Ko e taha pē eni ʻo e ngaahi meʻa naʻe fakaangaʻi ai ʻe he ngaahi fili ʻo Sīsuú ia mo ʻene kau ākongá. Naʻe fakamatalaʻi ʻe he Lao ʻa Mōsesé ʻa e meʻa te ne ʻai ai ha tokotaha ke taʻemaʻa, ko e fakatātaá, ko e ʻau ʻa e kakai fefiné, kiliá pe ala ki ha sino ʻo ha tangata pe monumanu kuo mate. Naʻe toe ʻoatu ʻe he Laó ʻa e ngaahi fakahinohino ki he founga ʻe lava ke hoko ai ha taha ʻo toe maʻá. Naʻe lava ke fai eni ʻo fakafou ia ʻi he feilaulaú, kaukau pe afuhi ʻaki ʻa e vaí.​—Livitiko vahe 11-15; Nōmipa vahe 19.

Ko e kau faiako Siú naʻe toe ʻiloa kinautolu ko e kau lāpaí, naʻa nau tānaki atu ʻenau tuʻutuʻuni pē ʻa kinautolu ki he ngaahi lao ko ení. ʻOku pehē ʻe ha maʻuʻanga fakamatala ʻe taha, naʻe faʻu ʻe he kau lāpaí ha tuʻutuʻuni fakaikiiki lahi ange fekauʻaki mo e meʻa te ne ʻai ai ha taha ke taʻemaʻá pea pehē ki he founga te ne ʻai ai ke taʻemaʻa mo e niʻihi kehé. Naʻe toe faʻu ʻe he kau lāpaí ha tuʻutuʻuni fekauʻaki mo e faʻahinga naunau ngaohi kai ʻe lava ke nau maʻa pe taʻemaʻa aí mo e ngaahi ouau ʻe fiemaʻu ke muimui ai ʻa e kakaí ke nau hoko ʻo toe maʻá.

Naʻe ʻeke ange ʻe he ngaahi fili ʻo Sīsuú kiate ia: “Ko e hā ʻoku ʻikai tauhi ai ʻe hoʻo kau ākongá ʻa e talatukufakaholo ʻa e kau tangata ʻo e kuonga muʻá, ka ʻoku nau maʻu ʻenau meʻatokoní mo e nima ʻulí?” (Mk. 7:5) Naʻe ʻikai ke ʻuhinga ʻa e kau Fālesí ia ki he haisiní, ʻa ia ko hono fufulu ʻa e nimá ki muʻa ke kaí. Naʻe fokotuʻu ʻe he kau Fālesí ha tuʻutuʻuni, ko e ki muʻa ke kai ha tahá kuo pau ke lingi e vaí ʻi hono ongo nimá ko e konga ia ʻo e ouaú. ʻOku tānaki mai ʻe he maʻuʻanga fakamatala naʻe lave ki ai ʻi ʻolungá, ko e kau lāpaí naʻa nau “toe fakakikihiʻi pe ko fē ʻa e ʻaiʻanga meʻa ke ngāueʻaki ki hono lingi ʻa e vaí, ko e hā ʻa e faʻahinga vai ʻoku tāú, ko hai ʻoku totonu ke ne lingí mo e feituʻu ʻi he nimá ʻoku totonu ke aʻu ki ai ʻa e vaí.”

Naʻe anga-fēfē ʻa e fakafeangai ʻa Sīsū ki he ngaahi lao tānaki mai ko eni naʻe faʻu ʻe he tangatá? Naʻá ne tala ange ki he kau taki lotu Siú: “He tonu ē ko e kikite ʻa ʻAisea ʻo fekauʻaki mo kimoutolu kau mālualoi, ʻo hangē ko ia kuo tohí: ‘Ko e kakaí ni ʻoku nau fakaʻapaʻapaʻiaʻi au ʻaki honau loungutú, ka kuo hiki mamaʻo honau lotó meiate au [Sihova]. Ko e koto kulanoa ʻenau hanganaki lotu mai kiate aú, he ʻoku nau akoʻaki ʻa e ngaahi tuʻutuʻuni ʻa e tangatá ko e ngaahi tokāteline.’ ʻOku mou liʻaki ʻa e fekau ʻa e ʻOtuá pea mou pipiki ki he talatukufakaholo ʻa e tangatá.”​—Mk. 7:6-8.