‘I HE fononga atu ‘a Sīsū ‘i he fonuá, na‘á ne fakamo‘ui ‘a e kau mahaki. Na‘e tala ‘a e ongoongo ‘o e ngaahi mana ko ‘ení ‘i he ngaahi kolo kotoa takatakaí. Ko ia na‘e ‘omai ‘e he kakaí kiate ia ‘a kinautolu ‘oku heke mo kui mo tuli, mo e tokolahi kehe ‘a ia ‘oku nau puke. Pea na‘e fakamo‘ui kotoa pē kinautolu ‘e Sīsū.

Na‘e laka atu ‘eni ‘i he ta‘u ‘e tolu talu mei hono papitaiso ‘e Sione ‘a Sīsuú. Pea na‘e tala ‘e Sīsū ki he‘ene kau ‘apositoló ‘e vavé ni ‘a ‘ene ‘alu ki Selusalema, ‘a ia ‘e tāmate‘i ai ia, pea te ne toki toetu‘u mei he maté. Kaekehe ki mu‘a ai, na‘e hokohoko atu pē ‘a e fakamo‘ui ‘e Sīsū ‘a e kau mahakí.

‘I he ‘aho ‘e taha na‘e faiako ‘a Sīsū ‘i he ‘aho Sāpate. Ko e Sāpaté ko e ‘aho mālōlō ia ki he kau Siú. Na‘e fu‘u puke lahi ‘aupito ‘a e fefine ‘okú ke sio ki ai ‘i hení. Na‘e piko hono tu‘á ‘o fe‘unga mo e ta‘u ‘e 18 mo e ‘ikai ke lava ke ne tu‘u hangatonu. Ko ia na‘e ala atu ‘a Sīsū kiate ia, pea kamata leva ke tu‘u hangatonu hake. Na‘e fakamo‘ui ia!

Na‘e ‘ai ‘e he me‘á ni ke ‘ita lahi ‘a e kau taki lotú. Na‘e kaila atu ha taha ‘o kinautolu ki he fu‘u kakaí ‘o pehē: ‘⁠Ko e ‘aho ‘e ono ‘oku totonu ke tau ngāue ai. Ko e ngaahi ‘aho ia ke omi ai ‘o faito‘o, kae ‘ikai ‘i he Sāpaté!’

Ka na‘e tali ange ‘e Sīsū: ‘⁠Ko e kau tangata kovi kimoutolu. Ko ha taha pē ‘iate kimoutolu te ne vete ‘ene ‘así ‘o ‘ave ke fakainu ‘i he Sāpaté. Ko ia, ‘oku ‘ikai ke totonu nai ki he si‘i fefiné ni, ‘a ia kuó ne si‘i puke ‘o fe‘unga mo e ta‘u ‘e 18, ke fakamo‘ui ‘i he Sāpaté?’ Na‘e hoko ‘a e tali ‘a Sīsuú ke mā ai ‘a e kau tangata koví ni.

Ki mui mai ai, na‘e fononga atu ‘a Sīsū mo ‘ene kau ‘apositoló ki Selusalema. Pea ‘i he‘enau ‘i he tu‘akolo ‘o Sielikoó, na‘e fanongo ha ongo kui mo‘ui kolekole ‘oku ha‘u ‘a Sīsū. Ko ia na‘á na kaila: ‘⁠Sīsū, tokoni kiate kimaua!’

Na‘e ui leva ‘e Sīsū ‘a e ongo tangata kuí, ‘o ‘eke: ‘⁠Ko e hā ‘okú mo fiema‘u ke u fai kiate kimouá?’ Na‘á na pehē: ‘ ‘Eiki, faka‘ā homa matá.’ Na‘e ala atu ‘a Sīsū ki hona matá, pea na‘e lava leva ke na sio! ‘Okú ke ‘ilo ‘a e ‘uhinga na‘e fai ai ‘e Sīsū ‘a e ngaahi mana fakaofo kotoa ko ‘ení? Koe‘uhi he ‘okú ne ‘ofa ki he kakaí pea ‘okú ne loto ke nau tui kiate ia. Ko ia ‘oku lava ke tau ‘ilo pau ai, ‘i he taimi te ne pule mai ai ko e Tu‘í ‘e ‘ikai ke toe ‘i ai ha tokotaha ia ‘i he māmaní ‘e puke.