“Naʻá ku tupu hake ʻi ha faama ʻi he feituʻu ʻutá,” ko e lea ia ʻa Agostinho, ʻoku nofo ʻi Pelēsila. “Naʻa mau masiva ʻaupito. Naʻe pau ke u nofo ʻi he akó koeʻuhi ke ngāue pea tokoni ke tokonaki maʻa homau fāmilí.” Naʻe toki ako ʻa Agostinho ke tohi mo lautohi ʻi heʻene taʻu 33. “Ko e ako ke tohi mo lautohí naʻá ne tokoniʻi au ke maʻu ʻa e ngeia lahi ange pea toe lahi ange ai ʻeku fakamahuʻingaʻi-kitá,” ko ʻene leá ia.

 Ko Agostinho ko e toko 1 ia ʻi he kakai ʻe toko 250,000 tupu ʻa ia kuo akoʻi ʻe he Kau Fakamoʻoni ʻa Sihová ke nau poto ʻi he tohí mo e lautohí ʻi he taʻu ʻe 70 tupu kuo maliu atú. Ko e hā ʻoku fakahoko ai ʻe he Kau Fakamoʻoni ʻa Sihová ʻa e ngaahi kalasi peheé? Kuo anga-fēfē maʻu ʻaonga ʻa e kakaí mei he ako peheé?

 ʻI he vaeuaʻanga ʻo e 1930 tupú, naʻe fakahoko ʻe he Kau Fakamoʻoni ʻa Sihová ʻenau ngāue fakafaifekaú ʻi he fonua ʻe 115. Ke aʻu ki he kakai naʻa nau lea ʻi he ngaahi lea kehé, ko e kau misinalé naʻa nau tā ʻa e ngaahi hiki-leʻo ʻo e ngaahi malanga Fakatohitapu kuo liliu, pea ʻi he ngaahi tuʻunga ʻe niʻihi naʻe malava ke nau tuʻuaki ʻa e ʻū tohi ʻi he ngaahi lea fakalotofonuá. Neongo naʻe fakahāhā ʻe he kakai tokolahi ʻa e mahuʻingaʻia lahi ʻi he Tohi Tapú, ko e ʻikai poto ʻi he tohí mo e lautohí naʻá ne fakafaingataʻaʻiaʻi ʻa e ako ʻa e tokolahi ʻo kinautolu.

 ʻI he ʻikai malava ʻa e kakaí ke nau lau ʻiate kinautolu pē ʻa e Tohi Tapú, naʻa nau fāinga ke ako ʻa e founga ke ngāueʻaki ai ʻa e ngaahi tefitoʻi moʻoni Fakatohitapú. (Siosiua 1:8; Saame 1:2, 3) Naʻa nau toe fehangahangai mo e ngaahi pole ʻi heʻenau fakahoko honau ngaahi fatongia faka-Kalisitiané. Ko e fakatātaá, kapau naʻe ʻikai lava ʻa e ngaahi mātuʻá ke lautohi, ʻe fiemaʻu ʻa e feinga lahi ange mei heʻenau tafaʻakí ke akoʻi ʻenau fānaú. (Teutalōnome 6:6, 7) Pea ko e Kau Fakamoʻoni foʻou ʻa ia ʻoku ʻikai lava ke nau lautohí ʻe fakangatangata ʻenau malava ke ngāueʻaki ʻa e Tohi Tapú ʻi heʻenau feinga ke akoʻi ʻa e niʻihi kehé.

 Lolotonga ʻa e 1940 tupú mo e 1950 tupú, ko Nathan H. Knorr mo Milton G. Henschel, ʻa e toko ua ʻi he faʻahinga naʻa nau takimuʻa ʻi he haʻohaʻonga ʻo e Kau Fakamoʻoni ʻa Sihová, naʻá na folau ki he ngaahi fonua kehekehe ke tokoni ki hono fokotuʻutuʻu ʻa e ngāue fakamalangá. ʻI he ngaahi fonua naʻe anga-maheni ai ʻa e ʻikai poto ʻi he tohí mo e lautohí, naʻa nau fakalototoʻaʻi ʻa e ngaahi ʻōfisi vaʻa fakalotofonuá ke fokotuʻu ha ngaahi kalasi ako ki he tohí mo e lautohí ʻi he ngaahi fakatahaʻangá.

 Naʻe ʻoatu ʻe he ngaahi ʻōfisi vaʻá ʻa e ngaahi fakahinohino ki he ngaahi fakatahaʻangá fekauʻaki mo e founga ke fakahoko ai ʻa e ngaahi kalasí. ʻI he ngaahi fonua ʻe niʻihi, naʻe ʻosi ʻi ai ʻa e ngaahi polokalama ʻa e puleʻangá ʻe lava ke ngāueʻaki. Ko e fakatātaá, ʻi Pelēsila, naʻe maʻu ʻe he ʻōfisi vaʻá ʻa e ngaahi naunau mo e ngaahi tohi ako mei he puleʻangá pea fakafolau ia ki he ngaahi fakatahaʻangá. ʻI he ngaahi fonua kehé, naʻe faʻu ʻe he Kau Fakamoʻoní ʻenau polokalama ako ki he tohí mo e lautohí.

 Ko e ngaahi kalasi ako ki he tohí mo e lautohí naʻe ʻatā ki he kakai tangata mo e kakai fefine, kei siʻi mo e taʻumotuʻa. Ko e taumuʻá ke akoʻi ʻa e kau akó ke nau poto ʻi he lautohi ʻi heʻenau lea tuʻufonuá​—neongo kapau naʻe ʻuhinga ení ko hono akoʻi ʻa e ngaahi lea kehekehe ʻi he fakatahaʻanga ʻe taha.

 Kuo anga-fēfē maʻu ʻaonga ʻa e kakaí mei he polokalama ako ko eni ke tohi mo lautohí? Ko ha Fakamoʻoni mei Mekisikou ʻokú ne pehē: “ʻI he taimí ni ʻoku ou malava ke mahinoʻi ʻa e ʻuhinga ʻo e Tohi Tapú, pea ʻoku lava leva ke maongo ia ki hoku lotó. ʻI heʻeku hoko ʻo poto ʻi he lautohí kuó ne tokoniʻi au ke talanoa tauʻatāina mo hoku kaungāʻapí, pea kuo malava ai ke u aʻu ki he kakai tokolahi ange mo e pōpoaki Fakatohitapú.”

 Ko e ngaahi ʻaonga ʻo e polokalama ako ke tohi mo lautohí kuo fakalaka atu ia ʻi hono tokoniʻi pē ʻa e kakaí ke mahinoʻi ʻa e Tohi Tapú. Ko Isaac mei Pulunitī ʻokú ne pehē: “Ko e ako ke poto ʻi he tohí mo e lautohí kuó ne tokoniʻi au ke ako ʻa e ngaahi pōtoʻi langa. Ko e ngāue langá kuo hoko ia ko ʻeku ngāué, pea ʻi he taimí ni ʻoku ou tokangaʻi ha ngaahi poloseki langa lalahi.”

 Ko Jesusa mei Pelū naʻá ne taʻu 49 ʻi he taimi naʻá ne kamata kau ai ki he ngaahi kalasi ako ki he tohí mo e lautohí. “ʻI he tuʻunga ko ha uaifi tauhi ʻapi,” ko ʻene leá ia, “ʻOku fiemaʻu ke u sio ki he ngaahi totongi mo e hingoa ʻo e ngaahi meʻa ʻoku fakatau ʻi he māketí. ʻI he kuohilí, naʻe hoko ia ko ha pole. ʻOku ou fakamālō ki he kalasi ako ki he tohí mo e lautohí, ʻoku ou loto-maʻu lahi ange ʻi heʻeku fai ʻa e fakatau maʻa hoku fāmilí.”

 ʻI he faai mai ʻa e ngaahi taʻú, ko e kau maʻu mafai ʻi he ngaahi fonua kehekehe kuo nau fakaongoongoleleiʻi ʻa e Kau Fakamoʻoni ʻa Sihová ki he ngāue kuo nau fai ke fakalahi ʻa e malava ke tohi mo lautohí. ʻI he ʻahó ni, ʻoku kei fakahoko pē ʻe he Kau Fakamoʻoni ʻa Sihová ʻa e ngaahi kalasi ako ki he tohí mo e lautohí, ʻo ngāueʻaki ʻa e ngaahi polokalama mo e meʻangāue kuo fakaleleiʻi ʻi he faai mai ʻa e ngaahi taʻú. Kuo nau toe faʻu mo pulusi ʻa e ngaahi polosiua ofi ʻi he 224 milioná ʻi he lea ʻe 720 ke tokoni ki he kakaí ke nau ako ke lautohi pe ke tokoni ki he faʻahinga mo ha tuʻunga fakaako fakangatangata. a