1. Ko e hā ‘a e vakai ‘a e kakai tokolahi ki he ngāué?

‘OKU anga-fēfē ‘a e vakai ‘a e kakai tokolahi taha ‘i he feitu‘u ‘okú ke nofo aí ki he ngāué? ‘I he ngaahi fonua ‘e ni‘ihi, ‘oku ngāue mālohi ange mo lōloa ange ‘a e kakaí ‘i ha toe taimi ki mu‘a. Ko e kakai ‘oku tōtu‘a ‘enau ngāué ‘oku nau fa‘a femo‘uekina ‘o ‘ikai ai ke nau mālōlō, fakamoleki ha taimi mo honau fāmilí pe fakalato ‘enau fiema‘u fakalaumālié. (Tml. 2:23) ‘I he tafa‘aki ‘e tahá, ‘oku ‘i ai ‘a e kakai ‘e ni‘ihi ‘oku ‘ikai pē ke nau sai‘ia ke ngāue pea kumi kalofanga ki he ‘ikai ke nau ngāué.—Pal. 26:13, 14.

2-3. Ko e hā ‘a e fa‘ifa‘itaki‘anga na‘e fokotu‘u mai ‘e Sihova mo Sīsū fekau‘aki mo e ngāué?

² ‘I he kehe mei he vakai ‘ikai mafamafatatau ‘a e māmaní, fakakaukau ki he anga ‘o e vakai ‘a Sihova mo Sīsuú. ‘Oku ‘ikai toe ala fehu‘ia ko Sihova ko ha tokotaha ngāue. Na‘e fakamahino ia ‘e Sīsū ‘i he‘ene pehē: “Kuo ngāue ma‘u ai pē ‘eku Tamaí ‘o a‘u mai ki he taimí ni, pea ‘oku ou ngāue ma‘u ai pē.” (Sione 5:17) Fakakaukau ki he ngāue kotoa na‘e fai ‘e he ‘Otuá ‘i hono fakatupu ‘a e ngaahi me‘amo‘ui laumālie ta‘efa‘alauá mo e ‘univeesi kāfakafá. ‘Oku tau toe sio ki he fakamo‘oni fe‘unga‘ānoa ‘o e ngaahi ngāue fakaefakatupu ‘a e ‘Otuá ki he māmani faka‘ofo‘ofa ‘oku tau nofo aí. Na‘e mo‘oni ‘a e pehē ‘e he tokotaha-tohi-sāmé: “He lahi mo‘oni ē ko ho‘o ngaahi ngāué, ‘e Sihova! Kuó ke ngaohi kotoa kinautolu ‘i ho potó. ‘Oku fonu ‘a e māmaní ‘i he me‘a kuó ke ngaohí.”—Saame 104:24.

³ Na‘e fa‘ifa‘itaki ‘a Sīsū ki he‘ene Tamaí. Ko e ‘Aló, ‘a e tokotaha ko potó, na‘á ne kau fakataha mo e ‘Otuá ‘i hono “teuteu ‘a e langí.”  Na‘á ne ‘i he tafa‘aki ‘o Sihová “ko ha tufunga pōto‘i.” (Pal. 8:27-31) Ki mui ‘aupito ai, ‘i he ‘i māmani ‘a Sīsuú, na‘á ne fai ‘a e ngāue tu‘u-ki-mu‘a. Na‘e hangē ‘a e ngāue ko iá ko ha me‘akai kiate ia, pea ko ‘ene ngaahi ngāué na‘e fakamo‘oni‘i ai na‘e fekau‘i mai ia ‘e he ‘Otuá.—Sione 4:34; 5:36; 14:10.

4. Ko e hā ‘e lava ke tau ako meia Sihova mo Sīsū fekau‘aki mo e mālōloó?

⁴ ‘I he fa‘ifa‘itaki‘anga na‘e fokotu‘u mai ‘e Sihova mo Sīsū ‘i he ngāue mālohí ‘oku ‘uhinga iá ‘oku ‘ikai fiema‘u ia ke tau mālōlō? ‘Ikai ‘aupito. ‘Oku ‘ikai ‘aupito ke hela‘ia ‘a Sihova, ko ia ‘oku ‘ikai fiema‘u ia ke ne mālōlō. ‘Oku pehē ‘i he Tohi Tapú ‘i he hili hono fakatupu ‘e Sihova ‘a e langí mo e māmaní, “na‘e tuku ai ‘ene ngāué peá ne mālōlō.” (‘Eki. 31:17) Kae kehe, ‘oku hā mahino ‘oku ‘uhinga iá na‘e ki‘i tuku ‘e Sihova ‘ene ngāue fakaefakatupú pea vahe‘i ha taimi ke fiefia ‘i he me‘a na‘á ne ngaohí. Pea neongo na‘e ngāue mālohi ‘a Sīsū ‘i he‘ene ‘i māmaní, na‘á ne kei vahe‘i pē ‘a e taimi ke mālōlō pea kai fakataha mo hono kaungāme‘á.—Māt. 14:13; Luke 7:34.

5. Ko e hā ‘oku fāinga ‘a e tokolahi mo iá?

⁵ ‘Oku fakalototo‘a‘i ‘e he Tohi Tapú ‘a e kakai ‘a e ‘Otuá ke nau ngāue. Ko ‘ene kau sevānití ‘oku totonu ke nau ngāue mālohi kae ‘ikai ko e fakapikopiko. (Pal. 15:19) Mahalo ‘okú ke ngāue fakamāmani ke tokanga‘i ho fāmilí. Pea ko e kau ākonga kotoa ‘a Kalaisí ‘oku nau ma‘u ‘a e fatongia ke kau ‘i he ngāue malanga‘i ‘o e ongoongo leleí. Neongo ia, ‘oku fiema‘u foki ke ke ma‘u ha mālōlō fe‘unga. ‘Okú ke fāinga ‘i he taimi ‘e ni‘ihi ke ‘ai ke mafamafatatau ho taimi ki he ngāue fakamāmaní, ngāue fakafaifekaú mo e mālōloó? ‘Oku tau ‘ilo fēfē ‘a e lahi ‘o e taimi ke ngāué mo e taimi ke mālōlō aí?

6. ‘Oku anga-fēfē hono fakahaa‘i ‘i he Ma‘ake 6:30-34 na‘e ma‘u ‘e Sīsū ha vakai mafamafatatau ki he ngāué mo e mālōloó?

⁶ ‘I he fekau‘aki mo e ngāué, ko e mafamafatataú ‘oku mahu‘inga. Na‘e fakamānava‘i ‘a Tu‘i Solomone ke ne tohi: “‘Oku ‘i ai ha taimi ki he . . . ngāue kotoa pē.” Na‘á ne lave ki he tō, langa hake, kata, me‘e, pea mo e ngaahi ngāue kehe. (Tml. 3:1-8) ‘Oku hā mahino, ko e tafa‘aki mahu‘inga ‘e ua ‘o e mo‘uí ko e ngāue mo e mālōlō. Na‘e ma‘u ‘e Sīsū ha vakai mafamafatatau ki he ngāué mo e mālōloó. ‘I he taimi ‘e taha, na‘e foki ‘a e kau ‘apositoló mei ha fononga fakamalanga. Na‘a nau fu‘u femo‘uekina ‘o “‘ikai ai hanau taimi ‘atā ‘o a‘u ki hano ma‘u ha me‘atokoni.” Na‘e pehē ‘e Sīsū: “Mou ha‘u, ‘a kimoutolu pē, ki ha potu lala ‘o ki‘i mālōlō.” (Lau ‘a e Ma‘ake 6:30-34.) Neongo ko ia mo ‘ene kau ākongá na‘e ‘ikai malava ma‘u pē ke nau ma‘u ha mālōlō fe‘unga, na‘e ‘ilo‘i ‘e Sīsū na‘e fiema‘u ke nau mālōlō kotoa.

7. ‘E lava fēfē ke tokoni‘i kitautolu ‘e he lāulea ki he lao ‘o e Sāpaté?

⁷ ‘I he taimi ‘e ni‘ihi, ‘oku fiema‘u mo‘oni ha mālōlō pe ko ha fenga‘unu‘aki. ‘Oku lava ke tau vakai ki ai ‘i ha fokotu‘utu‘u na‘e fai ‘e he ‘Otuá ma‘a hono kakai ‘i he kuonga mu‘á—ko e Sāpate fakauiké. ‘Oku ‘ikai ke tau ‘i he malumalu ‘o e Lao ‘a Mōsesé, neongo ia ‘e lava ke tau ma‘u ‘aonga mei he lāulea ki he me‘a na‘e lea‘aki fekau‘aki mo e Sāpaté. Ko e me‘a ‘oku tau akó ‘e lava ke tokoni‘i ai kitautolu ke sivisivi‘i ‘etau vakai ki he ngāué mo e mālōloó.

8. Fakatatau ki he ‘Ekisoto 31:12-15, ko e Sāpaté ko ha ‘aho ‘o e hā?

⁸ ‘Oku pehē ‘e he Folofola ‘a e ‘Otuá hili ‘a e “‘aho” hono ono ‘o e fakatupú, na‘e mālōlō ‘a e ‘Otuá mei he‘ene ngāue ki he māmaní. (Sēn. 2:2) Neongo ia, ‘oku sai‘ia ‘a Sihova ‘i he ngāué pea kuó ne “ngāue ma‘u ai pē” ‘i he ngaahi founga kehé. (Sione 5:17) Ko e Sāpate fakauiké na‘e muimui ia ki ha sīpinga meimei tatau mo e ‘aho mālōlō ko ia ‘a Sihova ‘oku fakamatala‘i ‘i he Sēnesí. Na‘e pehē ‘e he ‘Otuá ko e Sāpaté ko ha faka‘ilonga ia ‘i hono vaha‘á mo e kau ‘Isilelí. Ko ha  ‘aho ia ‘o e “mālōlō faka‘aufuli . . . , ko ha me‘a ia ‘oku mā‘oni‘oni kia Sihova.” (Lau ‘a e ‘Ekisoto 31:12-15.) Ko hono tapui ‘a e ngāué na‘e tatau ki he tokotaha kotoa kau ai ‘a e fānau, kau pōpula, pea na‘a mo e fanga manu lalatá. (‘Eki. 20:10) Na‘e faka‘atā ai ki he kakaí ke nau tokanga lahi ange ki he ngaahi me‘a fakalaumālié.

9. Ko e hā ‘a e vakai ‘ikai mafamafatatau fekau‘aki mo e Sāpaté ‘i he ‘aho ‘o Sīsuú?

⁹ Ko e ‘aho Sāpaté na‘e lelei ki he kakai ‘a e ‘Otuá; kae kehe, ko e tokolahi ‘o e kau taki lotu ‘i he taimi ‘o Sīsuú na‘a nau vakai ki ai ‘o fu‘u tōtu‘a. Na‘a nau taukave‘i na‘e ‘ikai ngofua ke paki ‘a e uité ‘i he Sāpaté pe fakamo‘ui ha tokotaha na‘e puke. (Mk. 2:23-27; 3:2-5) Ko e ngaahi vakai ko iá na‘e ‘ikai tapua atu ai ‘a e fakakaukau ‘a e ‘Otuá, pea na‘e fakamahino ia ‘e Sīsū ki he fa‘ahinga ‘e fanongó.

10. Ko e hā ‘oku lava ke tau ako mei he Mātiu 12:9-12 fekau‘aki mo e vakai ‘a Sīsū ki he Sāpaté?

¹⁰ Na‘e tauhi ‘e Sīsū mo hono kau muimui Siú ‘a e Sāpaté koe‘uhi na‘a nau ‘i he malumalu ‘o e Lao ‘a Mōsesé. * Ka na‘e fakahaa‘i ‘e Sīsū ‘i he‘ene leá mo e ngāué ko hono tauhi ‘o e Sāpaté na‘e mafamafatatau pea na‘e ngofua pē ke fai ha ngāue ‘aonga mo anga-lelei. Na‘á ne fakahaa‘i mahino: “‘Oku ngofua ke fai ha me‘a lelei ‘i he Sāpaté.” (Lau ‘a e Mātiu 12:9-12.) Na‘e ‘ikai ke ne vakai ki hono fai ‘a e ngāue ‘aonga mo anga-leleí ko hano maumau‘i ia ‘a e Sāpaté. Ko e ngāue ‘a Sīsuú na‘e fakamamafa‘i ai ha tafa‘aki tefito ‘o e Sāpaté. Koe‘uhi na‘e mālōlō ‘a e kakai ‘a e ‘Otuá mei he‘enau ngāue faka‘ahó, na‘e malava ke nau  tokangataha ai ki he ngaahi me‘a fakalaumālié. Na‘e tupu hake ‘a Sīsū ‘i ha fāmili kuo pau pē ko e ‘aho Sāpaté na‘a nau ngāue‘aki ia ki he lotu ki he ‘Otuá. Na‘e tapua mai eni ‘i he me‘a ‘oku tau lau fekau‘aki mo Sīsū ‘i he taimi na‘á ne ‘i hono kolo ko Nāsaletí: “Fakatatau ki he me‘a na‘á ne [Sīsū] anga ki ai ‘i he ‘aho Sāpaté, na‘á ne hū ki he sinakoké pea na‘á ne tu‘u hake ke lau ‘a e Folofolá.”—Luke 4:15-19.

11. Ko e hā ‘a e fa‘ifa‘itaki‘anga lelei na‘e fokotu‘u mai ‘e Sīsū fekau‘aki mo e ngāué?

¹¹ Na‘e ma‘u mo‘oni ‘e Siosifa ‘a e vakai ‘a e ‘Otuá fekau‘aki mo e ngāué ‘i he‘ene ako‘i ‘a Sīsū, ‘a hono foha ohí, ke hoko ko ha tufunga. (Māt. 13:55, 56) Pea kuo pau pē na‘e sio ‘a Sīsū ki he ngāue mālohi ‘a Siosifá ‘i he ‘aho ki he ‘aho ke poupou‘i hono fāmili tokolahí. Ko e me‘a ‘oku fakatupu tokangá, na‘e tala ‘e Sīsū ki mui ai ki he‘ene kau ākongá: “‘Oku taau ‘a e tokotaha ngāué mo ‘ene totongí.” (Luke 10:7) ‘Io, na‘e maheni pē ‘a Sīsū ia mo e ngāue mālohí.

12. Ko e hā ‘a e konga Tohi Tapu ‘oku fakahaa‘i ai ‘a e lau ‘a e Tohi Tapú fekau‘aki mo e ngāue mālohí?

¹² Na‘e meimei tatau pē mo e ‘apositolo ko Paulá. Ko ‘ene ngāue tefitó ko e faifakamo‘oni fekau‘aki mo e huafa ‘o Sīsuú mo ‘ene pōpoakí. Ka, na‘e ngāue ‘a Paula ke poupou‘i ‘a ia tonu. Na‘e lāu‘ilo ‘a e kau Tesalonaiká ki he‘ene “ngāue mālohi mo e fakaongosia,” ko ‘ene “ngāue . . . ‘i he pō mo e ‘aho” koe‘uhí ke ‘oua na‘a ne hilifaki “ha kavenga fakamole lahi” ki ha taha. (2 Tes. 3:8; Ngā. 20:34, 35) ‘I he lave ‘a Paula ki he‘ene ngāué mahalo pē na‘á ne ‘uhinga ki he ngaohi-tēnití. ‘I he‘ene ‘i Kolinitoó, na‘á ne nofo mo ‘Akuila mo Pīsila “‘o nau ngāue, he ko kinautolú ko e kau ngaohi-tēniti.” Ko e ngāue ‘a Paula “‘i he pō mo e ‘aho” na‘e ‘ikai ‘uhinga ia na‘á ne ngāue ta‘emālōlō. Na‘á ne mālōlō mei he ngaohi-tēnití, hangē ko e Sāpaté. Na‘á ne ma‘u ‘i he ‘aho ko iá ha faingamālie ke faifakamo‘oni ki he kau Siú, ‘a ia na‘e ‘ikai foki ke nau ngāue ‘i he Sāpaté.—Ngā. 13:14-16, 42-44; 16:13; 18:1-4.

13. Ko e hā ‘oku lava ke tau ako mei he fa‘ifa‘itaki‘anga ‘a Paulá?

¹³ Na‘e fokotu‘u ‘e he ‘apositolo ko Paulá ha fa‘ifa‘itaki‘anga lelei. Na‘e pau ke ne ngāue fakamāmani; ka, na‘á ne fakapapau‘i ke kau ma‘u pē “‘i he ngāue toputapu ‘o e ongoongo lelei ‘a e ‘Otuá.” (Loma 15:16; 2 Kol. 11:23) Na‘á ne enginaki ki he ni‘ihi kehé ke nau fai pehē. Ko ia ai, ko ‘Akuila mo Pīsilá ko hono “ongo kaungāngāue ‘ia Kalaisi Sīsū.” (Loma 12:11; 16:3) Na‘e enginaki ‘a Paula ki he kau Kolinitoó ke nau “femo‘uekina ai pē ‘i he ngāue ‘a e ‘Eikí.” (1 Kol. 15:58; 2 Kol. 9:8) Na‘e a‘u ‘o fakamānava‘i ‘e Sihova ‘a e ‘apositolo ko Paulá ke ne tohi: “Kapau ‘oku ‘i ai ha taha ‘oku ‘ikai ke fie ngāue, ‘oua na‘a tuku ia ke ne kai.”—2 Tes. 3:10.

14. Ko e hā na‘e ‘uhinga ki ai ‘a Sīsū ‘i he‘ene lea ‘oku hiki ‘i he Sione 14:12?

¹⁴ Ko e ngāue mahu‘inga taha ‘i he ngaahi ‘aho faka‘osi ko ení ko e malangá mo e ngaohi ākongá. Ko hono mo‘oní, na‘e tomu‘a tala ‘e Sīsū ko ‘ene kau ākongá te nau fai ‘a e ngāue lahi ange ia ‘iate ia! (Lau ‘a e Sione 14:12.) Na‘e ‘ikai ke ne ‘uhingá te tau fai ‘a e ngaahi mana ‘o hangē ko iá. ‘I hono kehé, ko hono kau muimuí te nau malanga mo faiako ‘i ha feitu‘u ngāue lahi ange, ki ha kakai tokolahi ange, pea ‘i ha vaha‘a taimi lōloa ange ‘iate ia.

15. Ko e hā ‘a e ngaahi fehu‘i ‘oku totonu ke tau ‘eke hifó, pea ko e hā hono ‘uhingá?

¹⁵ Kapau ‘okú ke ngāue fakamāmani, ‘eke hifo ‘a e fehu‘i ko ení: ‘‘Oku ‘ilo‘i au he ngāue‘angá ko ha tokotaha ngāue mālohi? ‘Oku ou fakakakato taimi totonu ‘eku ngāué pea fai ‘a e lelei taha ‘o ‘eku malavá?’ Kapau ko ho‘o talí ko e ‘io, ‘oku ngalingali leva ‘oku falala atu kiate koe ‘a ho pule ngāué. Te ke ‘ai foki ai ‘a e pōpoaki ‘o e Pule‘angá ke fakamānako ange ki he fa‘ahinga ‘i he ngāue‘angá. ‘I he‘ene ha‘u ki he ngāue fakamalangá mo e faiakó, ‘eke hifo ‘a e ngaahi fehu‘i ko ení: ‘‘Oku ‘ilo‘i au ko ha tokotaha ngāue mālohi ‘i he ngāue fakafaifekaú? ‘Oku ou teuteu lelei ki he ‘uluaki ‘a‘ahí? ‘Oku ou foki vave ke talanoa  mo e kakai mahu‘inga‘iá? Pea ‘oku ou kau tu‘uma‘u ‘i he ngaahi tafa‘aki kehekehe ‘o e ngāue fakafaifekaú?’ Kapau ko ho‘o talí ko e ‘io, te ke fiefia ‘i ho‘o ngāué.

16. Ko e hā ‘a e kehekehe ‘i he vakai ‘a Sīsū mo ‘ene kau ‘apositoló ki he mālōloó mei he tokolahi ‘i he ‘ahó ni?

¹⁶ Na‘e ‘ilo‘i ‘e Sīsū ‘i he taimi ‘e ni‘ihi ko ia mo ‘ene kau ‘apositoló na‘e fiema‘u ke nau mālōlō. Kae kehe, ko e kakai tokolahi ‘i he taimi ko iá mo e ‘ahó ni ‘oku lava ke fakatatau kinautolu ki he tangata koloa‘ia ‘i he talanoa fakatātā ‘a Sīsuú. Na‘e tuipau ‘a e tangata ko iá: “Te u mālōlō ā ‘o kai, inu, mo fiefia.” (Luke 12:19; 2 Tīm. 3:4) Na‘á ne tuku taha hono lotó ‘i he mālōloó mo e mālié. ‘I hono kehé, ko Sīsū mo ‘ene kau ‘apositoló na‘e ‘ikai ke nau fakatefito ‘enau mo‘uí ‘i hono fakahōhō‘ia‘i kinautolú.

17. ‘Oku anga-fēfē ‘etau ngāue‘aki ‘a e taimi ‘oku tau mālōlō ai mei he ngāue fakamāmaní?

¹⁷ ‘I he ‘ahó ni, ‘oku tau feinga ke fa‘ifa‘itaki kia Sīsū ‘aki ‘a e ‘ikai ngata pē ‘etau mālōlō ‘i he taimi ‘oku ‘ikai ke tau ngāue aí ka ‘oku tau toe fai foki ‘a e me‘a ‘oku lelei ‘aki ‘a e faifakamo‘oni ki he ni‘ihi kehé pea ma‘u ‘a e ngaahi fakataha faka-Kalisitiané. Ko hono mo‘oní, ko e ngaohi ākongá mo e ma‘u fakatahá ‘oku mātu‘aki mahu‘inga kiate kitautolu ko ia ‘oku tau feinga lahi ke kau tu‘uma‘u ‘i he ngaahi ngāue toputapu ko iá. (Hep. 10:24, 25) Na‘a mo e taimi ‘oku tau mālōlō ‘eve‘eva aí, ‘oku tau pipiki ki he‘etau taimi-tēpile fakalaumālie ‘o hono ma‘u ‘a e ngaahi fakatahá ‘o tatau ai pē pe ‘oku tau ‘i fē, pea ‘oku tau kumi ki ha faingamālie ke faifakamo‘oni ki he fa‘ahinga ‘oku tau fetaulaki mo iá.—2 Tīm. 4:2.

18. Ko e hā ‘oku loto ‘a hotau Tu‘í, ‘a Kalaisi Sīsū, ke tau faí?

¹⁸ He hounga‘ia ē ko kitautolu ‘i hotau Tu‘í, ‘a Kalaisi Sīsū, ‘okú ne faka‘atu‘i pea tokoni‘i kitautolu ke ma‘u ‘a e vakai mafamafatatau ki he ngāué mo e mālōloó! (Hep. 4:15) ‘Okú ne loto ke tau ma‘u ha mālōlō fe‘unga. ‘Okú ne loto foki ke tau ngāue mālohi ke tokonaki ‘etau ngaahi fiema‘u fakaesinó pea kau ‘i he ngāue fakaivifo‘ou ‘o e ngaohi ākongá. ‘I he kupu hono hokó, te tau lāulea ai ki he ngafa ‘o Sīsū ‘i he‘ene fakatau‘atāina‘i kitautolu mei ha founga anga-fakamamahi ‘o e pōpulá.