1. ʻOku anga-fēfē hono fakahāhā ʻe he kau lotu ʻa Sihová ʻoku nau feʻofaʻakí?

 KO E kau lotu ʻa Sihova takatakai ʻi he māmaní kotoa ʻoku nau kau ki ha fāmili. Ko e fanga tokoua mo e fanga tuofāfine kinautolu ʻoku nau feʻofaʻaki. (1 Sio. 4:16, 21) ʻI he taimi ʻe niʻihi ʻoku nau fai ha ngaahi feilaulau lalahi maʻa honau fanga tokouá, ka ko e taimi lahi tahá ʻoku nau fakahāhā ʻa ʻenau ʻofá ʻi he fanga kiʻi meʻa iiki lahi ʻoku nau fai maʻanautolú. Ko e fakatātaá, ʻoku nau lea lelei nai ki honau fanga tokouá pe anga-lelei kiate kinautolu. ʻI heʻetau anga-fakaʻatuʻi ki he niʻihi kehé, ʻoku tau faʻifaʻitaki ai ki heʻetau Tamai fakahēvaní.​—ʻEf. 5:1.

2. Naʻe anga-fēfē ʻa e faʻifaʻitaki ʻa Sīsū ki he ʻofa ʻa ʻene Tamaí?

² Naʻe faʻifaʻitaki haohaoa ʻa Sīsū ki heʻene Tamaí. Naʻá ne anga-lelei maʻu pē ki he niʻihi kehé. Naʻá ne pehē: “Haʻu kiate au, ʻa kimoutolu kotoa ʻoku ongosia mo mafasiá, pea te u fakaivifoʻou kimoutolu.” (Māt. 11:28, 29) ʻI heʻetau faʻifaʻitaki kia Sīsū pea fakahāhā ʻa e “fakaʻatuʻi ki he tokotaha māʻulaló,” te tau ʻai ai ʻa Sihova ke fiefia, pea te tau fiefia foki ai. (Saame 41:1) ʻI he kupú ni, te tau sio ai ki he founga ʻe lava ke tau anga-fakaʻatuʻi ai ki he ngaahi mēmipa ʻo hotau fāmilí, ko hotau fanga tokouá mo e fanga tuofāfiné, mo e faʻahinga ʻoku tau fetaulaki ʻi he ngāue fakafaifekaú.

3. ʻE lava fēfē ke hoko ʻo anga-fakaʻatuʻi ha husepāniti ki hono uaifí? (Sio ki he ʻuluaki fakatātā ʻi he kupú ni.)

³ ʻOku fiemaʻu ke fokotuʻu ʻe he ngaahi husepānití ʻa e faʻifaʻitakiʻangá pea fakahāhā ʻa e lahi ʻo ʻenau tokanga ki honau fāmilí. (ʻEf. 5:25; 6:4) ʻOku pehē ʻe he Tohi Tapú kuo pau ki he ngaahi husepānití ke nau hoko ʻo anga-fakaʻatuʻi mo mahinoʻi ʻa honau uaifí. (1 Pita 3:7; fakamatala ʻi lalo) Ko ha husepāniti ʻokú ne maʻu ʻa e mahinó ʻokú ne ʻiloʻi neongo ʻokú ne kehe mei hono uaifí ʻi he ngaahi founga lahi, ʻoku ʻikai te ne lelei ange ʻiate ia. (Sēn. 2:18) ʻOkú ne fakaʻatuʻi ʻa ʻene ongoʻí pea fakafeangai kiate ia ʻaki ʻa e fakangeingeia mo e fakalāngilangi. ʻOku pehē ʻe ha uaifi ʻi Kānata fekauʻaki mo hono husepānití: “ʻOku ʻikai ʻaupito te ne fakamaʻamaʻaʻi ʻa ʻeku ongoʻí pe pehē, ‘ʻOku ʻikai totonu ke ke ongoʻi pehē.’ Ko ha tokotaha fanongo lelei foki ia. ʻI heʻene tokoniʻi au ke fakatonutonu ʻeku fakakaukau ki ha meʻá, ʻokú ne fai ia ʻi he anga-lelei.”

4. ʻE lava fēfē ke fakahāhā ʻe ha husepāniti ʻokú ne fakaʻatuʻi ʻa e ongoʻi ʻa hono uaifí ʻi he anga ʻo ʻene fakafeangai ki he kakai fefine kehé?

⁴ Ko ha husepāniti ʻokú ne fakaʻatuʻi ʻa e ongoʻi ʻa hono uaifí ʻoku ʻikai ʻaupito te ne fakamalinga mo e kakai fefine kehé pe fakahāhā ha mahuʻingaʻia taʻetotonu ʻiate kinautolu, fakahangatonu, ʻi he mītia fakasōsialé, pe ʻi he ʻInitanetí. (Siope 31:1) ʻOku ʻikai te ne ngāueʻaki ʻa e mītia fakasōsialé ke fakamalinga ai, pea ʻoku ʻikai te ne sio ʻi he ngaahi uepisaiti ʻoku ʻikai leleí. ʻIo, ʻokú ne hanganaki mateaki ki hono uaifí koeʻuhi ʻokú ne ʻofa ʻiate ia pea koeʻuhi ʻokú ne ʻofa kia Sihova pea fehiʻa ʻi he meʻa ʻoku koví.​—Lau ʻa e Saame 19:14; 97:10.

5. ʻE lava fēfē ke fakaʻatuʻi ʻe ha uaifi ʻa hono husepānití?

⁵ ʻI he faʻifaʻitaki ʻa ha husepāniti ki he faʻifaʻitakiʻanga anga-ʻofa ʻa hono ʻulú, ʻa Sīsū Kalaisí, ʻe faingofua ange ai ki hono uaifí ke ne “fakaʻapaʻapa loloto” kiate ia. (ʻEf. 5:22-25, 33) Pea ʻi heʻene fakaʻapaʻapa kiate iá, te ne feinga ke mahinoʻi ʻa ʻene ongoʻí pea anga-lelei kiate ia ʻi heʻene femoʻuekina ʻi he ngaahi meʻa ʻa e fakatahaʻangá pe ʻi he fiemaʻu ke ne fekuki mo e ngaahi palopalemá. ʻOku pehē ʻe ha husepāniti ʻi Pilitānia: “ʻI he hoko ha meʻa, ʻoku ʻiloʻi ʻe hoku uaifí mei he liliu ʻa ʻeku tōʻongá ʻoku ʻi ai ha meʻa ʻoku ou hohaʻa ki ai. ʻOkú ne ngāueʻaki leva ʻa e tefitoʻi moʻoni ʻi he Palōveepi 20:5, neongo kapau ʻoku ʻuhinga ení ko e tatali ki he taimi totonu ke ‘fusi hake’ ai ʻeku fakakaukaú kapau ko ha meʻa ʻoku lava ke ma talanoa ki ai.”

6. ʻE lava fēfē ke tau hanga kotoa ʻo fakalototoʻaʻi ʻa e fānaú ke nau fakakaukau ki he niʻihi kehé pea ke nau anga-lelei, pea ʻe maʻu ʻaonga fēfē mei ai ʻa e fānaú?

⁶ ʻI he fefakafeangaiʻaki ʻa e ongo mātuʻá ʻi ha founga fakaʻatuʻí, ʻokú na fokotuʻu ai ha faʻifaʻitakiʻanga lelei ki heʻena fānaú. ʻOku fiemaʻu foki ke na akoʻi ʻena fānaú ke nau fakakaukau ki he niʻihi kehé pea hoko ʻo anga-lelei. Ko e fakatātaá, ʻoku lava ke akoʻi ʻe he ngaahi mātuʻá ʻenau fānaú ke ʻoua te nau lele holo ʻi he Fale Fakatahaʻangá. Pe ʻi he taimi ʻoku nau ʻi ha fakatahataha fakasōsiale ai, ʻe lava ke nau tala ki heʻenau fānaú ke nau tatali kae ʻoua kuo ʻuluaki maʻu ʻe he faʻahinga taʻumotuʻá ʻenau meʻakaí. Ko e moʻoni, ʻe lava ke tokoni ʻa e tokotaha kotoa ʻi he fakatahaʻangá ki he ngaahi mātuʻá. Ko ia ʻoku totonu ke tau fakaongoongoleleiʻi ha kiʻi leka ʻi heʻene fai ʻi he fakakaukau lelei ha meʻa, ko e fakatātaá, ʻi heʻene fakaava kiate kitautolu ʻa e matapaá. ʻE ʻai ʻe he meʻá ni ke ongoʻi lelei ʻa e kiʻi leká pea ʻe tokoniʻi ai ia ke ne ʻiloʻi “ʻoku ʻi ai ʻa e fiefia lahi ange ʻi he foaki atú ʻi he maʻu maí.”​—Ngā. 20:35.

7. Naʻe anga-fēfē ʻa e anga-fakaʻatuʻi ʻa Sīsū ki ha tangata tuli, pea ko e hā ʻe lava ke tau ako mei he faʻifaʻitakiʻanga ʻa Sīsuú?

⁷ ʻI he ʻaho ʻe taha, naʻe ʻi he feituʻu Tikapōlusí ai ʻa Sīsū ʻi he taimi naʻe hanga ai ʻe he kakaí ʻo “ʻomi kiate ia ha tangata naʻe tuli mo faingataʻa ʻa ʻene leá.” (Mk. 7:31-35) Naʻe fakamoʻui ia ʻe Sīsū, kae ʻikai ʻi he ʻao ʻo e niʻihi kehé. Ko e hā hono ʻuhingá? Koeʻuhi naʻe tuli ʻa e tangatá, ʻoku ngalingali naʻá ne ongoʻi taʻefiemālie ʻi he ʻi ai ha fuʻu kakai tokolahi. Naʻe mahinoʻi ʻe Sīsū ʻene ongoʻí pea naʻá ne “ʻave ia” ki ha feituʻu naʻe ʻikai ke ʻi ai ha kakai ʻo fakamoʻui ai ia. Ko e moʻoni, heʻikai lava  ke tau fakahoko ha ngaahi mana, ka ʻoku totonu ke tau fakakaukau ki he ngaahi fiemaʻu mo e ongoʻi ʻa hotau fanga tokouá pea anga-lelei kiate kinautolu. Naʻe tohi ʻe he ʻapositolo ko Paulá: “Tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí.” (Hep. 10:24) Naʻe mahinoʻi ʻe Sīsū ʻa e anga ʻo e ongoʻi ʻa e tangata tulí peá ne anga-lelei kiate ia. Ko ha faʻifaʻitakiʻanga lelei moʻoni ia kiate kitautolu!

8, 9. ʻE lava fēfē ke tau fakahāhā ʻoku tau tokanga ki he kau taʻumotuʻá mo e faʻahinga ʻoku faingataʻaʻia fakaesinó? (ʻOmai ha ngaahi fakatātā.)

⁸ Anga-fakaʻatuʻi ki he kau taʻumotuʻá mo e faʻahinga ʻoku faingataʻaʻia fakaesinó. Ko e ʻulungaanga mahuʻinga taha ʻi he fakatahaʻanga Kalisitiané ko e ʻofá, ʻo ʻikai ko e lavameʻá. (Sione 13:34, 35) ʻOku ʻai kitautolu ʻe he ʻofá ke tau fai ʻa e meʻa kotoa te tau malavá ke tokoniʻi hotau fanga tokoua mo e fanga tuofāfine ʻoku nau taʻumotuʻa pe faingataʻaʻia fakaesinó ke nau maʻu ʻa e ngaahi fakatahá pea ke nau malanga. ʻOku tau tokoniʻi kinautolu naʻa mo e ʻikai hatau faingamālié pe naʻa mo e ʻikai lava ke nau fai ha meʻa lahí. (Māt. 13:23) Ko Michael, ʻa ia ʻokú ne heka saliote, ʻokú ne houngaʻia lahi ʻi he tokoni ʻoku fai ʻe hono fāmilí mo e fanga tokoua ʻi heʻene fakatahaʻangá. ʻOkú ne pehē: “Koeʻuhi ko e tokoni kotoa ʻoku nau fai maí, ʻoku malava ke u maʻu ai ʻa e lahi taha ʻo e ngaahi fakatahá pea kau maʻu pē ʻi he ngāue fakafaifekaú. ʻOku ou saiʻia tautefito ʻi he faifakamoʻoni ʻi he feituʻu kakaí.”

⁹ ʻI he ngaahi ʻapi Pēteli lahi, ʻoku ʻi ai ʻa e fanga tokoua mo e fanga tuofāfine faitōnunga ʻoku nau taʻumotuʻa pe faingataʻaʻia fakaesino. Ko e kau ʻovasia tokangá ʻoku nau fakahāhā ʻa e ʻofa kiate kinautolu ʻaki ʻa e fokotuʻutuʻu ke nau malanga fakafou ʻi he faitohi mo ngāueʻaki ʻa e telefoní. Ko Bill, ʻa ia ʻoku taʻu 86 pea ʻokú ne faitohi ki he kakai ʻi he feituʻu mamaʻó, ʻokú ne pehē: “ʻOku mau houngaʻia ʻi he monū ʻo e malava ke faitohí.” Ko Nancy, ʻa ia ʻoku meimei taʻu 90, ʻokú ne fakamatala: “ʻOku ʻikai te u vakai ki he faitohí ko hano faʻo pē ha meʻa ʻi ha ngaahi sila. Ko e ngāue fakamalanga eni. ʻOku fiemaʻu ke ʻilo ʻe he kakaí ʻa e moʻoní!” ʻOku pehē ʻe Ethel, ʻa ia naʻe fāʻeleʻi ʻi he 1921: “Ko e langá ko ha konga ia ʻo ʻeku moʻuí. ʻI he ʻaho ʻe niʻihi ʻoku ou faingataʻaʻia ʻi he feinga pē ke tui valá.” Naʻa mo ia, ʻokú ne fiefia ʻi he malanga ʻo ngāueʻaki ʻa e telefoní pea maʻu ha ngaahi toe ʻaʻahi lelei. ʻOku fakamatala ʻa Barbara, ʻa ia ʻoku taʻu 85: “Koeʻuhi ko ʻeku mahamahakí, ʻoku faingataʻa ʻaupito kiate au ke ʻalu maʻu pē ʻi he ngāue fakamalangá. Ka ko e faifakamoʻoni ʻi he telefoní ʻokú ne ʻai ke u malava ʻo lea ai ki he niʻihi kehé. Mālō, Sihova!” Siʻi hifo he taʻu ʻe taha, ʻoku fakamoleki ai ʻe ha kulupu ʻo e faʻahinga taʻumotuʻa ʻofeiná ʻa e houa ʻe 1,228 ʻi he ngāue fakafaifekaú, fai ʻa e tohi ʻe 6,265, tā telefoni ʻe 2,000 tupu, pea tufa ʻa e ʻū tohi ʻe 6,315! ʻOku lava ke tau fakapapauʻi naʻe ʻai ʻe heʻenau ngaahi feingá ʻa Sihova ke ne fiefia lahi!​—Pal. 27:11.

10. ʻE lava fēfē ke tau tokoniʻi hotau fanga tokouá ke nau maʻu ʻaonga mei he ngaahi fakatahá ʻi he lahi taha ʻe ala lavá?

¹⁰ Anga-fakaʻatuʻi ʻi he ngaahi fakataha faka-Kalisitiané. ʻI heʻetau anga-fakaʻatuʻí, ʻoku tau tokoniʻi ai hotau fanga tokouá ke nau maʻu ʻa e ʻaonga lahi taha ʻe ala lavá mei he ngaahi fakatahá. Anga-fēfē? Ko e founga ʻe taha ko e aʻu taimi totonu ki ai koeʻuhi ke ʻoua te tau fakahohaʻasi kinautolu. ʻI he taimi ʻe niʻihi, ʻe ʻai nai ʻe ha ngaahi meʻa taʻeʻamanekina ke tau tōmui. Ka ʻo kapau ʻoku tau faʻa tōmui, ʻoku totonu ke tau fakakaukau ki hono uesia ʻe he meʻá ni hotau fanga tokouá mo ha ngaahi liliu ʻe lava ke tau fai ke fakahāhā ʻoku tau tokanga kiate kinautolu. Manatuʻi foki, ko Sihova mo hono ʻAló ʻokú na fakaafeʻi kitautolu ki he ngaahi fakatahá. (Māt. 18:20) ʻOku totonu ke tau fakahāhā moʻoni ʻetau fakaʻapaʻapa kiate kinauá ʻaki ʻetau tauhi taimi!

11. Ko e hā ʻoku totonu ai ki he fanga tokoua ʻoku ʻi ai ʻenau konga ʻi ha fakatahá ke nau muimui ʻi he fakahinohino ʻi he 1 Kolinitō 14:40?

¹¹ Kapau ʻoku tau anga-fakaʻatuʻi ki hotau fanga tokouá, te tau muimui ʻi he fakahinohino ʻa e Tohi Tapú: “Tuku ke fakahoko ʻa e ngaahi meʻa kotoa pē ʻi ha tuʻunga taau mo maau.” (1 Kol. 14:40) Ko e fanga tokoua ʻoku ʻi ai ʻenau konga ʻi ha fakatahá ʻoku nau muimui ki he fakahinohino ko ení ʻi heʻenau  ʻosi taimi totonú. ʻI he foungá ni, ʻoku nau anga-fakaʻatuʻi ai ʻo ʻikai ki he tokotaha-malanga pē hono hokó kae pehē foki ki he fakatahaʻangá fakakātoa. Fakakaukau ki he founga ʻe uesia nai ai ʻa e niʻihi kehé kapau ʻe tōmui ʻa e tuku ʻa e fakatahá. ʻOku fiemaʻu ki he fanga tokoua ʻe niʻihi ke nau fakaʻuli ki ha feituʻu mamaʻo ʻi he foki ki honau ʻapí. ʻOku fiemaʻu ki he niʻihi ke nau maʻu ha pasi pe ko ha lēlue. Pea ko e niʻihi ʻoku nau maʻu ha hoa taʻetuí ʻoku nau ʻamanekina ke nau ʻi ʻapi ʻi ha taimi pau.

12. Ko e hā ʻoku tuha ai ʻa e kau mātuʻá mo e fakaʻapaʻapa mo e ʻofá? (Sio ki he puha “ Anga-Fakaʻatuʻi ki he Faʻahinga ʻOku Takimuʻá.”)

¹² ʻOku ngāue mālohi ʻa e kau mātuʻá ʻi he fakatahaʻangá pea ʻi he ngāue fakafaifekaú, ko ia ʻoku nau tuha mo ʻetau fakaʻapaʻapá mo e ʻofá. (Lau ʻa e 1 Tesalonaika 5:12, 13.) Ko e moʻoni ʻokú ke houngaʻia lahi ʻi he meʻa kotoa ʻoku nau fai maʻaú. ʻE lava ke ke fakahaaʻi eni ʻaki ʻa e talangofua loto-lelei mo poupou kiate kinautolu, koeʻuhí “ʻoku nau hanganaki leʻohi kimoutolu ʻi he tuʻunga ko e faʻahinga ʻa ia te nau fai ha fakamatala ki he meʻá ni.”​—Hep. 13:7, 17.

13. Ko e hā ʻoku lava ke tau ako mei he anga ʻo e fakafeangai ʻa Sīsū ki he kakaí?

¹³ ʻI he kikite fekauʻaki mo Sīsuú, naʻe pehē ʻe ʻAisea: “Heʻikai te ne maumauʻi ha kaho kuo laiki, pea heʻikai te ne tāmateʻi ha vavae maama ʻoku tamatemate.” (ʻAi. 42:3) Ko e ʻofa ʻa Sīsū ki he kakaí naʻá ne ʻai ia ke ne maʻu ʻa e kaungāongoʻi. Naʻá ne mahinoʻi ʻa e ongoʻi ʻa e faʻahinga naʻe ongoʻi loto-siʻi mo vaivai ʻo hangē ko ha “kaho kuo laiki” pe ko ha “vavae maama ʻoku tamatemate,” ko ia naʻá ne anga-lelei mo anga-kātaki kiate kinautolu. Naʻa mo e fānaú naʻa nau loto ke ʻia Sīsū. (Mk. 10:14) Ko e moʻoni, heʻikai lava ke tau mahinoʻi pe akoʻi ʻa e kakaí ʻi he founga naʻe fai ʻe Sīsuú! Ka ʻe lava ke tau fakahāhā ʻoku tau anga-fakaʻatuʻi ki he faʻahinga ʻi hotau feituʻu ngāué ʻi he anga ʻo ʻetau lea kiate kinautolú, ʻi he taimi ʻoku tau fai ai iá, pea mo hono fuoloa ʻo ʻetau nofo aí.

14. Ko e hā ʻoku totonu ai ke tau fakakaukau ki he anga ʻo ʻetau lea ki he kakaí?

¹⁴ ʻOku totonu ke fēfē ʻetau lea ki he kakaí? Ko e laui miliona ʻo e kakai he ʻaho ní kuo “ngaohikovia kinautolu mo liʻekina” ʻe he kau taki pisinisi,  kau taki fakapolitikale, mo e kau taki lotu kākā mo anga-fakamamahi ʻo e māmani ko ení. (Māt. 9:36) Ko hono olá, ʻoku ʻikai ke falala ʻa e tokolahi ki ha taha pē pea ʻoku ʻikai haʻanau ʻamanaki. Ko e ʻuhinga ia ʻoku fiemaʻu ai ke fakahāhā kiate kinautolu ʻi he lea ʻoku tau ngāueʻakí mo e tō ʻo hotau leʻó ʻoku tau anga-lelei pea ʻoku tau tokanga kiate kinautolu! ʻOku loto ʻa e kakai tokolahi ke fanongo ki heʻetau pōpoakí ʻo ʻikai koeʻuhi pē ko ʻetau ngāueʻaki lelei ʻa e Tohi Tapú ka koeʻuhí foki ko ʻetau mahuʻingaʻia moʻoni ʻiate kinautolu mo fakahāhā ʻa e fakaʻapaʻapa kiate kinautolú.

15. Ko e hā ha ngaahi founga ʻe lava ke tau anga-fakaʻatuʻi ai ki he kakai ʻi hotau feituʻu ngāué?

¹⁵ ʻOku lahi ʻa e ngaahi founga ʻe lava ke tau anga-fakaʻatuʻi ai ki he kakai ʻi hotau feituʻu ngāué. ʻOku fiemaʻu ke tau ʻeke ha ngaahi fehuʻi ʻi he anga-lelei mo e anga-fakaʻapaʻapa. Naʻe ngāue ha tāimuʻa ʻi ha feituʻu ʻa ia naʻe mā ai ʻa e tokolahi ʻo e kakaí, ko ia naʻá ne fakaʻehiʻehi mei hono ʻeke ha ngaahi fehuʻi ʻe ʻai ai ke nau ongoʻi mā kapau ʻoku ʻikai te nau ʻilo ʻa e tali totonú. Naʻe ʻikai te ne ʻeke, “ʻOkú ke ʻiloʻi ʻa e huafa ʻo e ʻOtuá?” pe “ʻOkú ke ʻiloʻi pe ko e hā ʻa e Puleʻanga ʻo e ʻOtuá?” ʻI hono kehé, naʻá ne leaʻaki ha meʻa hangē ko ení, “Kuó u ʻiloʻi mei he Tohi Tapú ko e ʻOtuá ʻoku ʻi ai hono huafa fakafoʻituitui. ʻE lava ke u fakahaaʻi atu ʻa e huafa ko iá?” ʻOku ʻikai ke ngāueʻaki ʻa e foungá ni ʻi he feituʻu kotoa pē, koeʻuhí he ʻoku kehekehe ʻa e kakaí mo e anga fakafonuá. Ka ʻoku totonu ke tau fakafeangai maʻu pē ʻi he anga-lelei mo e anga-fakaʻapaʻapa ki he kakai ʻi hotau feituʻu ngāué. Ke fai ení, ʻoku fiemaʻu ke tau feinga ke ʻiloʻi lelei kinautolu.

16, 17. ʻE lava fēfē ke tau fakahāhā ʻa e anga-lelei ʻi hono fakapapauʻi ʻa e (a) taimi ke ʻaʻahi ai ki he kakaí? (e) fuoloa ʻo ʻetau talanoa mo kinautolú?

¹⁶ Ko fē ʻa e taimi ʻoku totonu ke tau ʻaʻahi ai ki he kakaí? ʻI heʻetau ʻalu mei he fale ki he falé, ʻoku ʻikai ke ʻamanekina kitautolu ʻe he kakaí koeʻuhí naʻe ʻikai te nau fakaafeʻi kitautolu. ʻOku mātuʻaki mahuʻinga leva ke tau ʻaʻahi kiate kinautolu ʻi ha taimi nai te nau loto-lelei ange ai ke talanoá. (Māt. 7:12) Ko e fakatātaá, ʻoku saiʻia ʻa e kakai ʻi ho feituʻu ngāué ke mohe fuoloa ʻi he fakaʻosinga uiké? Mahalo ʻe lava ke kamata hoʻo ngāue fakafaifekaú ʻaki hoʻo ngāue ʻi he halá, faifakamoʻoni ʻi he feituʻu kakaí, pe fai ha ngaahi toe ʻaʻahi ki he kakai ʻokú ke ʻiloʻi te nau faingamālie ke talanoá.

¹⁷ ʻOku totonu ke fuoloa fēfē ʻetau ʻi aí? ʻOku femoʻuekina ʻaupito ʻa e kakai tokolahi, ko ia ʻe lelei nai ke tauhi ke nounou ʻetau ʻaʻahí, tautefito ʻi he ʻuluaki taimí. ʻOku lelei ange ke ʻosi vave ʻetau talanoá ʻi haʻatau nofo ai ʻo fuʻu fuoloa. (1 Kol. 9:20-23) ʻI he sio ʻa e kakaí ʻoku tau mahinoʻi ʻoku nau femoʻuekiná, te nau loto-lelei ange ai ke talanoa mo kitautolu ʻi he taimi hono hoko te tau sio ai kiate kinautolú. Kapau ʻoku tau fakahāhā ʻa e ngaahi ʻulungaanga ʻoku haʻu mei he laumālie ʻo e ʻOtuá, te tau hoko moʻoni ai ko e ‘kaungāngāue ʻo e ʻOtuá.’ ʻE aʻu nai ʻo ngāueʻaki kitautolu ʻe Sihova ke tokoniʻi ha tokotaha ke ne ako ʻa e moʻoní!​—1 Kol. 3:6, 7, 9.

18. ʻI heʻetau anga-fakaʻatuʻi ki he niʻihi kehé, ko e hā ʻa e ngaahi tāpuaki ʻoku tau ʻamanaki te tau maʻú?

¹⁸ Ko ia tau fai ʻa e meʻa kotoa te tau malavá ke hoko ʻo anga-fakaʻatuʻi ki he ngaahi mēmipa ʻo hotau fāmilí, ki hotau fanga tokouá mo e fanga tuofāfiné, mo e faʻahinga ʻoku tau fetaulaki ʻi he ngāue fakafaifekaú. Te tau maʻu leva ai ʻa e tāpuaki lahi, ʻi he taimí ni pea ʻi he kahaʻú. Hangē ko e lau ʻa e Saame 41:1, 2: “Fiefia ē ko ha taha ʻokú ne fakahāhā ʻa e fakaʻatuʻi ki he tokotaha māʻulaló; ʻe fakahaofi ia ʻe Sihova ʻi he ʻaho ʻo e faingataʻá. ʻE leʻohi ia ʻe Sihova pea tauhi ia ke ne moʻui. ʻE fakahaaʻi ia ko ha tokotaha fiefia ʻi he māmaní.”