ʻI he efiafi Sāpate ʻo Fepueli 24, 1924, naʻe fuofua kamata ai ʻa e fakahoko fatongia ʻa e fale fakamafola lea foʻou ʻa e Kau Ako Tohi Tapú, a ʻa e WBBR. Naʻe fēfē ʻa e fuofua fakamafola leá? Ko hai naʻe fanongo ki aí? Pea kuo anga-fēfē hokohoko atu ʻa e Kau Fakamoʻoni ʻa Sihová ke ngāueʻaki ʻa e tekinolosia fakamuimui taha ko ení ke ʻai ke ʻiloa ʻa e “ongoongo lelei ko ʻeni ʻo e Puleʻangá . . . ʻi he kotoa ʻo e māmani kuo nofoʻí”?​—Mātiu 24:14.

 Ko e fuofua fakamafola leá naʻe kamata ʻi he 8:30 efiafi pea naʻe lele ʻi ha houa ʻe ua. Naʻe fakamafola ʻa e polokalamá mei ha fale fakamafola lea foʻou naʻe langa ʻi he motu ko Staten, Niu ʻIoke. Ko e tokotaha naʻá ne tokangaʻi ʻa e ongo lelei ʻa e polokalamá, ko Tokoua Ralph Leffler, naʻá ne manatuʻi “naʻe lēlea honau lotó” ʻi he fale fakamafola leá. “ʻE ʻi ai nai ha taha ʻe malava ke fanongo mai kiate kitautolu?” ko ʻene fifilí ia. “Naʻá ku fakamoʻui ʻa e mīsiní, pea naʻa mau kamata leva, ʻo ʻamanaki ʻe lele lelei.”

 Ko e tokotaha naʻe fakahoko fatongia ʻi he fakamafola lea fakahisitōlia ko iá ko Tokoua Victor Schmidt, ko e pule ʻo e fale fakamafola leá. Naʻá ne kamata ʻa e polokalamá ʻaki hono fakafeʻiloaki ʻa e kau mūsika pōtoʻi, ko kinautolu kotoa ko e Kau Ako Tohi Tapu. ʻUluakí, ko ha tokotaha naʻá ne tā ha fasi ʻi he pianó. Ki mui ai, naʻe hivaʻi ʻe Cora Wellman ʻa e “Ko e Toko Hivangofulu mā Hiva,” naʻe makatuʻunga ʻi he talanoa fakatātā ʻa Sīsū fekauʻaki mo e sipi molé. (Luke 15:4-7) Naʻe hoko atu ʻa e ngaahi fakaʻaliʻali kehe, ʻo kau ai ʻa Frederick W. Franz, naʻá ne hivaʻi ʻa e “Ko e Tokotaha Fakatomalá,” ko ha hiva ʻo fakamatalaʻi ai ʻa e talanoa ki he foha molé pe foha maumau koloá.​—Luke 15:11-25.

 Ko Joseph F. Rutherford, ʻa ia naʻá ne takimuʻa ʻi he Kau Ako Tohi Tapú ʻi he taimi ko iá, naʻá ne fai ha malanga fakatapui ʻo e fale fakamafola leá ke ngāueʻaki “ki he ngaahi meʻa ʻo e puleʻanga ʻo e Mīsaiá.” Naʻá ne pehē: “Koeʻuhi naʻe fakaʻatā ʻe he ʻEikí ʻa e letioó ke fokotuʻu ʻi he taimi ko ení, kuo pau pē ʻokú Ne leleiʻia lahi ʻi hono ngāueʻaki ia ke akoʻi ʻa e kakaí fekauʻaki mo e fakahoko ʻo ʻEne ngaahi kikite fakaofó.”

 Ko e tokolahi ʻo e kau fanongo ʻi he tokelau-hahake ʻo ʻAmeliká naʻa nau fanongo ki he fuofua fakamafola leá. Laka hake ʻi he kilomita ʻe 320 (maile ʻe 200) hono mamaʻó, ko ha tokotaha fanongo ʻi Morrisville, Vermont, naʻá ne pehē: “ʻOku ou fiefia ke fakahā atu naʻe aʻu lelei mai ʻa e polokalamá ki heni. . . . Ko e leʻo ʻo Rutherford naʻe māʻalaʻala tahá. . . . Naʻe ongo lelei ʻa e foʻi silapa kotoa.” Naʻa mo ha tokotaha fanongo ʻi Monticello, Fololita, naʻe malava ke ne fanongo ki ai! Ko e fale fakamafola lea foʻoú naʻe hoko moʻoni ʻo lavameʻa lahi, pea naʻe lahi ʻa e ngaahi tohi ʻo e houngaʻia naʻe ʻoatu.

 Naʻe hokohoko atu ʻa e falé ni ke fakamafola ʻa e pōpoaki ʻo e Puleʻangá ʻi he taʻu ʻe 33, b ʻo tautefito ki he tokelau-hahake ʻo ʻAmeliká. Ka ʻi he taimi ʻe niʻihi naʻe toe fakahoko ʻa e polokalama ʻa e WBBR ʻi he ngaahi fale fakamafola lea kehe, ʻo aʻu ai ki he kau fanongo ʻe laui miliona ʻi ʻAmelika, Kānata pea fakalaka atu ai. Ko hono moʻoní, ʻi he 1975 Yearbook of Jehovah’s Witnesses naʻe līpooti ai: “ʻI he 1933, naʻe aʻu ai ki he tumutumu ʻo hono ngāueʻaki ʻa e ngaahi fale fakamafola lea ʻe 408 ke ʻave ʻa e pōpoakí ki he konitinēniti ʻe ono, pea ko e malanga Fakatohitapu kehekehe ʻe 23,783 naʻe fakamafolá . . . ʻI he ngaahi ʻaho ko iá, ko ha taha ʻe lava ke ne liliu pē ʻa e letioó ʻo maʻu ʻa e ngaahi polokalama ʻa e Watch Tower ʻi he ngaahi fakamafola lea kehekehe ʻi he taimi tatau. Naʻe faʻa fonu ʻa e ngaahi peau ongó ʻi he ngaahi lea ʻo e moʻoni naʻe fakalāngilangiʻi ai ʻa e ʻOtuá.”

 ʻI he kamata ngāueʻaki ʻe he Kau Ako Tohi Tapú ʻa e WBBR, naʻe fakaʻavalisi ʻa e kau malanga ʻo e Puleʻangá ki he toko 1,064 ʻi ʻAmelika. Ko e kiʻi kulupu tokosiʻi ko ení naʻa nau maʻu ʻa e tokoni lahi mei he ngaahi polokalama fakamafola leá. Kae kehe, ʻi he 1957, ko e ʻavalisi ʻo e kau fanongonongo ʻo e Puleʻangá ʻi ʻAmeliká naʻe toko 187,762 pea ko e toko 653,273 ʻi māmani lahi. ʻIkai ko ia pē, mālō mo e ako naʻe tokonaki ʻi he ngaahi fakataha ʻa e fakatahaʻangá, ko e fanga tokoua mo e fanga tuofāfine faivelenga ko iá naʻe hoko ʻo toe ola lelei ange ʻenau ngāue fale ki he falé pea mo e ngaahi tafaʻaki kehe ʻo e ngāue fakafaifekaú.

 Ko e ngaahi liliu lelei ko iá naʻá ne ueʻi ʻa e fanga tokoua fua fatongiá ke toe sivisiviʻi ʻa e ngaahi ʻaonga ʻo e ngaahi polokalama letioó ʻo fakahoa ki he ʻaʻahi ki he ngaahi ʻapi tāutahá. Ko e hā ʻa e olá? Naʻe fai ʻa e fili ke fakatau atu ʻa e WBBR, ʻa e fale fakamafola lea pē ʻe taha naʻe kei maʻu mo fakalele ʻe he Sōsaieti Taua Leʻo. Naʻe fakatau atu ʻa e fale fakamafola leá ʻi ʻEpeleli 15, 1957. ʻI he ʻaho ki muʻa aí, lolotonga ha polokalama fakamafola lea makehe fakaʻosi, naʻe ʻeke kia Nathan H. Knorr ʻa e ʻuhinga naʻe fakatau atu ai ʻa e letioó. Naʻá ne fakamatala ko e tupulaki ʻi he tokolahi ʻo e Kau Fakamoʻoni ʻa Sihová ko e ola ia tautefito ʻo e ngāue fakafaifekau fale ki he falé. “Ko e tokolahi kuo nau maʻu ʻa e tokoni lahi mei he ngaahi polokalama fakamafola lea ʻa e WBBR,” ko ʻene leá ia, peá ne toe pehē: “Ka ko e tupulaki ko eni ʻi he feituʻu ʻoku fakamafola ki ai ʻa e WBBR ʻoku meimei tatau pē ia mo e tupu fakalūkufua ʻi māmani lahí.” Naʻe fakamulituku ai ʻa e fanga tokouá ʻe lava ke maʻu ʻa e ngaahi ola lelei ange mei he ngāue fale ki he falé ʻi he letioó. Kae kehe, naʻe ʻikai ko e ngataʻanga ia ʻo e fakamafola leá. ʻI he ngaahi laui hongofuluʻi taʻu ki mui ai naʻe toe ʻasi hake, ka ʻi ha founga foʻou.

 ʻI ʻOkatopa 6, 2014, naʻe ʻi ai ha fakalakalaka fakafiefia ʻi he kautaha ʻa Sihová​—ko hono fokotuʻu ʻo e televīsone ʻi he ʻInitanetí ʻoku ui ko e JW Broadcasting. Ko e Kau Fakamoʻoni ʻa Sihová mo e niʻihi kehé ʻoku nau sio ki he ngaahi polokalama fakamāhiná ʻi ha Web browser, JW Library, puha satelaite pe ngāueʻaki ha ngaahi meʻangāue ke sio hangatonu ki ai. c Ka ʻi he ngaahi feituʻu ʻe niʻihi ʻi he māmaní, ko e kakai ʻa Sihová ʻoku nau kei ngāueleleiʻaki pē ʻa e letioó mo e televīsoné. Anga-fēfē?

 ʻI he ngaahi taʻu ki mui ní, kuo ngāueʻaki ʻe he kautaha ʻa Sihová ʻa e letiō mo e televīsone ʻa e ngaahi kautaha kehe ke fakamafola ai ʻa e ngaahi fakataha fakauiké pehē foki ki he ngaahi fakataha-lahí ʻi he ngaahi feituʻu ʻoku ʻikai ke maʻu lelei ai ʻa e ʻInitanetí. Ko e ngaahi polokalama ko ení kuo toe fakaaʻu atu ia ki he tokolahi ʻo e faʻahinga ʻikai Fakamoʻoni, ʻo kau ai ʻa e kakai mahuʻingaʻia tokolahi. Ko e fakatātaá, ʻi he 2021 ki he 2022, ko e kau pule ʻi he ngaahi kautaha letioó naʻa nau tala ange ki he ʻōfisi vaʻa ʻo e Kau Fakamoʻoni ʻa Sihova ʻi ʻAfilika Hahaké, naʻe tokolahi ʻa e faʻahinga ʻikai Fakamoʻoni naʻa nau fakahaaʻi ʻenau houngaʻia ʻi heʻetau ngaahi fakatahá. Ko e kau fanongo ʻe niʻihi ʻi Keniā, Sutani Tonga mo Tenisania naʻe aʻu ʻo nau kole ki ha ako Tohi Tapu fakafoʻituitui.

 Neongo ia, ʻoku ngāueʻaki tautefito ʻe he Kau Fakamoʻoni ʻa Sihová ʻa e ngāue fale ki he falé, ngaahi papa faifakamoʻoní mo e uepisaiti jw.org ke fakamafola atu ʻa e pōpoaki ʻo e Puleʻangá ʻi he kotoa ʻo e māmaní. Ko ʻetau uepisaití ʻokú ne ʻoange ki he faʻahinga mahuʻingaʻiá ʻa e founga faingofua ke nau maʻu ai ʻa e Tohi Tapú pehē foki ki he ʻū tohi makatuʻunga Fakatohitapú ʻi he lea laka hake ʻi he 1,080​—ʻo taʻetotongi kātoa. ʻE lava foki ke nau maʻu ʻa e ngaahi tali ki he ngaahi fehuʻi Fakatohitapú pea kumi ki he feituʻu ʻoku fakahoko ai ʻa e ngaahi fakataha faka-Kalisitiané. Ko e ola ʻo e ngaahi feinga mo e ngaahi polokalama ko ení, kuo ʻai ai ʻe he Kau Fakamoʻoni ʻa Sihová ʻa e ongoongo lelei ʻo e Puleʻanga ʻo e ʻOtuá ke ala maʻu lahi ange ʻi ha toe taimi ʻi he hisitōlia ʻo e faʻahinga ʻo e tangatá! Ko e moʻoni, kuo fanongonongo ia “ʻi he kotoa ʻo e māmani kuo nofoʻí,” ʻo hangē tofu pē ko hono tomuʻa tala ʻi he Tohi Tapú.​—Mātiu 24:14.