Ko e Folofola Fakaekikite ʻa e ʻOtuá ʻOkú Ne ʻOmai ʻa e ʻAmanaki ki he Kahaʻú

FAKAMĀLŌ ki he Folofola ʻa e ʻOtuá, ʻa e Tohitapu Māʻoniʻoní, ʻoku vakai atu ai ʻa e kau Kalisitiane moʻoní ki he kahaʻú mo e tui, ʻamanaki, pea mo e fakatuʻamelie. ʻI he malu ʻi honau vahaʻangatae mo Sihova ko e ʻOtuá, ʻoku nau fakatuʻotuʻa atu ai ki he ʻapongipongí. Hangē ko ia naʻe fakamatalaʻi ʻe he malanga kamata ʻi he Fakataha-Lahi Fakavahe “Folofola Fakaekikite ʻa e ʻOtuá,” kuo hoko ʻa e Kau Fakamoʻoni ʻa Sihová ko e kau ako loto-vēkeveke ʻo e kikite ʻa e Tohitapú ʻi he ngaahi taʻu lahi. Ko ia, ko e hā naʻe tukutauhi ʻe Sihova ki heʻene kakaí ʻi he ngaahi fakataha-lahi ko ení? ʻI heʻenau maʻu ʻenau Tohitapú, naʻe vēkeveke ʻa e faʻahinga kotoa naʻa nau maʻu iá ke ʻiloʻi ia. Ko e kaveinga ki he ʻaho taki taha ʻo e fakataha-lahí ʻoku fokotuʻu ia ko ha kaveinga tokoni mavahe.

ʻAHO ʻULUAKÍ: ʻAʻeva ʻi he Maama ʻo e Folofola ʻa e ʻOtuá

Ko e malanga “Kuo Tataki Kitautolu ʻe he Folofola ʻa e ʻOtuá” naʻe fakamatalaʻi ai ko e kakai ʻa Sihová ʻoku hangē ia ha tangata ʻokú ne kamata ha fononga ʻi he fakapoʻulituʻu ʻo e poó. ʻI he hopo hake ʻa e laʻaá, ʻokú ne sio ki he ngaahi ʻata, ka ʻi he taimi ʻoku ulo hangatonu hifo ai ʻa e laʻaá mei ʻolungá, ʻokú ne sio ai ki he fakaikiiki leleí. Hangē ko ia naʻe tomuʻa tala ʻi he Palovepi 4:​18 (Lea Fakatātā, PM), kuo haʻu ʻa e kakai ʻa Sihová ʻo sio lelei ki honau halá ʻi he malumalu ʻo e maama ngingila ʻo e laʻā ʻo e moʻoni mei he folofola fakaekikite ʻa e ʻOtuá. ʻOku ʻikai tuku kinautolu ke nau humu ʻi he fakapoʻulituʻu fakalaumālié.

Ko e malanga ʻi he tefitoʻi fakakaukaú, “Tokanga ki he Folofola Fakaekikite ʻa e ʻOtuá,” naʻe fakamanatu ai ki he kau fanongó ko e faʻahinga ko ia ʻoku nau hanga kia Sihová ʻoku nau hao mei he fakalotomamahi mo e fakakaukau hala ʻoku hokosia ʻe he kakai ko ia ʻoku nau muimui ʻi he kau mīsaia loí mo e kau palōfita loí. ʻI he mātuʻaki kehé, ko e ngaahi fakamoʻoni ʻo kau ki he Mīsaia moʻoní, ʻa Sīsū Kalaisí, ʻoku lahi ʻaupito! Ko e fakatātaá, ko e fakasinokehe fakaemana ʻa Sīsuú naʻá ne tokonaki mai ha tomuʻa maʻalifekina ʻoʻona ʻi hono tuʻunga ko e Tuʻi fakanofo ʻo e Puleʻanga ʻo e ʻOtuá. Talu ʻene hoko mai ki he mafai ʻo e Puleʻangá ʻi he 1914, mo e toe hoko ai ʻa Sīsū ko e “fetuʻuʻaho” naʻe lave ki ai ʻi he 2 Pita 1:​19. “ʻI hono tuʻunga ko e Fetuʻuʻaho Fakaemīsaiá, ʻokú ne fakahaaʻi ai ha ʻaho, pe kuonga foʻou, ʻa ia ʻoku kamata ke mahino ki he faʻahinga talangofua kotoa ʻo e tangatá,” ko e lau ia ʻa e tokotaha malangá.

ʻI hono fakahoko mai ʻo e polokalama ʻi he efiafí, ko e malanga “Ulo Atu ko e Ngaahi Maamaʻanga”  naʻe lāulea ai ki he Efeso 5:​8, ʻa ia naʻe akonaki mai ai ʻa e ʻapositolo ko Paulá kiate kitautolu ke tau “laka ʻo tāu mo e fanau ʻa maama.” Ko e kau Kalisitiané ko e ngaahi maamaʻanga, ʻo ʻikai koeʻuhi pē ko hono vahevahe atu ʻa e Folofola ʻa e ʻOtuá ki he niʻihi kehé kae toe pehē foki ki hono ngāueʻaki ʻa e Tohitapú ʻi heʻenau moʻuí ʻi he faʻifaʻitaki kia Sīsuú.

Ke hoko ko ha maamaʻanga hangē ko ení, kuo pau ke tau “Fiefia ʻi Hono Lau ʻa e Folofola ʻa e ʻOtuá.” Ko e tuʻunga-lea ko ení naʻe fakahoko ia ʻi ha malanga fakakongokonga konga ʻe tolu. Hili e lave kia Abraham Lincoln, ʻa ia naʻá ne ui ʻa e Tohitapú ko e “meʻaʻofa lelei taha ia kuo foaki ʻe he ʻOtuá ki he tangatá,” naʻe ʻeke ʻe he ʻuluaki tokotaha malangá ki he kau fanongó pe ko e hā ʻoku fakahaaʻi ʻe heʻenau ngaahi tōʻonga lautohí ʻo fekauʻaki mo hono loloto ʻo ʻenau houngaʻia ki he Folofola ʻa Sihová. Naʻe fakalototoʻaʻi ʻa e kau fanongó ke nau lau tokanga ʻa e Tohitapú, ʻo tuku ha taimi ke sioloto ai ki he ngaahi fakamatala Fakatohitapú pea ke fakatahaʻi ʻa e ngaahi poini foʻoú mo e ngaahi meʻa ko ia kuo nau ʻosi ʻiló.

Ko e konga hoko ʻo e malanga fakakongokongá naʻe fakamamafaʻi ai ʻa e fiemaʻu ke akó, ʻo ʻikai ko e lautohi noa pē, kapau ʻoku fiemaʻu ke tau maʻu ʻa e “meʻakai malohi.” (Hepelu 5:​13, 14) ʻOku tautefito ʻa e fakatupu langa hake ʻa e akó, ko e lau ia ʻa e tokotaha malangá, kapau ʻoku tau ‘teuʻi hotau lotó’ ki muʻa, ʻo hangē ko ia naʻe fai ʻe he taulaʻeiki ʻIsileli ko ʻĒselá. (Esela 7:​10, NW) Ka ko e hā ʻoku mātuʻaki mahuʻinga ai ʻa e akó? Koeʻuhi ʻoku ʻi ai ʻa ʻene kaunga hangatonu ki hotau vahaʻangatae mo Sihová. Ko ia ai, ʻoku totonu ke mahuʻinga, fakafiefia mo fakaivifoʻou ʻa e ako Tohitapú, neongo ʻoku kau ki ai ʻa e akonakiʻi fakaeʻatamai mo e feinga. ʻOku anga-fēfē ʻetau maʻu ʻa e taimi ki ha ako mohu ʻuhingá? ʻAki ʻa e “lamalama ke ngaueʻaki ʻa e faingamalie” mei he ngaahi ngaahi meʻa ʻoku siʻi hono mahuʻingá, ko e lau ia ʻa e tokotaha malanga fakaʻosi ʻo e malanga fakakongokongá. (Efeso 5:​16) ʻIo, ko e kī ki hono maʻu ʻa e taimí ko hono ngāueʻaki ki he lelei tahá ʻa e taimi ʻoku tau maʻú.

Ko e malanga ko e “Fakaivimālohiʻi ʻe he ʻOtuá ʻa e Faʻahinga ʻOku Ongosiá” naʻe fakahaaʻi ai ʻoku ongosia ʻa e kakai tokolahi ʻi he ngaahi ʻahó ni. Koeʻuhi ke lava ke tau maʻu ʻa e “makehe atu ʻo e mafai” ki he ngāue fakafaifekau faka-Kalisitiané, ʻoku fiemaʻu ke tau falala kia Sihova, ʻa ia ʻokú ne “foaki ivi ki he tokotaha ongosiá.” (2 Kolinito 4:7; Aisea 40:​29, NW [Isaia, PM]) Ko e ngaahi tokoni fakaivimālohí ʻoku kau ai ʻa e Folofola ʻa e ʻOtuá, lotú, ko e fakatahaʻanga Kalisitiané, kau tuʻumaʻu ʻi he ngāue fakafaifekaú, koe kau ʻovasia Kalisitiané, pea mo e faʻifaʻitakiʻanga anga-tonu ʻa e niʻihi kehé. Ko e kaveinga ko e “Hoko ko e Kau Faiako ʻi he Vakai Atu ki he Taimí” naʻe fakamamafaʻi ai ʻa e fiemaʻu ki he kau Kalisitiané ke nau hoko ko e kau faiako pea mo e kau malanga foki pea ke ngāue mālohi ʻi hono fakatupulekina ʻa e “pōtoʻi ʻi he faiakó.”​—2 Timote 4:​2, NW.

Ko e malanga fakaʻosi ʻo e ʻahó, “Ko e Kautau Fakafepaki ki he ʻOtuá ʻE ʻIkai Te Nau Ikuna,” naʻe lave ai ki he ngaahi feinga tākihalaʻi ki muí ni ʻi he ngaahi fonua ʻe niʻihi ke fakaʻilongaʻi ʻa e Kau Fakamoʻoni ʻa Sihová ko ha kulupu lotu fakaeouau fakatuʻutāmaki. Ka ʻoku ʻikai fiemaʻu ke tau manavahē, he ʻoku pehē ʻe he Aisea 54:17: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa; pea ʻilonga ha ʻelelo ʻoku hopo mo koe ʻi he fakamaau, te ke fakahalaia. Ko e ʻinasi eni ʻo e kau tamaioʻeiki ʻa Sihova, pea ko ʻenau fakatonuhia meiate au​—ko Sihova ia mei he Taʻehamai.”

ʻAHO UÁ: Fakaʻilo ʻa e Ngaahi Meʻá Fakafou ʻi he Ngaahi Konga Tohitapu Fakaekikité

Hili ʻa e lāulea ki he konga Tohitapu ʻo e ʻahó, naʻe fiefia ʻa e faʻahinga naʻe fakatahatahá ʻi he malanga  fakakongokonga hono ua ʻo e fakataha-lahí, naʻe fakakaveinga “Fakalāngilangiʻi ʻa Sihova ʻi he Tuʻunga ko e Kau Toʻo Maama.” Naʻe fakahaaʻi ʻi he ʻuluaki malangá ko e taumuʻa ia ʻa ha Kalisitiane ke fakalāngilangiʻi ʻa Sihova ʻaki ʻene malanga ʻi he feituʻu kotoa pē. Naʻe lave ʻi he konga hokó ki he fiemaʻu ke tataki ʻa e faʻahinga ongongofuá ki he kautaha ʻa e ʻOtuá. Anga-fēfē? ʻAki ʻetau vaheʻi ʻa e miniti ʻe nima pe hongofulu ki muʻa pea ʻi he hili ʻa e ako Tohitapu taki taha ʻi ʻapi ke fakahaaʻi ai ʻa e founga ʻo hono fakalele ʻo e kautaha ʻa e ʻOtuá. Ko e malanga hono tolu ʻo e malanga fakakongokonga ko ení naʻe fakamamafaʻi ai ʻa e fiemaʻu ke fakalāngilangiʻi ʻa e ʻOtuá ʻaki ʻa e ngaahi ngāue leleí.

Ko e malanga “Mātuʻaki ʻOfa ʻi he Ngaahi Fakamanatu ʻa Sihová” naʻe lāulea ai ki he ngaahi veesi kuo filifili ʻi he Sāme 119. Ko e moʻoni, ʻoku tau fiemaʻu ʻa e ngaahi fakamanatú, he ʻoku tau hehema kotoa ke loto-ngalongalo. He mahuʻinga ē ko ia, ke tau fakatupulekina ha ʻofa ki he ngaahi fakamanatu ʻa Sihová, ʻo hangē ko ia naʻe fai ʻe he tokotaha-tohi-sāmé!

Naʻe hoko mai leva ha malanga mahuʻinga makehe​—ko e malanga papitaisó ʻa ia naʻe fakakaveinga “Ko e Tokanga ki he Folofola Fakaekikité ʻOku Taki Atu Ai ki he Papitaisó.” Naʻe fakamanatu ki he kau teu papitaisó ʻoku nau faʻifaʻitaki kia Kalaisi ʻikai ʻi he papitaisó pē kae pehē foki ʻi he muimui ofi ki hono topuvaʻé. (1 Pita 2:​21) Ko ha monū ē ʻa e pau ke kau ʻa e faʻahinga foʻoú ni ʻi hono fakahoko ʻo e Sione 10:​16, ʻa ia naʻe tomuʻa tala ai ʻe Sīsū te ne tānaki ʻa e “fanga sipi kehe” ke nau ngāue fakataha mo ʻene kau ākonga pani ʻe he laumālié!

ʻI he kamata ʻo e polokalama efiafí, ko e malanga “Fakafanongo ki he Meʻa ʻE Folofolaʻaki ʻe he Laumālié” naʻe fakamatalaʻi ai ko e laumālie ʻo Sihová ʻoku folofola mai ia kiate kitautolu fakafou ʻi he Tohitapú, “tamaioeiki agatonu mo boto,” pea mo hotau konisēnisi kuo akoʻi ʻe he Tohitapú. (Mātiu 24:​45, PM) Ko ia ai, ʻoku ʻikai fiemaʻu ke fanongo ʻa e kau Kalisitiané ki ha leʻo hangatonu mei hēvani koeʻuhi ke nau ʻiloʻi ai ʻa e founga ke fakahōifuaʻi ʻa e ʻOtuá. Ko e lāulea hokó, “Tuʻumaʻu Maʻá e Akonaki Ko Ia ʻOku Fehoanaki mo e Anga-Līʻoa Fakaʻotuá,” naʻe enginaki ai ki he kau Kalisitiané ke ʻoua te nau hanga ki he ngaahi fakakaukau fakalotosiʻi ʻoku ʻomai ʻe he māmani ko ení. Ko e moʻoni, ko ha fieʻilo taʻemapuleʻi ʻe lava ke ne fakaeʻa ai kitautolu ki he fakamatala fakatupu maumau ʻoku fokotuʻu mai ʻe he kau tafoki mei he moʻoní mo e kau fakafofonga kehe ʻo Sētané. He lelei ange ē ko ia ke lau tuʻumaʻu ʻa e Tohitapú pea pehē ki he ngaahi kupu kotoa ʻi he Taua Leʻo mo e Awake!

Ko e malanga hokó naʻe fakakaveinga “Hanganaki Puke ʻa e Sīpinga ʻo e Ngaahi Lea Fakatupu Moʻui Leleí,” naʻe fakamamafaʻi ai ʻa e mahuʻinga ʻo e maheni fakaʻāuliliki mo e “sīpinga” Fakatohitapú, pe faʻunga ʻo e moʻoní. (2 Timote 1:​13, NW) Ko hono mahinoʻi ʻo e sīpinga ko ení ʻa e kī ʻo ʻikai ki hono maʻu pē ʻo e anga-līʻoa fakaʻotuá kae pehē foki ki hono ʻiloʻi ʻo e meʻa ko ia ʻoku ʻikai feongoongoi mo e moʻoní.

Fakaʻuta atu ki he vakai mai ʻa Sihova ʻokú te manakoá. Ko ha lāngilangi moʻoni ia! Makatuʻunga ʻi he kikite ʻa Hakeaí, ko e malanga “ʻOku Fakafonu ʻe he ‘Ngaahi Meʻa Manakoá’ ʻa e Fale ʻo Sihová” naʻe mātuʻaki fakalototoʻa koeʻuhi he naʻá ne fakapapauʻi ki he kau fanongó ko e mēmipa taki taha ʻo e “fuʻu kakai lahi” ʻoku nau manakoa moʻoni kia Sihova. (Fakahā 7:9) Ko ia ai, ʻe fakahaofi kinautolu ʻe Sihova fakafou ʻi heʻene “luluʻi” fakaʻosi ʻo e ngaahi puleʻangá lolotonga ʻa e “mamahi lahi” ka hoko maí. (Hakeai 2:​7, 21, 22; Mātiu 24:21) Kae kehe, ʻi he taimi tatau, ko e kakai ʻa Sihová kuo pau ke nau leʻo fakalaumālie, hangē ko ia naʻe fakamatalaʻi ʻi he konga “Ko e Ngaahi Konga Tohitapu Fakaekikité ʻOku Nau Fakatokanga Kiate Kitautolu ke Faʻa Leʻo.” Naʻe lave ʻa e tokotaha malangá ki he ngaahi lea ʻa Sīsuú: “Ko ia ke mou leʻo; he ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki.” (Mātiu 24:42) ʻOku anga-fēfē ʻetau tauhi maʻu ʻa e ʻā fakalaumālié? ʻAki ʻa e hanganaki femoʻuekina ʻi he ngāue ʻa Sihová, lotu hokohoko, pea hanganaki ʻamanaki ki he ʻaho lahi ʻo Sihová.

Ko e malanga fakaʻosi ʻo e ʻahó naʻe fakakaveinga “Ko e Folofola Fakaekikite ʻi he Taimi ʻo e Ngataʻangá.” ʻE manatua ia ʻi he ngaahi taʻu hoko maí. Ko e hā hono ʻuhingá? Koeʻuhi he naʻe fanongonongo ai ʻe he tokotaha malangá ʻa hono tukuange mai ʻo ha tohi foʻou ko e​—Pay Attention to Daniel’s Prophecy! “Ko e tohi fakatātā fakaʻofoʻofa peesi ʻe 320 ko ení ʻoku ʻi ai ʻa e konga kotoa ʻo e tohi ʻa Tanielá,” ko e lau ia ʻa e tokotaha malangá. He fakamoʻoni fakatupu tui mālohi ē ʻo e huluhulu mai ʻe Sihova ʻa e maama ki heʻene Folofola fakaekikité!

ʻAHO TOLÚ: ʻE ʻIkai ʻAupito Tō Kelekele ʻa e Folofola Fakaekikite ʻa e ʻOtuá

Ko e ʻaho fakaʻosi ʻo e fakataha-lahí naʻe kamata ia ʻaki ʻa e malanga fakakongokonga “Ngaahi Folofola Fakaekikite ki he Kuonga Kuo Kotofá.” Ko e konga ʻe  tolú naʻe sivisiviʻi ai ʻa hono talaki tuʻo tolu ʻe he palōfita ko Hapakuké ʻa e ngaahi tautea fakaefakamaau ʻa Sihová. Ko e ʻuluakí naʻe fai ia ki Siuta talangataʻa pea ko hono uá ki Pāpilone anga-fītaʻa. Ko e konga fakaʻosí, ʻoku kei toe ke fakahokó, ʻoku kaunga ia ki he fakaʻauha ʻoku tuʻunuku mai ki he kotoa ʻo e faʻahinga fulikivanu ʻo e tangatá. ʻI he lau ʻo kau ki ʻĀmaketoné, ko e tokoua fakaʻosi ʻo e malanga fakakongokongá naʻá ne fakatupu ha tuʻunga ʻo e manavahē fakaʻotuá ki heʻene kau fanongó ʻi heʻene pehē: “Ko e moʻoni, ʻe fakamanavahē ʻa e taimi ʻe tukuange mai ai ʻe Sihova ʻa e mālohi kakato ʻo hono fuʻu mālohí.”

Ko e “Houngaʻia ʻi Hotau Tofiʻa Fakalaumālié” ʻa e kaveinga ʻo e tulama faka-Tohitapu fakaueʻiloto ʻo e fakataha-lahí. Ko e fakahoko fakatupu sivisiviʻi konisēnisi ko ení naʻe fakafaikehekeheʻi ai ʻa e ngaahi fakakaukau ʻa Sēkope mo ʻĪsoa ki he ngaahi meʻa fakalaumālié. Naʻe siolalo ʻa ʻĪsoa ki hono tofiʻa fakalaumālié, ko ia naʻe foaki ia kia Sēkope, ʻa ia naʻá ne koloaʻaki ia. “Ko e hā [ʻa e tofiʻa fakalaumālie] kuo foaki mai ʻe Sihova kiate kitautolú?” ko e ʻeke ia ki he kau maʻu fakataha-lahí. “Ko e moʻoni ʻo ʻene Folofolá, ʻa e Tohitapú; ko e ʻamanaki ʻo e moʻui taʻengatá; pea mo e lāngilangi ke fakafofongaʻi ia ʻi he tuʻunga ko e kau fanongonongo ʻo e ongoongo leleí,” ko e tali ia ʻa e tokotaha malangá.

Ko e konga hokó naʻe fakakaveinga “Ko e Hā ʻEne ʻUhinga Kiate Koe ʻa Hotau Tofiʻa Mahuʻingá?” ʻOku tau fakahaaʻi ʻa e fakakaukau totonu ki hotau tofiʻa fakalaumālié ʻaki hono fakamuʻomuʻa ʻetau ngāue kia Sihová mo hotau ngaahi monū fakalaumālié ʻi he ngaahi mahuʻingaʻia fakafoʻituitui mo fakamatelié. ʻI he foungá ni ʻoku tau langa takatakai ai ʻetau moʻuí ʻi hotau vahaʻangatae mo Sihová, ʻo mātuʻaki kehe ia meia ʻĀtama, ʻĪsoa, mo e kau ʻIsileli taʻeangatonú.

Ko e malanga maʻá e kakaí, “Ko Hono Fakafoʻou ʻo e Meʻa Kotoa Pē​—ʻO Hangē Ko Ia Naʻe Tomuʻa Talá,” naʻe fakatahaʻi kotoa ai ʻa e ngaahi kikite tefito ʻe fā ʻo fekauʻaki mo e “ngaahi langi foʻou” pea mo e “fonua foʻou.” (Aisea 65:​17-​25; 66:​22-​24; 2 Pita 3:​13; Fakahā 21:​1, 3-5) ʻOku hā mahino, naʻe ʻi he fakakaukau ʻa Sihová ha fakahoko lahi ange ʻo e ngaahi kikite ko ení ʻi he meʻa ko ia naʻe hoko ki hono kakai naʻe toe fakafoki mai ʻi he 537 K.M. ʻIo, naʻe ʻi heʻene fakakaukaú ʻa ʻene founga-pule faka-Puleʻangá (ʻa e “ngaahi langi foʻou”) pea ko e faʻahinga ʻe pule ki ai ʻi he māmaní (ʻa e “fonua foʻou”), ʻa ē te nau nofoʻi ha palataisi lāngilangiʻia ʻi māmani lahi.

Naʻe ʻomai ʻa e fakataha-lahí ki ha fakaʻosinga fakalotofiefia mo fakaueʻiloto ʻe he malanga “Ko ʻEtau Ngaahi ʻAmanakí ʻi Hono Tataki Kitautolu ʻe he Folofola ʻa e ʻOtuá.” Naʻá ne fakamanatu ki he tokotaha kotoa “kuo fakanounou ʻa e kuonga” ki hono fakakakato ʻa e ngāue ʻo hono fanongonongo ʻo e Puleʻangá. (1 Kolinito 7:​29) ʻIo, ʻoku tau tuʻu ʻi he matapā tonu ʻo hono fakahoko ʻa e tuʻutuʻuni ʻa Sihova kia Sētane mo ʻene fokotuʻutuʻu fulikivanú kotoa. ʻOfa ke hoko ʻetau ngaahi fakakaukaú ʻo hangē ko e fakakaukau ko ia ʻa e tokotaha-tohi-sāmé ʻa ia naʻe hiva: “Kuo nofoʻaki tali hotau laumalie kia Sihova: ko hotau tokoni ia mo hotau pa.” (Sāme 33:20) He ʻamanaki fakaofo ē ʻoku tuʻu mei muʻa ki he faʻahinga ko ia ko ʻenau ngaahi ʻamanakí ʻoku makatuʻunga ʻi he folofola fakaekikite ʻa e ʻOtuá!

[Fakatātā ʻi he peesi 7]

Ko ha tulama fakaueʻiloto naʻá ne fakalahiʻi ʻa e houngaʻia ki he tofiʻa fakalaumālie ʻo e kau sevāniti ʻa Sihová

[Fakatātā ʻi he peesi 7]

Ko e tokolahi ko ia naʻa nau tokanga ki he folofola fakaekikite ʻa e ʻOtuá naʻa nau papitaiso