1. Neongo ko Sihova ʻa e Tokotaha Aoniú, ko e hā kuó ne fakaafeʻi ke fai ʻe he niʻihi kehé?

 KO SIHOVA ʻa e Tokotaha Aoniú. Naʻá ne fakatupu ʻa e meʻa kotoa pē pea kuó ne maʻu ʻa e poto mo e mālohi taʻefakangatangata. Hili ʻene tokoniʻi ʻa Siope ke mahinoʻi ení, naʻe pehē ʻe Siope kia Sihova: “ʻOku ou ʻilo ʻoku ke mafai ʻa e meʻa kotoa pe, pea ʻoku ʻikai haʻo fakakaukau ʻe ala taʻofia.” (Siope 42:1) ʻOku lava ke fai ʻe Sihova ha meʻa pē ʻo ʻikai fiemaʻu ha tokoni mei ha taha. Ka ʻi heʻene fakahāhā ʻa e ʻofá ʻokú ne fakaafeʻi ai ʻa e niʻihi kehé ke ngāue fakataha mo ia ke fakahoko ʻene taumuʻá.

2. Ko e hā ʻa e ngāue mahuʻinga naʻe fakaafeʻi ʻe Sihova ʻa Sīsū ke ne faí?

² Naʻe fakatupu ʻe he ʻOtuá hono ʻAló ʻa Sīsū, ki muʻa ke ne fakatupu ʻa e tokotaha kotoa mo e meʻa kotoa pē. Naʻe fakaʻatā leva ʻe Sihova hono ʻAló ke tokoni kiate ia ʻi hono fakatupu ʻa e ngaahi meʻa kehe kotoa pē. (Sione 1:1-3, 18) Naʻe tohi ʻa e ʻapositolo ko Paulá ʻo fekauʻaki mo Sīsū: “Fakafou ʻiate ia, naʻe fakatupu ai ʻa e ngaahi meʻa kehe kotoa pē ʻi he langí pea ʻi he funga ʻo māmaní, ʻa e ngaahi meʻa hā mai mo e ngaahi meʻa taʻehāmai, ʻo tatau ai pē pe ko e ngaahi taloni pe tuʻunga ʻeiki pe ko e ngaahi founga-pule pe ko e ngaahi mafai kinautolu.  Ko e ngaahi meʻa kehe kotoa pē kuo fakatupu ia fakafou ʻiate ia pea maʻana.” (Kol. 1:15-17) Ko ia, naʻe ʻikai ngata pē ʻi hono ʻoange ʻe Sihova ki hono ʻAló ha ngāue mahuʻinga, ka naʻá ne tala ia ki he niʻihi kehé. Ko ha monū ia!

3. Ko e hā naʻe fakaafeʻi ʻe Sihova ke fai ʻe ʻĀtamá pea ko e hā hono ʻuhingá?

³ Naʻe toe fakaafeʻi ʻe Sihova ʻa e faʻahinga ʻo e tangatá ke ngāue fakataha mo ia. Ko e fakatātaá, naʻá ne fakaʻatā ʻa ʻĀtama ke fakahingoa ʻa e fanga manú. (Sēn. 2:19, 20) Sioloto atu ki he fiefia naʻe maʻu ʻe ʻĀtama ʻi hono fai ʻa e ngāue ko ení! Naʻá ne sivisiviʻi fakalelei ʻa e fōtunga mo e tōʻonga ʻa e fanga manú, pea naʻá ne fili leva ha hingoa taki taha moʻo kinautolu. Naʻe fakatupu ʻe Sihova ʻa e kotoa ʻo e fanga manú, ko ia naʻe mei malava pē ke ne fakahingoa kinautolu. Kae kehe, naʻá ne fakahāhā kia ʻĀtama ʻa e lahi ʻo ʻene ʻofa ʻiate iá ʻaki hono fakaʻatā ia ke ne fakahingoa ʻa e fanga manú. Naʻe toe ʻoange ʻe he ʻOtuá kia ʻĀtama ha ngāue ko hono ʻai ʻa e māmaní fakalūkufua ke hoko ko ha palataisi. (Sēn. 1:27, 28) Ka naʻe faifai atu pē ʻo fili ʻa ʻĀtama ke tuku ʻene ngāue mo e ʻOtuá, pea ko hono nunuʻá naʻe hoko ai ʻa e faingataʻa lahi kiate ia mo e kotoa ʻo hono hakó.​—Sēn. 3:17-19, 23.

4. Naʻe anga-fēfē ʻa e ngāue fakataha ha niʻihi mo e ʻOtuá ke fakahoko hono finangaló?

⁴ Ki mui ai, naʻe fakaafeʻi ʻe he ʻOtuá ha niʻihi kehe ke ngāue fakataha mo ia. Naʻe faʻu ʻe Noa ʻa e ʻaʻaké ko ha haoʻanga kiate ia mo hono fāmilí lolotonga ʻa e Lōmakí. Naʻe fakatauʻatāinaʻi ʻe Mōsese ʻa e puleʻanga ʻIsilelí mei ʻIsipite. Naʻe tataki ʻe Siosiua ʻa e kau ʻIsilelí ki he Fonua ʻo e Talaʻofá. Naʻe langa ʻe Solomone ʻa e temipale ʻi Selusalemá. Naʻe hoko ʻa Mele ko e faʻē ʻa Sīsū. Ko e kotoa ʻo e faʻahinga faitōnunga ko ení mo e tokolahi kehe naʻa nau ngāue fakataha mo Sihova ke fakahoko hono finangaló.

5. Ko e hā ʻa e ngāue ʻe lava ke tau kau ki aí, pea naʻe fiemaʻu kia Sihova ke fakakau kitautolu ʻi he ngāue ko ení? (Sio ki he ʻuluaki fakatātā ʻi he kupú ni)

⁵ ʻI he ʻahó ni, ʻoku fakaafeʻi kitautolu ʻe Sihova ke tau fai ʻa e meʻa kotoa te tau malavá ke poupouʻi hono Puleʻangá. ʻOku lahi ʻa e ngaahi founga ʻe lava ke tau tauhi ai ki he ʻOtuá. Pea neongo ʻoku ʻikai lava ke tau tauhi kotoa kiate ia ʻi he founga tatau, ʻoku tau lava kotoa ke malangaʻi ʻa e ongoongo lelei ʻo e Puleʻangá. Naʻe mei malava eni ke fai ʻe Sihova ʻiate ia pē. Naʻe mei malava ke ne folofola hangatonu mei hēvani ki he kakai ʻi he māmaní. Naʻe pehē ʻe Sīsū naʻe mei malava ʻe Sihova ke fakalea ʻa e maká ke nau tala ki he niʻihi kehé ʻo fekauʻaki mo e Tuʻi ʻo Hono Puleʻangá. (Luke 19:37-40) Ka ʻoku fakaʻatā kitautolu ʻe Sihova ke hoko ko hono “kaungāngāue.” (1 Kol. 3:9) Naʻe tohi ʻe he ʻapositolo ko Paulá: “ʻI he ngāue fakataha mo iá, ʻoku mau enginaki atu foki kiate kimoutolu ke ʻoua naʻa mou tali ʻa e ʻofa maʻataʻatā ʻa e ʻOtuá pea taʻemaʻu hono taumuʻá.” (2 Kol. 6:1) Ko ha monū lahi ia ʻi hono fakaafeʻi kitautolu ke ngāue mo e ʻOtuá. Tau sio angé ki he niʻihi ʻo e ngaahi ʻuhinga ʻoku ʻomai ai heni kia kitautolu ʻa e fiefia lahi.

6. Naʻe anga-fēfē hono fakamatalaʻi ʻe he ʻAlo ʻuluaki ʻo e ʻOtuá ʻa e anga ʻene ongoʻí fekauʻaki mo e ngāue fakataha mo ʻene Tamaí?

⁶ Ko e ngāue mo e ʻOtuá kuó ne ʻai maʻu pē ʻa e kau sevāniti ʻa Sihová ke nau fiefia. Ki muʻa ke haʻu ki he māmaní ʻa e ʻAlo ʻuluaki ʻo e ʻOtuá, naʻá ne pehē: “Naʻe maʻu au ʻe Sihova ko e kamata o ʻene fai atu . . . naʻa ku ʻi hono tafaʻaki, ko e tufunga lahi, ʻo u hakailangitau he ʻaho kotoa pe; ʻO u fiefia ʻi hono ʻao he taimi kotoa pe.” (Pal. 8:22, 30) ʻI he taimi naʻe ngāue ai ʻa Sīsū mo ʻene Tamaí, naʻá ne fiefia koeʻuhí he naʻá ne fakahoko ʻa e ngaahi meʻa lahi pea naʻá ne ʻiloʻi naʻe ʻofaʻi ia ʻe Sihova. Kae fēfē kitautolu?

7. Ko e hā ʻoku ʻomai ai kia kitautolu ʻe he ngāue fakamalangá ʻa e fiefiá?

⁷ Naʻe pehē ʻe Sīsū te tau maʻu ʻa e fiefiá fakatouʻosi ʻi he taimi ʻoku tau foaki atu aí mo maʻu mai aí. (Ngā. 20:35) ʻOku tau fiefia ʻi he taimi naʻa tau maʻu ai ʻa e moʻoní, ka ko e hā ʻoku tau  toe fiefia ai ʻi heʻetau vahevahe atu ʻa e moʻoní ki he niʻihi kehé? Koeʻuhí ko ʻetau sio kia kinautolu ʻoku nau maʻu ʻa e fiefia moʻoní ʻi he taimi ʻoku nau mahinoʻi ai ʻa e meʻa ʻoku akoʻi ʻe he Tohi Tapú pea kamata ke nau maʻu ha vahaʻangatae mo e ʻOtuá. ʻOku tau fiefia ke sio kia kinautolu ʻi he liliu ʻa e anga ʻenau fakakaukaú mo e tōʻonga moʻuí. Ko e ngāue fakamalangá ʻa e ngāue mahuʻinga taha mo fakafiefia taha ʻe lava ke tau faí. ʻOku malava ai ki he faʻahinga ʻoku nau hoko ko e ngaahi kaumeʻa ʻo e ʻOtuá ke nau maʻu ʻa e moʻui taʻengatá.​—2 Kol. 5:20.

8. Ko e hā kuo leaʻaki ʻe he niʻihi fekauʻaki mo e fiefia ʻoku nau maʻu ʻi he ngāue mo Sihová?

⁸ ʻI he taimi ʻoku tau tokoniʻi ai ʻa e niʻihi kehé ke nau ako fekauʻaki mo e ʻOtuá, ʻoku tau ʻiloʻi ʻoku tau fakahōifuaʻi ai ʻa Sihova pea ʻokú ne fakamahuʻingaʻi ʻetau feinga ke tauhi kiate iá. ʻOku ʻomai heni kia kitautolu ʻa e fiefia. (Lau ʻa e 1 Kolinitō 15:58.) ʻOku pehē ʻe Marco mei ʻĪtalí: “Kuó u maʻu ʻa e fiefia taʻehanotatau ʻi hono ʻiloʻi ʻoku ou ʻoatu hoku lelei tahá kia Sihova kae ʻikai ki ha tokotaha ʻa ia ʻe vave ʻene fakangaloʻi ʻeku ngāué.” ʻOku meimei tatau ia mo Franco, ʻa ia ʻoku toe ngāue ʻi ʻĪtali, ʻokú ne pehē: “Fakafou ʻi heʻene Folofolá mo ʻene ngaahi tokonaki fakalaumālié, ʻoku fakamanatu mai ai ʻe Sihova kia kitautolu ʻi he ʻaho kotoa ʻokú ne ʻofa ʻiate kitautolu pea ko e meʻa kotoa ʻoku tau fai kiate iá ʻoku mahuʻinga, neongo ko ʻetau ngaahi feingá ʻe hā ngali taʻemahuʻinga kia kitautolu. Ko e ʻuhinga ia ʻoku ou fiefia ai ʻi he ngāue fakataha mo e ʻOtuá pea ʻoku ʻomai ai ha moʻui ʻoku mohu ʻuhinga.”

9. Ko e hā ʻa e vahaʻangatae ʻoku maʻu ʻe Sihova mo Sīsuú, pea ko e hā hono ʻuhingá?

⁹ ʻI he taimi ʻoku tau ngāue fakataha ai mo e faʻahinga ʻoku tau ʻofa aí, ʻoku tohoakiʻi ai kitautolu ke ofi kiate kinautolu. ʻOku tau hoko ʻo ʻiloʻi ange ai honau angaʻitangatá mo honau ngaahi ʻulungāngá. ʻOku tau ʻiloʻi ʻenau ngaahi taumuʻá mo e founga ʻoku nau feinga ke aʻusia iá. Naʻe ngāue ʻa Sīsū mo Sihova ʻi he taʻu ʻe laui piliona nai. Ko ʻena ʻofá mo ʻena fetokangaʻakí naʻe hoko ʻo mālohi ʻaupito ʻa ia heʻikai lava ʻe ha meʻa ke ne maumauʻi hona vahaʻangataé. Naʻe fakamatalaʻi ʻe Sīsū ʻa e anga ʻo e vāofi hona vahaʻangataé ʻi he taimi naʻá ne pehē ai: “Ko au mo e Tamaí ʻokú ma taha.” (Sione 10:30) Naʻá na fāʻūtaha moʻoni, pea naʻá na feongoongoi kakato ʻi he taimi naʻá na ngāue fakataha aí.

10. Ko e hā ʻoku hanga ai ʻe he ngāue fakamalangá ʻo tohoakiʻi kitautolu ke ofi ange ki he ʻOtuá mo e niʻihi kehé?

¹⁰ Naʻe kole ʻe Sīsū kia Sihova ke maluʻi ʻene kau ākongá. Ko e hā hono ʻuhinga? Naʻá ne lotu: “Ke nau hoko ai ʻo taha ʻo hangē tofu pē ko kitauá.” (Sione 17:11) ʻI he taimi ʻoku tau moʻui ʻo fehoanaki mo e ngaahi tuʻunga ʻa e ʻOtuá pea kau ʻi he ngāue fakamalangá, ʻoku tau mahinoʻi ange ai hono ngaahi ʻulungaanga fakaofó. ʻOku tau ʻiloʻi ʻa e ʻuhinga ʻoku fakapotopoto ai ke tau falala kiate iá mo muimui ʻi heʻene tatakí. Pea ʻi heʻetau ʻunuʻunu ofi ki he ʻOtuá, ʻokú ne ʻunuʻunu ofi mai kiate kitautolu. (Lau ʻa e Sēmisi 4:8.) ʻOku tau toe ʻunuʻunu ofi ai ki hotau fanga tokouá mo e fanga tuofāfiné koeʻuhí ʻoku tau hokosia ʻa e ngaahi palopalema mo e fiefia meimei  tatau koeʻuhí ʻoku tau maʻu ʻa e taumuʻa tatau. ʻOku tau ngāue fakataha, fiefia fakataha mo kītaki fakataha. ʻOku pehē ʻe Octavia mei Pilitāniá: “Ko e ngāue mo Sihová ʻoku tohoakiʻi ai au ke u ofi ange ki he niʻihi kehé.” ʻOkú ne pehē, koeʻuhí ko hono vahaʻangatae he taimi ní ʻoku makatuʻunga ia ʻi he “taumuʻa mo e fakahinohino tatau.” Ko e moʻoni, ʻoku tau maʻu ʻa e fakakaukau tatau. ʻI he taimi ʻoku tau sio ai ki he feinga ʻa e fanga tokouá ke fakahōifuaʻi ʻa Sihová, ʻoku tohoakiʻi ai kitautolu ke tau ofi ange kiate kinautolu.

11. Ko e hā te tau ʻunuʻunu ofi ange ai kia Sihova mo hotau fanga tokouá ʻi he māmani foʻoú?

¹¹ Ko ʻetau ʻofa ki he ʻOtuá mo hotau fanga tokouá ʻoku mālohi ia he taimí ni, ka ʻe aʻu ʻo toe mālohi ange ʻi he māmani foʻoú. Fakakaukau ki he kotoa ʻo e ngaahi ngāue fakafiefia te tau fai ʻi he kahaʻú! Te tau talitali lelei ʻa e faʻahinga ʻe toetuʻu maí pea akoʻi kinautolu fekauʻaki mo Sihova. Te tau toe ngāue ke hoko ʻa e māmaní ko ha palataisi. ʻE hoko ko e meʻa fakafiefia moʻoni ke ngāue fakataha pea faai atu pē ʻo hoko ʻo haohaoa ʻi he malumalu ʻo e pule ʻa Kalaisí. Ko e kotoa ʻo e faʻahinga ʻo e tangatá te nau ʻunuʻunu ke fevāofiʻaki ange pea pehē kia Sihova, ʻa ia ʻokú ne fakapapauʻi mai te ne “fakamakona ʻa e holi ʻa e meʻa moʻui kotoa.”​—Saame 145:16.

12. ʻOku anga-fēfē hoko ʻa e ngāue fakamalangá ko ha maluʻangá?

¹² ʻOku fiemaʻu ke maluʻi hotau vahaʻangatae mo Sihová. ʻOku tau moʻui ʻi he māmani ʻo Sētané pea ʻoku tau taʻehaohaoa, ko ia ʻe faingofua ai kiate kitautolu ke tau kamata ke fakakaukau mo ngāue ʻo hangē ko e māmaní. ʻOku hangē ia ko e kakau ʻi ha vaitafe ʻoku ʻave ai kitautolu ʻe he ʻaú ki he feituʻu ʻoku ʻikai ke tau loto ke ʻalu ki ai. Ko ia, kuo pau ke tau ngāueʻaki hotau mālohí kotoa ke kakau ki he feituʻu ʻe tahá. ʻI he tuʻunga meimei tatau, ʻoku fiemaʻu ke tau ngāue mālohi ke fakaʻehiʻehi mei hono tākiekina kitautolu ʻe he māmani ʻo Sētané. Kae kehe, ʻoku anga-fēfē hono maluʻi kitautolu ʻe he ngāue fakamalangá? ʻI he taimi ʻoku tau talanoa ai fekauʻaki mo Sihova mo e Tohi Tapú, ʻoku tau tokangataha ai ki he ngaahi meʻa ʻoku mahuʻinga mo leleí, kae ʻikai ko e ngaahi meʻa te ne fakavaivaiʻi ʻetau tuí. (Fil. 4:8) ʻOku hanga ʻe he ngāue fakamalangá ʻo fakaivimālohiʻi ʻetau tuí koeʻuhí ʻoku fakamanatu mai ai kia kitautolu ʻa e ngaahi talaʻofa ʻa e ʻOtuá mo ʻene ngaahi tuʻunga anga-ʻofá. ʻOku toe tokoniʻi ai kitautolu ke tauhi maʻu ʻa e ngaahi ʻulungaanga ʻoku tau fiemaʻú koeʻuhí ke maluʻi ai kitautolu meia Sētane mo hono māmaní.​—Lau ʻa e ʻEfesō 6:14-17.

13. ʻOku anga-fēfē ʻa e ongoʻi ha tokoua ʻi ʻAositelēlia fekauʻaki mo e ngāue fakamalangá?

¹³ ʻI he taimi ʻoku tau femoʻuekina ai ʻi he malangá, ngaahi meʻa fakalaumālié mo hono fai ha ngaahi ngāue maʻá e niʻihi ʻi he fakatahaʻangá, ʻoku maluʻi ai kitautolu koeʻuhí heʻikai leva ke ʻi ai ha taimi ke tau hohaʻa tōtuʻa ai ki hotau ngaahi palopalemá tonu. Ko Joel mei ʻAositelēliá, ʻokú ne pehē: “ʻOku tokoniʻi au ʻe he ngāue fakamalangá ke u tokangataha ki he meʻa ʻoku mahuʻinga angé. ʻOku fakamanatu mai kiate au ʻa e ngaahi pole ʻoku fehangahangai mo e kakaí pea mo e ʻaonga kuó u hokosia ʻi hono ngāueʻaki ʻa e ngaahi tefitoʻi moʻoni Fakatohitapú ʻi heʻeku moʻuí. ʻOku tokoniʻi au ʻe he ngāue fakamalangá ke u feinga ke nofoʻaki anga-fakatōkilalo; ʻoku ʻomai ai ʻa e faingamālie ke u falala ai kia Sihova pea ki hoku fanga tokouá mo e fanga tuofāfiné.”

14. Ko e hā ʻoku fakahaaʻi ai ʻi heʻetau kītaki ʻi he ngāue fakamalangá ʻoku ʻiate kitautolu ʻa e laumālie ʻo e ʻOtuá?

¹⁴ ʻOku toe ʻomai ʻe he ngāue fakamalangá ʻa e tuipau lahi ange ʻoku ʻiate kitautolu ʻa e laumālie ʻo e ʻOtuá. Ke fakatātaaʻi: Sioloto atu ko hoʻo ngāué ko hono tufaki ʻa e maá ki he kakai ʻi ho feituʻú. ʻOku ʻikai totongi koe ʻi hono fai ʻa e ngāué ni, pea ʻokú ke fua pē hoʻo fakamolé. Pehē foki, ʻoku ʻikai saiʻia ʻa e tokolahi taha ʻo e kakaí ʻi he maá, pea aʻu ʻa e niʻihi ʻo fehiʻa ʻiate koe ʻi hoʻo tufaki atu ʻa e maá kiate kinautolú. Ko e hā hono fuoloa haʻo hokohoko atu ʻi ha ngāue pehē?  ʻE vave haʻo ongoʻi loto-siʻi pea ngalingali te ke tukuange ʻa e ngāué. Kae kehe, ko e tokolahi ʻo kitautolu ʻoku tau hokohoko atu ʻi he ngāue fakamalangá ʻi he taʻu ki he taʻu, neongo ʻoku fakamoleki ai hotau taimí mo e paʻangá pea aʻu ʻo fakakataʻaki kitautolu ʻe he kakai ʻe niʻihi pe ʻita mai. ʻOku fakamoʻoniʻi heni hono tokoniʻi kitautolu ʻe he laumālie ʻo e ʻOtuá.

15. ʻOku anga-fēfē ʻa e fekauʻaki hono malangaʻi ʻa e ongoongo leleí mo e taumuʻa ʻa e ʻOtuá ki he faʻahinga ʻo e tangatá?

¹⁵ ʻOku anga-fēfē ʻa e fekauʻaki ʻa e ngāue fakamalangá mo e taumuʻa ʻa Sihova ki he faʻahinga ʻo e tangatá? Naʻe taumuʻa ʻa e ʻOtuá ke moʻui taʻengata ʻa e faʻahinga ʻo e tangatá, pea naʻe ʻikai liliu ʻene taumuʻá ʻi he taimi naʻe faiangahala ai ʻa ʻĀtamá. (ʻAi. 55:11) Naʻe fai ʻe he ʻOtuá ha fokotuʻutuʻu ke fakatauʻatāinaʻi kitautolu mei he angahalá mo e maté. Anga-fēfē? Naʻe haʻu ʻa Sīsū ki māmaní ʻo feilaulauʻi ʻene moʻuí. Ka ke maʻu ʻaonga mei heʻene feilaulaú ʻoku fiemaʻu ki he faʻahinga ʻo e tangatá ke talangofua ki he ʻOtuá. Ko ia, naʻe akoʻi ʻe Sīsū ʻa e kakaí ki he meʻa ʻoku fiemaʻu ʻe he ʻOtuá meiate kinautolú, pea naʻá ne fekauʻi ʻene kau ākongá ke nau fai ʻa e meʻa tatau. ʻI he taimi ʻoku tau malanga mo tokoniʻi ai ʻa e niʻihi kehé ke nau hoko ʻo kaumeʻa mo e ʻOtuá ʻi he ʻaho ní, ʻoku tau ngāue fakahangatonu ai mo e ʻOtuá ʻi heʻene fokotuʻutuʻu anga-ʻofa ke fakahaofi ʻa e faʻahinga ʻo e tangatá mei he angahalá mo e maté.

16. ʻOku anga-fēfē ʻa e kaunga ʻetau ngāue fakamalangá ki he ongo fekau lahi taha ʻa e ʻOtuá?

¹⁶ ʻI he taimi ʻoku tau tokoniʻi ai ʻa e niʻihi kehé ke nau ʻiloʻi ʻa e hala ki he moʻui taʻengatá, ʻoku fakahaaʻi ai ʻetau ʻofa kiate kinautolu pea pehē kia Sihova. “Ko hono finangaló ia ke hoko ʻa e faʻahinga kakai kotoa pē ʻo fakahaofi pea ke nau aʻusia ha ʻilo totonu ki he moʻoní.” (1 Tīm. 2:4) ʻI he taimi naʻe ʻeke ai ʻe ha Fālesi kia Sīsū pe ko e hā ʻa e fekau lahi taha ʻa e ʻOtuá, naʻe pehē ʻe Sīsū: “‘Kuo pau ke ke ʻofa kia Sihova ko ho ʻOtuá ʻaki ho lotó kotoa pea ʻaki hoʻo moʻuí kotoa pea ʻaki ho ʻatamaí kotoa.’ Ko ʻeni ia ʻa e fekau lahi tahá mo muʻomuʻá. Ko hono uá, hangē ko iá, ʻa eni: ‘Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé.’” (Māt. 22:37-39) ʻI hono malangaʻi ʻa e ongoongo leleí, ʻoku tau talangofua ai ki he ongo fekau ko ení.​—Lau ʻa e Ngāue 10:42.

17. ʻOku anga-fēfē hoʻo ongoʻi fekauʻaki mo e monū ke malangaʻi ʻa e ongoongo leleí?

¹⁷ He tāpuaki moʻoni ia kiate kitautolu! Kuo ʻomi ʻe Sihova ha ngāue ʻokú ne ʻomai ʻa e fiefia kiate kitautolu, tohoakiʻi kitautolu ke ofi ange kiate ia mo hotau fanga tokouá, pea ʻoku maluʻi ai hotau vahaʻangatae mo iá. ʻOku toe ʻomai kiate kitautolu ha faingamālie ke fakahāhā ai ʻetau ʻofa ki he ʻOtuá mo e niʻihi kehé. Kuo ʻi ai ʻa e kau sevāniti ʻe laui miliona ʻa Sihova takatakai ʻi he māmaní, pea ko e kotoa ʻo kinautolu ʻoku nau maʻu ʻa e ngaahi tuʻunga mātuʻaki kehekehe. Kae tatau ai pē pe ʻoku tau kei iiki pe taʻumotuʻa, tuʻumālie pe masiva, mālohi pe vaivai, ʻoku tau fai ʻa e meʻa kotoa te tau ala lavá ke vahevahe atu ʻetau tuí ki he niʻihi kehé. ʻOku tau ongoʻi ʻo hangē ko Chantel mei Falaniseé, ʻa ia naʻá ne pehē: “Ko e Tokotaha mālohi taha ʻo e ʻunivēsí, ko e Tokotaha Fakatupu ʻo e meʻa kotoa pē, ko e ʻOtua fiefia, ʻokú ne pehē mai: ‘ʻAlu! Lea! Lea maʻá ku, lea mei ho lotó. ʻOku ou ʻoatu hoku mālohí, ko ʻeku Folofolá ʻa e Tohi Tapú, poupou fakahēvaní, kaungāngāue ʻi he māmaní, ako fakalaumālié mo e fakahinohino tonu ʻi hono taimi totonu.’ He monū kāfakafa ē ko hono fai ʻa e meʻa ʻoku kole mai ʻe Sihova kiate kitautolú pea ke ngāue fakataha mo hotau ʻOtuá!”