e melinó mei he Folofola ʻa e ʻOtuá, ko e Tohitapú. (Ngāue 10:​34-36; Efeso 6:15) ʻOku nau ʻilo, hangē ko ia naʻe fakahā ʻe he palōfita ko Selemaiá, “ʻoku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) Ko e Puleʻanga pē ʻo e ʻOtuá ʻi he ongo toʻukupu ʻo hono ʻAló, ʻa Sīsū Kalaisi, ʻoku lava ke ne ʻomai ʻa e fakaleleiʻanga ki he fakamaau taʻetotonú mo e masivá ʻi he māmaní.—Mātiu 6:10.

[Mape ʻi he peesi 9]

(Ki he fakamatala kuo fokotuʻú, sio ki he tohi)

Kūlifa ʻo Mekisikoú

CHIAPAS

KUATEMALA

ʻŌseni Pasifikí

[Maʻuʻanga ʻo e Mape]

Mountain High Maps® Copyright © 1997 Digital Wisdom, Inc.

[Fakatātā ʻi he peesi 9]

ʻAlu ʻa e Kau Fakamoʻoní ʻi he ngāue fakafaifekaú ʻi he ngaahi feituʻu māʻolunga ʻo Chiapas