Fakamatalaʻi ʻo e Tohi ʻa Tanielá!

NAʻE loto-vēkeveke ʻa e kau maʻu fakataha-lahí ke maʻu ʻenau tatau ʻo e tohi peesi ʻe 320 tukuange foʻou mai ko e, Pay Attention to Daniel’s Prophecy! Naʻe anga-fēfē ʻenau ongoʻi fekauʻaki mo e tohí? Vakai angé ki he meʻa naʻe leaʻaki ʻe he niʻihi.

“ʻI he tatau mo e tokolahi taha ʻo e kau taʻu hongofulu tupú, ʻoku faingataʻa kiate au ke u fiefia ʻi hono ako ʻo e hisitōlia ʻo e kuonga muʻá. Ko ia, ʻi heʻeku maʻu ʻa ʻeku tatau fakafoʻituitui ʻo e tohi foʻoú, Pay Attention to Daniel’s Prophecy! naʻe ʻikai te u fuʻu loto-māfana fekauʻaki mo hono lau iá, ka naʻá ku kiʻi ʻahiʻahiʻi. Tamani, naʻá ku maʻu ha fakakaukau hala! Ko e taha eni ʻo e ngaahi tohi lelei taha kuó u fetaulaki mo iá. ʻOkú ne puke moʻoni ʻa ʻete tokangá! ʻOku ʻikai te u kei ongoʻi ko ʻeku lau ʻo fekauʻaki mo ha fakamatala ʻa ia naʻe hoko ʻi he ngaahi taʻu ʻe laui afe kuo maliu atú. Ko e ʻuluaki taimí, naʻá ku ongoʻi ai ʻe lava ke u ʻai au ʻi he tuʻunga ʻo Tanielá. ʻOku lava moʻoni ke u sioloto atu ki he tuʻunga ʻe tatau mo hano ʻave kita mei hoto fāmilí, ʻo ʻave ki ha fonua muli, pea ʻahiʻahiʻi ʻa ʻete mateaki-angatonú ʻi he taimi ki he taimi. ʻOku ou fakamālō lahi atu ki he tohí ni.”​—Anya.

“Ko e meʻa ʻokú ne tokoniʻi lahi taha aú ko e pōpoaki maʻalaʻala ko ia ʻoku puleʻi fakaʻaufuli ʻe Sihova ʻa e ngaahi meʻa ʻokú ne uesia ʻa hono kakaí. Fakafou ʻi he ngaahi vīsone mo e ngaahi misi ʻa Taniela pea mo e niʻihi kehe ko ia naʻá ne fakaʻuhingaʻí, ʻoku hā mahino ʻe ʻikai ʻaupito fakaʻatā ʻe hotau ʻOtuá ʻa e ngaahi meʻa ʻoku hokó ke lahi ange pe siʻi ange ʻi he meʻa kuó ne fakataumuʻá. ʻOku fakaivimālohiʻi ʻe he meʻá ni ʻa e ʻamanaki ʻoku tau maʻu ʻi he ngaahi fakatātā fakaekikite ʻoku maʻu ʻi he Tohitapú ʻo fekauʻaki mo e māmani foʻou te ne faʻú.”​—Chester.

“ʻOku ou saiʻia ʻi he founga ʻo hoʻomou ʻai ke toe moʻui mai ʻa Tanielá. ʻOku ou ongoʻi maheni lelei ange mo ia ʻi he founga ʻo hoʻomou fakaeʻa ʻa e ngaahi meʻa naʻá ne tokanga mo hohaʻa ki aí. ʻOku lava ke u mahinoʻi lelei ange ai ʻa e ʻuhinga naʻe mātuʻaki manakoa ai ia kia Sihová. Lolotonga ʻa e kotoa ʻo hono ngaahi fakamāuʻí mo e ngaahi fakatangá, naʻe ʻikai te ne tokanga fekauʻaki mo ia tonu. Naʻá ne tokanga lahi taha kia Sihova mo Hono huafa fakaʻofoʻofá. ʻOku ou fakamālō atu ʻi hono ʻai ke ʻilonga ʻa e ngaahi poini ko ení.”​—Joy.

“Ko e meʻa eni kuo tau tatali ki aí! Kuo teʻeki ʻaupito fakahaaʻi ki muʻa ʻa e lahi ʻo e kaunga moʻoni ʻo e tohi ʻa Tanielá kiate kitautolu taki taha. Hili hono lau ʻa e konga lahi ʻo e tohi foʻoú ʻi he efiafi hili ʻa ʻeku maʻu iá, naʻe pau ke u taʻofi ʻo fakamālō kia Sihova ʻi he lotu.”​—Mark.

“Ko e meʻa naʻe ʻikai te ma ʻamanekiná ko ʻene maongo ki heʻema ongo tamaikí. ʻOkú na taʻu nima mo taʻu tolu. . . . Lolotonga ʻoku kau maʻu pē ʻa e ngaahi talanoa kia Taniela, ʻĀnanaia, Misaeli, mo ʻĀsalaiá ʻi he ngaahi talanoa ʻokú na saiʻia taha ai ʻi he Ko ʻEku Tohi ʻo e Ngaahi Talanoa Faka-Tohitapú, ko e meʻa ko ia ʻoku ʻomai ʻi he tohi Daniel’s Prophecy kuó ne ueʻi kinaua ʻi ha founga naʻe ʻikai te ma ʻamanekina. Naʻa mo e ʻi heʻena taʻu siʻí, naʻe hā ngali naʻá na malava ke ʻiloʻi ʻa e kau talavou māʻoniʻoni ko ení. He faʻifaʻitakiʻanga fakaofo ē ki heʻema fānaú! He meʻangāue fakaofo moʻoni ia kuo mou foaki mai kiate kimautolú! ʻOku ou fakamālō atu, fakamālō lahi atu!”​—Bethel.

“Naʻá ku ongoʻi naʻá ku ʻi ai tonu mo e kau talavou Hepeluú ʻi heʻenau foua ʻa e ngaahi ʻahiʻahi ʻo ʻenau tuí tonu; pea naʻe fakalototoʻaʻi au ʻe he meʻa ko iá ke u sivisiviʻi ʻa ʻeku tuí tonu. Ko e puha fakamanatú ʻoku fakakaveinga ‘Ko e Hā Naʻá Ke ʻIló?’ ʻokú ne ʻai ke maongo ki he lotó ʻa e meʻa ʻi loto ʻi he vahé. ʻOku ou toe fakamālō atu ki he toe ngāue pōtoʻi ko ení.”​—Lydia.