“Ko e Kiʻi Siʻi” Kuo Hoko “ko e Toko Afe”
“Ko e Kiʻi Siʻi” Kuo Hoko “ko e Toko Afe”
“Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi.”—AISEA 60:22 (ISAIA, PM).
1, 2. (a) Ko e hā ʻoku ʻufiʻufi ai ʻa e foʻi māmaní he ʻahó ni ʻe he poʻulí? (e) Kuo anga-fēfē ʻa e ulo fakalakalaka ʻa e maama ʻa Sihová ʻi heʻene kakaí?
“ʻOKU ʻufiʻufi ʻa mamani ʻe he poʻuli, mo e poʻuli matolu ʻa e ngaahi faʻahinga: kae hopo [“ulo atu,” NW] ʻa Sihova kiate koe, pea ʻe ha hono kololia ʻi ho funga.” (Aisea 60:2) ʻOku fakamatalaʻi lelei ʻe he ngaahi leá ni ʻa e tuʻunga ʻi he foʻi māmaní talu mei he 1919. Kuo talitekeʻi ʻe Puleʻanga-Haʻa-Kalisitiane ia ʻa e fakaʻilonga ʻo e ʻi ai fakatuʻi ʻa Sīsū Kalaisí, “ko e maama ʻo māmani.” (Sione 8:12; Mātiu 24:3) Koeʻuhi ko e “ʻita lahi” ʻa Sētané, ko e pule ʻo e “houʻeiki fakaleveleva ʻo e fakapoʻuli ni,” naʻe hoko ai ʻa e senituli hono 20 ko e taimi anga-fakamamahi lahi taha, mo fakaʻauha lahi taha ia ʻi he hisitōlia ʻo e tangatá. (Fakahā 12:12; Efeso 6:12) ʻOku moʻui ʻa e tokolahi taha ʻo e kakaí ʻi he fakapoʻuli fakalaumālie.
2 Ka, ʻoku ulo atu ʻa e māmá he ʻahó ni. ʻOku ‘ulo atu’ ʻa Sihova ki heʻene kau sevānití, ko e toenga ʻo e kau paní, ʻa ia ko e kau fakafofonga fakaemāmani ʻo ʻene “fefine” fakahēvaní. (Aisea 60:1) Tautefito talu mei honau tukuange mei he nofo pōpula faka-Pāpiloné ʻi he 1919, kuo tapua atu ʻe he faʻahingá ni ʻa e kolōlia ʻo e ʻOtuá pea kuo nau ʻai ‘ʻenau māmá ke ulo atu ke hā ki he kakaí.’ (Mātiu 5:16) Mei he 1919 ʻo faai mai ki he 1931, naʻe toe ulo maama ange ai ʻa e maama ʻo e Puleʻangá ʻi hono hanga ʻe he faʻahingá ni ʻo toʻo atu ʻa e toenga ʻo e ngaahi haʻi ʻa e fakakaukau faka-Pāpiloné. Naʻe tupulaki honau tokolahí ki he laui mano ʻi hono fakahoko ʻe Sihova ʻa ʻene talaʻofá: “Te u matuʻaki tanaki ʻa e toenga ʻo Isileli: te u ʻai fakataha kinautolu hange ko e fanga sipi ʻo Posila: hange ha takanga ʻi honau loto kaikaiʻanga, ʻe uʻulu ha uouotuʻu ʻa e kakai.” (Maika 2:12) ʻI he 1931, ko e kolōlia ʻo Sihová ʻi heʻene kakaí naʻe hoko ʻo toe hā mahino ange ʻi he taimi naʻa nau tali ai ʻa e hingoa ko e Kau Fakamoʻoni ʻa Sihová.—Aisea 43:10, 12.
3. Naʻe anga-fēfē ʻa e hoko ʻo hā mahino ko e maama ʻa Sihová ʻe ulo atu ia ki he niʻihi kehe tuku kehe ʻa e kau paní?
3 Ko e toenga pē ʻo e “fanga sipi toko siʻi” ʻe ulo atu ki ai ʻa Sihová? (Luke 12:32) ʻIkai. Ko e tatau ʻo e The Watch Tower ʻo Sepitema 1, 1931, naʻe tuhu ai ki ha toe kulupu ʻe taha. ʻI hano fakamatalaʻi lelei ʻo e Isikeli 9:1-11, naʻe fakahaaʻi ai ko e tangata mo e ʻaiʻanga vaitohi ʻa e tangata-tohí naʻe lave ki ai ʻi he ngaahi veesi ko iá, ʻokú ne fakafofongaʻi ʻa e toenga ʻo e kau paní. Ko hai ʻoku fakaʻilongaʻi ʻi he foʻi laʻé ʻe he “tangata” ko iá? Ko e “fanga sipi kehe,” ʻa e faʻahinga ko ia ʻoku nau maʻu ʻa e ʻamanaki ko e moʻui taʻengata ʻi he māmani palataisí. (Sione 10:16; Sāme 37:29) ʻI he 1935 naʻe ʻiloʻi ai ʻa e kulupu ko ʻeni ʻo e “fanga sipi kehe” ko e “fuʻu kakai lahi . . . mei he puleʻanga kotoa pē” ʻa ia naʻe sio ki ai ʻa e ʻapositolo ko Sioné ʻi he vīsoné. (Fakahā 7:9-14) Mei he 1935 ʻo aʻu mai ki he taimí ni, kuo fakahanga ai ʻa e tokanga lahi ki hono fakatahatahaʻi ʻo e fuʻu kakai lahí.
4. Ko hai ʻa e ‘ngaahi tuʻi’ mo e ‘ngaahi puleʻanga’ ʻoku lave ki ai ʻi he Aisea 60:3?
4 Ko e ngāue fakatahatahaʻi ko ʻení ʻoku lave ki ai ʻi he kikite ʻa ʻAiseá ʻi heʻene pehē: “ʻE fononga mai ʻani puleʻanga ki hoʻo maama, moni tuʻi ki he malama ʻa hoʻo hopo hake [“ulo atú,” NW].” (Aisea 60:3) Ko hai ʻa e ‘ngaahi tuʻi’ ʻoku lave ki ai hení? Ko e toenga ko ia ʻo e toko 144,000, ʻa ia fakataha mo Sīsū Kalaisí, ko e kau kaungāʻea ʻo e Puleʻanga fakahēvaní, pea kuo nau takimuʻa ʻi he ngāue fakaefakamoʻoní. (Loma 8:17; Fakahā 12:17; 14:1) ʻI he ʻahó ni, ko e laui afe siʻi ko ia ʻo e toenga ʻo e kau paní kuo lakasi lahi ia ʻe he “ngaahi puleʻanga,” ʻa e faʻahinga ko ia ʻoku nau maʻu ha ʻamanaki fakaemāmani ʻa ia ʻoku nau haʻu kia Sihova ke akoʻi kinautolu mo fakaafeʻi ʻa e niʻihi kehé ke nau fai ʻa e meʻa tatau.—Aisea 2:3.
Kau Sevāniti Faivelenga ʻa Sihová
5. (a) Ko e hā ʻa e ngaahi moʻoniʻi meʻa ʻoku nau fakahaaʻi kuo ʻikai hōloa ʻa e faivelenga ʻa e kakai ʻa Sihová? (e) Ko fē ʻa e ngaahi fonua naʻe ʻi ai ʻa e tupulaki tuʻu-ki-muʻa ʻi he 1999? (Sio ki he saati ʻi he peesi 17-20.)
5 He faivelenga lahi ē naʻe fakahāhaaʻi ʻe he Kau Fakamoʻoni ʻa Sihova ʻi onopōní ʻi he kotoa ʻo e senituli hono 20! Pea neongo ʻa e tupulaki ʻa e ngaahi fakafeʻātungiá, naʻe ʻikai hōloa ʻenau faivelengá ʻi he tuʻunuku mai ʻa e taʻu 2000. ʻOku nau kei fai fakamātoato pē ki he fekau ʻa Sīsuú: “Ngaohi ʻa e ngāhi kakai kotoa pe ko ʻeku kau ako.” (Mātiu 28:19, 20) Ko e tokolahi ʻo e kau malanga longomoʻui ʻo e ongoongo leleí ʻi he taʻu fakangāue fakamuimui ʻo e senituli hono 20 naʻe aʻu ki ha tumutumu foʻou ko e toko 5,912,492. Naʻa nau fakamoleki ʻa e ngaahi houa fakakātoa ʻoku taau ke fakatokangaʻi ʻe 1,144,566,849 ʻi he talanoa ki he niʻihi kehé ʻo fekauʻaki mo e ʻOtuá pea mo ʻene ngaahi taumuʻá. Naʻa nau fai ʻa e ngaahi toe ʻaʻahi ʻe 420,047,796 ki he faʻahinga mahuʻingaʻiá pea fakahoko ʻa e ngaahi ako Tohitapu taʻetotongi ʻe 4,433,884 ʻi ʻapi. Ko ha lēkooti fakaofo ē ʻo e ngāue faivelengá!
6. Ko e hā ʻa e fokotuʻutuʻu foʻou naʻe fai maʻá e kau tāimuʻá, pea ko e hā ʻa e tali ki aí?
6 ʻI Sanuali ne toki ʻosí, naʻe fanongonongo ai ʻe he Kulupu Pulé ha fengaʻunuʻaki ʻi he houa ʻoku fiemaʻu ki he kau tāimuʻá. Naʻe ngāueʻaongaʻaki ʻeni ʻe he tokolahi ke hū ai ki he ngāue ko e kau tāimuʻa tuʻumaʻú pe tokoní. Ko e fakatātaá, ʻi he lolotonga ʻa e ʻuluaki māhina ʻe fā ʻo e 1999, naʻe maʻu ai ʻe he ʻōfisi vaʻa ʻi Netalení ʻa e ngaahi tohi kole tāimuʻa tuʻumaʻu ʻo liunga fā hono lahí ʻoʻona mei he lahi ʻi he vahaʻa taimi tatau ʻo e taʻu ki muʻá. ʻOku līpooti mei Kana: “Koeʻuhi naʻe ola lelei ʻa e taumuʻa ki he houa foʻou ki he tāimuʻá, kuo ʻalu hake maʻu ai pē ki ʻolunga ʻa e ngaahi tuʻunga ʻo ʻetau kau tāimuʻa tuʻumaʻú.” ʻI he taʻu fakangāue ʻo e 1999, naʻe aʻu ai ʻa e tokolahi ʻo e kau tāimuʻá ʻi māmani lahi ki he toko 738,343—ko ha fakahāhā fakaofo ia ʻo e ‘faivelenga ʻi he ngaahi ngaue leleí.’—Taitusi 2:14.
7. Kuo anga-fēfē hono tāpuakiʻi ʻe Sihova ʻa e ngāue faivelenga ʻa ʻene kau sevānití?
7 Kuo tāpuakiʻi ʻe Sihova ʻa e ngāue faivelenga ko ʻení? ʻIo. ʻOkú ne pehē ʻo fakafou mai ʻia ʻAisea: “Tangaki ho mata, ʻo sio takai: ʻoku nau tanaki fakataha, ʻoku nau haʻu kiate koe: ʻoku haʻu ho ngaahi foha mei he mamaʻo, pea ko ho ngaahi ʻofefine ʻe fafa fakavakavaka.” (Aisea 60:4) Ko e “ngaahi foha” mo e “ngaahi ʻofefine” pani kuo fakatahatahaʻi maí ʻoku nau kei tauhi faivelenga pē ʻa e ʻOtuá. Pea ʻi he taimí ni, ʻoku lolotonga fakatahatahaʻi ai ʻa e fanga sipi kehe ʻa Sīsuú ki he tafaʻaki ʻo e “ngaahi foha” mo e “ngaahi ʻofefine” pani ʻo Sihová, ʻi he ngaahi fonua mo e ngaahi ʻotu motu ʻe 234 ʻo e tahí.
“Gaahi Gaue Lelei Kotoabe”
8. Ko e hā ʻa e “gaahi gaue lelei” ʻoku longomoʻui ai ʻa e Kau Fakamoʻoni ʻa Sihová?
8 ʻOku maʻu ʻe he kau Kalisitiané ʻa e fatongia ke malangaʻi ʻa e ongoongo lelei ʻo e Puleʻangá pea mo tokoniʻi ʻa e faʻahinga mahuʻingaʻiá ke nau hoko ko e kau ākonga. Ka ʻoku nau “teuteu ki he gaahi gaue lelei kotoabe.” (2 Timote 3:17, PM, fakaʻītali ʻamautolu.) Ko ia, ʻoku nau tokanga anga-ʻofa ki honau ngaahi fāmilí, fakahāhā ʻa e anga-talitali kakaí, pea ʻaʻahi ki he kau puké. (1 Timote 5:8; Hepelu 13:16) Pea ʻoku kau ʻa e kau ngāue pole ʻi he ngaahi ngāue hangē ko e langa ʻo e ngaahi Fale Fakatahaʻangá—ko ha ngāue ʻokú ne toe fai ha fakamoʻoni. ʻI Toko, ʻi he hili ʻa hono langa ʻo ha holo ʻe taha, naʻe loto ai ʻa e kau maʻu mafai ʻo ha siasi tōʻonga fakafaimana fakalotofonua ke nau ʻilo ki he ʻuhinga naʻe malava ai ʻa e Kau Fakamoʻoni ʻa Sihová ke nau langa honau ngaahi fale pē ʻo kinautolú lolotonga ia naʻe pau ke totongi mai ʻe he siasí ia ha kakai ki he taumuʻa ko ʻení! ʻOku līpooti mei Toko ko hono langa ko ia ʻo e ngaahi Fale Fakatahaʻanga tuʻunga leleí ʻoku maʻu ai ha ola lelei pehē ʻi he kaungāʻapí ʻi he feinga ʻa e kakai ʻe niʻihi ke nofo totongi pe langa fale ʻi he ngaahi feituʻu ko ia ʻe langa ai ha ngaahi holó.
9. Kuo anga-fēfē ʻa e tali ʻa e Kau Fakamoʻoni ʻa Sihová ʻi he taimi kuo tō mai ai ha ngaahi fakatamaki?
9 ʻI he taimi ʻe niʻihi, ʻoku fiemaʻu ai ha toe faʻahinga ngāue lelei ʻe taha. Naʻe taaʻi ʻe ha ngaahi fakatamaki ʻa e ngaahi fonua lahi ʻi he lolotonga ʻo e taʻu fakangāue kuo ʻosí, pea ko e fika ʻuluaki naʻe hā maʻu pē ki hono fai ʻa e tokoní ko e Kau Fakamoʻoni ʻa Sihová. Ko e fakatātaá, ko e konga lahi ʻo Honitulasi naʻe laiki ia ʻe Afā Mitch. Tuai e kemo, ne fokotuʻu ʻe he vaʻá ha ngaahi kōmiti fakatuʻupakē ke fokotuʻutuʻu ha ngaahi tokoni. Ko e Kau Fakamoʻoni ʻi Honitulasí mo e ngaahi fonua lahi kehe, naʻa nau tānaki ʻa e ngaahi vala, meʻakai, faitoʻo, mo e ngaahi meʻa tefito kehe. Naʻe ngāueʻaki ʻe he Ngaahi Kōmiti Langa Fakafeituʻú ʻenau ngaahi pōtoʻí ke toe langa ʻa e ngaahi falé. Naʻe vave ʻaupito ai hono tokoniʻi ʻa hotau fanga tokoua naʻe maʻukovia ʻe he fakatamakí ke nau toe foki ki heʻenau ngaahi ngāue tuʻumaʻú. ʻI ʻEkuatoa, naʻe fai ai ʻe he Kau Fakamoʻoni ʻa Sihová ʻa e tokoni ki honau fanga tokouá ʻi hono fakaʻauha ʻe ha fuʻu tāfea ʻa e ngaahi ʻapi ʻe niʻihi. ʻI he hili ʻa e vakai ki he founga lelei naʻa nau fekuki ai mo e tuʻungá ni, naʻe pehē ai ʻe ha ʻōfisa fakapuleʻanga: “Kapau naʻá ku maʻu ʻa e kulupu ko ʻení, te u lavameʻa fakaofo! Ko e kakai hangē ko kimoutolú ʻoku totonu ke ʻi he tapa kotoa pē ʻo e māmaní.” Ko e ngāue lelei peheé ʻokú ne ʻomai ʻa e fakahīkihiki kia Sihova ko e ʻOtuá pea ʻoku hā mahino ai ko ʻetau “anga-līʻoa fakaʻotuá ʻoku ʻaonga ki he meʻa kotoa pē.”—1 Timote 4:8, NW.
ʻOku Nau “Puna Hange ko e ʻAo”
10. Neongo ʻa e holo hifo ʻa e tokolahi ʻo e kau paní, ko e hā ʻoku talaki ai ʻa e huafa ʻo Sihová ʻo ʻikai hano tatau ki muʻá?
10 ʻOku ʻeke mai leva ʻe Sihova: “Ko hai ʻa kinautolu na ʻoku puna hange ko e ʻao, pe hange ko e fanga lupe ki honau ngaahi tupa? ʻAua, ʻoku tanaki mai kiate au ʻa e ngaahi motu, pea muʻomuʻa ʻa e ngaahi vaka Tasisi, ke ʻomi hoʻo fanau mei he mamaʻo . . . ʻe langa ho ngaahi ʻa ʻe he hakoʻi muli, pea ko honau ngaahi tuʻi ʻe nofo ke ʻaonga kiate koe.” (Aisea 60:8-10) Ko e ʻuluaki faʻahinga naʻa nau tali ʻa e ‘ulo atu’ ʻa Sihová ko ʻene “fanau,” ko e kau Kalisitiane paní. Pea hoko mai leva ʻa e “hakoʻi muli,” ko e fuʻu kakai lahí, ʻa ia ʻoku nau ngāue mateaki ki honau fanga tokoua paní, ʻo muimui ʻi heʻenau taki ʻi hono malangaʻi ʻo e ongoongo leleí. Ko ia, neongo ʻoku holo hifo ʻa e tokolahi ʻo e kau paní, ʻoku lolotonga talaki ʻo taʻehanotatau mo ha toe taimi ki muʻa ʻa e huafa ʻo Sihová ʻo takatakai ʻi he foʻi māmaní.
11. (a) Ko e hā ʻoku kei hokohoko atú pea ko e hā hono ola ʻi he 1999? (e) Ko fē ʻa e ngaahi fonua naʻe tuʻu-ki-muʻa ʻi he ngaahi fika ʻo e papitaisó ki he 1999? (Sio ki he saati ʻi he peesi 17-20.)
11 Ko hono olá, ʻoku ʻaukolo ʻa e laui miliona ʻo “hange ko e fanga lupe ki honau ngaahi tupa,” ʻo maʻu ʻa e hūfanga ʻi loto ʻi he fakatahaʻanga Kalisitiané. ʻOku tānaki mai ki ai ʻa e laui kilu ʻi he taʻu taki taha, pea ʻoku fakaava ʻa e matapaá ki ha toe tokolahi ange. ʻOku pehē ʻe ʻAisea: “ʻE ava maʻu pe ho ngaahi matanikolo, ʻe ʻaho mo e po ʻo ʻikai songo; koeʻuhi ke ʻomi kiate koe ʻa e koloa ʻo e ngaahi puleʻanga.” (Aisea 60:11) ʻI he taʻu kuo ʻosí naʻe papitaiso ai ʻa e toko 323,439 ʻi hono fakaʻilongaʻi ʻa ʻenau fakatapui kia Sihová, pea kuo teʻeki ai ke ne tāpuni ʻa e ngaahi matanikoló. Ko e “ngaahi meʻa manakoa mei he ngaahi puleʻanga kotoa pē,” ʻa e kau mēmipa ʻo e fuʻu kakai lahí, ʻoku nau kei fakatahataha ʻo fou mai ʻiate kinautolu. (Hakeai 2:7, NW) ʻOku ʻikai fakatafokiʻi ha taha pē ʻoku loto ke mavahe mai mei he fakapoʻulí. (Sione 12:46) ʻOfa ke ʻoua ʻaupito ʻe mole mei he faʻahinga peheé kotoa ʻenau houngaʻia ki he māmá!
Taʻemanavahē ʻi he Fehangahangai mo e Fakafepakí
12. Kuo anga-fēfē ʻa e feinga ʻa e faʻahinga ʻoku nau ʻofa ki he poʻulí ke tāmateʻi ʻa e māmá?
12 Ko e faʻahinga ko ia ʻoku nau ʻofa ʻi he poʻulí ʻoku nau fehiʻa ʻi he maama ʻa Sihová. (Sione 3:19) ʻOku aʻu ʻo feinga ʻa e niʻihi ke tāmateʻi ʻa e maama ko iá. ʻOku ʻikai ke taʻeʻamanekina ʻeni. Naʻa mo Sīsū, “ʻa e maama moʻonia, ʻa ia ʻoku ne huluhulu ʻa e tangata taki taha,” naʻe lumaʻi, fakafepakiʻi, pea aʻu ʻo tāmateʻi ʻe he kau tangata ʻo hono fonuá. (Sione 1:19) ʻI he kotoa ʻo e senituli hono 20, kuo toe kau foki ʻa e Kau Fakamoʻoni ʻa Sihová, ʻi hono manukiʻi, tuku pilīsone, fakataputapui, pea aʻu ʻo tāmateʻi, ʻi heʻenau tapua anga-tonu atu ʻa e maama ʻa Sihová. ʻI he ngaahi taʻu ki mui ní, kuo feinga ai ʻa e kau fakafepakí ke fakamafola ʻa e ngaahi loi ʻi he mītiá ʻo fekauʻaki mo e faʻahinga ko ia ʻoku nau tapua atu ʻa e maama ʻa e ʻOtuá. ʻOku loto ʻa e niʻihi ke ʻai ʻa e kakaí ke nau tui ko e Kau Fakamoʻoni ʻa Sihová ʻoku nau fakatuʻutāmaki pea ʻoku totonu ke fakangatangata pe fakataputapui kinautolu. Kuo lavameʻa ʻa e kau fakafepaki peheé?
13. Ko e hā kuo hoko mei hono ʻoatu fakapotopoto ʻo e ngaahi moʻoniʻi meʻa ʻo fekauʻaki mo ʻetau ngāué ki he mītiá?
13 ʻIkai. ʻI heʻene feʻungamālié, kuo aʻu ai ʻa e Kau Fakamoʻoni ʻa Sihová ki he mītiá ke fakamatalaʻi ʻa e ngaahi moʻoniʻi meʻá. Ko hono olá, kuo talaki ai ʻa e huafa ʻo Sihová ʻo mafolalahia ʻi he ngaahi nusipepá mo e ngaahi makasiní pea ʻi he letioó mo e televīsoné. Kuo hoko ʻi he meʻá ni ʻa e ngaahi ola lelei ʻi he ngāue fakamalangá. Ko e fakatātaá, ʻi Tenimaʻake, naʻe fekauʻaki ai ha polokalama ʻi he TV fakafonuá mo e tuʻunga-lea “ʻUhinga ʻoku hōloa ai ʻa e tui ʻa e kau Tenimaʻaké.” Naʻe fakaʻekeʻeke ai ʻa e Kau Fakamoʻoni ʻa Sihová fakataha mo e niʻihi kehe. ʻI he hili iá, naʻe fakamatala ha fefine ʻa ia naʻá ne mamata ʻi he polokalamá: “Naʻe hā mahino ʻaupito ʻa e faʻahinga naʻa nau maʻu ʻa e laumālie ʻo e ʻOtuá.” Naʻe kamata ha ako mo ia.
14. Ki honau fakamāʻí, ko e hā ʻe vavé ni ke fakamālohiʻi ʻa e kau fakafepakí ke nau ʻiloʻí?
14 ʻOku ʻilo ʻe he Kau Fakamoʻoni ʻa Sihová ʻe fakafepakiʻi kinautolu ʻe he tokolahi ʻi he māmani ko ʻení. (Sione 17:14) Ka, ʻoku fakaivimālohiʻi kinautolu ʻe he kikite ʻa ʻAiseá: “Ko e fanau ʻa e kakai naʻe fakatangaʻi koe, te nau ʻalu punopunou atu; pea ko kinautolu naʻe manukiʻi koe, te nau foʻohifo ʻi ho lalo vaʻe: pea te nau ui koe ko e Kolo ʻo Sihova, ko e Saione ʻo e Tapuha ʻo Isileli.” (Aisea 60:14) Ki honau fakamāʻí, ʻe vavé ni ke ʻilo ʻe he kau fakafepakí, ko hono moʻoní, ko e ʻOtuá tonu naʻa nau faitau ki aí. Ko hai ʻe lava ke ne ikuna ʻi ha faitau pehē?
15. ʻI he founga fē ʻoku hanga ai ʻe he Kau Fakamoʻoni ʻa Sihová ʻo “komo ʻa e huʻakau ʻani puleʻanga,” pea kuo anga-fēfē ʻa e tapua atu ʻa e meʻá ni ʻi heʻenau faiakó mo e ngāue fakaʻevangelioó?
15 Ko e toe ngaahi talaʻofa ʻa Sihová: “Te u ngaohi koe ko e polepoleʻanga taʻengata . . . te ke komo ʻa e huʻakau ʻani puleʻanga, pea te ke huhu ʻani huhu ʻoni tuʻi: pea te ke ʻilo ko au Sihova ko ho moʻuiʻanga.” (Aisea 60:15, 16) ʻIo, ko Sihova ʻa e Moʻuiʻanga ʻo hono kakaí. Kapau ʻoku nau falala kiate ia, te nau tolonga ʻo “taʻengata.” Pea te nau “komo ʻa e huʻakau ʻani puleʻanga,” ʻo ngāueʻaki ʻa e ngaahi koloa pau ʻoku ala maʻú ʻi hono ʻai ke laka ki muʻa ʻa e lotu moʻoní. Ko e fakatātaá, ko hono ngāue fakapotopotoʻaki ʻa e komipiutá mo e ngaahi naunau fetuʻutaki fakatekinolosiá ʻoku malava ai ʻa e pulusi taimi taha ʻo e Taua Leʻo ʻi he ngaahi lea ʻe 121, pea mo e Awake! ʻi he lea ʻe 62. ʻOku ʻi ai ha polokalama fakakomipiuta pau kuo faʻu ke tokoni ki hono liliu ʻo e New World Translation ki he ngaahi lea foʻoú, pea ʻoku ʻomai ʻe he liliu peheé ʻa e fiefia lahi. ʻI hono tukuange mai ʻa e liliu faka-Kolōtia ʻo e ngaahi Konga Tohitapu Faka-Kalisi Kalisitiané ʻi he 1999, naʻe tō loʻimata ai ʻi he fiefia ʻa e laui afe. Naʻe pehē ʻe ha tokoua taʻumotuʻa: “Naʻe fuoloa fau ʻeku tatali ki he Tohitapú ni. ʻOku malava leva he taimí ni ke u mate ʻi he fiemālie!” Ko e tufaki takai ʻo e New World Translation, ʻi hono kakató pe konga, kuo laka hake ʻi he 100 milioná ʻi he ngaahi lea ʻe 34.
Ngaahi Tuʻunga Fakaeʻulungaanga Māʻolunga
16, 17. (a) Neongo ʻene faingataʻá, ko e hā ʻoku mātuʻaki mahuʻinga ai ke tauhi maʻu ʻa e ngaahi tuʻunga māʻolunga ʻa Sihová? (e) Ko e hā ʻa e meʻa naʻe hokosia ʻokú ne fakahāhaaʻi ʻoku malava ʻe he toʻutupú ke fakaʻehiʻehi mei honau ʻuliʻi ʻe he māmaní?
16 Naʻe pehē ʻe Sīsū: “ʻIlonga ʻa ia ʻoku ngāue kovi ʻoku ne fehiʻa ki he maama.” (Sione 3:20) ʻI he tafaʻaki ʻe tahá, ko e faʻahinga ʻoku nau nofo maʻu ʻi he māmá ʻoku nau ʻofa ʻi he ngaahi tuʻunga māʻolunga ʻa Sihová. ʻOku pehē ʻe Sihova fakafou ʻia ʻAisea: “Pea ko ho kakai te nau maʻoniʻoni kotoa.” (Aisea 60:21a) ʻOku lava ke hoko ko ha pole ʻa hono tauhi maʻu ʻa e ngaahi tuʻunga māʻoniʻoní ʻi ha māmani ʻoku failahia ai ʻa e ʻulungaanga taʻetaau fakaefehokotaki fakasinó, loí, mānumanú, mo e loto-pōlepolé. Ko e fakatātaá, ʻi he ngaahi fonua ʻe niʻihi, ʻoku tupulekina ai ʻa e ʻikonōmiká pea ʻoku faingofua ke afe ʻo fakapapauʻi ke tuli ki he tuʻumālié. Kae kehe, naʻe fakatokanga ʻa Paula: “Ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia.” (1 Timote 6:9) He toki meʻa fakamamahi ē ko e taimi ʻoku kau lahi ai ha taha ʻi he ngaahi ngāue fakapisinisí ʻo ne feilaulauʻi ai ʻa e ngaahi meʻa mahuʻinga moʻoní, ʻo hangē ko e feohi faka-Kalisitiané, ngāue toputapú, ngaahi tefitoʻi moʻoni fakaeʻulungāngá, mo e ngaahi fatongia fakafāmilí!
17 ʻOku tautefito ki he toʻutupú ʻa e faingataʻa ke nau tauhi maʻu ʻa e ngaahi tuʻunga māʻoniʻoní, ʻi he lahi fau ʻa honau toʻumeʻa ʻoku kau ʻi hono ngāuehalaʻaki ʻa e faitoʻo kona tapú mo e ʻulungaanga taʻetāú. ʻI Sulinemi, naʻe fakaofi atu ai ha tamasiʻi mānaʻia ʻi he ʻapiakó ki ha kiʻi taʻahine taʻu 14 ʻo fakaafeʻi ke na fehokotaki fakasino. Naʻá ne fakafisingaʻi, ʻo fakamatalaʻi ange ʻoku tapui ʻe he Tohitapú ʻa e ngaahi meʻa pehē ʻi tuʻa mei he nofo malí. Naʻe manukiʻi ia ʻe he tamaiki fefine kehe ʻi he ʻapiakó pea feinga ke tenge ia ke liliu ʻene fakakaukaú, ʻo pehē naʻe loto ʻa e tokotaha kotoa ke nau mohe mo e tamasiʻi tonu ko iá. Ka, naʻe kei tuʻumaʻu pē ʻa e kiʻi taʻahiné. Hili ha ngaahi uike mei ai, naʻe ʻiloʻi ai ʻoku maʻu ʻe he tamasiʻí ʻa e fakaʻilonga ʻo e HIV pea naʻe hoko ʻo puke lahi. Naʻe fiefia ʻa e kiʻi taʻahiné ʻi heʻene talangofua ki he fekau ʻa Sihová ke ‘fakaʻehiʻehi mei he feʻauakí.’ (Ngāue 15:28, 29) ʻOku mātuʻaki pōlepole ʻa e Kau Fakamoʻoni ʻa Sihová ʻi he toʻutupu ko ia ʻi honau lotolotongá ʻoku nau tuʻu maʻu ki he meʻa ʻoku totonú. Ko ʻenau tuí, pea mo e tui ʻa ʻenau ngaahi mātuʻá, ʻoku ‘ogoogolelei ai’—ʻo ʻomai ai ʻa e lāngilangi ki he—huafa ʻo Sihova ko e ʻOtuá.—Aisea 60:21e, PM.
Kuo ʻOmai ʻe Sihova ʻa e Tupú
18. (a) Ko e hā ʻa e meʻa lahi kuo fai ʻe Sihova maʻa ʻene kakaí? (e) Ko e hā ʻa e fakamoʻoni ʻoku ʻi ai ʻe hokohoko atu ʻa e tupulekiná, pea ko e hā ʻa e ngaahi ʻamanaki lāngilangiʻia ʻoku fakatatali mai ki he faʻahinga ko ia ʻoku nau kei nofo ʻi he māmá?
18 ʻIo, ʻoku ʻomai ʻe Sihova ʻa e maama ki heʻene kakaí, ʻo tāpuakiʻi kinautolu, ʻo tataki kinautolu, mo fakaivimālohiʻi kinautolu. ʻI he lolotonga ʻa e senituli hono 20, naʻa nau sio ai ki hono fakahoko ʻa e ngaahi lea ʻa ʻAiseá: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi: ko au Sihova te u fakavave ia ʻi hono taimi.” (Aisea 60:22) Mei he falukunga ʻi he 1919, “ko e kiʻi siʻi” kuo hoko ʻo laka hake ia ʻi he “toko afe.” Pea ʻoku teʻeki ke hoko mai ʻa e ngataʻanga ʻo e tupu ko iá! ʻI he taʻu kuo ʻosí naʻe maʻu ai ʻa e kātoanga Fakamanatu ʻo e pekia ʻa Sīsuú ʻe he toko 14,088,751. Ko e tokolahi ʻo e faʻahingá ni naʻe ʻikai ko e Kau Fakamoʻoni longomoʻui. ʻOku tau fiefia ʻi heʻenau maʻu ʻa e ouau mahuʻinga ko iá, pea ʻoku tau fakaafeʻi kinautolu ke nau hanganaki ʻunu atu ki he māmá. ʻOku kei ulo ngingila hifo ʻa Sihova ki heʻene kakaí. ʻOku kei ava ʻa e matapā ki heʻene kautahá. Ko ia, ʻai ke fakapapauʻi ʻe he tokotaha kotoa ke nofo ʻi he maama ʻa Sihová. He ngaahi tāpuaki lahi ē ʻe ʻomai ʻe he meʻá ni kiate kitautolu he taimí ni! Pea ko ha fiefia lahi ē te ne ʻomai ʻi he kahaʻú ʻi he taimi ʻe fakahīkihikiʻi ai ʻe he meʻa fakatupu kotoa pē ʻa Sihova, pea fiefia ʻi he ngeia ʻo hono lāngilangí!—Fakahā 5:13, 14.
ʻE Lava Ke Ke Fakamatalaʻi?
• Ko hai kuó ne tapua atu ʻa e kolōlia ʻo Sihová ʻi he ngaahi ʻaho fakaʻosí ni?
• Ko e hā ʻokú ne fakahaaʻi ko e faivelenga ʻa e kakai ʻa Sihová kuo ʻikai ke hōloa?
• Ko e hā ʻa e niʻihi ʻo e ngaahi ngāue lelei ʻa ia ʻoku femoʻuekina ai ʻa e Kau Fakamoʻoni ʻa Sihová?
• Neongo ʻa e fakafepaki kakahá, ko e hā ʻoku tau loto-falala ki aí?
[Fehuʻi ki he Ako]
[Saati ʻi he peesi 17-20]
LĪPOOTI TAʻU FAKANGĀUE 1999 ʻA E KAU FAKAMOʻONI ʻA SIHOVÁ ʻI MĀMANI LAHI
[Fakatātā ʻi he peesi 15]
ʻOku kei ʻaukolo mai ʻa e kakaí ki he kautaha ʻa Sihová
[Fakatātā ʻi he peesi 16]
ʻOku tau fiefia he ʻoku kei fakaava lahi ʻe Sihova ʻa e matapaá ki he faʻahinga ʻoku nau ʻofa ki he māmá