Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

ʻI he taimi ʻoku ʻomai ai ha ngaahi fakahinohino mei he kautaha ʻa e ʻOtuá, ko e hā ʻa e fakakaukau ʻoku totonu ke maʻu ʻe he fanga tokouá, ʻo hangē ko e kau ʻovasia sēketí mo e kau mātuʻa ʻi he fakatahaʻangá?

ʻOku totonu ke vave ʻenau talangofua ki aí. ʻE lava ke nau ʻeke hifo kiate kinautolu: ‘ʻOku ou tokoni ki he tuʻunga fakalaumālie ʻo e faʻahinga takatakai ʻiate aú? ʻOku vave ʻeku tali mo poupouʻi ʻa e ngaahi fakahinohino ʻoku ʻomaí?’​—w16.11, p. 11.

Ko fē ʻa e taimi naʻe nofo pōpula ai ʻa e kau Kalisitiane moʻoní ʻi Pāpiloné?

Naʻe hoko eni taimi nounou mei he mate ʻa e kau ʻapositoló. ʻI he taimi ko iá, naʻe kamata ke ʻasi mai ʻa e kalasi ʻo e haʻa faifekaú. Naʻe pouaki ʻe he Siasí mo e puleʻanga Lomá ʻa e kau Kalisitiane tafoki mei he moʻoní mo feinga ke fakavaivaiʻi ʻa e leʻo ʻo e kau Kalisitiane naʻe hangē ha uité. Ka ʻi he laui hongofuluʻi taʻu ʻo aʻu mai ki he 1914, naʻe kamata ke mavahe mai ʻa e kau paní.​—w16.11, p. 23-25.

Ko e hā naʻe mahuʻinga ai ʻa e ngāue ʻa Lefèvre d’Étaples?

Lolotonga ʻa e 1520 tupú, naʻe liliu ai ʻe Lefèvre ʻa e Tohi Tapú ki he lea faka-Falaniseé ke malava ʻo maʻu ʻe he kakai lāuvalé. Ko ʻene fakamatalaʻi ʻa e ngaahi kupu ʻi he Tohi Tapú naʻe tākiekina ai ʻa Mātini Lūtelo, Viliami Tinitale mo Sione Kalavini.​—wp16.6, p. 10-12.

Ko e hā ʻa e kehekehe ʻo e “fokotuʻu ʻa e fakakaukaú ʻi he kakanó” mo e “fokotuʻu ʻa e fakakaukaú ʻi he laumālié”? (Loma 8:6)

Ko e tokotaha ʻokú ne fokotuʻu ʻene fakakaukaú ʻi he kakanó ʻokú ne tokangataha pē ki he ngaahi holí mo falala ki he kakano taʻehaohaoá, ʻokú ne talanoa maʻu pē ki ai pea fakalāngilangiʻi ʻa e ngaahi meʻa ʻo e kakanó. Ko ha tokotaha ʻokú ne fokotuʻu ʻa e fakakaukaú ʻi he laumālié ʻoku fakatefito ʻene moʻuí ʻi he ngaahi meʻa ʻoku felāveʻi mo e ʻOtuá mo ʻene fakakaukaú; ko ha Kalisitiane pehē ʻoku puleʻi ia ʻe he laumālie māʻoniʻoní. Ko e fakakaukau ʻi he kakanó ʻoku iku ia ki he mate, ko e fakakaukau ʻi he laumālié ʻoku iku ki he moʻui mo e melino.​—w16.12, p. 15-17.

Ko e hā ha ngaahi founga ʻaonga ke fakasiʻisiʻi ai ʻa e loto-moʻuá?

Fakamuʻomuʻa ʻa e ngaahi meʻa ʻoku mahuʻinga angé, hoko ʻo anga-fakaʻatuʻi, vaheʻi ha taimi ke mālōlō ai, fiefia ʻi he fakatupu ʻa e ʻOtuá, ʻai ke anga-fakakata, pea fakamālohisino maʻu pē mo maʻu ha mohe feʻunga.​—w16.12, p. 22-23.

‘Naʻe ʻave ʻa ʻĪnoke koeʻuhi ke ʻoua te ne sio ʻi he maté.’ (Hep. 11:5) Anga-fēfē?

Ngalingali naʻe ʻave ʻe he ʻOtuá ʻa ʻĪnoke mei he moʻuí ki he maté ʻo ʻikai te ne ʻiloʻi naʻá ne mate.​—wp17.1, p. 12-13.

Ko e hā ʻoku kei mahuʻinga ai ʻa e anga-vaivaí?

Ko e anga-vaivaí ʻoku kau ki ai ʻa hono maʻu ha vakai totonu kiate kitautolu pea ʻiloʻi hotau ngataʻangá. ʻOku fiemaʻu ke tau ʻiloʻi ʻa e anga hono uesia ʻe heʻetau tōʻongá ʻa e niʻihi kehé pea ʻoua ʻe fuʻu fakakaukau tōtuʻa fekauʻaki mo kitautolu.​—w17.01, p. 18.

Ko e hā ʻokú ne fakamoʻoniʻi naʻe tataki ʻe he ʻOtuá ʻa e kulupu pule ʻi he ʻuluaki senitulí, ʻo hangē pē ko ʻene tataki ʻa e faʻahinga ʻi he Kulupu Pule ʻi he ʻaho ní?

Naʻa nau mahinoʻi ʻa e ngaahi moʻoni Fakatohitapú ʻi he tokoni ʻa e laumālie māʻoniʻoní. Naʻa nau tokangaʻi ʻa e ngāue fakamalangá ʻi he tokoni ʻa e kau ʻāngeló pea ʻoku nau falala ki he Folofola ʻa e ʻOtuá ʻi he taimi ʻoku nau tokonaki mai ai ha fakahinohino. Ko e ngaahi moʻoniʻi meʻa ko ení ʻoku toe hoko mo ia ʻi he ʻahó ni.​—w17.02, p. 26-28.

Ko e hā ʻa e ngaahi moʻoniʻi meʻa ʻokú ne ueʻi kitautolu ke tau vakai ai ʻoku mahuʻinga ʻa e huhuʻí?

Moʻoniʻi meʻa ʻe fā: Ko hai naʻá ne ʻomai iá, ʻuhinga naʻe ʻomai aí, ko e hā ha feilaulau naʻe kaunga ki aí, pea ko e hā ʻa e fiemaʻu moʻoni naʻe fakahoko aí. ʻOku totonu ke tau fakalaulauloto ki he anga ʻo ʻene kaunga ki ai ʻa e ngaahi moʻoniʻi meʻa ko ení.​—wp17.2, p. 4-6.

ʻE lava ke liliu ʻe ha Kalisitiane ʻene fakakaukaú ʻi he hili haʻane ʻosi fakapapauʻi ha meʻa?

ʻOku totonu ke tau fai ki heʻetau leá. Kae kehe, ʻi he taimi ʻe niʻihi ʻoku ʻi ai ha fili ʻoku taau ke toe fakakaukauʻi. ʻI he hili ʻa e fakatomala ʻa e kakai ʻo Ninivé, naʻe liliu ʻa e fakakaukau ʻa e ʻOtuá. ʻI he taimi ʻe niʻihi, koeʻuhí ko ha ngaahi tuʻunga foʻou pe fakamatala foʻou ʻe fiemaʻu nai ai ke tau fai ʻa e meʻa tatau—w17.03, p. 16-17.

Ko e hā ʻoku mātuʻaki fakatuʻutāmaki ai ʻa e ngutu laú?

ʻOku lava ke ne fakatupunga ha palopalema ʻo ʻikai lava ai ke mapuleʻi, ʻo ne ʻai ai ʻa e palopalemá ke toe kovi ange. Tatau ai pē pe ʻoku tau tonu pe hala, ko e ngaahi lea fakalotomamahí heʻikai ʻaupito ke ne fakaleleiʻi ʻe ia ʻa e ngaahi tuʻungá.—w17.04, p. 21.