Na‘e faka‘ilonga‘i ‘e he me‘a fakamanavahē ko iá ‘a e kamata‘anga ‘eku kumi ki he Tokotaha-Fakatupú. Ka ki mu‘a ke u lave ki he me‘a na‘e hoko ‘i he pō kaupō‘uli ko iá, tuku ke u talanoa atu ki he‘eku ngaahi hokosia ‘i he‘eku kei si‘í na‘á ne tākiekina ‘eku fakakaukaú pea teu‘i hoku lotó ke fekumi ki he ‘Otuá.

Na‘e fanau‘i au ‘i he 1937 ‘i Guesnain, ko ha kolo keli‘anga malala ‘i he fakatokelau ‘o Falanisē. Na‘á ku ako mei he‘eku tamaí, ‘a ia ko ha tokotaha keli malala, ‘a e mahu‘inga ‘o e ngāue mālohí. Na‘á ku ako foki ‘ene ongo‘i mālohi ki he fakamaau totonú, ‘a ia na‘á ne ue‘i ia ke ngāue ma‘á e kau keli malala na‘a nau kātekina ‘a e ngaahi tu‘unga ngāue fakatu‘utāmaki. ‘I he feinga ke fakalelei‘i honau tu‘ungá, na‘e kau ‘eku Tamaí ‘i ha kautaha ‘o tau‘i ‘a e totonu ‘a e kau ngāué. Na‘á ne toe ‘ita ‘i he mālualoi ‘a e kau faifekau ‘i he feitu‘ú. Ko e tokolahi na‘a nau mo‘ui tu‘umālie; ka, na‘a nau kole me‘akai mo e pa‘anga mei he kau keli malala na‘a nau fāinga ke fakalato ‘enau fiema‘u faka‘ahó. Na‘e fakalili‘a ‘eku Tamaí ‘i he tō‘onga ‘a e kau faifekaú ‘o ‘ikai ke ne ako‘i mai ha me‘a fakalotu.  Ko hono mo‘oní, na‘e a‘u ‘o ‘ikai ‘aupito ke mau talanoa fekau‘aki mo e ‘Otuá.

‘I he‘eku tupu haké, na‘á ku fehi‘a foki ‘i he fakamaau ta‘etotonú. Ko e fakamaau ta‘etotonu ko iá na‘e kau ai ‘a e tomu‘a fehi‘a ki he kau muli ‘i Falanisē. Na‘á ku va‘inga soka mo e fānau ‘a e kau mulí pea fiefia ‘i he feohi mo kinautolú. Tuku kehe ia, na‘e ‘ikai ko ha Falanisē ‘eku fa‘eé ko ha Pōlani ia. Na‘á ku faka‘amua ha melino fakamatakali mo ha vahevahe tatau.

Na‘e tu‘utu‘uni ke u kau ‘i he taú ‘i he 1957. Ko e founga ia na‘á ku a‘u ai ki he ‘otu mo‘unga ‘Alasīliá ‘i he pō kaupō‘uli na‘á ku fakamatala ki ai ki mu‘á. Hili ‘eku kaila “‘Otua! ‘E ‘Otua!” Na‘á ku fehangahangai ai, ‘o ‘ikai mo ha sōtia mei he filí, ka ko ha ‘asi kaivao! Na‘á ku ongo‘i na‘e tau ‘eku mānavá! Ka, ko e me‘a ko iá mo e taú na‘á ne ‘ai au ke u fakakaukau fakamātoato ange fekau‘aki mo e ‘uhinga ‘o e mo‘uí. Ko e hā ‘oku tau ‘i heni aí? ‘Oku tokanga mai ‘a e ‘Otuá fekau‘aki mo kitautolu? Te tau ma‘u koā ha melino tu‘uloa?

Ki mui ai, lolotonga ‘eku ‘i he ‘api ‘eku ongo mātu‘á ‘i ha‘aku livi, na‘á ku fetaulaki ai mo e taha ‘o e Kau Fakamo‘oni ‘a Sihová. Na‘á ne ‘omai ha tatau ‘o e La Sainte Bible, ko ha liliu Katolika faka-Falanisē ‘o e Tohi Tapú, na‘á ku kamata lau ia ‘i he‘eku foki ki ‘Alasīliá. Ko ha konga tohi na‘e maongo lahi kiate au ko e Fakahā 21:3, 4. ‘Oku pehē ai: “Ko e tēniti ‘o e ‘Otuá ‘oku ‘i he fa‘ahinga ‘o e tangatá . . . Pea te ne holoholo ‘a e lo‘imata kotoa pē mei honau matá, pea ‘e ‘ikai ke toe ‘i ai ha mate, pe ha mamahi pe ha tangi pe ha langa.” * Na‘á ku ‘ohovale ‘i he ngaahi lea ko ení. Na‘á ku fifili, ‘‘E lava ke mo‘oni eni?’ ‘I he taimi ko iá, na‘e ‘ikai ha‘aku ‘ilo ‘e taha ki he ‘Otuá mo e Tohi Tapú.

Hili ‘a e kakato ‘eku ngāue fakakautaú ‘i he 1959, na‘á ku fetaulaki mo ha Fakamo‘oni ko François, na‘á ne ako‘i mai ‘a e ngaahi mo‘oni Fakatohitapu lahi. Ko e fakatātaá, na‘á ne fakahaa‘i mai ‘i he Tohi Tapú ‘a e huafa fakafo‘ituitui ‘o e ‘Otuá, ko e Sihova. (Saame 83:18) Na‘e toe fakamatala‘i mai ‘e François ‘e ‘omai ‘e Sihova ‘a e fakamaau totonu ki he māmaní, ‘o liliu ‘a e māmaní ko ha palataisi, pea fakahoko ‘a e ngaahi lea ‘i he Fakahā 21:3, 4.

Na‘e mahu‘ingamālie ‘a e ngaahi akonaki ko iá pea maongo ki hoku lotó. Ka na‘á ku toe ‘ita lahi ‘i he kau faifekaú pea loto ke fakahala‘i kinautolu ki he ako‘i ‘a e ngaahi me‘a ‘oku ‘ikai ‘i he Tohi Tapú! ‘Oku hā ngali na‘e kei tākiekina pē au ‘e he ngaahi fakakaukau ‘eku tamaí, pea na‘á ku ta‘ekātaki. Na‘á ku loto ke fai leva ha me‘a!

Na‘e tokoni‘i au ‘e François mo hoku ngaahi kaume‘a Fakamo‘oní ke u mokomoko hifo. Na‘a nau fakamatala‘i mai ko ‘etau ngāue ko ha Kalisitiané, ‘oku ‘ikai ko e faifakamaau ka ko e ‘oatu ‘a e ‘amanaki fakafou ‘i he ongoongo lelei ‘a e Pule‘anga ‘o e ‘Otuá. Ko e ngāue ia na‘e fai ‘e Sīsū pea ‘oange ki hono kau muimuí ke nau faí. (Māt. 24:14; Luke 4:43) Na‘á ku ako foki ke lea anga-lelei mo fakapotopoto ki he kakaí, neongo pe ko e hā ‘enau tuí. ‘Oku pehē ‘e he Tohi Tapú: “Ko ha tamaio‘eiki ‘a e ‘Eikí ‘oku ‘ikai fiema‘u ia ke ne kē, ka ‘oku fiema‘u ke ne hoko ‘o anga-fakaalaala ki he tokotaha kotoa pē.”​—2 Tīm. 2:24.

 Na‘á ku fai ‘a e ngaahi liliu na‘e fiema‘ú pea papitaiso ko e taha ‘o e Kau Fakamo‘oni ‘a Sihová ‘i he ‘asemipilī ‘i he 1959. Na‘á ku fetaulaki ai mo ha tuofefine kei si‘i ko Angèle ‘a ia na‘á ku manako ai. Na‘á ku ‘alu ki he fakataha‘anga na‘á ne kau ki aí, pea na‘á ma mali ‘i he 1960. Ko ha fefine lelei mo‘oni ia, ko ha uaifi fakaofo ia pea ko ha me‘a‘ofa mahu‘inga meia Sihova.​—Pal. 19:14.

‘I he faai mai ‘a e ngaahi ta‘ú, kuó u ako ‘a e ngaahi lēsoni mahu‘inga mei he fanga tokoua poto mo taukeí. Ko e taha ‘o e ngaahi lēsoni mahu‘inga tahá: Ke lavame‘a ‘i ha vāhenga-ngāue faingata‘a pē, kuo pau ke tau anga-fakatōkilalo pea ngāue‘aki ‘a e poto ‘i he Palōveepi 15:22, ‘a ia ‘oku pehē: “‘Oku lavame‘a . . . ‘i he tokolahi ‘a e kau fale‘í.”

‘I he 1964, na‘e kamata ke u sio ki he mo‘oni ‘a e ngaahi lea fakamānava‘i ko iá. ‘I he ta‘u ko iá, na‘á ku kamata ngāue ko ha ‘ovasia sēketi, ‘o ‘a‘ahi ki he ngaahi fakataha‘angá ke fakalototo‘a‘i ‘a e fanga tokouá pea langa hake fakalaumālie kinautolu. Kae kehe, na‘á ku ta‘u 27 ‘i he taimi ko iá pea ‘ikai ha‘aku taukei. Ko ia na‘á ku fai ‘a e ngaahi fehālaaki. Ka na‘á ku feinga ke ako mei ai. Hiliō he me‘a kotoa, na‘á ku ako ‘a e ngaahi lēsoni mahu‘inga mei he ‘kau fale‘i’ lavame‘a mo taukeí.

‘Oku ou manatu ki ha fakatātā ‘i he kamata‘angá. Hili ‘eku ‘a‘ahi ki ha fakataha‘anga ‘i Pālesi, na‘e kole mai ‘e ha tokoua matu‘otu‘a fakalaumālie pe ‘e lava ke ma ki‘i talanoa. Na‘á ku tala ange, “Lelei.”

Na‘á ne ‘eke mai, “Louis, ‘i he ‘a‘ahi ha toketā ki ha ‘api, ko ‘ene ‘alú ke sio kia hai?”

Na‘á ku tali ange, “Ki he tokotaha puké.”

Na‘á ne pehē: “Tonu ia. Ka kuó u fakatokanga‘i ‘okú ke fakamoleki ‘a e lahi taha ho taimí mo e fa‘ahinga ‘oku tu‘unga fakalaumālie leleí, hangē ko e ‘ovasia ‘a e fakataha‘angá. ‘Oku tokolahi ‘i he‘etau fakataha‘angá ‘a e fanga tokoua mo e fanga tuofāfine ‘oku nau loto-si‘i, kei fo‘ou pe mā. Te nau hounga‘ia lahi kapau te ke fakamoleki ho taimí mo kinautolu, na‘a mo e ‘alu ki honau ‘apí ki ha houa kai.”

Ko e fale‘i ‘a e tokoua ‘ofeina ko iá na‘e ‘uhinga mālie mo ‘aonga lahi. Ko ‘ene ‘ofa ki he fanga sipi ‘a Sihová na‘e maongo ki hoku lotó. Ko ia na‘á ku tuku ki tafa‘aki ‘a e pōlepolé peá u ngāue‘aki leva ‘a e me‘a na‘á ne tala maí. ‘Oku ou fakamālō kia Sihova koe‘uhi ko e fanga tokoua peheé.

 ‘I he ta‘u 1969 mo e 1973, na‘e fakanofo au ke tokanga‘i ‘a e Potungāue Me‘akaí ‘i ha fakataha fakavaha‘apule‘anga ‘e ua ‘i Colombes, Pālesi. ‘I he fakataha-lahi ‘i he 1973, ko e toko 60,000 nai na‘e fiema‘u ke fafanga ‘i he ‘aho ‘e nima! Na‘e ‘ikai ke u ‘ilo pe ‘e malava fēfē eni. Ka ‘i he taimi tatau, ko e kī ki he lavame‘á ko e Palōveepi 15:22​—fai ha alēlea. Na‘á ku kumi ki he fale‘i ‘a e kau tangata matu‘otu‘a fakalaumālie na‘a nau taukei ‘i he ngāue ki he me‘akaí. Na‘e kau ai ‘a e kau fahi kakano‘i-manu, kau tō vesitapolo, kau kuki mo e kau hū koloa. Na‘a mau lava‘i ai ha vāhenga-ngāue na‘e hangē ha fu‘u mo‘ungá.

‘I he 1973, na‘e fakaafe‘i au mo hoku uaifí ke ngāue ‘i he Pēteli ‘i Falanisē. Ko ‘eku fuofua vāhenga-ngāué na‘e hoko ko ha toe pole lahi. Na‘e pau ke u ‘ave ‘etau ‘ū tohí ki hotau fanga tokoua ‘i he fonua ‘Afilika ko Kameluní, ‘a ia na‘e tapui ai ‘etau ngāué mei he 1970 ki he 1993. Na‘á ku toe ongo‘i lōmekina. Mahalo na‘e fakatokanga‘i ia ‘e he tokoua na‘á ne tokanga‘i ‘a e ngāue ‘i Falanisē ‘o ne fakalototo‘a‘i au, ‘o pehē: “Ko hotau fanga tokoua ‘i Kameluní ‘oku nau fiema‘u lahi ‘a e me‘akai fakalaumālié. Tau fafanga‘i kinautolu!” Pea na‘a mau fai ia.

Na‘á ku fa‘a fononga ki he ngaahi fonua kau‘āfonua ‘o Kameluní ke fetaulaki mo e kau mātu‘a mei he fonua ko iá. Ko e kau tangata loto-to‘a mo poto ko iá na‘a nau tokoni‘i au ke fai ‘a e ngaahi fokotu‘utu‘u na‘e fiema‘ú ke ‘ave ma‘u pē ‘a e me‘akai fakalaumālié ki Kameluni. Na‘e tāpuaki‘i ‘e Sihova ‘emau ngaahi feingá. Ko hono mo‘oní, ‘i ha ta‘u ‘e 20 nai, ko ‘ene kakai ‘i he fonua ko iá na‘a nau ma‘u ma‘u pē ha ‘īsiu ‘o e Taua Le‘o mo e tatau fakamāhina ‘o e tohi na‘e ui he taimi ko iá ko e Our Kingdom Service.

Mei he kamata pē ‘ema faialeá, na‘á ku vakai ki he ngaahi ‘ulungaanga fakalaumālie ‘o Angèle. Na‘e hoko ‘o hā mahino ange ‘a e ngaahi ‘ulungaanga ko iá ‘i he‘ema nofo malí. Ko hono mo‘oní, ‘i he efiafi pē na‘á ma mali aí, na‘á ne kole mai ke u  lotu fekau‘aki mo ‘ema holi ke tauhi kia Sihova ‘i he lahi taha ‘ema malavá ko ha ongo me‘a mali. Na‘e tali ‘e Sihova ‘a e lotu ko iá.

Na‘e toe tokoni‘i au ‘e Angèle ke falala kakato ange kia Sihova. Ko e fakatātaá: ‘I he 1973 na‘e fakaafe‘i ai kimaua ke ngāue ‘i he Pētelí, na‘á ku toumoua koe‘uhí na‘á ku ‘ofa ‘i he ngāue fakasēketí. Ka na‘e fakamanatu mai ‘e Angèle kuó ma fakatapui ‘ema mo‘uí kia Sihova. ‘Ikai ‘oku totonu ke ma fai ha me‘a pē ‘oku kole mai ‘e he‘ene kautahá ke ma fai? (Hep. 13:17) Na‘e ‘ikai ha ‘uhinga ke u toe fakafetau ai! Ko ia na‘á ma ‘alu leva ki Pēteli. ‘I he kotoa ‘o ‘ema mo‘ui fakatahá, ko e fakapotopoto, fakakaukau lelei mo e vakai fakalaumālie ‘a hoku uaifí kuó ne fakaivimālohi‘i ‘ema nofo malí pea tokoni‘i kimaua ke fai ‘a e ngaahi fili lelei.

Kuó ma ta‘umotu‘a ange he taimí ni, ka ‘oku hokohoko atu ‘a e hoko ‘a Angèle ko ha uaifi poupou mo lelei ‘aupito. Ko e fakatātaá, koe‘uhi ke ma‘u ‘a e ngaahi ako fakateokalatí, ‘a ia ko e lahi ‘o kinautolu na‘e fakahoko ‘i he lea faka-Pilitāniá, na‘á ku ngāue mālohi mo Angèle ke toe sai ange ‘ema leá. Na‘e kau ki ai ‘ema kau ki ha fakataha‘anga lea faka-Pilitānia, neongo na‘á ma ta‘u 70 tupu he taimi ko iá. Koe‘uhi na‘á ku hoko ko ha mēmipa ‘o e Kōmiti Va‘a Falanisē, ko hono ako ha lea kehe ko ha pole. Ka na‘á ku fetokoni‘aki mo Angèle. ‘Okú ma ta‘u 80 tupu he taimí ni, ‘okú ma kei teuteu pē ki he fakatahá ‘i he lea faka-Pilitāniá mo e faka-Falaniseé. ‘Okú ma toe feinga ke kau ki he ngaahi fakatahá mo e ngāue fakafaifekau ‘ema fakataha‘angá ‘i he lahi te ma malavá. Kuo tāpuaki‘i ‘e Sihova ‘ema ngaahi feinga ke ako ‘a e lea faka-Pilitāniá.

Na‘á ma ma‘u ha tāpuaki tu‘u-ki-mu‘a ‘i he 2017. Na‘á ku ma‘u mo Angèle ‘a e monū ke kau ki he Ako Ma‘á e Kau Mēmipa ‘o e Kōmiti Va‘á mo Honau Ngaahi Uaifí, na‘e fai ‘i he Senitā Fakaeako Taua Le‘o ‘i Patterson, Niu ‘Ioke.

Ko e mo‘oni ko Sihova ‘a e Faiako Ma‘ongo‘ongá. (‘Ai. 30:20) Ko ia ‘oku ‘ikai ha ofo ‘i hono ma‘u ‘e he‘ene kakaí​—ta‘umotu‘a mo e kei si‘i​—‘a e ako lelei taha ‘oku ala ma‘ú! (Teu. 4:5-8) Ko e mo‘oni, kuó u vakai ko e to‘utupu ‘oku nau fanongo kia Sihova mo e fanga tokoua mo e fanga tuofāfine taukeí ‘oku nau fakalakalaka fakalaumālie pea hoko ko ha kakai lalahi lavame‘a. ‘Oku fakamanatu mai ‘e he Palōveepi 9:9: “‘Oatu ‘a e fakahinohinó ki ha tokotaha poto, pea te ne poto ange ai. Ako‘i ha tokotaha mā‘oni‘oni, pea ‘e fakalahi ai ‘a e me‘a kuó ne akó.”

‘Oku ou fa‘a fakakaukau ki he pō kaupō‘uli fakamanavahē ‘i he ‘otu mo‘unga ‘o ‘Alasīlia ‘i he meimei ta‘u ‘e 60 kuohilí. Na‘e ‘ikai ke u teitei ‘ilo ‘a e me‘a lelei na‘e toka mei mu‘a kiate aú. Kuó u ako ha me‘a lahi mei he ni‘ihi kehé! Kuo foaki mo‘oni mai ‘e Sihova ha mo‘ui fakakoloa mo fakafiefia kiate au mo Angèle. Ko ia ‘okú ma fakapapau‘i ke ‘oua ‘aupito na‘a tuku ‘ema ako fekau‘aki mo ‘ema Tamai fakahēvaní pea mei he fanga tokoua mo e fanga tuofāfine poto mo taukei ‘oku nau ‘ofa kiate iá.