SIO kia Sīsū ki he‘ene kuku mai ‘a e ki‘i tamasi‘í. ‘Oku lava ke ke ‘ilo ‘oku tokanga mo‘oni ‘a Sīsū ki he fānau iikí. Ko e kau tangata ‘oku nau mamata ki aí ko ‘ene kau ‘apositoló. Ko e hā ‘oku tala ange ‘e Sīsū kiate kinautolú? Tau vakai ange.

Na‘e toki a‘u mai ‘a Sīsū mo ‘ene kau ‘apositoló mei ha‘anau fononga mama‘o. ‘I he halá na‘e fekīhiaki ai ‘a e kau ‘apositoló ‘iate kinautolu pē. Ko ia ‘i he ‘osi ‘a e fonongá na‘e ‘eke ange ‘e Sīsū: ‘⁠Ko e hā na‘a mou fekīhiaki ki ai ‘i he halá?’ Ko hono mo‘oní, na‘e ‘ilo pē ‘e Sīsū ia ‘a e me‘a na‘e fai ki ai ‘a e fekīhiakí. Ka ko ‘ene ‘eke pē ‘a e fehu‘í ke ‘ilo pē ‘e tala ange ‘e he kau ‘apositoló kiate ia.

Na‘e ‘ikai ke tali ange ia ‘e he kau ‘apositoló, koe‘uhi he ko ‘enau fekīhiaki ‘i he halá ‘o fekau‘aki pe ko hai ‘iate kinautolu ‘oku lahi tahá. Na‘e loto ‘a e kau ‘apositolo ‘e ni‘ihi ke nau mahu‘inga ange ‘i he ni‘ihi ko ē. Na‘e anga-fēfē ‘a hano tala ‘e Sīsū kiate kinautolu ‘oku ‘ikai ke totonu ke fie hoko ko e lahi taha?

Na‘á ne ui ha ki‘i tamasi‘i ‘o ne fokotu‘u ia ‘i mu‘a ‘iate kinautolu hono kotoa. Peá ne pehē ki he‘ene kau ākongá: ‘ ‘Oku ou fiema‘u ke mou ‘ilo lelei ‘a e me‘a ko ‘ení, ‘E ‘ikai ‘aupito te mou hū ki he pule‘anga ‘o e ‘Otuá kae‘oua ke mou liliu ‘o hoko ‘o hangē ko e fānau iiki. Ko e tokotaha lahi taha ‘i he pule‘angá ko e tokotaha ‘oku hoko ‘o hangē ko e ki‘i tamasi‘i ko ‘ení.’ ‘Okú ke ‘ilo ‘a e ‘uhinga na‘e lea pehē ai ‘a Sīsuú?

Koe‘uhi ‘oku ‘ikai ke tokanga ‘a e fānau iikí ki he hoko ko ha tokotaha lahi ange pe mahu‘inga ange ‘i he ni‘ihi kehé. Ko ia na‘e totonu ke ako ‘a e kau ‘apositoló ke nau hangē ko e fānaú ‘i he founga ko ‘ení pea ‘oua te nau kē ‘o kau ki he hoko ‘o lahi pe mahu‘inga.

Na‘e toe ‘i ai foki mo e ngaahi taimi kehe na‘e fakahā ai ‘e Sīsū ‘a e lahi ‘o ‘ene tokanga ki he fānau iikí. ‘I ha ngaahi māhina si‘i ki mui mai na‘e ‘omai ‘e ha kakai ‘e ni‘ihi ‘enau fānaú ke sio kia Sīsū. Na‘e feinga ‘a e kau ‘apositoló ke ta‘ofi kinautolu. Ka na‘e fakahā ‘e Sīsū ki he‘ene kau ‘apositoló: ‘⁠Tuku ‘a e fānaú ke ha‘u kiate au, pea ‘oua te mou ta‘ofi kinautolu, koe‘uhi he ko e pule‘anga ‘o e ‘Otuá ‘oku ‘o e fa‘ahinga pehē.’ Pea na‘e fua leva ‘e Sīsū ‘a e fānaú, mo tāpuaki‘i kinautolu. ‘Ikai ‘oku lelei ke ‘ilo ‘oku ‘ofa‘i ‘e Sīsū ‘a e fānau iikí?