Naʻe tala ange ʻe Sīsū ki heʻene kau ākongá: “Te mou hoko ko e kau fakamoʻoni kiate au . . . ki he feituʻu taupotu taha ʻo e māmaní.” (Ngāue 1:8) ʻI he ʻahó ni, ko e Kau Fakamoʻoni ʻa Sihová ʻoku nau fakahoko faivelenga ʻa e fekau ko iá. Kae kehe, ko e ngaahi feituʻu ʻe niʻihi ʻi he māmaní, kau ai ʻa e ngaahi feituʻu mātuʻaki fuʻu tokolahí, kuo teʻeki ke nau maʻu ha fakamoʻoni fakaʻāuliliki. Pea ko e ngaahi fonua ʻe niʻihi ʻoku tokosiʻi ʻaupito ai ʻa e Kau Fakamoʻoní. (Mātiu 9:37, 38) Ko e hā ʻoku tau fai ke aʻu ai ki he kakai tokolahi taha ʻoku ala lavá?

 Ke tokoni ki hono fakahoko ʻa e fekau ʻa Sīsuú, ʻoku vaheʻi ʻe he Kōmiti Ngāue ʻo e Kulupu Pule ʻo e Kau Fakamoʻoni ʻa Sihová ʻa e kau misinale ki he malaʻe malangá ki he ngaahi feituʻu ʻoku fiemaʻu aí takatakai he māmaní. ʻI he taimí ni, ʻoku ʻi ai ʻa e kau misinale ʻi he malaʻe malangá ʻe toko 3,090. a Ko e tokolahi tahá kuo nau maʻu ʻa e ako ʻi ha akoʻanga Fakatohitapu, hangē ko e Ako Maʻá e Kau ʻEvangeliō ʻo e Puleʻangá. ʻOku loto-lelei ʻa e kau misinalé ke mavahe mei honau ngaahi ʻapí pea hiki ki ha fonua muli. Mālō mo e matuʻotuʻa, ako mo e taukei ʻa e kau misinale faitōnunga ko ení, ʻoku nau tokoni ai ki hono fakamafola ʻa e ongoongo leleí pea fokotuʻu ha faʻifaʻitakiʻanga lelei ki he kau ākonga foʻoú.

 ʻI he ʻōfisi vaʻa taki taha, ko e Potungāue Tokangaekina Kau Ngāue Taimi-Kakató ʻoku nau ngāue fakataha mo e Kōmiti Vaʻá ke tokangaʻi ʻa e fiemaʻu ʻa e kau misinalé, hangē ko ha fale feʻunga, ko ʻenau ngaahi meʻa fakafaitoʻó pea mo ha kiʻi paʻanga ke tokoni ki heʻenau nofó. Lolotonga ʻa e taʻu fakangāue 2020, kuo fakamoleki ʻe he Kau Fakamoʻoni ʻa Sihová ʻa e tola ʻAmelika ofi he $27 milioná ki hono tokangaʻi ʻa e kau misinalé. Mālō mo e ngaahi tokonaki ko ení, ʻoku lava ai ke tuku taha ʻe he kau misinalé ʻenau tokanga kakató mo e iví ki he ngāue fakafaifekaú, pehē foki ki hono fakaivimālohiʻi ʻenau fakatahaʻanga fakalotofonuá.

 Kuo anga-fēfē tokoni ʻa e kau misinalé ki he ngāue fakamalangá? Ko Frank Madsen, ʻoku ngāue ʻi he Kōmiti Vaʻa Malauī, ʻokú ne pehē: “Koeʻuhi ko e loto-toʻa mo e pōtoʻi ʻa e kau misinalé, kuo nau tokoniʻi ai ʻa e ngaahi fakatahaʻangá ke nau kamata ngāueʻi ʻa e ngaahi feituʻu ngāue faingataʻá, hangē ko e ngaahi feituʻu ʻaaʻi malú mo e ngaahi feituʻu lea mulí. Pehē foki, ko ʻenau ngāue mālohi ʻi hono ako ʻa e lea fakalotofonuá mo e anga fakafonuá ʻoku nau fokotuʻu ai ha faʻifaʻitakiʻanga fakaueʻiloto ki he niʻihi kehé, pea ʻoku nau tākiekina lelei ʻa e toʻutupú ki he ngāue taimi-kakató. ʻOku tau fakamālō kia Sihova koeʻuhi ko e kau misinale ki he malaʻe malangá.”

 Ko ha mēmipa ʻo ha Kōmiti Vaʻa mei ha fonua ʻe taha ʻokú ne pehē: “Ko e kau misinalé ʻoku nau fakamoʻoniʻi ko e kakai ʻa Sihová ʻoku nau fāʻūtaha ʻi māmani lahi. Naʻa mo e niʻihi ʻikai Fakamoʻoní ʻoku lava ke nau sio māʻalaʻala ʻoku ʻikai ke tau māvahevahe ʻi he anga fakafonuá, ka ko e ngaahi akonaki Fakatohitapú kuó ne tokoniʻi kitautolu ke tau hoko ko ha fetokouaʻaki fāʻūtaha.”

 ʻOku anga-fēfē tokoni ʻa e kau misinalé ki he kau malanga fakalotofonuá? Ko Paulo, mei Tīmoa-Lesitā, ʻokú ne houngaʻia ʻi he kau misinale naʻe vaheʻi ange ki heʻene fakatahaʻangá. ʻOkú ne pehē: “Ko homau feituʻú ʻoku fuʻu vela ʻaupito. Ka neongo ko e haʻu ʻa e kau misinalé mei ha feituʻu momoko, ʻoku ʻikai ʻaupito ke nau tuku ʻa e ʻeá ke ne taʻofi kinautolu mei he malangá. ʻOku nau ʻi he fakataha malanga pongipongí maʻu pē. ʻOku ou faʻa sio ki heʻenau fai ʻa e ngaahi toe ʻaʻahí ʻi he hoʻatā mālié, ʻi he taimi vela tahá, pea pehē ki he efiafí. Kuo nau tokoniʻi ʻa e kakai tokolahi ke ako ʻa e moʻoní, kau ai au. ʻI he faivelenga mo e vēkeveke, ʻoku nau ngāueʻaki ʻenau moʻuí kotoa ke ngāue kia Sihova, pea ʻoku ueʻi heni ʻa e fakatahaʻangá kotoa ke ngāue kakato ange kiate ia.”

 Ko Ketti, ko ha tāimuʻa tuʻumaʻu ʻi Malauī, ʻokú ne lave ki he anga hono tokoniʻi ia mo hono fāmilí ʻe ha ongo meʻa misinale: “ʻI he taimi naʻe vaheʻi mai ai ha ongo meʻa misinale ki heʻemau fakatahaʻangá, ko au pē ʻa e Fakamoʻoni ʻi hoku fāmilí. Ka naʻá ku maʻu ʻa e poupou lelei mei he ongo meʻá, pea naʻá na vāofi ʻaupito mo homau fāmilí. Ko ʻena faʻifaʻitakiʻanga leleí naʻe tokoniʻi ai ʻeku fānaú ke nau sio ko e tauhi kia Sihová ʻoku iku ki ha moʻui fiefia mo fakafiemālie. Mālō mo e tākiekina fakaueʻiloto ʻa e ongo misinalé, ʻoku hoko ai hoku ʻofefine ʻe toko tolu ko e kau tāimuʻa tuʻumaʻu pea ko hoku husepānití kuó ne kamata maʻu ʻa e ngaahi fakatahá.”

 ʻOku anga-fēfē hono feau ʻa e fakamole ki hono tokangaʻi ʻa e kau misinale ki he malaʻe malangá? Fakafou ʻi he ngaahi tokoni ki he ngāue ʻi māmani lahí, ko e lahi ʻoku fai fakafou ʻi he ngaahi founga ʻoku maʻu ʻi he donate.jw.org. Ko e ngaahi tokoni nima-homo ko ení ʻoku fakahoungaʻi lahi.