1. Fakatatau ki he Mātiu 24:9, ko e hā ʻoku ʻikai totonu ai ke tau ofo kapau ʻe fehiʻanekinaʻi kitautolu ʻe he māmaní?

 NAʻE fakatupu kitautolu ʻe Sihova ke tau fakahāhā ʻa e ʻofá pea ke ʻofaʻi kitautolu. Ko ia ʻi he taimi ʻoku fehiʻanekinaʻi ai kitautolu ʻe ha taha, te tau ongoʻi loto-mamahi pe aʻu nai ʻo tau ilifia. Ko e fakatātaá, ko ha tuofefine ko Georgina, ʻoku nofo ʻi ʻIulope, ʻokú ne pehē: “ʻI heʻeku taʻu 14, naʻe fehiʻa ʻeku faʻeé ʻiate au koeʻuhi ko ʻeku tauhi kia Sihová. Naʻá ku ongoʻi liʻekina peá u kamata veiveiua pe ko ha tokotaha lelei au.” b Ko ha tokoua ko Danylo ʻokú ne tohi: “ʻI hono tā au ʻe he kau sōtiá, leakoviʻi au, pea fakamanamanaʻi koeʻuhi ko ʻeku kau ki he Kau Fakamoʻoni ʻa Sihová, naʻá ku ongoʻi tailiili mo fakamāʻia.” Ko e tāufehiʻa peheé ʻoku fakamamahi ka ʻoku ʻikai ke tau ofo ai. Naʻe tomuʻa tala ʻe Sīsū ʻe fehiʻanekinaʻi kitautolu.​—Lau ʻa e Mātiu 24:9.

2-3. Ko e hā ʻoku fehiʻanekinaʻi ai ʻa e kau muimui ʻo Sīsuú?

² ʻOku fehiʻa ʻa e māmaní ʻi he kau muimui ʻo Sīsuú. Ko e hā hono ʻuhingá? Koeʻuhí hangē ko Sīsū “ʻoku ʻikai ko ha konga [kitautolu] ʻo e māmaní.” (Sione 15:17-19) Ko hono olá, lolotonga ʻetau fakaʻapaʻapa ki he ngaahi puleʻanga fakaetangatá, heʻikai ke tau kau ʻi he meʻa fakapolitikalé, salute ki ha fuka pe hiva ʻi ha fasi fakafonua. ʻOku tau foaki kia Sihova ʻetau anga-līʻoa maʻataʻataá. ʻOku tau pouaki ʻa e totonu ʻa e ʻOtuá ke pule ki he faʻahinga ʻo e tangatá​—ko ha totonu ʻoku mātuʻaki poleʻi ʻe Sētane mo hono “hakó.” (Sēn. 3:1-5, 15) ʻOku tau malangaʻi ko e Puleʻanga ʻo e ʻOtuá ko e ʻamanakiʻanga pē ia ʻe taha ki he faʻahinga ʻo e tangatá pea ʻoku vavé ni ke laiki ʻe he Puleʻanga ko iá ʻa e faʻahinga kotoa ʻoku fakafepaki ki aí. (Tan. 2:44; Fkh. 19:19-21) Ko e pōpoaki ko iá ko e ongoongo lelei ia ki he anga-vaivaí ka ko e ongoongo kovi ia ki he kau fulikivanú.​—Saame 37:10, 11.

 ³ ʻOku toe fehiʻanekinaʻi kitautolu koeʻuhi ko ʻetau moʻuiʻaki ʻa e ngaahi tuʻunga māʻoniʻoni ʻa e ʻOtuá. Ko e ngaahi tuʻunga ko ení ʻoku fehangahangai fakaʻaufuli ia mo e ngaahi tuʻunga fakaeʻulungaanga ololalo ʻa e māmaní. Ko e fakatātaá, ʻoku tali lelei ʻe he kakai tokolahi ʻi he taimí ni ʻa e ngaahi ʻulungaanga mātuʻaki taʻetaau ʻo meimei tatau mo ia naʻe fakaʻauha ai ʻe he ʻOtuá ʻa Sōtoma mo Komolá! (Sute 7) Koeʻuhi ʻoku tau muimui ki he ngaahi tuʻunga Fakatohitapu fekauʻaki mo e ngaahi tōʻonga peheé, ʻoku manukiʻi kitautolu ʻe he kakai tokolahi pea tala ʻoku tau fuʻu fakataputapui!​—1 Pita 4:3, 4.

4. Ko e hā ʻa e ongo ʻulungaanga te na fakaivimālohiʻi kitautolu ʻi hono fehiʻanekinaʻi kitautolu ʻe he kakaí?

⁴ Ko e hā ʻe lava ke ne tokoniʻi kitautolu ke kātekina hono fehiʻanekinaʻi kitautolu ʻe he kakaí mo leakoviʻí? ʻOku fiemaʻu ke tau tui mālohi ʻe tokoniʻi kitautolu ʻe Sihova. Hangē ko ha pā, ko ʻetau tuí ʻe lava ke “tāmateʻiʻaki ʻa e ngaahi ngahau vela kotoa ʻa e tokotaha fulikivanú.” (ʻEf. 6:16) Ka ʻoku tau fiemaʻu ʻa e meʻa lahi ange ʻi he tuí. ʻOku tau toe fiemaʻu ʻa e ʻofá. Ko e hā hono ʻuhingá? Koeʻuhí ko e ʻofá “ʻoku ʻikai te ne hoko ʻo ʻitangofua.” ʻOkú ne ʻūkuma mo kātekina ʻa e ngaahi meʻa fakamamahi kotoa pē. (1 Kol. 13:4-7, 13) Te tau vakai he taimí ni ki he founga ʻe tokoniʻi kitautolu ʻe he ʻofa kia Sihová, ʻofa ki hotau kaungālotú pea naʻa mo e ʻofa ki hotau ngaahi filí ke kātekina ʻa e tāufehiʻá.

5. Naʻe anga-fēfē hono fakaivimālohiʻi ʻa Sīsū ʻe heʻene ʻofa ki heʻene Tamaí?

⁵ ʻI he pō ki muʻa ke tāmateʻi ʻa Sīsū ʻe hono ngaahi filí, naʻá ne tala ange ki hono kau muimui mateakí: “ʻOku ou ʻofa ʻi he Tamaí, [ko ia] ʻoku ou fai ʻo hangē tofu pē ko e meʻa kuo fekau mai ʻe he Tamaí ke u faí.” (Sione 14:31) Ko e ʻofa ʻa Sīsū kia Sihová naʻá ne fakaivimālohiʻi ia ke fehangahangai mo e ngaahi ʻahiʻahi naʻe toka mei muʻá. Ko ʻetau ʻofa kia Sihová ʻe lava ai ke tau fai ʻa e meʻa tatau.

6. Fakatatau ki he Loma 5:3-5, ʻoku anga-fēfē ongoʻi ʻa e kau sevāniti ʻa Sihová fekauʻaki mo hono kātekina ʻa e tāufehiʻa ʻa e māmaní?

⁶ Ko e ʻofa ki he ʻOtuá kuó ne tokoniʻi maʻu pē ʻa e kau sevāniti ʻa Sihová ke nau kātekina ʻa e fakatangá. Ko e fakatātaá, ʻi hono fekauʻi ʻe he fakamaauʻanga lahi faka-Siú ʻa e kau ʻapositoló ke tuku ʻenau malangá, ko e ʻofa ki he ʻOtuá naʻá ne ueʻi kinautolu ke “talangofua ki he ʻOtuá ko e pulé ia kae ʻikai ki he tangatá.” (Ngā. 5:29; 1 Sio. 5:3) Ko e ʻofa taʻealamotuhi ko iá ʻokú ne toe fakaivimālohiʻi hotau fanga tokouá ʻi he ʻahó ni, ko e tokolahi ʻo kinautolu ʻoku nau tuʻu maʻu ʻi hono fakafepakiʻi mālohi mo anga-kakaha ʻe he ngaahi puleʻangá. ʻI he ʻikai ke loto-siʻí, ʻoku tau lau ia ko ha monū ke kātekina ʻa e tāufehiʻa ʻa e māmaní.​—Ngā. 5:41; lau ʻa e Loma 5:3-5.

7. ʻOku totonu ke fēfē ʻetau fakafeangai ʻi hono fakafepakiʻi kitautolu ʻe he ngaahi mēmipa hotau fāmilí?

⁷ Mahalo ko e taha ʻi hotau ngaahi ʻahiʻahi lahi tahá ko e haʻu mei he ngaahi mēmipa hotau fāmilí tonu. ʻI he kamata ke tau fakahāhā ʻa e mahuʻingaʻia ʻi he moʻoní, ʻe fakakaukau ʻa e ngaahi mēmipa ʻe niʻihi hotau fāmilí kuo takihalaʻi kitautolu. ʻOku fakakaukau nai ʻa e niʻihi kuo hē hotau ʻatamaí. (Fakafehoanaki mo e Maʻake 3:21.) ʻOku aʻu nai ʻo nau fakafepakiʻi anga-fakamālohi kitautolu. Ko e fakafeangai ʻikai lelei ko ení ʻoku ʻikai totonu ke tau ofo ai. Naʻe pehē ʻe Sīsū: “ʻE hoko ko e ngaahi fili ʻo ha tangata ʻa e faʻahinga ʻi hono falé tonu.” (Māt. 10:36) Ko e moʻoni, tatau ai pē pe ko e hā ʻa e anga ʻo e vakai mai hotau kāingá, heʻikai ke tau fakafeangai kiate kinautolu ko hotau fili. ʻI hono kehé, ʻi he tupulaki ʻetau ʻofa kia Sihová, ʻe pehē pē mo ʻetau ʻofa ki he kakaí. (Māt. 22:37-39) Ka heʻikai ʻaupito ke tau fakangaloku ʻetau ngaahi tuʻungá ʻaki hono tukunoaʻi ʻa e ngaahi lao mo e tefitoʻi moʻoni Fakatohitapú koeʻuhi pē ke fakahōhōʻiaʻi ha tangatá.

8-9. Ko e hā naʻá ne tokoniʻi ha tuofefine ke tuʻu maʻu neongo ʻa e fakafepaki kakahá?

⁸ Ko Georgina, naʻe lave ki ai ki muʻá, naʻá ne tuʻu maʻu neongo ʻa e fakafepaki kakaha ʻene faʻeé. ʻOku pehē ʻe Georgina: “Naʻá ku kamata ako  mo ʻeku faʻeé ʻa e Tohi Tapú mo e Kau Fakamoʻoní. Ka ʻi he māhina ʻe ono ki mui ai naʻá ku loto ke maʻu ʻa e fakatahá, naʻe liliu fakafokifā ʻa e vakai ʻeku faʻeé. Naʻá ku toki ʻiloʻi naʻá ne fetuʻutaki mo e kau tafoki ʻo fakafepaki ki he moʻoní, pea naʻá ne ngāueʻaki ʻenau fakakikihí ʻi heʻene talanoa mai kiate aú. Naʻá ne leakoviʻi foki au, fusi hoku ʻulú, fakasisina au pea laku mo ʻeku ʻū tohí. ʻI heʻeku taʻu 15, naʻá ku papitaiso. Naʻe feinga ʻeku faʻeé ke taʻofi au mei heʻeku tauhi kia Sihová ʻaki hono ʻave au ki he ʻapi naʻe tauhi ai ʻa e kau taʻu hongofulu tupú, ko e niʻihi naʻa nau ngāueʻaki ʻa e faitoʻo kona tapú mo faihia. ʻOku faingataʻa ke fekuki mo e fakafepakí tautefito ʻi heʻene haʻu mei ha tokotaha ʻoku totonu ke ʻofa ʻiate koe mo tokanga kiate koe.”

⁹ Naʻe anga-fēfē ʻa e fekuki ʻa Georgina mo e meʻá ni? ʻOkú ne pehē: “Ko e ʻaho naʻe siʻaki ai au ʻe heʻeku faʻeé, ko e toki ʻosi ia ʻa e Tohi Tapú kakato heʻeku lau. Naʻá ku falala pau kakato he taimi ko ení kuó u maʻu ʻa e moʻoní, pea naʻá ku ongoʻi vāofi ʻaupito mo Sihova. Naʻá ku faʻa lotu kiate ia, pea naʻá ne fanongo mai kiate au. ʻI heʻeku nofo ʻi he ʻapi naʻe tauhi ai ʻa e kau taʻu hongofulu tupú, naʻe fakaafeʻi au ʻe ha tuofefine ki hono ʻapí, peá ma ako fakataha ʻa e Tohi Tapú. Lolotonga ʻa e taimi ko iá, naʻe fakaivimālohiʻi au ʻe he fanga tokouá mo e fanga tuofāfine ʻi he Fale Fakatahaʻangá. Naʻa nau ʻai au ke u hoko ko ha konga honau ngaahi fāmilí. Naʻá ku sio tonu ai ki he mālohi ange ʻa Sihova ʻi hotau kau fakafepakí, ʻo tatau ai pē pe ko hai kinautolu.”

10. Ko e hā ʻa e falala pau ʻoku tau maʻu ʻia Sihova ko hotau ʻOtuá?

¹⁰ Naʻe tohi ʻe he ʻapositolo ko Paulá ʻoku ʻikai ha meʻa ʻe lava ke ne “fakamavaheʻi kitautolu mei he ʻofa ʻa e ʻOtuá ʻa ia ʻoku ʻia Kalaisi Sīsū ko hotau ʻEikí.” (Loma 8:38, 39) Neongo te tau faingataʻaʻia nai ʻi ha taimi, ko Sihova te ne ʻi hotau tafaʻakí maʻu pē ke fakafiemālieʻi mo fakaivimālohiʻi kitautolu. Pea hangē ko ia ʻoku fakahaaʻi ʻi he hokosia ʻa Georgina, ʻoku toe tokoniʻi kitautolu ʻe Sihova fakafou ʻi hotau fāmili fakalaumālie ʻofeiná.

11. Naʻe anga-fēfē tokoni ʻa e ʻofa naʻe fakamatalaʻi ʻe Sīsū ʻi he Sione 15:12, 13 ki heʻene kau ākongá? ʻOmai ha fakatātā.

¹¹ ʻI he pō ki muʻa ke pekia ʻa Sīsuú, naʻá ne fakamanatu ki heʻene kau ākongá ke nau feʻofaʻaki. (Lau ʻa e Sione 15:12, 13.) Naʻá ne ʻiloʻi ko e ʻofa feilaulauʻi-kita ko iá te ne tokoniʻi kinautolu ke nofoʻaki fāʻūtaha pea kātekina ʻa e tāufehiʻa ʻa e māmaní. Fakakaukau ki he faʻifaʻitakiʻanga ʻa e fakatahaʻanga ʻi Tesalonaiká. Mei he taimi naʻe fokotuʻu aí, naʻe fakafepakiʻi ʻa e fanga tokouá mo e fanga tuofāfiné. Neongo ia, naʻa nau  hoko ko e faʻifaʻitakiʻanga ʻo e anga-tonú mo e ʻofá. (1 Tes. 1:3, 6, 7) Naʻe fakalototoʻaʻi kinautolu ʻe Paula ke hokohoko atu ʻenau fakahāhā ʻa e ʻofá “ke toe kakato ange.” (1 Tes. 4:9, 10) Ko e ʻofá te ne ueʻi kinautolu ke nau fakanonga ʻa e loto-mafasiá pea poupou ki he kau vaivaí. (1 Tes. 5:14) Naʻa nau muimui ki he fakahinohino ʻa Paulá, koeʻuhi ʻi heʻene tohi hono uá, naʻe hiki ʻi ha taʻu nai ʻe taha ki mui ai, naʻe lava ke pehē ʻe Paula kiate kinautolu: “ʻOku fakautuutu ʻa e feʻofaʻaki ʻa e tokotaha taki taha ʻo kimoutolu.” (2 Tes. 1:3-5) Ko ʻenau ʻofá naʻá ne tokoniʻi kinautolu ke nau kātekina ʻa e faingataʻá mo e fakatangá.

12. Lolotonga ha tau, naʻe anga-fēfē hono fakahāhā ʻe he fanga tokoua mo e fanga tuofāfine ʻi ha fonua ʻe taha ʻa e feʻofaʻakí?

¹² Fakakaukau ki he hokosia ʻa Danylo, naʻe lave ki ai ki muʻá, mo hono uaifí. ʻI he taimi naʻe kapa ai honau koló ʻi he taú, naʻe hokohoko atu ʻena maʻu ʻa e ngaahi fakatahá, malanga ʻi he lahi taha ʻena malavá, pea vahevahe ʻa e meʻakai naʻá na maʻú mo e fanga tokouá mo e fanga tuofāfiné. Pea ʻi he ʻaho ʻe taha, naʻe fakaofiofi atu ha kau sōtia ʻosi fakamahafu kia Danylo. “Naʻa nau fekauʻi ke u siʻaki ʻeku tuí,” ko e lea ia ʻa Danylo. “ʻI heʻeku fakafisí, naʻa nau tā au pea ʻai ke nau fanaʻi au ka naʻe heke pē ʻa e faná ʻi hoku funga ʻulú. Ki muʻa ke nau mavahé, naʻa nau fakamanamanaʻi au te nau toe foki mai ke tohotohoʻi hoku uaifí. Ka naʻe fakavave hotau fanga tokouá ʻo fakaheka kimaua ki ha lēlue ke ma ʻalu ai ki ha kolo ʻe taha. Heʻikai ʻaupito ngalo ʻiate au ʻa e ʻofa ʻa e siʻi fanga tokoua ko iá. Pea ʻi heʻema aʻu ki he kolo ko iá, naʻe ʻomai ʻe he fanga tokouá ʻema meʻakai pea tokoni ke kumi ʻeku ngāue mo ha ʻapi! Ko hono olá, naʻe malava ai ke ma tokonaki ha nofoʻanga ki he Kau Fakamoʻoni kehe naʻa nau hola mai mei he feituʻu naʻe fai ai ʻa e taú.” ʻOku fakahaaʻi ʻe he ngaahi hokosia peheé ko e ʻofa faka-Kalisitiané ʻe lava ke ne tokoniʻi kitautolu ke tau kātekina ʻa e tāufehiʻá.

13. ʻOku anga-fēfē hono tokoniʻi kitautolu ʻe he laumālie māʻoniʻoní ke tau kātaki ʻi he tauhi kia Sihová neongo hono fehiʻanekinaʻi kitautolu ʻe he kakaí?

¹³ Naʻe tala ʻe Sīsū ki hono kau muimuí ke nau ʻofa ki honau ngaahi filí. (Māt. 5:44, 45) ʻOku faingofua ke fai pehē? ʻIkai ʻaupito! Ka ʻoku malava ia ʻi he tokoni ʻa e laumālie māʻoniʻoni ʻo e ʻOtuá. Ko e fua ʻo e laumālie ʻo e ʻOtuá ʻoku kau ai ʻa e ʻofa, pehē foki ki he kātaki, anga-lelei, anga-malū mo e mapuleʻi-kita. (Kal. 5:22, 23) ʻOku tokoniʻi kitautolu ʻe he ngaahi ʻulungaanga ko ení ke tau kātekina ʻa e tāufehiʻá. Ko e kau fakafepaki tokolahi kuo liliu honau lotó koeʻuhi ko hano fakahāhā ʻe ha husepāniti tui, uaifi, kiʻi tama pe  ko ha kaungāʻapi ʻa e ngaahi ʻulungaanga fakaʻotua ko iá. Ko e kau fakafepaki tokolahi kuo aʻu ʻo nau hoko ko hotau fanga tokoua mo e fanga tuofāfine ʻofeina. Ko ia kapau ʻoku faingataʻa kiate koe ke ʻofa ki he faʻahinga ʻoku nau fehiʻa ʻiate koe koeʻuhi pē ko hoʻo tauhi kia Sihová, lotu ʻo kole ʻa e laumālie māʻoniʻoní. (Luke 11:13) Pea falala pau kakato ko e founga ʻa e ʻOtuá ko e lelei tahá maʻu pē ia.​—Pal. 3:5-7.

14-15. Naʻe anga-fēfē hono tokoniʻi ʻe he Loma 12:17-21 ʻa Yasmeen ke ne fakahāhā ʻa e ʻofá ki hono husepānití neongo ʻene fakafepaki anga-kakahá?

¹⁴ Fakakaukau ki he faʻifaʻitakiʻanga ʻa Yasmeen, ʻoku nofo ʻi he Hahake Lotolotó. ʻI heʻene hoko ko e taha ʻo e Kau Fakamoʻoni ʻa Sihová, naʻe fakakaukau hono husepānití kuo kākaaʻi ia, peá ne feinga ke taʻofi ia mei heʻene tauhi ki he ʻOtuá. Naʻá ne leakoviʻi ia pea fakaʻaiʻai ʻa e kāingá pehē ki ha faifekau mo ha faifakalouʻakau ke fakamanamanaʻi ia pea tukuakiʻi ia ki hono ʻai ke movete hono fāmilí. Naʻe aʻu ʻo kaikailaʻi ʻe hono husepānití ʻa e fanga tokouá lolotonga ha fakataha ʻa e fakatahaʻangá! Naʻe faʻa tangi ʻa Yasmeen koeʻuhi ko e fakafeangai taʻeʻofa naʻe fai kiate iá.

¹⁵ ʻI he Fale Fakatahaʻangá, naʻe fakafiemālieʻi mo fakaivimālohiʻi ʻa Yasmeen ʻe hono fāmili fakalaumālié. Naʻe fakalototoʻaʻi ia ʻe he kau mātuʻá ke ne ngāueʻaki ʻa e ngaahi lea ʻi he Loma 12:17-21. (Lau.) “Naʻe faingataʻa,” ko e lau ia ʻa Yasmeen. “Ka naʻá ku kole kia Sihova ke ne tokoniʻi au, pea naʻá ku fai hoku lelei tahá ke ngāueʻaki ʻa e meʻa ʻoku leaʻaki ʻe he Tohi Tapú. Ko ia ʻi he haʻu ʻa hoku husepānití ʻo fakalikolikoʻi ʻa e peitó naʻá ku fakamaʻa ia. ʻI he taimi naʻá ne leakoviʻi ai aú, naʻá ku tali anga-malū. Pea ʻi he taimi naʻe puke aí, naʻá ku tokangaʻi ia.”

16-17. Ko e hā ʻokú ke ako mei he faʻifaʻitakiʻanga ʻa Yasmeen?

¹⁶ Naʻe fakapaleʻi ʻa Yasmeen ʻi heʻene fakahāhā ʻa e ʻofá ki hono husepānití. ʻOkú ne pehē: “Naʻe kamata ke falala ange mai hoku husepānití koeʻuhi naʻá ne ʻiloʻi te u tala ange maʻu pē ʻa e moʻoní. Naʻe kamata ke ne fanongo anga-fakaʻapaʻapa mai kiate au ʻi he taimi naʻá ma talanoa ai fekauʻaki mo e lotú, pea naʻá ne loto-lelei ke fakamelino ʻi ʻapi. ʻOkú ne tala mai he taimí ni ke u fiefia ʻi he ngaahi fakataha ʻa e fakatahaʻangá. Kuo lelei ange ʻema moʻui fakafāmilí pea ʻokú ma maʻu ʻa e nonga moʻoní. Ko ʻeku ʻamanakí ia ʻe fakaava ʻe hoku husepānití hono lotó ki he moʻoní pea kau fakataha mo au ʻi he tauhi kia Sihová.”

¹⁷ ʻOku fakahaaʻi ʻi he faʻifaʻitakiʻanga ʻa Yasmeen ko e ʻofá “ʻokú ne ʻūkuma ʻa e meʻa kotoa pē, . . . ʻamanaki ʻi he meʻa kotoa pē, kātekina ʻa e meʻa kotoa pē.” (1 Kol. 13:4, 7) Ko e tāufehiʻá ʻe lava ke mālohi mo fakalotomamahi, ka ko e ʻofá ʻoku mātuʻaki mālohi ange ia. ʻOkú ne ikunaʻi ʻa e lotó. Pea ʻoku ʻai ai ʻa e loto ʻo Sihová ke fiefia. Ka neongo  kapau ʻoku hokohoko atu hono fehiʻanekinaʻi kitautolu ʻe he kau fakafepakí, ʻe lava ke tau kei fiefia pē. Anga-fēfē?

18. Ko e hā ʻoku lava ai ke tau fiefia ʻi hono fehiʻanekinaʻí?

¹⁸ Naʻe pehē ʻe Sīsū: “Fiefia ē ko kimoutolu ʻo ka fehiʻanekinaʻi kimoutolu ʻe he tangatá.” (Luke 6:22) ʻOku ʻikai ke tau fili ke fehiʻanekinaʻi kitautolu. ʻOku ʻikai ke tau feinga ke tau hoko ko e kau māʻata. Ko ia ko e hā ʻoku lava ai ke tau fiefia ʻi hono fehiʻanekinaʻí? Fakakaukau ki ha ʻuhinga ʻe tolu. ʻUluakí, ʻi heʻetau kātakí, ʻoku tau maʻu ai ʻa e hōifua ʻa e ʻOtuá. (1 Pita 4:13, 14) Uá, ʻoku siviʻi ai ʻetau tuí pea toe mālohi ange. (1 Pita 1:7) Pea ko e tolú, te tau maʻu ai ha pale mahuʻinga taʻehanotatau​—ko e moʻui taʻengatá.​—Loma 2:6, 7.

19. Ko e hā naʻe fiefia ai ʻa e kau ʻapositoló hili hono haha kinautolú?

¹⁹ ʻI he hili pē ʻa e toetuʻu ʻa Sīsuú, naʻe hokosia ʻe he kau ʻapositoló ʻa e fiefia naʻá ne lea fekauʻaki mo iá. Hili hono haha pea fekauʻi ke tuku ʻenau malangá, naʻa nau fiefia. Ko e hā hono ʻuhingá? “Koeʻuhi kuo lau kinautolu ʻoku taau ke ngaohikoviʻi koeʻuhi ko hono huafá [Sīsū].” (Ngā. 5:40-42) Naʻa nau ʻofa ʻi honau ʻEikí ʻo lahi ange ia ʻi heʻenau ilifia ʻi hono fehiʻanekinaʻi kinautolu ʻe honau ngaahi filí. Pea naʻa nau fakahāhā ʻenau ʻofá ʻaki hono talaki ʻa e ongoongo leleí “ʻo ʻikai tuku.” Ko e tokolahi hotau fanga tokouá he ʻahó ni ʻoku hokohoko atu ʻenau tauhi faitōnungá neongo ʻa e ngaahi faingataʻá. ʻOku nau ʻiloʻi heʻikai fakangaloʻi ʻe Sihova ʻenau ngāué pea mo ʻenau ʻofa ki hono huafá.​—Hep. 6:10.

20. Ko e hā te tau lāulea ki ai ʻi he kupu hono hokó?

²⁰ Ko e māmaní te nau fehiʻa ʻiate kitautolu kae ʻoua ke ngata ʻa e fokotuʻutuʻu ko ení. (Sione 15:19) Ka ʻoku ʻikai fiemaʻu ia ke tau manavahē. Hangē ko ia te tau sio ki ai ʻi he kupu hono hokó, ko Sihova “te ne fakaivimālohiʻi . . . pea maluʻi” ʻene faʻahinga mateakí. (2 Tes. 3:3) Ko ia tau hokohoko atu ke ʻofa kia Sihova, ʻofa ki hotau fanga tokouá mo e fanga tuofāfiné pea ʻofa ki hotau ngaahi filí. ʻI heʻetau muimui ki he faleʻi ko ení, te tau nofoʻaki fāʻūtaha mo mālohi fakalaumālie, te tau ʻoatu ai ʻa e lāngilangí kia Sihova, pea te tau fakamoʻoniʻi ai ko e ʻofá ʻoku mālohi mamaʻo ange ia ʻi he fehiʻá.