Ko e kakai falalaʻangá te nau maʻu ʻa e falala pau ʻenau mātuʻá, kaumeʻá mo e pule ngāué. ʻOku nau muimui ki he ngaahi laó, fai ki heʻenau ngaahi leá pea tala maʻu pē ʻa e moʻoní.

ʻI he meimei tuʻunga kotoa pē, ko e lahi ʻo e tauʻatāina ʻokú ke maʻú ʻoku kaunga fakahangatonu ia ki he falala kuó ke maʻu ʻi he faai mai ʻa e taimí.

“Ko e founga lelei taha ke maʻu ai ʻa e falala hoʻo ongo mātuʻá ko hono fakahaaʻi ʻokú ke matuʻotuʻa mo fua fatongia, ʻo ʻikai ʻi he taimi pē ʻokú ke ʻi ai ai mo kinauá kae pehē foki ki he taimi ʻoku ʻikai ke na ʻi ai aí.”​—Sarahi.

TEFITOʻI MOʻONI FAKATOHITAPU: “Hanganaki fakamoʻoniʻi ʻa e tuʻunga totonu ʻoku mou ʻi aí.”​—2 Kolinitō 13:5.

Tatau ai pē pe ʻokú ke loto ke maʻu ha falala lahi ange pe toe maʻu ʻa e falala naʻe molé, ʻe lava ke tokoni ʻa e ngaahi sitepu ko ení.

Hoko ʻo faitotonu. ʻOku ʻikai ha meʻa ʻe vave ange ʻene toʻo ʻa e falala ʻa e niʻihi kehé meiate koé ka ko e loí. Ka ʻi he tafaʻaki ʻe tahá, ʻi he taimi ʻokú ke talanoa tauʻatāina ai mo faitotonú​—tautefito ʻi heʻene fekauʻaki mo hoʻo ngaahi fehālaakí​—ʻe lava ke ke maʻu ʻa e falala ʻa e niʻihi kehé.

“ʻOku faingofua ke faitotonu ʻi he taimi ʻoku lele lelei ai ʻa e ngaahi meʻá. Ka ʻi hoʻo faitotonu ʻi he ngaahi meʻa te ne ʻai koe ke ke hā koví, te ne ʻai nai ʻa e niʻihi kehé ke nau falala lahi ange kiate koe.”​—Caiman.

TEFITOʻI MOʻONI FAKATOHITAPU: “Ko ʻemau fakaʻamú ia ke mau faitotonu ʻi he meʻa kotoa pē.”​—Hepelū 13:18.

Hoko ʻo falalaʻanga. ʻI ha savea ʻe taha ʻi ʻAmelika, ko e pēseti ʻe 78 ʻo e faʻahinga ʻoku nau ngāue ʻi he ngaahi kautahá naʻa nau pehē “ko e taha ʻi he ngaahi ʻulungaanga mahuʻinga taha ʻe tolu ʻoku fiemaʻu mei ha taha kole ngāué,” ko e falalaʻangá. Ko e ako ke hoko ʻo falalaʻanga he taimi ní ʻe ʻaonga ia kiate koe ʻi he taimi te ke hoko ai ko ha tokotaha lahi.

“ʻOku fakatokangaʻi heʻeku ongo mātuʻá ʻa e taimi ʻoku ou fua fatongia aí pea fai ʻeku ngaahi ngāué ʻiate au pē ʻo ʻikai toe fakapuʻia. Ko e lahi ange ʻeku fakahāhā ʻa e tamuʻomuʻa hangē ko iá, ko e lahi ange ia ʻena falala mai kiate aú.”​—Sarah.

TEFITOʻI MOʻONI FAKATOHITAPU: “ʻOku ou falala pau te ke talangofua ki he meʻá ni, . . . ʻi heʻeku ʻiloʻi te ke fai ʻa e meʻa ʻoku ou kole atú ʻo toe lahi ange.”​—Filimone 21.

Hoko ʻo anga-kātaki. ʻI he ʻikai hangē ko e tupu fakaesinó, ʻa ia ʻoku faʻa faingofua maʻu pē ke fakatokangaʻí, ʻoku faʻa fiemaʻu ʻa e taimi ki he niʻihi kehé ke nau fakatokangaʻi ʻa e tupu fakaeongó mo e fakaʻatamaí.

“Heʻikai ke ke maʻu ʻa e falala hoʻo ongo mātuʻá mo e niʻihi kehé ʻi ha foʻi ngāue pē ʻe taha. Ka ʻe lava ke ke langa māmālie hake ia kapau ʻokú ke hoko ʻo fua fatongia maʻu pē ʻi ha vahaʻa taimi.”​—Brandon.

TEFITOʻI MOʻONI FAKATOHITAPU: “Mou kofuʻaki kimoutolu ʻa e . . . kātaki.”​—Kolose 3:12.