Talanoa ki he Moʻuí

Tāpuakiʻi ʻAki ha Tofiʻa Makehe

FAKAMATALA FAI ʻE CAROL ALLEN

Naʻá ku toko taha pē, ʻo pukepuke ʻeku tohi foʻou fakaʻofoʻofá. Naʻe maʻunimā au ʻe he manavaheé, pea lele hifo mo e loʻimatá ʻi hoku matá. ʻI he ʻosi angé, ko ha kiʻi taʻahine taʻu fitu au naʻe mole ʻi ha fonua muli, ʻo takatakaiʻi ʻe ha kakai ʻe laui mano!

KI MUÍ NI, ʻi he meimei taʻu ʻe 60, ko e ngaahi manatu lelei ki he meʻa naʻá ku hokosia ʻi he kei siʻí naʻe toe foki mai, naʻe langaʻi ia ʻe ha ʻaʻahi mo hoku husepānití, ko Paul, ki he Watchtower Educational Center ʻi Patterson, Niu ʻIoke. Naʻe fakaafeʻi ia ki ai ke ne kau ki he kalasi hono ua ʻo ha ako ki he kau ʻovasia fefonongaʻaki ʻa e Kau Fakamoʻoni ʻa Sihová.

ʻI heʻema sio takai ʻi he loki hūʻanga maamaʻiá, naʻá ku fakatokangaʻi ai ha fakaʻaliʻali lahi naʻe fakalea “NGAAHI FAKATAHA-LAHI.” ʻI he ofi ki loto-mālié naʻe ʻi ai ha laʻitā motuʻa lanu ʻuliʻuli-mo e-hinehina ʻo ha fānau ʻoku nau taʻataʻalo fiefia ʻaki ʻenau ngaahi tatau ʻo ʻeku tohi he kei siʻí! Naʻe vave leva ʻeku lau ʻa e fakamatala ʻo e fakatātaá: “1941​—ʻI St. Louis, Missouri, ʻi he taimi naʻe kamata ai ʻa e konga pongipongí, ko e fānau ʻe toko 15,000​—mei he vahaʻa ʻo e taʻu 5 ki he 18 honau taʻumotuʻá—naʻa nau fakatahataha ʻi he malaʻe vaʻinga tefitó fakahangatonu ʻi muʻa ʻi he peletifōmú. . . . naʻe fanongonongo ai ʻe Tokoua Rutherford ʻa e tukuange mai ʻo e tohi foʻou ko e Children.”

Naʻe ʻoange ki he kiʻi leka taki taha ha tatau fakafoʻituitui. Naʻe foki leva ʻa e fānaú kotoa ki he feituʻu naʻe tangutu ai ʻenau ngaahi mātuʻá​—tukukehe pē au. Naʻá ku pulia! Naʻe fua hake au ki ʻolunga ʻe ha tokotaha anga-fakakaumeʻa peá ne fokotuʻu au ʻi ha funga puha meʻaʻofa māʻolunga peá ne talamai kiate au ke u fakasio ha tokotaha ʻoku ou maheni mo iá. ʻI heʻeku loto-moʻuá naʻá ku fakasio ki he matua hifo ʻa e fuʻu kakaí mei he siteisi lahi ʻi ʻolungá. ʻOhovale pē, naʻá ku fakatokangaʻi atu ha tokotaha! “Uncle Bob! Uncle Bob!” Naʻá ne ʻiloʻi mai au! Naʻe fua atu au ʻe Bob Rainer ki he feituʻu naʻe tatali ai ʻeku ongo mātuʻa loto-hohaʻá.

 Ngaahi Meʻa ki Muʻa Naʻá Ne Fakafuo ʻEku Moʻuí

ʻI heʻeku sio ki he fakatātaá naʻe vave ai ʻa e toe foki mai ʻeku manatú​—ʻa e ngaahi meʻa ko ia naʻá ne fakafuo ʻeku moʻuí pea taki atu ai ki heʻema ʻi he fale fakaʻofoʻofa ʻi Patterson. Naʻe toe ʻomai ki heʻeku fakakaukaú ʻa e ngaahi meʻa ʻi he ngaahi taʻu ʻe teau ki muʻa atú, ki he ngaahi meʻa naʻá ku ako fekauʻaki mo ia tautautefito mei heʻeku ongo kuí pea mo ʻeku ongo mātuʻá.

ʻI Tīsema 1894 ko ha faifekau taimi-kakato ʻo e Kau Ako Tohitapú, ʻa ia ʻoku ʻiloa he taimí ni ko e Kau Fakamoʻoni ʻa Sihová, naʻá ne ʻaʻahi ki heʻeku kui tangatá, ko Clayton J. Woodworth, ʻi hono ʻapí ʻi Scranton, Pennsylvania, U.S.A. Naʻe toki mali pē ʻa Clayton. Naʻá ne fai ha tohi ki he palesiteni ʻo e Watch Tower Bible and Tract Society, ko Charles Taze Russell, pea naʻe pulusi ia ʻi he Watchtower ʻo Sune 15, 1895. Naʻá ne fakamatala ai:

“Ko kimauá ko ha husepāniti mo e uaifi kei talavou ʻa ia naʻá ma hoko ko e ongo mēmipa ʻo e siasi Palotisaní ʻi he taʻu nai ʻe hongofulu; ka ko kimaua he taimi ní, ʻokú ma fakapapauʻi, ʻa ʻema mavahe mei hono fakapoʻulí ki he maama ʻo e ʻaho foʻou ʻoku aata mai he taimí ni ki he fānau fakatapui ʻo e Fungani Māʻolungá. . . . Ki muʻa fuoloa atu ke ma feʻilongakí ko ʻema fakaʻamu vēkeveké ia ke ma ngāue nai ki he ʻEikí, kapau ko hono finangaló ia, ke ma hoko ko e ongo misinale ʻi he malaʻe mulí.”

Ki mui mai, ʻi he 1903, ko Sebastian mo Catherine Kresge, ʻa ʻeku ongo kui fefiné, naʻá na fiefia ke fanongo ki he pōpoaki ʻa e Tohitapú ʻa ia naʻe ʻomai ʻe he ongo fakafofonga ʻo e Taua Leʻó ki he faama lahi ko ia naʻá na nofo aí, ʻi he ʻOtu Moʻunga fakaʻofoʻofa Pocono ʻo Pennsylvania. Ko hona ongo ʻofefiné, ʻa Cora mo Mary, naʻá na nofo foki ai fakataha mo hona ongo husepānití, ko Washington mo Edmund Howell. Ko e ongo fakafofonga ʻo e Taua Leʻó, ʻa Carl Hammerle mo Ray Ratcliffe, naʻá na nofo fakataha mo kinautolu ʻi he uike kakato ʻe taha, ʻo akoʻi kiate kinautolu ha ngaahi meʻa lahi. Ko e mēmipa kotoa ʻe toko ono ʻo e fāmili ko ʻení naʻa nau fanongo, ako, pea vave ʻenau hoko ko e Kau Ako Tohitapu faivelenga.

ʻI he taʻu pē ko iá, ʻi he 1903, naʻe maʻu ʻe Cora mo Washington Howell ha ʻofefine ko hono hingoá ko Catherine. Naʻe mahuʻinga ʻa e founga naʻe faifai atu ai ʻone mali mo ʻeku tamaí, ʻa Clayton J. Woodworth Siʻi, pea naʻá ku tui ki ha talanoa mohu ʻuhinga. ʻOku fakahaaʻi mai ai ʻa e ʻiloʻilo mo e tokanga fakaetamai ʻa ʻeku kui tangata ko Clayton J. Woodworth Lahí.

Maʻu Heʻeku Tamaí ha Tokoni Anga-ʻOfa

Ko ʻeku tamaí, ʻa Clayton siʻi, naʻe fāʻeleʻi ia ʻi Scranton ʻi he 1906, ʻi loto ʻi he kilomita ʻe 80 pe fakafuofua ki he maile ʻe 50 mei he faama ʻa e Howell. ʻI he ngaahi taʻu ki muʻa atu ko iá, naʻe maheni lelei ai ʻa ʻeku Kui Tangatá ko Woodworth mo e fāmili lahi ʻo Howell, ʻo ne faʻa fiefia ʻi heʻenau anga talitali kakai ʻiloá. Naʻá ne hoko ko ha tokoni lahi ki he fakatahaʻanga ʻo e Kau Ako Tohitapú ʻi he feituʻu ko iá. ʻI he faai mai ʻa e taimí, naʻe tala ange ai kia Kulenipā ke ne fakahoko ʻa e mali ʻa e foha ʻe toko tolu ʻo e Howell, pea ʻi he fakakaukau atu ki ha lelei maʻa hono fohá tonu, naʻá ne ʻai ia ko ha ʻuhinga ke na ʻalu fakataha ki he mali taki taha ko ʻení.

Naʻe teʻeki ai ke kau longomoʻui ʻa Teti ki he ngāue fakafaifekau ʻa e Kau Ako Tohitapú. Ko e moʻoni, naʻá ne ʻave ʻa Kulenipā ke ne fai ʻene ngaahi ʻaʻahi fakafaifekaú, ka neongo ʻa e fakalototoʻa ʻa Kulenipaá, naʻe ʻikai ke fakahoko ai ʻe Teti ia ʻa ʻene tafaʻaki ʻaʻaná. ʻI he taimi ko iá, ko e mahuʻingaʻia ʻa ʻeku tamaí ʻi he mūsiká naʻá ne uesia kotoa ai ʻa e niʻihi kehé, pea naʻá ne hoko atu ki ha ngāue fakapalōfesinale.

 Ko Catherine, ʻa e ʻofefine ʻo Cora mo Washington Howell, naʻá ne toe hoko mo ia ʻo potopotoʻi ʻi he mūsiká, ʻo ne tā mo akoʻi ʻa e tā pianó. Ka ʻi hono fakaʻatā mai pē kiate ia ʻa e ngāue fakapalōfesinalé, naʻá ne tuku ki he tafaʻakí ʻa e tulimui ki aí ka ne kamata ke kau ki he ngāue fakafaifekau taimi-kakató. Naʻe ʻikai mei ʻi he fakakaukau ʻa Kulenipaá ha kaungāngāue lelei taha ʻo hono fohá​—ka ne taʻeʻoua ʻeku fakakaukaú! Naʻe papitaiso ʻeku tamaí, pea naʻá ne mali mo ʻeku faʻeé ʻi he māhina ʻe ono ki mui ai, ʻi Sune 1931.

Naʻe laukauʻaki maʻu pē ʻe Kulenipā ʻa e malava fakamūsika ʻa hono fohá. Naʻá ne fiefia ʻaupito ʻi he taimi naʻe kole ange ai kia Teti ke ne akoʻi ʻa e kau hiva lahi ʻo e fakataha-lahí ki he fakataha-lahi fakavahaʻapuleʻanga ʻo e 1946 ʻi Cleveland, Ohio. ʻI he taʻu hoko maí, naʻe tataki ai ʻe Teti ha kau hiva ʻi he ngaahi fakataha-lahi kehe lahi ʻa e Kau Fakamoʻoni ʻa Sihová.

ʻAhiʻahiʻi ʻo Kulenipaá mo e Moʻui ʻi Pilīsoné

ʻI he loki hūʻanga ʻi Patterson, naʻá ku toe sio ai mo Paul ʻi he meʻa ʻoku fakaʻaliʻalí ʻi he fakatātā he peesi hono hokó. Naʻe vave ʻa ʻeku fakatokangaʻi ʻa e fakatātaá, koeʻuhi naʻe ʻomai ʻe Kulenipā kiate au ha tatau ʻo ia ʻo laka hake ʻi he taʻu ʻe 50 kuo maliu atú. Ko ia ʻa e tokotaha ʻoku tuʻu taupotu ki toʻomataʻú.

ʻI he lolotonga ʻo e fekeʻikeʻi mamahiʻi-fonua takatakai ʻi he Tau I ʻa e Māmaní, ko e toko valu ʻo e Kau Ako Tohitapú​—kau ai ʻa Joseph F. Rutherford (ʻoku tangutu ʻi loto-mālié), ko e palesiteni ʻo e Sōsaieti Taua Leʻó—naʻe tuku pōpula taʻetotonu pea tauhi taʻetotongi-maluʻi. Naʻe fakatefito ʻa hono tukuakiʻi kinautolú ki he ngaahi fakamatala ʻi he voliume hono fitu ʻo e Studies in the Scriptures, ʻa ia naʻe fakakaveinga ko e The Finished Mystery. Ko e fakamatalá naʻe maʻuhala ʻo pehē ko hono fakalotosiʻiʻi ʻa e kau ʻa e ʻIunaite Seteté ʻi he Tau I ʻa Māmaní.

Laka hake ʻi he vahaʻa taimi ʻo e ngaahi taʻu lahi, naʻe tohi ai ʻe Charles Taze Russell ʻa e ʻuluaki voliume ʻe ono ʻo e Studies in the Scriptures, ka naʻá ne mate ki muʻa ke ne tohi ʻa hono fitú. Ko ia naʻe ʻave ai ʻene ngaahi noutí kia Kulenipā pea mo ha Tokotaha Ako Tohitapu ʻe taha, pea naʻá na tohi ʻa e voliume hono fitú. Naʻe tukuange mai ʻeni ʻi he 1917, ki muʻa ke ngata ʻa e taú. ʻI he hopó, ko Kulenipā pea mo e tokolahi taha ʻo e niʻihi kehé, naʻe tautea ki he tikite ʻe fā ʻo taki taʻu ʻe  20 taki taha kae ngāueʻi fakataha pē he foʻi taʻu ʻe 20.

ʻOku fakamatalaʻi ʻe he fakamatala ʻo e fakatātā ʻi he loki hūʻanga ʻi Patterson: “ʻI he māhina ʻe hiva hili ʻa hono tautea ʻo Rutherford pea mo hono ngaahi kaungāngāué​—pea mo e ʻosi atu ʻo e taú​—ʻi Maʻasi 21, 1919, naʻe ʻoatu ai ʻe he fakamaauʻanga tangí ha totongi-maluʻi ki he kotoa ʻo e kau fakaʻiloa ʻe toko valú, pea ʻi Maʻasi 26, naʻe tukuange ai kinautolu  ʻi Brooklyn ʻi he totongi-maluʻi ko e $10,000 ki he tokotaha taki taha. ʻI Mē 5, 1920, naʻe fakatonuhiaʻi ai ʻa J. F. Rutherford pea mo ha niʻihi kehe.”

ʻI he hili ʻa hono tauteá, ka ki muʻa ke ʻoatu ki he ʻapi pōpula fakavahe ʻi Atlanta, Georgia, naʻe fakamoleki ʻe he toko valú honau ʻuluaki ngaahi ʻaho siʻi ʻo e ngāue pōpulá ʻi he ʻapi pōpula ʻi he Hala Raymond ʻi Brooklyn, Niu ʻIoke. Mei aí naʻe hiki ʻe Kulenipā ha fakamatala fekauʻaki mo hono tuku ʻi ha kiʻi loki mita ʻe 1.8 mo e 2.4 “ʻi he lotolotonga ʻo e ʻuli mo e taʻemaau fakaʻulia.” Naʻá ne pehē: “ʻOku mou maʻu ha fokotuʻunga nusipepa, pea kapau ʻoku mou tomuʻa hehema ke tukunoaʻi kinautolu, te mou fakatokangaʻi leva ko e pepa ko ʻení pea mo e koá mo ha konga tupenu kaukau, ʻa e faingamālie pē taha ki hono tauhi maʻu ʻo e maʻá mo e tokaʻi-kitá.”

Ka, naʻe tauhi ʻe Kulenipā ʻa ʻene fakakatá, ʻo lave ki he ʻapi pōpulá ʻi he tuʻunga ko e “Hôtel de Raymondie,” ʻo pehē, “Te u ngata ā hē he taimí ni kuo ʻosi e taimí.” Naʻá ne toe fakamatalaʻi ʻa e takai ʻi hono lotoʻaá. ʻI he taimi naʻá ne kiʻi tuʻu ai ke helu hono ʻulú, naʻe hamusi ʻe ha tokotaha ʻene kiʻi kato uasí, kae hangē ko ia naʻá ne tohí, “Naʻe motu ʻa e seiní ka naʻá ku fakahaofi ia.” ʻI he taimi naʻá ku ʻaʻahi ai ki he Pēteli ʻi Brooklyn ʻi he 1958, ko Grant Suiter, ko e sekelitali-tauhi paʻanga ia he taimi ko iá ʻa e Sōsaieti Taua Leʻó, naʻá ne ui au ki hono ʻōfisí ʻo ne ʻomai kiate au ʻa e uasi ko iá. ʻOku ou kei koloaʻaki ia.

Ola ki he Tamaí

ʻI he taimi naʻe tuku pōpula taʻetotonu ai ʻa Kulenipā ʻi he 1918, naʻe taʻu 12 pē ʻeku tamaí. Naʻe tāpuni ʻe Kulenimā honau ʻapí pea ʻave ia ʻo na ō ke nau nofo mo ʻene faʻeé pea mo hono fanga tokoua ʻe toko tolu. Ko e fakaiku ʻo ʻeku Kulenimaá he teʻeki ke ne malí ko e Arthur, pea naʻe pōlepoleʻaki ʻe he fāmilí ʻo pehē ko e taha ʻo honau kāingá, ko Chester Alan Arthur, ko e palesiteni ia hono 21 ʻo ʻIunaite Seteté.

ʻI he hili ʻa hono ʻoange kia Kulenipā ha tautea lōloa ʻo e faihia fakafepaki tokua ki he ʻIunaite Seteté, naʻe ongoʻi moʻoni ʻe he kau Arthur kuó ne fakamaaʻi honau hingoa fakafāmilí. Ko ha taimi fakalotomamahi ia ki heʻeku tamaí. Mahalo ko e fakafeangai peheé ko ha ʻuhinga ia ki heʻene ʻuluaki toumoua ke kau ki he ngāue fakafaifekau ki he kakaí.

ʻI he taimi naʻe tukuange mai ai ʻa Kulenipā mei he pilīsoné, naʻá ne ʻave hono fāmilí ki ha fale holisi sima fakapetepete ʻi he Hala Quincy ʻi Scranton. ʻI heʻeku kei siʻí, naʻá ku ʻiloʻi lelei ia​—mo e ngaahi tisi maka fakaʻofoʻofa ʻa Kulenimaá. Naʻa mau ui kinautolu ko ʻene ngaahi tisi toputapu koeʻuhí he naʻe ʻikai ha taha ka ko Kulenimā pē naʻe ngofua ke ne fufulu iá. ʻI he hili ʻa e mate ʻa Kulenimā ʻi he 1943, naʻe faʻa tauhi ʻe heʻeku faʻeé mo ngāueʻaki ʻa e ngaahi tisi fakaʻofoʻofa ko iá.

Femoʻuekina ʻi he Ngāue ʻo e Puleʻangá

ʻI he ʻaho ʻe taha ʻi he ʻapi Patterson, naʻá ku sio ai ʻi ha fakatātā ʻo Tokoua Rutherford ʻi heʻene malanga ʻi he fakataha-lahi ʻi he 1919 ʻi Cedar Point, Ohio. ʻI aí naʻá ne fakaʻaiʻai ʻa e tokotaha kotoa pē ke kau faivelenga ʻi hono fanongonongo atu ʻa e Puleʻanga ʻo e ʻOtuá pea ke ngāueʻaki ʻa e makasini foʻou naʻe tukuange mai ʻi he fakataha-lahi ko iá, ʻa ia ko e The Golden Age. Naʻe fakanofo ʻe Kulenipā ʻa hono tokotaha ʻētitá, pea naʻá ne tokoni ʻaki ki ai ha ngaahi kupu ʻo aʻu mai ki he 1940 tupú, taimi nounou pē ki muʻa ke ne maté. ʻI he 1937 naʻe fetongi ai ʻa e hingoa ʻo e makasiní ki he Consolation pea ʻi he 1946 ki he Awake!

Naʻe fai ʻe Kulenipā ʻene tohí fakatouʻosi ʻi ʻapi ʻi Scranton pea ʻi he ʻuluʻi ʻōfisi ʻo e Taua Leʻó ʻi he kilomita ʻe 240 nai hono mamaʻo ʻi Brooklyn, ʻo fakamoleki ʻa e uike ʻe ua ʻi ha taimi ʻi he feituʻu taki taha. ʻOku pehē ʻe Teti ʻokú ne manatuʻi ʻa e leʻo ʻo e taipe ʻa Kulenipaá ʻi he nimá he ngaahi pongipongi lahi. Ko ia, naʻe fai fakamātoato ʻe Kulenipā ʻa e fatongia ke kau ki he ngāue fakamalanga ki he kakaí. Ko hono moʻoní, naʻá ne faʻu ha uasikote fakatangata ʻoku ʻi ai ʻa e ngaahi kato-loto lahi ke faʻo ai ʻa e ngaahi tohi faka-Tohitapú. Ko e uaifi taʻu 94 ʻo e tuongaʻane siʻisiʻi ʻo ʻeku faʻeé, ko Naomi Howell, ʻokú ne kei maʻu ha taha. Naʻá ne toe faʻu ha kato tohi maʻá e kakai fefiné.

 Ko ia, ʻi he hoko atu ʻaki ha fetalanoaʻaki faka-Tohitapu longomoʻui, naʻe pehē ʻe he hoa ngāue ʻo Kulenipaá: “C. J., naʻá ke fai ha fehālaaki ʻe taha.”

“Ko e hā ʻa e fehālaakí?” Ko e ʻeke atu ia ʻa Kulenipaá. Naʻá ne vakaiʻi hono uasikoté. Naʻe halaʻatā ʻa hono ongo kató.

“Naʻe ngalo ʻiate koe ke ke tuʻuaki ange kiate ia ha tukuhau ki he The Golden Age.” Naʻá na fekataʻi ʻi he ngalo he tokotaha ʻētitá ke tufa ʻene makasiní.

Ngaahi Manatu ki he Tupu Haké

ʻOku ou manatuʻi ʻeku tangutu ʻi he funga ʻo Kulenipaá ʻi heʻeku kei siʻí, naʻá ne puke hoku kiʻi nimá ʻi heʻene talanoa mai kiate au ʻa e “Finger Story.” ʻI he kamata ʻaki ʻa e “Tommy Thumb” pea hoko atu ki he “Peter Pointer,” naʻá ne talanoa mai ha meʻa makehe fekauʻaki mo e foʻi tuhu taki taha. Naʻá ne fakatahaʻi fakalelei kotoa leva ʻa e ngaahi foʻi tuhú peá ne ʻomai ʻa e talanoá: “ʻOku ngāue lelei taha ʻa e ngaahi foʻi tuhú ʻi heʻenau fāʻūtahá.”

ʻI he hili ʻo ʻena malí, naʻe hiki ʻa ʻeku ongo mātuʻá ki Cleveland, Ohio, peá na hoko ʻo kaungāmeʻa ofi mo Ed mo Mary Hooper. Ko hona fāmilí ko e Kau Ako Tohitapu talu mei he kamataʻanga ʻo e senitulí. Ko ʻeku ongo mātuʻá mo ʻAngikolo Ed mo ʻAnitī Mary, hangē ko ia naʻá ku uiʻaki kinautolú, naʻa nau kaungāmeʻa vāofi ʻaupito. Ko e ongo Hooper naʻe mole ʻa ʻena kiʻi tama pē ʻe taha, ko ha pēpē fefine, ko ia ʻi heʻeku hoko mai ʻi he 1934, naʻá ku hoko ai ko hona “ʻofefine” makehe. ʻI hono ʻohake ʻi ha ʻātakai fakalaumālie lahi pehē, naʻá ku fai ʻeku fakatapui ki he ʻOtuá pea naʻá ku papitaiso ki muʻa ke hoko hoku taʻu valú.

Ko e lau Tohitapú ko e konga ia ʻo e kamataʻanga ʻo hoku ngaahi taʻú. Ko e fakamatala fekauʻaki mo e moʻui ʻi he māmani foʻou ʻa e ʻOtuá ʻi he Aisea 11:​6-9 ko e taha ia ʻo ʻeku ngaahi konga Tohitapu manakoá. Ko ʻeku ʻuluaki feinga ke lau ʻa e Tohitapú kotoa ko e 1944, hili ʻa hono maʻu ʻo ʻeku tatau fakafoʻituitui ʻo e American Standard Version, naʻe tukuange mai ʻi ha pulusinga makehe ʻi he fakataha-lahi ʻi Buffalo, Niu ʻIoke. He loto-fiefia ē ka ko au ʻi heʻeku lau ʻa e liliu ko ʻení ʻa ia ko e huafa ʻo e ʻOtuá, ʻa Sihova, kuo toe fakafoki ki hono tuʻunga totonú ʻo meimei tuʻo 7,000 ʻi he “Fuakava Motuʻa”!

ʻI he fakaʻosinga ʻo e ngaahi uiké ko e ngaahi taimi fakafiefia ia. Naʻe ʻave au ʻe heʻeku ongo mātuʻá fakataha mo e fāmili Hooper ʻi he fakamoʻoni ʻi he ngaahi feituʻu ʻutá. Naʻa mau ʻave ha kai hoʻatā pea mau kaimeʻakai ʻi ha veʻe vaitafe. Pea naʻa mau ʻalu ai ki he faama ʻa ha tokotaha ki ha talanoa faka-Tohitapu ʻi tuʻa ʻa ia naʻa mau fakaafeʻi ai ʻa e tokotaha kotoa pē ʻo e ngaahi kaungāʻapí. Naʻe faingofua ʻa e moʻuí. Naʻa mau maʻu ʻemau fiefiá ʻi he tuʻunga ko e ngaahi fāmilí. Ko ha tokolahi ʻo e ngaahi kaungāmeʻa fakafāmili ki muʻa ko ʻení naʻa nau hoko ki mui mai ko e kau ʻovasia fefonongaʻaki, kau ai ʻa Ed Hooper, Bob Rainer, pea mo hono ongo fohá. ʻOku kei fakahoko pē ʻe Richard Rainer ʻa e ngāue ko ʻení, fakataha mo hono uaifí, ko Linda.

Naʻe tautefito ʻa e ngaahi taimi fiefiá ki he taimi māfaná. Naʻá ku nofo ʻi he faama ʻa Howell fakataha mo e ongo tamaiki fefine ʻoku ou tokouaʻaki. ʻI he 1949 naʻe mali ai ʻa Grace ʻa ia ʻoku ou tokouaʻakí mo Malcolm Allen. Naʻe ʻikai te u ʻiloʻi te u mali mo hono tokouá ʻi he ngaahi taʻu ki mui mai aí. Ko e taʻahine siʻisiʻi ʻoku ou tokouaʻakí ʻa Marion naʻe ngāue fakamisinale ia ʻi ʻUlukuei. Naʻá ne mali mo Howard Hilborn ʻi he 1966. Fakatouʻosi ʻa e ongo tamaiki fefine ʻoku ou tokouaʻakí naʻá na ngāue fakataha mo hona ongo husepānití ʻi he ʻuluʻi ʻōfisí ʻi Brooklyn ʻi ha ngaahi taʻu lahi.

Ko Kulenipā mo ʻEku Maʻu Tohi Fakamoʻoni Akó

He lolotonga hoku ngaahi taʻu he ako māʻolungá, ko Kulenipaá ko ha tokotaha fetohiʻaki loto-lelei. Ko ʻene ngaahi tohí naʻe kau ai ʻa e ngaahi tā fakafāmili motuʻa lahi fakataha mo e ngaahi fakamatala fakaikiiki naʻe taipeʻi ʻi he tuʻa taá, ʻo fakahaaʻi mai ai ʻa e hisitōlia fakafāmilí. Ko e founga ia naʻá ku maʻu ai ʻeku tatau ʻo e laʻi tā ʻo ia pea mo e niʻihi kehe naʻe ʻave taʻetotonu ki he pilīsoné.

ʻI he konga ki mui ʻo e 1951, naʻe mole ai ʻa e leʻo ʻo Kulenipaá koeʻuhi ko e kanisā hono mongá. Ko ʻene ʻilo-meʻa vavé naʻe kei kakato, ka ko ʻene leá naʻe pau ke hiki ʻi ha pepa nouti siʻisiʻi ʻa ia naʻá ne toʻotoʻo holo pē. Naʻá ku maʻu tohi fakamoʻoni ako ki he vaeua ʻo e teemi fakaakó ʻi he kalasi ako-māʻolungá, ʻi Sanuali 1952. ʻI he kamataʻanga ʻo Tīsemá, naʻá ku meiliʻi atu ai kia Kulenipā ʻa e fokotuʻutuʻu ʻo ʻeku lea ʻe fai he tānaki-tuʻungá. Naʻá ne fai ha ngaahi fakamatala lahi ange pea ʻi he peesi fakamuimuí leva naʻá ne tohi ai ʻa e foʻi lea ʻe ua naʻe maongo ia ki hoku lotó: “Fiefia, Kulenipā.” Naʻá ne fakaʻosi hono ʻalunga ʻi he māmaní ʻi hono taʻu 81, ʻi Tīsema 18, 1951. a ʻOku ou kei tauhi ʻa e tatau tamatemate ʻo ʻeku lea ʻi he tānaki-tuʻungá fakataha mo e ongo foʻi lea ko ia ʻi he peesi fakamuimuí.

ʻI he hili atu pē ʻeku maʻu tohi fakamoʻoni akó, naʻá ku hū ki he ngāue tāimuʻá, hangē ko ia ʻoku ui ʻe he Kau Fakamoʻoni ʻa Sihová ko e ngāue fakamalanga  taimi-kakató. ʻI he 1958, naʻá ku maʻu ai ʻa e fakataha-lahi kāfakafa ʻi New York City, ʻa ia ko ha tumutumu ko e toko 253,922 ʻo e faʻahinga mei he ngaahi fonua ʻe 123 naʻa nau fakafonu ʻa e Yankee Stadium pea mo e Polo Grounds. ʻI ai ʻi he ʻaho ʻe taha, naʻá ku fetaulaki ai mo ha tokotaha ʻaʻahi mei ʻAfilika ʻa ia naʻá ne tui ha kaati fakaʻilonga ʻoku pehē ai “Woodworth Mills.” ʻI he taʻu ʻe 30 ki muʻa aí, naʻe fakahingoa ai ia kia Kulenipā!

Fiefia ʻi Hoku Tofiʻá

ʻI he taimi naʻá ku taʻu 14 aí, naʻe toe kamata tāimuʻa ʻeku faʻeé. Naʻá ne mate ʻi he taʻu ʻe 40 ki mui ai, ʻi he 1988, naʻá ne kei tāimuʻa pē! Naʻe kau ʻa Teti ki he ngāue tāimuʻá ʻi he taimi naʻá ne malava aí. Naʻá ne mate ʻi he māhina ʻe hiva ki muʻa ʻia Mami. Ko e faʻahinga naʻa mau ako mo kinautolú naʻa nau hoko ko e ngaahi kaumeʻa ʻofeina ʻi he moʻuí. Ko e niʻihi ʻo honau ngaahi fohá naʻa nau ʻalu ke ngāue ʻi he ʻuluʻi ʻōfisi ʻi Brooklyn, pea ko e niʻihi kehé naʻa nau hū ki he ngāue tāimuʻá.

Kiate au ko e 1959 ko ha taʻu mātuʻaki makehe ia. Ko e taimi ia naʻe fakafeʻiloaki ai au kia Paul Allen. Naʻe fakanofo ia ko ha ʻovasia fefonongaʻaki ʻi he 1946 ʻi he taimi naʻá ne maʻu tohi fakamoʻoni ako ai mei he kalasi hono fitu ʻo Kiliatí, ko ha akoʻanga ki hono akoʻi ʻo e kau misinale ʻa e Kau Fakamoʻoni ʻa Sihová. ʻI he taimi ʻo ʻemau feʻiloakí, naʻe ʻikai ha taha ʻiate kimautolu te ne ʻilo ko e vāhenga-ngāue hono hoko ʻa Paul ko Cleveland, Ohio, ʻa e feituʻu naʻá ku ngāue tāimuʻa aí. Naʻe ʻofa ʻa Teti ʻiate ia, pea pehē pē mo Mami. Naʻá ma mali ʻi Siulai 1963 ʻi he faama ʻa e Howell, ʻa ia ʻoku takatakaiʻi ʻe homau ngaahi fāmilí pea ko Ed Hooper naʻá ne fai ʻa e malanga malí. Ko ha misi ia naʻe hoko moʻoni.

Naʻe teʻeki ai ke maʻu ʻe Paul ha kā. ʻI he taimi naʻá ma mavahe ai mei Cleveland ki heʻene vāhenga-ngāue hono hokó, ko e kotoa ʻo ʻema ngaahi koloá naʻe feʻunga ia ʻi heʻeku kiʻi kā Volkswagen siʻisiʻi ʻo e 1961. Naʻe faʻa afe mai ʻa e ngaahi kaumeʻá ʻi he ngaahi ʻaho Mōnité, ʻa e ʻaho naʻá ma mavahe ai ki ha fakatahaʻanga ʻe taha, ke sio ki heʻema fetukutukú. Naʻe hangē ha faiva sēkasí ke sio ki he ngaahi kato-valá, ngaahi kato-tohí, puha failé, taipé, pea mo e hā fua, ʻoku puli kotoa hifo ʻi he kiʻi kā siʻisiʻi ko iá.

Ko Paul fakataha mo au naʻá ma fononga ʻi ha ngaahi kilomita taʻefaʻalaua, ʻo fiefia ʻi he fetongitongi ʻo e moʻui lolotongá​—ko e meʻa kotoa pē kuo fai ʻi he mālohi ʻa ia ko Sihova pē ʻokú ne malava ke tokonakí. ʻI he faai mai ʻa e ngaahi taʻú naʻe hoko ʻo fakafiefia, ʻo fonu ʻi he ʻofa kia Sihova, ki he faʻahinga taki taha, pea ki he ngaahi kaumeʻa motuʻá mo e foʻoú. Ko e māhina ʻe ua naʻá ma fakamoleki ʻi Patterson ʻi hono maʻu ʻe Paul ha ako aí ko ha meʻa tuʻu-ki-muʻa ia ʻo ʻema moʻuí kotoa. ʻI he vakai atu ki he fakautuutu ʻa e kautaha fakaemāmani ʻa Sihová ʻoku toe fakapapauʻi mai ai ha tuipau kiate au ʻi he tuʻunga ko hoku tofiʻa fakalaumālie maʻongoʻongá: ʻOku moʻoni ko e kautaha ʻeni ʻa e ʻOtuá. Ko ha fiefia ē ke hoko ko ha kiʻi kupu ʻo ia!

[Fakamatala ʻi lalo]

[Fakatātā ʻi he peesi 25]

Fakataha mo Ed Hooper ki muʻa siʻi pē ʻi he fakataha-lahi ʻi St. Louis he 1941, ʻa ia naʻá ku maʻu ai ʻeku tatau fakafoʻituitui ʻo e tohi ko e “Children”

[Fakatātā ʻi he peesi 26]

Ko Kulenipā ʻi he 1948

[Fakatātā ʻi he peesi 26]

ʻI he faama ʻa e Howell ʻi he taimi naʻe mali ai ʻeku ongo mātuʻá (ʻi he foʻi fuopotopotó)

[Fakatātā ʻi he peesi 27]

Ko e Kau Ako Tohitapu ʻe toko valú ʻa ia naʻe tuku pōpula taʻetotonu ʻi he 1918 (Ko Kulenipā ʻoku tuʻu taupotu ki toʻomataʻú)

[Fakatātā ʻi he peesi 29]

Ko e kotoa ʻo ʻema ngaahi koloa fakamāmaní naʻe feʻunga ʻi heʻema kiʻi kā Volkswagen

[Fakatātā ʻi he peesi 29]

Fakataha mo hoku husepānití, ko Paul