ʻI he māhina taki taha, ʻoku tau hanga vēkeveke atu ki he ngaahi polokalama mo e vitiō fakalaumālie ʻoku tuku ange mai ʻi he JW Broadcasting. Neongo ia, ko e tokolahi hotau fanga tokoua ʻi ʻAfiliká ʻoku ʻikai ke nau lava ʻo sio ʻi he ngaahi polokalama ko ení ʻi he ʻInitanetí. Ko e hā hono ʻuhingá?

 Ko e ngaahi feituʻu lahi ʻi ʻAfilika ʻoku fakangatangata hono maʻu ʻa e ʻinitanetí. Pea ʻi he feituʻu ʻoku ala maʻu aí, ʻoku faʻa tuai pe mamafa ʻaupito. Ko e fakatātaá, ko ha ʻovasia sēketi ʻi Matakesikā naʻá ne hiki ha polokalama fakamāhina ʻo e JW Broadcasting ʻi ha fale ʻInitaneti. Naʻe fiemaʻu ke ne totongi ʻa e paʻanga ʻe $16, ʻa ia ʻoku lahi ange ʻi he paʻanga ʻoku maʻu ʻe he kakai ʻe niʻihi ʻi ha uike! a

 Neongo ʻa e ngaahi faingataʻa ko ení, ko e laui miliona ʻi ʻAfilika ʻoku lava ke nau maʻu he taimí ni ʻa e JW Broadcasting ʻo ʻikai ngāueʻaki ʻa e ʻInitanetí. Anga-fēfē?

 Talu mei he 2017, ko e JW Broadcasting kuo ala maʻu ia ʻe he faʻahinga ʻoku nau nofo ʻi he faka-Tonga ʻo Sahala ʻi Afiliká fakafou ʻi ha sēnolo TV satelaite. Ko e sēnolo ko ení ʻoku fakamafola taʻetotongi, houa ʻe 24 he ʻaho, ʻaho ʻe 7 he uike, ʻi he lea ʻe 16.

 Ke maʻu ení, naʻe fai ʻe he Kau Fakamoʻoni ʻa Sihová ha alea pau mo ha kautaha TV ke fakamafola ia fakafou ʻi ha satelaite. Ko e satelaite ʻoku ngāueʻakí ʻokú ne kāpui ʻa e fonua ʻe 35 ʻi he faka-Tonga ʻo Sahala ʻi Afiliká. Ko e alea paú ko e paʻanga ʻe $12,000 tupu ʻi he māhina. ʻI he taimi ʻe niʻihi, ʻoku pau ke totongi ha paʻanga lahi ange ke fakamafola fakahangatonu ha ngaahi meʻa ʻoku hoko ʻi ha sēnolo kehe. ʻOku lava heni ke maʻu ʻe he laui afe ʻa e ngaahi fakataha-lahí pe ngaahi polokalama makehe ʻoku fekauʻaki mo e ʻaʻahi mei he vaʻá.

 Ko e kakai tokolahi, kau ai ʻa e faʻahinga ʻoku ʻikai ko e Kau Fakamoʻoni, ʻoku nau sio ʻi he sēnolo satelaite JW ʻi ha TV ʻi ʻapi. Kae kehe, ko e tokolahi hotau fanga tokouá ʻoku ʻikai ke nau lava ʻo fakatau ʻa e meʻangāue ʻoku fiemaʻu ke sio ai ʻi he sēnolo satelaité. Ke tokoniʻi kinautolu, ko e ngaahi Fale Fakatahaʻanga laka hake ʻi he 3,670 kuo fakanaunau ʻaki kinautolu ha ngaahi naunau satelaite koeʻuhi ke lava ʻa e fanga tokouá ʻo sio ai ki he JW Broadcasting. Ko e totongi ʻo e meʻangāué, fakataha mo hono ʻomaí, ʻoku paʻanga nai ʻe $70 kapau kuo ʻosi ʻi ai pē ha TV pe mīsini hulu faiva ʻi he Fale Fakatahaʻangá. Ka ʻikai, ko e naunaú fakakātoa ʻe lava ke aʻu ʻo paʻanga ʻe $530.

 Ko hotau fanga tokouá mo e fanga tuofāfiné ʻoku nau houngaʻia lahi ʻi he sēnoló. Ko ha mātuʻa ʻi Kameluni ʻokú ne pehē: “ʻOku hangē ia ha mana ʻi he loto toafá ki homau fāmilí.” Ko Odebode, ko ha tokoua ʻi Naisīlia, ʻokú ne pehē: “ʻOku mau sio ʻi he sēnoló ko ha foʻi fāmili ʻo tuʻo tolu he uike. ʻOku fakatuʻotuʻa maʻu pē ʻeku fānaú ki ai. ʻOku aʻu ʻo nau kole mai ke mau sio ʻi he sēnolo JW ʻi he ngaahi taimi kehé.” Ko Rose, ʻoku ʻi Naisīlia pē mo ia, ʻokú ne pehē: “ʻOku ou fiefia ke pehē ʻoku ʻikai ke toe maʻunimā au he sio he sēnolo ongoongó koeʻuhi ko e ʻi ai ʻa e sēnolo satelaite JW. ʻI he taimi ʻoku ou sio ai he ongoongó, ʻoku ou faʻa ʻiteʻita pea faʻa lele hoku totó. Ka ko e JW Broadcasting ʻoku fakatupu langa hake ʻaupito ia mo fakanonga! Ko ʻeku sēnolo manakó ia. Ko ha tāpuaki lahi ia meia Sihova.”

 Ko ha ʻovasia sēketi ʻi Mosemipiiki ʻokú ne pehē ko e ngaahi Fale Fakatahaʻanga ko ia ʻi heʻene sēketí, kuo fakanaunau ʻaki ha ngaahi naunau ke maʻu ai ʻa e sēnolo satelaité. Ko e fanga tokoua ʻi he ngaahi fakatahaʻanga ko ení ʻoku nau aʻu mai ʻi he houa ʻe taha pe lahi ange ki muʻa he fakatahá ke sio ʻi he JW Broadcasting fakafou ʻi he satelaité.

 Naʻe ngāueʻaki ʻa e sēnoló ke ne fakamafola ʻa e ngaahi malanga tefito ʻi he fakataha-lahi fakavahaʻapuleʻanga 2019 ʻi Johannesburg, ʻAfilika Tongá, ki he ngaahi feituʻu kehe ʻe hiva, kau ai ʻa e ngaahi malanga naʻe fai ʻe ha mēmipa ʻo e Kulupu Pulé. Ko Sphumelele, mei he Potungāue Broadcasting ʻi he vaʻa ʻi ʻAfilika Tongá, ʻokú ne pehē: “Ki muʻá, naʻe fiemaʻu ke mau fakamafola ʻa e ngaahi malangá fakafou ʻi he ʻInitanetí. Ka ʻoku fiemaʻu heni ke sai ʻa e ʻInitanetí pea ʻi ai mo ha paʻanga lahi ke totongiʻaki. Ko e sēnolo satelaite JW naʻe maʻamaʻa ange ia pea falalaʻanga lahi ange.”

 Mālō ki hoʻomou tokoni nima-homo ki he ngāue fakamāmani lahí, ko e tokolahi hotau fanga tokoua mo e fanga tuofāfine ʻi ʻAfiliká ʻoku lava ke nau sio ʻi he JW Broadcasting fakafou ʻi he satelaité. ʻOku mau houngaʻia lahi ʻi he tokoni ʻoku mou fai fakafou ʻi he ngaahi founga kehekehe ʻoku maʻu ʻi he donate.jw.org.