“KO E utu-taʻú ʻoku lahi, ka ʻoku tokosiʻi ʻa e kau ngāué. Ko ia ai, mou kōlenga ki he ʻEiki ʻo e utu-taʻú ke ne fekau atu ha kau ngāue ki heʻene utu-taʻú.” (Luke 10:2) Ko e lea ko eni naʻe leaʻaki ʻe Sīsū ʻi he taʻu nai ʻe 2,000 kuohilí ʻokú ne fakamatalaʻi lelei ʻa e tuʻunga ʻi Mienimā ʻi he ʻaho ní. Ko e hā hono ʻuhingá? ʻI Mienimā, ko e kau malanga pē ʻe toko 4,200 nai ʻoku nau fakamafola ʻa e ongoongo leleí ʻi he lotolotonga ʻo e kakai ʻe toko 55 miliona.

Kae kehe, ko e “ʻEiki ʻo e utu-taʻú,” ʻa Sihova, kuó ne ueʻi ʻa e loto ʻo e fanga tokoua mo e fanga tuofāfine ʻe lauingeau mei he ngaahi fonua kehekehe, pea kuo nau omi ki he fonua ko eni ʻi ʻĒsia Tonga-Hahaké ke tokoni ʻi he ngāue utu-taʻu fakalaumālié. Ko e hā naʻá ne ʻai kinautolu ke nau mavahe mei honau fonuá? Naʻe anga-fēfē hono tokoniʻi kinautolu ke nau hikí? Pea ko e hā ʻa e ngaahi tāpuaki ʻoku nau maʻú? Tau vakai angé ki aí.

ʻI he ngaahi taʻu kuo maliu atú, naʻe hamu ai ʻi he mahaki-moá ʻa Kazuhiro, ko ha tāimuʻa ʻi Siapani, ʻo ne pongia, pea naʻe leleakiʻi ia ki he falemahakí. Naʻe tala ange ʻe he toketaá ke ʻoua te ne toe fakaʻuli ʻi he taʻu ʻe ua. Naʻe ʻohovale ai ʻa Kazuhiro. Naʻá ne ʻeke hifo kiate ia, ‘ʻE lava fēfē ke hokohoko atu ʻeku fai ʻa e meʻa ʻoku ou manako aí​—ʻa e tāimuʻá?’ Naʻá ne lotu tōtōivi, ʻo kōlenga kia Sihova ke ne fakaʻatā ia ke hokohoko atu ʻene tāimuʻá.

ʻOku fakamatala ʻa Kazuhiro: “ʻI ha māhina ki mui ai, naʻe fanongo ʻa hoku kaumeʻa naʻe ngāue ʻi Mienimā ʻi he tuʻunga naʻá ku ʻi aí. Naʻá ne tā mai ʻo ne pehē: ‘Ko e meʻalele uta pāsese tefito ʻi Mienimaá ko e pasí. Kapau te ke haʻu ki heni, ʻe lava ke hokohoko atu hoʻo ngāue fakamalangá ʻo ʻikai ke fiemaʻu ha kā!’ Naʻá ku ʻeke ki heʻeku toketaá pe ʻe lava ʻi hoku tuʻungá ke u ʻalu ki Mienimā. Naʻá ku ʻohovale ʻi he pehē mai ʻe he toketaá: ‘ʻOku ʻaʻahi mai ki Siapani he taimí ni ha toketā mataotao ʻi he ʻutó mei Mienimā. Te u fakafeʻiloaki koe kiate ia. Kapau ʻe faifai ange peá ke toe hamu, ʻe lava ke ne tokangaʻi koe.’ Naʻá ku tui ko e tali ʻa e toketaá ko ha tali ia meia Sihova.”

Naʻe ʻīmeili leva ʻa Kazuhiro ki he ʻōfisi vaʻa ʻi Mienimaá ʻo fakahaaʻi ʻa ʻene holi mo hono uaifí ke ngāue tāimuʻa ʻi he fonua ko iá. Naʻe fai mai ʻe he vaʻá ʻa e tali ʻi he ʻaho pē ʻe nima mei ai, “Mo omi, ʻoku mau fiemaʻu ha kau tāimuʻa tokolahi ange!” Naʻe fakatau atu ʻe Kazuhiro mo hono uaifí ko Mari ʻena ongo meʻalelé, maʻu ha visa, pea fakatau mo e tikite vakapuna. ʻI he ʻahó ni, ʻokú na ngāue fiefia mo e kulupu lea fakanoa ʻi Mandalay. ʻOku pehē ʻe Kazuhiro: “Fakafou ʻi he hokosia ko ení ʻokú ma ongoʻi kuo ʻai ke mālohi ʻema tui ki he talaʻofa ʻa e ʻOtuá ʻi he Saame 37:5: ‘Tuku atu ho halá kia Sihova; falala kiate ia, pea te ne fai ha meʻa maʻau.’”

ʻI he 2014, naʻe maʻu ai ʻe he Kau Fakamoʻoni ʻa Sihova ʻi Mienimaá ʻa e monū ʻo hono fai ha talitali ʻi ha fakataha-lahi makehe. Naʻe haʻu ki ai ha kau fakafofonga muli tokolahi. Ko e taha ʻo kinautolu ko Monique, ko ha tuofefine taʻu 30 tupu mei ʻAmelika, ʻokú ne pehē: “ʻI heʻeku foki mei he fakataha-lahí, naʻá ku lotu kia Sihova fekauʻaki mo e sitepu hono hoko te u fou ai ʻi heʻeku moʻuí. Naʻá ku talanoa foki mo ʻeku ongo mātuʻá fekauʻaki mo ʻeku taumuʻa fakalaumālié. Ne mau tui kotoa ʻoku totonu ke u foki ki Mienimā, ka naʻe fiemaʻu ʻa e taimi mo e lotu lahi ki muʻa ke u fai ʻeku fili fakaʻosí.” ʻOku fakamatala ʻa Monique ki hono ʻuhingá.

“Naʻe fakalototoʻaʻi ʻe Sīsū ʻa hono kau muimuí ke ‘fikaʻi ʻa e fakamolé.’ Ko ia naʻá ku ʻeke hifo: ‘ʻE lava ke u fua ʻa e fakamole ki he hiki ko ení? ʻE lava ke u maʻu ha moʻui ʻi he fonua ko iá ʻo ʻikai fakamoleki ʻa e taimi lahi ange ʻi he ngāue paʻangá?’” ʻOkú ne fakahaaʻi: “Ne vave ʻeku ʻiloʻi ʻoku ʻikai te u maʻu ha paʻanga feʻunga ke hiki ki he tafaʻaki ko eni ʻe taha ʻi he māmaní.” Ko ia, naʻe lava fēfē ke ne hikí?​—Luke 14:28.

ʻOku fakamatala ʻa Monique: “ʻI he ʻaho ʻe taha naʻe fiemaʻu ai ʻe hoku pule ngāue ke ma talanoa. Naʻá ku manavasiʻi, ʻi he fakakaukau ʻe fakanofo au mei he ngāué. Ka, ʻi hono kehé, naʻe fakamālō mai ʻa hoku pule ngāué ʻi heʻeku ngāue leleí. Naʻá ne tala mai leva kuó ne fokotuʻutuʻu ke u maʻu ha pōnasi, ʻa ia ko e lahi tofu pē ia ʻo e paʻanga naʻá ku fiemaʻu ke totongi ʻaki hoku ngaahi moʻuá!”

Kuo ngāue ʻa Monique ʻi Mienimā talu mei Tīsema 2014. ʻOku fēfē ʻene ongoʻi fekauʻaki mo ʻene ngāue ʻi he feituʻu ʻoku lahi ange ai ʻa e fiemaʻú? “ʻOku ou fiefia lahi ʻi heʻeku ʻi hení,” ko ʻene leá ia. “ʻOku ou fai ha ako Tohi Tapu ʻe tolu. Ko e taha ʻo ʻeku kau akó ʻoku taʻu 67. ʻOkú ne malimali maʻu pē mo fāʻofua ʻiate au ʻi heʻema feʻiloakí. ʻI heʻene ʻiloʻi ko e huafa ʻo e ʻOtuá ko Sihová, naʻe ueʻi ia ke ne fakatō loʻimata. Naʻá ne pehē: ‘Ko e ʻuluaki taimi eni ʻi heʻeku moʻuí kuó u fanongo ai ko Sihova ʻa e huafa ʻo e ʻOtuá. ʻOkú ke fuʻu kei siʻi ange ʻiate au, ka kuó ke akoʻi kiate au ʻa e meʻa mahuʻinga taha ʻoku lava ke faifai ange peá u akó.’ Ko e moʻoni, naʻá ku fakatō loʻimata foki mo au. Ko e ngaahi hokosia hangē ko ení ʻokú ne ʻai ʻa e ngāue ʻi he feituʻu ʻoku lahi ange ai ʻa e fiemaʻú ke hoko ko ha moʻui mātuʻaki fakafiemālie.” Ki muí ni mai, naʻe maʻu ai ʻe Monique ʻa e monū ʻo e kau ki he Ako Maʻá e Kau ʻEvangeliō ʻo e Puleʻangá.

Ko e toe meʻa naʻá ne ueʻi ʻa e niʻihi ke omi ki Mienimaá ko e fakamatala ʻi he 2013 Yearbook of Jehovah’s Witnesses fekauʻaki mo e fonuá ni. Naʻe nofo ha tuofefine taʻu 30 tupu siʻi ko Li ʻi ʻĒsia Tonga-Hahake. Naʻá ne ngāue paʻanga taimi-kakato, ka naʻe ueʻi ia ʻe he fakamatala ʻi he Yearbook ke ne fakakaukau ke tāimuʻa ʻi Mienimā. “ʻI heʻeku maʻu ha fakataha-lahi makehe ʻi he 2014 ʻi Yangon, naʻá ku fetaulaki ai mo ha ongo meʻa mali ʻokú na ngāue ʻi he feituʻu ʻoku lahi ange ai ʻa e fiemaʻú ʻi he malaʻe lea faka-Siaina ʻi Mienimaá. Koeʻuhi ko ʻeku lea faka-Siainá, naʻá ku fili ke hiki ki Mienimā ʻo tokoni ki he kulupu Siaina ʻi aí. Naʻá ku hoa ngāue mo Monique, pea naʻá ma hiki ki Mandalay. Naʻe tāpuakiʻi kimaua ʻe Sihova ʻi heʻema maʻu ha ngāue konga taimi ko e faiako ʻi he ʻapiako tatau, peá ma maʻu ha ʻapaatimeni ofi ki ai. Neongo ʻa e vela ʻa e ʻeá mo e faingataʻa ʻe niʻihi, ʻoku ou fiefia ʻi heʻeku ngāue ʻi hení. ʻOku moʻui faingofua ʻa e kakai ʻi Mienimaá, ka ʻoku nau anga-fakaʻapaʻapa mo loto-lelei ke vaheʻi ʻa e taimi ke fanongo ai ki he ongoongo leleí. ʻOku mātuʻaki fakafiefia ʻa e sio ki hono fakavaveʻi ʻe Sihova ʻa e ngāué. ʻOku ou tuipau ko e finangalo ʻo Sihova kiate aú ke u ʻi heni tonu ʻi Mandalay.”

Kuo hokosia ʻe he kau ngāue tokolahi ʻi he feituʻu ʻoku lahi ange ai ʻa e fiemaʻú ʻa e mālohi ʻo e lotú. Ko e fakatātaá ko Jumpei mo hono uaifí ko Nao, ʻokú na taʻu 30 tupu. Naʻá na ʻosi ngāue ʻi ha fakatahaʻanga lea fakanoa ʻi Siapani. Ko e hā naʻá na hiki ai ki Mienimaá? ʻOku fakamatala ʻa Jumpei: “Ko au mo hoku uaifí naʻá ma  taumuʻa maʻu pē ke ngāue ʻi he feituʻu ʻoku lahi ange ai ʻa e fiemaʻú ʻi ha fonua muli. Naʻe hiki ha tokoua ʻi heʻemau fakatahaʻanga lea fakanoa ʻi Siapaní ki Mienimā. Neongo naʻe siʻi pē ʻema paʻanga naʻe tātānakí, naʻá ma hiki foki ʻi Mē 2010. Naʻe talitali māfana kimaua ʻe he fanga tokoua ʻi Mienimaá!” ʻOku anga-fēfē ʻene ongoʻi fekauʻaki mo e malaʻe lea fakanoa ʻi Mienimaá? “ʻOku lahi ʻa e mahuʻingaʻiá. ʻI heʻema hulu ʻa e ngaahi vitiō lea fakanoá, ʻoku ofoofo ai ʻa e kau noa ʻi he ngaahi ʻapí. ʻOkú ma fiefia lahi ʻi heʻema fili ke haʻu ʻo ngāue kia Sihova ʻi hení!”

Kuo anga-fēfē ʻa e tuʻunga fakapaʻanga ʻo Jumpei mo Nao? “Hili ha taʻu ʻe tolu, ne ma ngāueʻaki ʻo meimei ʻosi ʻema paʻangá pea ʻikai ha paʻanga feʻunga ke totongi ʻaki ʻa e falé ki he taʻu hono hokó. Naʻá ku lotu tōtōivi mo hoku uaifí. Naʻá ma maʻu taʻeʻamanekina ha tohi mei he ʻōfisi vaʻá naʻe fakaafeʻi ai kimaua ke ma ngāue tāimuʻa makehe fakataimi! Naʻá ma falala kia Sihova, pea naʻe ʻikai te ne liʻaki kimaua. Kuó ne tokangaʻi kimaua ʻi he tafaʻaki kotoa pē.” Ki muí ni mai, naʻe kau foki ai ʻa Jumpei mo Nao ʻi he Ako Maʻá e Kau ʻEvangeliō ʻo e Puleʻangá.

Ko e hā naʻá ne ueʻi ʻa Simone, ko ha tokoua taʻu 40 tupu naʻe tupu hake ʻi ʻĪtali, mo hono uaifí ko Anna, ko ha tuofefine taʻu 30 tupu lahi, naʻe tupu hake ʻi Nuʻu Sila, ke na hiki ki Mienimaá? Naʻe tali ʻe Anna “ko e fakamatala ki Mienimā ʻi he 2013 Yearbook!” ʻOku pehē ʻe Simone: “Ko ha monū lahi ia ke ʻi Mienimā. ʻOku mātuʻaki faingofua ange ʻa e moʻui ʻi hení, pea ʻoku lava ke u vaheʻi ai ʻa e taimi lahi ange ki he ngāue ʻa Sihová. ʻOku fakafiefia ʻa e hokosia hono tokangaʻi kimaua ʻe Sihova ʻi heʻema ngāue ʻi he feituʻu ʻoku lahi ange ai ʻa e fiemaʻú.” (Saame 121:5) ʻOku pehē ʻe Anna: “ʻOku ou fiefia ange ʻi ha toe taimi ki muʻa. ʻOkú ma maʻu ha moʻui faingofua. ʻOku ou fakamoleki ʻa e taimi lahi ange mo hoku husepānití, pea kuó ma toe vāofi ange. Kuó ma maʻu foki ha ngaahi kaumeʻa ʻofeina foʻou. ʻOku ʻikai ke tomuʻa fehiʻa ʻa e kakaí ki he Kau Fakamoʻoní, pea ʻoku fakaofo ʻa e lahi ʻo e mahuʻingaʻia ʻi he feituʻú!” ʻI he ngaahi founga fē?

ʻOku fakamatala ʻa Anna: “ʻI he ʻaho ʻe taha, naʻá ku faifakamoʻoni ai ki ha tokotaha ako ʻunivēsiti ʻi he māketí pea fokotuʻutuʻu ke ma toe fetaulaki. ʻI heʻema fetaulakí, naʻá ne haʻu mo hano kaumeʻa. ʻI he taimi hono hokó, naʻá ne haʻu mo ha niʻihi. Ki mui ai naʻá ne haʻu mo e tokolahi ange. ʻOku ou ako he taimí ni mo e toko nima ʻo kinautolu.” ʻOku pehē ʻe Simone: “ʻOku anga-fakakaumeʻa mo fieʻilo ʻa e kakai ʻi he feituʻú. ʻOku mahuʻingaʻia ʻa e tokolahi. ʻOku ʻikai moʻoni ke ma maʻu ha taimi feʻunga ke ʻalu ai ki he faʻahinga kotoa ʻoku mahuʻingaʻiá.”

Kae fēfē ʻa e ngaahi sitepu ʻaonga ʻoku kau ʻi he fili ke hiki ki Mienimaá? Ko e fakamatala eni ʻa Mizuho, mei Siapani: “Ko au mo hoku husepānití ko Sachio, naʻá ma loto maʻu pē ke ngāue ʻi ha fonua ʻoku lahi ange ai ʻa e fiemaʻú​—ka ʻi fē? Hili hono lau ʻa e fakamatala fekauʻaki mo Mienimaá ʻi he 2013 Yearbook, naʻe mātuʻaki maongo kiate kimaua ʻa e ngaahi hokosia fakalotomāfaná ʻo kamata ai ke ma fakakaukau pe te ma lava ʻo ngāue ʻi Mienimā.” ʻOku pehē ʻe Sachio: “Naʻá ma fili ke ʻaʻahi uike ʻe taha ki Yangon, ʻa e kolo  lahi ʻi Mienimaá, ʻo asiasi ʻa e fonuá, hangē ko e laú. Ko e ʻaʻahi nounou ko ia ke maʻu ʻa e ngaahi moʻoniʻi meʻá naʻá ma tuipau ai ʻoku totonu ke ma hiki mai ki heni.”

Ko Rodney mo hono uaifí ko Jane mei ʻAositelēlia, ʻokú na taʻu 50 tupu, pea ko hona fohá, ko Jordan, mo hona ʻofefine, ko Danica, kuo nau ngāue ʻi he feituʻu ʻoku lahi ange ai ʻa e fiemaʻú ʻi Mienimā talu mei he 2010. ʻOku pehē ʻe Rodney: “Naʻe maongo lahi kiate kimautolu ʻa e fiekaia fakalaumālie ʻa e kakaí. ʻOku ou mātuʻaki fokotuʻu atu ki he ngaahi fāmili kehé ke nau ʻahiʻahi ngāue ʻi ha feituʻu hangē ko Mienimaá.” Ko e hā hono ʻuhingá? “Ko e meʻa kuo fai ʻe he meʻá ni ki homau fāmilí ʻi he tuʻunga fakalaumālié ʻoku mahuʻinga taʻehanotatau! ʻOku nōfoʻi ʻa e toʻutupu tokolahi ʻi heʻenau telefoní, meʻalelé, ngāué, mo e hā fua. Ko ʻema ongo tamaikí ʻokú na femoʻuekina kinaua ʻi hono ako ʻa e ngaahi foʻi lea foʻou ke na ngāueʻaki ʻi he ngāue fakafaifekaú. ʻOkú na feinga ke ako ke fakaʻuhinga mo e faʻahinga ʻoku ʻikai te nau maheni mo e Tohi Tapú mo e founga ke fai ai ha tali lolotonga ʻa e ngaahi fakataha ʻa e fakatahaʻanga fakalotofonuá, pea ʻokú na moʻumoʻua ʻi he ngaahi ngāue fakalaumālie fakafiefia kehe.”

Ko Oliver, ko ha tokoua taʻu 30 tupu lahi mei ʻAmelika, ʻokú ne fakamatala ki he ʻuhinga ʻokú ne fakaongoongoleleiʻi ai ʻa e faʻahinga ngāue ko ení: “Ko e ngāue kia Sihova ʻi ha ʻātakai foʻoú kuo ʻi ai hono ngaahi ʻaonga lahi. Ko e mavahe mei ʻapí kuo tokoniʻi ai au ke langa hake ʻa ʻeku tuipau mo e falala kia Sihová ʻo tatau ai pē pe ko e hā ʻa e tuʻunga ʻoku ou ʻi aí. Ko e ngāue mo e faʻahinga naʻe ʻikai te u ʻiloʻi ki muʻa ka ʻoku nau maʻu ʻa e tui tatau mo aú kuo tokoniʻi moʻoni ai au ke u sio ʻoku halaʻatā ha meʻa ʻi he māmani ko ení ʻe ala fakahoa ʻa hono mahuʻingá ki he Puleʻanga ʻo e ʻOtuá.” ʻI he ʻahó ni, ko Oliver mo hono uaifí ko Anna, ʻoku hokohoko atu ʻena ngāue faivelenga ʻi he malaʻe lea faka-Siainá.

Ko Trazel, ko ha tuofefine taʻu 50 tupu siʻi mei ʻAositelēlia, kuó ne ngāue ʻi Mienimā talu mei he 2004. ʻOkú ne pehē: “Ki he faʻahinga ʻoku fakaʻatā ʻe honau tuʻungá, ʻoku ou fakaongoongoleleiʻi lahi atu ʻa e ngāue ʻi he feituʻu ʻoku lahi ange ai ʻa e fiemaʻú. ʻI he meʻa kuó u hokosiá kapau ʻokú ke loto ke ngāue, ʻe tāpuakiʻi ʻe Sihova hoʻo ngaahi feingá. Naʻe ʻikai ʻaupito haʻaku misi te u maʻu ha moʻui peheni. Ko e moʻui mohu ʻuhinga mo fakafiemālie lahi taha ia ʻoku lava ke u fakaʻamu ki aí.”

ʻOfa ke hanga ʻe he ngaahi lea loto-moʻoni ko eni ʻa e kau ngāue ʻi he feituʻu ʻoku lahi ange ai ʻa e fiemaʻú ʻi Mienimaá ʻo fakalototoʻaʻi koe ke ke fakakaukau ke tokoniʻi ʻa e faʻahinga loto-totonu ʻi he ngaahi feituʻu ʻoku teʻeki ke ngāueʻí. Ko e moʻoni, ʻoku fakaafe atu ʻa e kau ngāue ʻi he feituʻu ʻoku lahi ange ai ʻa e fiemaʻú, “Laka mai muʻa ki Mienimā ʻo tokoniʻi kimautolu!”