Ki mu‘a ke fai ha ngaahi fili ‘oku lahi pe si‘isi‘i, ‘oku tau ‘eke hifo kiate kitautolu, ‘‘E fēfē nai ‘a e vakai ‘a Sihová?’ Neongo he‘ikai ‘aupito ke tau ‘ilo‘i ‘a e me‘a kotoa fekau‘aki mo e fakakaukau ‘a Sihová, ‘okú ne ‘omai e fakamatala fe‘unga ‘i he‘ene Folofolá ke teu‘i ai kitautolu ki he “ngāue lelei kotoa pē.” (2 Tīm. 3:16, 17; Loma 11:33, 34) ‘Oku ‘ilo‘i lelei ‘e Sīsū ‘a e finangalo ‘o Sihová pea ‘ai ia ko e me‘a mu‘omu‘a taha ‘i he‘ene mo‘uí. (Sione 4:34) ‘I he fa‘ifa‘itaki kia Sīsuú, ‘ofa ke tau fai hotau lelei tahá ‘i hono fai ‘a e ngaahi fili ‘oku fakahōifua kia Sihová.—Sione 8:28, 29; ‘Ef. 5:15-17.

SIO ‘I HE VITIŌ HOKOHOKO ATU KE ‘ILO‘I ‘A E FINANGALO ‘O SIHOVÁ (LIV. 19:18), PEA TALI LEVA ‘A E NGAAHI FEHU‘I KO ENÍ:

• Ko e hā kuo pau ai ke tau ngāue‘aki ‘a e ngaahi tefito‘i mo‘oni Fakatohitapú ‘i he‘etau mo‘uí?

• Ko e hā ‘a e tefito‘i mo‘oni Fakatohitapu ‘oku totonu ke ne tākiekina ‘etau fili ‘a e ngaahi fasí?

• Ko e hā ‘a e tefito‘i mo‘oni Fakatohitapu ‘oku totonu ke ne tākiekina ‘etau fili ‘a e valá mo e teuteú?

• Ko e hā ‘a e toe tafa‘aki ‘o e mo‘uí kuo pau ke tau ngāue‘aki ai ‘a e tefito‘i mo‘oni Fakatohitapú?

• ‘E lava fēfē ke fakalelei‘i ‘etau malava ke ‘ilo‘i ‘a e finangalo ‘o Sihová?