‘UHINGA ‘OKU MAHU‘INGA AÍ: ‘Oku ‘ai ‘e Sihova ‘a e ngaahi tenga ‘o e mo‘oní ke tupu ‘i he loto ‘o kinautolu ‘oku “hehema totonu ki he mo‘ui ta‘engatá.” (Ngā. 13:48; 1 Kol. 3:7) ‘Oku tau ngāue fakataha mo ia ‘aki ‘a e fakahangataha ‘etau ngaahi feinga ‘i he ngāue fakafaifekaú ki he fa‘ahinga ‘oku nau tali ‘a e me‘a kuo nau akó. (1 Kol. 9:26) ‘Oku fiema‘u ke mahino‘i ‘e he kau ako Tohi Tapú ko e papitaiso faka-Kalisitiané ‘oku mahu‘inga ia ke ma‘u ai ‘a e fakamo‘uí. (1 Pita 3:21) ‘Oku tau tokoni‘i kinautolu ke nau hoko ko e kau ākonga ‘aki hono ako‘i kinautolu ke fai ha liliu ‘i he‘enau mo‘uí, ke malanga mo faiako, pea mo fakatapui ‘enau mo‘uí kia Sihova.—Māt. 28:19, 20.

FOUNGA HONO FAI IÁ:

• Fakamanatu ki he kau ako Tohi Tapú ko e taumu‘a ‘enau akó ke tokoni‘i kinautolu ke nau “hoko ‘o ‘ilo‘i” ‘a Sihova pea fakahōifua‘i ia.—Sione 17:3

• Tokoni‘i kinautolu ke fai ha fakalakalaka fakalaumālie ‘aki hono iku‘i ha fakafaingata‘a‘ia‘anga, hangē ko e ‘ulungaanga kovi pe feohi ‘oku ala fehu‘ia

• Fakaivimālohi‘i mo fakalototo‘a‘i kinautolu ki mu‘a pea mo e hili ‘enau papitaisó.—Ngā. 14:22

SIO ‘I HE VITIŌ KO SIHOVA KO E ‘OTUÁ TE NE TOKONI‘I KOE PEA TALI LEVA ‘A E NGAAHI FEHU‘I KO ENÍ:

• Ko e hā nai ha fakamanamana te ne ta‘ofi ha taha mei he fakatapuí mo e papitaisó?

• ‘E lava fēfē ke tokoni ‘a e kau mātu‘á ki he kau ako Tohi Tapú ke nau fakalakalaka fakalaumālie?

• Ko e hā ‘oku ako‘i mai kiate kitautolu ‘i he ‘Aisea 41:10 fekau‘aki mo Sihová?

• Ko e hā ‘a e ngaahi ‘ulungaanga ‘e malava ai ‘e Sihova ke ne faka‘atā kitautolu ke tauhi kiate ia neongo ‘etau ta‘ehaohaoá?