NAʻE fāʻeleʻi au ʻi he 1923 ʻi Hemsworth, ko ha kolo ʻi Yorkshire, ʻIngilani. Naʻe ʻi ai hoku tuongaʻane lahi ko Bob. ʻI heʻeku taʻu hivá, naʻe maʻu ai ʻe heʻema tamaí ha ʻū tohi naʻe fakamatalaʻi ai ʻa hono kākaaʻi ʻe he lotu loí ʻa e kakaí. Naʻe maongo ʻaupito ki he tangataʻeikí ʻa e meʻa naʻá ne laú. Naʻe ʻikai te ne saiʻia ʻi hono akoʻi ʻe he kau taki lotú ʻa e meʻa ʻe taha kae fai e meʻa kehe. ʻI ha ngaahi taʻu siʻi mei ai, naʻe haʻu ai ʻa Bob Atkinson ki homau ʻapí ʻo ne tā ʻa e taha ʻo e malanga ʻa Tokoua Rutherford naʻe hiki. Naʻa mau ʻiloʻi ko e malanga ko ení ko e haʻu ia mei he kulupu tatau naʻa nau pulusi ʻa e ʻū tohi naʻe lau ʻe he tangataʻeikí. Naʻe fakaafeʻi ʻe heʻeku ongo mātuʻá ʻa Tokoua Atkinson ke mau kai efiafi ʻi he pō kotoa peá ne tali ʻemau fehuʻi Fakatohitapu lahi. Naʻá ne fakaafeʻi kimautolu ki he fakataha ʻi ha ʻapi ʻo ha tokoua naʻe ʻi ha ngaahi maile siʻi ʻa hono mamaʻó. Naʻa mau kamata maʻu maʻu pē ʻa e fakatahá, pea naʻe fokotuʻu ai ha kiʻi fakatahaʻanga ʻi Hemsworth. ʻIkai fuoloa naʻa mau nofo mo e kau sevāniti soné (ʻoku ʻiloa he taimí ni ko e kau ʻovasia sēketí) mo e kau tāimuʻa mei he ngaahi fakatahaʻanga ofi maí ʻo nau kai mo kimautolu. Ko e fanga tokoua mo e fanga tuofāfine ko iá naʻa nau hoko ko e tākiekina lelei ʻaupito kiate au.

ʻI he taimi ko iá naʻe kamataʻi ai ʻe homau fāmilí ha pisinisi. Ka naʻe tala ange ʻe heʻeku tamaí ki hoku tuongaʻané, “Kapau ʻokú ke loto ke ke tāimuʻa, te tau tuku ange eni.” Naʻe loto ki ai ʻa Bob, pea naʻá ne mavahe mei ʻapi ke tāimuʻa ʻi heʻene taʻu 21. ʻI he taʻu ʻe ua mei ai, ʻi heʻeku taʻu 16, naʻá ku hoko foki ko ha tāimuʻa. Naʻá ku ngāue mo e niʻihi kehé ʻi he fakaʻosinga uiké, ka ʻi he lahi taha ʻo e ʻaho he lolotonga ʻa e uiké naʻá ku ngāue toko taha pē ai. Naʻá ku ngāueʻaki ha kalamafoni mo ha kaati fakamoʻoni, ko ha kiʻi kaati naʻe ʻi ai ha pōpoaki Fakatohitapu nounou mo faingofua. Naʻe tāpuakiʻi au ʻe Sihova ʻaki hono maʻu ha ako Tohi Tapu naʻe fakalakalaka lelei. Ko e tokolahi ʻi he fāmili ʻo e tokotaha ako ko iá naʻe faai atu pē ʻo nau haʻu ki he moʻoní. ʻI he taʻu hokó, naʻe fakanofo ai au ko ha tāimuʻa makehe, fakataha mo Mary Henshall. Naʻe vaheʻi kimaua ki ha feituʻu ngāue naʻe teʻeki ngāueʻi ʻi he vahefonua ʻo Cheshire.

ʻI he Tau II ʻa Māmaní, naʻe pau ai ke fai ʻe he kakai fefiné ʻa e ngāue tokoni ki he taú. Ko e kau faifekau fakalotu kehé naʻa nau ʻatā mei he taú, ko ia naʻa mau pehē ko e kau tāimuʻa makehe ko kimautolú, te mau  ʻatā foki mei ai. Ka naʻe ʻikai loto-tatau mo ia ʻa e ngaahi fakamaauʻangá, pea naʻe tauteaʻi au ke u nofo pilīsone ʻi he ʻaho ʻe 31. ʻI he taʻu hokó, ʻi heʻeku taʻu 19, naʻe pau ke u ʻalu tuʻo ua ki he fakamaauʻangá koeʻuhi naʻe ʻikai pē fakaʻatā au ʻe hoku konisēnisí ke u poupou ki he taú. Kae kehe, ʻi he ongo taimi ko iá naʻe tuku ange ai au ʻe he kau maʻu mafaí. Lolotonga ʻa e hokosia kotoa ko ení, ne u ʻiloʻi naʻe tokoniʻi au ʻe he laumālie māʻoniʻoní pea naʻe ʻai au ʻe Sihova ke u tuʻumaʻu mo mālohi.​—ʻAi. 41:10, 13.

Naʻá ku fetaulaki mo Arthur Matthews ʻi he 1946. Ko e toki ʻosi pē ia ʻa e ngāue pōpula māhina ʻe tolu ʻa Arthur ko ʻene fakafisi ke ʻalu ʻi he taú. ʻI hono tuku ange pē ia mei pilīsoné, naʻá ne ngāue mo hono tokoua ko Dennis, ko ha tāimuʻa makehe, ʻi Hemsworth. Naʻe akoʻi kinaua ʻe heʻena tamaí fekauʻaki mo Sihova ʻi heʻena kei siʻi ʻaupitó, peá na papitaiso ʻi heʻena taʻu hongofulu tupú. ʻIkai fuoloa mei heʻena kamata tāimuʻá, naʻe vaheʻi ʻa Dennis ki ʻAilani. Ko ia naʻe ʻikai ai ha hoa ʻo Arthur. Naʻe maongo ki heʻeku ongo mātuʻá ʻa e tōʻonga ʻa e tāimuʻa ngāue mālohi ko ení. Ko ia naʻá na fakaafeʻi ia ke nau nofo. ʻI heʻeku ʻaʻahi atu ki aí, naʻá ku faʻa fufulu mo Arthur ʻa e ʻū ipú ʻi he ʻosi ʻa e kaí. Naʻe faifai pē ʻo ma fetohiʻaki. ʻI he 1948, naʻe pau ai ke ʻalu ʻa Arthur ki pilīsone ʻi ha toe māhina ʻe tolu. Naʻá ma mali ʻi Sanuali 1949, pea ko ʻema taumuʻá ke ngāue taimi-kakato ʻi he fuoloa taha ʻe ala lavá. Naʻá ma tokanga ʻaupito ki heʻema fakamolé, peá ma ngāueʻaki homa taimi mālōloó ke maʻu mai ha paʻanga ʻi he toli fuaʻiʻakau. ʻI he tāpuaki ʻa Sihová, naʻe malava ai ke hokohoko atu ʻema tāimuʻá.

Laka siʻi he taʻu ʻe taha ki mui ai, naʻe vaheʻi kimaua ki ʻAilani Tokelau, ʻuluakí ki Armagh pea ki Newry, ko e ongo kolo naʻe meimei tokolahi ai ʻa e kau Katoliká. Naʻe ʻi ai ha tomuʻa fehiʻa fakalotu mālohi ʻi he feituʻú, ko ia naʻe pau ke ma tokanga ʻaupito pea ngāueʻaki e fakafuofua leleí ʻi he malanga ki he kakaí. Naʻa mau fakataha ʻi ha ʻapi ʻo ha tokoua mo ha tuofefine naʻe kilomita ʻe 16 (maile ʻe 10) mei he feituʻu naʻá ma nofo aí. Ko e toko valu nai naʻa nau maʻu ʻa e fakatahá. ʻI he taimi ʻe niʻihi ne ma nofo ai ʻi he poʻulí. Naʻá ma faʻa mohe he falikí pea maʻu ha fuʻu kai pongipongi ʻi he ʻaho hokó. ʻOku fakafiefia lahi ʻa e ʻiloʻi ʻoku tokolahi ai he taimí ni ʻa e Kau Fakamoʻoní.

Ko hoku tuongaʻané mo hono uaifí ko Lottie, naʻá na ngāue ko e ongo tāimuʻa makehe ʻi ʻAilani Tokelau, pea ʻi he 1952 naʻa mau maʻu ai ha fakataha-lahi fakavahe ʻi Belfast. Naʻe anga-lelei ha tokoua ʻo ne talitali kimautolu, ko ia naʻa mau nofo ʻi hono ʻapí mo Pryce Hughes, ko e sevāniti vaʻa ia ʻi Pilitāniá. ʻI he pō ʻe taha naʻa mau lāulea ai ki ha kiʻi tohi foʻou, ko e God’s Way Is Love, ʻa ia ne faʻu pē ki he kakai ʻi ʻAilaní. Naʻe fakamatala ʻa Tokoua Hughes ne faingataʻa ke malanga ki he kau Katolika ʻi he Lepupilika ʻAilaní. Naʻe fakamālohiʻi ʻa e fanga tokouá ke nau mavahe mei he feituʻu naʻa nau nofo aí, pea ne fakaʻaiʻai ʻe he kau pātelé ʻa e kakaí ke nau ʻohofi e fanga tokouá. Naʻe pehē ʻe Pryce, “ʻOku mau fiemaʻu ha ongo hoa mali mo ha kā ki ha feingangāue makehe ʻi hono tufaki e fanga kiʻi tohí ʻi he fonuá kotoa.” a (Sio ki he fakamatala  ʻi lalo.) Ko e taimi ia naʻa mau pehē ai, “Te mau fai ia!”

Ko e feituʻu ʻe taha naʻe nofo maʻu pē ai ʻa e kau tāimuʻá ʻi Dublin ko e ʻapi ʻo Ma Rutland, ko ha tuofefine faitōnunga naʻe tauhi kia Sihova ʻi he taʻu lahi. Naʻa mau ʻalu foki ʻo nofo ai ʻi ha taimi, pea naʻa mau fakatau atu ha niʻihi ʻo e meʻa naʻa mau maʻú. Pea naʻa mau heka ʻi ha motopaiki taulani ʻo ʻalu ke fakasio ha kā. Naʻa mau maʻu ha kā ne ʻosi ngāueʻaki naʻe ʻi ha tuʻunga lelei, pea mau kole ki he tokotaha naʻá ne tuʻuaki maí ke ne ʻomai ia he naʻe ʻikai ke poto ha taha ʻiate kimautolu ʻi he fakaʻulí. Naʻe tangutu ʻa Arthur ʻi he efiafí kotoa ʻi he mohengá, ʻo fakangalingali ʻokú ne ueʻi holo ʻa e kia ʻo ha kā. ʻI he pongipongi hokó ʻi heʻene feinga ke hū ki tuʻa ʻa e kaá mei he tauʻangá, naʻe haʻu ha misinale ko Mildred Willett (ʻa ia naʻe mali ki mui mo John Barr). Naʻá ne poto he fakaʻulí! Naʻá ne tokoniʻi kimautolu ʻo mau ako fakaʻuli, pea ʻi he hili iá naʻa mau mateuteu ke ō.

Ko hono hokó, naʻe fiemaʻu ke mau kumi ha feituʻu ke nofo ai. Naʻe tala mai ʻe he fanga tokouá ke mau fakaʻehiʻehi mei he nofo ʻi ha taulani he ʻe lava ke tutu ia ʻe he kau fakafepakí. Ko ia naʻa mau kumi ha ʻapi ka naʻe ʻikai ke maʻu. ʻI he pō ko iá naʻa mau mohe toko fā ʻi he kaá. ʻI he ʻaho hokó ko e meʻa pē naʻa mau maʻú ko ha kiʻi ʻapi taulani naʻe ʻi ai ha ongo kiʻi mohenga. Naʻe hoko ia ko homau ʻapí. Ko e meʻa fakaofó, naʻe ʻikai haʻamau palopalema ʻi he tau ʻa e taulaní ʻi he ʻapi ʻo ha kau faama anga-fakakaumeʻa. Naʻa mau malanga ʻi ha feituʻu ngāue naʻe kilomita ʻe 16 ki he 24 (maile ʻe 10 ki he 15) mei he taulaní. Hili ʻa e hiki ki ha feituʻu foʻou, naʻa mau foki leva ʻo malanga ʻi he feituʻu naʻe tau ai ki muʻa ʻa e taulaní.

Naʻa mau ʻaʻahi ki he ʻapi kotoa ʻi he tonga-hahake ʻo e Lepupilika ʻAilaní ʻo ʻikai fuʻu lahi ha fakafepaki. Naʻa mau tufa ʻa e fanga kiʻi tohi ʻe 20,000 tupu, pea ʻave ʻa e hingoa ʻo e faʻahinga kotoa naʻe mahuʻingaʻiá ki he ʻōfisi vaʻa ʻi Pilitāniá. Ko ha tāpuaki ē ʻa e ʻi ai ʻa e Kau Fakamoʻoni he taimí ni ʻe lauingeau ʻi he feituʻu ko ia ʻo ʻAilaní!

ʻI ha ngaahi taʻu ki mui ai, naʻe toe vaheʻi kimautolu ki he fakatonga ʻo Lonitoní. Hili ha uike siʻi, naʻe fetuʻutaki ai ʻa e fanga tokoua mei he ʻōfisi vaʻa ʻi Pilitāniá kia Arthur ʻo kole ke ne kamata ʻi he ngāue fakasēketí ʻi he ʻaho hono hokó! Naʻe akoʻi kimaua ʻi ha uike, peá ma fononga leva ki homa sēketí ʻi Sikotilani, ko ia naʻe ʻikai ha taimi lahi ʻo Arthur ke teuteu ʻene malangá. Ka naʻá ne loto-lelei maʻu pē ke fai ha ngāue ʻi he ngāue ʻa Sihová, tatau ai pē pe ko e hā hono faingataʻá. Ko ʻene faʻifaʻitakiʻangá naʻe fakalototoʻaʻi lahi ai au. Naʻá ma fiefia moʻoni ʻi homa vāhenga-ngāue fakasēketí. Hili ʻema ʻi ha ngaahi taʻu he feituʻu naʻe teʻeki ngāueʻí, ko ha tāpuaki fisifisimuʻa ia ke ʻi he lotolotonga ʻo e fanga tokoua mo e fanga tuofāfine tokolahi fau.

ʻI hono fakaafeʻi ʻo Arthur ke ne hū ki he Akoʻanga Kiliatí ʻi he 1962, naʻe pau ke ma fai ha fili lahi. ʻE feʻunga ʻa e akó mo e māhina ʻe hongofulu, ka heʻikai lava ke u ʻalu he naʻe ʻikai ke fakaafeʻi au. Naʻá ma fakapapauʻi naʻe totonu ke tali ʻe Arthur ʻa e fakaafé ni. Koeʻuhí heʻikai haku hoa tāimuʻa, naʻe fakafoki au ʻe he vaʻá ki Hemsworth ke u ngāue ai ko ha tāimuʻa makehe. ʻI he foki mai ʻa Arthur ʻi he taʻu ʻe taha mei ai, naʻe vaheʻi kimaua ki he ngāue fakavahé. Ko homa feituʻu ngāué naʻe kau ai ʻa Sikotilani, fakatokelau ʻo ʻIngilaní, mo ʻAilani Tokelau.

ʻI he 1964, naʻe vaheʻi ai ʻa Arthur ke ne hoko ko e sevāniti vaʻa ʻi he Lepupilika ʻAilaní. Naʻá ku ʻuluaki manavasiʻi ke ʻalu ki he Pētelí he naʻá ku fiefia moʻoni ʻi he ngāue fefonongaʻakí. ʻI he sio atu ki ai he taimi ní, ʻoku ou houngaʻia ʻi he monū ʻo e ngāue ʻi he Pētelí. ʻOku ou tui kapau te ke tali ha vāhenga-ngāue neongo ʻoku ʻikai te ke saiʻia moʻoni ke fai ia, ʻe tāpuakiʻi maʻu pē koe ʻe Sihova. ʻI he Pētelí, naʻá ku ngāue ai he ʻōfisí, faʻo ʻa e ʻū tohí, kuki, mo fai ʻa e fakamaʻá. Naʻá ma ʻi he ngāue fakavahé foki pea malava ke ma fetaulaki ai mo e fanga tokoua ʻi he feituʻu kotoa ʻo e fonuá. Ko e meʻá ni fakataha mo e sio ki he fakalakalaka ʻema kau ako Tohi Tapú ʻi he moʻoní, naʻe ʻai ai ke ma maʻu ha haʻi mālohi mo homa fanga tokoua ʻi ʻAilaní. Ko ha tāpuaki moʻoni ia!

Ko e ʻuluaki fakataha-lahi fakavahaʻapuleʻanga ʻi ʻAilaní naʻe fai ia ʻi Dublin ʻi he 1965. b (Sio ki he fakamatala ʻi lalo.) Neongo naʻe ʻi ai ʻa e fakafepaki lahi, naʻe lavameʻa ʻaupito ʻa e fakataha-lahí. Naʻe kau ki ai ʻa e toko 3,948, pea naʻe papitaiso ʻa e toko 65. Ko e kau maʻu fakataha fakavahaʻapuleʻanga ʻe toko 3,500 naʻa nau nofo ʻi he ʻapi ʻo e kakai ʻi Dublin. Naʻe maʻu ʻe he faʻahinga naʻe ʻonautolu ʻa e ngaahi ʻapí ha tohi naʻe fakahaaʻi ai ʻa e houngaʻia. Pea ko e faʻahinga naʻe ʻonautolu ʻa e ngaahi ʻapí naʻa nau fakavīkivikiʻi foki ʻa e ʻulungaanga lelei ʻo e fanga tokouá. Ko ha liliu lelei moʻoni ia ki ʻAilani.

ʻI he 1966 naʻe fakatahaʻi ʻa e tokelau mo e tonga ʻo ʻAilaní ʻi he malumalu ʻo e ʻōfisi vaʻa ʻi Dublin. Naʻe kehe ʻaupito ʻa e fāʻūtaha ko ení mei he meʻa naʻe hoko fakalūkufua he motú, he naʻe māvahevahe ʻa e kakaí koeʻuhi ko e politikí mo e lotú. Naʻá ma fiefia lahi ʻi he sio ki he haʻu ʻa e kau Katolika tokolahi ki he moʻoní ʻo tauhi kia Sihova mo honau fanga tokoua naʻa nau Palotisani ki muʻá.

ʻI he 2011 naʻe liliu fakaʻaufuli ai ʻema moʻuí ʻi he fakatahaʻi ʻa e vaʻa ʻi Pilitānia mo ʻAilaní pea naʻe vaheʻi kimaua ki he Pēteli ʻi Lonitoní. ʻI he taimi ko iá, naʻe kamata ai ke u hohaʻa fekauʻaki mo e moʻui lelei ʻa Arthur. Naʻe ʻiloʻi ʻokú ne maʻu ʻa e mahaki Parkinson. Ko e meʻa fakamamahí, ʻi he ʻaho 20 ʻo Mē, 2015, ne siʻi mālōlō ai ʻa hoku kaumeʻa ʻi he taʻu ʻe 66.

ʻI he taʻu siʻi kuo maliu atú, naʻá ku ongoʻi mamahi lahi ai, loto-mafasia mo faingataʻaʻia. ʻI he kuohilí, naʻe ʻi ai maʻu pē ʻa Arthur kiate au. He ongoʻi lahi moʻoni ē ʻa ʻene pulí! Ka ʻi hoʻo fou ʻi he tuʻunga pehení, ʻokú ke ʻunuʻunu ofi ange ai kia Sihova. ʻOku ou fiefia ʻi he ʻiloʻi ʻa e ʻofa lahi ʻa e niʻihi kehé ʻia Arthur. Kuó u maʻu ʻa e ngaahi tohi mei he fanga tokoua ʻi ʻAilani, Pilitānia, pea mo ʻAmelika. Ko e ngaahi tohí ni mo e fakalototoʻa mei he tokoua ʻo Arthur ko Dennis mo hono uaifí ko Mavis, mo ʻena ongo tamaikí ko Ruth mo Judy, kuo tokoniʻi lahi ai au ʻo ʻikai lava ke u fakamatalaʻi.

Ko ha konga Tohi Tapu kuó ne fakalototoʻaʻi lahi aú ko e ʻAisea 30:18. ʻOku pehē ai: “ʻOku tatali anga-kātaki ʻa Sihova ke fakahaaʻi atu kiate kimoutolu ʻa e hōifuá, pea te ne tuʻu hake ke fakahaaʻi atu kiate kimoutolu ʻa e mēsí. He ko Sihová ko ha ʻOtua ʻo e fakamaau totonu. He fiefia ē ka ko e faʻahinga kotoa ʻoku hanganaki ʻamanaki kiate iá.” ʻOku fakafiemālie moʻoni kiate au ʻa e ʻiloʻi ʻoku tatali anga-kātaki ʻa Sihova ke fakaleleiʻi ʻetau palopalemá kotoa pea ʻomai ʻa e ngaahi ngāue fakafiefia ʻi heʻene māmani foʻoú.

ʻI heʻeku fakakaukau atu ki he kuohilí, ʻoku lava ke u sio ai ki he anga hono tataki mo tāpuakiʻi ʻe Sihova ʻa e ngāue fakamalanga ʻi ʻAilaní. ʻOku ou ongoʻi lāngilangiʻia ke hoko ko e taha ʻo e faʻahinga tokolahi kuo nau tokoni ki he ngāué ni. Ko e moʻoni ko hono fai ʻa e meʻa ʻoku fiemaʻu mai ʻe Sihová ʻoku ʻomai maʻu pē ai ʻa e ngaahi tāpuaki.