1, 2. (a) Ko e hā ʻa e ngāue mahuʻinga taha ʻi he moʻui ʻa Sīsuú, pea ko e hā hono ʻuhingá? (e) Ko e hā kuo pau ke tau fai ke hoko ai ʻo lavameʻa ʻi he tuʻunga ko e ‘kaungāngāue ʻo e ʻOtuá’?

 KO Sīsū Kalaisí naʻá ne hoko ko ha tufunga peá ne hoko ki mui ai ko ha faifekau. (Mk. 6:3; Loma 15:8) Naʻá ne fai fakatouʻosi ʻa e ongo ngāue ko iá ʻi he tuʻunga haohaoa. ʻI hono tuʻunga ko ha tufungá, naʻá ne ako ʻa e founga ke ngāueʻaki ai ʻene ngaahi meʻangāué ke ngaohiʻaki ha ngaahi koloa ʻaonga mei he papá. Pea ʻi hono tuʻunga ko ha faifekaú, naʻá ne ngāueʻaki ʻa ʻene ʻilo loloto ki he Folofolá ke tokoniʻi ʻa e kakai lāuvalé ke nau mahinoʻi ʻa e moʻoni mei he Folofola ʻa e ʻOtuá. (Māt. 7:28; Luke 24:32, 45) ʻI he taʻu 30 ʻa Sīsuú, naʻe tuku ʻa ʻene tufungá peá ne hoko ko ha faifekau koeʻuhí naʻá ne ʻiloʻi ko e ngāue mahuʻinga taha eni naʻe lava ke ne faí. Naʻá ne pehē ko hono malangaʻi ʻa e ongoongo lelei ʻo e Puleʻanga ʻo e ʻOtuá ʻa e ʻuhinga ʻe taha naʻe fekauʻi mai ai ia ʻe he ʻOtuá ki he māmaní. (Māt. 20:28; Luke 3:23; 4:43) Naʻe tokangataha ʻa Sīsū ʻi heʻene moʻuí ki hono malangaʻi ʻa e ongoongo leleí, pea naʻá ne loto ke fai ʻe he niʻihi kehé ʻa e meʻa tatau.​—Māt. 9:35-38.

² Ko e tokolahi taha ʻo kitautolú ʻoku ʻikai ko ha kau tufunga, ka ko kitautolu kotoa ko e kau faifekau ʻoku tau akoʻi ki he niʻihi kehé ʻa e ongoongo leleí. ʻOku mātuʻaki mahuʻinga ʻa e ngāué ni he ʻoku kau ai ʻa e ʻOtuá. Ko hono moʻoní, ʻoku ui kitautolu ko e ‘kaungāngāue ʻo e ʻOtuá.’ (1 Kol. 3:9; 2 Kol. 6:4) ʻOku tau loto-tatau mo e tokotaha-tohi-sāmé ʻa ia naʻá ne pehē: “Ko e uho tonu ʻo hoʻo folofolá ʻoku moʻoni.” (Saame 119:159, 160) Ko e folofola ʻa Sihová ko e moʻoní ia. Ko e ʻuhinga ia ʻoku tau loto ai ke fakapapauʻi ʻoku tau “tofa totonu ʻa e folofola ʻo e moʻoní”  ʻi heʻetau ngāue fakafaifekaú. (Lau ʻa e 2 Tīmote 2:15.) Ko ia ʻoku tau hanganaki feinga ke hoko ʻo toe pōtoʻi ange ʻi hono ngāueʻaki ʻa e Tohi Tapú, ʻa ʻetau meʻangāue tefitó ki hono akoʻi ʻa e niʻihi kehé fekauʻaki mo Sihova, Sīsū, pea mo e Puleʻangá. Ke tokoniʻi kitautolu ke tau hoko ʻo lavameʻa ʻi heʻetau ngāue fakafaifekaú, kuo ʻomai ʻe he kautaha ʻa Sihová ha toe ngaahi meʻangāue ʻaonga kehe, pea ʻoku fiemaʻu ke tau ʻiloʻi foki ʻa e founga ʻo hono ngāueʻakí. Ko e ngaahi meʻangāué ni ʻoku ʻi heʻetau Puha Meʻangāue Fakafaiakó.

3. Ko e hā ʻoku totonu ke tau tokangataha ki ai ʻi heʻetau ngāue fakafaifekaú, pea ʻoku anga-fēfē hono tokoniʻi kitautolu ʻe he Ngāue 13:48 ke tau fai iá?

³ Te ke fifili nai pe ko e hā ʻoku tau ui ai ia ko ha Puha Meʻangāue Fakafaiako ʻo ʻikai ko ha Puha Meʻangāue Fakamalangá. ʻOku peheé koeʻuhí ke “malanga” ʻoku ʻuhinga iá ko hono talaki ha pōpoaki, ka ke “faiako” ʻoku ʻuhinga iá ko hono fakamatalaʻi ʻa e pōpoaki ko iá koeʻuhi ke mahinoʻi ʻe he tokotahá ʻa e meʻa ʻokú ne fanongo ki aí pea ueʻi leva ai ke ne ngāueʻi ʻa e meʻa ʻokú ne akó. Lolotonga ʻa e taimi nounou ʻoku toe ʻi he fokotuʻutuʻu ko ení, kuo pau ke tau tokangataha ki hano kamataʻi ha ngaahi ako Tohi Tapu pea akoʻi ʻa e moʻoní ki he kakaí koeʻuhi ke lava ʻo nau hoko ko e kau ākonga ʻa Kalaisi. ʻOku ʻuhinga ení ʻoku totonu ke tau kumi tōtōivi ki he faʻahinga kotoa ʻoku “hehema totonu ki he moʻui taʻengatá” pea tokoniʻi kinautolu ke nau kamata tauhi kia Sihova.​—Lau ʻa e Ngāue 13:44-48.

4. ʻE lava fēfē ke tau maʻu ʻa e faʻahinga ʻoku “hehema totonu ki he moʻui taʻengatá”?

⁴ ʻE lava fēfē ke tau maʻu ʻa e faʻahinga ʻoku “hehema totonu ki he moʻui taʻengatá”? Ki he muʻaki kau Kalisitiané, ko e founga pē taha ke maʻu ai ʻa e kakai ko iá ko e malanga. Naʻe tala ʻe Sīsū ki heʻene kau ākongá: “ʻIlonga ha kolo lahi pe ha kolo siʻi te mou hū ki ai, kumi pe ko hai ai ʻoku tāú.” (Māt. 10:11) ʻOku fiemaʻu ke tau fai ʻa e meʻa tatau ʻi he ʻahó ni. Ko e moʻoni, kapau ʻoku ʻikai ke loto-totonu ʻa e kakaí, ʻoku nau pōlepole, pe ʻoku ʻikai te nau tokanga moʻoni fekauʻaki mo e ʻOtuá, ʻoku ʻikai ke tau ʻamanekina te nau fanongo ki he ongoongo leleí. ʻOku tau kumi ki he kakai ʻoku nau loto-totonu, anga-fakatōkilalo, pea loto moʻoni ke ʻiloʻi ʻa e moʻoní. ʻE lava ke tau fakahoa ʻetau kumi ki he kakaí ki he meʻa naʻe pau ke fai ʻe Sīsū ʻi heʻene hoko ko ha tufungá. Ki muʻa ke lava ʻo ne ngaohi ha naunau fale, matapā, ʻioke, pe ko ha toe meʻa, naʻe ʻuluaki pau ke ne maʻu ʻa e papa totonú. ʻE lava leva ke ne ʻomi ʻene puha meʻangāué, ngāueʻaki ʻene ngaahi pōtoʻí, pea ngaohi ha meʻa. ʻI ha founga meimei tatau ʻi he ʻahó ni, kuo pau ke tau ʻuluaki kumi ke maʻu ʻa e kakai loto-totonú, pea ʻe lava leva ke tau ngāueʻaki ʻetau ngaahi meʻangāué mo e pōtoʻí ke tokoniʻi kinautolu ke nau hoko ko e kau ākonga.​—Māt. 28:19, 20.

5. Ko e hā ʻoku fiemaʻu ke tau ʻilo fekauʻaki mo e ngaahi meʻangāue ʻi heʻetau Puha Meʻangāue Fakafaiakó? Fakatātaaʻi. (Sio ki he ʻuluaki fakatātā ʻi he kupú ni.)

⁵ ʻOku ʻi ai ha taumuʻa tefito ki he meʻangāue taki taha ʻi ha puha meʻangāue. Ko e fakatātaá, fakakaukau ki he ngaahi meʻangāue naʻe ngāueʻaki ʻe Sīsū ʻi heʻene hoko ko ha tufungá. a (Sio ki he fakamatala ʻi lalo.) Naʻá ne fiemaʻu ha ngaahi meʻangāue ki hono fua, fakaʻilongaʻi, tutuʻu, vili, mo fakafuo, pea pehē ki hono ʻai ke lēvolo mo hono hokoʻi fakataha ʻa e papá. ʻI he tuʻunga meimei tatau, ʻoku ʻi ai ha taumuʻa tefito ki he meʻangāue taki taha ʻi heʻetau Puha Meʻangāue Fakafaiakó. Ko ia tau feinga ke ʻilo ʻa e founga ke ngāueʻaki ai ʻa e ngaahi meʻangāue mahuʻinga ko ení.

6, 7. (a) Kuo anga-fēfē hoʻo ngāueʻaki ʻa e kaati fetuʻutakí? (e) Ko e hā ʻoku tau ngāueʻaki ai ʻa e tohi fakaafe ki he fakataha ʻa e fakatahaʻangá?

⁶ Kaati Fetuʻutaki. Ko e fanga kiʻi meʻangāue iiki eni ka ʻoku ʻaonga ʻaupito ʻokú ne tala ki he kakaí pe ko hai kitautolu pea tataki kinautolu ki heʻetau uepisaiti jw.org. ʻE lava ke nau ako lahi ange fekauʻaki mo kitautolu ʻi heʻetau uepisaití pea aʻu ʻo lava ke nau kole ha ako Tohi Tapu. Kuo aʻu eni ʻo kole ʻi he jw.org ʻe he kakai ʻe toko 400,000 tupu ke nau ako Tohi Tapu, pea ʻoku fai pehē  ʻa e lauingeau ʻi he ʻaho kotoa pē! ʻE lava ke ke tauhi ha kaati fetuʻutaki ʻo ngāueʻaki ʻi hoʻo talanoa mo e kakai ʻokú ke fetaulaki mo ia ʻi he lolotonga ʻa e ʻahó.

⁷ Tohi Fakaafe. Ko e tohi fakaafe kuo pulusi ki heʻetau ngaahi fakatahá ʻoku pehē ai: “ʻOku fakaafeʻi koe ke ako ʻa e Tohi Tapú mo e Kau Fakamoʻoni ʻa Sihová.” ʻOku pehē leva ai ʻe lava ke ke fai eni “ʻi heʻemau ngaahi fakataha maʻá e kakaí” “pe mo ha tokotaha faiako fakafoʻituitui.” Ko ia ʻoku tala ʻe he tohi fakaafé ki he kakaí pe ko hai kitautolu pea ʻoku toe fakaafeʻi ai ʻa e faʻahinga ʻoku nau “lāuʻilo ki heʻenau fiemaʻu fakalaumālié” ke nau ako Tohi Tapu mo kitautolu. (Māt. 5:3) Ko e moʻoni, ʻoku talitali lelei ʻa e kakaí ke nau maʻu ʻetau ngaahi fakatahá tatau ai pē pe te nau tali ha ako Tohi Tapu pe ʻikai. ʻI heʻenau omi ki heʻetau ngaahi fakatahá, te nau sio ai ki he lahi ʻo e meʻa ʻe lava ke nau ako fekauʻaki mo e Tohi Tapú.

8. Ko e hā ʻoku mahuʻinga ai ke haʻu tuʻo taha ʻa e kakaí ki heʻetau fakatahá? ʻOmai ha fakatātā.

⁸ ʻOku mahuʻinga ke tau hanganaki fakaafeʻi ʻa e kakaí ke nau maʻu ʻetau fakatahá naʻa mo e tuʻo taha pē. Ko e hā hono ʻuhingá? Koeʻuhí ʻi heʻenau omí, te nau sio ai ʻoku akoʻi ʻe he Kau Fakamoʻoni ʻa Sihová ʻa e moʻoni mei he Tohi Tapú pea tokoniʻi ʻa e kakaí ke nau hoko ʻo ʻiloʻi ʻa e ʻOtuá, lolotonga ia ʻoku ʻikai ke fai pehē ʻa e ngaahi lotu loí. (ʻAi. 65:13) Ko e fakatātaá, ko ha ongo meʻa mali ʻi ʻAmelika ko Ray mo Linda naʻá na fakatokangaʻi ʻa e faikehekehe ko ení ʻi ha ngaahi taʻu he kuohilí. Naʻá na tui ki he ʻOtuá pea loto ke na hoko ʻo ʻiloʻi lelei ange ia. Ko ia naʻá na fili ke ʻaʻahi ki he siasi kotoa pē ʻi hona koló pea kumi ki he meʻa ʻe ua ki muʻa ke na kau ki ha siasi. ʻUluakí, kuo pau ke na ako ha meʻa ʻi he siasí, pea ko hono uá, ko e kau mēmipa ʻo e siasí kuo pau ke nau ʻai vala ʻo hangē ko e kakai ʻoku nau taukaveʻi ʻoku nau tauhi ki he ʻOtuá. Naʻá na fai ia ʻi ha ngaahi taʻu koeʻuhí naʻe lahi fau ʻa e ngaahi siasí. Ka naʻe mātuʻaki siva ʻena ʻamanakí. Naʻe ʻikai te na ako ha meʻa, pea naʻe vala mātuʻaki taʻefakaʻapaʻapa ʻa e kau mēmipa ʻo e siasí. Hili ʻena ʻaʻahi ki he siasi fakamuimui taha ʻi heʻena lisí, naʻe ʻalu ʻa Linda ki he ngāué pea foki ki ʻapi ʻa Ray. ʻI heʻene foki ki ʻapí, naʻá ne lele atu ʻi ha Fale Fakatahaʻanga. Naʻá ne fakakaukau, ‘Te u hū ʻo sio pe ko e hā ʻoku fai aí.’ Ko e moʻoni, ko e hokosia lelei taha eni ʻi he ʻaʻahi kotoa naʻá na faí! Ko e tokotaha kotoa ʻi he Fale Fakatahaʻangá naʻe anga-lelei mo anga-fakakaumeʻa pea teunga lelei ʻaupito. Naʻe tangutu ʻa Ray ʻi he ʻotu muʻá pea naʻá ne saiʻia ʻi he meʻa naʻá ne akó! ʻOku fakamanatu mai heni kiate kitautolu ʻa hono fakamatalaʻi ʻe he ʻapositolo ko Paulá ha tokotaha ʻoku ʻalu ki ha fakataha ʻi he ʻuluaki taimí peá ne pehē: “ʻOku ʻiate kimoutolu moʻoni ʻa e ʻOtuá.” (1 Kol. 14:23-25) Naʻe ʻalu ʻa Ray ki he fakatahá ʻi he Sāpate kotoa pē ʻi he hili iá. Naʻá ne kamata leva ke ʻalu ki he fakataha kotoa pē ʻi he lolotonga ʻo e uiké. Naʻe toe kamata ke ʻalu ʻa Linda ki he ngaahi fakatahá, pea neongo naʻá na taʻu 70 tupu, naʻá na ako Tohi Tapu peá na papitaiso.

9, 10. (a) Ko e hā ʻoku faingofua ai ʻa hono ngāueʻaki ʻo e ngaahi tulekí? (e) Fakamatalaʻi ʻa e founga ke ngāueʻaki ai ʻa e tuleki Ko e Hā ʻa e Puleʻanga ʻo e ʻOtuá?

⁹ Tuleki. ʻOku ʻi ai ʻetau tuleki ʻe valu ʻi heʻetau puha meʻangāué. ʻOku faingofua hono ngāueʻakí, pea ʻoku ola lelei ʻaupito ki hono kamata ha fetalanoaʻaki. Koeʻuhi naʻe tuku ange mai ʻa e fuofua tulekí ʻi he 2013, kuo pulusi hano tatau ʻe nima piliona nai! Ko e ngaahi tulekí ni ʻoku nau sīpinga tatau kotoa. Ko ia ʻi hoʻo ʻilo pē ʻa e founga ʻo hono ngāueʻaki ha taha ʻo kinautolú, ʻe lava ke ke ngāueʻaki kotoa kinautolu! ʻE lava fēfē ke ke ngāueʻaki ha tuleki ke kamata ha fetalanoaʻaki mo ha taha?

¹⁰ Mahalo pē te ke loto ke ngāueʻaki ʻa e tuleki Ko e Hā ʻa e Puleʻanga ʻo e ʻOtuá? Fakahaaʻi ki he tokotahá ʻa e fehuʻi ʻi muʻá pea ʻeke: “Kuó ke fifili nai ʻi ha taimi pe ko e hā ʻa e Puleʻanga ʻo e ʻOtuá? Te ke pehē nai ko e . . . ?” ʻEke leva pe ko fē ha taha ʻi he tali ʻe tolú te ne filí. ʻI he ʻikai pehē ʻoku tonu pe hala ʻene talí, fakaava pē ʻa e tulekí ki he konga ʻi loto “Ko e Lau ʻa e Tohi Tapú” pea lau ʻa e ongo veesi ʻoku ʻasi aí, ko e Taniela 2:44 mo e ʻAisea 9:6. ʻI he ʻosi hoʻomo fetalanoaʻakí, ʻeke ʻa e fehuʻi ʻi  mui ʻi he kaveinga “Ke Fakakaukau ki Ai”: “ʻE fēfē ʻa e moʻuí ʻi he malumalu ʻo e pule ʻa e Puleʻanga ʻo e ʻOtuá?” ʻE lava ke ke tali ʻa e fehuʻi ko iá ʻi hoʻomo fetalanoaʻaki hono hokó. ʻI hoʻomo toe fetaulakí, ʻe lava ke ke ngāueʻaki ʻa e lēsoni 7 ʻo e polosiua Ongoongo Lelei mei he ʻOtuá!, ʻa ia ko e taha ia ʻo ʻetau ngaahi meʻangāue ki hono kamata ha ako Tohi Tapu.

11. Ko e hā ʻoku fakataumuʻa ke fai ʻe heʻetau ongo makasiní, pea ko e hā ʻoku totonu ke tau ʻilo fekauʻaki mo iá?

¹¹ Makasini. Ko e Taua Leʻo mo e ʻĀ Hake! ʻa e ongo makasini ʻoku pulusi mo tufaki lahi taha ʻi he māmaní! Koeʻuhi ʻoku lau ʻe he kakai mei he fonua lahi kehekehe ʻa e ongo makasini ko ení, ʻoku fakataumuʻa ʻa e ngaahi kaveinga ʻi he takafí ke fakamānako ki he kakai ʻi he feituʻu kotoa pē. ʻOku totonu ke tau ngāueʻaki ʻa e ongo makasini ko ení ke tokoniʻi ʻa e kakaí ke nau tokangataha ki he meʻa ʻoku mahuʻinga taha ʻi he moʻuí he ʻaho ní. Ka ko e ʻuluaki meʻá, ʻoku fiemaʻu ke tau ʻiloʻi ʻa e faʻahinga tokotaha pau ʻoku fakataumuʻa ki ai ha makasini.

12. (a) ʻOku fakataumuʻa kia hai ʻa e ʻĀ Hake!, pea ko e hā ʻene taumuʻá? (e) Ko e hā ha ngaahi hokosia lelei kuó ke maʻu ki muí ni ʻi hono ngāueʻaki ʻa e meʻangāue ko ení?

¹² Ko e ʻĀ Hake!  b ʻoku fakataumuʻa ia ki he kakai ʻoku siʻi ʻaupito pe halaʻatā haʻanau ʻilo fekauʻaki mo e Tohi Tapú. ʻOku ʻikai nai ke nau ʻilo ha meʻa fekauʻaki mo e ngaahi akonaki faka-Kalisitiané, ʻoku ʻikai nai ke nau falala moʻoni ki he lotú, pe ʻoku ʻikai nai ke nau ʻiloʻi ʻe lava ke tokoniʻi kinautolu ʻe he Tohi Tapú ʻi heʻenau moʻui fakafoʻituituí. Ko e taumuʻa tefito ʻe taha ʻa e ʻĀ Hake! ke fakatuipauʻi ki he tokotaha lautohí ʻoku ʻi ai ha ʻOtua. (Loma 1:20; Hep. 11:6) ʻOku toe tokoniʻi foki ai ʻa e tokotaha lautohí ke ne tui ko e Tohi Tapú “ko hono tuʻunga moʻoní, ko e folofola ia ʻa e ʻOtuá.” (1 Tes. 2:13) Ko e ʻīsiu ʻe tolu ʻi he 2018 ko hono ngaahi kaveinga eni: “Ko e Founga ki he Fiefiá,” “Fakapulipuli ʻe 12 ki he Fāmili Lavameʻá,” mo e “Tokoni ki he Faʻahinga ʻOku Mamahí.”

13. (a) ʻOku fakataumuʻa kia hai ʻa e pulusinga ʻo e Taua Leʻo maʻá e kakaí? (e) Ko e hā ha ngaahi hokosia lelei kuó ke maʻu ki muí ni ʻi hono ngāueʻaki ʻa e meʻangāue ko ení?

¹³ Ko e taumuʻa tefito ʻa e pulusinga ʻo e Taua Leʻo maʻá e kakaí ke fakamatalaʻi ʻa e ngaahi akonaki Fakatohitapú ki he kakai ʻoku nau maʻu ha fakaʻapaʻapa ki he ʻOtuá mo e Tohi Tapú. ʻOku nau ʻilo nai ha ngaahi meʻa fekauʻaki mo e Tohi Tapú, ka ʻoku ʻikai te nau mahinoʻi totonu ʻa e meʻa ʻokú ne akoʻí. (Loma 10:2; 1 Tīm. 2:3, 4) Ko e ʻīsiu ʻe tolu ki he 2018 ʻoku tali ai ʻa e ngaahi fehuʻi ko ení: “ʻOku Kei ʻAonga ʻa e Tohi Tapú ʻi he ʻAhó Ni?,” “Ko e Hā ʻOku Tuku Tauhi Mai ʻe he Kahaʻú?,” mo e “ʻOku Tokanga Mai ʻa e ʻOtuá Fekauʻaki mo Koe?”

14. (a) Ko e hā ʻoku fakataumuʻa ke fai ʻe he vitiō ʻe fā ʻi heʻetau Puha Meʻangāue Fakafaiakó? (e) Ko e hā ha ngaahi hokosia lelei kuó ke maʻu ʻi hono hulu ʻa e ngaahi vitiō ko ení?

¹⁴ Vitiō. ʻI he taimi ʻo Sīsuú, ko e ngaahi meʻangāue pē naʻe maʻu ʻe ha tufunga ko e ngaahi meʻangāue ke ngāueʻaki nima. Ka ʻi he taimi ní, ʻoku toe maʻu ʻe he kau tufungá ʻa e ngaahi meʻangāue ʻoku ngāueʻaki ki ai ʻa e ivi fakaʻuhila, hangē ko e kili, vili, mo e mīsini sanipepa. ʻI heʻetau malanga ʻi he ʻaho ní, tānaki atu ki he ʻū tohi ʻoku pulusí, ʻoku tau maʻu ʻa e ngaahi vitiō lelei ke hulu ki he kakaí. Ko e vitiō ʻe fā ʻoku ʻi heʻetau puha meʻangāué: Ko e Hā ke Ako Ai ʻa e Tohi Tapú?, Ko e Hā ʻOku Fai ʻi ha Ako Tohi Tapu?, Ko e Hā ʻOku Fai ʻi ha Fale Fakatahaʻanga? mo e Kau Fakamoʻoni ʻa Sihová​—Ko Hai Kimautolu? Ko e vitiō nounou angé ʻoku lava ke hulu ia ʻo siʻi hifo he miniti ʻe ua pea ʻoku ola lelei ʻi he ʻuluaki ʻaʻahí. Ko e vitiō lōloa angé ʻe lava ke ngāueʻaki ʻi he toe ʻaʻahí mo e faʻahinga ʻoku ʻi ai honau taimi lahi angé. Ko e ngaahi vitiō ko ení ko e ngaahi meʻangāue lelei ʻaupito ia he ʻoku lava ke ueʻi ai ʻa e kakaí ke nau ako Tohi Tapu pea omi ki heʻetau ngaahi fakatahá.

15. Ko e hā ʻa e ola ʻoku lava ke hoko ki he kakaí ʻi heʻenau sio ʻi ha taha ʻo ʻetau ngaahi vitioó ʻi heʻenau leá? ʻOmai ha fakatātā.

¹⁵ Ko ha fakatātā, naʻe fetaulaki ha tuofefine mo ha fefine naʻe hiki mei Maikolonīsia pea ko ʻene  ʻuluaki leá ʻa e lea faka-Iepí. Naʻe hulu ange ʻe he tuofefiné kiate ia ʻa e Ko e Hā ke Ako Ai ʻa e Tohi Tapú? ʻi he lea faka-Iepí. ʻI he kamata ʻa e vitioó, naʻe pehē ange ʻe he fefiné: “Ko ʻeku leá eni. ʻOku ʻikai lava ke u tui ki ai! ʻOku lava ke u tala mei he tō ʻene leá ko ʻene haʻu mei hoku motú. ʻOkú ne lea ʻi heʻeku leá!” ʻI he hili iá, naʻá ne pehē te ne lau mo sio ʻi he meʻa kotoa pē ʻi heʻene leá ʻi he jw.org. (Fakafehoanaki mo e Ngāue 2:8, 11.) Ko e toe fakatātā ʻe taha ko ha tuofefine ʻi ʻAmelika ʻoku nofo ʻa hono ʻilamutú ʻi ha fonua kehe. Naʻá ne ʻai ke ne sio ʻi he vitiō tatau ʻi heʻene leá. Naʻá ne sio ʻi he vitioó peá ne ʻīmeili kiate ia: “Ko e konga fekauʻaki mo ha pule kovi ʻokú ne puleʻi ʻa e māmaní naʻe tautefito ʻene maʻu ʻa ʻeku tokangá. Naʻá ku kole ha ako Tohi Tapu.” ʻOku tautefito ʻa e fakafiefia ʻa e meʻá ni he ʻokú ne nofo ʻi ha fonua ʻoku tapui ai ʻetau ngāué!

16. Fakamatalaʻi ʻa e taumuʻa tefito ʻo e polosiua taki taha: (a) Fanongo ki he ʻOtuá pea Moʻui Taʻengata. (e) Ongoongo Lelei mei he ʻOtuá! (f) Ko Hai ʻOkú Ne Fai ʻa e Finangalo ʻo Sihová ʻi he ʻAho Ní?

¹⁶ Polosiua. ʻOku lava fēfē ke tau akoʻi ʻa e moʻoní ki ha taha ʻoku ʻikai lava ke lautohi lelei pe ʻoku ʻikai haʻane tohi Fakatohitapu ʻi heʻene leá? ʻE lava ke tau ngāueʻaki ʻa e polosiua Fanongo ki he ʻOtuá pea Moʻui Taʻengata. c (Sio ki he fakamatala ʻi lalo.) Ko e meʻangāue lelei ʻaupito ki hono kamata ʻo e ako Tohi Tapú ko e polosiua Ongoongo Lelei mei he ʻOtuá! ʻE lava ke ke fakahaaʻi ki ha tokotaha ʻa e kaveinga ʻe 14 ʻi he takafi ʻi muí pea ʻeke ange pe ko fē ʻokú ne mahuʻingaʻia taha aí. Pea kamata leva ʻa e akó ʻi he lēsoni ko iá. Kuó ke ʻahiʻahiʻi eni ʻi hoʻo toe ʻaʻahí? Ko e polosiua hono tolu ʻi heʻetau puha meʻangāué ko e Ko Hai ʻOkú Ne Fai ʻa e Finangalo ʻo Sihová ʻi he ʻAho Ní? ʻOku fakataumuʻa ia ke akoʻi ʻa e kau ako Tohi Tapú fekauʻaki mo ʻetau kautahá. Ke ako ʻa e founga ke ngāueʻaki ai ʻa e polosiuá ni ʻi he ako Tohi Tapu taki taha, sio ki he ʻīsiu ʻo Maʻasi 2017 ʻo e Ko ʻEtau Moʻui Faka-Kalisitiané mo e Ngāue Fakafaifekaú​—Polokalama Ngāue ki he Fakatahá.

17. (a) Ko e hā ʻa e taumuʻa tefito ʻo e tohi ako taki taha? (e) Ko e hā ʻoku fiemaʻu ke fai ʻe he faʻahinga kotoa ʻoku papitaisó, pea ko e hā hono ʻuhingá?

¹⁷ Tohi. Hili hoʻo kamata ha ako mo ha tokotaha ʻo ngāueʻaki ha polosiua, ʻe lava ke ke fetongi ʻi ha faʻahinga taimi pē ki he tohi Ko e Hā ʻOku Lava ke Akoʻi Mai ʻe he Tohi Tapú? Ko e meʻangāué ni ʻoku lava ke ne tokoniʻi ʻa e kakaí ke nau ako lahi ange fekauʻaki mo e ngaahi akonaki Fakatohitapu tefitó. Kapau ʻoku fakalakalaka ʻa e tokotaha akó peá ne ʻosiki ʻa e tohi ko iá, ʻe lava ke ke hoko atu ʻa e akó ʻi he tohi Founga ke Nofo Maʻu Ai ʻi he ʻOfa ʻa e ʻOtuá. Ko e meʻangāue ko ení ʻe akoʻi ai ʻa e tokotaha akó ki he founga ke ngāueʻaki ai ʻa e ngaahi tefitoʻi moʻoni Fakatohitapú ʻi heʻene moʻui fakaʻahó. Manatuʻi, naʻa mo e hili ʻene papitaisó, ʻe kei fiemaʻu pē ki ha tokotaha foʻou ke hokohoko atu ʻene akó kae ʻoua kuó ne ʻosiki fakatouʻosi ʻa e ongo tohí. ʻE tokoniʻi ia ʻe he meʻá ni ke ne maʻu ha tui mālohi kia Sihova pea mateaki ai pē kiate ia.​—Lau ʻa e Kolose 2:6, 7.

18. (a) Ko e hā ʻoku fakalototoʻaʻi kitautolu ʻe he 1 Tīmote 4:16 ke tau fai ʻi hotau tuʻunga ko e kau faiako ʻo e moʻoní, pea ko e hā ʻa e olá? (e) Ko e hā ʻetau taumuʻá ʻi heʻetau ngāueʻaki ʻa ʻetau Puha Meʻangāue Fakafaiakó?

¹⁸ ʻI he hoko ko e Kau Fakamoʻoni ʻa Sihová, ʻoku tau maʻu ʻa e fatongia ke akoʻi ki he kakaí ʻa e “pōpoaki ʻo e moʻoni ʻo e ongoongo leleí” ʻa ia ʻe lava ke ne taki kinautolu ki he moʻui taʻengatá. (Kol. 1:5; lau ʻa e 1 Tīmote 4:16.) Ke tokoniʻi kitautolu ke tau fai ení, ʻoku tau maʻu ha Puha Meʻangāue Fakafaiako fakataha mo e ngaahi meʻangāue ʻoku tau fiemaʻú. (Sio ki he puha “ Puha Meʻangāue Fakafaiako.”) Tau ngāueʻaki ʻa e ngaahi meʻangāué ni ʻi he lelei taha ʻo ʻetau malavá. Ko kitautolu taki taha ʻe lava ke tau fili pe ko fē ʻa e meʻangāue ʻi he puha meʻangāué ke ngāueʻakí pea mo e taimí. Kae manatuʻi, ko ʻetau taumuʻá ʻoku ʻikai ko e tufa tohi pē, pea ʻoku ʻikai ke tau ʻoange ʻa e tohí ki he kakai ʻoku ʻikai te nau mahuʻingaʻia ʻi heʻetau pōpoakí. Ko ʻetau taumuʻá ke ngaohi ko e kau ākonga ʻa e kakai ʻoku nau loto-totonu, anga-fakatōkilalo, pea nau loto moʻoni ke ʻiloʻi ʻa e ʻOtuá, ko e kakai ʻoku nau “hehema totonu ki he moʻui taʻengatá.”​—Ngā. 13:48; Māt. 28:19, 20.