‘I HE foki ‘a Mōsese ki ‘Isipité, na‘á ne fakahā ki hono tokoua ko ‘Ēloné ‘o fekau‘aki mo e ngaahi maná. Pea ‘i hono fakahāhā ‘e Mōsese mo ‘Ēlone ki he kau ‘Isilelí ‘a e ngaahi mana ko ‘ení, na‘e tui ‘a e kakaí kotoa na‘e ‘iate kinaua ‘a Sihova.

Pea na‘e toki ‘alu leva ‘a Mōsese mo ‘Ēlone kia Felo. Na‘á na tala kiate ia: ‘ ‘Oku pehē ‘e Sihova ko e ‘Otua ‘o ‘Isileli, “Tuku ange ‘eku kakaí ke nau ‘alu ‘i he ‘aho ‘e tolu, koe‘uhi ke nau ‘alu ‘o lotu mai kiate au ‘i he toafá.” ’ Ka ne tali ‘e Felo: ‘ ‘Oku ‘ikai te u tui au kia Sihova. Pea he‘ikai te u tuku ange ‘a e kau ‘Isilelí ke nau ‘alu.’

Na‘e ‘ita lahi ‘a Felo, koe‘uhi ko e fiema‘u ‘e he kakaí ha taimi mālōlō mei he ngāué ke lotu ai kia Sihova. Ko ia na‘á ne toe fakamālohi‘i ‘a e kakaí ke nau ngāue lahi ange. Na‘e tukuaki‘i ‘e he kau ‘Isilelí ‘a Mōsese ‘i hono ngaohikovi‘i kinautolú, pea na‘e loto-mamahi ai ‘a Mōsese. Ka na‘e tala ange ‘e Sihova kiate ia ke ‘oua ‘e hoha‘a. Na‘e pehē ‘e Sihova: ‘⁠Te u ‘ai ‘a Felo ke ne tuku ange ‘eku kakaí ke nau ‘alu.’

Na‘e toe ‘alu ‘a Mōsese mo ‘Ēlone kia Felo. Na‘á na fai ‘i he taimi ko ‘ení ha mana. Na‘e lī ki lalo ‘e ‘Ēlone hono tokotokó, pea na‘e hoko ia ko e fu‘u ngata lahi. Ka na‘e toe lī ki lalo ‘e he kau tangata poto ‘a Feló ha ngaahi tokotoko, pea hoko ia ko ha fanga ngata. Kae vakai ange! Ko e ngata ko ia ‘a ‘Ēloné ‘okú ne folo ‘a e fanga ngata ‘a e kau tangata potó. Ka na‘e ‘ikai pē ke tuku ange ‘e Felo ia ‘a e kau ‘Isilelí ke nau ‘alu.

Ko ia na‘e a‘u ki ha taimi ke ako‘i ai ‘e Sihova ha me‘a kia Felo. ‘Okú ke ‘ilo pe na‘e anga-fēfē ‘ene fai ‘a e me‘a ko ‘ení? Na‘e fakahoko ‘eni ‘i hano ‘omai ‘a e mala, pe ko e ngaahi fakatu‘utāmaki lahi ‘e 10 ki ‘Isipite.

‘I he hili ‘a e ni‘ihi ‘o e ngaahi malá, na‘e fekau ‘e Felo ke ‘omai ‘a Mōsese peá ne pehē ki ai: ‘⁠Ta‘ofi ‘a e malá pea te u tuku ange leva ‘a e kau ‘Isilelí ke nau ‘alu.’ Ka ‘i he ta‘ofi ‘a e ngaahi malá, kuo liliu ‘a e fakakaukau ia ‘a Feló. Pea na‘e ‘ikai te ne tuku ange ‘a e kakaí ke nau ‘alu. Ka ne faifai atu pē, ‘i he ‘osi ‘a e mala hono 10, na‘e tuku ange leva ‘e Felo ‘a e kau ‘Isilelí ke nau ‘alu.

‘Okú ke ‘ilo ‘a e ngaahi mala kotoa ko ia ‘e 10? Huke‘i ‘a e peesí pea te tau ako ‘o fekau‘aki mo ia.