1-2. ʻOku anga-fēfē ʻa e malava ke tau muimui ʻi he topuvaʻe ʻo Sīsuú? Fakatātaaʻi.

 SIOLOTO atu ʻokú ke kau ʻi ha fononga fakatuʻutāmaki ko e fou atu ʻi ha feituʻu tanu maina. ʻOku taki kimoutolu ʻe ha tokotaha tataki taukei. ʻI heʻene muʻomuʻá, ʻokú ne tuku mai ha fakaʻilonga pe ko hono topuvaʻé ʻi he kelekelé. ʻE ʻi ai ʻa e taimi heʻikai te ke lava ʻo sio ki he tokotaha tatakí! Ka ʻoku ʻikai te ke hohaʻa. ʻI hono kehé, ʻokú ke muimui mo ho kaungāfonongá ʻi he topuvaʻe ʻo e tokotaha tatakí ʻi he ofi taha te mou malavá!

² Ko kitautolu kau Kalisitiane moʻoní, ʻoku hangē ʻoku tau fononga atu ʻi ha feituʻu tanu maina fakatuʻutāmaki​—ko e māmani fulikivanu ko ení. Kae mālō, kuo tokonaki mai ʻe Sihova ha Tataki haohaoa​—ko hono ʻAló, ʻa Sīsū Kalaisi, ʻa ia ʻe lava ke tau muimui ofi ʻi hono topuvaʻé. (1 Pita 2:21) Fakatatau ki he maʻuʻanga fakamatala Tohi Tapu ʻe taha, ʻoku ngāueʻaki heni ʻe Pita ʻa e lea fakatātā ʻo e tokotaha tataki. Hangē ko ha tokotaha tataki ʻokú ne tuku mai ha fakaʻilonga, kuo tuku mai ʻe Sīsū hono topuvaʻé ke tau muimui ki ai. Tau lāulea angé ki he fehuʻi ʻe tolu fekauʻaki mo e muimui ʻi hono topuvaʻé​—ko e hā ia? Ko e hā hono ʻuhingá? Pea anga-fēfē?

3. Ko e hā ʻa e ʻuhinga ʻo e muimui ʻi he topuvaʻe ʻo ha taha?

³ Ko e hā ʻa e ʻuhinga ʻo e muimui ʻi he topuvaʻe ʻo ha taha? ʻI he Tohi Tapú, ko e foʻi lea “ʻaʻeva” mo e “vaʻe” ʻoku ʻuhinga ia ʻi he taimi ʻe niʻihi ki he ʻalunga moʻui ʻa ha taha. (Sēn. 6:9; Pal. 4:26) Ko e faʻifaʻitakiʻanga ʻoku fokotuʻu mai ʻe ha taha, ʻe fakahoa nai ia ki he topuvaʻe ʻoku ʻilonga ʻi hono lakaʻangá. Ko ia ke muimui ʻi ha topuvaʻe ʻo ha taha, ʻoku ʻuhingá ke muimui ʻi heʻene faʻifaʻitakiʻangá pe faʻifaʻitaki kiate ia.

4. Ko e hā ʻa e ʻuhinga ʻo e muimui ʻi he topuvaʻe ʻo Sīsuú?

 ⁴ Ko e hā leva ʻa e ʻuhinga ʻo e muimui ʻi he topuvaʻe ʻo Sīsuú? Ko hono ʻai mahinó, ʻoku ʻuhingá ke faʻifaʻitaki ki heʻene faʻifaʻitakiʻangá. ʻI heʻetau konga tohi ʻo e kaveingá, ʻoku fakatefito ʻa e fakamatala ʻa e ʻapositolo ko Pitá ki he faʻifaʻitakiʻanga lelei naʻe fokotuʻu ʻe Sīsū ʻi hono kātekina ʻa e faingataʻá; kae kehe, ʻoku lahi ʻa e ngaahi founga kehe ʻe lava ke tau faʻifaʻitaki ai kia Sīsū. (1 Pita 2:18-25) Ko hono moʻoní, ʻi he kotoa ʻo e ʻalunga moʻui ʻa Sīsuú​—ʻa e meʻa kotoa naʻá ne leaʻaki mo faí​—ko ha faʻifaʻitakiʻanga ia ke tau muimui ai.

5. ʻE lava moʻoni ke muimui ʻa e faʻahinga taʻehaohaoa ʻo e tangatá ʻi he faʻifaʻitakiʻanga haohaoa ʻa Sīsuú? Fakamatalaʻi.

⁵ ʻI he tuʻunga ko e faʻahinga taʻehaohaoa ʻo e tangatá, ʻe lava moʻoni ke tau muimui ʻi he faʻifaʻitakiʻanga ʻa Sīsuú? ʻIo, te tau lava. Manatuʻi ʻoku ekinaki mai ʻa Pita ke tau “muimui ofi [ʻi he] topuvaʻe” ʻo Sīsuú, ʻo ʻikai ko e muimui haohaoa. Kapau te tau muimui fakalelei ʻi hono topuvaʻé, ʻo fai ʻa e lelei taha te tau malavá ʻi he tuʻunga ko e faʻahinga taʻehaohaoa, te tau talangofua ai ki he lea ʻa e ʻapositolo ko Sioné: “ʻAʻeva ai pē ʻo hangē tofu pē ko e ʻaʻeva ʻa Sīsuú.”​—1 Sio. 2:6.

6-7. Ko e hā ʻoku lava ai ke tau pehē ko e muimui ʻi he topuvaʻe ʻo Sīsuú te tau ʻunuʻunu ofi ange ai kia Sihova?

⁶ ʻI he muimui ʻi he topuvaʻe ʻo Sīsuú te tau ʻunuʻunu ofi ange ai kia Sihova. Ko e hā ʻoku lava ai ke tau lea peheé? ʻUluakí, naʻe fokotuʻu ʻe Sīsū ʻa e faʻifaʻitakiʻanga tuʻu-ki-muʻa ʻo e founga moʻui ke fakahōifuaʻi ai ʻa e ʻOtuá. (Sione 8:29) Ko ia ʻi he muimui ʻi he topuvaʻe ʻo Sīsuú, te tau fakahōifuaʻi ai ʻa Sihova. Pea ʻoku lava ke tau fakapapauʻi ko ʻetau Tamai fakahēvaní te ne ʻunuʻunu ofi ki he faʻahinga ʻoku nau feinga mālohi ke hoko ko hono ngaahi kaumeʻá.​—Sēm. 4:8.

⁷ Uá, naʻe faʻifaʻitaki haohaoa ʻa Sīsū ki heʻene Tamaí. Ko e ʻuhinga ia ʻoku pehē ai ʻe Sīsū: “ʻIlonga ʻa ia kuó ne mātā aú kuó ne mātā foki  ʻa e Tamaí.” (Sione 14:9) ʻI he taimi ʻoku tau faʻifaʻitaki ai ki he ngaahi ʻulungaanga mo e anga ʻo e fakafeangai ʻa Sīsū ki he niʻihi kehé​—ko e fakatātaá, ko ʻene fakaʻofaʻia ʻi he tokotaha kiliá, ko ʻene kaungāongoʻi ki ha fefine naʻá ne maʻu ʻa e mahaki fakamamahi, ko ʻene manavaʻofa ki he faʻahinga mamahí​—ʻoku tau faʻifaʻitaki foki ai kia Sihova. (Mk. 1:40, 41; 5:25-34; Sione 11:33-35) Ko e lahi ange ʻetau faʻifaʻitaki kia Sihová, ko ʻetau ʻunuʻunu ofi ange ia kiate iá.

8. Fakamatalaʻi ʻa e ʻuhinga ʻe tokoniʻi ai kitautolu ʻe he muimui ʻi he topuvaʻe ʻo Sīsuú ke tau “ikunaʻi” ʻa e māmaní.

⁸ Ko e muimui ʻi he topuvaʻe ʻo Sīsuú ʻoku tokoniʻi ai kitautolu ke ʻoua ʻe fakaleluʻi ʻe he māmani fulikivanu ko ení. ʻI he pō fakaʻosi ʻo e moʻui ʻa Sīsū ʻi he māmaní, naʻe malava ke ne pehē: “Kuó u ikuna ʻa e māmaní.” (Sione 16:33) Naʻá ne ʻuhingá naʻá ne fakafisi ke fakaʻatā ia ke tākiekina ʻe he fakakaukau, ngaahi taumuʻa mo e ngāue ʻa e māmani ko ení. Naʻe ʻikai ʻaupito fakaʻatā ʻe Sīsū ʻa ia tonu ke mole ʻene tokangataha ki he ʻuhinga naʻe fekau mai ai ia ki he māmaní​—ke fakatonuhiaʻi ʻa Sihova. Fēfē kitautolu? ʻI he māmani ko ení, ʻoku lahi ʻa e ngaahi meʻa te ne fakaleluʻi kitautolu. Ka ʻo kapau te tau hangē ko Sīsuú ʻo hanganaki tokangataha ki hono fai ʻa e finangalo ʻo Sihová, ko kitautolu foki te tau “ikunaʻi” ʻa e māmaní.​—1 Sio. 5:5.

9. Ko e hā kuo pau ke tau fai ke tau nofo ai pē ʻi he hala ki he moʻui taʻengatá?

⁹ Ko e muimui ʻi he topuvaʻe ʻo Sīsuú ʻoku taki atu ki he moʻui taʻengatá. ʻI he taimi naʻe ʻeke ange ai ʻe ha talavou koloaʻia kia Sīsū pe ko e hā ʻe fiemaʻu ke ne fai ke maʻu ai ʻa e moʻui taʻengatá, naʻá ne tali ange: “Haʻu ʻo muimui ʻiate au.” (Māt. 19:16-21) Naʻe tala ange ʻe Sīsū ki he kau Siu naʻe ʻikai ke nau tui ko e Kalaisí ia: “[Ko] ʻeku fanga sipí . . . ʻoku nau muimui ʻiate au. ʻOku ou ʻoange kiate kinautolu ʻa e moʻui taʻengatá.” (Sione 10:24-29) Naʻe tala ange ʻe Sīsū kia Nikotīmasi, ko ha mēmipa ʻo e Sanetalimí ʻa ia naʻá ne mahuʻingaʻia ʻi he ngaahi akonaki ʻa Sīsuú, ko e faʻahinga ʻoku nau “ngāueʻi ʻa e tui kiate iá” te nau “maʻu ʻa e moʻui taʻengatá.” (Sione 3:16) ʻOku tau ngāueʻi ʻa e tui kia Sīsuú ʻaki hono ngāueʻaki ʻa e meʻa naʻá ne akoʻi mai fakafou ʻi he lea mo e faʻifaʻitakiʻanga. Kapau te tau fai ia, te tau nofo ai pē ʻi he hala ki he moʻui taʻengatá.​—Māt. 7:14.

10. Ko e hā ʻoku kau ki he “hoko ʻo ʻiloʻi” lelei ange ʻa Sīsuú? (Sione 17:3)

¹⁰ Ki muʻa ke tau muimui ofi ʻi he topuvaʻe ʻo Sīsuú, kuo pau ke tau hoko ʻo ʻiloʻi ia. (Lau ʻa e Sione 17:3.) Ko e “hoko ʻo ʻiloʻi” ʻa Sīsuú ko ha ngāue hokohoko ia. Kuo pau ke tau hoko ʻo toe maheni lelei ange mo ia​—ʻo ako fekauʻaki mo hono ngaahi ʻulungāngá, fakakaukaú mo ʻene ngaahi tuʻungá. Tatau ai pē pe ko e hā ʻa e fuoloa ʻo ʻetau ʻi he moʻoní, kuo pau ke tau hanganaki ngāue ke hoko ʻo ʻiloʻi ʻa Sihova mo hono ʻAló.

11. Ko e hā ʻoku maʻu ʻi he Kōsipeli ʻe faá?

¹¹ Kuo fakakau anga-ʻofa ʻe Sihova ʻa e Kōsipeli  ʻe faá ʻi heʻene Folofolá ke tokoniʻi ai kitautolu ke hoko ʻo ʻiloʻi ʻa hono ʻAló. ʻOku maʻu ʻi he Ngaahi Kōsipelí ha fakamatala fakahisitōlia fekauʻaki mo e moʻui mo e ngāue fakafaifekau ʻa Sīsuú. ʻOku tala mai ai ʻa e meʻa naʻe leaʻaki ʻe Sīsuú, meʻa naʻá ne faí pea fakahaaʻi mai ai ʻa e anga ʻene ongoʻí. ʻOku tokoniʻi kitautolu ʻe he tohi ko eni ʻe faá ke “fakakaukau fakalelei” ki he faʻifaʻitakiʻanga ʻa Sīsuú. (Hep. 12:3) Ko hono moʻoní, ʻoku tau ʻiloʻi ai ʻa e topuvaʻe ʻo Sīsuú. Ko ia ʻi hono sivisiviʻi ʻa e Ngaahi Kōsipelí, ʻe lava ke tau hoko ai ʻo toe ʻiloʻi lelei ange ʻa Sīsū. Ko hono olá, ʻe lava ke tau muimui ofi ai ʻi hono topuvaʻé.

12. ʻOku lava fēfē ke tau maʻu ʻaonga kakato mei he Ngaahi Kōsipelí?

¹² Ke maʻu ʻaonga kakato mei he Ngaahi Kōsipelí, kuo pau ke tau fai ʻa e meʻa lahi ange ʻi hono lau pē iá. ʻOku fiemaʻu ke tau vaheʻi ʻa e taimi ke ako fakalelei mo fakalaulauloto loloto ki ai. (Fakafehoanaki mo e Siosiua 1:8, fakamatala ʻi lalo.) Tau lāulea angé ki ha fokotuʻu ʻe ua ʻe lava ke ne tokoniʻi kitautolu ke fakalaulauloto ki he Ngaahi Kōsipelí pea ngāueʻaki ʻa e meʻa ʻoku tau lau aí.

13. ʻE lava fēfē ke ke ʻai ke moʻoni mo moʻui ʻa e ngaahi fakamatala ʻi he Kōsipelí?

¹³ ʻUluakí, ʻai ke moʻoni mo moʻui ʻa e ngaahi fakamatala ʻi he Kōsipelí. Ngāueʻaki hoʻo siolotó ke sio, fanongo mo ongoʻi ʻa e meʻa naʻe hokó. Ke tokoniʻi koe ke fai iá, fai ha fekumi ʻi he ʻū tohi kuo tokonaki mai ʻe he kautaha ʻa Sihová. Sivisiviʻi ʻa e potutohí​—ʻa e ngaahi meʻa naʻe hoko ki muʻa ʻi he meʻa ʻokú ke akó pe hoko ki mui aí. Kumi ki he fakamatala fekauʻaki mo e puipuituʻá mo e ʻātakaí. Fakahoa ʻa e fakamatala ʻokú ke akó mo ha fakamatala tatau ʻoku ʻi ha Kōsipeli kehe. ʻI he taimi ʻe niʻihi ʻoku fakakau ʻe ha tokotaha-hiki Kōsipeli ha fakaikiiki mahuʻinga ʻa ia naʻe ʻikai hiki ia ʻe ha tokotaha-hiki Kōsipeli ʻe taha.

14-15. ʻE lava fēfē ke tau ngāueʻaki ʻa e ngaahi fakamatala ʻi he Kōsipelí ʻi heʻetau moʻuí?

¹⁴ Uá, ngāueʻaki ʻa e ngaahi fakamatala ʻi he Kōsipelí ʻi hoʻo moʻuí. (Sione 13:17) ʻI he hili hoʻo ako fakalelei ha fakamatala Kōsipeli, ʻeke hifo: ‘ʻOku ʻi ai ha lēsoni ʻi he fakamatala ko ení ʻe lava  ke u ngāueʻaki ʻi heʻeku moʻuí? ʻE lava fēfē ke u ngāueʻaki ʻa e fakamatala ko ení ke tokoni ki ha taha kehe?’ Feinga ke fakakaukau ki ha tokotaha pau, pea ʻi he taimi feʻungamālié, vahevahe anga-ʻofa mo fakapotopoto kiate ia ʻa e lēsoni naʻá ke akó.

¹⁵ Tau lāulea angé ki ha fakatātā ʻo e founga ʻe lava ke tau ngāueʻaki ai ʻa e fokotuʻu ʻe ua ko ení. Te tau sivisiviʻi ʻa e fakamatala ki he uitou masiva naʻe fakatokangaʻi ʻe Sīsū ʻi he temipalé.

16. Fakamatalaʻi ʻa e meʻa naʻe hiki ʻi he Maʻake 12:41.

¹⁶ ʻAi ke moʻoni mo moʻui ʻa e fakamatalá. (Lau ʻa e Maʻake 12:41.) Sioloto atu ki he meʻa ʻoku hokó. Ko Nīsani 11, 33 T.S. eni​—ko e ngaahi ʻaho siʻi mei heni ʻe pekia ʻa Sīsū. Kuo fakamoleki ʻe Sīsū ʻa e konga lahi ʻo e ʻahó ʻi he faiako ʻi he temipalé. Kuo ʻai ʻe he kau fakafepaki fakalotú ke faingataʻa eni kiate ia. Ki muʻa ange, naʻe fehuʻia ʻe he niʻihi hono mafaí. Naʻe feinga ʻa e niʻihi ke fakafihiaʻi ia ʻaki ʻa e ngaahi fehuʻi faingataʻa. (Mk. 11:27-33; 12:13-34) ʻI he taimi ko ení kuo ʻunu ʻa Sīsū ki ha tafaʻaki ʻe taha ʻo e temipalé. ʻI hení​—ʻoku ngalingali ko e feituʻu naʻe ui ko e Lotoʻā ʻo e Kakai Fefiné​—ʻoku lava ke ne sio atu ki he ngaahi puha paʻanga ʻoku fakaʻotu ʻi he holisi ʻo e lotoʻaá. ʻOkú ne tangutu hifo pea kamata ke ne fakatokangaʻi atu ʻa e kakaí ʻi heʻenau lī ʻenau ngaahi meʻaʻofa ʻi he ngaahi puhá. ʻOkú ne vakai atu ki he kakai koloaʻiá ʻoku nau lī ʻa e ngaahi koini lahi. Mahalo ʻokú ne ofi feʻunga atu pē ke fanongo ki he ongo mai ʻa e ngangana ʻa e ngaahi koiní ki he puhá.

17. Ko e hā naʻe fai ʻe he uitou masiva ʻoku lave ki ai ʻi he Maʻake 12:42?

¹⁷ Lau ʻa e Maʻake 12:42. Taimi nounou mei ai, ʻoku fakatokangaʻi atu ʻe Sīsū ha fefine. Ko ha “uitou masiva.” (Luke 21:2) ʻOku mātuʻaki faingataʻa ʻa e moʻuí kiate ia; ʻoku ngalingali ʻokú ne fāinga ke maʻu ʻa e ngaahi fiemaʻu tefito ʻi he moʻuí. Neongo ia, ʻokú ne fakaofi atu ki he taha ʻo e ngaahi puhá pea lī fakamoulu hifo ʻene ongo kiʻi foʻi koiní, mahalo ʻoku faingataʻa ke ongoʻi atu ʻena tō hifo ki he puhá. ʻOku ʻiloʻi ʻe Sīsū ʻa e meʻa naʻá ne lií​—ko e koini lepitā ʻe ua, ko e koini siʻisiʻi taha ia ʻi he taimi ko iá. Ko hono mahuʻingá ʻoku ʻikai feʻunga ia ke fakatau mai ʻaki ha foʻi misi, ʻa ia naʻe kau ʻi he manupuna maʻamaʻa taha naʻe fakatau atu ko ha meʻakai.

18. Fakatatau ki he Maʻake 12:43, 44, ko e hā naʻe leaʻaki ʻe Sīsū fekauʻaki mo e tokoni ʻa e uitoú?

¹⁸ Lau ʻa e Maʻake 12:43, 44. ʻOku maongo lahi kia Sīsū ʻa e meʻa naʻe fai ʻe he uitoú. Ko ia ʻokú ne ui mai ʻene kau ākongá, ʻo taki ʻenau tokangá ki he uitoú, peá ne pehē ange: “Ko e uitou masivá ni naʻe lahi ange ʻene lií ʻi he kotoa ʻo e faʻahinga naʻa nau lī paʻanga.” ʻOkú ne fakamatala leva: “Naʻa nau [tautefito ki he kakai koloaʻiá] lī kotoa mei heʻenau meʻa naʻe hulú, ka ko e fefiné ni, neongo ʻene fusimoʻomó, naʻá ne lī kotoa ʻa e meʻa naʻá ne maʻú, ʻa ʻene moʻuí kotoa.” ʻI he taimi naʻe foaki ai ʻe he uitou faitōnunga ko ení ʻene toenga paʻangá ʻi he ʻaho ko iá, naʻá ne tuku atu ai ʻene moʻuí ki he toʻukupu tokanga ʻo Sihová.​—Saame 26:3.

19. Ko e hā ʻa e lēsoni mahuʻinga ʻoku lava ke tau ako mei he ngaahi lea ʻa Sīsū fekauʻaki mo e uitou masivá?

¹⁹ Ngāueʻaki ʻa e fakamatalá ʻi hoʻo moʻuí. ʻEke hifo, ‘Ko e hā ʻa e lēsoni ʻe lava ke u ako mei he ngaahi lea ʻa Sīsū fekauʻaki mo e uitou masivá?’ Fakakaukau atu ki he uitou ko iá. ʻOku ʻikai ha veiveiua naʻá ne fakaʻamu ʻe lava ke ne foaki ha meʻa lahi ange kia Sihova. Neongo ia, naʻá ne fai pē ʻa e meʻa naʻá ne malavá; naʻá ne foaki kia Sihova hono lelei tahá. Pea naʻe ʻiloʻi ʻe Sīsū ko ʻene tokoní naʻe mahuʻinga ia ʻi he vakai ʻene Tamaí. Ko ha lēsoni mahuʻinga leva eni kiate kitautolu: ʻOku hōifua mai ʻa Sihova ʻi he taimi ʻoku tau foaki ai kiate ia hotau lelei tahá​—ʻa ʻetau ngāue loto-kakato mo loto-ʻaufuatoó. (Māt. 22:37; Kol. 3:23) ʻOku fiefia ʻa Sihova ʻi heʻene vakai mai ʻoku tau fai ʻa e meʻa kotoa ʻoku tau lavá! ʻOku ngāueʻaki ʻa e tefitoʻi moʻoni ko iá  ki he lahi ʻo e taimi mo e ivi ʻoku lava ke tau līʻoa ki heʻetau lotú, kau ai ʻa e ngāue fakafaifekaú mo e fakatahá.

20. ʻE lava fēfē ke ke ngāueʻaki ʻa e lēsoni mei he fakamatala fekauʻaki mo e uitoú? ʻOmai ha fakatātā.

²⁰ ʻE lava fēfē ke ke ngāueʻaki ʻa e lēsoni mei he fakamatala fekauʻaki mo e uitoú? Feinga ke fakakaukau ki ha faʻahinga pau ʻoku nau fiemaʻu nai ke fakapapauʻi ange ko ʻenau ngaahi feingá ʻoku fakahōifua kia Sihova. Ko e fakatātaá, ʻokú ke ʻiloʻi ha tuofefine taʻumotuʻa mahalo ʻokú ne ongoʻi halaia pe ʻikai hano ʻaonga koeʻuhi ʻoku ʻikai ke ne kei maʻu ʻa e moʻui lelei pe ivi ke fai ʻa e ngāue tatau mo ia naʻá ne anga ki ai ʻi he ngāue fakafaifekaú? Pe ʻokú ke fakakaukau ki ha tokoua ʻoku ʻi ai hano mahaki tauhi langa lahi, ʻokú ne loto-siʻi koeʻuhi ʻoku ʻikai lava ke ne maʻu maʻu pē ʻa e ngaahi fakatahá ʻi he Fale Fakatahaʻangá? Tokoni ki he faʻahinga peheé ʻaki hono fai ha lea “ʻoku lelei ki he langa haké.” (ʻEf. 4:29) Vahevahe kiate kinautolu ʻa e lēsoni fakalotomāfana naʻá ke ako mei he fakamatala fekauʻaki mo e uitou masivá. Ko hoʻo ngaahi lea fakalototoʻá ʻe fakapapauʻi ai kiate kinautolu ʻoku hōifua mai ʻa Sihova ʻi he taimi ʻoku tau foaki ai kiate ia hotau lelei tahá. (Pal. 15:23; 1 Tes. 5:11) ʻI hoʻo fakaongoongoleleiʻi ʻa e niʻihi kehé ki heʻenau foaki kia Sihova honau lelei tahá​—tatau ai pē pe ʻoku hā ngali siʻisiʻi fēfē​—ʻokú ke muimui ofi ai ʻi he topuvaʻe ʻo Sīsuú.

21. Ko e hā ʻokú ke fakapapauʻi ke faí?

²¹ He fakamālō ē ko kitautolu ki hono tokonaki mai ʻi he ngaahi fakamatala ʻi he Kōsipelí ʻa e ngaahi fakaikiiki lahi fekauʻaki mo e moʻui ʻa Sīsuú, ʻo malava ai ke tau faʻifaʻitaki kiate ia pea muimui ofi ʻi hono topuvaʻé! Fēfē ke fai ha ako fakafoʻituitui pe Lotu Fakafāmili ʻo fakahangataha ki he Ngaahi Kōsipelí? Tuku ke tau manatuʻi ke maʻu ʻaonga kakato mei he ako peheé, ʻoku fiemaʻu ke tau ʻai ke moʻui mo moʻoni ʻa e fakamatalá pea ngāueʻaki ia ʻi heʻetau moʻuí. Tānaki atu ki he faʻifaʻitaki ki he meʻa naʻe fai ʻe Sīsuú, ʻoku fiemaʻu ke tau fanongo ki he meʻa naʻá ne leaʻakí. ʻI he kupu hokó, te tau lāulea ai ki he meʻa ʻe lava ke tau ako mei he ngaahi lea fakaʻosi ʻa Sīsū ko ha tangatá.