Kapau ʻoku ʻikai mei he ʻOtuá ʻa e faingataʻaʻiá, ko e hā ʻoku tupu mei ai ʻa e fasimanavá, masiva ʻangoʻangó, tau anga-fulikivanú, mahaki mamateá, mo e fakatamaki fakanatulá? Ko e Folofola ʻa e ʻOtuá, ʻa e Tohi Tapú, ʻokú ne fakahaaʻi mai ʻa e tupuʻanga tefito ʻe tolu ʻo e faingataʻaʻia ʻa e faʻahinga ʻo e tangatá:

1. Siokita, Mānumanu, mo e Tāufehiʻa. “Pule . . . ha tangata ki ha tangata ko e kovi pē ʻokú ne ʻomi kiate iá.” (Tangata Malanga 8:9) ʻOku faʻa faingataʻaʻia ʻa e kakaí koeʻuhi ʻoku maʻukovia kinautolu ʻe he taʻehaohaoa, siokita, pe anga-fakamamahi.

2. Taimi mo e Ngaahi Meʻa Taʻeʻamanekina ʻOku Hoko. ʻOku faʻa faingataʻaʻia ai ʻa e tangatá “koeʻuhí ʻoku hoko kiate kinautolu kotoa ʻa e ngaahi taimi faingataʻa mo e ngaahi meʻa ʻoku hoko taʻeʻamanekina.” (Tangata Malanga 9:11) ʻA ia, ko e kakaí ʻoku nau ʻi he feituʻu hala ʻi he taimi hala, ʻoku hoko ha ngaahi fakatuʻutāmaki, pe ʻoku taʻetokanga ha kakai pe ʻoku nau fai ha ngaahi fehālaaki.

3. Ko e Pule Kovi ʻo e Māmaní. ʻOku fakahaaʻi mahino ʻe he Tohi Tapú ʻa e tupuʻanga tefito ʻo e faingataʻaʻia ʻa e tangatá. ʻOkú ne pehē: “Ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sione 5:19) Ko e ‘tokotaha fulikivanu’ ko iá ko Sētane ko e Tēvoló, ko ha meʻamoʻui laumālie mālohi ʻa ia naʻe ʻuluaki hoko ko ha ʻāngelo ʻa e ʻOtuá ka “naʻe ʻikai te ne tuʻu maʻu ʻi he moʻoní.” (Sione 8:44) ʻOku ʻi ai mo ha ngaahi meʻamoʻui laumālie kehe naʻa nau kau mo Sētane ʻo angatuʻu ki he ʻOtuá koeʻuhi ko ʻenau tuli ki he ngaahi holi siokitá, ʻo nau hoko ai ko e fanga tēmeniō. (Sēnesi 6:1-5) Talu mei heʻenau angatuʻú, kuo fai ai ʻe Sētane mo ʻene fanga tēmenioó ha tākiekina mālohi mo anga-fakamamahi ki he ngaahi meʻa ʻi he māmaní. Kuo hoko eni tautefito ʻi hotau taimí. ʻI he taimi ní ʻoku ʻita lahi ʻa e Tēvoló pea “ʻokú ne takihalaʻi ʻa e kotoa ʻo e māmani kuo nofoʻí,” ʻo iku ai ki he “ʻoiauē ʻa e māmaní.” (Fakahā 12:9, 12) Ko e moʻoni, ko Sētané ko ha pule fakatikitato anga-fulikivanu. ʻOkú ne maʻu ʻa e fiemālie taʻetotonu ʻi he faingataʻaʻia ʻa e tangatá. Ko Sētane​—ʻikai ko e ʻOtuá—​ʻokú ne fakatupunga ʻa e faingataʻaʻia ʻa e kakaí.

FAKAKAUKAU ANGÉ: Ko ha tokotaha faikovi mātuʻaki loto-fefeka pē te ne fakatupunga ke faingataʻaʻia ʻa e kakai tonuhiá. ʻI hono kehé, ʻoku pehē ʻe he Tohi Tapú: “Ko e ʻOtuá ko e ʻofa.” (1 Sione 4:8) ʻI he fehoanaki mo hono ʻulungaanga ʻofá, ʻoku “mole ke mamaʻo ha fai ʻe he ʻOtua moʻoní ha tōʻonga fulikivanu, pe ko ha faihala ʻa e Māfimafi-Aoniú!”​—Siope 34:10.

Kae kehe, ʻoku fakanatula pē nai haʻo fifili, ‘Ko e hā hono fuoloa ʻe fakaʻatā ai ʻe he ʻOtua Māfimafi-Aoniú ʻa Sētane ke hokohoko atu ʻene pule fulikivanú?’ Hangē ko ia kuo tau lāuʻilo ki aí, ʻoku fakaliliʻa ʻa e ʻOtuá ʻi he fulikivanú, pea ʻokú ne mamahi lahi ʻi heʻetau faingataʻaʻiá. Ko ia ai, ʻoku naʻinaʻi mai ʻe heʻene Folofolá: “Lī atu ʻa e kotoa hoʻomou loto-moʻuá kiate ia, koeʻuhí he ʻokú ne tokanga mai kiate kimoutolu.” (1 Pita 5:7) ʻOku ʻofa ʻa e ʻOtuá ʻiate kitautolu pea ʻokú ne maʻu ʻa e mālohi, ke ne toʻo atu ʻa e faingataʻaʻia mo e fakamaau taʻetotonu kotoa pē, ʻo hangē ko ia ʻe fakamatalaʻi ʻi he kupu hono hokó. *