Ko e lahi ange ʻetau ako ki he ʻulungaanga ʻo ha tokotaha, ko e lelei ange ia ʻetau ʻiloʻi ʻa e tokotaha ko iá, pea ʻe lava ke toe vāofi ange ʻetau kaumeʻá. ʻI he tuʻunga meimei tatau, ko e lahi ange ʻetau ʻiloʻi ʻa e ngaahi ʻulungaanga ʻo Sihová, ʻe lelei ange ai ʻetau ʻiloʻi pe ko e tokotaha fēfē ia, pea ʻe lava ke toe vāofi ange ai ʻetau kaumeʻá. ʻI he kotoa ʻo e ngaahi ʻulungaanga fakaofo ʻo e ʻOtuá, ʻoku tuʻu-ki-muʻa ai ʻa e ngaahi ʻulungaanga ʻe fā: ko ʻene mālohí, potó, fakamaau totonú, mo e ʻofá.

“ʻE ʻEiki Hau Sihova! Vakai! Naʻá ke ngaohi ʻa e langí mo e māmaní ʻaki ho fuʻu iví.”​—SELEMAIA 32:17.

ʻOku fakamoʻoniʻi ʻe he fakatupú ʻoku mālohi ʻa e ʻOtuá. Ko e fakatātaá, ʻi hoʻo tuʻu ʻi tuʻa ʻi ha ʻaho laʻā tafitonga, ʻoku fēfē hoʻo ongoʻí? Ko e māfana mei he laʻaá. Ko hono moʻoní, ʻokú ke ongoʻi ʻa e mālohi ʻo e fakatupu ʻa Sihová. ʻOku mālohi fēfē ʻa e laʻaá? Ko e māfana hono uhouhongá, ʻoku aʻu ki he tikilī Falenihaiti ʻe 27,000,000 nai (tikilī selosiasi ʻe 15,000,000). Ko e sekoni kotoa pē, ʻoku tukuange mai ʻe he laʻaá ʻa e ivi tatau mo e pā ʻo ha foʻi pomu niukilia ʻe laui ngeau miliona.

Neongo ia ko hotau laʻaá ʻoku siʻisiʻi ia ʻi hono fakahoa atu ki he ngaahi fetuʻu taʻefaʻalaua ʻe laui tiliona ʻi he ʻunivēsí. ʻOku fakafuofua ʻe he kau faisaienisí ko e taha ʻo e ngaahi foʻi fetuʻu lahi tahá, kuo fakahingoa ko UY Scuti, ko hono taiamitá ʻoku lī tuʻo 1,700 nai ai ʻa e foʻi laʻaá. Kapau ʻe fetongi ʻe Scuti ʻa e foʻi laʻaá, te ne kāpui nai ʻa e māmaní pea hope atu ʻo fakalaka ʻi he halanga vilo takai ʻo e palanite ko Siupitá. ʻOku tokoni nai eni kiate kitautolu ke tau mahinoʻi lelei ange ʻa e fakamatala ʻa Selemaia ko Sihova ko e ʻOtuá naʻá ne ngaohi ʻa e langí mo e māmaní, ʻa ia, ko e ʻunivēsí, ʻaki hono fuʻu mālohí.

ʻOku anga-fēfē ʻetau maʻu ʻaonga mei he mālohi ʻo e ʻOtuá? Ko ʻetau moʻuí ʻoku fakatuʻunga ia ʻi he ngaahi meʻa fakatupu fakamatelie ʻa e ʻOtuá, ʻo hangē ko e laʻaá pea pehē ki he kotoa ʻo e ngaahi  tokonaki fakaofo ʻi he māmaní. Tānaki atu ki aí, ʻoku ngāueʻaki ʻe he ʻOtuá hono mālohí ke maʻu ʻaonga fakafoʻituitui mei ai ʻa e faʻahinga ʻo e tangatá. Anga-fēfē? ʻI he ʻuluaki senitulí, naʻe foaki ʻe he ʻOtuá kia Sīsū ʻa e mālohi ke ne fakahoko ha ngaahi ngāue naʻe hoko ko ha mana moʻoni. ʻOku tau lau: “Ko eni ʻoku sio ʻa e kuí pea ʻoku lue ʻa e heké, ʻoku maʻa ʻa e kiliá pea fanongo ʻa e tulí, kuo fokotuʻu hake ʻa e maté.” (Mātiu 11:5) Fēfē ʻa e ʻahó ni? “ʻOkú ne foaki ʻa e mālohi ki he tokotaha helaʻiá,” ko e lau ia ʻa e Tohi Tapú, pea hoko atu: “Ko kinautolu ʻoku ʻamanaki kia Sihová te nau maʻu ʻa e mālohi.” (ʻAisea 40:29, 31) ʻOku lava ke tokonaki mai ʻe he ʻOtuá ʻa e “mālohi ʻoku mahulu atu ia ʻi he tuʻunga anga-mahení” ke tau lava ʻo fekuki pe kītaki ʻi he ngaahi faingataʻa mo e ʻahiʻahi ʻo e moʻuí. (2 Kolinitō 4:7) ʻIkai ʻokú ke ongoʻi ʻoku tohoakiʻi koe ki ha ʻOtua ʻokú ne ngāue anga-ʻofa ʻaki hono mālohi taʻefakangatangatá ki heʻetau leleí?

“He lahi moʻoni ē ko hoʻo ngaahi ngāué, ʻe Sihova! Kuó ke ngaohi kotoa kinautolu ʻi ho potó.”​—SAAME 104:24.

Ko e lahi ange ʻetau ako ʻo fekauʻaki mo e ngaahi meʻa kuo ngaohi ʻe he ʻOtuá, ko e lahi ange ia ʻetau ofo ʻi hono potó. Ko e moʻoni, ʻoku ʻi ai ha malaʻe ʻo e akó ʻoku ui ko e paiomimētiká, ʻa ia ʻoku sivisiviʻi ai ʻe he kau faisaienisí ʻa e fakatupu ʻa Sihová pea nau ohi mai ʻa e ngaahi ʻelemēniti ʻoku nau maʻu mei he fakatupu ʻo natulá ke fakaleleiʻiʻaki ʻenau ngaahi tisaini ʻa kinautolú. ʻOku kamata eni mei ha kiʻi meʻa faingofua ʻo ʻalu ki ha tisaini fihi mo faingataʻa ange.

ʻOku tau mātā ʻa e fakaofo ʻo e poto ʻa e ʻOtuá ʻi he sino ʻo e tangatá. Ko e fakatātaá, fakakaukau angé, ki he anga ʻo e tupu ʻa e sino ʻa ha kiʻi pēpē. ʻOku kamata ia mei ha foʻi sela, ʻoku ʻi loto kotoa ai ʻa e ngaahi fakahinohino fakakēnisi ʻoku fiemaʻú. Ko e sela ko iá ʻoku vahevahe ia ki ha ngaahi sela ʻoku nau hā meimei tatau. Ka ʻi hono taimi totonú, ko e ngaahi selá ʻoku kamata ke nau ʻi ha fakafōtunga kehekehe, ʻo iku ai ki ha ngaahi kalasi kehekehe ʻe lauingeau, hangē ko e sela toto, sela neave, mo e sela hui. Taimi nounou mei ai ʻoku nau ʻasi mai ko e ngaahi kupu pea kamata ke nau ngāue. ʻI ha māhina pē ʻe hiva, ko e foʻi sela naʻe kamata maí kuo tupu ia ʻo hoko ko ha kiʻi pēpē kakato ʻoku faʻuʻaki ʻa e ngaahi sela ʻe laui piliona. Ko e poto ʻoku hā mei he tisaini ko iá ʻoku ueʻi ai ʻa e tokolahi ke nau loto-tatau mo e tokotaha-tohi Tohi Tapú ʻa ia naʻá ne pehē: “ʻOku ou fakahīkihikiʻi koe koeʻuhí ko e fakamanavahē ʻa e founga fakaofo ʻo hono ngaohi aú.”​—Saame 139:14.

ʻOku anga-fēfē ʻetau maʻu ʻaonga mei he poto ʻo e ʻOtuá? Ko e Tokotaha-Fakatupú ʻokú ne ʻiloʻi ʻa e meʻa ʻoku tau fiemaʻú ke fiefia aí. Ko hono mahinoʻi ʻa e lahi ʻo ʻene ʻiló mo e mahinó, ʻokú ne tokonaki mai ʻa e faleʻi fakapotopoto ʻi heʻene Folofolá, ʻa e Tohi Tapú. Ko e fakatātaá, ʻoku ekinaki ai: “Hokohoko atu ʻa e . . . fefakamolemoleʻaki loto-lelei.” (Kolose 3:13) ʻIkai ko ha faleʻi fakapotopoto eni? ʻIo. Kuo ʻiloʻi ʻe he kau fakatotoló ko e hoko ʻo fakamolemolé ʻe lava ke fakaleleiʻi ai ʻa e mohe ʻa ha taha pea siʻi ai ʻa e lele ʻa e totó. ʻOku toe holoki nai ai ʻa e tuʻunga fakatuʻutāmaki ʻo e loto-mafasiá mo e ngaahi ʻīsiú fakamoʻuilelei kehé. ʻOku hangē ʻa e ʻOtuá ko ha kaumeʻa poto mo ʻofa ʻoku ʻikai ʻaupito tuku ʻene ʻomai ʻa e ngaahi faleʻi ʻaongá. (2 Tīmote 3:16, 17) ʻIkai te ke loto ke maʻu ha kaumeʻa pehē?

“ʻOku manako ʻa Sihova ki he fakamaau totonú.”​—SAAME 37:28.

ʻOku fai maʻu pē ʻe he ʻOtuá ʻa e meʻa ʻoku totonú. Ko e moʻoni, ʻoku “mole ke mamaʻo ha fai ʻe he ʻOtua moʻoní ha tōʻonga fulikivanu, pe ko ha faihala ʻa e Māfimafi-Aoniú!” (Siope 34:10) Ko ʻene fakamāú ʻoku faitotonu, ʻo hangē ko e meʻa naʻe leaʻaki ʻe he tokotaha-tohi-sāmé kia Sihová: “Te ke fai ʻa e fakamaau totonu ki he ngaahi kakaí.” (Saame 67:4) Koeʻuhi “ʻoku sio ʻa Sihova ia ki he lotó,” heʻikai ke kākaaʻi ia ʻe he mālualoí ka ʻokú ne ʻiloʻi maʻu pē ʻa e moʻoní pea fai ʻa e fakamaau ʻoku tonu mātē. (1 Sāmiuela 16:7) ʻIkai ko ia pē, ʻoku lāuʻilo ʻ a e ʻOtuá ki he fakamaau taʻetotonu kotoa pē mo e taʻefaitotonu ʻi he māmaní, pea kuó ne talaʻofa ʻe vavé ni ki he ‘kau fulikivanú ke tuʻusi atu kinautolu mei he māmaní.’​—Palōveepi 2:22.

Neongo ia, ko e ʻOtuá ʻoku ʻikai ko ha fakamaau anga-fefeka mo vēkeveke ke faitautea. ʻOkú ne fakahāhā ʻa e mēsí ʻi he taimi feʻungamālié. ʻOku pehē ʻe he Tohi Tapú: “Ko Sihová ʻoku mohu meesi mo manavaʻofa,” ʻo aʻu ki he faʻahinga fulikivanú ʻo kapau ʻoku nau fakatomala loto-moʻoni. ʻIkai ko e fakamaau totonu moʻoní ia?​—Saame 103:8; 2 Pita 3:9.

ʻOku anga-fēfē ʻetau maʻu ʻaonga mei he fakamaau totonu ʻa e ʻOtuá? Naʻe pehē ʻe he ʻapositolo ko Pitá: “ʻOku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.” (Ngāue 10:34, 35) ʻOku tau maʻu ʻaonga mei he fakamaau totonu ʻa e ʻOtuá koeʻuhi ʻoku ʻikai ʻaupito te ne fakahāhā ʻa e filifilimānakó pe fakafaʻafaʻahí. ʻOku lava ke ne tali kitautolu pea hoko ko ʻene kau lotu tatau ai pē pe ko e hā hotau matakalí, fonuá, tuʻunga fakaakó pe fakasōsialé.

Koeʻuhi ʻoku loto ʻa e ʻOtuá ke tau mahinoʻi pea maʻu ʻaonga mei heʻene fakamaau totonú, kuó ne tokonaki mai kiate kitautolu ha konisēnisi. ʻOku fakamatalaʻi ʻe he Tohi Tapú ko e konisēnisí ʻoku hangē ko ha lao ‘kuo hiki ʻi hotau lotó,’ ʻa ia ʻoku “kaungā-fakamoʻoni” pe ko ʻetau tōʻongá ʻoku tonu pe hala. (Loma 2:15) ʻOku anga-fēfē ʻetau maʻu ʻaongá? ʻI hono akoʻi totonú, ko hotau konisēnisí ʻoku lava ke ne ueʻi kitautolu ke tau tafoki mei he  ngaahi tōʻonga fakatupu maumau pe taʻetotonú. Pea kapau ʻoku tau faiangahala ʻe lava ke ne ueʻi kitautolu ke tau fakatomala pea fakatonutonu hotau ʻalungá. Ko e moʻoni, ko hono mahinoʻi e anga ʻo e vakai ʻa e ʻOtuá ki he fakamaau totonú ʻoku tokoniʻi mo tohoakiʻi ai kitautolu kiate ia!

“Ko e ʻOtuá ko e ʻofa.”​—1 SIONE 4:8.

ʻOku fakahāhā ʻe he ʻOtuá ʻene mālohí, potó, mo e fakamaau totonú, ka ʻoku ʻikai ke pehē ʻe he Tohi Tapú ko e ʻOtuá ko e mālohi, poto, pe fakamaau totonu. ʻOku pehē ia ai ko e ʻOtuá ko e ʻofa. Ko e hā hono ʻuhingá? Koeʻuhi ʻoku lava moʻoni ke pehē ko e mālohi ʻo e ʻOtuá ʻoku malava ke ne ngāue pea ko ʻene fakamaau totonú mo e potó ʻokú ne tataki ʻa e founga ʻokú ne ngāue aí. Ka ko e ʻofa ʻa Sihová ʻoku ueʻi ia ke ngāué. Ko e ʻofá ʻokú ne tākiekina ʻa e meʻa kotoa ʻokú ne faí.

Neongo ʻoku ʻikai ke masiva ʻa Sihova ʻi ha meʻa, ko ʻene ʻofá naʻe ueʻi ia ke ne fakatupu ʻa e ngaahi meʻamoʻui poto, fakatouʻosi ʻi hēvani mo māmani, ʻa ia ʻoku lava ke maʻu ʻaonga mo fiefia ʻi heʻene ʻofá mo e tokangá. Naʻá ne teuteuʻi taʻesiokita ʻa e foʻi māmaní ko ha ʻapi feʻungamālie ki he faʻahinga ʻo e tangatá. Pea ʻokú ne hokohoko atu ke fakahāhā ki he kotoa ʻo e faʻahinga ʻo e tangatá ʻa e ʻofá ʻi heʻene “ʻai ke hopo ʻene laʻaá ki he fulikivanú mo e kakai leleí pea ʻokú ne ʻomai ʻa e ʻuhá ki he māʻoniʻoní mo e taʻemāʻoniʻoní.”​—Mātiu 5:45.

Tānaki atu ki aí, “Ko Sihová ʻoku manavaʻofa loloto ʻaupito mo mohu meesi.” (Sēmisi 5:11) ʻOkú ne fakahāhā ʻene ʻofá ki he faʻahinga ʻoku nau feinga loto-moʻoni ke ʻiloʻi ia mo ʻunuʻunu ofi kiate iá. ʻOku vakai ʻa e ʻOtuá ki he faʻahinga ko iá ʻi he tuʻunga tāutahá. Ko e moʻoni, “ʻokú ne tokanga mai kiate kimoutolu.”​—1 Pita 5:7.

ʻOku anga-fēfē ʻetau maʻu ʻaonga mei he ʻofa ʻa e ʻOtuá? ʻOku tau fiefia ʻi he fakaʻofoʻofa ʻo e tō ʻa e laʻaá. ʻOku tau saiʻia ʻi he fanongo ki he kata ʻa ha kiʻi pēpē. ʻOku tau houngaʻia ʻi he ʻofa ʻa ha mēmipa ofi ʻo e fāmilí. Ko e ngaahi meʻa ko ení ʻoku ʻikai ko ha fiemaʻu pau ka ʻokú ne ʻai ʻe ia ke fakamānako ʻetau moʻuí.

ʻOku tau toe maʻu ha ʻaonga ʻe taha mei hono fakahāhā ʻe he ʻOtuá ʻa e ʻofá: ko e lotú. ʻOku ekinaki mai ʻe he Tohi Tapú: “ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá.” ʻI he hangē ha tamai ʻofá, ʻokú ne loto mai ke tau hanga kiate ia ki ha tokoni ki he ngaahi meʻa ʻoku tau hohaʻa lahi taha ki aí. Ko Sihova leva, ʻi heʻene ʻofa taʻesiokitá, ʻokú ne talaʻofa ke tokonaki ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.”​—Filipai 4:6, 7.

Kuo hanga ʻe he lāulea nounou ko eni ki he ngaahi ʻulungaanga tuʻu-ki-muʻa ʻo e ʻOtuá​—hangē ko hono mālohí, potó, fakamaau totonú, mo e ʻofá—​ʻo tokoniʻi koe ke ke maʻu ʻa e vakai totonu ange pe ko e tokotaha fēfē ʻa e ʻOtuá? Ke fakalahi atu hoʻo houngaʻia ʻi he ʻOtuá, ʻoku mau fakaafeʻi koe ke ke ako ki he meʻa kuó ne faí mo ia ʻoku te u ke ne faí ke ke maʻu ʻaonga mei ai.