Na‘e tala‘ofa ‘e he ‘Otuá ki he palōfita ko ‘Ēpalahamé ko e taha ‘i hono hakó ‘e fakafou mai ai ‘a e ngaahi tāpuaki ki he “ngaahi pule‘anga kotoa pē ‘o e māmaní.” (Sēnesi 22:18) Ko hai ‘a e hako ko iá?

‘I he meimei ta‘u ‘e 2,000 kuo maliu atú, na‘e ‘oange ‘e he ‘Otuá kia Sīsū, ‘a ia ko ha hako ‘o ‘Ēpalahame, ‘a e mālohi ke ne fakahoko ‘a e ngaahi mana fakaofo. Na‘e fakahaa‘i ‘i he ngaahi mana ko iá ko e tala‘ofa na‘e fai kia ‘Ēpalahame fekau‘aki mo e ngaahi pule‘angá ‘e fakafou mai ia ‘ia Sīsū.​—Kalētia 3:14.

Ko e ngaahi mana na‘e fai ‘e Sīsuú na‘e fakapapau‘i ai ko ia ‘a e toko taha kuo fili ‘e he ‘Otuá ke ne tāpuaki‘i ‘a e fa‘ahinga ‘o e tangatá, pea na‘e toe fakahaa‘i ai ‘a e founga ‘e ngāue‘aki ai ia ‘e he ‘Otuá ke tāpuaki‘i tu‘uloa ‘a e fa‘ahinga ‘o e tangatá. Fakatokanga‘i ‘a e anga hono fakamamafa‘i ‘e he ngaahi mana ‘a Sīsuú ‘a e ni‘ihi hono ngaahi ‘ulungaanga fakamānakó.

Kaungāongo‘i​—Na‘e fakamo‘ui ‘e Sīsū ‘a e puké.

‘I he taimi ‘e taha na‘e kōlenga ‘e ha tokotaha kilia kia Sīsū ke ne fakamo‘ui ia. Na‘e ala ‘a Sīsū kiate ia peá ne pehē: “‘Oku ou loto ki ai!” Na‘e puli atu leva ‘a e kiliá meiate ia.​—Ma‘ake 1:40-42.

Nima-homo​—Na‘e fafanga ‘e Sīsū ‘a e fiekaiá.

Na‘e ‘ikai ke loto ‘a Sīsū ke fiekaia ‘a e kakaí. Na‘e ‘ikai ke tu‘o taha pē ‘ene fafanga‘i fakaemana ‘a e kakai ‘e laui afe ‘aki ‘a e ngaahi fo‘i mā mo e fanga ki‘i mata‘iika. (Mātiu 14:17-21; 15:32-38) Hili ‘enau kaí, na‘a nau mākona kotoa pea na‘e toe lahi ‘a e me‘akaí.

Manava‘ofa​—Na‘e fokotu‘u ‘e Sīsū ‘a e maté.

‘I he ue‘i ‘e he “faka‘ofa‘ia” ‘a Sīsuú, na‘á ne fokotu‘u mei he maté ‘a e tama pē ‘e taha ‘a ha uitou na‘e mamahi koe‘uhi na‘e ‘ikai ha taha ke ne toe tokanga‘i ia.​—Luke 7:12-15.