1. Ko e hā kuo fai ʻe Sihova maʻaú?

NAʻE anga-fēfē hoʻo hoko ko e taha ʻo e Kau Fakamoʻoni ʻa Sihová? ʻUluakí, naʻá ke fanongo ki he “ongoongo leleí”​—mahalo pē mei hoʻo ongo mātuʻá, mei ha kaungāngāue pe ko ha kaungāako pe fakafou ʻi he malanga fale ki he falé. (Mk. 13:10) Pea naʻe fakamoleki leva ʻe ha taha ha taimi fakataha mo e feinga lahi ke fakahoko ha ako Tohi Tapu mo koe. Lolotonga ʻa e ako ko iá, naʻá ke hoko ai ʻo ʻofa kia Sihova peá ke ʻiloʻi ai ʻokú ne ʻofa mai kiate koe. Naʻe tohoaki mai koe ʻe Sihova ki he moʻoní, pea ʻi he taimí ni, ʻi he hoko ko ha ākonga ʻa Sīsū Kalaisí, ʻokú ke maʻu ʻa e ʻamanaki ki he moʻui taʻengatá. (Sione 6:44) ʻOku ʻikai ha veiveiua ʻokú ke houngaʻia ʻia Sihova ʻi Heʻene ueʻi ha tokotaha ke ne akoʻi kiate koe ʻa e moʻoní pea naʻá Ne tali koe ko e taha ʻo ʻEne kau sevānití.

2. Ko e hā te tau lāulea ki ai ʻi he kupu ko ení?

² ʻI heʻetau ʻiloʻi ʻa e moʻoní ʻi he taimi ní, ʻoku tau maʻu ai ʻa e monū ke tokoniʻi ʻa e niʻihi kehé ke tau kau fakataha ʻi he fononga ʻi he hala ki he moʻuí. ʻOku tau ongoʻi fiemālie nai ʻi he malanga fale ki he falé, ka ʻoku faingataʻa nai ke tau tuʻuaki mo fakahoko ha ngaahi ako Tohi Tapu. Ko e anga ia hoʻo ongoʻí? Kapau ko ia, mahalo te ke ʻiloʻi ko e niʻihi ʻo e ngaahi fokotuʻu ʻi he kupu ko ení ʻe tokoni kiate koe. Te tau lāulea ki he meʻa ʻokú ne ueʻi kitautolu ke tokoni ki he ngaohi ākongá. Te tau lāulea foki ki he founga ʻe lava ke tau ikuʻi ai ʻa e ngaahi pole ʻokú ne taʻofi nai kitautolu mei hono fakahoko ha ako Tohi Tapu. ʻUluakí, tau lāulea angé ki he ʻuhinga kuo pau ai ke ʻoua te tau hoko pē ko e kau malanga ka tau toe hoko foki ko e kau faiako ʻo e ongoongo leleí.

3. Ko e hā ʻa e ʻuhinga ʻoku tau malanga aí?

³ ʻI he ʻi māmani ʻa Sīsuú, naʻá ne ʻoange ki hono kau muimuí ha fekau konga ʻe ua. ʻUluakí, naʻá ne tala ange ke nau malangaʻi ʻa e  ongoongo lelei ʻo e Puleʻangá, pea naʻá ne fakahaaʻi ange ʻa e founga ke fakahoko ai iá. (Māt. 10:7; Luke 8:1) Ko e fakatātaá, naʻe teuʻi ʻe Sīsū ʻene kau ākongá ki he founga ke fakafeangai ai ki he ʻikai ke tali pe tali lelei ʻa e pōpoaki ʻo e Puleʻangá. (Luke 9:2-5) Naʻá ne toe tomuʻa tala ʻa e lahi ʻo ʻenau ngāue fakamalangá, ʻo tala ange ko hono kau muimuí te nau fai ha “fakamoʻoni ki he ngaahi puleʻanga kotoa pē.” (Māt. 24:14; Ngā. 1:8) Tatau ai pē pe ʻe anga-fēfē tali ʻa e kakaí ki he malangá, ko e kau ākongá naʻe pau ke nau talanoa ki he kakaí fekauʻaki mo e Puleʻanga ʻo e ʻOtuá mo e meʻa te ne fakahokó.

4. Fakatatau ki he Mātiu 28:18-20, ko e hā kuo pau ke tau fai ʻo tānaki atu ki he malanga fekauʻaki mo e Puleʻangá?

⁴ Ko e hā ʻa e konga hono ua ʻo e fekau ʻa Sīsuú? Naʻá ne tala ange ki hono kau muimuí ke akoʻi ʻa e faʻahinga ʻe malava ke nau hoko ko e kau ākongá ke tauhi ʻa e meʻa kotoa pē naʻá ne fekau maí. Ka ʻe fakangatangata pē ʻa e ngāue fakamalanga mo e faiako ko ení ʻi he ʻuluaki senitulí, ʻo hangē nai ko e meʻa ʻoku taukaveʻi ʻe he niʻihi? ʻIkai, naʻe fakahaaʻi ʻe Sīsū ko e ngāue mātuʻaki mahuʻinga ko ení ʻe hokohoko mai ia ʻo aʻu ki hotau taimí, “ʻo aʻu ki he fakaʻosiʻosi ʻo e fokotuʻutuʻu lolotongá.” (Lau ʻa e Mātiu 28:18-20.) ʻOku ngalingali naʻe ʻoange ʻe Sīsū ʻa e fekau ko iá ʻi he taimi naʻá ne hā ai ki heʻene kau ākonga ʻe toko 500 tupú. (1 Kol. 15:6) Pea ʻi he meʻa fakahā naʻe ʻoange ʻe Sīsū kia Sioné, naʻá ne fakahaaʻi mahino ai ko ʻene kau ākongá kotoa ʻoku ʻamanekina ke nau tokoniʻi ʻa e niʻihi kehé ke nau ako fekauʻaki mo Sihova.​—Fkh. 22:17.

5. Fakatatau ki he 1 Kolinitō 3:6-9, naʻe anga-fēfē hono fakatātaaʻi ʻe Paula ʻa e fekauʻaki ʻa e malangá mo e faiakó?

⁵ Naʻe fakatatau ʻe he ʻapositolo ko Paulá ʻa e ngāue ngaohi ākongá ki hono tō ha ngoue, ʻo fakahaaʻi ai kuo pau ke tau fai ʻa e meʻa lahi ange ʻi hono tō pē ha ngaahi tenga. Naʻá ne fakamanatu ki he kau Kolinitō: “Naʻá ku tō ʻe au, naʻe fuʻifuʻi ʻe ʻApolosi . . . Ko kimoutolú ko e ngoueʻanga ʻa e ʻOtuá.” (Lau ʻa e 1 Kolinitō 3:6-9.) ʻI he tuʻunga ko e kau ngāue ʻi he “ngoueʻanga ʻa e ʻOtuá,” ʻoku ʻikai ke ngata pē ʻetau tō ʻa e ngaahi tengá ka ʻoku tau fuʻifuʻi kinautolu pea vakaiʻi maʻu pē ʻenau tupú. (Sione 4:35) ʻI he taimi tatau, ʻoku tau ʻiloʻi ko e ʻOtuá ʻokú ne ʻai ʻa e tengá ke tupu.

6. Ko e hā ʻoku kau ki heʻetau ngāue ko e kau faiakó?

⁶ ʻOku tau kumi ki he faʻahinga ʻoku “hehema totonu ki he moʻui taʻengatá.” (Ngā. 13:48) Ke tokoni ki he faʻahinga taautaha ko iá ke hoko ko ha kau ākonga, kuo pau ke tau tokoniʻi kinautolu (1) ke mahinoʻi, (2) ke tali, pea (3) ke ngāueʻaki ʻa e ngaahi meʻa ʻoku nau ako mei he Tohi Tapú. (Sione 17:3; Kol. 2:6, 7; 1 Tes. 2:13) Ko e kotoa ʻi he fakatahaʻangá ʻe lava ke nau tokoni ki he kau ako Tohi Tapú ʻaki hono fokotuʻu ha faʻifaʻitakiʻanga ʻi hono fakahāhā ʻa e ʻofá ki he faʻahinga foʻou ko ení pea ʻai ke nau ongoʻi ʻoku talitali lelei kinautolu ʻi heʻenau maʻu ʻa e fakatahá. (Sione 13:35) Ko e tokotaha ʻokú ne fakahoko ʻa e akó ʻe toe fiemaʻu nai ke ne fakamoleki ʻa e taimi mo e ivi lahi ʻi hono tokoniʻi ha tokotaha ako ke fulihi ʻa e ngaahi tui pe tōʻonga ʻoku “mālohi hangē ha ngaahi kolotaú.” (2 Kol. 10:4, 5) ʻE fiemaʻu nai ʻa e ngaahi māhina ke tataki ha tokotaha ke fou ʻi he ngaahi sitepu ko ení koeʻuhi ke faai atu pē ʻo ne aʻusia ʻa e taumuʻa ʻo e papitaisó. Ka ʻoku tuha moʻoni ia mo e feingá.

7. Ko e hā ʻokú ne ueʻi kitautolu ke kau ʻi he ngāue fakamalangá mo e ngaohi ākongá?

⁷ Ko e hā ʻoku tau kau ai ʻi he ngāue fakamalangá mo e ngaohi ākongá? ʻUluakí, koeʻuhi ʻoku tau ʻofa kia Sihova. ʻI hoʻo fai ho lelei tahá ke talangofua ki he fekau ke malanga mo ngaohi ākongá, ʻokú ke fakahāhā ai hoʻo ʻofa ki he ʻOtuá. (1 Sio. 5:3) Fakakaukau angé ki heni: Ko hoʻo ʻofa kia Sihová kuó ne ʻosi ueʻi koe ke malanga mei he fale ki he fale. Naʻe faingofua ke talangofua ki he fekau ko iá? Mahalo pē ʻikai. ʻI he taimi  naʻá ke fakaofiofi ai ki hoʻo ʻuluaki fale ʻi he ngāue fakamalangá, naʻá ke manavasiʻi? ʻOku pau pē naʻe pehē! Ka naʻá ke ʻiloʻi ko e ngāue eni ʻoku loto ʻa Sīsū ke ke faí, pea naʻá ke talangofua ki he fekaú. Pea ʻoku ngalingali ʻi he faai mai ʻa e taimí, kuo faingofua ange ke ke kau ʻi he ngāue fakamalangá. Kae fēfē hono fakahoko ha ako Tohi Tapú? ʻOkú ke manavasiʻi ʻi he fakakaukau atu ki aí? Mahalo pē. Kae kehe, ʻi he taimi ʻokú ke kole ai kia Sihova ke tokoniʻi koe ke ikuʻi hoʻo manavasiʻí pea tafunaki ha loto-toʻa ke tuʻuaki ha ako Tohi Tapu, ʻe lava ke tokoniʻi koe ʻe Sihova ke fakaivimālohiʻi hoʻo holi ke ngaohi ākongá.

8. Fakatatau ki he Maʻake 6:34, ko e hā ha toe meʻa ʻe lava ke ne ueʻi kitautolu ke akoʻi ʻa e niʻihi kehé?

⁸ Uá, ko e ʻofa ki hotau kaungāʻapí ʻokú ne ueʻi kitautolu ke akoʻi ʻa e moʻoní kiate kinautolu. ʻI he taimi ʻe taha, ko Sīsū mo ʻene kau ākongá naʻa nau ongosia ʻi ha ngāue fakamalanga lahi. Naʻa nau fiemaʻu ha feituʻu ke nau mālōlō ai, ka naʻe haʻu kiate kinautolu ha fuʻu kakai tokolahi. ʻI hono ueʻi ʻe he fakaʻofaʻiá ʻa Sīsuú, naʻe kamata ke ne akoʻi ki he kakaí “ʻa e ngaahi meʻa lahi.” (Lau ʻa e Maʻake 6:34.) Naʻá ne ngāue mālohi ʻi he tuʻunga ko ení. Ko e hā hono ʻuhingá? Naʻe ʻai ʻe Sīsū ʻa ia tonu ke ʻi he tuʻunga ʻo e kakai naʻe ʻi aí. Naʻá ne vakai ki he lahi ʻo ʻenau faingataʻaʻiá​—ʻa e lahi ʻo ʻenau fiemaʻu ha ʻamanakí​—pea naʻá ne loto ke tokoniʻi kinautolu. Ko e kakai ʻi he ʻaho ní ʻoku nau ʻi he tuʻunga tatau. ʻOua ʻe fakamāuʻi kinautolu ʻaki honau fōtunga hā maí. ʻOku nau hangē ha fanga sipi hē ʻoku ʻikai hanau tokoni, ʻo ʻikai hanau tauhi ke tataki kinautolu. Naʻe fakamatalaʻi ʻe he ʻapositolo ko Paulá ʻa e kakai hangē ko ení ʻoku ʻikai ke nau ʻiloʻi ʻa e ʻOtuá pea ʻikai haʻanau ʻamanaki. (ʻEf. 2:12) ʻOku nau ʻalu ʻi he “hala ʻoku taki atu ki he ʻauhá”! (Māt. 7:13) ʻI heʻetau fakakaukau ki he tuʻunga fakalaumālie ʻo e faʻahinga ʻi hotau feituʻu ngāué, ko e ʻofá mo e manavaʻofá te na ueʻi kitautolu ke tokoniʻi kinautolu. Pea ko e founga lelei taha ʻe lava ke tau tokoni aí ko hono tuʻuaki ange ke ako Tohi Tapu mo kinautolu.

9. Fakatatau ki he Filipai 2:13, ʻe lava fēfē ke tokoniʻi koe ʻe Sihova?

⁹ Mahalo ʻokú ke toumoua ke tuʻuaki ha ako Tohi Tapu koeʻuhí ʻokú ke ʻiloʻi ʻe fiemaʻu ʻa e taimi lahi ki ai. Kapau ko e tuʻungá ia, fakahā hoʻo ngaahi ongoʻí kia Sihova. Kole kiate ia ke tokoniʻi koe ke fakatupulekina ʻa e holi ke maʻu pea fakahoko ha ako. (Lau ʻa e Filipai 2:13.) Naʻe fakapapauʻi mai ʻe he ʻapositolo ko Sioné ʻe tali ʻe he ʻOtuá ʻa e ngaahi lotu ʻoku fehoanaki mo hono finangaló. (1 Sio. 5:14, 15) Ko ia ʻoku lava ke ke fakapapauʻi ʻe tokoniʻi koe ʻe Sihova ke fakatupulekina ʻa e holi ke kau ʻi he ngaohi ākongá.

10-11. Ko e hā nai ʻokú ne taʻofi kitautolu mei hono fakahoko ha ako Tohi Tapu?

¹⁰ ʻOku tau fakahoko fakamātoato ʻa e fekau ke faiakó neongo ʻetau fehangahangai mo e ngaahi pole ʻokú ne taʻofi nai kitautolu mei hono fakahoko ʻa e meʻa lahi ange ʻoku tau saiʻia ke fai ʻi he ngaohi ākongá. Tau lāulea angé ki he niʻihi ʻo e ngaahi pole ko iá mo e founga ʻe lava ke tau ikuʻi ai iá.

¹¹ ʻOku tau ongoʻi nai ʻoku fakangatangata hotau tuʻungá. Ko e fakatātaá, ko e kau malanga ʻe niʻihi ʻoku nau taʻumotuʻa ange pe mahamahaki. Ko ho tuʻungá nai ia? Kapau ko ia, fakakaukau ki ha lēsoni kuo tau ako mei he mahaki fakaʻauha COVID-19. Kuo tau ʻiloʻi ʻoku lava ke tau fakahoko ʻa e ngaahi ako Tohi Tapu ola lelei ʻi he ngaahi meʻangāue fakaʻilekitulōniká! Ko ia ʻoku malava nai ke ke kamata mo fakahoko ha ako mei ho ʻapí tonu. Pea ʻoku toe ʻi ai mo hono lelei ʻe taha. ʻE fiefia nai ʻa e niʻihi ke ako ʻa e Tohi Tapú, ka ʻoku ʻikai ke nau faingamālie ʻi he taimi ʻoku faʻa vaheʻi ʻe hotau fanga tokouá ki he malangá. Kae kehe, ʻoku nau faingamālie nai ʻi he hengihengí pe ʻi he fuoloa ʻa e poʻulí. ʻE malava nai ke ke fakafaingamālieʻi koe ke fakalato ʻa e fiemaʻu ko iá? Naʻe akoʻi ʻe Sīsū ʻa Nikotīmasi ʻi he poʻulí, ʻa ia ko e taimi ia naʻe fili ʻe Nikotīmasí.​—Sione 3:1, 2.

12. Ko e hā ʻa e ngaahi tafaʻaki te ne tokoniʻi kitautolu ke falala pau te tau hoko ko e kau faiako ola leleí?

 ¹² ʻOku ʻikai nai ke tau falala pau ki heʻetau malava ke fakahoko ha ako Tohi Tapú. Mahalo ʻoku tau ongoʻi ʻoku totonu ke tau maʻu ha ʻilo pe pōtoʻi lahi ange ko ha faiako ki muʻa ke lava ʻo tau ako mo ha taha. Kapau ko e anga eni hoʻo ongoʻí, fakakaukau ki ha tafaʻaki ʻe tolu ʻe lava ke ne fakalahi hoʻo falala paú. ʻUluakí, ʻoku lau ʻe Sihova ʻokú ke taau ke akoʻi ʻa e niʻihi kehé. (2 Kol. 3:5) Uá, ko Sīsū, kuó ne maʻu “ʻa e mafai kotoa pē ʻi hēvani mo māmani,” kuó ne fakamafaiʻi koe ke faiako. (Māt. 28:18) Pea ko e tolú, ʻoku lava ke ke falala ki he tokoni ʻa e niʻihi kehé. Naʻe falala ʻa Sīsū ki he meʻa naʻe akoʻi ange ʻe heʻene Tamaí ke ne leaʻakí, pea te ke lava foki mo koe ʻo fai pehē. (Sione 8:28; 12:49) ʻIkai ko ia pē, ʻe lava ke ke kole ki hoʻo ʻovasia kulupu ngāue fakamalangá, ki ha tāimuʻa taau pe ki ha tokotaha malanga taukei ke ne tokoniʻi koe ke kamata pea fakahoko ha ako Tohi Tapu. Ko e founga ʻe taha ʻe lava ke ke maʻu ai ʻa e falala paú ko e kau ki ha ako Tohi Tapu ʻoku fakahoko ʻe he kau malanga ko ení.

13. Ko e hā ʻoku fiemaʻu ai ke tau feʻunuʻakí?

¹³ ʻE faingataʻa nai ke tau feʻunuʻaki ki ha ngaahi founga foʻou mo e meʻangāue foʻou. Ko e founga ʻoku tau fakahoko ai ʻa e ngaahi ako Tohi Tapú kuo liliu he taimí ni. Ko ʻetau tohi ako tefitó, ʻa e Fiefia ʻi he Moʻuí ʻo Taʻengata!, ʻoku fiemaʻu ia ke tau teuteu ki he akó pea fakahoko ia ʻi ha founga kehe mei he meʻa naʻa tau anga ki ai ʻi he kuohilí. ʻOku siʻi ange ʻa e ngaahi palakalafi ke laú pea lahi ange ʻa e fetalanoaʻaki mo e tokotaha akó. ʻI he faiakó, ʻoku tau ngāueʻaki lahi ange ʻa e ngaahi vitiō mo e ngaahi maʻuʻanga fakamatala fakaʻilekitulōnika, hangē ko e JW Library^®. Kapau ʻoku ʻikai ke ke alāanga mo e ngaahi meʻangāue ko ení, talanoa ki ha tokotaha ʻe lava ke ne tokoniʻi koe ke ʻiloʻi hono ngāueʻaki iá. Ko kitautolu faʻahinga ʻo e tangatá ʻoku tau fiemālie pē ʻi hono fai ʻa e meʻa ʻoku tau anga ki aí. ʻOku ʻikai faingofua ke tau feʻunuʻaki ki ha ngaahi founga foʻou ʻo e fakahoko ha meʻa. Ka ʻi he tokoni ʻa Sihová mo e tokoni ʻa e niʻihi kehé, ʻe faingofua ange ai ke ke feʻunuʻaki pea ʻe toe fakafiefia ange ke ako mo e kakaí. Hangē ko e meʻa naʻe leaʻaki ʻe ha tāimuʻa, ko e founga ako ko ení ʻoku “fakaivifoʻou fakatouʻosi ki he tokotaha akó mo e faiakó.”

14. Ko e hā ʻoku totonu ke tau manatuʻi ʻi he ngāue ʻi ha feituʻu ngāue faingataʻa, pea ʻoku anga-fēfē ʻa e fakalototoʻa kiate kitautolu ʻa e 1 Kolinitō 3:6, 7?

¹⁴ ʻOku tau nofo nai ʻi ha feituʻu ngāue ʻoku faingataʻa ke kamata ai ha ngaahi ako Tohi Tapu. Ko e kakaí ʻoku hā ngali ʻoku ʻikai ke nau mahuʻingaʻia ʻi heʻetau pōpoakí pe aʻu ʻo nau fakafepakiʻi ia. Ko e hā ʻe lava ke ne tokoniʻi kitautolu ke tauhi maʻu ha fakakaukau pau ʻi ha feituʻu ngāue pehē? Manatuʻi ko e tuʻunga ʻo e kakaí ʻoku lava ke liliu vave ʻi he māmani taʻemanonga ko ení, pea ko e faʻahinga naʻe ʻikai ke nau mahuʻingaʻia ki muʻá ʻoku nau lāuʻilo nai ki heʻenau fiemaʻu fakalaumālié. (Māt. 5:3) Ko e niʻihi naʻa nau fakafisi maʻu pē ke tali ʻetau ʻū tohí kuo nau tali ki muí ni ha ako Tohi Tapu. ʻOku tau ʻiloʻi foki ko Sihova ʻa e ʻEiki ʻo e utu-taʻú. (Māt. 9:38) ʻOkú ne loto ke tau hanganaki tō mo fuʻifuʻi, ka ko ia ʻa e Tokotaha ʻokú ne ʻai ia ke tupú. (1 Kol. 3:6, 7) Pea he fakalototoʻa ē ke manatuʻi neongo kapau ʻoku ʻikai malava ke tau fakahoko ha ako Tohi Tapu he taimí ni, ʻoku fakapaleʻi kitautolu ʻe Sihova ʻo makatuʻunga ʻi heʻetau ngaahi feingá, ʻo ʻikai ʻi he ola ʻetau ngāué! *

15. ʻOku anga-fēfē ongoʻi ʻa Sihova ʻi he taimi ʻoku tali ai ʻe ha taha ha ako Tohi Tapu pea ngāueʻaki ʻa e meʻa ʻokú ne akó?

¹⁵ ʻOku fiefia ʻa Sihova ʻi he taimi ʻoku tali ai ʻe ha taha ʻa e moʻoni Fakatohitapú pea vahevahe  ʻa e moʻoni ko iá ki he niʻihi kehé. (Pal. 23:15, 16) He fiefia lahi ē ko Sihova ʻi heʻene vakai hifo ki he meʻa ʻoku hoko ʻi he ʻaho ní! Ko e fakatātaá, neongo ʻa e mahaki fakaʻauha fakamāmanilahi ʻi he taʻu fakangāue 2020, naʻe fakahoko ʻa e ngaahi ako Tohi Tapu ʻe 7,705,765, ʻa ia naʻe tokoniʻi ai ʻa e kakai ʻe toko 241,994 ke fakatapui kia Sihova pea papitaiso. Ko e kau ākonga foʻou ko ení te nau fakahoko ʻa e ngaahi ako Tohi Tapu pea ngaohi ha kau ākonga tokolahi ange. (Luke 6:40) ʻOku ʻikai ha veiveiua, ʻoku tau ʻai ʻa Sihova ke fiefia ʻi heʻetau kau ki he ngāue ngaohi ākongá.

16. Ko e hā ha taumuʻa lelei ke fokotuʻu?

¹⁶ Ko e ngaohi ākongá ko ha ngāue faingataʻa, ka ʻi he tokoni ʻa Sihová ʻe lava ke tau fakahoko ha ngafa ʻi hono akoʻi ʻa e faʻahinga foʻoú ke ʻofa ki heʻetau Tamai fakahēvaní. ʻE lava ke tau fokotuʻu ha taumuʻa ke kamata mo fakahoko naʻa mo ha ako Tohi Tapu ʻe taha? Te tau ʻohovale nai ʻi he meʻa ʻe hoko kapau ʻoku tau ngāueʻaki ʻa e faingamālie kotoa pē ke ʻeke ki he faʻahinga ʻoku tau fetaulaki mo iá pe te nau fie ako mo kitautolu. ʻE lava ke tau fakapapauʻi ʻe tāpuakiʻi ʻe Sihova ʻetau ngaahi feingá.

17. Ko e hā te tau hokosia kapau ʻoku malava ke tau fakahoko ha ako Tohi Tapu?

¹⁷ Ko ha monū ē ʻoku tau maʻu ke malanga mo akoʻi ʻa e moʻoní ki he niʻihi kehé! Ko e ngāue ko ení ʻokú ne ʻai ke tau fiefia moʻoni. Ko e ʻapositolo ko Paulá, ʻa ia naʻá ne tokoniʻi ʻa e tokolahi ʻi Tesalonaika ke hoko ko e kau ākonga, naʻá ne fakamatalaʻi ʻene ongoʻí ʻo peheni: “Ko e hā homau ʻamanakiʻangá pe fiefiaʻangá pe kalauni ʻo e hākailangitaú ʻi he ʻao ʻo hotau ʻEiki ko Sīsuú ʻi heʻene ʻi hení? ʻIkai ko hono moʻoní ko kimoutolu ia? Ko e moʻoni ko kimoutolu ʻa homau lāngilangí mo e fiefiaʻangá.” (1 Tes. 2:19, 20; Ngā. 17:1-4) Ko e tokolahi ʻi he ʻahó ni ʻoku nau maʻu ʻa e ongoʻi tatau. Ko ha tuofefine ko Stéphanie, ʻa ia kuó ne tokoniʻi mo hono husepānití ʻa e tokolahi ke nau papitaiso ʻokú ne pehē, “ʻOku ʻikai ha fiefia ʻe toe lahi ange ʻi hono tokoniʻi ʻa e kakaí ke nau fakatapui kia Sihová.”