“Ko Sophia a mo aú naʻá ma nofo mali ʻo laka hake ʻi he taʻu ʻe 39 peá ne toki mate koeʻuhi ko ha mahaki tauhi. Naʻe lahi ʻa e poupou naʻá ku maʻu mei he ngaahi kaumeʻá, pea naʻá ku nofoʻaki femoʻuekina pē. Ka ʻi ha taʻu kakato ʻe taha, naʻá ku ongoʻi kuo konga ʻeku moʻuí. Naʻá ku ongoʻi naʻe fetōʻaki ʻeku ngaahi ongoʻí. Naʻa mo e ʻi he taimí ni, ko e meimei taʻu ia ʻe tolu ʻene maté, ʻoku faʻa fakafokifā pē ʻeku ongoʻi mamahi fakaeongo ʻi he taimi ʻe niʻihi.”​—Kostas.

Kuo mole hao ʻofaʻanga ʻi he maté? Kapau ko ia, ʻokú ke ongoʻi tatau nai mo Kostas. ʻOku ʻi ai ʻa e ngaahi meʻa ʻe niʻihi ʻokú ne fakatupunga ʻa e loto-mafasia pe loto-mamahi lahi ange ʻi he mate ha hoa mali, kāinga pe kaumeʻa ʻofeina. Ko e kau mataotao ʻoku nau ako ki he mamahi ʻoku fakatupunga ʻe he maté ʻoku nau loto-tatau mo ia. ʻOku pehē ʻe he kupu ʻi he The American Journal of Psychiatry ko e “maté ʻa e meʻa ʻokú ne fakatupunga ʻa e mamahi tuʻuloa mo fakamamahi tahá.” ʻI he fehangahangai mo e langa lahi ʻoku ʻomai ʻe he maté, ʻe fifili nai ai ʻa e tokotaha mamahí: ‘Ko e hā ʻa e fuoloa ʻeku ongoʻi pehení? ʻE faifai ange peá u toe fiefia? ʻE lava fēfē ke u maʻu ha nonga?’

Ko e tali ki he ngaahi fehuʻi ko ení ʻe lāulea ki ai ʻi he ʻīsiú ko eni ʻo e ʻĀ Hake! Ko e kupu hokó ʻe lāulea ai ki he meʻa ʻe lava ke ke ʻamanekina kapau naʻe toki mole hao ʻofaʻanga. Ko e ngaahi kupu hoko maí te tau sio ai ki he ngaahi founga ʻe lava ke tokoniʻi ai koe ke fakasiʻisiʻi hoʻo mamahí.

ʻOku mau ʻamanaki moʻoni ko e ngaahi kupu hokó ʻe ʻoatu ai ha fakafiemālie mo ha tokoni ʻaonga ki ha taha pē ʻokú ne hokosia ʻa e mamahi ʻoku ʻomi ʻe he maté.