1, 2. (a) Ko e hā ʻa e ʻīsiu mahuʻinga ʻoku kaunga ki ai ʻa e faʻahinga kotoa ʻo e tangatá? (e) Ko e hā ʻoku mahuʻinga ai kiate kitautolu ʻa e ʻīsiu ko ení?

 KI HE kakai tokolahi ʻi he ʻahó ni, ko e paʻangá ʻa e ʻīsiu mahuʻingá. Ko e meʻa ia ʻoku nau fakakaukau mo hohaʻa ki aí. ʻOku nau fakamoleki honau taimí ʻi he feinga ke maʻu ha paʻanga lahi ange pe tokangaʻi ʻa e paʻanga kuo nau maʻú. Ki he kakai ʻe niʻihi, ko e ʻīsiu mahuʻinga taha kiate kinautolú ko honau fāmilí, moʻui leleí pe ko e ngaahi meʻa ʻoku nau loto ke lavaʻi ʻi he moʻuí.

² ʻOku ʻi ai ha ʻīsiu ʻoku mahuʻinga ange ia ʻi ha taha pē ʻo e ngaahi meʻá ni. Ko e ʻīsiu ko iá ko e fakatonuhiaʻi ʻa e tuʻunga-hau ʻo Sihová. ʻOku mātuʻaki mahuʻinga ke ʻoua ʻaupito naʻa tuku ʻetau tokangataha ki he ʻīsiu ko ení. Kapau ʻe ʻikai ke tau tokanga, ʻe lava ke tau fuʻu femoʻuekina ʻi heʻetau ngaahi ngāue fakaʻahó pe hohaʻa lahi ki heʻetau ngaahi palopalemá tonu ʻo ngalo ʻiate kitautolu ʻa e mahuʻinga ʻo e ʻīsiu. Kapau te tau poupouʻi ʻa e tuʻunga-hau ʻo Sihová, te tau ʻi ha tuʻunga lelei ange ke fekuki mo e ngaahi palopalema ʻi heʻetau moʻui fakaʻahó, pea te tau ʻunuʻunu ofi ange ai kia Sihova.

3. Ko e hā ʻoku taukaveʻi ʻe Sētane ʻo fekauʻaki mo e tuʻunga-pule ʻa e ʻOtuá?

³ Naʻe langaʻi ʻe Sētane ko e Tēvoló ʻa e fehuʻi pe ʻoku maʻu ʻe  Sihova ʻa e totonu ko ia ke pulé. ʻOku fiemaʻu ʻe Sētane ke fakakaukau ʻa e faʻahinga ʻo e tangatá ko Sihová ko ha Pule kovi pea ʻoku ʻikai ke Ne loto ke tau maʻu ʻa e lelei tahá. Naʻe fakahuʻunga ʻa Sētane ʻe fiefia ange ʻa e kakaí kapau te nau pule pē kiate kinautolu. (Sēn. 3:1-5) Naʻá ne toe fakahuʻunga ʻo pehē heʻikai ha tangata ia ʻe mateaki moʻoni ki he ʻOtuá pea kapau ʻe hoko ʻa e moʻuí ʻo fuʻu faingataʻa, ʻe talitekeʻi Ia ʻe ha taha pē ʻi hono tuʻunga ko e Pulé. (Siope 2:4, 5) Ko ia ʻoku fakaʻatā ʻe Sihova ʻa e taimi ke fakamāʻalaʻala ai ki he tokotaha kotoa ko e moʻui ʻo taʻekau ai ʻa e ʻOtuá ko e Pulé ʻe fakamamahi.

4. Ko e hā kuo pau ai ke fakaleleiʻi ʻa e ʻīsiu ʻo e tuʻunga-haú?

⁴ Ko e moʻoni, ʻoku ʻafioʻi ʻe Sihova ʻoku loi ʻa e ngaahi tukuakiʻi ʻa e Tēvoló. Ko ia ko e hā naʻá ne fakaʻatā ai ʻa e taimi kia Sētane ke feinga ke fakamoʻoniʻi ʻene poiní? Ko e talí ʻoku kaunga ia ki he tokotaha kotoa, fakatouʻosi ʻi hēvani mo māmani. (Lau ʻa e Saame 83:18.) Naʻe talitekeʻi ʻe ʻĀtama mo ʻIvi ʻa e tuʻunga-pule ʻo Sihová, pea pehē ki he tokolahi kehe talu mei ai. ʻOku lava ke ʻai heni ke fakakaukau ha niʻihi ʻoku moʻoni ʻa e Tēvoló. ʻI he kei tuʻu taʻefakaleleiʻi ʻa e ʻīsiu ʻi he ʻatamai ʻo e faʻahinga ʻo e tangatá pe ko e kau ʻāngeló, heʻikai lava ke maʻu ai ʻa e melino moʻoní mo e fāʻūtahá. Ka ʻi he hili hono fakatonuhiaʻi ʻa e tuʻunga-hau ʻo Sihová, ʻe moʻui taʻengata ʻa e tokotaha kotoa pē ʻi he malumalu ʻo ʻene pule fakaofó. ʻE ʻi ai ʻa e melino ʻi he kotoa ʻo e ʻunivēsí.—ʻEf. 1:9, 10.

5. ʻOku anga-fēfē ʻetau kau ki he ʻīsiu ʻo e tuʻunga-haú?

⁵ ʻE fakatonuhiaʻi ʻa e tuʻunga-hau ʻo Sihová, pea ko e founga pule ʻa Sētane mo e faʻahinga ʻo e tangatá ʻe ʻikai ʻaupito ke lavameʻa pea ʻe toʻo atu ia. Ko e founga pule ʻa e ʻOtuá ʻo fakafou ʻi hono Puleʻanga faka-Mīsaiá ʻe lavameʻa. ʻE fakamoʻoniʻi ai ʻe he kakai faitōnungá ʻoku kei lava pē ʻa e faʻahinga ʻo e tangatá ʻo tauhi maʻu ʻenau anga-tonú pea poupou mateaki ki he tuʻunga-pule ʻa e ʻOtuá. (ʻAi. 45:23, 24) ʻOku tau loto ke ʻi he haʻohaʻonga ʻo e faʻahinga faitōnunga ko ení? ʻIo! Ko ia, ʻoku fiemaʻu ke tau mahinoʻi ʻa e mahuʻinga moʻoni ʻo e ʻīsiu ko ení.

6. ʻOku mahuʻinga fēfē hono fakatonuhiaʻi ʻa e tuʻunga-hau ʻo Sihová?

⁶ Ko hono fakatonuhiaʻi ʻa e tuʻunga-hau ʻo Sihová ʻoku mahuʻinga ange ia ʻi heʻetau fiefia fakafoʻituituí. Ka ʻoku ʻikai ke ʻuhinga iá ʻoku ʻikai ke mahuʻinga hotau fakamoʻuí pe ʻoku ʻikai ke tokanga moʻoni mai ʻa Sihova kiate kitautolu. ʻOku anga-fēfē ʻetau ʻiloʻi ení?

7, 8. Ko e hā ʻa e ʻaonga te tau maʻu ʻi hono fakatonuhiaʻi ʻa e tuʻunga-hau ʻo e ʻOtuá?

⁷ ʻOku ʻofa lahi ʻaupito ʻa Sihova ʻi he faʻahinga ʻo e tangatá. Ko hono moʻoní, ʻoku tau mahuʻinga ʻaupito kiate ia he naʻá ne foaki mai hono ʻAló kae lava ke tau maʻu ʻa e moʻui taʻengatá. (Sione 3:16; 1 Sio. 4:9) Kapau naʻe ʻikai ke fai ʻa Sihova ki heʻene ngaahi talaʻofa ki hotau kahaʻú, ʻe moʻoni leva ʻa Sētane mo e kau fakafepaki kehé. ʻOku taukaveʻi ʻe Sētane ko Sihová ko ha tokotaha loi ʻa ia ʻokú ne taʻofi ʻa e ngaahi meʻa lelei mei he faʻahinga ʻo e tangatá peá ne pule ʻi ha founga taʻetotonu. ʻOku fakakataʻaki ʻe he kau fakafepakí ʻa e ngaahi talaʻofa ʻa Sihová pea nau pehē: “Ko fē ʻa ʻene ʻi heni ʻa ia naʻe talaʻofaʻakí? Ko e talu ē mei he ʻaho naʻe mohe ai ʻetau fanga kuí ʻi he maté, ʻoku kei hokohoko atu pē ʻa e kotoa ʻo e ngaahi meʻá ʻo hangē tofu pē ko ia talu mei he kamataʻanga ʻo e fakatupú.” (2 Pita 3:3, 4) Ka ʻe fai ʻa Sihova ki heʻene ngaahi talaʻofá. Kuó ne fakapapauʻi ko e fakatonuhiaʻi hono tuʻunga-haú ʻe kau ai ʻa hono fakamoʻui ʻa e faʻahinga talangofua ʻo e tangatá. (Lau ʻa e ʻAisea 55:10, 11.) Ko e tuʻunga-hau ʻo Sihová ʻoku makatuʻunga ia ʻi he ʻofa. ʻI heʻene peheé ʻoku lava ai ke tau fakapapauʻi ʻokú ne ʻofa mo fakamahuʻingaʻi maʻu pē ʻene kau sevāniti mateakí.—ʻEki. 34:6.

⁸ Ko e moʻoniʻi meʻa ko ia ʻo e hoko ʻa e  tuʻunga-hau ʻo Sihová ko ha ʻīsiu mahuʻingá ʻoku ʻikai ke ʻuhinga iá ʻoku ʻikai mahuʻinga kiate ia ʻa hotau fakamoʻuí. ʻOku tokanga lahi mai ʻa Sihova kiate kitautolu. ʻOku fiemaʻu ke tauhi maʻu ʻi heʻetau fakakaukaú ʻa e meʻa ʻoku mahuʻinga angé pea poupou mateaki ki he tuʻunga-pule ʻo Sihová.

9. Ko e hā naʻe leaʻaki ʻe Sētane ʻo kau kia Siopé? (Sio ki he ʻuluaki fakatātā ʻi he kupú ni.)

⁹ ʻOku mahuʻinga ke tau maʻu ha fakakaukau totonu ʻo fekauʻaki mo e tuʻunga-hau ʻo Sihová. ʻOku lava ke tau ʻiloʻi eni mei hono lau ʻa e tohi ʻa Siopé, ko e taha ʻi he ʻuluaki tohi naʻe hiki ʻi he Tohi Tapú. ʻOku tau lau ai ʻa hono taukaveʻi ʻe Sētane kapau ʻe faingataʻaʻia lahi ʻa Siope, te ne siʻaki ʻa e ʻOtuá. Naʻe aʻu ʻo kole ʻa Sētane ki he ʻOtuá ke ʻai ʻa Siope ke ne faingataʻaʻia. Heʻikai ke fai ia ʻe Sihova, ka naʻá ne fakaʻatā ʻa Sētane ke ne ʻahiʻahiʻi ʻa Siope ʻaki ʻene pehē: “Ko e meʻa kotoa pē ʻokú ne maʻú ʻoku ʻi ho nimá ia.” (Lau ʻa e Siope 1:7-12.) Taimi nounou mei ai, naʻe mole meia Siope ʻene kau sevānití mo ʻene koloá. Peá ne toe ʻiloʻi ko ʻene fānau ʻe toko hongofulú naʻa nau mate ʻi ha tuʻunga fakamamahi. Naʻe ʻai ʻe Sētane ke hā ngali ko e ʻOtuá naʻá ne fakatupunga ʻa e ngaahi meʻa fakamamahi ko ení. (Siope 1:13-19) Hokó, naʻe ʻai ʻe Sētane ʻa Siope ke ne puke lahi ʻi ha mahaki naʻe langa mo palakū. (Siope 2:7) Ke ʻai ke toe kovi ange ʻa e tuʻungá, ko e uaifi tonu ʻo Siopé mo e ngaahi kaungāmeʻa loi ʻe toko tolú naʻa nau leaʻaki kotoa ʻa e meʻa naʻe fakamamahi mo fakalotosiʻi kiate ia.—Siope 2:9; 3:11; 16:2.

10. (a) Naʻe anga-fēfē hono fakahāhā ʻe Siope ʻene anga-tonu ki he ʻOtuá? (e) Ko e hā naʻe fiemaʻu ai ke fakatonutonu ʻa Siopé?

¹⁰ Naʻe moʻoni ʻa e meʻa naʻe taukaveʻi ʻe Sētané? ʻIkai. Neongo naʻe tofanga ʻa Siope ʻi he ngaahi meʻa fakamamahi fakaʻulia, naʻe ʻikai ʻaupito ke ne siʻaki ʻa Sihova. (Siope 27:5) Ka naʻe ʻi ai ha kiʻi taimi naʻe ngalo ai ʻia Siope ʻa e meʻa naʻe mahuʻinga moʻoní pea naʻe lahi ange pē ʻene fakakaukau kiate iá. Naʻá ne toutou pehē naʻe ʻikai ke ne fai ha hala. Naʻe toe ongoʻi ʻe Siope naʻe totonu ke ne ʻilo ʻa e ʻuhinga naʻe faingataʻaʻia aí. (Siope 7:20; 13:24) ʻE lava nai ke tau mahinoʻi ʻa e ngaahi ongoʻi ʻa Siopé. Kae kehe, naʻe ʻiloʻi ʻe Sihova ʻa e hala ʻa e fakakaukau ʻa Siopé, pea naʻá ne fakatonutonu ʻa Siope. Naʻe anga-fēfē ʻene fai ení?

11, 12. Ko e hā naʻe tokoniʻi ʻe Sihova ʻa Siope ke ne houngaʻia aí? Naʻe anga-fēfē ʻa e tali ʻa Siope ki aí?

¹¹ ʻOku lava ke tau lau ʻa e meʻa naʻe tala ʻe Sihova kia Siopé ʻi he vahe 38 ki he 41 ʻo e tohi Siopé. Naʻe ʻikai ke fakamatalaʻi ʻe Sihova kia Siope ʻa e ʻuhinga naʻá ne faingataʻaʻia aí. ʻI hono kehé, naʻe loto ʻa Sihova ke tokoniʻi ia ke ne mahinoʻi ʻa ʻene siʻisiʻi fau ʻi hono fakahoa ki he ʻOtuá. Naʻá ne akoʻi kia Siope naʻe ʻi ai ʻa e  ngaahi ʻīsiu naʻe mahuʻinga mamaʻo ange ia ʻi he ngaahi palopalema tonu ʻa Siopé. (Lau ʻa e Siope 38:18-21.) Naʻe hoko ʻa e ngaahi lea ʻa Sihová ke tokoniʻi ai ʻa Siope ke fakatonutonu ʻene fakakaukaú

¹² Naʻe anga-kovi ʻa Sihova ʻi heʻene lea pehē kia Siopé he ko ē ʻokú ne faingataʻaʻia? ʻIkai, pea ko Siope tonu naʻe ʻikai ke ne fakakaukau pehē. Naʻe mahinoʻi mo fakamahuʻingaʻi ʻe Siope ʻa e akonaki ʻa Sihová. Naʻe aʻu ʻo ne pehē: “ʻOku ou fakafoki ai ʻa e meʻa naʻá ku leaʻakí, pea ʻoku ou fakatomala ʻi he efu mo e efuefu.” (Siope 42:1-6) Ki muʻa aí, naʻe toe tokoniʻi ʻa Siope ʻe ha kiʻi talavou ko ʻIlaiū ke fakatonutonu ʻene fakakaukaú. (Siope 32:5-10) ʻI he hili ʻa e fanongo ʻa Siope ki he faleʻi anga-ʻofa ʻa Sihová pea liliu ʻene fakakaukaú, naʻe ʻai ʻe Sihova ke ʻiloʻi ʻe he niʻihi kehé naʻá ne hōifua ki he faitōnunga ʻa Siopé.—Siope 42:7, 8.

13. Naʻe anga-fēfē hono tokoniʻi ʻa Siope ʻe he akonaki ʻa Sihová ʻi he hili ʻa hono ngaahi ʻahiʻahí?

¹³ Naʻe hokohoko atu ʻa e maʻu ʻaonga ʻa Siope mei he ngaahi akonaki ʻa Sihová naʻa mo e hili ʻa hono ngaahi ʻahiʻahí. “Naʻe tāpuakiʻi ʻe Sihova ʻa e konga ki mui ʻo e moʻui ʻa Siopé ʻo lahi ange ia ʻi he kamataʻangá.” ʻI he faai mai ʻa e taimí, naʻá ne maʻu ha “ngaahi foha ʻe toko fitu mo ha toe ngaahi ʻofefine ʻe toko tolu.” (Siope 42:12-14) Neongo naʻe ʻofa ʻa Siope ʻi he fānau ko ení, naʻá ne ongoʻi moʻoni ʻa e faʻahinga naʻa nau maté. Pea ngalingali naʻe ʻikai ʻaupito ke ngalo ʻiate ia ʻa e ngaahi meʻa fakalilifu naʻe hoko kiate ia mo hono fāmilí. Neongo kapau naʻe faifai atu pē ʻo ʻiloʻi ʻe Siope ʻa e ʻuhinga naʻá ne hokosia ai ʻa e ngaahi ʻahiʻahí, naʻá ne fifili nai ki he ʻuhinga naʻe fakaʻatā ai ʻe he ʻOtuá ke ne faingataʻaʻia lahí. Kapau naʻe maʻu ʻe Siope ha ngaahi fakakaukau pehē, naʻe mei lava ke ne manatuʻi ʻa e meʻa naʻe tala ange ʻe Sihova kiate iá. Naʻe mei fakafiemālieʻi ai ia pea tokoniʻi ia ke ne maʻu ʻa e fakakaukau totonú.—Saame 94:19, fakamatala ʻi lalo.

14. Ko e hā ʻoku lava ke tau ako mei he hokosia ʻa Siopé?

¹⁴ Ko e fakalaulauloto ki he meʻa naʻe hoko kia Siopé, ʻoku lava ke tokoniʻi ai kitautolu ke fakatonutonu ʻetau fakakaukaú pea lava ke fakafiemālieʻi ai kitautolu. Ko e tohi Siopé ko e konga ia ʻo e lēkooti naʻe hiki ʻe Sihova “ko hotau fakahinohino, koeʻuhí ke tau lava fakafou ʻi heʻetau kātakí pea fakafou ʻi he fakafiemālie mei he Folofolá ke tau maʻu ai ha ʻamanaki.” (Loma 15:4) ʻOku akoʻi ai kitautolu ʻoku totonu ke ʻoua te tau fakakaukau tōtuʻa ki heʻetau ngaahi palopalemá ʻo tuku ai ʻetau fakakaukau fekauʻaki mo hono fakatonuhiaʻi ʻa e tuʻunga-hau ʻo Sihová. Hangē ko Siopé, ʻoku fakahaaʻi ʻetau poupou ki he tuʻunga-hau ʻo Sihová ʻaki ʻetau faitōnunga ai pē kiate ia naʻa mo e taimi ʻoku faingataʻa ai ʻa e moʻuí.

15. Ko e hā ʻoku hoko ʻi heʻetau faitōnunga lolotonga ʻetau fehangahangai mo e ngaahi palopalemá?

¹⁵ Ko e hokosia ʻa Siopé ʻoku lava ke ne  fakafiemālieʻi kitautolu, koeʻuhí ʻoku fakahaaʻi ai ʻoku ʻikai ke ʻuhinga ʻa e ngaahi ʻahiʻahí ʻoku houhau ʻa Sihova ʻiate kitautolu. ʻOku ʻomai ʻe he ngaahi ʻahiʻahí ha faingamālie ke tau poupouʻi ai ʻa e tuʻunga-hau ʻo Sihová. (Pal. 27:11) ʻI heʻetau kātaki faitōnungá, ʻoku tau fakahōifuaʻi ai ʻa Sihova, pea ʻoku toe mālohi ange ai ʻetau ʻamanaki ki he kahaʻú. (Lau ʻa e Loma 5:3-5.) Ko e hokosia ʻa Siopé ʻoku fakahaaʻi mai ai kiate kitautolu “ko Sihová ʻoku manavaʻofa loloto ʻaupito mo mohu meesi.” (Sēm. 5:11) Kapau te tau poupouʻi ʻa e tuʻunga-hau ʻo Sihová, te ne fakapaleʻi kitautolu. Ko hono ʻiloʻi ení, ʻe tokoniʻi ai kitautolu ke tau “kātekina ʻa e meʻa kotoa pē ʻi he kātaki mo e fiefia.”—Kol. 1:11.

16. Ko e hā ʻoku fiemaʻu ai ke tau fakamanatu kiate kitautolu ʻoku mātuʻaki mahuʻinga ʻa hono fakatonuhiaʻi ʻa e tuʻunga-hau ʻo Sihová?

¹⁶ Ko e moʻoni ʻe lava ke faingataʻa ʻa e tokangataha ki hono fakatonuhiaʻi ʻa e tuʻunga-hau ʻo Sihová, ʻi he taimi ʻoku tau fekuki ai mo e ngaahi palopalema ʻi he moʻuí. Naʻa mo e ngaahi palopalema īkí ʻe hā ngali lahi ia kapau te tau fakakaukau tōtuʻa ki ai. Ko ia ʻoku fiemaʻu ke tau fakamanatu maʻu pē kiate kitautolu ʻa e mahuʻinga ʻo hono poupouʻi ʻa e tuʻunga-hau ʻo e ʻOtuá, neongo pe ko e hā ha ngaahi faingataʻa ʻoku tau hokosia.

17. ʻE lava fēfē ke tokoniʻi kitautolu ʻe he femoʻuekina ʻi he ngāue ʻa Sihová ke tau tokangataha ki he meʻa ʻoku mahuʻinga moʻoní?

¹⁷ Ko e hanganaki femoʻuekina ʻi he ngāue ʻa Sihová ʻoku lava ke ne tokoniʻi kitautolu ke tau manatuʻi ʻa e meʻa ʻoku mahuʻinga moʻoní. Ko e fakatātaá, ko ha tuofefine ko Renee naʻe pā-kālava, felāngaaki maʻu pē, peá ne toe maʻu ʻa e kanisaá. Lolotonga ʻene ʻi he falemahakí, naʻá ne faifakamoʻoni ai ki he kau ngāué, kau mahaki kehé mo e kau ʻaʻahí. ʻI he taimi ʻe taha naʻe nofo falemahaki ai ʻa Renee ʻi he uike ʻe ua mo e konga, naʻá ne malanga ai ʻi he houa ʻe 80. Neongo naʻe ʻiloʻi ʻe Renee te ne mate, naʻe ʻikai ʻaupito ke ngalo ʻiate ia ʻa e meʻa naʻe mahuʻinga moʻoní. Naʻá ne maʻu ʻa e nonga ʻi heʻene poupouʻi ʻa e tuʻunga-hau ʻo Sihová.

18. Ko e hā ʻoku akoʻi mai kiate kitautolu ʻe he hokosia ʻa Jennifer ʻo fekauʻaki mo hono poupouʻi ʻa e tuʻunga-hau ʻo Sihová?

¹⁸ ʻOku lava ke tau toe poupouʻi ʻa e tuʻunga-hau ʻo Sihová ʻi he taimi ʻoku tau fekuki ai mo e ngaahi palopalema iiki fakaʻahó. Ko ha tuofefine ko Jennifer naʻá ne ʻi ha malaʻe vakapuna ʻi he ʻaho ʻe tolu ʻo tatali ai ke puna ki hono ʻapí. ʻI hono toutou kaniseli ʻa e taimi ʻo e vakapuná, naʻe ongoʻi ongosia mo taʻelata ai ʻa Jennifer. Naʻe mei lava ke ne ongoʻi mamahi lahi ai. Ka ʻi hono kehé, naʻe lotu ʻa Jennifer kia Sihova ke tokoniʻi ia ke ne vahevahe atu ʻa e ongoongo leleí ki he faʻahinga naʻe tatali ʻi he malaʻe vakapuná. Naʻe iku ʻo ne faifakamoʻoni ai ki ha kakai tokolahi pea tufaki mo e ʻū tohi lahi. Naʻe pehē ʻe Jennifer, “Naʻá ku ongoʻi naʻe tāpuakiʻi au ʻe Sihova neongo ʻa e ngaahi hokosia faingataʻá pea naʻá ne ʻomi kiate au ha mālohi feʻunga ke u fataki ai hono huafá ʻi ha founga ʻaonga.”

19. Ko e hā ʻokú ne fakaʻilongaʻi ʻa e kau lotu moʻoní?

¹⁹ Ko e kakai pē ʻa Sihová ʻoku nau mahinoʻi moʻoni ʻa e mahuʻinga ʻo e tuʻunga-hau ʻo Sihová. Ko e mahino ko ení ʻokú ne fakaʻilongaʻi ai ʻa e kau lotu moʻoní. Ko ia ai, kuo pau kiate kitautolu taki taha ke tau fakapapauʻi ke hanganaki poupouʻi ʻa e tuʻunga-hau ʻo Sihová.

20. ʻOku fēfē ʻa e ongoʻi ʻa Sihova ki he meʻa kotoa pē ʻokú ke fai ke poupou ai ki hono tuʻunga-haú?

²⁰ ʻOku ʻiloʻi mo fakamahuʻingaʻi ʻe Sihova ʻa e meʻa kotoa pē ʻokú ke fai ke poupouʻi ʻaki hono tuʻunga-haú lolotonga hoʻo tauhi faitōnunga kiate iá mo kātekina ʻa e ngaahi ʻahiʻahí. (Saame 18:25) Ko e kupu hokó ʻe fakamatala lahi ange ai ki he ʻuhinga ʻoku tuha ai mo e tuʻunga-hau ʻo Sihová ʻa hoʻo poupoú pea mo e founga ʻe lava ke ke poupouʻi kakato ai iá.