1. Ko e hā naʻe fakatupu ai ʻe Sihova ʻa e moʻuí?

 NAʻE ʻi ai ʻa e taimi naʻe toko taha pē ai ʻa Sihova. Ka naʻe ʻikai ke ne taʻelata. Naʻá ne maʻu ʻa e meʻa kotoa pē. Neongo ia, naʻe finangalo ʻa e ʻOtuá ke fiefia ʻa e niʻihi kehé ʻi he moʻuí. ʻI hono ueʻi ʻa Sihova ʻe he ʻofá, naʻá ne kamata ʻa e fakatupú.​—Saame 36:9; 1 Sio. 4:19.

2. Naʻe anga-fēfē ongoʻi ʻa Sīsū mo e kau ʻāngeló fekauʻaki mo e ngāue fakaefakatupu ʻa Sihová?

² ʻUluakí, naʻe fakatupu ʻe Sihova hano kaungāngāue. Pea naʻe fakafou leva ʻi hono ʻAló, “ʻa hono fakatupu ʻa e ngaahi meʻa kehe kotoa pē,” kau ai ʻa e ngaahi meʻamoʻui laumālie ʻatamaiʻia ʻe laui miliona. (Kol. 1:16) Naʻe fiefia ʻa Sīsū ʻi he faingamālie ke ngāue mo ʻene Tamaí. (Pal. 8:30) Pea naʻe toe maʻu ʻe he ngaahi foha fakaeʻāngelo ʻo e ʻOtuá ha ʻuhinga ke fiefia. Naʻa nau ʻi ai tonu ʻi he taimi naʻe fakatupu ai ʻe Sihova mo ʻene Tufunga Pōtoʻí, ʻa Sīsū, ʻa e langí mo e māmaní. Naʻe anga-fēfē ʻa e fakafeangai ʻa e kau ʻāngeló? Naʻa nau “kamata kaila fakahīkihiki” ʻi hono faʻu ʻa e māmaní, pea ʻoku ʻikai ha veiveiua naʻe hokohoko atu ʻenau fakahīkihikiʻi ʻa e ngāue fakaefakatupu taki taha ʻa Sihová, kau ai ʻene fakatupu fakaʻosi makehé, ʻa e faʻahinga ʻo e tangatá. (Siope 38:7; Pal. 8:31, fkm. ʻi lalo) Ko e meʻa fakatupu taki taha ko ení naʻe fakaeʻa ai ʻa e ʻofa mo e poto ʻa Sihová.​—Saame 104:24; Loma 1:20.

3. Hangē ko ia ʻoku fakahaaʻi ʻi he 1 Kolinitō 15:21, 22, ko e hā ʻoku ala lava ke maʻu koeʻuhi ko e feilaulau huhuʻi ʻa Sīsuú?

³ Ko e taumuʻa ʻa Sihova ki he fāmili fakaetangatá ke nau maʻu ʻa e moʻui taʻengata ʻi he māmani fakaʻofoʻofa naʻá ne fakatupú. Ka ʻi he taimi naʻe angatuʻu ai ʻa ʻĀtama mo ʻIvi ki heʻena Tamai  ʻofá, naʻe tofuhia ai ʻa e māmaní kotoa ʻi he angahalá mo e maté. (Loma 5:12) Naʻe anga-fēfē ʻa e fakafeangai ʻa Sihová? Naʻá ne fakahaaʻi mai leva ʻa e founga te ne fakahaofi ai ʻa e faʻahinga ʻo e tangatá. (Sēn. 3:15) Naʻe fakataumuʻa ʻe Sihova ke tokonaki mai ha huhuʻi ʻe malava ai ke fakatauʻatāinaʻi ʻa e fānau ʻa ʻĀtama mo ʻIví mei he angahalá mo e maté. Naʻe lava leva ke ne fakaʻatā ʻa e tokotaha taki taha ke ne fili ke tauhi kiate Ia pea maʻu ʻa e moʻui taʻengatá.​—Sione 3:16; Loma 6:23; lau ʻa e 1 Kolinitō 15:21, 22.

4. Ko e hā ʻa e ngaahi fehuʻi te tau lāulea ki ai ʻi he kupu ko ení?

⁴ Ko e talaʻofa ʻa e ʻOtuá ke fokotuʻu mai ʻa e kau maté ʻoku langaʻi ai ha ngaahi fehuʻi. Ko e fakatātaá, ʻe anga-fēfē nai hono fakahoko ʻa e toetuʻú? ʻE malava ke tau ʻiloʻi hotau ngaahi ʻofaʻangá ʻi he taimi te nau toetuʻu mai aí? ʻI he ngaahi founga fē ʻe ʻomai ai ʻe he toetuʻú ʻa e fiefiá? Pea ʻe lava fēfē ke hanga ʻe he fakalaulauloto ki he toetuʻú ʻo fakalahi ʻetau houngaʻia ki he ʻofa, poto mo e kātaki ʻa Sihová? Tau lāulea taha taha angé ki he ngaahi fehuʻi ko iá.

5. Ko e hā ʻoku ʻuhinga lelei ai ke tui heʻikai ke toetuʻu mai ʻa e kakaí kotoa ʻi he taimi tatau?

⁵ ʻI he taimi ʻe fokotuʻu ai ʻe Sihova ʻa e laui miliona taʻefaʻalaua fakafou ʻi hono ʻAló, ʻoku tau fakahuʻunga nai heʻikai ke nau toetuʻu kotoa mai ʻi he taimi tatau. He ko e hā? Koeʻuhi ko e fuʻu tokolahi ʻo e māmaní ʻoku ngalingali ʻe fakatupu māveuveu. Pea ʻoku ʻikai ʻaupito ke fai ʻe Sihova ha meʻa ʻi ha founga taʻemaau mo māveuveu. ʻOkú ne ʻiloʻi ke tuʻuloa ʻa e melinó, kuo pau ke fokotuʻutuʻu maau. (1 Kol. 14:33) Naʻe poto mo kātaki ʻa Sihova ko e ʻOtuá ʻi heʻene ngāue mo Sīsū ke teuteuʻi ʻa e māmaní ki muʻa ke fakatupu ʻa e tangatá. Ko ia ai, ʻe fakahāhā ʻe Sīsū ʻa e ngaahi ʻulungaanga tatau lolotonga ʻa e  Pule Taʻu ʻe Afé ʻi he taimi te ne ngāue fakataha ai mo e faʻahinga ʻe hao ʻi ʻĀmaketoné ʻi heʻenau teuteuʻi ʻa e māmaní ke talitali ʻa e faʻahinga ʻe toetuʻu maí.

6. Fakatatau ki he Ngāue 24:15, ko hai ʻe kau ʻi he faʻahinga ʻe fokotuʻu mai ʻe Sihová?

⁶ Ko e meʻa mahuʻinga tahá, ko e faʻahinga ʻe hao atu ʻi ʻĀmaketoné ʻe fiemaʻu ke nau akoʻi ʻa e faʻahinga ʻe toetuʻú fekauʻaki mo e Puleʻanga ʻo e ʻOtuá mo e ngaahi fiemaʻu ʻa Sihová. Ko e hā hono ʻuhingá? Koeʻuhi ko e tokolahi taha ʻo e faʻahinga ʻe toetuʻú ko e kau “taʻemāʻoniʻoní.” (Lau ʻa e Ngāue 24:15.) Te nau fai ʻa e ngaahi liliu lahi koeʻuhi ke maʻu ʻaonga mei he feilaulau ʻa Kalaisí. Fakakaukau atu ki he ngāue lahi ʻi hono akoʻi ʻa e moʻoni fekauʻaki mo e ʻOtuá ki he laui miliona ʻoku ʻikai haʻanau ʻilo kia Sihova. ʻE maʻu ʻe he tokotaha taki taha ha fakahinohino fakatāutaha ʻo meimei tatau mo e founga ʻoku fai ai ʻa e ako Tohi Tapu he ʻaho ní? ʻE vaheʻi ʻa e faʻahinga foʻou ko ení ki ha ngaahi fakatahaʻanga pea teuʻi kinautolu ke nau akoʻi ʻa e faʻahinga ʻe toetuʻu mai ʻamui angé? ʻE fiemaʻu ke tau tatali kae ʻoua ke aʻu ki ai. Kae kehe, ʻoku tau ʻiloʻi ʻi he ngataʻanga ʻo e Pule Taʻu ʻe Afe ʻa Kalaisí, “ʻe fonu moʻoni ʻa e māmaní ʻi he ʻiloʻi ʻo Sihová.” (ʻAi. 11:9) He taʻu ʻe afe femoʻuekina ē kae fakafiefia!

7. Ko e hā ʻe maʻu ai ʻe he kakai ʻa e ʻOtuá ʻa e kaungāongoʻi ʻi hono akoʻi ʻa e faʻahinga ʻe toetuʻú?

⁷ Lolotonga ʻa e Pule Taʻu ʻe Afe ʻa Kalaisí, ko e kotoa ʻo e fānau ʻa Sihova ʻi he māmaní ʻe fiemaʻu ke nau fai ʻa e ngaahi liliu ke fakahōifua kiate ia. Ko kinautolu kotoa te nau maʻu ʻa e kaungāongoʻi moʻoni ʻi heʻenau tokoniʻi ʻa e faʻahinga ʻe toetuʻú ke tauʻi ʻa e ngaahi hehema angahalaʻiá pea moʻuiʻaki ʻa e ngaahi tuʻunga ʻa Sihová. (1 Pita 3:8) ʻOku ʻikai ha veiveiua ko e faʻahinga te nau toetuʻu maí ʻe tohoakiʻi kinautolu ki he kakai anga-fakatōkilalo ʻa Sihová, ʻa ia te nau toe “hanganaki ngāueʻi [honau] fakamoʻui.”​—Fil. 2:12.

8. Ko e hā ʻoku ʻuhinga lelei ai ke tau fakahuʻunga ko e faʻahinga te nau talitali ʻa e niʻihi ʻe toetuʻú ʻe malava ke nau ʻiloʻi honau ngaahi ʻofaʻangá?

⁸ ʻOku ʻi ai ʻa e ngaahi ʻuhinga lahi, ʻe lava ke tau fakahuʻunga ai ko e faʻahinga te nau talitali ʻa e niʻihi ʻe toetuʻú ʻe malava ke nau ʻiloʻi honau ngaahi ʻofaʻangá. Ko e fakatātaá, makatuʻunga ʻi he ngaahi toetuʻu ʻi he kuohilí, ʻoku hā ngali ʻe toe fakatupu ʻe Sihova ʻa e kakaí ke nau maʻu ʻa e fōtunga, lea mo e fakakaukau tatau mo ia naʻa nau maʻu ʻi he ki muʻa pē ke nau maté. Manatuʻi naʻe fakahoa ʻe Sīsū ʻa e maté ki he mohe pea mo e toetuʻú ki he fafangu ha taha mei he mohé. (Māt. 9:18, 24; Sione 11:11-13) ʻI he ʻā hake ʻa e kakaí mei he mohé, ʻoku nau maʻu ʻa e fōtunga mo e leʻo tatau, pea ʻoku nau kei manatuʻi pē ʻa e meʻa tatau. Fakakaukau kia Lāsalosi. Naʻá ne mate ʻi he ʻaho ʻe fā, pea kamata ke ʻauʻaunga hono sinó. Kae kehe, ʻi hono fokotuʻu hake ia ʻe Sīsuú, naʻe ʻiloʻi ia ʻe hono ongo tuofāfiné, pea ʻoku hā mahino naʻe manatuʻi kinaua ʻe Lāsalosi.​—Sione 11:38-44; 12:1, 2.

9. Ko e hā heʻikai ke fokotuʻu mai ai ʻa e faʻahinga ʻe toetuʻú mo ha ʻatamai mo e sino haohaoa?

⁹ ʻOku talaʻofa ʻe Sihova heʻikai ha taha ʻe moʻui ʻi he malumalu ʻo e pule ʻa Kalaisí te ne pehē: “ʻOku ou puke.” (ʻAi. 33:24; Loma 6:7) Ko ia, ko e faʻahinga ʻe fokotuʻu mai mei he maté ʻe toe fakatupu kinautolu mo ha sino moʻui lelei. Kae kehe, heʻikai ke nau haohaoa ʻi he taimi pē ko iá. He ka pehē, heʻikai nai ke ʻiloʻi kinautolu ʻe honau ngaahi ʻofaʻangá. ʻOku hā ngali ko e faʻahinga ʻo e tangatá kotoa ʻe faai atu pē ʻo nau haohaoa ʻi he lolotonga ʻa e Pule Taʻu ʻe Afe ʻa Kalaisí. Ko e toki ngata ʻa e taʻu ʻe taha afé ko Sīsū te ne fakafoki ʻa e Puleʻangá ki heʻene Tamaí. Pea ʻe toki fakakakato leva ʻe he Puleʻangá ʻene ngāué, ʻo kau ai hono ʻai ke haohaoa kakato ʻa e faʻahinga ʻo e tangatá.​—1 Kol. 15:24-28; Fkh. 20:1-3.

10. ʻE anga-fēfē hoʻo ongoʻi fekauʻaki mo e toetuʻú?

¹⁰ Sioloto atu pe ʻe fēfē haʻo talitali ho ngaahi ʻofaʻanga kuo maté. ʻE ʻai koe ʻe he fiefiá ke ke kata pe tangi? Te ke fiefia lahi ʻo ke hiva fakahīkihiki kia Sihova? Ko e meʻa ʻe taha ʻoku paú, te ke ongoʻi ʻofa lahi ki hoʻo Tamai tokangá pea mo hono ʻAlo taʻesiokitá koeʻuhi ko e meʻaʻofa fakaofo ʻo e toetuʻú.

11. Fakatatau ki he lea ʻa Sīsū ʻi he Sione 5:28, 29, ko e hā ʻe hokosia ʻe he faʻahinga te nau moʻuiʻaki ʻa e ngaahi tuʻunga māʻoniʻoni ʻa e ʻOtuá?

¹¹ Sioloto atu ki he fiefia ʻa e faʻahinga ʻe toetuʻú ʻi heʻenau huʻi atu honau angaʻitangata motuʻá pea nau moʻuiʻaki ʻa e ngaahi tuʻunga māʻoniʻoni ʻa e ʻOtuá. Ko e faʻahinga te nau fai ʻa e ngaahi liliu ko ení te nau toetuʻu ki he moʻui. ʻI he tafaʻaki ʻe tahá, ko e faʻahinga ʻoku nau angatuʻu ki he ʻOtuá heʻikai ke fakaʻatā kinautolu ke nau veuki ʻa e melino ʻi he Palataisí.​—ʻAi. 65:20; lau ʻa e Sione 5:28, 29.

12. ʻI he founga fē ʻe faitāpuekina ai ʻe Sihova ʻa e faʻahinga kotoa he māmaní?

¹² ʻI he malumalu ʻo e pule ʻa e Puleʻangá, ko e kakai kotoa ʻa e ʻOtuá te nau fakamoʻoniʻi ʻa e lea ʻi he Palōveepi 10:22: “Ko e tāpuaki ʻa Sihová ʻa ia ʻokú ne fakakoloa ha tahá, pea ʻoku ʻikai te Ne tānaki atu ki ai mo ha mamahi.” ʻI he ngāue ʻa e laumālie ʻo Sihová ʻi he kakai ʻa e ʻOtuá, te nau hoko ʻo lakalakaimonū fakalaumālie, ʻa ia, te nau hoko ʻo hangē ko Kalaisí pea ʻe faai atu pē ʻo nau haohaoa. (Sione 13:15-17; ʻEf. 4:23, 24) ʻI he ʻaho taki taha te nau hoko ko ha kakai mālohi ange mo lelei ange. He fakafiefia ē ko e moʻuí ʻi he taimi ko iá! (Siope 33:25) Ka ʻe lava fēfē ke tokoniʻi koe he taimí ni ʻe he fakalaulauloto ki he toetuʻú?

13. ʻI he fehoanaki mo e Saame 139:1-4, ʻoku anga-fēfē hono fakahaaʻi ʻi he toetuʻú ʻa e lahi hono ʻiloʻi kitautolu ʻe Sihová?

¹³ Hangē ko ia kuo tau lāulea mai ki aí, ʻi hono fokotuʻu mai ʻe Sihova ʻa e kakaí, te ne toe fakafoki ange ʻenau manatú mo honau angaʻitangatá tonu. Fakakaukau atu ki he ʻuhinga ʻo e meʻá ni. ʻOku ʻofa lahi ʻa Sihova ʻiate koe he ʻokú ne fakatokangaʻi ʻa e kotoa hoʻo fakakaukaú, ongoʻí, leá mo e meʻa ʻokú ke faí. Ko ia kapau te ne fokotuʻu hake koe, ʻe faingofua pē ke ne toe fakafoki atu hoʻo manatú, tōʻongá mo e angaʻitangatá. Naʻe lāuʻilo ʻa Tuʻi Tēvita ki he anga ʻo e mahuʻingaʻia ʻa Sihova ʻiate kitautolu taki tahá. (Lau ʻa e Saame 139:1-4.) ʻOku anga-fēfē ʻetau ongoʻi ʻo fekauʻaki mo hono ʻiloʻi lelei kitautolu ʻe Sihová?

14. ʻOku anga-fēfē ʻetau ongoʻi ʻi he taimi ʻoku tau fakalaulauloto ai ki hono ʻiloʻi lelei kitautolu ʻe Sihová?

¹⁴ ʻI he taimi ʻoku tau fakalaulauloto ai ki hono ʻiloʻi lelei kitautolu ʻe Sihová, ʻoku totonu ke ʻoua te tau hohaʻa. Ko e hā hono ʻuhingá? Manatuʻi ʻoku tokanga lahi mai ʻa Sihova kiate kitautolu. ʻOkú ne koloaʻaki ʻa e ngaahi tōʻonga ʻokú ne ʻai kitautolu taki taha ke tau makehé. ʻOkú ne fakatokangaʻi ʻa e meʻa kotoa pē ʻoku hoko ʻi he lolotonga ʻetau moʻuí. He fakakaukau fakafiemālie ē! ʻOua ʻaupito te tau ongoʻi ʻoku tau liʻekina. ʻI he miniti taki taha ʻi he ʻaho kotoa, ʻoku ʻi hotau tafaʻakí ʻa Sihova, ʻo kumi ki ha faingamālie ke tokoniʻi kitautolu.​—2 Kal. 16:9.

15. ʻOku anga-fēfē hono fakamoʻoniʻi ʻi he toetuʻú ʻa e poto ʻo Sihová?

¹⁵ Ko e fakamanamana ʻo e maté ko ha meʻatau mālohi. ʻOku ngāueʻaki ia ʻe he faʻahinga ʻoku puleʻi ʻe Sētané ke fakamālohiʻi ʻa e kakaí ke nau lavakiʻi honau kaungāmeʻá pe liʻaki ʻenau fakapapaú. Ka ko e fakamanamana ko iá ʻoku ʻikai hano mālohi kiate kitautolu. ʻOku tau ʻiloʻi kapau ʻe tāmateʻi kitautolu ʻe hotau ngaahi filí, ʻe toe fokotuʻu mai kitautolu ʻe Sihova. (Fkh. 2:10) ʻOku tau tuipau heʻikai ha meʻa te nau fai ʻe lava ke ne vaetuʻua ʻetau pīkitai kia Sihová. (Loma 8:35-39) He poto laulōtaha ē  kuo fakahaaʻi mai ʻe Sihova fakafou ʻi heʻene ʻomai ʻa e ʻamanaki ʻo e toetuʻú! ʻOkú ne ngāueʻaki eni ke ne huʻi ʻaki ʻa e taha ʻo e ngaahi meʻatau ola lelei taha ʻa Sētané pea ʻi he taimi tatau ʻokú ne fakateunga kitautolu ʻaki ʻa e loto-toʻa taʻemauea.

16. Ko e hā ʻa e fehuʻi ʻe ua ʻoku fiemaʻu ke ke ʻeke hifó, pea ʻe lava fēfē ke tokoniʻi koe ʻe he talí ke ke ʻiloʻi ʻa e lahi hoʻo falala kia Sihová?

¹⁶ Kapau ʻe fakamanamanaʻi koe ʻe he ngaahi fili ʻo Sihová ʻaki ʻa e maté, te ke loto-lelei ke tuku kiate Ia hoʻo moʻuí? Te ke ʻilo fēfē ʻe lava ke ke fai ia? Ko e founga ʻe taha ko hono ʻeke hifo, ‘Ko e ngaahi fili iiki ʻoku ou fai ʻi he ʻaho taki taha ʻoku nau fakamoʻoniʻi ʻoku ou falala kia Sihova?’ (Luke 16:10) Ko e fehuʻi ʻe taha, ‘ʻOku fakamoʻoniʻi ʻi heʻeku founga moʻuí ʻoku ou falala ki he talaʻofa ʻa Sihova te ne tokangaʻi ʻeku ngaahi fiemaʻu fakamatelié kapau ʻoku ou fakamuʻomuʻa hono Puleʻangá?’ (Māt. 6:31-33) Kapau ko hoʻo tali ki he ongo fehuʻi ko iá ko e ʻio, tā ʻokú ke fakamoʻoniʻi ai ʻokú ke falala kia Sihova, pea te ke mateuteu ai ki ha ʻahiʻahi pē te ke fehangahangai mo ia.​—Pal. 3:5, 6.

17. (a) ʻOku anga-fēfē hono fakahaaʻi ʻi he toetuʻú ʻa e kātaki ʻa Sihová? (e) ʻE lava fēfē ke tau fakahaaʻi ʻetau houngaʻia ʻi he kātaki ʻa Sihová?

¹⁷ Kuo kotofa ʻe Sihova ʻa e ʻaho mo e houa te ne fakangata ai ʻa e fokotuʻutuʻu motuʻa ko ení. (Māt. 24:36) Heʻikai ke ne taʻekātaki pea fai ha ngāue ki muʻa he taimi ko iá. Kuó ne holi ke fokotuʻu mai ʻa e kau maté, ka ʻokú ne kātaki. (Siope 14:14, 15) ʻOkú ne tatali kae ʻoua ke aʻu ki he taimi totonu ke fokotuʻu mai ai kinautolú. (Sione 5:28) ʻOku tau maʻu ʻa e ngaahi ʻuhinga lelei ke houngaʻia ai ʻi he kātaki ʻa Sihová. Fakakaukau atu ki ai: Koeʻuhi ko e kātaki ʻa Sihová, ko e kakai tokolahi, kau ai kitautolu, ʻoku tau maʻu ʻa e faingamālie ‘ke aʻusia ʻa e fakatomalá.’ (2 Pita 3:9) Ko e finangalo ʻo Sihová ke maʻu ʻe he kakai tokolahi taha ʻe ala lavá ʻa e faingamālie ke moʻui taʻengata. Ko ia tau fakahaaʻi ʻa e houngaʻia ʻi heʻene kātakí. Anga-fēfē? ʻAki ʻetau kumi vēkeveke ki he faʻahinga ʻoku nau “hehema totonu ki he moʻui taʻengatá” pea tokoniʻi kinautolu ke ʻofa kia Sihova pea tauhi kiate ia. (Ngā. 13:48) Te nau maʻu ʻaonga leva mei he kātaki ʻa Sihová, ʻo hangē pē ko kitautolú.

18. Ko e hā ʻoku totonu ai ke tau anga-kātaki ki he niʻihi kehé?

¹⁸ ʻE tatali anga-kātaki ʻa Sihova kae ʻoua ke aʻu ki he ngataʻanga ʻo e taʻu ʻe taha afé ki muʻa ke ne ʻamanekina kitautolu ke haohaoa. Ka ʻi he teʻeki ke aʻu ki he taimi ko iá, ʻoku loto-lelei ʻa Sihova ke ne fakangaloʻi ʻetau ngaahi angahalá. Ko ia ai, ʻoku tau maʻu ha ʻuhinga ke vakai ki he lelei ʻi he niʻihi kehé pea anga-kātaki kiate kinautolu.  Fakakaukau ki he faʻifaʻitakiʻanga ha tuofefine ʻa ia naʻe puke hono husepānití ʻi he loto-mafasia lahi pea ʻikai ke ne toe maʻu ʻa e fakatahá. “Naʻe mātuʻaki fakalotomamahi eni kiate au,” ko ʻene leá ia. “Ko ʻema ngaahi palani ki he kahaʻú ʻi he tuʻunga ko ha fāmilí naʻe liliu fakaʻaufuli.” Neongo ʻa e ngaahi meʻá ni kotoa, naʻe anga-kātaki ʻa e uaifi ʻofa ko ení ki hono husepānití. Naʻá ne falala kia Sihova pea ʻikai ʻaupito foʻi. Hangē ko Sihová, naʻá ne sio fakalaka atu ʻi he palopalemá pea tokangataha ki he ngaahi meʻa lelei fekauʻaki mo hono husepānití. ʻOkú ne pehē, “ʻOku maʻu ʻe hoku husepānití ha ngaahi ʻulungaanga fakaʻofoʻofa, pea ʻokú ne feinga lahi ke fakaakeake.” He mahuʻinga ē ke tau anga-kātaki ki he niʻihi ʻi hotau fāmilí pe fakatahaʻangá ʻoku nau feinga ke ikuʻi ʻa e ngaahi pole faingataʻá!

19. Ko e hā ʻoku totonu ke tau fakapapauʻi ke faí?

¹⁹ Naʻe fiefia ʻa Sīsū mo e kau ʻāngeló ʻi he taimi naʻe fuofua fakatupu ai ʻa e māmaní. Kae sioloto atu ki he fiefia te nau maʻu ʻi heʻenau sio hifo ki he māmaní ʻoku fonu ʻi he kakai haohaoa, ʻoku nau ʻofa mo tauhi kia Sihova. Sioloto atu ki he fiefia ʻa e faʻahinga naʻe ʻohake mei he māmaní ki hēvani ke kaungāpule mo Kalaisi ʻi heʻenau vakai hifo ki he maʻu ʻaonga ʻa e faʻahinga ʻo e tangatá mei heʻenau ngāué. (Fkh. 4:4, 9-11; 5:9, 10) Pea sioloto atu ki he moʻuí ko e loʻimata ʻo e mamahí ʻoku fetongiʻaki ʻa e loʻimata ʻo e fiefia, pea ko e puké, mamahí mo e maté ʻoku toʻo ʻosi atu. (Fkh. 21:4) Ka ʻi he teʻeki ke aʻu ki he taimi ko iá, fakapapauʻi he taimí ni ke faʻifaʻitaki ki hoʻo Tamai ʻofa, poto mo kātakí. Kapau ʻokú ke fai ia, te ke tauhi maʻu ai hoʻo fiefiá, tatau ai pē pe ko e hā ha ʻahiʻahi ʻokú ke fehangahangai mo ia. (Sēm. 1:2-4) He fakamālō ē ko kitautolu ki he talaʻofa ʻa Sihova “ʻe ʻi ai ʻa e toetuʻu”!​—Ngā. 24:15.