Na‘e ‘i ai ha ‘uhinga makehe ki he kau ‘Isilelí ke fakahīkihiki‘i ‘a Sihova. Na‘á ne ‘omai kinautolu mei ‘Isipite pea fakahaofi kinautolu mei he kau tau ‘a Feló! (‘Eki. 15:1, 2) ‘Oku hokohoko atu ‘a Sihova ke fai ha me‘a lelei ma‘a hono kakaí. ‘E lava fēfē ke tau fakahāhā ‘etau hounga‘iá?​—Saame 116:12.

Ko e founga ‘e taha, ke hoko ko ha tāimu‘a tokoni pe ko ha tāimu‘a tu‘uma‘u. ‘E lava ke ke lotu ki ha holi mo e mālohi ke hoko ko ha tāimu‘a. (Fil. 2:13) Ko e tokolahi ‘oku nau kamata ko ha tāimu‘a tokoni. ‘E lava ke ke fili ke ngāue‘i ‘a e houa ‘e 30 pe 50 lolotonga ‘a e māhina ko Ma‘asi mo ‘Epelelí pea lolotonga ‘a e māhina ‘oku ‘a‘ahi mai ‘a e ‘ovasia sēketí. ‘I ho‘o hokosia ‘a e fiefia ‘i ho‘o ngāue tāimu‘a tokoní te ke loto nai ke kakapa atu ‘o hoko ko ha tāimu‘a tu‘uma‘u. Na‘a mo e fa‘ahinga ‘oku ngāue pa‘anga taimi-kakató pe ko e fa‘ahinga ‘oku fakangatangata honau tu‘unga mo‘ui leleí kuo malava ke nau hoko ‘o tāimu‘a tu‘uma‘u. (mwb16.07 8) Ko hono mo‘oní ‘oku tuha ‘a Sihova mo ha feinga pē ‘oku tau fai ke fakahīkihiki‘i ia!​—1 Kal. 16:25.

SIO ‘I HE VITIŌ TAUTEHINA ‘E TOKO TOLU ‘I MONGOKŌLIA, PEA TALI LEVA ‘A E NGAAHI FEHU‘I KO ENÍ:

• Ko e hā ‘a e ngaahi pole na‘e pau ke iku‘i ‘e he kau tautehiná kae lava ke nau tāimu‘á?

• Ko e hā ‘a e ngaahi tāpuaki kuo nau ma‘ú?

• Koe‘uhi ko ‘enau tāimu‘a tu‘uma‘ú ko e hā ‘a e ngaahi faingamālie fo‘ou na‘a nau ma‘ú?

• Ko e hā ‘a e ‘aonga ki he ni‘ihi kehé ‘a ‘enau fa‘ifa‘itaki‘angá?