1-2. Ko e hā ʻa e ngaahi pole ʻoku fehangahangai mo e Kau Fakamoʻoni tokolahi?

 NAʻE fakalototoʻaʻi ʻe he ʻapositolo ko Paulá ʻa Tīmote pea pehē ki he kotoa ʻo e kau Kalisitiané ke fakahoko kakato ʻenau ngāue fakafaifekaú. (2 Tīm. 4:5) ʻOku mātuʻaki mahuʻinga kiate kitautolu ʻa e faleʻi ʻa Paulá. Neongo ia, ʻoku ʻi ai ʻa e ngaahi pole. ʻOku tokolahi hotau fanga tokoua mo e fanga tuofāfine, ʻoku fiemaʻu kiate kinautolu ʻa e loto-toʻa moʻoni ke kau ʻi he ngāue fakamalangá. (2 Tīm. 4:2) Ko e fakatātaá, fakakaukau ki hotau fanga tokoua ʻoku nau nofo ʻi he ngaahi fonua ʻoku fakangatangata pe aʻu ʻo tapui ai ʻetau ngāué. ʻOku nau kau ki he ngāue fakafaifekaú ʻo tuku ai ʻenau tauʻatāiná ke ʻi ha tuʻunga fakatuʻutāmaki!

² Kuo pau ke fekuki ʻa e kakai ʻa Sihová mo e ngaahi palopalema kehekehe ʻe lava ke fakalotosiʻiʻi ai kinautolu. Ko e fakatātaá, ko e tokolahi kuo pau ke nau ngāue ʻi he ngaahi houa lahi ke tokonaki ʻa e ngaahi fiemaʻu tefito maʻa honau fāmilí. ʻOku nau saiʻia ke fai ʻa e meʻa lahi ange ʻi he ngāue fakafaifekaú, ka ʻi he fakaʻosinga uiké kuo mei ʻosi honau iví. Ko e niʻihi ʻoku fuʻu fakangatangata ʻa e meʻa ʻoku lava ke nau faí koeʻuhi ko ha mahaki tauhi pe hoholo ke motuʻá; ʻo aʻu nai ʻo nau nofo fale pē. Ko e niʻihi ia ʻoku nau faitau hokohoko mo e ongoʻi ʻikai hanau ʻaongá. Ko Mary, b ko ha tuofefine ʻoku nofo ʻi he Hahake Lotolotó, ʻokú ne pehē: “ʻOku fiemaʻu ha feinga lahi ke faitau mo ʻeku ngaahi ongoʻi ʻikai leleí ʻo ʻai ai ke u helaʻia fakaeongo. Pea ʻoku ou ongoʻi halaia koeʻuhi ʻoku toʻo atu ai ʻa e taimi mo e ivi naʻe mei fakahoko ʻaki ʻeku ngāue fakafaifekaú.”

3. Ko e hā te tau lāulea ki ai ʻi he kupu ko ení?

³ Tatau ai pē pe ko e hā hotau tuʻungá, ʻe lava ke fakaivia kitautolu ʻe Sihova ke fekuki mo e ngaahi pole fakafoʻituituí pea kei tauhi kiate ia ki he ngataʻanga ʻoku fakaʻatā ʻe hotau tuʻungá. Ki muʻa ke tau lāulea ki he founga ʻe lava ke tokoniʻi ai kitautolu ʻe Sihová, tau sivisiviʻi angé ʻa e founga naʻá ne fakaivimālohiʻi ai ʻa  Paula mo Tīmote ke fakahoko ʻena ngāue fakafaifekaú neongo ʻa e ngaahi polé.

4. Ko e hā ʻa e ngaahi pole naʻe fehangahangai mo Paulá?

⁴ Naʻe fehangahangai ʻa Paula mo e ngaahi pole lahi. Naʻe tautefito ʻene fiemaʻu ʻa e mālohí ʻi he taimi naʻe haha ai, tolomakaʻi pea tuku pōpulá. (2 Kol. 11:23-25) Naʻe fakahaaʻi tauʻatāina ʻe Paula naʻá ne faitau ʻi he taimi ʻe niʻihi mo e ngaahi ongoʻi ʻikai lelei. (Loma 7:18, 19, 24) Naʻá ne kātekina foki “ha tolounua ʻi he kakanó,” ʻa ia naʻá ne fiemaʻu lahi ke toʻo atu ʻe he ʻOtuá.​—2 Kol. 12:7, 8.

5. Ko e hā naʻe fakahoko ʻe Paula neongo ʻa e ngaahi pole naʻá ne fehangahangai mo iá?

⁵ Naʻe fakaivia ʻe Sihova ʻa Paula ke fakahoko ʻene ngāue fakafaifekaú neongo ʻa e kotoa ʻo e ngaahi pole naʻá ne fehangahangai mo iá. Fakakaukau ki he meʻa naʻe fakahoko ʻe Paulá. Ko e fakatātaá, lolotonga hono tuku pōpula ia ʻi ha fale ʻi Loma, naʻá ne taukapoʻi faivelenga ʻa e ongoongo leleí ʻi he ʻao ʻo e kau taki Siú pea mahalo mo e kau ʻōfisa fakapuleʻangá. (Ngā. 28:17; Fil. 4:21,22) Naʻá ne toe malanga ki he tokolahi ʻi he Kau Kaʻate ʻa e ʻEmipolá, peá ne faifakamoʻoni ki he faʻahinga kotoa naʻe ʻaʻahi kiate iá. (Ngā. 28:30, 31; Fil. 1:13) Lolotonga ʻa e taimi ko iá, naʻe hiki ʻe Paula ʻa e ngaahi tohi fakamānavaʻi ʻa ia naʻe ʻaonga ki he kau Kalisitiane moʻoní pea aʻu mai ki he ʻahó ni. Ko e faʻifaʻitakiʻanga ʻa Paulá naʻá ne fakaivimālohiʻi ʻa e fakatahaʻanga ʻi Lomá ʻo nau maʻu ai “ʻo toe lahi ange ʻa e loto-toʻa ke lea taʻemanavahē ʻaki ʻa e folofola ʻa e ʻOtuá.” (Fil. 1:14) Neongo naʻe fakangatangata he taimi ʻe niʻihi ʻa e meʻa naʻe lava ke fai ʻe Paulá, naʻá ne ngāue lelei taha ʻaki hono tuʻungá, pea naʻe “laka ki muʻa ai ʻa e ongoongo leleí.”​—Fil. 1:12.

6. Fakatatau ki he 2 Kolinitō 12:9, 10, ko e hā naʻá ne ʻai ke malava ʻe Paula ʻo fakahoko ʻene ngāue fakafaifekaú?

⁶ Naʻe ʻiloʻi ʻe Paula ko e meʻa kotoa naʻá ne fai ʻi he ngāue ʻa Sihová ko e malava ia ʻi he mālohi ʻo e ʻOtuá, ʻo ʻikai ko hano mālohi. Naʻá ne pehē ko e mālohi ʻo e ʻOtuá naʻe “fakahaohaoaʻi ia [ʻi he] hoko ʻo vaivaí.” (Lau ʻa e 2 Kolinitō 12:9, 10.) Fakafou ʻi he laumālie māʻoniʻoni ʻo Sihová, naʻá ne foaki kia Paula ʻa e mālohi ke fakahoko kakato ʻaki ʻene ngāue fakafaifekaú​—neongo ʻa e fakatanga, tuku pōpula mo e ngaahi pole kehe.

7. Ko e hā ʻa e ngaahi pole naʻe pau ke ikuʻi ʻe Tīmote koeʻuhi ke fakahoko ai ʻene ngāue fakafaifekaú?

⁷ Ko Tīmote, ko ha kaungāngāue kei siʻi ange ʻo  Paula, naʻe pau foki ke ne falala ki he mālohi ʻo e ʻOtuá ke fakahoko ʻaki ʻene ngāue fakafaifekaú. Naʻe kau fakataha ʻa Tīmote mo Paula ʻi ha ngaahi fononga fakamisinale lōloa. Pehē foki, naʻe fekau atu ia ʻe Paula ʻi ha ngaahi fononga kehe ke ʻaʻahi mo fakalototoʻaʻi ʻa e ngaahi fakatahaʻangá. (1 Kol. 4:17) Kuo pau pē naʻe ongoʻi taʻefeʻunga ʻa Tīmote. Mahalo ko e ʻuhinga ia naʻe tala ange ai ʻe Paula: “ʻOua ʻaupito naʻa tuku ke siolalo atu ha taha ki hoʻo kei siʻí.” (1 Tīm. 4:12) ʻIkai ko ia pē, lolotonga ʻa e taimi ko ení, naʻe ʻi ai ha tolounua ʻi he kakano ʻo Tīmoté​—ko ʻene “faʻa puké.” (1 Tīm. 5:23) Ka naʻe ʻiloʻi ʻe Tīmote ko e laumālie māʻoniʻoni mālohi ʻo Sihová te ne foaki kiate ia ʻa e mālohi ʻoku fiemaʻu ke ne malangaʻi ʻaki ʻa e ongoongo leleí pea ngāue maʻa hono fanga tokouá.​—2 Tīm. 1:7.

8. ʻOku anga-fēfē hono fakaivimālohiʻi ʻe Sihova ʻene kakaí he ʻahó ni?

⁸ ʻI he ʻahó ni, ʻoku foaki ʻe Sihova ki heʻene kakaí “ʻa e mālohi ʻoku mahulu atu ia ʻi he tuʻunga anga-mahení” ke lava ʻo hokohoko atu ai ʻenau tauhi faitōnunga kiate iá. (2 Kol. 4:7) Tau lāulea angé ki ha meʻa ʻe fā kuo tokonaki mai ʻe Sihova ke fakaivimālohiʻi mo tokoniʻi ʻaki kitautolu ke nofoʻaki faitōnunga kiate ia: Ko e lotu, Tohi Tapu, feohi faka-Kalisitiane mo ʻetau ngāue fakafaifekaú.

9. ʻE lava fēfē ke tokoniʻi kitautolu ʻe he lotú?

⁹ Fakaivimālohiʻi fakafou ʻi he lotu. Hangē ko ia ʻoku hiki ʻi he ʻEfesō 6:18, ʻoku fakalototoʻaʻi ai kitautolu ʻe Paula ke lotu ki he ʻOtuá “ʻi he taimi kotoa pē.” ʻE tali ʻe he ʻOtuá ʻetau lotú ʻaki hono fakaivimālohiʻi kitautolu. Ko Jonnie, ʻoku nofo ʻi Polivia, naʻá ne hokosia ʻa e poupou ko iá ʻi heʻene foua ha ngaahi ʻahiʻahi hokohoko. Naʻe puke lahi ʻene ongo mātuʻá mo hono uaifí ʻi he taimi tatau. Naʻe fāinga ʻa Jonnie ke tokangaʻi ʻenau ngaahi fiemaʻú. Naʻe mate ʻene faʻeé, pea naʻe fuoloa ʻa e taimi ke fakaakeake ai hono uaifí mo ʻene tamaí. ʻI he manatu ki aí, ʻoku pehē ʻe Jonnie, “ʻI heʻeku ʻi he malumalu ʻo e faingataʻa lahí, naʻe tokoni maʻu pē kiate au ʻa e lotu ki he ngaahi meʻa pau.” Naʻe foaki ʻe Sihova kia Jonnie ʻa e mālohi ke ne kātekina ai. Ko Ronald, ko ha mātuʻa ʻi Polivia, naʻá ne ʻiloʻi naʻe maʻu ʻe he kanisā ʻene faʻeé. Naʻá ne mate ʻi ha māhina ʻe taha mei ai. Ko e hā naʻá ne tokoniʻi ia ke fekuki mo e meʻá ni? ʻOkú ne pehē: “Ko e lotú ʻokú ne fakaʻatā ke u huaʻi atu hoku lotó pea tuku ange atu ʻeku ngaahi ongoʻí kia Sihova. ʻOku ou ʻiloʻi ʻokú ne mahinoʻi lelei ange au ʻi ha toe taha, naʻa mo ʻeku mahinoʻi aú.” ʻI he taimi ʻe niʻihi, ʻoku tau ongoʻi lōmekina pe veiveiua fekauʻaki mo e meʻa ʻoku totonu ke tau lotu fekauʻaki mo iá. Ka ʻoku fakaafeʻi kitautolu ʻe Sihova ke lotu kiate ia neongo kapau ʻoku faingataʻa ke tau leaʻaki ʻa e meʻa ʻi heʻetau fakakaukaú mo ʻetau ongoʻí.​—Loma 8:26, 27.

10. Hangē ko ia ʻi he Hepelū 4:12, ko e hā ʻoku mātuʻaki mahuʻinga ai hono lau ʻa e Tohi Tapú pea fakalaulauloto ki he meʻa ʻoku tau laú?

¹⁰ Fakaivimālohiʻi fakafou ʻi he Tohi Tapú. Hangē pē ko e falala ʻa Paula ki he Folofolá ki ha mālohi mo ha fakafiemālie, ko kitautolu foki ʻoku lava ke tau falala ki ai. (Loma 15:4) ʻI heʻetau lau ʻa e Folofola ʻa e ʻOtuá pea fakalaulauloto ki aí, ʻoku lava ke ngāueʻaki ʻe Sihova hono laumālié ke tokoniʻi kitautolu ke mahinoʻi lelei ange ʻa e founga ke ngāueʻaki ai ʻa e Folofolá ʻi hotau tuʻungá. (Lau ʻa e Hepelū 4:12.) Ko Ronald, naʻe lave ki ai ki muʻá, ʻokú ne pehē: “ʻOku ou houngaʻia ʻi heʻeku tōʻongaʻaki hono lau ha konga ʻo e Tohi Tapú ʻi he pō kotoa. ʻOku ou fakalaulauloto lahi ki he ngaahi ʻulungaanga ʻo Sihová mo ʻene ngaahi fakafeangai ʻofa ki heʻene kau sevānití. ʻOku tokoni eni ke u toe maʻu hoku mālohí.”

11. Naʻe anga-fēfē hono fakaivimālohiʻi ʻe he Tohi Tapú ha tuofefine naʻe mamahi?

¹¹ ʻE lava ke tau fakatupulekina ha vakai totonu ki hotau tuʻungá ʻaki ʻa e fakalaulauloto ki he Folofola ʻa e ʻOtuá. Fakakaukau ki he maʻu  ʻaonga mei he Tohi Tapú ʻa ha uitou naʻe mamahi. Naʻe fokotuʻu ange ʻe ha mātuʻa ʻe lava ke ne ako ʻa e ngaahi lēsoni ʻaonga mei hono lau ʻa e tohi ʻa Siopé. ʻI heʻene fai iá, naʻá ne ʻuluaki fakaangaʻi ʻa Siope ki heʻene fakakaukau halá. Naʻá ne sioloto atu ʻokú ne fakatokanga kiate ia: “Siope! ʻOua te ke fuʻu fakakaukau taʻepau!” Ka naʻá ne toki fakatokangaʻi ko ʻene fakakaukaú naʻe meimei tatau pē mo Siope. Naʻe tokoni eni ke ne fakatonutonu ʻene vakaí pea fakaivimālohiʻi ia ke fekuki mo e mamahi ʻi he mole hono husepānití.

12. ʻOku anga-fēfē hono fakaivimālohiʻi kitautolu ʻe Sihova fakafou ʻi he kaungālotú?

¹² Fakaivimālohiʻi fakafou ʻi he feohi faka-Kalisitiané. Ko e founga ʻe taha ʻoku fakaivimālohiʻi ai ʻe Sihova ʻa e kau Kalisitiané ko e feohi mo e kaungālotú. Naʻe tohi ʻe Paula naʻá ne fakaʻamu ke “fefakalototoʻaʻaki” mo hono fanga tokoua mo e fanga tuofāfine fakalaumālié. (Loma 1:11, 12) Ko Mary, naʻe lave ki ai ki muʻá, ʻokú ne koloaʻaki ʻa e feohi ko iá. ʻOkú ne pehē: “Kuo ngāueʻaki ʻe Sihova ʻa e fanga tokoua mo e fanga tuofāfine naʻe ʻikai ke nau teitei ʻiloʻi ʻa e meʻa naʻá ku fāinga mo iá. Naʻa nau leaʻaki ha meʻa fakalototoʻa pe ʻomai ha kaati, pea ko e meʻa tofu pē ia naʻá ku fiemaʻú. ʻOku toe tokoni ʻa e talanoa ki he fanga tuofāfine kehe naʻa nau fāinga mo e meʻa meimei tatau pea ako mei heʻenau hokosiá. Pea ʻoku ʻai maʻu pē ʻe he kau mātuʻá ke u ongoʻi ʻoku ʻi ai hoku mahuʻinga ʻi he fakatahaʻangá.”

13. ʻE lava fēfē ke tau fefakaivimālohiʻaki ʻi he ngaahi fakatahá?

¹³ Ko e taha ʻo e ngaahi feituʻu lelei taha ke fefakalototoʻaʻaki aí ko e fakataha ʻa e fakatahaʻangá. ʻI hoʻo maʻu ʻa e ngaahi fakatahá, ko e hā ʻoku ʻikai ke ke tamuʻomuʻa ai ke fakaivimālohiʻi ʻa e niʻihi kehé pea fakahaaʻi loto-moʻoni ʻa e manavaʻofá mo e houngaʻiá? Ko e fakatātaá, ki muʻa ʻi ha fakataha naʻe tala ange ʻe ha mātuʻa ko Peter ki ha tuofefine ʻoku taʻetui hono hoá: “ʻOku ʻikai te ke ʻiloʻi ʻa e fakalototoʻa moʻoni ʻa hoʻo ʻi hení. ʻOkú ke haʻu maʻu pē mo hoʻo fānau ʻe toko onó ʻoku nau maau mo mateuteu ke fai ha tali.” Naʻe fakatē-loʻimata ʻa e tuofefiné ʻi he houngaʻia peá ne pehē ange: “ʻOku ʻikai te ke ʻiloʻi ko e lea tofu pē ena naʻá ku fiemaʻu ke fanongo ki ai he ʻaho ní.”

14. ʻOku anga-fēfē hono tokoniʻi kitautolu ʻi he kau ki he ngāue fakafaifekaú?

¹⁴ Fakaivimālohiʻi fakafou ʻi he ngāue fakafaifekaú. ʻI heʻetau vahevahe atu ʻa e ngaahi moʻoni Fakatohitapú ki he niʻihi kehé, ʻoku tau ongoʻi fakaivifoʻou mo longomoʻui, tatau ai pē pe ʻoku nau tali lelei ia pe ʻikai. (Pal. 11:25) Ko ha tuofefine ko Stacy naʻá ne hokosia ʻa e lava ke fakaivimālohiʻi ia ʻe he ngāue fakafaifekaú. ʻI he taimi naʻe tuʻusi ai ha mēmipa ʻi he fāmilí, naʻá ne puputuʻu, pea toutou ʻeke hifo kiate ia, ‘Naʻe mei lava ke u fai ha meʻa lahi ange ke tokoni?’ Naʻe ʻikai mei lava ke fakakaukau ʻa Stacy ki ha toe meʻa. Ko e hā naʻe tokoni kiate ia ke fekuki mo e tuʻunga fakamamahi ko ení? Ko e ngāue fakafaifekaú! ʻI heʻene kau ki he ngāue fakamalangá, naʻe kamata ke ne tokangataha ki he kakai ʻi he feituʻu ngāué naʻa nau fiemaʻu ʻene tokoní. ʻOkú ne pehē: “Lolotonga ʻa e taimi ko iá, naʻe ʻomai ʻe Sihova ha ako Tohi Tapu naʻe vave ʻene fakalakalaká. Naʻe fakalototoʻa lahi ia kiate au. Ko e meʻa naʻá ne tokoniʻi lahi taha au ke tuʻu maʻú ko e kau ki he ngāue fakafaifekaú.”

15. Ko e hā ʻokú ke ako mei he fakamatala ʻa Mary?

¹⁵ ʻOku ongoʻi nai ʻe he niʻihi ʻoku ʻikai malava ke nau fai ha meʻa lahi ʻi he ngāue fakafaifekaú koeʻuhi ko honau tuʻungá. Kapau ko e anga ia hoʻo ongoʻí, manatuʻi ʻoku hōifua mai ʻa Sihova kapau ʻokú ke fai ho lelei tahá. Toe fakakaukau angé ki he faʻifaʻitakiʻanga ʻa Mary. ʻI he taimi naʻá ne hiki ai ki ha malaʻe lea muli, naʻá ne ongoʻi ʻoku fuʻu fakangatangata ʻene malavá. ʻOkú ne pehē, “ʻI ha taimi, ko e meʻa pē naʻe lava ke u faí ko ha kiʻi tali faingofua, lau ha veesi Tohi Tapu pe tuʻuaki ha tuleki ʻi he malangá.” Naʻá ne ongoʻi taʻefeʻunga ʻi hono fakahoa  ia ki he faʻahinga ʻoku poto lelei ʻi he leá. Kae kehe, naʻá ne fakatonutonu ʻa e anga ʻene fakakaukaú. Naʻe kamata ke ne ʻiloʻi ʻe lava ke ngāueʻaki ia ʻe Sihova neongo ʻa e fakangatangata ʻene malavá. ʻOkú ne pehē, “Ko e ngaahi moʻoni fakahaofi moʻuí ʻoku faingofua ʻaupito, pea ko e ngaahi moʻoni ko iá ʻokú ne liliu ʻa e moʻui ʻa e kakaí.”

16. Ko e hā ʻe lava ke tokoni ki he faʻahinga ʻoku toka mohengá ke maʻu ha mālohi?

¹⁶ ʻOku ʻafioʻi mo fakahoungaʻi ʻe Sihova ʻetau holi ke kau ʻi he ngāue fakafaifekaú neongo kapau ʻoku tau toka mohenga. ʻOku lava ke ne fakaava mai ha faingamālie ke tau faifakamoʻoni ki he kau tauhí pe kau ngāue fakafaitoʻó. Kapau ʻoku tau fakahoa ʻetau ngāue lolotongá ki he meʻa naʻe malava ke tau fai ʻi he kuohilí, te tau hoko nai ai ʻo loto-siʻi. Ka ʻo kapau ʻoku tau ʻiloʻi ʻa e anga hono tokoniʻi kitautolu ʻe Sihova he taimi ní, te tau maʻu ai ʻa e mālohi ʻoku fiemaʻú ke tau kātekina ha faʻahinga ʻahiʻahi fakataha mo e fiefia.

17. Fakatatau ki he Tangata Malanga 11:6, ko e hā ʻoku totonu ai ke hokohoko atu ʻetau ngāue fakafaifekaú neongo kapau ʻoku ʻikai ke tau sio leva ki ha ola?

¹⁷ ʻOku ʻikai ke tau ʻiloʻi pe ko fē ʻa e tenga ʻo e moʻoní ʻa ia ʻoku tau toó ʻe faiaka pea kamata ke tupú. (Lau ʻa e Tangata Malanga 11:6.) Ko e fakatātaá, ko Barbara, ko ha tuofefine taʻu 80 tupu, ʻokú ne faifakamoʻoni maʻu pē ʻi he telefoní mo e faitohí. ʻI he taha ʻo ʻene ngaahi tohí, naʻá ne faʻo ai ʻa e Watchtower ʻo Maʻasi 1, 2014, mo e kupu “Meʻa Kuo Fai ʻe he ʻOtuá Maʻau.” Naʻe ʻikai te ne ʻiloʻi, naʻá ne ʻave ʻa e tohí ki ha ongo meʻa mali naʻe ʻikai ke na toe hoko ko ha Fakamoʻoni ʻa Sihova. Naʻá na toutou lau ʻa e makasiní. Naʻe ongoʻi ʻe he husepānití hangē naʻe lea hangatonu mai ʻa Sihova kiate iá. Naʻe kamata ke maʻu ʻe he ongo meʻá ʻa e ngaahi fakatahá pea faai atu pē ʻo na toe longomoʻui hili ia ha taʻu ʻe 27 nai. Sioloto atu ki he fakalototoʻa mo e fakaivimālohi ē kia Barbara ke sio ki he ola lelei ko ia mei he tohi pē ʻe taha!

18. Ko e hā ʻe lava ke tau fai ke maʻu ʻaonga mei he mālohi ʻo e ʻOtuá?

¹⁸ ʻOku tokonaki mai ʻe Sihova ʻa e faingamālie lahi ke tau maʻu ai hono mālohi hulu faú. ʻI he taimi ʻoku tau ngāueʻaki ai ʻene ngaahi tokonakí​—hangē ko e lotú, Tohi Tapú, feohi faka-Kalisitiané mo e ngāue fakafaifekaú​—ʻoku tau fakahaaʻi ai ʻoku tau falala ki he malava mo e holi ʻa Sihova ke tokoniʻi kitautolú. Fakatauange ke tau falala maʻu pē ki heʻetau Tamai fakahēvaní, ʻa ia ʻokú ne fiefia “ke fakahāhā hono mālohí koeʻuhi ko e faʻahinga ko ia ʻoku kakato honau lotó kiate iá.”​—2 Kal. 16:9.