1. Ko e hā ʻa e ngaahi meʻa lelei kuo ʻosi fakahoko ʻe he toʻutupu tokolahi?

 ʻI HE taʻu kotoa, ko e faʻahinga Kalisitiane kei siʻi ʻe laui afe ʻoku nau papitaiso. Kuó ke fou ʻi he sitepu ko ení? Kapau ko ia, ko ho fanga tokoua mo e fanga tuofāfine fakalaumālié ʻoku nau fiefia mo koe, pea ʻoku fiefia foki mo Sihova! (Pal. 27:11) Fakakaukau ʻi ha kiʻi mōmeniti fekauʻaki mo e meʻa lahi kuó ke ʻosi fakahokó. Kuó ke ako tōtōivi ʻa e Tohi Tapú, mahalo ʻi ha laui taʻu. Kuo fakatuipauʻi koe ʻe hoʻo akó ko e Tohi Tapú ko e Folofola ia ʻa e ʻOtuá. Kae mahulu atu aí, kuó ke hoko ʻo ʻiloʻi mo ʻofa ki he Faʻutohi ʻo e tohi toputapu ko iá. Ko hoʻo ʻofa kia Sihová kuo tupulaki ʻo aʻu ki he tuʻunga ʻokú ke hoko ai he taimí ni ko e taha ʻo ʻene kau sevāniti fakatapui ʻosi papitaisó. He fakaofo ē ko ia!

2. Ko e hā te tau lāulea ki ai ʻi he kupu ko ení?

 ² ʻOku ʻikai ha veiveiua ko hoʻo tuí naʻe ʻahiʻahiʻi ia ʻi he ngaahi founga lahi ʻi hoʻo fakalakalaka ko ia ki he papitaisó. Ka ʻi hoʻo tupu ʻo fuʻu lahi angé, te ke fehangahangai mo e ngaahi ʻahiʻahi foʻou. ʻE feinga ʻa Sētane ke fakavaivaiʻi hoʻo ʻofa kia Sihová pea ke tohoakiʻi mamaʻo koe mei he tauhi kiate Iá. (ʻEf. 4:14) Kuo pau ke ʻoua te ke fakaʻatā ia ke hoko. Ko e hā ʻe lava ke ne tokoniʻi koe ke nofoʻaki mateaki kia Sihova pea fakahoko hoʻo fuakava ʻo e fakatapuí? Kuo pau ke hokohoko atu hoʻo fai ʻa e fakalakalaká​—ke “tutui atu” ki he tuʻunga matuʻotuʻa faka-Kalisitiané. (Hep. 6:1) Ka ʻe lava fēfē ke ke fai ia?

3. Ko e hā ʻa e fakalakalaka ʻoku fiemaʻu ke fai ʻe he kau Kalisitiané kotoa hili ʻa e papitaisó?

³ Hili ʻa e papitaisó, ko kitautolu kotoa ʻoku fiemaʻu ke tau muimui ki he faleʻi naʻe ʻoange ʻe he ʻapositolo ko Paulá ki he kaungātui  ʻi ʻEfesoó. Naʻá ne fakalototoʻaʻi kinautolu ke nau hoko ko e kau Kalisitiane “kuo kakato [ʻenau] tupú.” (ʻEf. 4:13) Ko ha toe founga ia ʻe taha ʻo e pehē, ‘Hokohoko atu ke fai ʻa e fakalakalaká.’ ʻOku lava ke tau mahinoʻi ʻa e meʻa naʻe ʻuhinga ki ai ʻa Paulá ʻi he taimi naʻá ne fakahoa ai ʻa e tupu fakalaumālié ki he tupu fakaesino ʻa ha kiʻi tama. Ko ha kiʻi pēpē valevale toki fāʻeleʻi ko e fiefiaʻanga ia mo e laukauʻanga ʻene ongo mātuʻá. Ka heʻikai ke ne hoko ai pē ko ha kiʻi pēpē ʻo taʻengata. ʻI he faai atu ʻa e taimí, kuo pau ke ne tuku atu “ʻa e ngaahi tōʻonga ʻo e kei tamasiʻí.” (1 Kol. 13:11) ʻOku meimei tatau pē mo e kau Kalisitiané. Hili ʻa e papitaisó, kuo pau ke tau hokohoko atu ke fai ʻa e fakalakalaka. Tau lāulea angé ki he ngaahi fokotuʻu ʻe niʻihi te ne tokoniʻi kitautolu ke fai ia.

4. Ko e hā ʻa e ʻulungaanga ʻe lava ke ne tokoniʻi koe ke fakalakalaka fakalaumālié? Fakamatalaʻi. (Filipai 1:9)

⁴ Fakatupulekina hoʻo ʻofa kia Sihová. ʻOkú ke ʻosi ʻofa lahi ʻaupito kia Sihova. Ka ko hoʻo ʻofa kiate iá ʻe lava ke tupu ʻo toe loloto ange. Anga-fēfē? ʻOku fakamamafaʻi ʻe he ʻapositolo ko Paulá ha founga ʻe taha, ʻa ia ʻoku hiki ʻi he Filipai 1:9. (Lau.) Naʻe lotu ʻa Paula ke hoko ʻa e ʻofa ʻa e kau Filipaí “ʻo toe fakautuutu ange.” Ko ia ʻe lava ke tupulekina ʻetau ʻofá. ʻE lava ke tau fai ia ʻaki hono maʻu ʻa e “ʻilo totonu pea mo e mahino kakato.” Ko e lahi ange ʻetau hoko ʻo ʻiloʻi ʻa Sihová, ko e lahi ange ia ʻetau ʻofa kiate iá pea houngaʻia ʻi hono ʻulungāngá mo e founga ʻokú ne fai ai ʻa e ngaahi meʻá. ʻOku tupulaki ai ʻetau vēkeveke ke fakahōifuaʻi iá, ʻo ʻikai ʻaupito loto ke fai ha meʻa ʻe fakalotomamahi kiate ia. ʻOku tau ngāue mālohi ke ʻiloʻi ʻa hono finangaló pea mo e founga ʻe lava ke tau fakahoko ai iá.

5-6. ʻE lava fēfē ke tau fakatupulekina ʻetau ʻofa kia Sihová? Fakamatalaʻi.

⁵ ʻE lava ke tau fakatupulekina ʻetau ʻofa kia Sihová ʻaki ʻa hono ʻiloʻi lelei ange hono ʻAló, ʻa ia ʻokú ne tapua haohaoa mai ʻa e ʻulungaanga ʻo ʻene Tamaí. (Hep. 1:3) Ko e founga lelei taha ke hoko ʻo ʻiloʻi ai ʻa Sīsuú ko hono ako ʻa e ngaahi fakamatala Kōsipeli ʻe faá. Kapau ʻoku teʻeki ke ke tōʻongaʻaki ʻa hono lau ʻa e Tohi Tapú ʻi he ʻaho kotoa, fēfē ke ke kamata he taimí ni? ʻI hoʻo lau ʻa e ngaahi fakamatala fekauʻaki mo Sīsuú, tokangataha ki hono ngaahi ʻulungāngá. Naʻá ne fotungofua; naʻá ne anga-ʻofa ʻo puke mai ʻa e fānau īkí. (Mk. 10:13-16) Naʻá ne ʻai ke ongoʻi fiemālie ʻene kau ākongá; naʻa nau ongoʻi tauʻatāina ke tala ange ʻenau fakakaukaú kiate ia. (Māt. 16:22) ʻI he meʻá ni, naʻe faʻifaʻitaki ai ʻa Sīsū ki heʻene Tamai fakahēvaní. Ko Sihova ʻokú ne mātuʻaki fotungofua foki. ʻE lava ke tau hanga kiate ia ʻi he lotu. ʻI he taimi ʻoku tau lotu aí, ʻe lava ke tau huaʻi atu hotau lotó kiate ia. ʻOku tau falala pau heʻikai ke ne fakahalaiaʻi kitautolu. ʻOkú ne ʻofa mai kiate kitautolu; ʻokú ne tokanga mai kiate kitautolu.​—1 Pita 5:7.

⁶ Ko Sīsū naʻá ne ongoʻi manavaʻofa ki he kakaí. ʻOku līpooti ʻe he ʻapositolo ko Mātiú: “ʻI he vakai atu ki he fuʻu kakaí, naʻá ne ongoʻi fakaʻofaʻia ʻiate kinautolu, koeʻuhí ne ngaohikovia kinautolu mo liʻekina ʻo hangē ha fanga sipi taʻeʻiai hanau tauhí.” (Māt. 9:36) Pea ʻoku anga-fēfē ongoʻi ʻa Sihová? Naʻe pehē ʻe Sīsū: “ʻOku ʻikai ko e finangalo ia ʻo ʻeku Tamai ʻoku ʻi hēvaní ke ʻauha naʻa mo ha taha ʻo e faʻahinga siʻí ni.” (Māt. 18:14) He fakalotomāfana ē ko ia! ʻI heʻetau hoko ʻo ʻiloʻi lelei ange ʻa Sīsuú, ʻe tupulekina ai ʻetau ʻofa kia Sihová.

7. ʻE lava fēfē ke tokoniʻi koe ʻe he feohi mo e kau Kalisitiane matuʻotuʻá?

⁷ ʻE lava foki ke ke ako ke hoko ʻo anga-ʻofa ange pea fai ʻa e fakalakalaka ʻi he tuʻunga ko ha Kalisitiane ʻaki ʻa e feinga ke ʻiloʻi ʻa e fanga tokoua mo e fanga tuofāfine matuʻotuʻa ʻi hoʻo fakatahaʻangá. Fakatokangaʻi ʻa e fiefia ʻoku nau maʻú. ʻOku ʻikai haʻanau fakaʻiseʻisa ʻi heʻenau fili ke tauhi kia Sihová. Kole ange kiate kinautolu ke talanoa fekauʻaki mo ʻenau ngaahi hokosia ʻi heʻenau tauhi kia Sihová. ʻI he taimi ʻoku fiemaʻu ai ke ke fai ha fili mahuʻinga, kole faleʻi meiate  kinautolu. He ko ē, “ʻoku ʻi ai ʻa e lavameʻa ʻi he tokolahi ʻa e kau faleʻí.”​—Pal. 11:14.

8. Ko e hā ʻe lava ke ke fai kapau ʻoku faifai ange peá ke veiveiua fekauʻaki mo e meʻa ʻoku leaʻaki ʻe he Tohi Tapú?

⁸ Ikuʻi hoʻo ngaahi veiveiuá. Hangē ko ia naʻe lave ki ai ʻi he  palakalafi 2, ʻe feinga ʻa Sētane ke taʻofi koe mei hono fai ha fakalakalaka fakalaumālie lahi ange. Ko e founga ʻe taha te ne fai nai ai ení ko hono langaʻi ha ngaahi veiveiua ʻi ho ʻatamaí fekauʻaki mo e niʻihi ʻo e ngaahi akonaki Fakatohitapú. Ko e fakatātaá, ʻoku vavé ni ke ke fetaulaki nai mo e foʻi fakakaukau ʻo e ʻevalūsioó ʻa ia ʻokú ne taʻetokaʻi ʻa e ʻOtuá. Naʻe ʻikai nai ke ke loko fakakaukau fekauʻaki mo e kaveingá ʻi hoʻo kei siʻi angé, ka ko eni ʻokú ke fuʻu lahi ange, mahalo ʻokú ke fehangahangai tonu mo ia ʻi he ʻapiakó. Ko e meʻa ʻoku leaʻaki ʻe hoʻo kau faiakó ke poupouʻi ʻa e ʻevalūsioó ʻoku hā ngali ʻuhinga lelei nai mo fakatuipau. Kae kehe, kuo ʻikai nai ke nau fakakaukau fakamātoato ki he fakamoʻoni ʻo e ʻi ai ha Tokotaha-Fakatupú. Manatuʻi ʻa e tefitoʻi moʻoni ʻoku maʻu ʻi he Palōveepi 18:17: “Ko e tokotaha ʻokú ne ʻuluaki lea ʻo taukapoʻi iá ʻokú ne hā ngali totonu, kae ʻoua kuo haʻu ʻa e tafaʻaki ʻe tahá ʻo fakafehuʻi ia.” ʻI he ʻikai ke tali kuikui pē ʻa e ngaahi fakakaukau ʻokú ke fanongo ai ʻi he ʻapiakó, fakakaukau fakalelei ki he ngaahi moʻoni ʻoku maʻu ʻi he Folofola ʻa e ʻOtuá, ʻa e Tohi Tapú. Fai ʻa e fekumi ʻi heʻetau ʻū tohí. Talanoa ki he fanga tokoua mo e fanga tuofāfine naʻa nau tui ki he ʻevalūsioó ʻi he kuohilí. ʻEke ange kiate kinautolu fekauʻaki mo e meʻa naʻá ne fakatuipauʻi kinautolu ʻoku ʻi ai ha Tokotaha-Fakatupu ʻokú ne ʻofa mai kiate kitautolu. Ko e ngaahi fetalanoaʻaki fakatupu langa hake ko iá ʻe lava ke tokoniʻi ai koe ke tokangataha ki he ngaahi moʻoniʻi meʻá.

9. Ko e hā ʻokú ke ako mei he hokosia ʻa Melissa?

⁹ Ko ha tuofefine ko Melissa naʻá ne maʻu ʻaonga lahi mei he fekumi naʻá ne fai fekauʻaki mo e fakatupú. * ʻOkú ne pehē: “ʻI he ʻapiakó, ko e ʻevalūsioó ʻoku akoʻi ia ʻi ha founga ʻoku hā ngali fakatuipau moʻoni. ʻI he kamatá, naʻá ku ilifia ke fehangahangai mo ʻeku ngaahi veiveiuá. Naʻá ku manavahē ʻi hono fai ha fekumi naʻa faifai peá u ʻiloʻi ʻoku hala ʻeku tuí. Ka naʻá ku fakaʻuhinga ʻoku ʻikai loto ʻa Sihova ke tau tauhi kuikui pē kiate ia. Ko ia naʻá ku fehangahangai mo ʻeku ngaahi veiveiuá. Naʻá ku lau ʻa e tohi Is There a Creator Who Cares About You? pea mo e polosiua Was Life Created? mo e The Origin of  Life​—Five Questions Worth Asking. Ko e meʻa tofu pē eni naʻá ku fiemaʻú. ʻOku ou fakaʻamu naʻe vave ange ʻeku fai iá.”

10-11. Ko e hā ʻe lava ke ne tokoniʻi koe ke nofoʻaki maʻa fakaeʻulungāngá? (1 Tesalonaika 4:3, 4)

¹⁰ Siʻaki ʻa e tōʻonga halá. Lolotonga ʻa e taʻu hongofulu tupú, ko e ngaahi ongoʻi fakaefehokotaki fakasinó ʻe lava ke hoko ʻo mālohi ange, pea te ke fehangahangai nai mo e tenge mālohi ke fai ʻa e fehokotaki fakasino taʻetāú. ʻOku loto ʻa Sētane ke ke ʻulutukua ki hoʻo ngaahi holí. Ko e hā ʻe lava ke ne tokoniʻi koe ke nofoʻaki maʻa fakaeʻulungāngá? (Lau ʻa e 1 Tesalonaika 4:3, 4.) ʻI hoʻo ngaahi lotu fakafoʻituituí, vahevahe kia Sihova hoʻo ngaahi ongoʻí. Tala ange kiate ia ʻa e anga hoʻo ongoʻí, pea kole ange ke ne fakaivimālohiʻi koe. (Māt. 6:13) Manatuʻi ʻoku loto ʻa Sihova ke ne tokoniʻi koe, kae ʻikai ko hono fakahalaiaʻi koe. (Saame 103:13, 14) ʻE lava foki ke ke hanga ki he Folofola ʻa e ʻOtuá ki ha tokoni. Ko Melissa, naʻe lave ki ai ki muʻá, naʻá ne fāinga ke talitekeʻi ʻa e ngaahi fakakaukau taʻemaʻá. ʻOkú ne pehē: “Ko hono lau ʻa e Tohi Tapú ʻi he ʻaho kotoá naʻá ne fakalototoʻaʻi au ke ʻoua te u foʻi. Naʻe fakamanatu mai ai ʻoku ʻa Sihova au pea ʻoku ou loto ke ne kau ʻi heʻeku moʻuí.”​—Saame 119:9.

¹¹ ʻOua ʻe feinga ke fakaleleiʻi toko taha pē hoʻo ngaahi palopalemá. Talanoa ki hoʻo ongo mātuʻá fekauʻaki mo hoʻo fāingá. Ko e moʻoni, ʻoku ʻikai faingofua ke talanoa fekauʻaki mo e ngaahi meʻa fakafoʻituitui peheé, ka ʻoku mahuʻinga ke fai ia. ʻOku pehē ʻe Melissa: “Naʻá ku lotu ki ha loto-toʻa pea naʻá ku talanoa leva ki heʻeku tamaí fekauʻaki mo ʻeku palopalemá. Hili iá, naʻá ku ongoʻi fiemālie lahi. Naʻá ku ʻiloʻi naʻe laukauʻaki au ʻe Sihova.”

12. ʻE lava fēfē ke ke fai ʻa e ngaahi fili leleí?

¹² Tataki ʻe he ngaahi tefitoʻi moʻoni Fakatohitapú. ʻE faai atu pē ʻo ke maʻu ʻa e tauʻatāina lahi ange ke ke fai pē hoʻo ngaahi fili. Ka ko hoʻo taukei ʻi he moʻuí ʻoku kei fakangatangata pē. ʻE lava fēfē ke ke fakaʻehiʻehi mei hono fai ha fehālaaki ʻa ia te ne uesia hoʻo kaumeʻa mo Sihová? (Pal. 22:3) Ko ha tuofefine ko Kari ʻokú ne fakamatala ki he meʻa naʻá ne tokoniʻi ia ke fai ʻa e ngaahi fili lelei angé. Naʻá ne ʻiloʻi ko e kau Kalisitiane matuʻotuʻá ʻoku ʻikai ke nau fiemaʻu ha lao ke puleʻi ʻa e tuʻunga kotoa pē. ʻOkú ne pehē: “Naʻe fiemaʻu ke u mahinoʻi ʻa e ngaahi tefitoʻi moʻoni Fakatohitapú kae ʻikai ko e ngaahi laó pē.” ʻI hono lau ʻa e Tohi Tapú, ʻeke hifo kiate koe: ‘Ko e hā ʻoku tala mai ʻe he fakamatala ko ení fekauʻaki mo e fakakaukau ʻa Sihová? ʻOku maʻu ai ha ngaahi tefitoʻi moʻoni ʻe lava ke u ngāueʻaki ke tataki ʻeku tōʻongá? Kapau ko ia, ʻe anga-fēfē ʻeku maʻu ʻaonga ʻi heʻeku ngāueʻaki iá?’ (Saame 19:7; ʻAi. 48:17, 18) ʻI hono lau ʻa e Tohi Tapú pea fakalaulauloto ki he ngaahi tefitoʻi moʻoni mei aí, ʻe faingofua ange ai ke ke fai ʻa e ngaahi fili ʻoku fakahōifua kia Sihova. ʻI hoʻo hokohoko atu ke fai ʻa e fakalakalaká, te ke ʻiloʻi ai ʻoku ʻikai fiemaʻu ha lao ki he tuʻunga kotoa pē koeʻuhí te ke mahinoʻi ʻa e fakakaukau ʻa Sihova ki he ngaahi meʻá.

13. ʻE anga-fēfē hono tākiekina koe ʻe he ngaahi kaumeʻa leleí? (Palōveepi 13:20)

¹³ Fili ʻa e ngaahi kaumeʻa ʻoku nau ʻofa kia Sihova. Hangē ko ia naʻe lave ki ai ki muʻá, ko e ngaahi kaumeʻa ʻokú ke filí te nau tākiekina lahi hoʻo tupulekina ko ha Kalisitiané. (Lau ʻa e Palōveepi 13:20.) Ko ha tuofefine ko Sara naʻe mole atu ʻene fiefiá. Pea naʻe hoko ha meʻa naʻe tokoniʻi ai ia ke liliu ʻene vakaí. ʻOku pehē ʻe Sara: “Ko e ngaahi kaumeʻa leleí naʻa nau haʻu taimi tonu pē ki heʻeku moʻuí. Naʻá ku fakataha mo ha tuofefine kei siʻi ʻi he uike taki taha ke ako ʻa e Taua Leʻo. Naʻe ʻi ai ha kaumeʻa ʻe taha naʻá ne tokoniʻi au ke u tali ʻi he fakatahá. Koeʻuhi ko e tākiekina hoku ngaahi kaumeʻá, naʻe kamata ke u fai fakamātoato ange ʻa e ako fakafoʻituituí mo e lotú. Naʻe kamata ke u fakatupulekina ha vahaʻangatae mālohi ange mo Sihova, pea naʻe kamata ke u toe ongoʻi fiefia.”

14. Naʻe anga-fēfē hono maʻu ʻe Julien ʻa e ngaahi kaumeʻa leleí?

 ¹⁴ ʻE lava fēfē ke ke hoko ʻo kaumeʻa mo e kakai te nau tākiekina lelei koe? Ko Julien, ʻokú ne ngāue ko ha mātuʻa ʻi he taimí ni, ʻokú ne pehē: “ʻI heʻeku kei siʻi angé, naʻá ku maʻu ʻa e ngaahi kaumeʻa lelei lolotonga ʻeku kau ʻi he ngāue fakafaifekaú. Ko e ngaahi kaumeʻa ko ení naʻa nau faivelenga, pea naʻa nau tokoniʻi au ke u sio ki he fiefia lahi ʻe lava ke maʻu mei he ngāue fakafaifekaú. Naʻe kamata ke u ʻai ʻa e ngāue fakafaifekau taimi-kakató ko ʻeku taumuʻá. Naʻá ku toe ʻiloʻi foki naʻá ku tō mei he feohi leleí pea mo e ngaahi kaumeʻa fakamānakó ʻi heʻeku fakangatangata hoku ngaahi kaumeʻá ki he niʻihi pē ʻi hoku toʻú. Ki mui ai, naʻá ku toe maʻu mo e ngaahi kaumeʻa lelei ʻi he Pētelí. Ko ʻenau faʻifaʻitakiʻangá naʻá ne tokoniʻi au ke fakaleleiʻi ʻeku fili ʻo e fakafiefiá, pea naʻe ʻai heni ke u toe ofi ange kia Sihova.”

15. Ko e hā ʻa e fakatokanga fekauʻaki mo e feohí naʻe ʻoange ʻe Paula kia Tīmoté? (2 Tīmote 2:20-22)

¹⁵ Kae fēfē kapau ʻokú ke ʻiloʻi ʻoku ʻi ai ha taha ʻi he fakatahaʻangá ʻoku ʻikai ko ha feohi lelei kiate koe? Naʻe ʻiloʻi ʻe Paula naʻe ʻi ai ʻa e niʻihi ʻi he fakatahaʻanga Kalisitiane ʻi he ʻuluaki senitulí naʻe ʻikai ke nau maʻu ha vakai fakalaumālie, ko ia naʻá ne fakatokanga kia Tīmote ke ne mātuʻaki fakamamaʻo meiate kinautolu. (Lau ʻa e 2 Tīmote 2:20-22.) Ko ʻetau kaumeʻa mo e ʻOtuá ʻoku mahuʻinga. ʻOku ʻikai totonu ke tau fakaʻatā ha taha ke ne fakavaivaiʻi ʻa e haʻi kuo tau ngāue mālohi ke faʻu mo ʻetau Tamai fakahēvaní.​—Saame 26:4.

16. Ko e hā ʻa e faʻahinga taumuʻa ʻoku totonu ke ke fokotuʻú?

¹⁶ Fokotuʻu ʻa e ngaahi taumuʻa ʻaonga. Fili ʻa e ngaahi taumuʻa te ne fakaivimālohiʻi mo ʻai koe ke ke fakalakalaka. (ʻEf. 3:16) Ko e fakatātaá, te ke fili nai ke fakaleleiʻi hoʻo taimi-tēpile ako fakafoʻituituí mo e lau Tohi Tapú. (Saame 1:2, 3) Pe ʻokú ke vakai nai ki he fiemaʻu ke ke tokanga ki he lahi mo e tuʻunga hoʻo ngaahi lotú. Mahalo ʻoku fiemaʻu ke ke mapuleʻi-kita lahi ange ʻi hoʻo fili ʻo e fakafiefiá mo hoʻo ngāueʻaki ho taimí. (ʻEf. 5:15, 16) ʻI he taimi ʻoku vakai mai ai ʻa Sihova ʻokú ke ngāue mālohi ke fai ha fakalakalaka lahi angé, te ne fiefia.

17. Ko e hā ʻa e fiemālie ʻoku maʻu mei hono tokoniʻi ʻa e kakaí?

¹⁷ ʻOkú ke tupulekina ʻi he tuʻunga ko ha Kalisitiane  ʻi he taimi ʻokú ke tokoni ai ki he kakai kehé. Naʻe pehē ʻe Sīsū: “ʻOku ʻi ai ʻa e fiefia lahi ange ʻi he foaki atú ʻi he maʻu maí.” (Ngā. 20:35) Te ke maʻu ʻaonga lahi kapau te ke ngāueʻaki ha konga ho taimí mo e ivi fakatalavoú ke tokoniʻi ʻa e niʻihi kehé. Ko e fakatātaá, ʻe lava ke ke ʻai ko hoʻo taumuʻa ke tokoni ki he kau taʻumotuʻa mo mahamahaki ʻi hoʻo fakatahaʻangá. Mahalo ʻe lava ke ke fai haʻanau puʻi pe tokoniʻi kinautolu ʻi heʻenau ngāueʻaki ʻa e meʻangāue fakaʻilekitulōniká. Kapau ko ha tokoua koe, fokotuʻu ʻa e taumuʻa ke hoko ko ha sevāniti fakafaifekau, fakataha mo e vakai ke ngāue maʻa ho fanga tokouá mo e fanga tuofāfiné. (Fil. 2:4) ʻOkú ke toe fakahāhā ʻa e ʻofa ki he faʻahinga ʻi tuʻa ʻi he fakatahaʻangá ʻaki hono vahevahe atu ʻa e ongoongo lelei ʻo e Puleʻangá kiate kinautolu. (Māt. 9:36, 37) Kapau ʻe ala lava, ʻai ko hoʻo taumuʻa ia ke kau ʻi ha tafaʻaki ʻo e ngāue fakafaifekau taimi-kakató.

18. ʻE lava fēfē ke tokoniʻi koe ʻe he ngāue fakafaifekau taimi-kakató ke ke tupulakí?

¹⁸ Ko e ngāue fakafaifekau taimi-kakató ʻe lava ke ne ʻoatu kiate koe ʻa e ngaahi faingamālie lahi ke laka ki muʻa fakalaumālie. Ko e ngāue ko ha tāimuʻá te ne fakaava atu nai ʻa e matapā ke ke kau ʻi he Ako Maʻá e Kau ʻEvangeliō ʻo e Puleʻangá. ʻE malava nai ke ke ngāue ʻi Pēteli pe ko ha poloseki langa fakateokalati. Ko ha tuofefine tāimuʻa kei siʻi ko Kaitlyn ʻokú ne pehē: “Ko e fakamoleki ʻa e taimi ʻi he ngāue fakafaifekaú mo e fanga tokoua mo e fanga tuofāfine taukeí ko ha meʻa lahi ia naʻá ne tokoniʻi au ke u tupulaki fakalaumālie hili ʻeku papitaisó. Ko ʻenau faʻifaʻitakiʻangá naʻá ne ueʻi au ke fakalolotoʻi ʻeku ʻilo Fakatohitapú pea fakaleleiʻi ʻeku malava fakafaiakó.”

19. Ko e hā ʻa e ngaahi tāpuaki te ke maʻu ʻi hoʻo hokohoko atu ke fai ʻa e fakalakalaka fakalaumālié?

¹⁹ ʻI hoʻo hokohoko atu ke fai ʻa e fakalakalaka fakalaumālié, te ke maʻu ʻa e ngaahi tāpuaki lahi. Te ke fakaʻehiʻehi ai mei hono fakamoleki noa ho taimi toʻutupú ʻi he tuli ki he ngaahi taumuʻa koto ngeʻesí. (1 Sio. 2:17) Te ke kalofi ai ʻa e loto-mamahi tupu mei hono fai ʻa e ngaahi fili koví. ʻI hono kehé, te ke maʻu ai ʻa e lavameʻa mo e fiefia moʻoní. (Pal. 16:3) Ko hoʻo faʻifaʻitakiʻanga leleí ʻe fakalototoʻa ki ho kaungātuí, ʻa e kei siʻi mo e taʻumotuʻa. (1 Tīm. 4:12) Pea ko e mahuʻinga tahá, te ke maʻu ʻa e nonga mo e fiemālie ʻoku haʻu mei hono fakahōifuaʻi ʻa Sihova pea mo hono maʻu ʻa e kaumeʻa ofi mo iá.​—Pal. 23:15, 16.