HE FAKANONGA mo fakafiemālie moʻoni ē ko ha ngāue naʻe fai ʻi he anga-lelei! ʻI heʻetau ʻiloʻi ʻoku tokanga mai ha taha kiate kitautolú, ʻoku tau houngaʻia. Koeʻuhi ko kitautolu taki taha ʻoku tau houngaʻia ʻi he fakafeangai anga-lelei maí, ʻe lava fēfē ke tau fakatupulekina ʻa e ʻulungaanga fakaʻofoʻofa ko ení?

ʻOku kau ki he anga-leleí ha mahuʻingaʻia moʻoni ʻi he lelei ʻa e niʻihi kehé​—ko ha mahuʻingaʻia ʻoku fakahāhā fakafou ʻi he lea mo e ngāue ʻaonga. Koeʻuhi ʻoku fakahaaʻi ʻa e anga-leleí ʻi he ngāue, ʻoku ʻikai feʻunga ke fakahāhā fakamamata pē ha ngaahi ʻulungaanga lelei. Ko e anga-lelei moʻoní ʻoku ueʻi ia ʻe he ʻofa loloto mo e kaungāongoʻi. Mahulu atu aí, ko e anga-lelei ko iá ko e konga ia ʻo e fua ʻo e laumālie māʻoniʻoni ʻo e ʻOtuá ʻa ē ʻoku tala ki he kau Kalisitiané ke nau fakatupulekiná. (Kal. 5:22, 23) Kuo pau ke tau fakatupulekina ʻa e anga-leleí, ko ia tau sivisiviʻi angé ʻa e founga ʻo hono fakahāhā ʻe Sihova mo hono ʻAló ʻa e ʻulungāngá ni mo e founga ʻe lava ke tau muimui ai ʻi heʻena faʻifaʻitakiʻangá.

ʻOku anga-lelei mo anga-fakaʻatuʻi ʻa Sihova ki he tokotaha kotoa, ʻo kau ai ʻa e “kau taʻehoungaʻiá mo e fulikivanú.” (Luke 6:35) Hangē ko ení, ko Sihová ʻokú ne “ʻai ke hopo ʻene laʻaá ki he fulikivanú mo e kakai leleí pea ʻokú ne ʻomai ʻa e ʻuhá ki he māʻoniʻoní mo e taʻemāʻoniʻoní.” (Māt. 5:45) Ko ia ai, naʻa mo e faʻahinga ʻoku ʻikai te nau lāuʻilo ko Sihova ʻa honau Tokotaha-Fakatupú ʻoku nau kei maʻu ʻaonga pē mei heʻene tokonaki anga-lelei ki he moʻuí pea te nau maʻu nai ai ha fiefia.

ʻOku tau maʻu ha faʻifaʻitakiʻanga tuʻu-ki-muʻa ʻo e anga-leleí ʻi he meʻa naʻe fai ʻe Sihova maʻa ʻĀtama mo ʻIví. Taimi nounou mei heʻena faiangahalá, ko ʻĀtama mo ʻIvi “naʻá na tui ʻa e lou fiki ʻo na haʻi ʻi hona kongalotó.” Kae kehe, naʻe ʻiloʻi ʻe Sihova te na fiemaʻu ha vala feʻunga koeʻuhi ke na nofo ʻi tuʻa ʻi ʻĪteni, ʻa ia naʻe fakamalaʻiaʻi ʻa e kelekelé ʻi he taimi ko ení ʻo tupu ai ʻa e “ʻakau talatala mo e talatalaʻāmoa.” Ko ia naʻe fakafeangai ʻi he anga-lelei ʻa Sihova ki heʻena fiemaʻú ʻaki hono ngaohi “ha ongo kofu lōloa mei he kiliʻimanú” moʻonaua.​—Sēn. 3:7, 17, 18, 21.

Neongo ʻoku anga-lelei ʻa Sihova “ki he fulikivanú mo e kakai leleí,” ʻokú ne holi tautefito ke fakahāhā ʻa e anga-leleí ki heʻene kau sevāniti faitōnungá. Ko ha fakatātā, lolotonga ʻa e taimi ʻo e palōfita ko Sākalaiá, naʻe hohaʻa ai ha ʻāngelo ʻi heʻene sio ʻoku tuʻu ʻa hono toe langa ʻo e temipale ʻi Selusalemá. Naʻe fanongo ʻa Sihova ki he meʻa naʻe hohaʻa ki ai ʻa e ʻāngeló peá ne fai ha tali ʻaki “ha ngaahi lea anga-ʻofa mo fakafiemālie.” (Sāk. 1:12, 13) Naʻe fakafeangai meimei tatau ʻa Sihova ki he palōfita ko ʻIlaisiaá. ʻI he taimi ʻe taha naʻe ongoʻi mātuʻaki loto-mafasia ai ʻa e palōfitá ʻo ne kole kia Sihova ke tuku ke ne mate. Naʻe tokanga ʻa Sihova ki he ongoʻi ʻa ʻIlaisiaá peá ne fekauʻi mai ha ʻāngelo ke ne fakaivimālohiʻi ia. ʻIkai ngata aí, naʻe fakapapauʻi ʻe he ʻOtuá ki he palōfitá naʻe ʻikai te ne toko taha pē. Hili hono maʻu ʻe ʻIlaisiā ha lea anga-lelei pehē mo e tokoni naʻá ne fiemaʻú, naʻe malava ai ke ne hokohoko atu ʻi hono vāhenga-ngāué. (1 Tuʻi 19:1-18) ʻI he lotolotonga ʻo e kau sevāniti ʻa e ʻOtuá, ko hai ʻoku tuʻu-ki-muʻa ʻi heʻene tapua atu ʻa e ʻulungaanga ʻiloa ʻo Sihova ko e anga-leleí?

Lolotonga ʻene ngāue fakafaifekau ʻi he māmaní, naʻe ʻiloa ʻa Sīsū ʻi heʻene anga-lelei mo anga-fakaʻatuʻi. Naʻe ʻikai ʻaupito ke ne anga-fefeka mo anga-mālohi. ʻI heʻene kaungāongoʻí naʻá ne pehē: “Haʻu kiate au, ʻa kimoutolu kotoa ʻoku ongosia mo mafasiá, pea te u fakaivifoʻou kimoutolu.” (Māt. 11:28-30) ʻI he fakafeangai ki heʻene anga-leleí, naʻe muimui ʻa e kakaí kia Sīsū ʻi ha feituʻu pē naʻá ne ʻalu ki ai. ʻI he “ongoʻi fakaʻofaʻia” naʻe fafanga ʻe Sīsū kinautolu, fakamoʻui ʻenau kau puké mo e mahamahakí, pea akoʻi kiate kinautolu “ʻa e ngaahi meʻa lahi” fekauʻaki mo ʻene Tamaí.​—Mk. 6:34; Māt. 14:14; 15:32-38.

Ko e fakamoʻoni ʻo ʻene anga-lelei lahí, naʻe mahinoʻi ʻe Sīsū mo ne ʻiloʻilo ʻi heʻene fakafeangai ki he niʻihi kehé. Ko hono moʻoní, tatau ai pē pe ko e hā hono faingataʻa ha kole naʻe fai ange, naʻe talitali “lelei” ʻe Sīsū ʻa e faʻahinga kotoa naʻa nau kumi loto-moʻoni kiate iá. (Luke 9:10, 11) Hangē ko ení, naʻe ʻikai te ne ngāhiʻi ha fefine naʻe ilifia, ʻa ia neongo naʻá ne taʻemaʻa fakaeouau, naʻá ne ala ki hono kofu tuʻá ʻi he ʻamanaki ʻe fakamoʻui ia mei ha ʻau toto. (Liv. 15:25-28) ʻI he manavaʻofa ki he fefiné ni ʻa ia naʻá ne faingataʻaʻia ʻi he taʻu ʻe 12, naʻe tala ange ʻe Sīsū: “ʻOfefine, kuo fakamoʻui koe ʻe hoʻo tuí. ʻAlu ʻi he fiemālie, peá ke moʻui mei ho mahaki fakamamahí.” (Mk. 5:25-34) He ngāue fakaofo moʻoni ē ʻo e anga-leleí!

ʻI he ngaahi fakatātā naʻe fakahaaʻi ʻi ʻolungá, ʻoku tau sio ko e anga-lelei moʻoní ʻoku fakahāhā ia ʻaki ʻa e ngāue. Naʻe fakatātaaʻi ʻe Sīsū ʻa e fiemaʻu ke fai ha ngāué ʻi he talanoa fakatātā fekauʻaki mo e Samēlia anga-fakakaungāʻapí. Neongo naʻe ʻi ai ha fetāufehiʻaʻaki ʻi he vahaʻa ʻo e kau Samēliá mo e kau Siú, ko e tangata Samēlia ʻi he talanoa fakatātaá naʻá ne fakaʻofaʻia ʻi ha tangata naʻe kaihaʻasia, haha, pea tuku kuó ne mei mate ʻi he halá. Naʻe ueʻi ʻe he anga-leleí ʻa e Samēliá ke ne fai ha ngāue. Naʻá ne faitoʻo ʻa e ngaahi lavea ʻo e tangatá pea ʻave ia ki ha fale talifononga. Naʻe totongiʻi leva ʻe he Samēliá ʻa e tauhi ʻo e fale talifonongá ke ne tokangaʻi ʻa e tangata naʻe kafó pea aʻu ʻo ne tala ange te ne totongi ha toe fakamole kehe.​—Luke 10:29-37.

Lolotonga ko e anga-leleí ʻoku faʻa fakahāhā ia ʻaki ʻa e ngāue, ʻe toe lava ke fakahāhā ia fakafou ʻi he lea ʻosi fakakaukauʻi lelei mo fakaueʻiloto. Ko ia ai, neongo ko e “hohaʻa ʻi he loto ʻo ha tangata ʻokú ne lōmekina ia,” ʻoku toe pehē ʻi he Tohi Tapú “ko ha lea lelei ʻokú ne fakafiefiaʻi ia.” (Pal. 12:25) ʻE lava ke tau ʻai ke fiefia ʻa e niʻihi kehé ʻi hono ueʻi kitautolu ʻe he anga-ʻofá mo e anga-leleí ke tau vahevahe kiate kinautolu ha ngaahi meʻa fakatupu langa hake. a Ko ʻetau lea ʻi he anga-leleí ʻe fakahaaʻi ai ʻoku tau tokanga kiate kinautolu. ʻI heʻenau hoko ʻo loto-toʻá, te nau fekuki lelei ange ai mo e ngaahi ʻahiʻahi te nau fetaulaki mo ia ʻi he moʻuí.​—Pal. 16:24.

Koeʻuhi ko e fakatupu ʻa e faʻahinga kotoa ʻo e tangatá “ʻi he ʻīmisi ʻo e ʻOtuá,” ʻoku malava ke nau fakatupulekina ʻa e ʻulungaanga ko e anga-leleí. (Sēn. 1:27) Ko e fakatātaá, ko Suliasi ko ha ʻōfisa fakakautau Loma naʻá ne tokangaʻi ʻa e ʻapositolo ko Paulá ʻi heʻene folau ki Lomá, naʻá ne tōʻongafai ki he ʻapositoló ʻi he ‘anga-lelei ʻo ne fakangofua ia ke ne ʻalu ki hono ngaahi kaungāmeʻá ke nau tokangaʻi ia’ ʻi he kolo ko Saitoní. (Ngā. 27:3) ʻI ha taimi ki mui ai, naʻe fakahāhā ʻe he kau nofo ʻi Mēlitá ha “manavaʻofa makehe atu” kia Paula mo e niʻihi naʻa nau toki ʻosi hokosia ha vaka tūkia. Naʻe aʻu ʻo tafu ʻe he kakai ʻo e motú ha afi ke fakamāfana ai ʻa e faʻahinga ʻi he vaka tūkiá. (Ngā. 28:1, 2) Neongo naʻe lava ke fakaongoongoleleiʻi ʻenau ngāué, ʻoku kau ki he anga-leleí ʻa e meʻa lahi ange ʻi hono fai pē ʻi he taimi ki he taimi ha tōʻonga anga-lelei.

Ke fakahōifuaʻi kakato ʻa e ʻOtuá, kuo pau ke tau fakatupulekina ʻa e anga-leleí ko ha konga tuʻumaʻu ʻo hotau angaʻitangatá mo e founga moʻuí. ʻI he ʻuhinga ko ení, ʻoku tala mai ʻe Sihova ke tau “kofuʻaki” ʻa e anga-leleí. (Kol. 3:12) Kae kehe, ko hono moʻoní, ʻoku ʻikai maʻu pē ke faingofua kiate  kitautolu ke tau ʻai ʻa e ʻulungaanga fakaʻotua ko ení ko hatau konga. Ko e hā hono ʻuhingá? Te tau toumoua nai mei hono fakahāhā ʻa e anga-leleí koeʻuhi ko e mā, ʻikai ha tuipau, fakafepaki ʻoku fai mai, pe siokita. Neongo ia, ʻe lava ke tau ikuʻi ʻa e ngaahi faingataʻa ko iá ʻi he falala ki he laumālie māʻoniʻoní pea ʻi he faʻifaʻitaki ki hono fakahāhā ʻe Sihova ʻa e anga-leleí.​—1 Kol. 2:12.

ʻE lava ke tau ʻiloʻi ʻa e ngaahi tafaʻaki ʻe fiemaʻu ai ke tau fakaleleiʻi hono fakahāhā ʻa e anga-leleí? ʻOku totonu ke tau ʻeke hifo: ‘ʻOku ou hoko ko ha tokotaha fanongo kaungāongoʻi? ʻOku ou tokanga ki he fiemaʻu ʻa e niʻihi kehé? Ko fē ʻa e taimi fakamuimui naʻá ku anga-lelei ai ki ha taha ʻoku ʻikai ko ha mēmipa ʻo e fāmilí pe kaumeʻa ofi?’ ʻE lava leva ke tau fokotuʻu ha ngaahi taumuʻa, hangē ko e ʻai ke ʻilo lahi ange fekauʻaki mo e kakai takatakai ʻiate kitautolú, tautefito ʻi he fakatahaʻanga Kalisitiané. ʻI he foungá ni ʻe lava ke tau ʻiloʻi ai honau tuʻungá mo ʻenau fiemaʻú. Hokó, ʻoku totonu ke tau feinga ke fakahāhā ʻa e anga-lelei ki he niʻihi kehé ʻi he ngaahi founga te tau houngaʻia ke maʻu kapau naʻa tau ʻi honau tuʻungá. (Māt. 7:12) Fakaʻosí, ʻe tāpuakiʻi ʻe Sihova ʻetau ngaahi feinga ke fakatupulekina ʻa e anga-leleí kapau te tau kole tokoni kiate ia.​—Luke 11:13.

ʻI he hiki ʻe he ʻapositolo ko Paulá ʻa e meʻa naʻá ne ʻai ia ke ne ʻiloa ko e faifekau ʻa e ʻOtuá, naʻá ne fakakau ai ʻa e “anga-lelei.” (2 Kol. 6:3-6) Naʻe tohoakiʻi ʻa e kakaí kia Paula koeʻuhi ko ʻene mahuʻingaʻia fakafoʻituitui ʻiate kinautolú, ʻa ia naʻá ne fakahaaʻi ia fakafou ʻi he ngāue mo e lea ʻi he anga-lelei. (Ngā. 28:30, 31) ʻI he founga meimei tatau, ʻe lava ke tau tohoakiʻi mai ʻa e kakaí ki he moʻoní ʻi heʻetau anga-leleí. ʻI heʻetau fakahāhā ki he tokotaha kotoa ʻa e anga-leleí, ʻo kau ai ʻa e faʻahinga ʻoku nau fakafepakiʻi kitautolú, te tau ʻai nai ai ke māfana honau lotó pea mōlia atu ai ʻenau fakafilí. (Loma 12:20) ʻE aʻu nai ʻi ha taimi ʻo tohoakiʻi kinautolu ki he pōpoaki ʻa e Tohi Tapú.

ʻI he Palataisi fakaemāmani ka hoko maí, ʻoku ʻikai ha veiveiua ʻe fiefia ʻa e faʻahinga taʻefaʻalaua ʻe toetuʻú ʻi hano hokosia ʻa e anga-lelei moʻoní, ko e ʻuluaki taimí nai ia. ʻI he houngaʻiá, ʻe ueʻi ai kinautolu ke nau fakahāhā ʻa e anga-lelei ki he niʻihi kehé. Ko ha taha pē ʻe moʻui ʻi he taimi ko iá ʻoku fakafisi ke fakahāhā ʻa e anga-leleí mo tokoniʻi ʻa e niʻihi kehé heʻikai hano nofoʻanga tuʻuloa ʻi he malumalu ʻo e Puleʻanga ʻo e ʻOtuá. ʻI he tafaʻaki ʻe tahá, ko e faʻahinga ʻoku hōifua ʻa e ʻOtuá ke nau moʻui taʻengatá te nau fefakafeangaiʻaki ʻi he anga-ʻofa mo e anga-lelei. (Saame 37:9-11) Ko ha māmani maʻumaʻuluta mo melino moʻoni ē ko ia! Kae kehe, ki muʻa ke aʻu ki he taimi faitāpuekina ko iá, ʻe lava fēfē ke tau maʻu ʻaonga he taimí ni ʻi hono fakahāhā ʻa e anga-leleí?

“Ko ha tangata anga-lelei ʻokú ne maʻu ʻaonga mei ai,” ko e lau ia ʻa e Tohi Tapú. (Pal. 11:17) ʻOku tohoakiʻi ʻa e kakaí ki ha tokotaha anga-lelei, pea ʻoku nau hehema ke anga-lelei foki kiate ia. Naʻe pehē ʻe Sīsū: “Ko e meʻafua ʻoku fai ʻaki hoʻomou fuá, te nau fua mai ʻaki kimoutolu.” (Luke 6:38) Ko ia ai, ko ha tokotaha anga-lelei ʻe faingofua ʻene maʻu mo tauhi maʻu ha ngaahi kaumeʻa lelei.

Naʻe fakaʻaiʻai ʻe he ʻapositolo ko Paulá ʻa e faʻahinga ʻi he fakatahaʻanga ʻi ʻEfesoó ke nau “hoko ʻo feangaleleiʻaki, manavaʻofa kaungāongoʻi, ʻo fefakamolemoleʻaki mātuʻaki loto-lelei.” (ʻEf. 4:32) ʻOku maʻu ʻaonga lahi ha fakatahaʻanga ʻi hono faʻuʻaki ha kau Kalisitiane kaungāongoʻi ʻoku nau fakahāhā ʻa e anga-lelei mo feinga ke fetokoniʻaki. Ko e faʻahinga peheé ʻoku ʻikai ʻaupito te nau ngāueʻaki ʻa e lea fefeká, fakaanga kakahá, pe lea manuki fakalotomamahi. ʻI he ʻikai te nau fakamafola ha lau fakatupu maumau, ʻoku nau feinga mālohi ke ngāueʻaki honau ʻeleló ke tokoniʻi ʻa e niʻihi kehé. (Pal. 12:18) Ko e olá, ʻoku lakalakaimonū fakalaumālie ai ʻa e fakatahaʻangá.

ʻIo, ko e anga-leleí ko ha ʻulungaanga ia ʻoku fakahāhā ʻaki ʻa e lea mo e ngāue. ʻI heʻetau anga-leleí, ʻoku tau tapua atu ai ʻa e ʻulungaanga māfana mo e nima-homo ʻa hotau ʻOtua ko Sihová. (ʻEf. 5:1) ʻI he tafaʻaki ʻe tahá, ʻoku tau fakaivimālohiʻi ai ʻetau fakatahaʻangá pea tohoakiʻi mai ai ʻa e niʻihi kehé ki he lotu maʻá. ʻOfa ke ʻiloa maʻu pē kitautolu ko ha kakai ʻoku tau fakahāhā ʻa e anga-leleí!